တောင်ကြီးခရိုင်တွင် မြို့နယ်ပေါင်းကိုးခုကျော်ရှိ သီးနှံစိုက်ခင်းများတွင် ငမြှောင်တောင်ပိုး ကူးစက်ဖျက်ဆီးခံနေရပြီး ကာကွယ်ရေးလုပ်ငန်းများ ဆောင်ရွက်နေ

ငမြှောင်တောင်ဥများနှင့် ငမြှောင်တောင်ပိုးများအား တွေ့ရစဉ်

ရှမ်းပြည်နယ်တောင်ပိုင်း တောင်ကြီးခရိုင်တွင် မြို့နယ်ပေါင်း ကိုးခုကျော်တို့တွင် ငမြှောင်တောင်ပိုး ကူးစက်ဖျက်ဆီးခံနေရပြီး ကြိုတင်ကာကွယ်ရေးလုပ်ငန်းများကို စိုက်ပျိုးရေးဌာနမှ ပညာပေးလုပ်ငန်းများ ဆောင်ရွက်နေသည်ဟု သြဂုတ် ၃၁ ရက်တွင် တောင်ကြီး ခရိုင် အထွေထွေအုပ်ချုပ်ရေးဦးစီးဌာန အုပ်ချုပ်ရေးမှူး ဦးကိုကိုလွင်က အတည်ပြု ပြောကြားသည်။

တောင်ကြီးခရိုင်တွင်းရှိ တောင်ကြီးမြို့နယ်၊ ညောင်ရွှေမြို့နယ်၊ ကျောက်တစ်လုံးကြီးမြို့နယ်၊ ကလောမြို့နယ်တို့တွင် ငမြှောင်တောင်ပိုး ကျရောက်ခြင်းအခြေအနေ မရှိသေးဘဲ ဟိုပုံး၊ ဆီဆိုင်၊ ပင်းတယ၊ ရွာငံ၊ ရပ်စောက်၊ အင်တော၊ ပင်လောင်း၊ နောင်တရား နှင့် ဖယ်ခုံစသော ကိုးမြို့နယ်တွင် ကျရောက်နေကြောင်း သိရသည်။

ရှမ်းတောင်၊ တောင်ကြီးခရိုင်တွင် ဟိုပုံးမြို့နယ်တွင် ၈၃ ဧက၊ ဆီဆိုင်တွင် ၄၆ ဧက၊ ပင်းတယတွင် ၂၅ ဧက၊ ရွာငံတွင် ၆၄ ဒသမ ၅၀ ဧက၊ ရပ်စောက်တွင် ၅၈ ဧက၊ အင်တောတွင် ၉၄၄ ဧက၊ ပင်လောင်းတွင် ၅၀ ဧက၊ နောင်တရားတွင် ၅၀ ဧက၊ ဖယ်ခုံတွင် ၃၅ ဧက၊ စုစုပေါင်း ခရိုင်ချုပ် ကျရောက်ဧကပေါင်း ၁၃၅၆ ဒသမ ၅၀ ဧက ရှိနေပြီး ထိခိုက်ဧက ပေါင်း ၁၂၈ ဒသမ ၅၀ ဧက ရှိကြောင်း၊ ပျက်စီး ဧကပေါင်း ၆၂ ဧက ရှိကြောင်း စာရင်းများအရ သိရသည်။

အဆိုပါ ထိခိုက်ပျက်စီးခဲ့သော နေရာများတွင် ပြည်နယ်ဘတ်ဂျက်ဖြင့် စိုက်ပျိုးရေး သုံးပစ္စည်းများ၊ ပိုးသတ်ဆေးများ ထောက်ပံ့ပေးအပ်ခဲ့သည်မှာ စုစုပေါင်း ခရိုင်ချုပ် တန်ဖိုး ၃၃ သိန်းကျော်ဖိုးပေးအပ်ခဲ့ကြောင်း၊ ပုဂ္ဂလိကကုမ္ပဏီများမှ ထောက်ပံ့ပေးမှုမှာ စုစုပေါင်း ခရိုင်ချုပ် ငါးသိန်းကျော်ဖိုးရှိကြောင်း၊ ထပ်မံ ထောက်ပံ့ပေးရန် လိုအပ်ချက်အားဖြင့် ကျပ် သိန်း ၁၂၂ သိန်းကျော်တန်ဖိုး လိုအပ်နေသေးကြောင်း သိရသည်။

“အခုကတော့ အကုန်လုံးဖြစ်နေတယ်။ တောင်ကြီးမကျဘူး။ ညောင်ရွှေ၊ ကလော၊ ကျောက်တစ်လုံးကြီး မကျဘူး။ ထိခိုက်ပျက်စီးတာတွေ ရှိနေတယ်။ ကူညီထောက်ပံ့မှုတွေ ပေးထားတာ ရှိတယ်။ လိုအပ်ချက်တွေလည်း ရှိနေသေးတယ်။ စိုက်ပျိုးရေးဌာနနဲ့ ပညာပေး ဆောင်ရွက်နေပါတယ်” ဟု တောင်ကြီးခရိုင် အုပ်ချုပ်ရေးမှူး ဦးကိုကိုလွင်က ပြောကြားသည်။

ငမြှောင်တောင် ပိုးကောင်အမသည် ပျံသန်းနိုင်ကာ ရောက်ရာအရပ်တွင် ဥများ ဥချလေ့ရှိကြောင်း၊ အဆိုပါ ဥမှ ပေါက်ပွားလာသော အကောင်သည် အပင်များကို စားသောက် ဖျက်ဆီးတတ်ကြောင်း၊ အဆိုပါ ဥများကို အချိန်မီနှိမ်နင်းရန် လိုအပ်ကြောင်း၊ မြို့နယ်တွင်း ငမြှောင်တောင်ပိုးများ ကျရောက်ခြင်း လတ်တလော မရှိသေးကြောင်း တောင်ကြီးမြို့နယ် အထွေထွေအုပ်ချုပ်ရေးဦးစီးဌာနမှ ဦးမင်းစိုးက ပြောကြားသည်။

ရှမ်းပြည်တောင်ပိုင်း၊ မြောက်ပိုင်းတို့တွင် ငမြှောင်တောင် အဖျက်ပိုးကျရောက်နေသဖြင့် စပါးခင်း၊ ပြောင်းခင်းများသည် ညတွင်းချင်းပျက်စီးနေကြပြီး အင်မတန်စိုးရိမ်ဖွယ်ရာကောင်းအောင် ဖြစ်နေသဖြင့် အမျိုးသားရေးအဆင့်အနေဖြင့် ရှမ်းပြည်နယ်အစိုးရမှ အဆိုပါ ကိစ္စကို ချက်ချင်းအရေးပေါ် နှိမ်နင်းဖြေရှင်းပေးရန် လိုအပ်နေပြီဖြစ်ကြောင်း စိုက်ပျိုးတောင်သူများက ပြောကြားသည်။

အဆိုပါ ငမြောင်တောင်ပိုးများသည် ရုပ်ဖုံးအဆင့်မှ အကောင်ဘ၀သို့ ကူးပြောင်းသွားချိန်တွင် ညတွင်းချင်း တစ်ညလျှင် မိုင် ၆၀ ပျံသန်းနိုင်ပြီး အဆိုပါရုပ်ဖုံးအဆင့်ကို ၁၄ ရက်အတွင်း နှိမ်နင်းနိုင်ခြင်းမရှိပါက ရှမ်းပြည်နယ်အတွင်း မိုင်ထောင်ပေါင်းများစွာကို ချက်ချင်းပျံ့နှံ့သွားနိုင်သည့် အခြေအနေသည် စိုးရိမ်ဖွယ်ရာဖြစ်နေကြောင်း စိုက်ပျိုးတောင်သူများက ပြောကြားသည်။

