<

နိုင်ငံခြားတိုက်ရိုက် ရင်းနှီးမြှုပ်နှံမှုနှင့် ပတ်သက်၍

လက်ရှိဘဏ္ဍာနှစ် ဒီဇင်ဘာလအထိ မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) မှ ခွင့်ပြုခဲ့သည့် နိုင်ငံခြားရင်းနှီးမြှုပ်နှံမှု ပမာဏမှာ ဒေါ်လာ ငါးဘီလျံရှိသော်လည်း ဒေါ်လာ ၃ ဒသ မ ၇ ဘီလျံသာ အမှန်ဝင်ရောက်ခဲ့ကြောင်း ကော်မရှင်က ထုတ်ပြန်ခဲ့သည်။ ၁၉၈၈-၁၉၈၉ ဘဏ္ဍာနှစ်မှ ၂၀၁၇-၂၀၁၈ ဘဏ္ဍာနှစ် ဒီဇင်ဘာလအထိ ခွင့်ပြုပေးခဲ့သည့် နိုင်ငံခြားရင်းနှီးမြှုပ်နှံမှုပမာဏ ဒေါ်လာ ၇၅ ဘီလျံကျော်ရှိပြီး တရုတ်နိုင်ငံက ပမာဏ အများဆုံး ရင်းနှီးမြှုပ်နှံထားပြီး စင်ကာပူက ဒုတိယအများဆုံး ရင်းနှီးမြှုပ်နှံထားကြောင်း သိရသည်။ ကဏ္ဍအလိုက် ရင်းနှီးမြှုပ်နှံမှုတွင် ရေနံနှင့်သဘာဝဓာတ်ငွေ့ကဏ္ဍတွင် အများဆုံးဖြစ်ပြီး စွမ်းအင်ကဏ္ဍတွင် ဒုတိယအများဆုံး ရင်းနှီးမြှုပ်နှံကြကြောင်း သိရသည်။

အထူးသဖြင့် နိုင်ငံခြား တိုက်ရိုက်ရင်းနှီးမြှုပ်နှံမှုသည် ဖွံ့ဖြိုးဆဲနှင့် ဖြစ်ထွန်းစ ဈေးကွက်စီးပွားရေးစနစ် နိုင်ငံများအတွက် အလွန်အရေးကြီးသည်။ ၎င်းတို့၏ကုမ္ပဏီများသည် ၎င်းတို့၏ နိုင်ငံတကာဈေးကွက်များကို ချဲ့ထွင်ရန် နိုင်ငံအမျိုးမျိုးမှ နိုင်ငံသားများ၏ ငွေကြေးထည့်ဝင်မှုနှင့် ကျွမ်းကျင်မှုများ လိုအပ်သည်။ ယင်းကဲ့သို့သော နိုင်ငံများသည် နိုင်ငံသားတို့၏ အလုပ်အကိုင် အခွင့်အလမ်းနှင့် လုပ်ခများ တိုးတက်စေရန်အတွက် အခြေခံအဆောက်အအုံကဏ္ဍ၊ စွမ်းအင်ကဏ္ဍနှင့် ရေအရင်းအမြစ်ကဲ့သို့သော ကဏ္ဍများ၌ ပုဂ္ဂလိက ရင်းနှီးမြှုပ်နှံမှုများ လိုအပ်သည်။

နိုင်ငံခြား တိုက်ရိုက်ရင်းနှီးမြှုပ်နှံမှုသည် ကမ္ဘာ့စီးပွားရေးကို အကျိုးရှိစေရုံသာမက ရင်းနှီးမြှုပ်နှံသောနိုင်ငံများနှင့် ယင်းကိုလက်ခံသော နိုင်ငံများအတွက်လည်း အကျိုးရှိစေသည်။ ကမ္ဘာ၏ မည်သည့်နေရာ၌မဆို အရင်းအနှီးများသည် ကြီးထွားရန် အကောင်းဆုံး အလားအလာများရှိသည့် လုပ်ငန်းများထဲသို့ စီးဝင်ကြသည်။ အဘယ့်ကြောင့်ဆိုသော် ရင်းနှီးမြှုပ်နှံသူများသည် စွန့်စားရမှု အနည်းဆုံးပြုကာ အကောင်းဆုံး အကျိုးအမြတ် ပြန်ရမည့် လုပ်ငန်းများကို ရှာဖွေကြသောကြောင့်ဖြစ်သည်။ သို့သော် အကျိုးအမြတ်သက်သက် စေ့ဆော်မှုသည် အရောင်ကန်းနေသည့်သဘောရှိပြီး ကိုးကွယ်သည့်ဘာသာနှင့် နိုင်ငံရေးကို ဂရုမစိုက်ပေ။ နိုင်ငံခြား တိုက်ရိုက်ရင်းနှီးမြှုပ်နှံမှုသည် နိုင်ငံရေး၊ ခရိုနီစနစ်နှင့် လာဘ်စားမှု၏ အကျိုးသက်ရောက်မှုများကို လျှော့ချပေးနိုင်သည်။ အကျိုးရလဒ်အားဖြင့် စမတ်အဖြစ်ဆုံး ငွေကြေးအား ကမ္ဘာတစ်ဝန်းလုံး၌ အကောင်းဆုံး လုပ်ငန်းများကို ချီးမြှင့်သည်။

