တရုတ်စီမံကိန်းများနှင့် ပွင့်လင်းမြင်သာမှု

တရုတ်စီမံကိန်းများနှင့် ပွင့်လင်းမြင်သာမှု
Published 3 December 2017

ပွင့်ပွင့်လင်းလင်းရှိခြင်း၊ တာဝန်ခံမှုရှိခြင်းနှင့် ရိုးသားမှုရှိခြင်းတို့က အစိုးရ၏ပွင့်လင်းမြင်သာမှုကို သတ်မှတ်သည်။ လွတ်လပ်သော လူ့အဖွဲ့အစည်းတစ်ရပ်၌ ပွင့်လင်းမြင်သာမှုဟူသည် အစိုးရအနေဖြင့် သူ၏နိုင်ငံသားများနှင့်အတူ သတင်းအချက်အလက်များကို အပြန်အလှန်ဖလှယ်မျှဝေခြင်းဖြစ်သည်။ ပွင့်လင်းမြင်သာမှုသည် နိုင်ငံသားများက အစိုးရအရာရှိများ၏ တာဝန်ခံမှုကို ထိန်းသိမ်းထားပုံ၏ အချက်အချာဖြစ်သည်။ အစိုးရအဖွဲ့များသည် ပြည်သူများအတွက် ထမ်းဆောင်ပေးရန် တည်ရှိခြင်းဖြစ်သည်။ အစိုးရအဖွဲ့တာဝန်ရှိသူများက အများပြည်သူနှင့်ဆိုင်သောလုပ်ငန်းများကို ဆောင်ရွက်ကြပုံနှင့် ပတ်သက်၍လည်းကောင်း၊ အခွန်ထမ်းပြည်သူတို့ထံမှ ရရှိသောငွေများကို မည်သို့မည်ပုံ သုံးစွဲကြသနည်းဟူသည်နှင့် ပတ်သက်၍လည်းကောင်း သတင်းအချက်အလက်များသည် အဆင်သင့်ရရှိနိုင်ရမည့်အပြင် အလွယ်တကူလည်း နားလည်နိုင်ရမည်ဖြစ်သည်။ ပွင့်လင်းမြင်သာမှုသည် ကောင်းမွန်ပြီး တရားမျှတသော အုပ်ချုပ်ရေးကို ဖြစ်စေသည်။

တရုတ်နိုင်ငံသို့ ရောက်ရှိနေသော နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် တရုတ်သမ္မတ ရှီကျင်ပင်းဦးဆောင်သော ကိုယ်စားလှယ်အဖွဲ့တို့သည် ဒီဇင်ဘာလ ၁ ရက်တွင် နှစ်နိုင်ငံထိပ်သီးအစည်းအဝေး ကျင်းပခဲ့ကြောင်းနှင့် ရှီကျင်ပင်းသည် ဒေါ်အောင်ဆန်းစုကြည်အား တွေ့ဆုံခဲ့ကြောင်း နိုင်ငံတော်၏ အတိုင်ပင်ခံပုဂ္ဂိုလ်ရုံးက သတင်းထုတ်ပြန်ခဲ့သည်။ ယင်းကဲ့သို့ တွေ့ဆုံစဉ် နှစ်နိုင်ငံအကြားရှိပြီးဖြစ်သည့် ဆွေမျိုးပေါက်ဖော်ဆက်ဆံရေးကို အခြေခံပြီး ဘက်စုံမဟာဗျူဟာမြောက် ပူးပေါင်းဆောင်ရွက်မှုများ အရှိန်အဟုန်မြှင့်တင်ရေး၊ အပြည်ပြည်ဆိုင်ရာ မျက်နှာစာတွင် ဆက်လက်ပူးပေါင်းဆောင်ရွက်ရေး၊ နှစ်ဖက်အဆင့်မြင့် ခေါင်းဆောင်များအကြား ချစ်ကြည်ရေးခရီးစဉ်များ အပြန်အလှန်သွားလာရေး၊ နှစ်နိုင်ငံပြည်သူအချင်းချင်း ချစ်ကြည်ရင်းနှီးမှုတို့ကို ဖော်ဆောင်ရေးနှင့် ကဏ္ဍစုံပူးပေါင်းဆောင်ရွက်ရေးတို့တွင် နှစ်နိုင်ငံအကြား အကောင်အထည်ဖော် ဆောင်ရွက်မည့်စီမံကိန်းကြီးများနှင့် မြန်မာနိုင်ငံ၏ ငြိမ်းချမ်းရေးလုပ်ငန်းစဉ်အား တရုတ်နိုင်ငံမှ အကူအညီပေးမည့်ကိစ္စရပ်များနှင့် ပတ်သက်၍ ရင်းနှီးပွင့်လင်းစွာ ဆွေးနွေးခဲ့ကြောင်း သိရသည်။ သို့သော် မြန်မာနိုင်ငံတွင် ပြုလုပ်နေသော သို့မဟုတ် ပြုလုပ်မည့် တရုတ်နိုင်ငံ၏ စီမံကိန်းများနှင့်ပတ်သက်၍ မည်သည့်သဘောတူညီချက်များ ပြုလုပ်ခဲ့သည်ကို ပွင့်လင်းမြင်သာစွာ ထုတ်ပြန်ခဲ့ခြင်းမရှိပေ။