နှစ်ပေါင်း ၂၀ ကျော်က ဖြစ်စဉ်နှင့်ပတ်သက်ပြီး မန္တလေးဘီယာ ဖက်စပ်ထုတ်လုပ်ခဲ့သော မြန်မာရောင်ခြည်ဦးကုမ္ပဏီပိုင်ရှင် ဒေါ်ဝင်းဝင်းနုအား အများနှင့်ဆိုင်သောပစ္စည်းများ ကာကွယ်စောင့်ရှောက်ရေးဥပဒေပုဒ်မ သုံးခုဖြင့် စသုံးလုံးက တရားစွဲဆိုထားမှု စွဲချက်တင်အမိန့်ချ

နှစ်ပေါင်း ၂၀ ကျော်က ဖြစ်စဉ်နှင့် ပတ်သက်ပြီး မန္တလေးဘီယာဖက်စပ်လုပ်ကိုင်ခဲ့သော မြန်မာရောင်ခြည်ဦး ကုမ္ပဏီပိုင်ရှင် ဒေါ်ဝင်းဝင်းနုအား အများနှင့်ဆိုင်သောပစ္စည်းများ ကာကွယ်စောင့်ရှောက်ရေး ဥပဒေပုဒ်မ သုံးခုဖြင့် စွဲချက်တင်အမိန့်ချမှတ်ခဲ့ကြောင်း သြဂုတ် ၃၁ ရက်တွင် စုံစမ်းသိရှိရသည်။

“သြဂုတ် ၃၀ ရက်က ဒေါ်ဝင်းဝင်းနုကို အ.ပ.က ၃ ပုဒ်မသုံးခုစလုံးနဲ့ စွဲချက်တင်ခဲ့တယ်။ သူ့အမှုကို ဒုခရိုင်တရားသူကြီး ၈ တရားခွင်မှာ စစ်ဆေးနေတာပါ။ စက်တင်ဘာ ၆ ရက်ကို စစ်ဆေးဖို့အတွက် ထပ်ပြီးရုံး ချိန်းချိန်းဆိုထားပါတယ်” ဟု အရှေ့ပိုင်းခရိုင်  တရားရုံးမှ တာဝန်ရှိသူတစ်ဦးက ဆိုသည်။

မြန်မာ့ရောင်ခြည်ဦး ကုမ္ပဏီပိုင်ရှင် ဒေါ်ဝင်းဝင်းနုမှာ ၁၉၉၃ ခုနှစ်က အစိုးရနှင့် အတူမန္တလေးဘီယာစက်ရုံကို ဖက်စပ်လုပ်ကိုင်ခဲ့ကြောင်းသိရပြီး စက်ရုံလည်ပတ်စဉ် ၁၉၉၄ ခုနှစ်မှ ၁၉၉၈ ခုနှစ်အတွင်း ဘီယာချက်ရန် လယ်ယာစိုက်ပျိုးရေးဝန်ကြီးဌာနမှ သကြားဝယ်ယူရာတွင် ဈေးနှုန်းကိုမမှန်မကန် တင်ပြခဲ့သည်ဟုဆိုကာ အထူးစုံစမ်းစစ်ဆေး ရေးဦးစီးဌာနက တရားစွဲဆိုခဲ့ခြင်းဖြစ်ကြောင်း သိရသည်။

၁၉၉၇ ခုနှစ်တွင်စက်မှုဝန်ကြီး ဦးအောင်သောင်း လက်ထက်က ငွေကြေးရင်းနှီးမြှုပ်နှံမှု အပိုင်းများ၌ အငြင်းပွားမှုများ ပေါ်ပေါက်လာခဲ့ပြီး ၁၉၉၈ ခုနှစ်တွင် စစ်အစိုးရက စက်ရုံအား ၀င်ရောက်သိမ်းပိုက်ခဲ့ပြီး ငွေကြေးနှင့် ပတ်သက်ပြီးလည်း ထိန်းချုပ်ခံခဲ့ရကြောင်း ၂၀၁၃ ခုနှစ်တွင် ဧရာဝတီကဖော်ပြထားသည့် သတင်းတစ်ပုဒ်တွင် ရေးသားထားသည်။

ယင်းအဖြစ်အပျက်များနှင့် ပတ်သက်ပြီး နိုင်ငံတကာ တရားရုံးတွင် စစ်အစိုးရနှင့် ဒေါ်ဝင်းဝင်းနုတို့ အကြား တရားစွဲဆိုမှုများ ရှိခဲ့ရာ နှစ်နှစ်ခန့် ကြာမြင့်ခဲ့သည်။

စက်ရုံကို ၁၉၉၈ ခုနှစ် နိုဝင်ဘာလတွင် အစိုးရကပြန်သိမ်းယူပြီးနောက် ဒေါ်ဝင်းဝင်းနုမှာ စင်ကာပူနိုင်ငံတွင် သွားရောက်နေထိုင်ခဲ့ကြောင်းသိရပြီး ယခုနှစ် ဇန်န၀ါရီလအတွင်း မြန်မာပြည်သို့အလည်အပတ်ရောက်ရှိနေစဉ် အဆိုပါအမှုဖြင့် ဖမ်းဆီးခံခဲ့ရခြင်း ဖြစ်ကာ အင်းစိန်ထောင်တွင် ချုပ်နှောင်ထားကြောင်း သိရသည်။

အများနှင့်ဆိုင်သော ပစ္စည်းများကာကွယ်စောင့်ရှောက်ရေး ဥပဒေပုဒ်မ ၃ နှင့် တရားစွဲဆိုခံရသူကို တရားရုံးက ပြစ်ဒဏ် အမိန့်ချမည်ဆိုပါက ထောင်ဒဏ် ၁၀ နှစ်မှ ထောင်ဒဏ်တစ်သက်တစ်ကျွန်းအထိ ချမှတ် ခံရနိုင်ကြောင်း သိရသည်။

စီရော်နယ်လ်ဒိုဝတ်ဆင်ခဲ့သည့် ကျောနံပါတ်(၇)အား ကစားသမားသစ် မာရီယာနိုဒီယက်ဇ် ၀တ်ဆင်ခွင့်ရရှိ်

ရီးယဲလ်မက်ဒရစ်အသင်းသည် ယနေ့သြဂုတ်(၃၁)ရက်တွင် လိုင်ယွန်အသင်းမှ ခေါ်ယူထားသည့် လူငယ်တိုက်စစ်မှူး မာရီယာနိုဒီယက်ဇ်ကို မိတ်ဆက်ပွဲပြုလုပ်ခဲ့ပြီး စီရော်နယ်လ်ဒိုဝတ်ဆင်ခဲ့သည့်ကျောနံပါတ်(၇)အား ၀တ်ဆင်ကစားစေမည်ဖြစ်ကြောင်း သိရသည်။

Photos: Twitter

အသက်(၂၅)နှစ်အရွယ်ရှိ ဒိုမီနီကန်တိုက်စစ်မှူး မာရီယာနိုဒီယက်ဇ်သည် ရီးယဲလ်မက်ဒရစ်လူငယ်အသင်းများတွင် ပါဝင်ကစားခဲ့ဖူးသူဖြစ်ပြီး၂၀၁၆-၁၇ ဘောလုံးရာသီအတွင်း နည်းပြဇီဒန်းလက်ထက်၌ ရီးယဲလ်မက်ဒရစ်အသင်းအတွက် လာလီဂါ(၈)ပွဲ ပါဝင်ကစားပြီး (၁)ဂိုးသွင်းယူပေးခဲ့သူဖြစ်သည်။

