တိုင်းပြည်ငြိမ်းချမ်းရေးနှင့် နိုင်ငံသားများ၏ဘ၀ မြင့်မား တိုးတက်ရေး

“တိုင်းပြည်ငြိမ်းချမ်းရေးနဲ့ လူနေမှုဘ၀၊ တိုင်းသူပြည်သားတွေဘ၀ မြင့်မားတိုးတက်ရေး အဲဒီအတွက်ကိုပဲ ဆက်ကြိုးစားသွားမှာပါ”၊ “ပြည်သူတွေရဲ့ အလှူဟာ ဘာကို ပြသလဲဆိုရင် ပြည်သူတွေဟာ ငြိမ်းချမ်းရေးရဖို့ ဘယ်လောက် ဆာလောင်မွတ်သိပ်နေကြတယ်၊ ငြိမ်းချမ်းတဲ့ ဘ၀ကို ဘယ်လောက် လိုချင်နေကြတယ်၊ ငြိမ်းချမ်းရေး ဖြစ်စဉ်မှာ နိုင်ငံတော်ရဲ့ အတိုင်ပင်ခံပုဂ္ဂိုလ် ဦးဆောင်ပြီး လူထုလူတန်းစား အဖွဲ့အစည်း အသီးသီးနဲ့ ဆွေးနွေးညှိနှိုင်း အဖြေရှာနေကြတဲ့ အပေါ်မှာ ဘယ်လောက်ယုံကြည် အားထားမှု ရှိတယ် ဆိုတာကို ပြသနေတာ ဖြစ်ပါတယ်။ ဒါကြောင့်လည်း ဒီနှစ်အတွင်းမှာ ပြည်သူတွေအတွက် ၀မ်းမြောက်ဖွယ်ရာ ရလဒ်ကောင်းများ ရရှိလိမ့်မယ်လို့ မျှော်လင့်မိပါတယ်” ဟူသည့် မှတ်ချက်များအား နိုင်ငံတော်သမ္မတ ဦးထင်ကျော်က ဧပြီ ၁၈ ရက်တွင် ပြောကြားခဲ့ခြင်းဖြစ်သည်။ ရန်ကုန်တိုင်းဒေသကြီး သုံးခွမြို့နယ်ရှိ မဟာအတုလဝေယံ သာသနာ့ဗိမာန်တွင် ပြုလုပ်ခဲ့သည့် နှစ်သစ်မင်္ဂလာ အန္တရာယ်ကင်း ပရိတ်တရားတော် နာယူပွဲနှင့် သက်ကြီးပူဇော်ပွဲ အခမ်းအနား အပြီးတွင် သတင်းထောက်များ၏ မေးမြန်းမှုများနှင့် ပတ်သက်ပြီး ဖြေကြားရာတွင် ယင်းကဲ့သို့ ထည့်သွင်းပြောကြားခဲ့ခြင်း ဖြစ်ပါသည်။

နိုင်ငံတော်သမ္မတ၏ ပြောကြားခဲ့သော စကားကဲ့သို့ပင် မြန်မာနိုင်ငံ၏ လတ်တလော လိုအပ်ချက်တွင် တိုင်းပြည်ငြိမ်းချမ်းရေးနှင့် တိုင်းသူပြည်သားများ ဘ၀ မြင့်မားတိုးတက်ရေးမှာ အဓိက အလေးထားရမည့် ကိစ္စများလည်း ဖြစ်ပါသည်။ သို့သော် နှစ်ပေါင်းများစွာ ခေတ်စနစ် အမျိုးမျိုးကြား အဂတိလိုက်စားမှုများ အားကောင်းခဲ့သည့်အတွက် နစ်နာခဲ့ရမှု အမျိုးမျိုးအား အချိန်တိုအတွင်း ပြေလည်အောင် ဖြေရှင်းနိုင်ရေးမှာ စိန်ခေါ်မှုများအဖြစ် ရှိနေဆဲပင် ဖြစ်ပါသည်။

