ခေါင်းဆောင်မှုပုံစံများအား အဓိပ္ပာယ်ဖွင့်ဆိုခြင်းနှင့် ရှင်းလင်းဖော်ပြခြင်းတို့သည် အရိုးရှင်းပုံစံမှ အလွန်ရှုပ်ထွေးသောပုံစံအထိ အမျိုးမျိုးရှိသည်။ ခေါင်းဆောင်မှုပုံစံများကို အခွင့်အာဏာကို အသုံးပြုပုံ၊ ခေါင်းဆောင်က အခြားသူများနှင့် ဆက်နွှယ်နေပုံံ၊ မိမိလက်အောက်၌ရှိသူများ၏ စိတ်သဘောထားနှင့် အင်အားများကို အသုံးပြုပုံနှင့် ခေါင်းဆောင်တစ်ဦး၏ ဆက်ဆံပုံတို့ဖြင့် ခွဲခြားသတ်မှတ်နိုင်သည်။
အာဏာရှင်ပုံစံ - ခေါင်းဆောင် သို့မဟုတ် မန်နေဂျာသည် အာဏာရှင်တစ်ဦးကဲ့သို့သော ပုံစံကိုအသုံးပြုသည်။ သူသည် ဘာကို၊ ဘယ်နေရာ၊ ဘယ်အချိန်၊ ဘာကြောင့်၊ ဘယ်လိုလုပ်မည် မှန်သမျှကိုလည်းကောင်း၊ မည်သူတို့အား လုပ်စေမည်ဆိုသည်ကိုလည်းကောင်း အစရှိသည့် ဆုံးဖြတ်ချက်အားလုံးကို သူတစ်ဦးတည်းသဘောဖြင့် ချမှတ်သည်။ သူ၏ လမ်းကြောင်းအတိုင်းမလိုက်သည့် နောက်လိုက်များ သို့မဟုတ် ဝန်ထမ်းများကို ပြင်းထန်စွာ အပြစ်ပေးခြင်း သို့မဟုတ် စောစီးစွာ အငြိမ်းစားယူစေခြင်းတို့ ပြုလုပ်သည်။
အာဏာပြပုံစံ - အာဏာရှင်ပုံစံ၏ သဘောသဘာဝသည် တည်ငြိမ်မှုမရှိသောကြောင့် ခေါင်းဆောင်များနှင့် မန်နေဂျာများသည် အာဏာပြသည့်ပုံစံကို ရွေးချယ်လာကြသည်။ အာဏာပြသည့်ပုံစံ၌ ခေါင်းဆောင်သည် အခြားသူများကို ဆုံးဖြတ်ချက်များချမှတ်ရန် ခွင့်ပြုခဲလှသည်။ မိမိသည်သာ အရည်အချင်းအရှိဆုံးနှင့် အတွေ့အကြုံအရှိဆုံးဟု ခံယူသူများဖြစ်သည်။ မိမိ၏အမြင်များသည်သာ အခိုင်မာဆုံးဟု ယူဆလျက် အခြားသူများ၏ အရည်အချင်းများနှင့် မိမိနှင့်ကွဲပြားခြားနားသော ထင်မြင်ချက်များကို ယုံကြည်မှုနည်းပါးသည်။ ၎င်းတို့ကိုလည်း အသိအမှတ်ပြုလေ့မရှိဘဲ အလွယ်တကူ ထိုးနှက်ဝေဖန်လေ့ရှိသည်။ မိမိ၏အကျိုးအတွက်သာ ရှေးရှုလျက်သာ အခြားသူများကို အသုံးချလေ့ရှိသည်။ ယင်းခေါင်းဆောင်မှုပုံစံ၏ အကြီးမားဆုံးအားနည်းချက်မှာ အခြားသူများ၏ ကျွမ်းကျင်မှုနှင့် အရည်အချင်းများကို အသိအမှတ်ပြုရန် ပျက်ကွက်ခြင်းဖြစ်သည်။