မာရီယာနိုဒီယက်ဇ်သည် ၂၀၁၇ခုနှစ် ဇွန်(၃၀)ရက်တွင် လိုင်ယွန်အသင်းသို့ ယူရို(၈)သန်းဖြင့် ပြောင်းရွှေ့ခဲ့ပြီးနောက် တစ်နှစ်ခန့် အကြာမှာပင် အသင်းဟောင်းရီးယဲလ်မက်ဒရစ်သို့ ပြောင်းရွှေ့ကြေးယူရို(၂၃)သန်းဖြင့် ပြန်လည်ရောက်ရှိလာခဲ့ခြင်းဖြစ်သည်။

အသင်း၏ဂန္ထ၀င်ကစားသမားများ၏ကျောနံပါတ်ကို ၀တ်ဆင်ကစားခွင့်ရခြင်းနှင့် ပတ်သက်ပြီး မာရီယာနိုဒီယက်ဇ်က ” ဒါက ကျွန် တော့်အတွက် ကြီးမားတဲ့စိန်ခေါ်မှုပါပဲ။ ဂန္ထ၀င်ကစားသမားတွေရဲ့ ကျောနံပါတ်ကိုဝတ်ဆင်ခွင့်ရတဲ့အတွက်လည်း ဂုဏ်ယူမိပါတယ်။ ဆီဗီလာအသင်းက ကျွန်တော့်ကို ကမ်းလှမ်းမှုတွေရှိခဲ့ပါတယ်။ ဒါပေမဲ့ဒီနေ့မှာတော့ကမ္ဘာ့အကောင်းဆုံးအသင်းနဲ့စာချုပ်ချုပ်ဆိုနိုင်ခဲ့ပါပြီ။
ဒီအတွက် ကျွန်တော်အရမ်းပျော်ရွှင်မိပါတယ်” ဟုပြောကြားခဲ့သည်။

ရီးယဲလ်မက်ဒရစ်အသင်းတွင် ကျောနံပါတ်(၇)အား စပိန်တိုက်စစ်မှူးဟောင်း ရာအူးလ်၊ ပေါ်တူဂီတိုက်စစ်မှူး စီရော်နယ်လ်ဒို တို့အပါအ ၀င် အသင်း၏ဂန္ထ၀င်ကစားသမားများက ၀တ်ဆင်ကစားခဲ့ကြသည်။

 

နိုင်ငံပိုင်စီးပွားရေး လုပ်ငန်းများအား တူညီသောလုပ်ငန်းအလိုက်စုဖွဲ့ပြီး နိုင်ငံပိုင်လုပ်ငန်းပြုပြင်ပြောင်းလဲရေး စီမံချက်နှင့် မဟာဗျူဟာတစ်ရပ် ချမှတ်အကောင်အထည်ဖော်ပေးရန် ပြည်သူ့လွှတ်တော်၌ အဆိုတင်သွင်း

နိုင်ငံပိုင်စီးပွားရေး လုပ်ငန်းကြီးများအား တူညီသောလုပ်ငန်း အလိုက်စုဖွဲ့ပြီး နိုင်ငံပိုင်လုပ်ငန်း ပြုပြင်ပြောင်းလဲရေး စီမံချက်နှင့် မဟာဗျူဟာတစ်ရပ် ချမှတ်အကောင်အထည်ဖော်ပေးရန် ပြည်သူ့လွှတ်တော်တွင် အဆိုတင်သွင်းခဲ့ကြောင်း သိရသည်။

နေပြည်တော်၌ သြဂုတ် ၃၁ ရက်က ပြုလုပ်သော ဒုတိယအကြိမ် ပြည်သူ့လွှတ်တော် န၀မပုံမှန်အစည်းအဝေး ၁၄ ရက် မြောက်နေ့တွင် ဒဂုံမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဒေါက်တာ ဒေါ်သက်သက်ခိုင်က မတူကွဲပြားသော လုပ်ငန်းသဘာဝ ရှိကြသည့် နိုင်ငံပိုင်စီးပွားရေးလုပ်ငန်းကြီးများအား သဘာဝအားဖြင့် တူညီသော လုပ်ငန်းအလိုက် တူရာစုဖွဲ့ပြီး အုပ်စုတစ်ခုစီနှင့် ဆီလျော်သော ပြုပြင်ပြောင်းလဲရေးမူဝါဒများ ချမှတ်ပြီး အားလုံးကို လွှမ်းခြုံနိုင်သည့် နိုင်ငံပိုင်လုပ်ငန်း ပြုပြင်ပြောင်းလဲရေး စီမံချက်နှင့် မဟာဗျူဟာ တစ်ရပ်ချမှတ် အကောင်အထည်ဖော်ပေးပါရန် ပြည်ထောင်စုအစိုးရအား တိုက်တွန်းကြောင်းအဆိုကို တင်သွင်းခဲ့ခြင်း ဖြစ်သည်။

“ကျွန်မအနေနဲ့ ယခုအဆိုကို တင်သွင်းရခြင်းဟာ နိုင်ငံပိုင်လုပ်ငန်းအများစု အရှုံးပေါ်နေပြီး ၎င်းင်းအရှုံးပေါ်ခြင်းကို ပြည်ထောင်စုဘဏ္ဍာရန်ပုံငွေမှ ကျခံသုံးစွဲနေရခြင်းနဲ့ နိုင်ငံပိုင် စီးပွားရေးလုပ်ငန်းများရဲ့ ပိုင်ဆိုင်မှု ပုံစံမှားယွင်းနေခြင်းတို့ကြောင့် ဖြစ်ပါတယ်” ဟု အဆိုရှင် ဒေါက်တာဒေါ်သက်သက်ခိုင်က ပြောကြားသည်။

၂၀၁၇ ခုနှစ် အောက်တိုဘာတွင် ကမ္ဘာ့ဘဏ်ကထုတ်ပြန်သည့် မြန်မာ့စီးပွားရေး လေ့လာစောင့်ကြည့်ခြင်း အစီရင်ခံစာအရ ၂၀၁၇ ခုနှစ်တွင် နိုင်ငံပိုင်စီးပွားရေးလုပ်ငန်းပေါင်း ၃၂  ခုရှိပြီး ၎င်းနိုင်ငံပိုင်လုပ်ငန်းများမှာ အလုပ်အကိုင်အားဖြင့် ၁၄၅,၀၀၀ ကျော်ခန့် ရှိကာ ပြည်သူ့ဝန်ထမ်းအားလုံး၏ ၁၅ ရာခိုင်နှုန်းနှင့် တစ်ပြည်လုံးတွင် အလုပ်လုပ်နေကြသည့် လုပ်သား ၂၂  ဒသမ ၇ သန်း၏ ၁ ရာခိုင်နှုန်းအောက်တွင်ရှိကြောင်း အဆိုရှင်က ပြောကြားသည်။

