ပိုမိုများပြားသော ပိုမိုကောင်းမွန်သော အလုပ်အကိုင်များကို ဖန်တီးခြင်း

ပိုမိုများပြားသော ပိုမိုကောင်းမွန်သော အလုပ်အကိုင်များကို ဖန်တီးခြင်း
Published 12 January 2018

ကျယ်ပြောသော အတိုင်းအတာတစ်ရပ်ဖြင့် အလုပ်အကိုင်အခွင့်အလမ်းများ ဖန်တီးခြင်းသည် အလွန်အမင်း ဆင်းရဲမွဲတေမှုကို အဆက်မပြတ် လျှော့ချရန်နှင့် ကြွယ်ဝမှုကို မျှဝေမှု တည်ဆောက်ရန် မည်သည့်စီးပွားရေး၌မဆို အလွန်အရေးကြီးသည်။ ခိုင်မာအား ကောင်း၍ ပြိုင်ဆိုင်မှုရှိသော ဈေးကွက်များသည် အလုပ်အကိုင်အခွင့်အလမ်းများ ဖန်တီးရေး၌ အလွန်အရေးပါသည်။ အလုပ်အကိုင်အခွင့်အလမ်းရရှိမှုနှုန်းများ တစ်သမတ်တည်း ရှိရေးအတွက် ၂၀၂၇ ခုနှစ်သို့ အရောက်တွင် အလုပ်အကိုင်အခွင့်အလမ်း သန်း ၆၀၀ ဖန်တီးနိုင်ရမည်ဖြစ်ပြီး ယင်းအလုပ်အကိုင်များ၏ ရာခိုင်နှုန်း ၉၀ သည် ပုဂ္ဂလိကကဏ္ဍများ၌ ဖြစ်ရမည်ဟု ကမ္ဘာ့ဘဏ်အုပ်စုက ခန့်မှန်းထားသည်။ ၎င်းအပြင် အရေးပေါ် ဦးစားပေး လုပ်ငန်းတစ်ရပ်ဖြစ်သည့် ကြွယ်ဝမှုများ မျှဝေနိုင်ရေးကို မြှင့်တင်ရန် ပိုမိုကောင်းမွန် သော အလုပ်အကိုင်များ ဖန်တီးနိုင်ရန် လိုအပ်သည်။ ယင်းတို့အတွက် ပြိုင်ဆိုင်မှုဆိုင်ရာ မူဝါဒသည် အလွန်အရေးကြီးသော အခန်းကဏ္ဍမှ ပါဝင်နေသည်။

ပြိုင်ဆိုင်မှုများသည် လုပ်သားများအား ထုတ်လုပ်မှုပိုမိုအားကောင်းသော အလုပ်အကိုင်ဆီသို့ တွန်းပို့ပေးသည်။ ပထမအချက်အနေဖြင့် ကုမ္ပဏီအဆင့် ထုတ်လုပ်မှုစွမ်းအားကို တိုးတက်စေပြီး ဒုတိယအချက်အနေဖြင့် လုပ်ငန်းတစ်ရပ်အတွင်း ထုတ်လုပ်မှု ပိုမိုအားကောင်းသော ကုမ္ပဏီများဆီသို့ လုပ်သားများ ခွဲဝေချထားမှုကို တွန်းပို့သည်။ မည်သို့ပင်ဆိုစေကာမူ အလုပ်အကိုင်အခွင့်အလမ်းများ ဖန်တီးနိုင်မှုမရှိဘဲ စီးပွားရေးကြီးထွားမှုဆီသို့ ဦးတည်နိုင်မည် မဟုတ်ပေ။ အလုပ်အကိုင်အခွင့်အလမ်းများ ပိုမိုဖန်တီးနိုင်ရန် နှင့် ပိုမိုကောင်းမွန်သော အလုပ်အကိုင်များ ဖန်တီးနိုင်ရန်တို့အတွက် ပြိုင်ဆိုင်မှုများ အကြီးအကျယ် ဖြစ်ထွန်းရန်လိုအပ်သည်။

ယေဘုယျအားဖြင့်ဆိုလျှင် ပိုမိုကောင်းမွန်သော အလုပ်အကိုင်များဆီသို့ တိုးတက်သွားရန်အတွက် ထုတ်လုပ်မှုစွမ်းအား နိမ့်ပါးသော အလုပ်အကိုင်များ တစ်စတစ်စ ပျောက်ကွယ်သွားရန် တစ်စိတ်တစ်ပိုင်းလိုအပ်ပြီး ရေတိုကာလအတွင်း ထုတ်လုပ်မှု ပိုမိုသော အလုပ်အကိုင် အခွင့်အလမ်းများ ဖန်တီးနိုင်ရန် လိုအပ်သည်။ ကမ္ဘာ့ဘဏ်အုပ်စု၏ လေ့လာချက်နှစ်ရပ်က ရေတိုရိုက်ခက်ချက်နှင့်ပတ်သက်၍ ရှုထောင့်သစ်များကို ပေးခဲ့သည်။ ပထမအချက်မှာ လုပ်သားဈေးကွက်၏ ရေတိုအရွေ့များကို နှစ်စဉ် ပျက်စီးသွားသော အလုပ်အကိုင်များထက် ဖန်တီးလိုက်သော အလုပ်အကိုင်များ ပိုမိုခြင်းဖြင့် ယေဘုယျ သဘောတိုင်းတာ သတ်မှတ်ခြင်းဖြစ်သည်။ ဒုတိယအချက်မှာ လိုက်လျောညီထွေ ညှိယူရသည့် တစ်နှစ်တာကာလပြီးဆုံးပြီးနောက် ထုတ်လုပ်မှုစွမ်းအားနှင့်ပတ်သက်သော စုစု ပေါင်းအကြောင်းချင်းရာ$ မြင့်တက်လာခြင်းတစ်ရပ်အပေါ် အလုပ်အကိုင်အခွင့်အလမ်း အားမကောင်းသော သက်ရောက်မှုက ပြောင်းပြန်အချိုးကျလေ့ရှိခြင်းဖြစ်သည်။

ပြိုင်ဆိုင်မှုများက မောင်းနှင်သော လုပ်ငန်းစဉ်သည် လုပ်သားများအား ထုတ်လွှင့်မှု စွမ်းအားနိမ့်ပါးမှုနှင့် အရည်အသွေးနိမ့်ပါးသော အလုပ်အကိုင်မှနေ၍ ထုတ်လွှင့်မှုစွမ်းအား ပိုမိုမြင့်မားသော၊ အရည်အသွေး ပိုမိုမြင့်မားသော၊ လုပ်ခပိုမိုမြင့်မားသော  အလုပ် အကိုင်များဆီသို့ အသွင်ပြောင်းပေးသည်။ ထို့ကြောင့် စီးပွားရေးကြီးထွားလိုသော နိုင်ငံတစ်နိုင်ငံအနေဖြင့် စီးပွားရေးပြုပြင်ပြောင်းလဲမှုအမျိုးမျိုးမှတစ်ဆင့် ပြိုင်ဆိုင်မှုကို အားကောင်းအောင်ပြုလုပ်ပြီး ပိုမိုများပြားသော၊ ပိုမိုကောင်းမွန်သော အလုပ်အကိုင်များ ဖန်တီးရန်အတွက် လုပ်ငန်းစဉ်များကို ချမှတ်ရန်လိုအပ်ပါကြောင်း The Daily Eleven သတင်းစာက ရေးသားအပ်ပါသည်။

 

(ဇန်နဝါရီ ၁၂ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)

Most Read

Most Recent