w တန်ဖိုးနည်းအိမ်ရာ - Eleven Media Group <

တန်ဖိုးနည်းအိမ်ရာ

မြန်မာနိုင်ငံ၏ မြို့ပြလူနေမှု နှစ်စဉ် တိုးတက်နေသည့်နည်းတူ နေထိုင်မှုဆိုင်ရာ ကုန်ကျစရိတ်များသည်လည်း လိုက်ပါမြင့်တက်လျက်ရှိသည်။ သို့သော် လိုက်ပါမြင့်တက်သည့်အထဲ မပါဝင်သည်မှာ ၀င်ငွေပင်ဖြစ်သည်။ ဥပမာအားဖြင့် ရန်ကုန်မြို့ လူဦးရေ၏ ၇၅ ရာ ခိုင်နှုန်းခန့်မှာ ကျပ်နှစ်သိန်းအောက်သာ ၀င်ငွေရှိနေသည်ဟု စစ်တမ်းတစ်ရပ်တွင် ဖော်ပြထားသည်။ ထို့ကြောင့် မြို့ပြလူနေမှု စရိတ်စက ကာမိစေရန် တန်ဖိုးနည်းသော အိမ်ရာ (သို့မဟုတ်) တန်ဖိုးသင့်တင့်သည့် ပမာဏဖြင့် နေထိုင်နိုင်မှု အိမ်ခန်းများ လိုအပ်မည်ဖြစ်သည်။

ရန်ကုန်မြို့ ရွှေလင်ဗန်းစက်မှုဇုန်ရှိ တော်ဝင်နှင်းဆီ တန်ဖိုးနည်းအိမ်ရာတွင် တိုက်ခန်းများကို တစ်ခန်းလျှင် ကျပ် ၆၂ သိန်းနှုန်းဖြင့် ရောင်းချလျက်ရှိပြီး တန်ဖိုးနည်းအိမ်ရာ တစ်လုံးလျှင် အခန်း ၆၀ ပါဝင်သည့် တိုက် ၂၆ လုံး ရှိနေသည်ဟု တရားဝင် ထုတ်ပြန်ထားသည်။ ယင်းအပြင် အစိုးရမှ ရောင်းချပေးမည့် တန်ဖိုးနည်း၊ တန်ဖိုးသင့်နှင့် တန်ဖိုးမျှအိမ်ရာများကို နှစ်ရှည် အရစ်ကျစနစ်ဖြင့် ၀ယ်ယူနိုင်မည့်အစီအစဉ်များကို တရားဝင်ထုတ်ပြန်ထားသည်။ ဆောက်လုပ်ရေးဝန်ကြီးဌာန၊ မြို့ပြနှင့် အိမ်ရာဖွံ့ဖြိုးရေးဦးစီးဌာနမှ တည်ဆောက်ရောင်းချလျက်ရှိသည့် တန်ဖိုးနည်းအိမ်ရာများမှ တိုက်ခန်းများ ၀ယ်ယူပါက အိမ်တန်ဖိုး၏ ရာခိုင်နှုန်း ၃၀ ကို ဆောက်လုပ်ရေးနှင့် အိမ်ရာဖွံ့ဖြိုးရေးဘဏ် (CHD) ဘဏ်တွင်  စုဆောင်းထားပြီး ကျန်ရာခိုင်နှုန်း ၇၀ ကို ၁၅ နှစ်အရစ်ကျနှစ်ရှည်ချေးငွေစနစ်ဖြင့် CHD ဘဏ်သို့ လစဉ်ပေးချေရမည်ဖြစ်ကာ ချေးငွေအတွက် အတိုးနှုန်းမှာ တစ်နှစ်လျှင် ၁၀ ဒသမ ၅ ရာခိုင်နှုန်း ကျသင့်မည်ဖြစ်သည်။ အစိုးရမှ ရောင်းချပေးမည့် တန်ဖိုးနည်း၊ တန်ဖိုးသင့်နှင့် တန်ဖိုးမျှတအိမ်ရာများကို နှစ်ရှည်အရစ်ကျစနစ်ဖြင့် ၀ယ်ယူလိုလျှင် ဆောက်လုပ်ရေးနှင့်အိမ်ရာဖွံ့ဖြိုးရေးဘဏ်၏ မည်သည့်ဘဏ်ခွဲတိုင်းတွင်မဆို Housing Savings A/C (အိမ်ရာစုဆောင်း ငွေစာရင်း) ကို ကျပ်ငွေ ၁၀၀၀၀ ကျပ်နှင့်စတင်၍ ဖွင့်လှစ်ပြီး မိမိ ၀ယ်ယူလိုသော တိုက်ခန်းတန်ဖိုး၏ ရာခိုင်နှုန်း ၃၀ ကို ပြည့်မီအောင် CHD ဘဏ်တွင် စုဆောင်းထားရမည်ဖြစ်ကြောင်း၊ လစဉ်စုဆောင်းရမည့် ငွေပမာဏကို သတ်မှတ်ထားခြင်း မရှိဘဲ မိမိဝင်ငွေအပေါ်မူတည်၍ လစဉ်ပုံမှန် စုဆောင်းရမည်ဖြစ်သည်။ ဆောက်လုပ်ရေး နှင့် အိမ်ရာဖွံ့ဖြိုးရေးဘဏ်များကို လက်ရှိတွင် ရန်ကုန်မြို့၊ နေပြည်တော်၊ မန္တလေး၊ ပုသိမ်၊ မော်လမြိုင်၊ မကွေး စသည်တို့တွင် ဖွင့်လှစ်ထားပြီး ကျန်ပြည်နယ်နှင့် တိုင်းဒေသကြီးများတွင် ဆက်လက်ဖွင့်လှစ်သွားမည်ဟုလည်း သိရသည်။