ထို့ပြင် နိုင်ငံတော်ပိုင် စီးပွားရေးလုပ်ငန်းကြီးများသည် လုပ်ငန်းသဘာဝအားဖြင့် လွန်စွာခြားနားကြပြီး နိုင်ငံပိုင်စီးပွားရေး လုပ်ငန်းများ၏ ၀င်ငွေထွက်ငွေသည် အစိုးရ တစ်ရပ်လုံး၏ ၀င်ငွေနှင့် အသုံးစရိတ်အားလုံး၏ သုံးပုံတစ်ပုံထက်ကျော်လွန်နေပြီး ပြည်ထောင်စုဘဏ္ဍာရန်ပုံငွေအတွက် အရေးကြီးသော အစိတ်အပိုင်းတစ်ခုဖြစ်နေကာ လွန်ခဲ့သော လေးနှစ်အတွင်း နိုင်ငံပိုင်စီးပွားရေး လုပ်ငန်းများ၏ ၀င်ငွေနှင့်အသုံးစရိတ် စုစုပေါင်းသည် ဂျီဒီပီ၏ ၃၅ ရာခိုင်နှုန်းနှင့် ၄၅ ရာခိုင်နှုန်းကြားတွင် ရှိခဲ့ကြောင်း၊ နိုင်ငံပိုင် လုပ်ငန်းများ၏ ရောင်းရငွေသည်  ဂျီဒီပီ၏ ခုနစ်ရာခိုင်နှုန်းသာရှိသည်ကို တွေ့ရကြောင်း၊ နိုင်ငံပိုင်လုပ်ငန်းများ၏ အကြမ်းအမြတ်နှင့် အသားတင်အမြတ်သည်လည်း ကဏ္ဍတိုင်းတွင် ကျဆင်းလာသည်ကိုတွေ့ရကာ ၂၀၁၄-  ၂၀၁၅ ဘဏ္ဍာနှစ်တွင် နိုင်ငံပိုင်စီးပွားရေး ကဏ္ဍမှ ပြည်ထောင်စုဘဏ္ဍာရန်ပုံငွေသို့ ပေးသွင်းငွေသည် ပြည်ထောင်စုဘဏ္ဍာရန်ပုံငွေမှ ပြန်လည်ထုတ်ယူသုံးစွဲငွေထက် နိမ့်ကျလာခြင်းကြောင့် နိုင်ငံပိုင်စီးပွားရေး ကဏ္ဍ၏အရှုံးပမာဏသည် ၂၀၁၄-၂၀၁၅ ဘဏ္ဍာနှစ်တွင် ဂျီဒီပီ၏ ၀ ဒသမ ၇ ရာခိုင်နှုန်းရှိခဲ့ကြောင်း ဒေါက်တာ ဒေါ်သက်သက်ခိုင်က ပြောကြားသည်။

“၂၀၁၃-၂၀၁၄ ဘဏ္ဍာနှစ်မှာ စတင်ခဲ့တဲ့ နိုင်ငံပိုင်လုပ်ငန်းပြုပြင်ပြောင်းလဲရေးဟာ ရည်ရွယ်ချက်ကောင်းတွေနဲ့ ဆောင်ရွက်ခဲ့ပေမဲ့ နိုင်ငံပိုင်စီးပွားရေးလုပ်ငန်းအများစုဟာ အရှုံးပေါ်နေကြပြီး အခြေခံအဆောက်အအုံနဲ့ဆိုင်တဲ့ နိုင်ငံပိုင်လုပ်ငန်းတွေအတွက် လုပ်ငန်းလည်ပတ်စရိတ်မြင့်တက်လာပြီး သဘာဝ သယံဇာတရောင်းရငွေ ကျဆင်းလာတဲ့အတွက် နိုင်ငံပိုင်စီးပွားရေးလုပ်ငန်းအားလုံးရဲ့ စုစုပေါင်းအရှုံးငွေဟာ တိုင်းပြည်ဂျီဒီပီရဲ့ ၀ ဒသမ ၇ ရာခိုင်နှုန်းအထိ တိုးမြင့်လာတာကို တွေ့ရှိရမှာ ဖြစ်ပါတယ်။ နိုင်ငံပိုင်စီးပွားရေး  လုပ်ငန်းများရဲ့ ထုတ်လုပ်မှုနဲ့ ပြိုင်ဆိုင်မှုစွမ်းအားများ ကျဆင်းနေပြီး လုပ်ငန်းဆောင်ရွက်မှု စရိတ်စကတွေ တိုးလာခြင်းတို့ကြောင့် အမြတ်အစွန်း ရရှိနိုင်စွမ်းတွေ ကျဆင်းနေတဲ့အတွက် နိုင်ငံပိုင်စီးပွားရေးကဏ္ဍကြီးတစ်ခုလုံးကို စီမံကိန်းနဲ့ ဘဏ္ဍာရေးဝန်ကြီးဌာန အနေနဲ့ ပြည်ထောင်စုအစိုးရကိုယ်စား နိုင်ငံပိုင်စီးပွားရေးဘဏ္ဍတစ်ခုလုံးရဲ့ ပိုင်ဆိုင်မှုပုံစံ၊ စီမံခန့်ခွဲခြင်းနဲ့ ကြပ်မတ်စစ်ဆေးခြင်းတို့အတွက် ပြုပြင်ပြောင်းလဲမှုတွေ အကောင်အထည်ဖော်ကြပ်မတ်ဖို့ လိုအပ်လျက်ရှိပါတယ်” ဟု ဒေါက်တာဒေါ်သက်သက်ခိုင်က ပြောကြားသည်။

အဆိုပါ နိုင်ငံပိုင်စီးပွားရေး လုပ်ငန်းကြီးများအား တူညီသောလုပ်ငန်းအလိုက်စုဖွဲ့ပြီး နိုင်ငံပိုင်လုပ်ငန်း ပြုပြင်ပြောင်းလဲရေး စီမံချက်နှင့် မဟာဗျူဟာတစ်ရပ် ချမှတ်အကောင်အထည်ဖော်ပေးရန် အဆိုကို မင်္ဂလာဒုံမဲဆန္ဒနယ်ပြည်သူ့လွှတ်တော်ကိုယ်စားလှယ် ဦးအောင်လှိုင်ဝင်းက ထောက်ခံဆွေးနွေးခဲ့ပြီး လွှတ်တော်ကလည်း လက်ခံဆွေးနွေးရန် သဘောတူခဲ့သည်။

ရခိုင်ပြည်နယ်ဆိုင်ရာ လွတ်လပ်သော စုံစမ်းစစ်ဆေးရေးကော်မရှင်အဖွဲ့ အကြမ်းဖက်မှုဖြစ်ပွားခဲ့ရာ မောင်တောဒေသသို့ ပထမဆုံးအကြိမ် ကွင်းဆင်း

 

ရခိုင်ပြည်နယ်ဆိုင်ရာ လွတ်လပ်သော စုံစမ်းစစ်ဆေးရေးကော်မရှင်အဖွဲ့ အကြမ်းဖက်မှုဖြစ်ပွားခဲ့ရာ မောင်တောဒေသသို့ သြဂုတ် ၃၁ ရက်က ပထမဆုံးအကြိမ် ကွင်းဆင်းခဲ့ကြောင်း သိရသည်။

