“ထို့ကြောင့် အချိန်နှင့်အခါအလျောက်လည်း ကျောင်းသား၏ဝတ္တရားလည်း ကွဲလာ၏။ ဤပြဆိုပြီးသော ကျောင်းသားဝတ္တရားအားလုံးကို သိမြင်သည်နှင့်အညီ နောင်သော် ဗမာပြည်ကိုဖန်တီးမည့် ကျောင်းသားများသည် ယခုအခါ လူများကဲ့သို့ မညီမညွတ်၊ မလုပ်တတ် မကိုင်တတ်မဖြစ်ရအောင် ကျွန်ုပ်တို့သည် ယခုအခါ ဗမာနိုင်ငံလုံးဆိုင်ရာ ကျောင်းသားသမဂ္ဂအသင်းကြီးကို အထင်အရှား တည်ထောင်ထား၏။ ထိုအသင်းသို့ ဝင်ရောက်အားပေးရန်မှာ ကျောင်းသားတိုင်း၊ တိုင်းပြည်ချစ်စိတ်ရှိသောသူတိုင်း၏ တာဝန်ဝတ္တရားပင်တည်း”
- ဗိုလ်ချုပ်အောင်ဆန်း တက္ကသိုလ်ကျောင်းသားဘဝက ရေးသားခဲ့သော ကျောင်းသားဝတ္တရားဆောင်းပါးမှ
မြန်မာနိုင်ငံ၏ ပညာရေးစနစ်သည် အစုအဖွဲ့နှင့် ပူးပေါင်း လုပ်ဆောင်တတ်စေရန် သင်ကြားပေးခြင်း မရှိသည့်အတွက် နိုင်ငံညီညွတ်ရေး စုပေါင်းလုပ်ဆောင်ရေးအတွက် အထောက်အကူမဖြစ်ကြောင်း နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။ နေပြည်တော်ရှိ MICC-2 ခန်းမတွင် ကျင်းပသော လူငယ်ရေးရာမူဝါဒ မိတ်ဆက်ဖြန့်ချိခြင်း အခမ်းအနားတွင် အမှာစကားပြောကြားရာ၌ ယင်းကဲ့သို့ ပြောကြားခဲ့ခြင်းဖြစ်သည်။ “ကျွန်မတို့နိုင်ငံရဲ့ အားနည်းချက်တစ်ခုက အစုအဖွဲ့နဲ့ တူတူလုပ်တတ်တဲ့ အရည်အချင်း မရှိတဲ့ဟာပါပဲ။ ဒါ ကျွန်မတို့ပညာရေးစနစ်မှာ အစုအဖွဲ့နဲ့တူတူ လုပ်တတ်ဖို့၊ လုပ်ဆောင်ဖို့ မသင်ပေးတာကြောင့်မို့လို့ ကိုယ်တစ်ယောက်တည်း အမှတ်အများဆုံးရအောင် လုပ်တဲ့စနစ်ကနေ ထွက်ပေါ်လာတဲ့စိတ်ဓာတ်တွေဟာ ကျွန်မတို့နိုင်ငံရဲ့ ညီညွတ်ရေးအတွက် စုပေါင်းလုပ်ဆောင်ရေးအတွက် အထောက်အကူမဖြစ်ပါဘူး”ဟု နိုင်ငံတော်၏ အတိုင်ပင်ခံပုဂ္ဂိုလ်က ပြောကြားသည်။ ထို့အတွက် မိဘများ၊ ဆရာများက စုပေါင်းလုပ် ဆောင်တတ်သော အလေ့အကျင့်ရရှိရန် လေ့ကျင်သင်ကြားပေးစေချင်ကြောင်း၊ မိဘများအနေဖြင့် မိမိသားသမီးအား အခြားသူများနှင့် ပြိုင်ခိုင်းခြင်းမပြုဘဲ မိတ်ဆွေ သူငယ်ချင်းများနှင့် စုပေါင်းလုပ်ဆောင်တတ်စေရန် သင်ကြားပေးရမည်ဖြစ်ကြောင်း ၎င်းက ပြောကြားသည်။
