လူထုအမှန်တကယ် စိတ်ဝင်စားသည့် အပြောင်းအလဲ

လူထုအမှန်တကယ် စိတ်ဝင်စားသည့် အပြောင်းအလဲ
Published 11 January 2018

NLD အစိုးရအနေဖြင့် ၂၀၁၈ ခုနှစ်တွင် အပြောင်းအလဲများ စတင်ပြုလုပ်မည်ဟူသော သတင်းများ ထွက်ပေါ်ခဲ့သည့်အတိုင်း အစိုးရအဖွဲ့အတွင်း အပြောင်းအလဲအချို့ကို စတင်ပြုလုပ်ခဲ့သည်ကို တွေ့ရသည်။ ဇန်နဝါရီ ၉ ရက် နေ့စွဲဖြင့် ဧရာဝတီတိုင်းဒေသကြီး အစိုးရအဖွဲ့မှ ဝန်ကြီးချုပ် မန်းဂျော်နီနှင့် စိုက်ပျိုးရေး၊ မွေးမြူရေး၊ သယံဇာတနှင့် ပတ်ဝန်းကျင်ထိန်းသိမ်းရေးဝန်ကြီးဌာန ဝန်ကြီး ဦးဘဟိန်းတို့ကို ဖွဲ့စည်းပုံအခြေခံဥပဒေပုဒ်မ ၂၆၄၊ ပုဒ်မခွဲ(က) နှင့် တိုင်းဒေသကြီး သို့မဟုတ် ပြည်နယ်အစိုးရအဖွဲ့ ဥပဒေပုဒ်မ ၅၂၊ ပုဒ်မခွဲ (က) နှင့် (ခ) တို့ပါ ပြဋ္ဌာန်းချက်များအရ ရာထူးများမှ နုတ်ထွက်ခွင့် ပြုလိုက်ကြောင်း နိုင်ငံတော်သမ္မတ၏ အမိန့်စာတစ်ရပ်ကို သမ္မတရုံးက ထုတ်ပြန်ခဲ့သည်။

ယင်းအပြင် ဝန်ကြီးချုပ်အချို့နှင့် ဝန်ကြီးအချို့လည်း ရာထူးများမှ အနားပေးရန်ရှိသည့် သတင်းများ နိုင်ငံရေး အသိုင်းအဝိုင်းကြားတွင် ဆက်လက် ထွက်ပေါ်ခဲ့သည်။ ယင်းတို့ထဲတွင် တချို့မှာ ကျန်းမာရေး၊ လူမှုရေး စသည့် အကြောင်းအရာများကြောင့် နုတ်ထွက်စာ တင်ထားကြသူများလည်း ဖြစ်သည်။ ပြည်သူများအကြားတွင် အစိုးရအဖွဲ့အတွင်း အပြောင်းအလဲများကြောင့် NLD အစိုးရ၏ ၂၀၁၈ ခုနှစ်အတွင်း ၎င်းတို့၏ အပြောင်းအလဲများ မည်သို့ဖြစ်မည်လဲ ဆိုသည်ကို ပိုမို စိတ်ဝင်စားလာကြသည်။ တချို့ကလည်း လူထုအကြား ဝေဖန်ခံရမှုများသည့် ဝန်ကြီးချုပ်အချို့ အပြောင်းအလဲတွင် ပါဝင်လာခြင်း မရှိသည့်အပေါ် အားမလိုအားမရဖြစ်ကာ အပြောင်းအလဲအပေါ် ဝေဖန်နေကြသည်။ တချို့ကလည်း လက်ရှိ နုတ်ထွက်ခွင့်ပြုလိုက်သော ဝန်ကြီးချုပ်နှင့် ဝန်ကြီးအချို့မှာ အဂတိကင်းရှင်းပြီး ပြည်သူများအကြား နာမည်ဆိုး မရှိသည့်အတွက် အံ့အားသင့်ရကြောင်း ကျယ်ကျယ်ပြန့်ပြန့် ပြောဆိုသုံးသပ်မှုများလည်း ရှိနေပြန်သည်။

