အစိုးရ အနေဖြင့် ဒေသတွင်း တိုးမြင့်လာသည့် အကြမ်းဖက်မှု ဖြစ်စဉ်များ ရပ်တန့်ချုပ်ငြိမ်းရေးနှင့် လုံခြုံတည်ငြိမ် အေးချမ်းရေးအတွက် တပ်မတော် တပ်ရင်းတပ်ဖွဲ့များနှင့်အတူ ပူးပေါင်း၍ နယ်မြေရှင်းလင်းရေး ဆောင်ရွက်လျက်ရှိပြီး လိုအပ်သည့် ဒေသများတွင် ညမထွက်ရအမိန့် ပုဒ်မ ၁၄၄ ထုတ်ပြန်ဆောင်ရွက်သွားမည်ဖြစ်ကြောင်း သြဂုတ် ၁၁ ရက်တွင် နိုင်ငံတော် အတိုင်ပင်ခံရုံး ဝန်ကြီးဌာနမှ ထုတ်ပြန်ခဲ့ပြီးနောက် ရခိုင်ပြည်နယ် ရသေ့တောင်မြို့နယ် အတွင်းရှိ ကျေးရွာအုပ်စု ၁၁ ခုတွင် ညမထွက်ရအမိန့် ပုဒ်မ ၁၄၄ ထုတ်ပြန်လိုက်ပြီ ဖြစ်သည်။
အစိုးရအနေဖြင့် တည်ဆဲဥပဒေ၊ စည်းမျဉ်းစည်းကမ်းများနှင့်အညီ သတိထား၍ ဆောင်ရွက်နေသည်ကို အခွင့်ကောင်းယူ၍ အကြမ်းဖက်လုပ်ရပ်များ တိုးမြှင့်ဆောင်ရွက်လာခြင်းကို ဥပဒေနှင့်အညီ ထိထိရောက်ရောက် နှိမ်နင်းသွားမည်ဖြစ်ကြောင်း နိုင်ငံတော် အတိုင်ပင်ခံရုံး ဝန်ကြီးဌာနက သြဂုတ် ၁၁ ရက်တွင် ထုတ်ပြန်သော “မောင်တောဒေသ တည်ငြိမ်အေးချမ်းရေးဆိုင်ရာ သတင်းထုတ်ပြန်ချက်” တွင် ထည့်သွင်းဖော်ပြထားသည်။ ရခိုင်ပြည်နယ် မောင်တောခရိုင်အတွင်း အစွန်းရောက် အကြမ်းဖက်များက အကြမ်းဖက် သတ်ဖြတ်မှုများ တိုးမြှင့်ဆောင်ရွက်လာခဲ့ပြီး သြဂုတ် ၉ ရက်အထိ သေဆုံးသူ ၅၉ ဦး၊ ပျောက်ဆုံးနေသူ ၃၃ ဦးအထိ ရှိလာခဲ့ကြောင်း၊ မောင်တောခရိုင်အတွင်း အုပ်ချုပ်ရေးမှူးများ၊ ရာအိမ်မှူးများ၊ ဆယ်အိမ်မှူးများ၊ အစိုးရနှင့် ပူးပေါင်းဆောင်ရွက်သူများ၊ သတင်းမီဒီယာများသို့ ထုတ်ဖော်ပြောကြားခဲ့သူများ အပါအဝင် အစ္စလာမ်ဘာသာဝင် အများအပြားကို သတ်ဖြတ်ခဲ့ပြီး နောက်ဆုံးတွင် မြိုတိုင်းရင်းသား ခုနစ်ဦးကို သတ်ဖြတ်လာခဲ့ကြောင်း၊ ၎င်းမှာ နိုင်ငံသားစိစစ်ရေး လုပ်ငန်းစဉ်တွင် လည်းကောင်း၊ ဒေသတည်ငြိမ်ရေးအတွက် လည်းကောင်း၊ နိုင်ငံတော် အစိုးရနှင့် ပူးပေါင်းဆောင်ရွက်ခြင်းများ မပြုနိုင်စေရန် သတ်ဖြတ်ခြိမ်းခြောက်နေခြင်းဟု ယူဆရပါကြောင်း၊ ဤကဲ့သို့ ရက်စက်ကြမ်းကြုတ်သည့် အကြမ်းဖက်မှုကို ပြင်းထန်စွာရှုတ်ချကြောင်းကိုလည်း ထည့်သွင်းဖော်ပြထားသည်။
ရခိုင်ပြည်နယ်အတွင်း အကြမ်းဖက်ခံရမှု ဖြစ်စဉ်များကြောင့် ဒေသတွင်း၌ လုံခြုံရေး မြှင့်တင်ရန် ဒေသဆိုင်ရာ အာဏာပိုင်များက အကူအညီတောင်းခံမှုဖြင့် တပ်မတော်တပ်ရင်း တစ်ခုသည် ရခိုင်ပြည်နယ်သို့ သွားရောက်ခဲ့သည်ဟူသော သတင်းများကို တုံ့ပြန်သောအားဖြင့် ကုလသမဂ္ဂ အထူးသံတမန် ယန်ဟီးလီက ယင်းအနေအထားသည် အဓိက စိုးရိမ်ဖွယ်ရာ အကြောင်းရင်းတစ်ရပ် ဖြစ်သည်ဟု သတိပေးစကား ပြောကြားသည်ကို သတင်းဖော်ပြချက်များတွင် တွေ့ရသည်။
ရခိုင်ပြည်နယ်အတွင်း ဖြစ်စဉ်များသည် ဒေသတွင်းလုံခြုံမှုနှင့် တည်ငြိမ်အေးချမ်းရေး၊ ဒေသဖွံ့ဖြိုးတိုးတက်ရေး အပါအဝင် ဒေသခံတိုင်းရင်းသား ပြည်သူလူထုအတွက် ထိခိုက်နစ်နာမှုများစွာ ဖြစ်ပေါ်လျက်ရှိသည်မှာ အမှန်ဖြစ်သည်။
သို့ပါ၍ ရခိုင်ပြည်နယ်အတွင်း ပေါ်ပေါက်နေသော အစွန်းရောက် အကြမ်းဖက်မှု ပြဿနာများမှာ နိုင်ငံတကာ အဝန်းအဝိုင်းကပါ အာရုံစိုက် စိတ်ဝင်စားသော ဖြစ်စဉ် ဖြစ်နေခြင်း၊ ဒေသခံ တိုင်းရင်းသား လူမျိုးများ၏ လုံခြုံစိတ်ချစေရေးအတွက် ဆောင်ရွက်ရာတွင် မလိုလားအပ်သော ဘေးထွက်ဆိုးကျိုး ပြဿနာများ မပေါ်ပေါက်စေရန် သတိထား ကိုင်တွယ်သင့်သည့် ထိရှလွယ်သော ကိစ္စရပ် ဖြစ်နေခြင်းများအပေါ် သတိထား လုပ်ဆောင်သင့်ပါကြောင်း The Daily Eleven သတင်းစာက ရေးသားအပ်ပါသည်။
(သြဂုတ်လ ၁၃ ရက်ထုတ် The Daily Eleven သတင်းစာ၏ အယ်ဒီတာ့အာဘော်)
