ကွဲပြားခြားနားသည့် မျိုးဆက်နှစ်ခု၏ အဖွဲ့ဝင်များအနေဖြင့် မတူကွဲပြားသော ထင်မြင်ယူဆချက်များ ရှိနေခြင်းသည် မျိုးဆက်ကွာဟမှုကြောင့် ဖြစ်သည်။ ပိုမိုငယ်ရွယ်သော မျိုးဆက်များကို အသက်ပို၍ကြီးသော မျိုးဆက်များနှင့် နှိုင်းယှဉ်သည့်အခါ နိုင်ငံရေး၊ တန်ဖိုးထားပုံနှင့် အခြားအကြောင်းအရာများနှင့် ပတ်သက်၍ အပြုအမူများ၊ ယုံကြည်မှုများနှင့် အရသာခံမှုများ ကွဲပြားခြားနားနေမှုကို ရှင်းပြရန်အတွက် မျိုးဆက်ကွာဟမှုဟူသည့် စကားလုံးကို အသုံးပြုလေ့ရှိသည်။ သမိုင်း၏ အချိန်အပိုင်းအခြားအားလုံးတွင် မျိုးဆက်ကွာဟမှုက လွှမ်းမိုးနေခဲ့ပြီး ၂၀ ရာစုနှင့် ၂၁ ရာစုတို့တွင် ယင်းမျိုးဆက်ကွာဟမှုကြောင့် ဖြစ်ပွားသော ကွဲပြားခြားနားမှုအတိုင်းအတာများသည် ပိုမိုကျယ်ပြော၍ လာတော့သည်။
ကုမ္ပဏီများအနေဖြင့် ကွဲပြာခြားနားနေသော အသက်အုပ်စုများတွင် ပါဝင်သူအသီးသီး၏ လိုအပ်ချက်များနှင့် အမြင်များကို ချိန်ညှိရန် နည်းလမ်းများရှာဖွေသည့်အခါ လုပ်ငန်းခွင်၌ မျိုးဆက်ကွာဟမှုသည် အဓိကကြီးမားသော အခန်းကဏ္ဍမှ ပါဝင်သည်။ လုပ်ငန်းများအနေဖြင့် အသက်အရွယ်အလိုက်အုပ်စုများ အပြောင်းအလဲကို အမြဲမပြတ် ဂရုပြုကြရသည်။ ၎င်းတို့၏ လုပ်ငန်းများအပေါ်၌ ကျားမကွာဟချက်သည် သိသာသော သက်ရောက်မှု ရှိနိုင်သကဲ့သို့ အသက်အရွယ် အုပ်စုများသည်လည်း ထိုနည်းလည်းကောင်း ဖြစ်သည်။
မျိုးဆက်ကွာဟမှုဟူသည့် စကားရပ်ကို ၁၉၆၀ ပြည့်လွန်နှစ်များအတွင်း စတင်သုံးစွဲခဲ့ခြင်း ဖြစ်သည်။ ယခုအခါ Baby Boomer ဟု ရည်ညွှန်းခေါ်ဆိုသော ထိုစဉ်က လူငယ်မျိုးဆက်သည် ၎င်းတို့ မိဘမျိုးဆက်များနှင့် ယုံကြည်ချက်နှင့် ထင်မြင်မှုများ အလွန်သိသာစွာ ကွဲပြားခြားနားနေမှုကို ပြသခဲ့ကြသည်။ မျိုးဆက်ကွာဟမှု ပေါ်ထွန်းလာသောကြောင့် လူမှုဗေဒပညာရှင်များသည် ယင်းစကားလုံးကို အသက်အရွယ်အလိုက် အုပ်စုများ ပိုင်းခြားရန်အတွက် အသုံးပြုလိုက်ခြင်းဖြစ်သည်။ လူတစ်ဦး၏ ဘဝသက်တမ်းကို ကလေးဘဝ၊ သက်လတ်ပိုင်းအရွယ်နှင့် အငြိမ်းစားယူသည့်အရွယ်ဟူ၍ သုံးပိုင်းပိုင်းခြားခဲ့သည်။ မျိုးဆက်ကွာဟမှုကို လေ့လာရာတွင် သိသာထင်ရှားမှုအရှိဆုံး အချက်တစ်ချက်မှာ လူတစ်ဦးသည် သူ့မျိုးဆက်၏ ပင်မလုပ်ဆောင်ချက်၌ ပါဝင်သည့်အခါ အခြားမျိုးဆက်တွင် ပါဝင်သူများက သူ့အား ဖယ်ကြဉ်သွားခြင်း ဖြစ်သည်။