မြန်မာနိုင်ငံတွင် ယခင်အစိုးရ အဆက်ဆက် ပေါ်ပေါက်ခဲ့သော၊ ဖြေရှင်းရန် လိုအပ်နေသော ပြဿနာများစွာအနက် မြေယာပြဿနာများ အရေးကို ကြည့်လျှင် အဆိုပါ စိန်ခေါ်မှုများကို ခန့်မှန်းနိုင်မည် ဖြစ်ပါသည်။ စိုက်ပျိုးရေးကို အခြေခံခဲ့သည့် နိုင်ငံဖြစ်သည့် အားလျော်စွာ နိုင်ငံ၏ ၇၀ ရာခိုင်နှုန်းမှာ လယ်ယာစိုက်ပျိုးရေး လုပ်ငန်းဖြင့် အဓိက အသက်မွေးဝမ်းကျောင်းပြုနေသော တောင်သူလယ်သမား အခြေခံ လူတန်းစားများ ဖြစ်ကြပါသည်။ သို့ပါ၍ လယ်ယာမြေ ပြဿနာများ အရေးမှာ နိုင်ငံတွင်းရှိ အခြေခံ လူတန်းစား အများစု၏ အရေး ဖြစ်နေသည်ဟုဆိုလျှင် မှားမည်မထင်ပါ။

သို့ရာတွင် လယ်ယာမြေနှင့် ပတ်သက်၍ ယခင် အမှားလုပ်ခဲ့သူများက ပြန်လည်ကာကွယ်သည့် အနေဖြင့် လုပ်ငန်းကြန့်ကြာအောင် လုပ်ဆောင်နေသည့်အတွက် လယ်ယာမြေ အမှုများ ဖြေရှင်းရာတွင် ကြန့်ကြာနေရခြင်းဖြစ်ကြောင်း၊ လယ်ယာမြေ ပြဿနာများ ဖြေရှင်းရာတွင် ယခင်ကကဲ့သို့ ၀တ်ကျေတမ်းကျေ ဆောင်ရွက်နေသူများ ရှိနေခြင်းကြောင့် လုပ်ငန်းများ ကြန့်ကြာနေခြင်းများလည်း ရှိကြောင်း၊ ၀န်ထမ်းအချို့ အနေဖြင့်လည်း ယခင်က အမှားလုပ်ဆောင်ခဲ့သူများကို ပြန်လည်ကာကွယ်နေသည့် သဘောမျိုးလည်း တွေ့ရကြောင်း၊ ထို့ကြောင့် လွှတ်တော်ကိုယ်စားလှယ်များကိုယ်တိုင် ထဲထဲဝင်ဝင် ပါဝင်ဆောင်ရွက်ပေးရန်အတွက် တိုင်းဒေသကြီး/ပြည်နယ်ဝန်ကြီးချုပ်များက ပြန်လည်ညွှန်ကြားထားကြောင်း၊ ထို့ကြောင့် ကော်မတီ အနေဖြင့် လယ်ယာမြေ ပြဿနာများ ဖြေရှင်းရာတွင် ပိုမိုကောင်းမွန်လာလိမ့်မည်ဟု မျှော်လင့်ရကြောင်း စသည်ဖြင့် ပြည်သူ့လွှတ်တော် တောင်သူလယ်သမားနှင့် အလုပ်သမားရေးရာ ကော်မတီဥက္ကဋ္ဌ ဦးကျော်မြင့်က ပြောကြားထားသည်။

ထို့ကြောင့် ယခင်ကာလများထက် ပိုမိုကောင်းမွန်သော အခြေအနေများ ရောက်ရှိရန် များစွာသော စိန်ခေါ်မှုများအပေါ် ရေတိုရေရှည် အစီအမံများဖြင့် မှန်မှန်ကန်ကန် လုပ်ဆောင်ရန် လိုအပ်မည် ဖြစ်ပါသည်။ တိုင်းပြည်ငြိမ်းချမ်းရေးနှင့် နိုင်ငံသားများ၏ ဘ၀ အမှန်တကယ် မြင့်မားတိုးတက်စေရေးအတွက် အရေးပါသော အခြေခံ ပြဿနာများအား စနစ်တကျ ကိုင်တွယ်ဖြေရှင်းနိုင်ရန် အရေးကြီးပါကြောင်း The Daily Eleven သတင်းစာက ရေးသားအပ်ပါသည်။

(ဧပြီ ၂၀ ရက်ထုတ် The Daily Eleven သတင်းစာ၏ အယ်ဒီတာ့အာဘော်)