ဥပဒေပြုရေးမဏ္ဍိုင် လွှတ်တော်၏ အခန်းကဏ္ဍ

ဥပဒေပြုရေးအာဏာ၊ အုပ်ချုပ်ရေးအာဏာနှင့် တရားစီရင်ရေးဟူသော နိုင်ငံတော် အချုပ်အခြာအာဏာ၏ ခက်မသုံးဖြာတို့အကြား တတ်နိုင်သမျှ ပိုင်းခြားသုံးစွဲခြင်းနှင့် အချင်းချင်း အပြန်အလှန် ထိန်းကျောင်းခြင်းတို့ ပြုရမည်ဖြစ်သည်။ အဂတိတရား ကင်းစင်သည့် ဒီမိုကရေစီစနစ် ရေရှည်တည်တံ့ အကောင်အထည်ဖော်နိုင်ရန် မဏ္ဍိုင်အချင်းချင်း အပြန်အလှန် ထိန်းကျောင်းခြင်းမှာ အရေးပါနေသည်။ ဒီမိုကရေစီ ဖော်ဆောင်မှု၏ အသက်သည်လည်း အာဏာသုံးရပ် ခွဲဝေသုံးစွဲခြင်းပင်ဖြစ်သည်။ ဥပဒေပြုရေးမဏ္ဍိုင်ဖြစ်သော လွှတ်တော်အနေဖြင့် နိုင်ငံနှင့်လူထုအတွက် အကျိုးရှိနိုင်မည့် ခေတ်ကာလနှင့် လျော်ညီ သော ဥပဒေများပြင်ဆင်နိုင်ရန် တာဝန်ရှိမည်ဖြစ်သည်။ ယင်းအပြင် တရားဥပဒေများအပေါ် မှန်မှန်ကန်ကန် အဓိပ္ပာယ်ဖော်ဆောင်၍ ထိထိရောက်ရောက် အကောင်အထည် ဖော်ရန်မှာ အုပ်ချုပ်ရေးမဏ္ဍိုင်၏ တာဝန်ပင်ဖြစ်သည်။ အလားတူပင် မတရားမှုများကို ဖော်ထုတ်အရေးယူ၍ အမှန်တရား ဖော်ဆောင်ရန် တရားစီရင်ရေးမဏ္ဍိုင်က တာဝန်ယူရမည်ဖြစ်သည်။

ထိုအထဲတွင် ဥပဒေပြုရေးဆိုင်ရာ ကိစ္စများနှင့်အတူ ပြည်သူများ၏ လိုအပ်ချက်များ နှင့် ပတ်သက်၍ ပြည်သူ့ကိုယ်စားလှယ်များမှ တင်ပြဆွေးနွေးခြင်း၊ အကြံပြုခြင်း၊ တိုက်တွန်းခြင်း စသည့် လုပ်ဆောင်ချက်များအတွက် လွှတ်တော် အစည်းအဝေးများက အရေးပါနေသည်။ ဒုတိယအကြိမ် ပြည်ထောင်စုလွှတ်တော်၊ ပြည်သူ့လွှတ်တော်နှင့် အမျိုးသားလွှတ်တော် ပဉ္စမပုံမှန် အစည်းအဝေးများကို မေ ၁၈ ရက်မှစ၍ ပြန်လည် ကျင်းပနေပြီဖြစ်သည်။ ယခုကျင်းပနေသော လွှတ်တော် အစည်းအဝေးကာလအတွင်း ယခင်အစည်းအဝေးကျင်းပစဉ်က ကျန်ရှိခဲ့သည့် ဥပဒေကြမ်း ၁၀ ခုနှင့် အသစ်ထပ်မံ ရောက်ရှိလာသည့် ဥပဒေကြမ်းများကို ဆက်လက် ဆွေးနွေးသွားမည်ဖြစ်ပြီး ဆွေးနွေးရန် အဆို ၂၅ ခုနှင့် ကြယ်ပွင့်ပြမေးခွန်း ၁၆၄ ခုရှိကြောင်း သိရသည်။