အငြင်းပွားဖွယ်ရာဖြစ်နေပြီး ရှင်းရှင်းလင်းလင်း သိရှိရခြင်းမရှိသေးသည့် စီမံကိန်းများထဲတွင် မြစ်ဆုံစီမံကိန်းနှင့် ကျောက်ဖြူ-ကူမင်းရထားလမ်း စီမံကိန်းများကဲ့သို့ တရုတ်၏စီမံကိန်းများ ပါဝင်နေသည်။ ကျောက်ဖြူ-ကူမင်းရထားလမ်းစီမံကိန်းကို ယခင်ရထားပို့ဆောင်ရေး ဝန်ကြီးဟောင်းဖြစ်သည့် ဦးအောင်မင်းနှင့် တာဝန်မှအနားယူသွားခဲ့သော ဒုတိယသမ္မတဟောင်း သီဟသူရဦးတင်အောင်မြင့်ဦးတို့ ဦးဆောင်ကာ တရုတ်နိုင်ငံဘက်မှ CREC ကုမ္ပဏီနှင့် ၂၀၁၁ ခုနှစ် ဧပြီလအတွင်း MoU ရေးထိုးခဲ့ခြင်းဖြစ်သည်။ စာချုပ်ရေးထိုးခဲ့စဉ်က တရုတ်ဘက်မှ သုံးနှစ်အတွင်း ယင်းစီမံကိန်းကို အပြီးသတ်လုပ်ဆောင်မည်ဟု ကြေညာမှုများရှိခဲ့သော်လည်း မြန်မာနိုင်ငံနှင့် လုပ်ငန်းလုပ်ဆောင်ရန် သဘောတူညီချက် MoU ရေးထိုးမှုမပြုရသေးမီ သက်တမ်းကုန်ဆုံးသွားသောကြောင့် ရပ်ဆိုင်းထားခဲ့ရသည်။ အထူးစီးပွားရေးဇုန်၊ ရေနက်ဆိပ်ကမ်း၊ သဘာဝဓာတ်ငွေ့ထုတ်လုပ်ရေး၊ ရေနံနှင့်သဘာဝဓာတ်ငွေ့ပိုက်လိုင်း စီမံကိန်းများရှိနေသည့်အပြင် ကျောက်ဖြူနှင့် တရုတ်နိုင်ငံ ယူနန်ပြည်နယ် မြို့တော်ကူမင်းသို့ချိတ်ဆက်မည့် ရထားလမ်းစီမံကိန်းသည် ရွှေသဘာဝဓာတ်ငွေ့ပိုက်လိုင်းနှင့်အပြိုင်ဖြစ်ပြီး ၈၆၈ ကီလိုမီတာ (၅၃၉ မိုင်) ရှည်လျားမည်ဖြစ်သည်။ ယင်းစီမံကိန်းသည် တရုတ်နိုင်ငံအနေဖြင့် မြန်မာနိုင်ငံကိုအသုံးချပြီး စစ်ရေး၊ နိုင်ငံရေးနှင့် စီးပွားရေးအာဏာများ တိုးချဲ့နိုင်မည့်အပြင် တရုတ်နိုင်ငံ၏ မဟာဗျူဟာမြောက် သမုဒ္ဒရာနှစ်စင်းပိုင်ဆိုင်ရေး အိပ်မက်ဖြစ်သော အိန္ဒိယသမုဒ္ဒရာထွက်ပေါက်နှင့် ပစိဖိတ်သမုဒ္ဒရာ ထွက်ပေါက်ရရှိရေးတို့အတွက်လည်း အရေးပါသည်။ အမှန်တကယ်၌ ယင်းစီမံကိန်းကို မြန်မာပြည်သူတို့အနေဖြင့် မနှစ်မြို့နိုင်ကြပေ။ ယင်းစီမံကိန်းသည် မြန်မာနိုင်ငံ၏ အချုပ်အခြာအာဏာကို ထိပါးစေသည်ဟုလည်းကောင်း၊ ရခိုင်ပြည်နယ်ရှိ ရှေးဟောင်းအမွေအနှစ်များကို ထိခိုက်စေသည်ဟုလည်းကောင်း ရှုမြင်ကြသည်။ ၎င်းအပြင် သဘာဝပတ်ဝန်းကျင်ထိခိုက်မှုများ ရှိလာနိုင်သည့်အပြင် မြေသိမ်းခြင်းနှင့် သိမ်းသည့်မြေအတွက် မျှတသည့်လျော်ကြေးမရရှိခြင်း ပြဿနာများလည်းရှိလာနိုင်သည်။ ယင်းကဲ့သို့ အငြင်းပွားဖွယ်ရာအချက်များရှိနေပြီး အများပြည်သူ၏ အကျိုးစီးပွားနှင့်သက်ဆိုင်နေသော စီမံကိန်းမျိုးနှင့်ပတ်သက်၍ ပွင့်လင်းမြင်သာစွာချပြန်ရန်လိုသည်။ အလားတူပင် မြန်မာပြည်သူလူထုအနေဖြင့် လက်မခံသော မြစ်ဆုံစီမံကိန်းကို လက်ရှိအစိုးရအနေဖြင့် တရုတ်နှင့် မည်သို့မည်ပုံ ညှိနှိုင်းကာ မည်ကဲ့သို့သော သဘောတူညီချက်များရရှိခဲ့သည်ကို ပြည်သူလူထုအား ပွင့်လင်းမြင်သာစွာချပြရန် လိုအပ်သည်။

