လူတိုင်းသည် ဘဝ၌ခက်ခဲကျပ်တည်းသော စိန်ခေါ်မှုများကို ရင်ဆိုင်ရတတ်သည်။ ထိုအခါ အခက်အခဲအချို့သည် ကျော်လွှားနိုင်ရန် ခက်ခဲနေတတ်သည်။ အထူးသဖြင့် ဖြစ်နိုင်ခြေအလားအလာများက မိမိဘက်သို့ အလေးမသာသည့်အခါတွင် ဖြစ်သည်။ သို့သော် အနေအထားက မိမိဘက်၌ ရှိမနေသောအခါများတွင်လည်း ဆန့်ကျင်ကျော်လွှားရန် မိမိတို့လုပ်ဆောင်နိုင်သည့် တစ်စုံတစ်ရာရှိနေသည်သာ။ စိန်ခေါ်မှုများကို ကျော်လွှားရန် လိုအပ်သည့်အရာမှာ ဘယ်သောအခါမျှ လက်လျှော့အရှုံးမပေးသည့် စိတ်ထားပင်ဖြစ်သည်။ ယင်းစိတ်ထားသာ ဖွံ့ဖြိုး၍လာပါက စိန်ခေါ်မှုများကို အနည်းနှင့်အများ ကျော်လွှားနိုင်မည်သာဖြစ်သည်။ အမှန်တကယ်၌ စိန်ခေါ်မှုဟူသည် သက်ဆိုင်ရာအနေအထား၌ မိမိထံမှ အကောင်းဆုံးအရာကို ဆွဲထုတ်ရန်ဖြစ်သည်။ စိတ်အေးအေးထား၍ ဖြစ်စဉ်ကို အသေအချာစဉ်းစားရန်လိုသည်။ မည်သည့်နည်းနှင့်မျှ ကျရှုံးရန်အကြောင်းမရှိဟူသော စိတ်သဘောထားမျိုး ဖွံ့ဖြိုးလာရန်လိုသည်။ ဘဝတွင် ပြင်းထန်သည့် အခက်အခဲများနှင့် ပြဿနာများကို တည်တည်ငြိမ်ငြိမ်ဖြင့် ရင်ဆိုင်ရမည်ဖြစ်သည်။

ဘဝတွင် လူအများစုသည် စိန်ခေါ်မှုများကို ရှောင်ရှားလိုကြသည်။ အဘယ်ကြောင့်ဆိုသော် ကျရှုံးမည်ကို စိုးရိမ်ကြောက်ရွံ့သောကြောင့်ဖြစ်သည်။ စိန်ခေါ်မှုများမှ ထွက်ပြေးခြင်းသည်သာ ကျရှုံးခြင်းမည်၏။ လူတိုင်းကျရှုံးဖူးသည်သာ။ မိမိဘယ်နှကြိမ် ကျရှုံးခဲ့သနည်းဟူသည် ထည့်တွက်ရန်မလိုပါ။ ဘဝ၌ ဘယ်နှကြိမ် ပြန်ထနိုင်ခဲ့သနည်းဟူသည်သာ အရေးကြီးသည်။ ပထမ၊ ဒုတိယ သို့မဟုတ် တတိယမြောက် ကျရှုံးခဲ့သည့်တိုင် အလျှော့ပေးရန်မလိုပါ။ မိမိဘာသာ ပြန်ထလျက် မိမိအဘယ်ကြောင့် ကျရှုံးခဲ့သနည်းဟူသည်ကို လေ့လာသင်ယူလျက် အပြုသဘောဆောင်သည့် လားရာအတိုင်း ရွေ့လျားရမည်ဖြစ်သည်။ ဘယ်အရာက မိမိအားကျရှုံးစေသနည်းဟူသည့်အချက်ကို နားလည်သဘောပေါက်သွားခြင်းသည် စိန်ခေါ်မှုအား ကျော်လွှားရန် နည်းလမ်းကို သဘောပေါက်သွားခြင်းပင်ဖြစ်သည်။ ရင်ဆိုင်နေရသည့် ပြဿနာ သို့မဟုတ် စိန်ခေါ်မှုကို အရိုးရှင်းဆုံးဖြစ်အောင်ပြုလုပ်ပြီး ကျော်လွှားရန် အဆင့်များကို ပိုင်းခြားသတ်မှတ်ရမည်ဖြစ်သည်။ ပြီးမှ တစ်ဆင့်ချင်း တက်သွားရန်လိုသည်။ တစ်ဆင့်ချင်း တက်နေစဉ်အတွင်း မိမိအနေဖြင့် စိန်ခေါ်မှုကို ကျော်လွှားနိုင်မည်ဟူသည့် ယုံကြည်ချက် ပို၍ ပို၍ ဖွံ့ဖြိုးလာနိုင်သည်။

မိမိကိုယ်ကိုယ် အကောင်းမြင်ထားမှုနှင့် မိမိကိုယ်ကိုယ် ယုံကြည်မှုအား ထိန်းသိမ်းထားရမည်ဖြစ်သည်။ စိန်ခေါ်မှုကို ကျော်လွှားရန်အတွက် မိမိအနေဖြင့် ယင်းကိစ္စကို အမှန်တကယ်ပြုလုပ်နိုင်မည်ဖြစ်ကြောင်း ယုံကြည်ချက်ရှိရမည်ဖြစ်သည်။ ကျော်လွှားနိုင်မည့် နည်းလမ်းများအားလုံးကို ရှာဖွေဖော်ထုတ်ပြီး အပြည့်အဝအသုံးချမှုနှင့် အားထုတ်မှု ပြုလုပ်ရမည်ဖြစ်သည်။ လူများအနေဖြင့် နေ့စဉ်နေ့တိုင်း စိန်ခေါ်မှုအမျိုးမျိုးကို ကျော်လွှားနေရသည်။ ယင်းတွင် အခက်အခဲဆုံးအပိုင်းမှာ မိမိ၏ စိတ်ပိုင်းဆိုင်ရာတည်ငြိမ်မှုကို ထိန်းထားနိုင်ရေးဖြစ်သည်။ စိတ်ထဲ၌ ယုံကြည်မှုဦးစွာမရရှိဘဲ စိန်ခေါ်မှုများကိုကျော်လွှားရန် ခက်လှသည်။ အဆိုးဆုံးကိုမတွေးဘဲ အကောင်းဆုံးကိုသာ တွေးရပေမည်။ ဘဝတွင် အောင်မြင်သောသူများသည် စိတ်ဓာတ်မကျဘဲ ဘဝ၏အတွေ့အကြုံများကို အနာဂတ်တွင် စိန်ခေါ်မှုများ ကျော်လွှားရေး၌ ကောင်းမွန်စွာ အသုံးချတတ်ကြသည်။

မည်သို့ပင်ဆိုစေကာမူ ဘဝ၌အောင်မြင်သူတစ်ဦး ဖြစ်လာအောင် အခက်အခဲများစွာကို ကျော်လွှားနိုင်သူတစ်ဦး ပြောတတ်သည့် လက်သုံးစကားမှာ “ဘာမဆို ဖြစ်နိုင်တယ်” ဟူ၍သာဖြစ်ပါကြောင်း The Daily Eleven သတင်းစာက ရေးသားအပ်ပါသည်။

နိုဝင်ဘာ (၈) ထုတ် The Daily Eleven သတင်းစာ အယ်ဒီတာ့အာဘော်