ရခိုင်ပြည်နယ်ဆိုင်ရာ လွတ်လပ်သော စုံစမ်းစစ်ဆေးရေးကော်မရှင်ဥက္ကဋ္ဌ သံအမတ်ကြီး ရိုဆာရီယိုမယ်နာလိုနှင့် အဖွဲ့ဝင်များဖြစ်ကြသည့် ဦးမြသိန်း၊ သံအမတ်ကြီး ကင်ဇိုအိုရှီးမား၊ ပါမောက္ခ ဒေါက်တာအောင်ထွန်းသက်တို့ ဦးဆောင်သောအဖွဲ့သည် မောင်တောမြို့နယ် ငါးခူရရှေ့တန်းပြန်လည်လက် ခံရေးစခန်းသို့ နံနက် ၉ နာရီ မိနစ် ၂၀ တွင် ရဟတ်ယာဉ်ဖြင့် ရောက်ရှိခဲ့ပြီး စခန်းတွင် ဆောင်ရွက်ထားရှိသည်များနှင့် ပတ်သက်ပြီး ကော်မရှင်ဥက္ကဋ္ဌက သိရှိလိုသည်များကို စုံစမ်းမေးမြန်းခဲ့ကြောင်း သိရသည်။

ထို့ပြင် လွတ်လပ်သော စုံစမ်းစစ်ဆေးရေးကော်မရှင်အဖွဲ့သည် ငါးခူရကျေးရွာအုပ်ချုပ်ရေးမှူးရုံး၌ ကျေးရွာတွင် အတူနေထိုင်နေကြသည့် ရခိုင် ၊ ဘင်္ဂါလီ ၊ ဟိန္ဒူဘာသာဝင်များနှင့် သီးခြားတွေ့ဆုံမေးမြန်းခဲ့ကြောင်း သိရသည်။

ထို့နောက် မောင်တောခရိုင် ထွေအုပ်ရုံးတွင် အကြမ်းဖက်တိုက်ခိုက်မှုမဖြစ်မီ  ARSA အစွန်းရောက် ဘင်္ဂါလီအဖွဲ့၏ သတ်ဖြတ်ခြင်းခံခဲ့ရသည့် ဘင်္ဂါလီမိသားစုဝင်များ၊ အကြမ်းဖက်ဖြစ်စဉ်အတွင်း အစုလိုက်အပြုံလိုက် သတ်ဖြတ်ခြင်းကိုခံခဲ့ရသည့် ဟိန္ဒူဘာသာဝင်များ၏ မိသားစုဝင်များ ၊ အကြမ်းဖက်ဖြစ်စဉ် ပြီးနောက် တစ်ဖက်နိုင်ငံသို့ ထွက်ပြေးခဲ့ပြီးနောက် ပြန်လည်ဝင်ရောက်လာသည့် ဘင်္ဂါလီမိသားစုဝင်များနှင့် တွေ့ဆုံမေးမြန်းခဲ့ကြောင်း သိရသည်။

ထို့နောက် ရွှေဇားကျေးရွာ စာသင် ကျောင်းတွင် ဟိန္ဒူ၊ ဘင်္ဂါလီ၊ ရခိုင်ကျေးရွာ သားများနှင့် တွေ့ဆုံခဲ့ကြောင်း သိရသည်။

လွတ်လပ်သော စုံစမ်းစစ်ဆေးရေးကော်မရှင်ကို နိုင်ငံတော်သမ္မတရုံးက ဇူလိုင် ၃၀ ရက်က ဖွဲ့စည်းခဲ့ခြင်းဖြစ်ပြီး ARSA အကြမ်းဖက်တိုက်ခိုက်မှုဖြစ်ပွားပြီးနောက် လူ့အခွင့်အရေး ချိုးဖောက်ကြောင်း စွပ်စွဲချက်များအပြင် ဆက်နွှယ်နေသည့်ကိစ္စများကို စုံစမ်းစစ်ဆေးရန်ဖြစ်ကြောင်း နိုင်ငံတော်သမ္မတရုံးက ထုတ်ပြန်ထားသည်။

လွတ်လပ်သော စုံစမ်းစစ်ဆေးရေးကော်မရှင် ဥက္ကဋ္ဌနှင့်အဖွဲ့ဝင်များသည် စစ်တွေမြို့မှတစ်ဆင့် မောင်တောမြို့နယ်သို့ရဟတ်ယာဉ်ဖြင့် သွားရောက်ခြင်းဖြစ်ကြောင်း သတင်းရရှိသည်။

တပ်မတော်ကာကွယ်ရေးဦးစီးချုပ်၏ Page အပါအ၀င် တပ်မတော် Page အချို့ကို Facebook က ပိတ်သိမ်းမှုအပေါ် ပြည်ခိုင်ဖြိုးပါတီ လွှတ်တော်ကိုယ်စားလှယ် အရေးကြီးအဆိုတင်သွင်းရန် တင်ပြခဲ့သော်လည်း လွှတ်တော်ဥက္ကဋ္ဌ ခွင့်မပြု

တပ်မတော်ကာကွယ်ရေးဦးစီးချုပ်၏  Page အပါအ၀င် တပ်မတော် Page အချို့ကို Facebook  က ပိတ်သိမ်းမှုအပေါ် အဆိုတင်သွင်းရန်တင်ပြခဲ့သော်လည်း လွှတ်တော် ဥက္ကဋ္ဌခွင့်မပြုကြောင်း အဆိုတင်သွင်းရန် တင်ပြခဲ့သူ ပြည်ခိုင်ဖြိုးပါတီဝင် ပျော်ဘွယ်မဲဆန္ဒနယ် ပြည်သူ့လွှတ်တော်ကိုယ်စားလှယ် ဦးသောင်းအေးက သြဂုတ် ၃၁ ရက်တွင် ပြုလုပ်သော ပြည်သူ့လွှတ်တော်အစည်းအဝေး ခေတ္တရပ်နားချိန်တွင် သတင်းထောက်များအား ပြောကြားသည်။

“ဖေ့စ်ဘွတ်က ဒီလိုလေးလုပ်တယ်ဆိုတာ သာမန်ပြည်သူတွေအနေနဲ့တော့ ဒီလိုပဲ မြင်ကောင်းမြင်လိမ့်မယ်။ သို့သော်လည်း ဒီအကြောင်းအရာတွေဟာ အခုမှ ၀ုန်းခနဲ ထပေါက်လာတာ မဟုတ်ဘူး။ တို့တိုင်းပြည်၊ တို့နိုင်ငံမှာ အရင်တုန်းကလည်း အနောက် အုပ်စုနဲ့ အရှေ့အုပ်စုနဲ့ အထူးသဖြင့် အမေရိကန်နဲ့ တရုတ်နဲ့ ပြဿနာတွေ အများကြီးရှိခဲ့တယ်။ အကြောင်းအရာတွေကို အကုန်လုံး ခြုံကြည့်လိုက်လို့ရှိရင် သာမန်ဖြစ်နေတဲ့ ဖြစ်စဉ်မဟုတ်ဘူး။ သာမန်ကို မထားနိုင်လို့ အရေးကြီးအဆိုကိုတင်တာ။ ဒီဟာကို နည်းဥပဒေနဲ့ မကိုက်ညီဘူး။ ဘယ်နည်းဥပဒေလဲလို့ပြောတော့ ပြည်သူ့လွှတ်တော် ဥပဒေ ၁၆၃ (က) (၂) အရ အဲဒီ (က)(၂) အရ အချက်သုံးချက်ရှိတယ်။ အဆိုတစ်ရပ်ဟာ လောလောဆယ်ဖြစ်ပေါ်နေတဲ့ ကိစ္စဖြစ်ရမယ်။  နောက်အများပြည်သူနဲ့ သက်ဆိုင်တဲ့ ကိစ္စဖြစ်ရမယ်။ လွှတ်တော်မှာ ဆုံးဖြတ်ချက် ရယူရမယ့် ကိစ္စဖြစ်ရမယ်။ ရောက်ရောက်ချင်းပဲ ပြည်သူ့လွှတ်တော်ဥက္ကဋ္ဌနဲ့ သွားတွေ့တယ်။ ကျွန်တော့်အဆိုက ဒီသုံးချက်လုံးနဲ့ မညီဘူးလို့ ဘယ်လိုလုပ်ပြောနိုင်မှာလဲလို့။ လတ်တလော ဖြစ်ပေါ်နေတဲ့ကိစ္စ၊ လောလောဆယ် ဖြစ်နေတဲ့ကိစ္စ၊ အများပြည်သူနဲ့ မသက်ဆိုင်ဘူးလို့ ပြောရအောင်လည်း တပ်မတော်က အများပြည်သူနဲ့ မသက်ဆိုင်ဘူးလား”  ဟု ဦးသောင်းအေးက ပြောကြားသည်။