အကြံပြုပုံစံ - ယင်းခေါင်းဆောင်မှုပုံစံသည် အခြားသူများ၏ ကျွမ်းကျင်မှုများ၊ အတွေ့အကြုံများနှင့် စိတ်ကူးများအပေါ် အဓိကအားပြုသည်။ သို့သော် ခေါင်းဆောင် သို့မဟုတ် မန်နေဂျာသည် နောက်ဆုံးဆုံးဖြတ်ချက် ချမှတ်သည့်အာဏာကို ဆုပ်ကိုင်ထားဆဲဖြစ်သည်။ ယင်းပုံစံကို ကျင့်သုံးသည့်ခေါင်းဆောင်များသည် ပြဿနာဖြေရှင်းခြင်းနှင့် အဖွဲ့တည်ဆောက်ခြင်းတို့၌ အခြားသူများကို ပါဝင်ခွင့်ပေးကြသည်။ နောက်ဆုံးဆုံးဖြတ်ချက်မချမှတ်မီ မတူကွဲပြားသည့် အခြားနည်းလမ်းများအားလုံးကို ချိန်ဆလေ့ရှိသော်လည်း ဗီတိုအာဏာကို ကိုင်စွဲထားဆဲဖြစ်သည်။
ပူးပေါင်းပါဝင်သည့်ပုံစံ - ခေါင်းဆောင်အများအပြား မသက်မသာဖြစ်ရသည့် ခေါင်းဆောင်မှုပုံစံမှာ ပူးပေါင်းပါဝင်သည့်ပုံစံဖြစ်သည်။ အားလုံးမဟုတ်သော်လည်း လုပ်ပိုင်ခွင့်အာဏာအများစုကို မိမိ၏အဖွဲ့ကို အပ်နှင်းထားသည့်ပုံစံဖြစ်သည်။ မန်နေဂျာသည် အဖွဲ့ခေါင်းဆောင်အဖြစ်သာရှိသည်။ ယင်းခေါင်းဆောင်မှုပုံစံတွင် အဖွဲ့ဝင်များ၏ စိတ်ကူးများသည် ခေါင်းဆောင်၏စိတ်ကူးများနှင့် အညီအမျှအရေးပါသည်။ လူတိုင်း၏ ထည့်ဝင်မှုများကိုစဉ်းစားပြီး ခေါင်းဆောင်မှုသည် အားလုံးပါဝင်လာအောင် အသင်းကို လှုံ့ဆော်သူသာဖြစ်သည်။ ဘောလုံးအသင်းကဲ့သို့ဆိုရလျှင် ခေါင်းဆောင်သည် နည်းပြကစားသမားဖြစ်သည်။ အဖွဲ့၏စိတ်ကူးများကို မိမိကိုယ်ပိုင်စိတ်ကူးများထက် အကြိမ်ပေါင်းများစွာ ပိုမိုလက်ခံမှုပြုလုပ်ရတတ်သည်။ မိမိအဖွဲ့အနေဖြင့် တီထွင်ဖန်တီးမှုရှိအောင် ဆန်းသစ်မွမ်းမံမှုရှိအောင် လှုံ့ဆော်ပေးမှုအပေါ်၌သာ အဓိကအားပြုသည်။
မည်သို့ပင်ဆိုစေကာမူ အချိန်အခါ၊ နေရာ၊ အခြေအနေ၊ မိမိ၏အင်အားအစရှိသည်တို့နှင့် လိုက်လျောညီထွေမှုရှိသော ခေါင်းဆောင်မှုပုံစံကို ကျင့်သုံးနိုင်ကြပါစေဟု The Daily Eleven သတင်းစာက ဆန္ဒပြုအပ်ပါသည်။
သြဂုတ်လ (၉) ရက်နေ့ထုတ် The Daily Eleven သတင်းစာ အယ်ဒီတာ့အာဘော်
