စီးပွားရေးဆိုင်ရာ တန်းတူညီမျှမှုဟူသည် စီးပွားရေး၌ အထူးသဖြင့် အခွန်ကောက်ခံခြင်းနှင့်ပတ်သက်၍ လူမှုဖူလုံရေးနှင့်ပတ်သက်၍ ညီမျှမှုရှိရေးဆိုင်ရာ သဘောတရား သို့မဟုတ် စိတ်ကူးဖြစ်သည်။ ပို၍တိကျစွာ ပြောရလျှင် မည်သူမည်ဝါဖြစ်သည်နှင့် မဆိုင်ဘဲ ညီမျှသော ဘဝအခွင့်အလမ်းများရရှိစေခြင်း၊ နိုင်ငံသားအားလုံးကို အခြေခံအရ အနိမ့်ဆုံးအဆင့် ညီမျှမှုအရ ဝင်ငွေ၊ ကုန်ပစ္စည်းနှင့် ဝန်ဆောင်မှုများ ရရှိစေခြင်းနှင့် ညီမျှစွာ ပြန်လည်ဖြန့်ဝေပေးရန်အတွက် ရန်ပုံငွေများ မြင့်မားအောင်ပြုလုပ်ခြင်းနှင့် ဆောင်ရွက်ပေးခြင်းတို့ကို ရည်ညွှန်းသည်။
အခွန်ကိစ္စ-ပြည်သူ့ဘဏ္ဍာငွေတွင် အလျားလိုက် ညီမျှမှုဟူသည် အခွန်ထမ်းဆောင်ရန် တူညီသောစွမ်းဆောင်ရည်ရှိသူများအနေဖြင့် တူညီသော သို့မဟုတ် အလားတူသော ပမာဏပေးဆောင်သင့်သည်ဟူသော သဘောတရားဖြစ်သည်။ ယင်းသည် အခွန်ဆိုင်ရာ ဘက်မလိုက်ရေးသဘောတရား သို့မဟုတ် အခွန်စနစ်သည် တူညီသောအရာများ (ဝါ) လူများအကြား ခွဲခြားမှုမရှိသင့်ဟူသည့် သဘောတရားတို့နှင့် ပတ်သက်နေသည်။ ဒေါင်လိုက် ညီမျှမှုဟူသည် အခွန်ထမ်းဆောင်ရန် ပို၍ စွမ်းဆောင်ရည်ရှိသူများအနေဖြင့် အခွန် ပို၍ထမ်းဆောင်သင့်သည်ဟူသည့် သဘောတရားကို ရည်ညွှန်းသည်။ ချမ်းသာသူများအနေဖြင့် ၎င်းတို့၏ ဝင်ငွေအချိုးအစားအရ အခွန်ပို၍ထမ်းဆောင်ရပါက ယင်းကို အချိုးကျအခွန်ဟု ခေါ်ဆိုနိုင်သည်။ ၎င်းတို့အနေဖြင့် အချိုးအစားတိုးမြှင့်၍ ထမ်းဆောင်ရပါက ယင်းကို တိုးမြှင့်အခွန်ဟုခေါ်သည်။ ယင်းတို့သည် ချမ်းသာကြွယ်ဝမှုအား ပြန်လည် ဖြန့်ဝေပေးရေး သဘောတရားနှင့် ပတ်သက်နေသည်။
ကျန်းမာရေးစောင့်ရှောက်မှုကိစ္စ-ယင်း၌ အလျားလိုက်ညီမျှမှုဟူသည် (တူညီသော လိုအပ်မှုရှိခြင်းကဲ့သို့သော) သက်ဆိုင်ရာ ရှုထောင့်တစ်ရပ်၌ တူညီသူများကို ညီမျှသည့် ကျန်းမာရေးစောင့်ရှောက်မှုပေးခြင်းဟု အဓိပ္ပာယ်ရသည်။ ဒေါင်လိုက်ညီမျှမှုဟူသည် (ကွဲပြားခြားနားသော လိုအပ်မှုရှိခြင်းကဲ့သို့သော) သက်ဆိုင်ရာရှုထောင့်များအရ ကွဲပြား