တင်သွင်းခွင့်မရခဲ့သည့် အရေးကြီးအဆိုမှာ Facebook အဖွဲ့မှ မြန်မာ့တပ်မတော်၏ လူမှုကွန်ရက်များနှင့် မြ၀တီရုပ်မြင်သံကြား လူမှုကွန်ရက်စာမျက်နှာများကို UNHCR အချက်အလက် ရှာဖွေရေးအဖွဲ့၏ အစီရင်ခံစာပါ လူ့အခွင့်အရေးချိုးဖောက်မှုများနှင့် အမုန်းစကားပွားစေခြင်း၊ ၎င်းတို့၏စံနှုန်းများဖြင့် မကိုက်ညီခြင်းတို့ကို အကြောင်းပြ၍ ပိတ်ပင်ဖယ်ရှားလိုက်ခြင်းသည် မြန်မာ့တပ်မတော်က လူ့အခွင့်အရေးချိုးဖောက်မှု ပြုလုပ်ကြောင်း စွပ်စွဲအတည်ပြုလိုက်သည့်သဘော သက်ရောက်ပြီး နိုင်ငံတော်နှင့် တပ်မတော်တို့၏ ဂုဏ်သိက္ခာနှင့် နိုင်ငံတော်အချုပ်အခြာအာဏာကို ထိပါးစော်ကားရာ ရောက်ရှိနေသည့်အတွက် ယင်းလုပ်ဆောင်မှုကို တရားဝင် တုံ့ပြန်ကန့်ကွက်နိုင်ပါရန် နိုင်ငံတော်အစိုးရအား တိုက်တွန်းကြောင်းဖြစ်သည်။

တအန်းလက်နက်ကိုင်အဖွဲ့ (TNLA) က ဖမ်းဆီးထားသည့် အမျိုးသမီးတစ်ဦး ပြန်လွှတ်ပေးရေးကိစ္စအား ကူညီပေးရန် နိုင်ငံတော်၏အတိုင်ပင်ခံပုဂ္ဂိုလ်ထံ SNLD ပါတီ စာပေးပို့

တအန်းလက်နက်ကိုင်အဖွဲ့ (TNLA) က ဖမ်းဆီးထားသည့် အမျိုးသမီးတစ်ဦး ပြန်လွှတ်ပေးရေးကိစ္စအား ကူညီဆောင်ရွက်ပေးပါရန်  နိုင်ငံတော်၏အတိုင်ပင်ခံပုဂ္ဂိုလ်ထံ ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ပါတီက သြဂုတ် ၂၇ ရက် နေ့စွဲဖြင့် စာရေးသားပေးပို့ထားသည်ကို သြဂုတ် ၃၁ ရက်တွင် သတင်းထုတ်ပြန်သည်။

သြဂုတ် ၁၇ ရက်တွင် ရှမ်းပြည်နယ်မြောက်ပိုင်း နမ့်ခမ်းမြို့ ဟိုနောင်ရပ်ကွက်နေ နန်းမိုဟွမ်အား အရပ်ဝတ်လက်နက်ကိုင် အမျိုးသားငါးဦးက လူမြင်ကွင်းအတွင်း လာရောက် ဖမ်းဆီးခေါ်ဆောင်သွားခဲ့သည်ကို မီဒီယာများမှတစ်ဆင့် ကြားသိပြီးဖြစ်မည်ဟု မျှော်လင့်ကြောင်း၊ နန်းမိုဟွမ်သည် ကလေးသုံးဦးမိခင်ဖြစ်ပြီး ခင်ပွန်းနှင့်အတူ ဆောက်လုပ်ရေးပစ္စည်းရောင်းသည့် အိမ်ဆိုင်ဖွင့်လှစ်ထားကြောင်း၊ ၎င်းအား ဖမ်းဆီးသွားသူများမှာ ပလောင်လက်နက်ကိုင်အဖွဲ့ (TNLA) အဖွဲ့ဝင်များဖြစ်ကြောင်း သက်ဆိုင်ရာ အဖွဲ့အစည်းမှ ပြောရေးဆိုခွင့်ရှိသူက သတင်းမီဒီယာများတွင် ၀န်ခံထားပြီးဖြစ်ကြောင်း နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ထံ ပေးပို့ထားသောစာတွင် ရေးသားထားသည်။

ထို့ပြင် TNLA အဖွဲ့၏အဆိုအရ နန်းမိုဟွမ်သည် ၎င်းတို့အဖွဲ့၏ ဥပဒေကို ချိုးဖောက်သည့်အတွက် ဖမ်းဆီးခံရခြင်းဖြစ်ကြောင်းလည်း သိရှိရသည်ဟု နိုင်ငံတော်၏အတိုင်ပင်ခံပုဂ္ဂိုလ်ထံ ပေးပို့သောစာတွင် ဖော်ပြထားသည်။

TNLA အဖွဲ့သည် ရှမ်းပြည်နယ်လွှတ်တော်က အကြမ်းဖက်အဖွဲ့အစည်းဟု သတ်မှတ်ခြင်းကို ခံထားရသော်လည်း ပြည်ထောင် စုငြိမ်းချမ်းရေးညီလာခံ- ၂၁ ရာစုပင်လုံ အစည်းအဝေးတက်ခွင့်ရထားသလို နိုင်ငံတော်၏အတိုင်ပင်ခံပုဂ္ဂိုလ်အပြင် ဒုတိယတပ်မတော်ကာကွယ်ရေးဦးစီးချုပ်နှင့်လည်း တွေ့ဆုံဆွေးနွေးခွင့်ရရှိထားကြောင်း၊ ၎င်းတို့ထံ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာနမှတစ်ဆင့် ဆက်သွယ်အကြောင်းကြားနိုင်သည်ဖြစ်၍ အရပ်သားပြည်သူတစ်ဦးအား ဥပဒေမဲ့ ဖမ်းဆီးခေါ်ဆောင်သွားသည့် အစိုးရနှင့် တပ်မတော်၏ ငြိမ်းချမ်းရေး ဆွေးနွေးဖက် TNLA မှ နန်းမိုဟွမ်အား  ခြင်းချက်မရှိ အမြန်ဆုံးပြန်လွှတ်ပေးနိုင်ရေး ကူညီဆောင်ရွက်ပါရန် ပန်ကြားအပ်ကြောင်း  နိုင်ငံတော်၏အတိုင်ပင်ခံပုဂ္ဂိုလ်ထံ ပေးပို့သောစာတွင် ပါရှိသည်။