ထို့ကြောင့် လွတ်လပ်သော လူ့အဖွဲ့အစည်းတစ်ရပ်၌ ပွင့်လင်းမြင်သာမှုဟူသည် အစိုးရအနေဖြင့် သူ၏နိုင်ငံသားများနှင့်အတူ သတင်းအချက်အလက်များကို အပြန်အလှန်ဖလှယ်မျှဝေခြင်းမှာ အချက်အချာအကျဆုံးဖြစ်သောကြောင့် မြန်မာနိုင်ငံ၏ အချုပ်အခြာအာဏာနှင့် ပြည်သူတစ်ရပ်လုံး၏ အကျိုးစီးပွားနှင့်သက်ဆိုင်သော မည်သည့်စီမံကိန်းများကိုမဆို မီဒီယာများမှတစ်ဆင့်သော်လည်းကောင်း၊ လွှတ်တော်မှတစ်ဆင့်သော်လည်းကောင်း နိုင်ငံသားများအားလုံးကို တရားဝင်အသိပေး ချပြသင့်ပါကြောင်း The Daily Eleven သတင်းစာက ရေးသားအပ်ပါသည်။

(ဒီဇင်ဘာ (၃) ရက်ထုတ် The Daily Eleven သတင်းစာ အယ်ဒီတာ့အာဘော်)