လွတ်လပ်ရေးဗိသုကာ အမျိုးသားခေါင်းဆောင်ကြီး ဗိုလ်ချုပ်အောင်ဆန်း ကျောင်းသားဘဝက ရေးသားခဲ့သော ဆောင်းပါးတွင်လည်း “ထိုသို့ဖြစ်ရာ လူတိုင်းလူတိုင်း တစ်ဦးနှင့်တစ်ဦး အပေါင်းအသင်းသမဂ္ဂရှိမှသာ အမျိုးမျိုးသော အယူအဆ အမှတ်အသားတို့ကိုတွေ့မြင်သိရှိရ၍ ပိုမိုအမြင်ကျယ်လာနိုင်သည်။ သို့အမြင်ကျယ်မှ တစ်ဦးကိုတစ်ဦး အနာခံတတ်ခြင်း၊ စောင်မကူညီခြင်း၊ အပြောအဆိုအနေအထိုင် ပြုပြင်လာခြင်း စသည်ဖြင့် လောက၌ လူလုပ်တတ်သည့် အရည်အချင်းများရနိုင်လေသည်။ ထို့ကြောင့် ထိုကူးလူးဆက်ဆံရေး အမြင်သန်အောင် ကျောင်းများ၊ တက္ကသိုလ်များတွင် ကျောင်းအိပ်၊ ကျောင်းစားထားခြင်း၊ အသင်းအပင်းများထောင်ခြင်း စသည်တို့ ပြုလုပ်ကြရလေသည်။ သို့ရာတွင် အပေါင်းအသင်းသမဂ္ဂအတွက် ပြုလုပ်ရာတွင် လွတ်လပ်စွာမပြောရ၊ မဆိုရ၊ မလုပ်ရ၊ မဆွေးနွေးရလျှင် မျက်စိပိတ်ထားသည်နှင့်တူပြန်သည်။ သို့ဖြစ်ရာ နှစ်ဖက်နှစ်ချက်စုံမှ ပညာရေးအစစ် မည်လေသည်။ တစ်ဖန် ယနေ့ဖြစ်သော ကျောင်းသားများသည် နက်ဖြန် ပြည်ကြီးသားများဖြစ်ကြ၏ဟု ဆိုရိုးစကားရှိ၏။သို့ဖြစ်ရာ ပြည်ကြီးသားတို့၏ အင်္ဂါလက္ခဏာ တို့နှင့်ညီအောင် အုပ်ချုပ်နည်း၊ မိမိအခွင့်အရေးအတွက် တိုက်ခိုက်နည်း၊ စကားပြောနည်း၊ စည်းကမ်းသေဝပ်နည်း၊ ကိုယ်လက်ကျန်းမာရေး စသည်ဖြင့် နည်းမျိုးစုံအောင် အသင်းအပင်းများ၊ ကစားနည်းများကိုထွင်ကြ၏” ဟု ပါရှိသည်။
အမှန်တကယ်၌ ပညာရေးစနစ်တစ်ရပ်သည် စာမေးပွဲများ၌ အမှတ်ကောင်းကောင်းဖြင့် အောင်မြင်ရေးအား ရှေးရှုခြင်းထက် အစုအဖွဲ့နှင့် ညီညီညွတ်ညွတ် ပူးပေါင်းလုပ်ဆောင်တတ်စေရေးအတွက် အထောက်အကူပြုရေးကို ပို၍ပင် ဦးစားပေးသင့်သည်။ ကျောင်းသားဘဝက ပူးပေါင်းလုပ်ဆောင်တတ်သော အလေ့အကျင့်များ ရရှိခဲ့ခြင်းမရှိပါက ယင်းကျောင်းသားများ နိုင်ငံတည်ဆောက်ရေးလုပ်ငန်းများ၌ ပါဝင်လုပ်ဆောင်ကြရာတွင် များစွာ အခက်တွေ့စေမည်ဖြစ်သည်။ ကျောင်းသားဘဝ၌ ပူးပေါင်းလုပ်ဆောင်တတ်သော အလေ့အထရရှိအောင် လေ့ကျင့်ရာတွင် လွတ်လပ်သော ကျောင်းသားသမဂ္ဂများ ဖွဲ့စည်းတည်ထောင်ကာ လှုပ်ရှားမှုများဆောင်ရွက်ခြင်းက များစွာအရေးပါသည်။ ထို့ကြောင့် အစုအဖွဲ့နှင့် ပူးပေါင်းလုပ်ဆောင်တတ်သော အလေ့အထကို မွေးမြူနိုင်ရန်အတွက် ကျောင်းသားများ မိမိတို့ဘာသာ လွတ်လပ်စွာ လှုပ်ရှားမှုများ ဆောင်ရွက်နိုင်သည့် ကျောင်းသားသမဂ္ဂများ မရှိမဖြစ် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
(ဇန်နဝါရီ ၆ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)