“ကျွန်တော်တို့နိုင်ငံရဲ့ ဒီမိုကရေစီ အသွင်ကူးပြောင်းရေးကာလ စတင်ခါစဖြစ်ပြီး များစွာနုနယ်တဲ့ အခြေအနေမှာ ရှိပါသေးတယ်။ ဒီမိုကရေစီ စံချိန်စံညွှန်းတွေ ရောက်ရှိဖို့ များစွာ ကြိုးပမ်းအားထုတ်ကြရဦးမှာ ဖြစ်ပါတယ်။ ဒီမိုကရေစီ ဖက်ဒရယ်ပြည်ထောင်စု တည်ဆောက်ရေးအတွက် အခက်အခဲ အကျပ်အတည်းတွေကို ကျော်လွှားကြရဦးမှာဖြစ်ပါတယ်။ ပြည်သူတွေအကြား ဒီမိုကရေစီ အလေ့အကျင့်တွေ အားကောင်းစေဖို့ လွှတ်တော်ကိုယ်စားလှယ်များက ပူးပေါင်းကူညီ ဆောင်ရွက်ကြရဦးမှာဖြစ်ပါတယ်။ ဒီမိုကရေစီအခွင့် အရေးရှိရင် တာဝန်နဲ့ ၀တ္တရားလည်း ရှိတယ်ဆိုတာကို လွှတ်တော်ကိုယ်စားလှယ်များက စံနမူနာ ကျင့်ကြံဆောင်ရွက်ကြရမှာ ဖြစ်ပါတယ်။ ဒီမိုကရေစီယဉ်ကျေးမှု ခိုင်မာဖို့အတွက် အပြောင်းအလဲဟာ ဆက်လက်ဆောင်ရွက်ကြရမယ့် Process အဖြစ် ခံယူထားကြရမှာ ဖြစ်ပါတယ်။ ဒါကြောင့် ကျွန်တော်တို့ဟာ ပြည်သူ့ကိုယ်စားလှယ်များ ပီသစွာ နိုင်ငံသူနိုင်ငံသားများရဲ့ ဒီမိုကရေစီ အခွင့်အရေးများရရှိပြီး လူမှုစီးပွားဘ၀ မြှင့်တင်ရေးကို ဆက်လက် ဆောင်ရွက်သွားကြပါစို့လို့ နှုတ်ခွန်း ဆက်သလိုက်ပါတယ်” ဟု ပြည်သူ့လွှတ်တော်ဥက္ကဋ္ဌ ဦးဝင်းမြင့်က လွှတ်တော် စတင်ကျင်းပချိန်၌ နှုတ်ခွန်းဆက်စကား ပြောကြားရာတွင် ထည့်သွင်းပြောကြားခဲ့သည်။

လွှတ်တော်အစည်းအဝေးများသည် ဥပဒေပြုရေးမဏ္ဍိုင်အတွက် အရေးပါသော အခန်းကဏ္ဍတွင် ရှိနေပြီး ပြည်သူများက ရွေးချယ်သော လွှတ်တော်ကိုယ်စားလှယ်များ အနေဖြင့် လူထုအကြား ပေါ်ပေါက်နေသော အခြေအနေမှန်များကို လေ့လာ သုံးသပ်ရမည်ဖြစ် သည်။ ယင်းအပြင် လူထုအား ဖိစီးစေသည့် မလိုလားအပ်သော၊ မမျှတသော ဥပဒေများကို ဖျက်သိမ်းခြင်း၊ ပြင်ဆင်ခြင်း၊ လိုအပ်သည်များ ဖြည့်စွက်ခြင်းတို့ကို လုပ်ဆောင်သင့်ပြီး ပြည်သူလူထု၏ အခြေခံရပိုင်ခွင့်များအား လုံလောက်စွာ အကာအကွယ်ပေးနိုင်မည့် တရားမျှတသော ဥပဒေ စည်းမျဉ်းစည်းကမ်းများ အသက်ဝင် ခိုင်မာရေးအတွက် ကူညီ ဆောင်ရွက်ပေးသင့်ပါကြောင်း The Daily Eleven သတင်းစာက ရေးသားအပ်ပါသည်။

(မေလ ၂၀ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)