အမျိုးသားပြန်လည်သင့်မြတ်ရေး၊ ငြိမ်းချမ်းရေးနှင့် တရားဥပဒေစိုးမိုးရေးကို အလေးထားဆောင်ရွက်နေသည့် အမျိုးသားဒီမိုက ရေစီအဖွဲ့ချုပ် အစိုးရအနေဖြင့် နိုင်ငံသားတစ်ဦး၏ ဘ၀လုံခြုံမှုနှင့် လူမှုလွတ်လပ်ခွင့်ကို တာဝန်ယူမှု၊ တာဝန်ခံမှုရှိရှိ ထိရောက်မှန်ကန်စွာ ဆောင်ကြဉ်းပေးနိုင်ပါစေကြောင်း ဆန္ဒပြုတိုက်တွန်းလိုက်သည်ဟု နိုင်ငံတော်အတိုင်ပင်ခံပုဂ္ဂိုလ်ထံ ပေးပို့သောစာတွင် SNLD ပါတီက ရေးသားထားသည်။

သြဂုတ် ၂၄ ရက်က နန်းမိုဟွမ် ပြန်လည်လွတ်မြောက်ရေးနှင့်ပတ်သက်ပြီး တအန်းလက်နက်ကိုင်အဖွဲ့ (TNLA) နှင့် ရှမ်းပြည်တိုးတက်ရေးပါတီ (SSPP/SSA) တို့ တွေ့ဆုံဆွေးနွေးခဲ့ကြပြီး နန်းမိုဟွမ်ကို အမြန်ဆုံး ပြန်လွှတ်ပေးမည်ဟု TNLA ဘက်က ကတိက၀တ်ပြုထားကာ ထပ်မံတွေ့ဆုံရန်ရှိကြောင်း SSPP ပြောရေးဆိုခွင့်ရှိသူ ဗိုလ်မှူးသန်းအောင်က ပြောကြားထားသည်။

 

စတုတ္ထအကြိမ်မြောက် BIMSTEC ထိပ်သီးအစည်းအဝေး၌ ဘေးဆွယ် ဆွေးနွေးမှုအဖြစ် အိန္ဒိယ၀န်ကြီးချုပ်က နိုင်ငံတော်သမ္မတ ဦးဝင်းမြင့်နှင့် တွေ့ဆုံ

(၀ဲမှယာ) မြန်မာသမ္မတကတော် ဒေါ်ချိုချို၊ နီပေါဝန်ကြီးချုပ်ကတော်၊ ထိုင်းဝန်ကြီးချုပ်၊ သီရိလင်္ကာ သမ္မတ၊ နီပေါဝန်ကြီးချုပ်၊ မြန်မာသမ္မတ ဦးဝင်းမြင့်၊ အိန္ဒိယ၀န်ကြီးချုပ် နရင်ဒရာမိုဒီ၊ ဘူတန်အစိုးရ တရားရေးနှင့် အကြံပေးအကြီးအကဲနှင့် ဘင်္ဂလားဒေ့ရ်ှဝန်ကြီးချုပ်တို့ သြဂုတ် ၃၁ ရက်က ခတ္တမန္ဒူမြို့၌ပြုလုပ်သည့် BIMSTEC ထိပ်သီးအစည်းအဝေး၌ ဓာတ်ပုံရိုက်ကူးခံနေစဉ် (Photo – AFP)

စတုတ္ထအကြိမ်မြောက် BIMSTEC ထိပ်သီးအစည်းအဝေးကို သြဂုတ် ၃၁ ရက်က အောင်မြင်စွာ ကျင်းပပြီးစီးခဲ့ပြီး အဆိုပါ အစည်းအဝေး၏ ဘေးဆွယ်ဆွေးနွေးမှုအဖြစ် အိန္ဒိယ၀န်ကြီးချုပ် နရင်ဒရာမိုဒီက နိုင်ငံတော်သမ္မတ ဦးဝင်းမြင့်နှင့် တွေ့ဆုံခဲ့ကြောင်း သိရသည်။

အဆိုပါအစည်းအဝေးတွင် နီပေါဝန်ကြီးချုပ် ကေပီရှာမားအိုလီက အဖွဲ့၏ ဥက္ကဋ္ဌနေရာကို သီရိလင်္ကာသမ္မတ မေသရီပါလာ ဆီရီဆီနာထံသို့ လွှဲပြောင်းပေးအပ်မှုလည်း ပြုလုပ်ခဲ့သည်။

အိန္ဒိယ၀န်ကြီးချုပ် နရင်ဒရာမိုဒီသည် အခြား BIMSTEC အဖွဲ့ဝင်နိုင်ငံများမှ အကြီးအကဲများနှင့်အတူ ခတ္တမန္ဒူမြို့၌ပြုလုပ်သည့် နှစ်ရက်ကြာကျင်းပသော အဆိုပါ ထိပ်သီးအစည်းအဝေးသို့ တက်ရောက်ခဲ့ခြင်း ဖြစ်သည်။

“၀န်ကြီးချုပ် နရင်ဒရာမိုဒီနဲ့ အခြားခေါင်းဆောင်တွေ BIMSTEC လုပ်ငန်းစဉ်ကို ပြန်လည်အသက်ဝင်အောင်ပြုလုပ်ဖို့  ကတိပြုမှုနဲ့အတူ ခတ္တမန္ဒူက BIMSTEC ထိပ်သီးအစည်းအဝေးဟာ အောင်မြင်စွာ ပိတ်သိမ်းနိုင်ခဲ့ပါတယ်” ဟု ပြည်ပရေးရာဝန်ကြီးဌာန ပြောရေးဆိုခွင့်ရှိသူ ရာဗီရှကူးမားက Twitter ၌ ရေးသားခဲ့သည်။

လက်ရှိ BIMSTEC ၏ ဥက္ကဋ္ဌတာဝန်ယူထားသော နီပေါဝန်ကြီးချုပ် အိုလီကခတ္တ မန္ဒူကြေညာချက်မူကြမ်းကို တင်သွင်းပြီး အဖွဲ့ဝင်နိုင်ငံများက တညီတညွတ်တည်း အတည်ပြုခဲ့ကြောင်း သိရသည်။

အစည်းအဝေး အပိတ်မိန့်ခွန်းပြောကြားရာတွင် အိုလီက “ဘင်္ဂလားပင်လယ်အော်ဒေသ ငြိမ်းချမ်းရေး၊ ကြွယ်ဝရေးနဲ့ ရေရှည်တည်တံ့ရေးဆိုတဲ့ ရည်မှန်းချက်ပန်းတိုင်နဲ့ ပတ်သက်ပြီး စုပေါင်းဥာဏ်ပညာ၊ စိတ်ကူးနှင့် အမြင်တွေ ခတ္တမန္ဒူကြေညာချက်မှာ အဓိပ္ပာယ်ရှိရှိ အမိအရ ထည့်သွင်းထားပါတယ်” ဟု ပြောကြားခဲ့သည်။

အဖွဲ့ဝင်နိုင်ငံများအကြား စွမ်းအင်ကိစ္စဆိုင်ရာ ပူးပေါင်းဆောင်ရွက်မှုကို မြှင့်တင်ရေးအတွက် BIMSTEC Grid Interconnection ထူထောင်ရန် နားလည်မှုစာချွန်လွှာတစ်ရပ်ကိုလည်း အဆိုပါအစည်းအဝေး၌ လက်မှတ်ရေးထိုးခဲ့ကြသည်။

