ယနေ့ခေတ် နိုင်ငံများစွာတို့တွင် နိုင်ငံရေးဆိုင်ရာ အခြေခံပဋိပက္ခသည် ရာစုနှစ်တစ်ခုလုံး ရှိခဲ့သည့်အတိုင်း တစ်ဦးချင်းဝါဒနှင့် ဘုံဝါဒတို့၏ ပဋိပက္ခဖြစ်သည်။ လူတစ်ဦးချင်းစီ၏ ဘဝသည် ၎င်းနှင့်သာ သက်ဆိုင်သလား သို့မဟုတ် အုပ်စု၊ လူ့အသိုင်းအဝိုင်း၊ လူ့အဖွဲ့အစည်း၊ နိုင်ငံတော် အစရှိသည်တို့နှင့် သက်ဆိုင်သလားဟူသည့် မေးခွန်းများက ပြဿနာဖြစ်နေသည်။ အစိုးရ အဖွဲ့များက လူတစ်ဦးချင်းစီမှ ကောက်ခံရရှိသော အခွန်ငွေများကို လူအများနှင့်ဆိုင်သော လုပ်ငန်းများအတွက် တိုး၍ တိုး၍ အသုံးပြုလာချိန်၌ ယင်းမေးခွန်းများသည် ပို၍ကျယ်လောင်လာသည်။
တစ်ဦးချင်းဝါဒဟူသည် လူတစ်ဦးချင်းစီ၏ ဘဝသည် ထိုသူနှင့်သာ သက်ဆိုင်ပြီး သူသင့်တော်သည်ဟု မြင်သည့်အတိုင်း နေထိုင်ရန်၊ သူ၏ကိုယ်ပိုင်ဆုံးဖြတ်ချက်ဖြင့် ပြုမူရန်၊ သူ့အားထုတ်မှု၏ ထွက်ကုန်/ရလဒ်အား သူ့ဘာသာ ထိန်းသိမ်းအသုံးပြုရန်နှင့် သူ့ဘာသာ ရွေးချယ်သော စံတန်ဖိုးများအတိုင်း နေထိုင်ရန်တို့အတွက် ထာဝရ အခွင့်အရေးရှိသည်။ ယင်းသဘောတရား၌ တစ်ဦးချင်းအနေဖြင့် အချုပ်အခြာအာဏာပိုင်ပြီး သူကိုယ်တိုင်၌ လမ်းဆုံးလျက် ကိုယ်ကျင့်တရားဆိုင်ရာ ကိစ္စ၏ အခြေခံယူနစ်သည် သူကိုယ်တိုင်သာ ဖြစ်သည်။ ယင်းစိတ်ကူး သဘောတရားကို ဥပမာအားဖြင့် အမေရိကန်ပြည်ထောင်စုကို ထူထောင်ခဲ့ကြသူများက ဖွံ့ဖြိုးလာစေခဲ့ပြီး ကြေညာချက်နှင့် အခြေခံဥပဒေ ရေးဆွဲသည့်အခါ ခိုင်မာအောင် ပြုလုပ်ခဲ့ကြသည်။ ၎င်းတို့သည် ဘဝ၊ လွတ်လပ်မှု၊ ပိုင်ဆိုင်မှုတို့နှင့် ပတ်သက်၍ တစ်ဦးချင်း အခွင့်အရေးများရှိကာ ပျော်ရွှင်မှုကို ရှာဖွေခြင်းအား အသိအမှတ်ပြုလျက် ကာကွယ်စောင့်ရှောက်ပေးသည့် နိုင်ငံတစ်နိုင်ငံကို ဖန်တီးခဲ့ကြသည်။
ဘုံဝါဒဟူသည် တစ်ဦးချင်းစီ၏ ဘဝသည် ၎င်းနှင့်မသက်ဆိုင်ဘဲ ၎င်းအနေဖြင့် တစ်စိတ်တစ်ပိုင်းအဖြစ် ပါဝင်နေသော လူအုပ်စု သို့မဟုတ် လူ့အဖွဲ့အစည်းနှင့် သက်ဆိုင်သည် ဟူသည့် သဘောတရားဖြစ်သည်။ ထိုကြောင့် ထိုသူ၌ ကိုယ်ပိုင်အခွင့်အရေး မရှိဘဲ သူ၏စံတန်ဖိုးများနှင့် ရည်မှန်းချက်များကို လူအုပ်စုတစ်စုလုံး ပိုမိုကောင်းမွန်ရေးအတွက် စတေးရမည်ဟူသည့် သဘောတရားဖြစ်သည်။ ဘုံဝါဒ သဘောတရားအရ လူအုပ်စု သို့မဟုတ် လူ့အဖွဲ့အစည်းသည် ကိုယ်ကျင့်တရားဆိုင်ရာ ကိစ္စအတွက် အခြေခံယူနစ်ဖြစ်ပြီး လူပုဂ္ဂိုလ် တစ်ဦးချင်းသည် ၎င်းတို့အနေဖြင့် လူအုပ်စု တစ်ခုလုံးအတွက် ထမ်းဆောင်နေမှသာ စံတန်ဖိုး တစ်ရပ်ရှိသည်။ ယင်းသဘောတရားကို အကြံပြုသူတစ်ဦးက “လူ့အဖွဲ့အစည်းက သူ့အားခွင့်ပြုထားသည်မှလွဲ၍ လူသား၌ အခွင့်အရေးများ မရှိ။ လူသားသည် မွေးဖွားချိန်မှ သေဆုံးသည်အထိ လူ့အဖွဲ့အစည်းက သူ့အား လူ့အခွင့်အရေး ဟုခေါ်သည့် အချို့သော အရာများကို ခွင့်ပြုထားပြီး အခြားအရာများကို ပိတ်ပင်ထားသည်။ အဘယ့်ကြောင့်ဆိုသော် လူ့အဖွဲ့အစည်းသည် လူတစ်ဦးချင်းစီကို အထူးသဖြင့် မျက်နှာသာပေးခြင်း သို့မဟုတ် ဖိနှိပ်ခြင်းတို့ပြုရန် ဆန္ဒရှိသောကြောင့်ဖြစ်သည်။ သို့သော် ယင်းမှာ လူ့အဖွဲ့အစည်း ကိုယ်တိုင်က သူ၏ တည်တံ့ခိုင်မြဲရေး၊ ကောင်းကျိုးဖြစ်ထွန်းရေးနှင့် ပျော်ရွှင်ရေးကို အဓိကအဖြစ် စဉ်းစားသောကြောင့်သာ ဖြစ်သည်” ဟု ဆိုသည်။
မည်သို့ပင်ဆိုစေကာမူ အမှန်တကယ်၌ တစ်ဦးချင်းဝါဒနှင့် ဘုံဝါဒမည်သည်က ပိုကောင်းသနည်း/ပို၍ မှန်ကန်သနည်းဟူသည် ဘက်အသီးသီးနှင့် ပတ်သက်၍ အချက်အလက်များပေါ်၌သာ မူတည်မည် ဖြစ်သောကြောင့် မိမိတို့ လူ့အဖွဲ့အစည်း သို့မဟုတ် မိမိတို့နိုင်ငံအလိုက် မှန်ကန်သော အချက်အလက်များ အပေါ်၌သာ အခြေပြု စဉ်းစားရမည် ဖြစ်ပါကြောင်း The Daily Eleven သတင်းစာက ရေးသားအပ်ပါသည်။
ဖေဖော်ဝါရီ ၁၄ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်