မည်သို့ပင်ဆိုစေ အစိုးရအဖွဲ့အတွင်း ပြောင်းလဲမှုအချို့ ဖြစ်ပေါ်ပြီးနောက်တွင် အသစ်ရောက်လာကြမည့် ဝန်ကြီးချုပ်၊ ဝန်ကြီးများ၏ စွမ်းဆောင်မှုနှင့် NLD အစိုးရ၏ ပြောင်းလဲမှုကို လူထုအနေဖြင့် စောင့်ကြည့် အကဲဖြတ်ကြပေလိမ့်မည်။ အစိုးရသက်တမ်း နှစ်နှစ်တာကာလသို့ ရောက်ရှိလာသည့်အချိန်တွင် အစိုးရ၏ ပြုပြင်ပြောင်းလဲမှု လုပ်ငန်းစဉ်များ၌ စီးပွားရေးပိုင်းဆိုင်ရာ တိုးတက်ကောင်းမွန်လာမှု မရှိခြင်းအပေါ် လူထုအနေဖြင့် စိတ်ပျက်ခဲ့ပြီး ပညာရှင်များနှင့် နယ်ပယ်စုံမှ ပြည်သူများ၏ အပြင်းအထန် ဝေဖန်မှုကို ခံနေရသည်။ အစိုးရ၏ စီးပွားရေးဆိုင်ရာ မူဝါဒများ ချမှတ် အကောင်အထည်ဖော်ရာတွင် ရလဒ်ပိုင်းဆိုင်ရာနှင့် ပတ်သက်၍ မေးခွန်းထုတ်ကြသည်။ သို့သော်လည်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဇန်နဝါရီ ၉ ရက်တွင် ပြုလုပ်ခဲ့သည့် အမျိုးသားစီမံကိန်းကော်မရှင် အစည်းအဝေး၌ နိုင်ငံ၏ အခြေအနေနှင့် ပတ်သက်ပြီး ခြုံငုံပြောပါက ယခင်နှစ်ထက် တိုးတက်ကြောင်းနှင့် အချို့တိုးတက်မှုမှာ ထင်သည်ထက် များကြောင်း ပြောကြားခဲ့သည်။ ၎င်း၏ပြောကြားမှုတွင် တိုးတက်မှုများ ထင်တာထက် မြန်ဆန်သည်ဟု နိုင်ငံတကာ လေ့လာရေးအဖွဲ့များက ပြောထားသည်များ ရှိသည်ဟုလည်း ပြောဆိုခဲ့သည်။

ပြည်သူများအကြားတွင် ယခုနှစ် နှစ်တာကာလအတွင်း စီးပွားရေးပိုင်းဆိုင်ရာ ကျပ်တည်းမှုများ ရှိနေသည့်အပေါ် ညည်းတွားမှုများနှင့်အတူ အစိုးရ၏ စီးပွားရေးဆိုင်ရာမူဝါဒများ ပြတ်သားမှု မရှိခြင်းနှင့် အချို့သော ပြောင်းလဲမှုများမှာ ပြည်သူအပေါ် သက်ရောက်မှု မရှိ၍ ဝေဖန်နေကြသည်ကိုလည်း မငြင်းသာပေ။ ယင်းသို့သော အခြေအနေတွင် အစိုးရအနေဖြင့် လူထု၏အသံကို နားထောင်ကာ မှန်ကန်သည့် လူအပြောင်းအလဲနှင့် မူဝါဒအပြောင်းအလဲကို လုပ်ဆောင်သင့်ပေသည်။
အောက်ခြေလူထု၏ အခြေအနေမှန်ကို ဖော်ပြနိုင်သည့် ကဏ္ဍအသီးသီးမှ (Key Performance Indicators) KPI များဖြင့် ဆန်းစစ် သုံးသပ်နိုင်ခြင်း မရှိပါက မှန်ကန်သည့် မဟာဗျူဟာများ ချမှတ်ရန် မလွယ်သည့်အပြင် အပြောင်းအလဲသည်လည်း ပြည်သူ့အတွက် အချည်းအနှီးပင် ဖြစ်လိမ့်မည်။

“လူကို မကြည့်ဘဲ ပါတီကိုသာ ကြည့်ပါ” ဆိုသည့် မဲဆွယ်ကမ်ပိန်းမှာ ၂၀၁၅ ရွေးကောက်ပွဲတွင် NLD အတွက် ထိရောက်သည့် လှုံ့ဆော်မှု ဖြစ်ခဲ့သည်။ သို့သော်လည်း အဘက်ဘက်မှ နိမ့်ကျနေသော နိုင်ငံကို တာဝန်ယူ အုပ်ချုပ်ရသည့် အခါတွင်မူ လူရောမူပါ အမှားအယွင်း မရှိစေရန် အရေးကြီးမည် ဖြစ်ပါသည်။ သို့ဖြစ်ရာ အစိုးရသက်တမ်း ငါးနှစ်တွင် နှစ်နှစ်နီးပါးခန့် ကုန်ဆုံးခဲ့ပြီ ဖြစ်သည့်အတွက် လက်ကျန်အချိန်များတွင် မှန်ကန်သည့် လူရွေးချယ်မှု၊ ထိရောက်သည့် မူဝါဒချမှတ်နိုင်မှု တို့သာလျှင် လူထုအမှန်တကယ် စိတ်ဝင်စားသည့် အပြောင်းအလဲ ဖြစ်နိုင်ပါကြောင်း The Daily Eleven သတင်းစာက ရေးသားအပ်ပါသည်။

ဇန်နဝါရီ ၁၁ ရက်နေ့ထုတ် The Daily Eleven သတင်းစာ အယ်ဒီတာ့အာဘော်

Most Read

Most Recent