နိုင်ငံခြား တိုက်ရိုက်ရင်းနှီးမြှုပ်နှံမှုကို လက်ခံသောလုပ်ငန်းများသည် လာရောက်ရင်းနှီးမြှုပ်နှံသူများထံမှ စီမံခန့်ခွဲမှု၊ စာရင်းအင်းနှင့် ဥပဒေလမ်းညွှန်ချက် အစရှိသည်တို့နှင့် ပတ်သက်၍ အကောင်းဆုံး ကျင့်သုံးမှုများကိုလည်း ရရှိကြသည်။ ၎င်းတို့သည် နောက်ဆုံးပေါ်နည်းပညာ၊ နောက်ဆုံးပေါ် လုပ်ငန်းဆောင်ရွက်မှုနှင့် နောက်ဆုံးပေါ် ဘဏ္ဍာရေးဆိုင်ရာ နည်းနာများကိုလည်း ရရှိနိုင်သည်။ ၎င်းတို့၏ လုပ်ဆောင်ကျင့်သုံးမှုများကို နည်းနာယူလျက် နိုင်ငံခြားတိုက်ရိုက် ရင်းနှီးမြှုပ်နှံမှုများကို လက်ခံသောလုပ်ငန်းများ အနေဖြင့် ၎င်းတို့ဝန်ထမ်းများ၏ လူနေမှုအဆင့်အတန်းကိုလည်း တိုးတက်စေနိုင်သည်။ နိုင်ငံခြား တိုက်ရိုက်ရင်းနှီးမြှုပ်နှံမှုသည် မည်သည့်နိုင်ငံ၌မဆို အကောင်းဆုံးကုမ္ပဏီများကိုသာ အကျိုးကျေးဇူးရှိစေသည်။ ၎င်းအပြင် နိုင်ငံခြားတိုက်ရိုက်ရင်းနှီးမြှုပ်နှံမှုသည် သက်ဆိုင်ရာ လုပ်ငန်းများအပေါ် သက်ဆိုင်ရာ အစိုးရအဖွဲ့များ၏ သြဇာလွှမ်းမိုးမှုကိုလည်း လျော့ကျစေနိုင်သည်။ နိုင်ငံခြား တိုက်ရိုက်ရင်းနှီးမြှုပ်နှံမှုကို လက်ခံသော နိုင်ငံများ၌ လူနေမှုအဆင့်အတန်း မြင့်တက်လာသည်ကို တွေ့ရှိရသည်။ လက်ခံသောကုမ္ပဏီများမှာလည်း ရင်းနှီးမြှုပ်နှံမှုမှ အကျိုးအမြတ် ရရှိသောကြောင့် မြင့်မားသော အခွန်ငွေများကိုပေးနိုင်သည်။ သို့သော် နိုင်ငံခြားတိုက်ရိုက် ရင်းနှီးမြှုပ်နှံမှုရရှိရန် အချိန်ယူ တည်ဆောက်ရမည်ဖြစ်ပြီး ဖွံ့ဖြိုးဆဲနိုင်ငံများ အနေဖြင့် မဟာဗျူဟာအရ အရေးကြီးသော လုပ်ငန်းများတွင် နိုင်ငံခြားသားများပိုင်ဆိုင်မှုကို ခွင့်မပြုသင့်ပေ။

မည်သို့ပင်ဆိုစေကာမူ နိုင်ငံခြားတိုက်ရိုက်ရင်းနှီးမြှုပ်နှံမှု တိုးတက်အောင် ပြုလုပ်ရာ၌ လည်းကောင်း၊ နိုင်ငံခြားတိုက်ရိုက် ရင်းနှီးမြှုပ်နှံမှုကို လက်ခံရာ၌လည်းကောင်း မဟာဗျူဟာမြောက်စွာ စနစ်တကျလုပ်ဆောင်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။

ဖေဖော်ဝါရီ (၃) ထုတ် The Daily Eleven သတင်းစာ အယ်ဒီတာ့အာဘော်

February 2, 2018














Copy Protected by Chetan's WP-Copyprotect.