ခြားနားသူများကို ကွဲပြားခြားနားစွာ ကုသမှုပေးခြင်းကို ဆိုလိုသည်။ သက်ဆိုင်ရာ လူမှုအုပ်စုများအနေဖြင့် အခြားအုပ်စုများထက် အဆင့်ကွဲပြားခြားနားသော စောင့်ရှောက်မှုများ စနစ်တကျ လက်ခံရရှိသလားဟူ၍ ကျန်းမာရေးဆိုင်ရာညီမျှမှုနှင့် ပတ်သက်သော လေ့လာမှုများရှိသည်။ ယင်းသို့ လေ့လာရာတွင် ကာကွယ်နိုင်ပြီး မညီမျှသည့် ကွာဟချက်များကိုဖော်ထုတ်ရန် နည်းလမ်းများစွာရှိသည်။
မျှတသော ပိုင်းခြားမှု-မျှတသော ပိုင်းခြားမှု၌ တန်းတူညီမျှမှုဟူသည် လူတိုင်းလူတိုင်း အနေဖြင့် အချို့သော ကုန်ပစ္စည်းများနှင့်ပတ်သက်၍ ၎င်းတို့ ရထိုက်သည်ဟု အကဲဖြတ်ထားသည့် ကိုယ်ပိုင်ဝေစုများ ညီမျှရေးဖြစ်သည်။ သို့သော် နှစ်ဦးထက်ပိုသည့်အခါ ယင်းကဲ့သို့ ပိုင်းခြားခြင်းသည် အမြဲတမ်း ညီမျှုနိုင်မည် မဟုတ်သကဲ့သို့ မနာလို ဝန်တိုစိတ်လည်း ကင်းနိုင်မည်မဟုတ်ပါ။
တန်းတူညီမျှမှုဟူသည် ကိုယ်ကျင့်တရားဆိုင်ရာ တရားမျှတရေးသဘောတရားပေါ်၌ အခြေခံထားခြင်းဖြစ်သည်။ စီးပွားရေးစနစ်တစ်ခုလုံး၌ အရင်းအနှီး၊ ကုန်ပစ္စည်းနှင့် ဝန်ဆောင်မှုများရရှိနိုင်မှု ခွဲဝေပုံများကို ကြည့်ရသည်။ တန်းတူညီမျှမှုနှင့်ပတ်သက်၍ အနိမ့် ပိုင်းအဆင့်များသည် အမွေဆက်ခံထားသော ချမ်းသာကြွယ်ဝမှု၊ လူမှုရေးဆိုင်ရာဖယ်ကြဉ်ခံရမှုနှင့် အခြေခံဝန်ဆောင်မှုများကို ကောင်းစွာမရရှိနိုင်မှုတို့အပေါ်အခြေခံသည့် ဘဝအခွင့်အလမ်းများနှင့် ပတ်သက်နေပြီး မျိုးဆက်များအလိုက် ဆင်းရဲမွဲတေမှုကိုဖြစ်စေကာ စီးပွားရေးကြီးထွားမှု၊ စီးပွားရေးမတည်ငြိမ်မှု၊ ရာဇဝတ်မှုနှင့် နိုင်ငံရေးမတည်ငြိမ်မှုများ မြင့်မားမှုတို့နှင့်ပတ်သက်၍ မကောင်းသော သက်ရောက်မှုများကို ဖြစ်ပေါ်စေသည်။
မည်သို့ပင်ဆိုစေကာမူ နိုင်ငံတစ်နိုင်ငံအနေဖြင့် အေးချမ်းတည်ငြိမ်ကာ ဖွံ့ဖြိုးတိုးတက်လိုပါက စီးပွားရေးဆိုင်ရာ တန်းတူညီမျှမှုရှိရေးသည် အရေးကြီးပါကြောင်း The Daily Eleven သတင်းစာက ရေးသားအပ်ပါသည်။
(ဖေဖော်ဝါရီ ၁၇ ရက်ထုတ် The Daily Eleven သတင်းစာ၏ အယ်ဒီတာ့အာဘော်)