မြို့ပြလူနေမှု အပြောင်းအလဲများနှင့်အတူ အလုပ်အကိုင်အခွင့်အလမ်းနှင့် စီးပွားရေးဆိုင်ရာ အခွင့်အလမ်းများကြောင့် တိုင်းနှင့် ပြည်နယ် ဒေသအသီးသီးမှ ရန်ကုန်မြို့သို့ ရွှေ့ပြောင်းလာလျက်ရှိကာ လူဦးရေတိုးပွားမှု အလျင်အမြန်ဆုံးမြို့တော်ဖြစ်လာသည်။ တရားဝင်စာရင်းများအရ ရန်ကုန်မြို့၏ တစ်နှစ်အိမ်ရာလိုအပ်ချက်မှာ အခန်းပေါင်း ၂၀၀၀၀ ကျော်ဖြစ်သည်။ ထို့ကြောင့် ၀င်ငွေနည်းပါးသည့် အခြေခံပြည်သူများအတွက် သင့်တင့်မျှတသော တန်ဖိုးနည်းအိမ်ရာများ လိုအပ်နေပါသည်။ သို့သော် အမှန်တကယ်လိုအပ်ချက်နှင့် ဖြည့်ဆည်းဆောင်ရွက်ချက်များ အံဝင်ခွင်ကျဖြစ်ရန်လိုအပ်သလို အခြေခံလူတန်းစားများ ပိုမိုဖိစီးစေမည့် အစီအမံများမဖြစ်ရန်လည်း လိုအပ်ပါသည်။ မည်သို့ပင်ဖြစ်စေ ရန်ကုန်မြို့အပါအ၀င် လူဦးရေထူထပ်သော မြို့ကြီးများတွင် ၀င်ငွေနည်းပြည်သူများအတွက် တန်ဖိုးသင့်တင့်သည့် နေထိုင်စရာများ ဖန်တီးပေးနိုင်ရေးမှာ အခြေခံလိုအပ်ချက်များအနက် အဓိကလိုအပ်ချက်တစ်ရပ်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

(အောက်တိုဘာ ၈ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)

October 7, 2017














Copy Protected by Chetan's WP-Copyprotect.