ဥပမာအားဖြင့် နည်းပညာများနှင့်အတူ ကြီးပြင်းနေထိုင်ရသူများဖြစ်သောကြောင့် နည်းပညာဇာတိဟုခေါ်ဆိုသည့် Millennial မျိုးဆက်ဝင်များသည် ၁၉၈၂ ခုနှစ်နှင့် ၂၀၀၂ ခုနှစ်အကြား မွေးဖွားလာကြသူများဖြစ်သည်။ နည်းပညာကို ကောင်းစွာအသုံးပြုခြင်းသည် Millennial မျိုးဆက်၏ အရေးပါသော အစိတ်အပိုင်းတစ်ရပ်ဖြစ်သည်။ အခြားမျိုးဆက်ဝင်များ (ယင်းမျိုးဆက်ထက် အသက်ပိုကြီးသောသူများ) သည် နည်းပညာအသစ်များကို အသုံးပြုသည့်အခါ Millennial မျိုးဆက်ကို အကူအညီတောင်းကြရသည်။ ယင်း၌ မျိုးဆက်ကို နှိုင်းယှဉ်သည့်အခါ နည်းပညာဗဟုသုတ အကြီးအကျယ် ကွာခြားနေခြင်းသည် မျိုးဆက်ကွာဟမှု၏ သက်သေခံ အချက်တစ်ချက်ဖြစ်သည်။ အသက်ပို၍ကြီးသော မျိုးဆက်များသည် Millennial များကဲ့သို့ နည်းပညာနှင့် အကျွမ်းတဝင် မရှိလှပေ။ ထို့ကြောင့် နည်းပညာအပေါ် အထူးပြုသည့်လုပ်ငန်းများတွင် အခြားမျိုးဆက်များသည် Millennial များကဲ့သို့ ၎င်းတို့၏ ထုတ်ကုန်များအပေါ် နားလည်နိုင်ခြင်းမရှိပေ။
မျိုးဆက်တစ်ခုနှင့်တစ်ခုကို ပိုင်းခြားသတ်မှတ်နိုင်သည့် အခြားနည်းလမ်းများစွာ ရှိသေးသည်။ ယင်းတို့ ပိုင်းခြားသတ်မှတ်ရာတွင် အဓိကအုပ်စုများအဖြစ် အစဉ်အလာဝါဒီများ (Traditionals) Baby Boomers ၊ X မျိုးဆက်နှင့် Millennial ဟူ၍ သိကြသည်။ ယင်းမျိုးဆက်အသီးသီးတို့သည် လူ့အဖွဲ့အစည်းနှင့် လုပ်ငန်းများအပေါ် ရိုက်ခတ်သည့် ကိုယ်ပိုင်ဝိသေသများ ရှိကြသည်။ အုပ်စုလိုက်သုံးစွဲသည့် ဘာသာဗေဒ၊ နည်းပညာဆိုင်ရာ သက်ရောက်မှုများ၊ လုပ်ငန်းခွင်သဘောထားများ၊ အထွေထွေသိမှုများနှင့် ဘဝနေထိုင်ပုံများအရလည်း မျိုးဆက်များကို ပိုင်းခြားနိုင်သည်။
မည်သို့ပင်ဆိုစေကာမူ မျိုးဆက်ကွာဟမှုများသည် ကိုယ်ပိုင်ဝိသေသများဖြင့် လူ့ အဖွဲ့အစည်းနှင့် လုပ်ငန်းခွင်များအပေါ် သိသာထင်ရှားသော သက်ရောက်မှုများရှိသောကြောင့် မျိုးဆက်ကွာဟမှုများနှင့် ပတ်သက်၍ လိုက်လျောညီထွေ ချိန်ညှိလုပ်ဆောင်နိုင်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
(သြဂုတ်လ ၁၁ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)