BIMSTEC အဖွဲ့အတွက် အိမ်ရှင်နိုင်ငံ အသစ်တာဝန်ကို ယူခဲ့သည့် သီရိလင်္ကာနိုင်ငံအား အိုလီက ဂုဏ်ပြုစကားပြောကြားခဲ့ပြီး အဖွဲ့ဝင်နိုင်ငံများ၏ အကြီးအကဲများကိုလည်း ထိပ်သီးအစည်းအဝေး အောင်မြင်အောင် အကောင်အထည်ဖော်ရာ၌ ၎င်းတို့၏ ထောက်ပံ့ကူညီမှုအတွက် ဂုဏ်ပြုစကား ပြောကြားခဲ့သည်။

BIMSTEC သည် အိန္ဒိယ၊ ဘင်္ဂလား ဒေ့ရှ်၊ မြန်မာ၊ သီရိလင်္ကာ၊ ထိုင်း၊ ဘူတန်နှင့် နီပေါနိုင်ငံတို့ပါဝင်သော ဒေသတွင်းအဖွဲ့အစည်းတစ်ရပ် ဖြစ်သည်။ အဆိုပါ အဖွဲ့ဝင်နိုင်ငံများတွင် ကမ္ဘာ့လူဦးရေ၏ ၂၂ ရာခိုင်နှုန်း နေထိုင်ပြီး စုစုပေါင်း GDP တန်ဖိုးသည် အမေရိကန်ဒေါ်လာ ၂ ဒသမ ၈ ထရီလျံရှိ သည်။

အစောပိုင်း၌ အိန္ဒိယ၀န်ကြီးချုပ် နရင်ဒရာမိုဒီသည် နိုင်ငံတော်သမ္မတ ဦးဝင်းမြင့် နှင့် တွေ့ဆုံခဲ့ပြီး အပြန်အလှန် ပူးပေါင်းဆောင်ရွက်မှု အားကောင်းအောင်ပြုလုပ်ရန် နည်းလမ်းများကို ဆွေးနွေးခဲ့ကြသည်။

မြန်မာနှင့် အိန္ဒိယနိုင်ငံတို့မှ ခေါင်းဆောင်တို့သည် နီပေါနိုင်ငံမြို့တော် ခတ္တမန္ဒူတွင်ပြုလုပ်သည့် BIMSTEC ထိပ်သီးအစည်းအဝေး ဘေးဆွယ်ဆွေးနွေးမှုအဖြစ် တွေ့ဆုံခဲ့ကြခြင်း ဖြစ်သည်။

“ဆွေးနွေးမှုဟာ စွမ်းအင်ကဏ္ဍနဲ့ အပြန်အလှန် ပူးပေါင်းဆောင်ရွက်မှုနဲ့ပတ်သက်တဲ့ တခြားကဏ္ဍတွေမှာ ပူးပေါင်းဆောင်ရွက်မှု ဖွံ့ဖြိုးလာရေးအပေါ် အဓိကထားပါတယ်” ဟု ပြည်ပရေးရာဝန်ကြီးဌာနမှ ပြောရေးဆိုခွင့်ရှိသူ ရာဗီရှကူးမားက Twitter ၌ ရေးသားခဲ့သည်။

Ref ; The Hindu

ရန်ကုန်ဆေးရုံကြီး၊ SIF နှင့် Sing Health တို့ ပူးပေါင်းပြီး ‘ထိခိုက်ဒဏ်ရာရရှိမှုမှ ပြန်လည်သန်စွမ်းရေး ပြီးပြည့်စုံသော ကျန်းမာရေးစောင့်ရှောက်မှုစီမံကိန်း’ ကို သုံးနှစ်ကြာလုပ်ဆောင်မည်

ရန်ကုန်ပြည်သူ့ဆေးရုံကြီး၊ International Foundation (SIF) နှင့် Singapore Health Services (Sing Health) တို့ပူးပေါင်းပြီး ရန်ကုန်မြို့ရှိ ပြည်သူ့ဆေးရုံကြီးအချို့တွင် ‘ထိခိုက်ဒဏ်ရာရရှိမှုမှ ပြန်လည်သန်စွမ်းရေး ပြီးပြည့်စုံသော ကျန်းမာရေးစောင့်ရှောက်မှုစီမံကိန်း’ ကို သုံးနှစ်ကြာ လုပ်ဆောင်မည်ဖြစ်ကြောင်း သြဂုတ် ၃၁ ရက်က ရန်ကုန်ပြည်သူ့ဆေးရုံကြီး၌ ပြုလုပ်ခဲ့သော စီမံကိန်းမိတ်ဆက်ပွဲအခမ်းအနားတွင် ပြောကြားချက်များအရ သိရသည်။

အဆိုပါ ပူးပေါင်းဆောင်ရွက်မှုသည် မြန်မာနိုင်ငံရှိ ကျန်းမာရေးစောင့်ရှောက်မှု ပညာရှင်များမှလူနာများ ပြန်လည်သန်စွမ်းရေးအတွက် အကဲဖြတ်မှု၊ဆေးကုသမှုအပိုင်းများတွင် နောက်ဆုံးပေါ်ကုသနည်းစနစ်များ၊ လက်တွေ့သင်ကြားပြသမှုများနှင့် အကောင်းဆုံးသော အလေ့အကျင့်များကို ဝေမျှခြင်းများ ပါဝင်မည် ဖြစ်ကြောင်း၊ မြန်မာနိုင်ငံမှ ကျန်းမာရေးစောင့်ရှောက်မှုပညာရှင်ပေါင်း ၁၈၀ ခန့်ကို ၎င်းစီမံကိန်းမှတစ်ဆင့် သင်တန်းပို့ချပေးရန် ရည်ရွယ်ထားပြီး ပညာရှင်များ၏ တိုးတက်လာသော အရည်အသွေးများနှင့် အသိပညာများမှတစ်ဆင့် သုံးနှစ်အတွင်းအနည်း ဆုံးလူနာဦးရေ ၃၀၀၀၀ခန့်ကို အကျိုးပြုနိုင်ရန် ရည်ရွယ်ထားကြောင်းနှင့် ထိုသင်တန်းသားများမှ ဆေးပညာနယ်ပယ်တွင် ၎င်းတို့ သင်ယူရရှိခဲ့သော အရည်အသွေးများနှင့် ဗဟုသုတများကို ပြန်လည်မျှဝေရန်အတွက် ရန်ကုန်ပြည်သူ့ဆေးရုံကြီးနှင့် အခြားပါဝင်သော ဆေးရုံများမှ လေ့ကျင့်ထားသော ထူးချွန်သည့် သင်တန်းနည်းပြ ၆၀ ဦးကို ထပ်မံရွေးချယ်လေ့ကျင့်သင်ကြားပေးပြီး ထိုသူများက ၎င်းတို့ လုပ်ငန်းနယ်ပယ်အတွင်း ပြန်လည်သင်တန်းပေးပို့ချ သွားနိုင်ရန်လည်း လုပ်ဆောင်သွားမည်ဖြစ်ကြောင်း သိရသည်။

“ကျွန်မတို့အနေနဲ့ SIF တို့ Sing Health တို့လို အဖွဲ့အစည်းတွေနဲ့ မြန်မာနိုင်ငံမှာ ထိခိုက်ဒဏ်ရာရရှိမှုဆိုင်ရာ စောင့်ရှောက်မှု အရည်အသွေးမြှင့်တင်တဲ့နေရာမှာ ပူးပေါင်းဆောင်ရွက်ခွင့်ရတဲ့အတွက် ၀မ်းသာပါတယ်။ ထိခိုက်ဒဏ်ရာရရှိမှုကြောင့်ဖြစ်တဲ့ ဝေဒနာဟာ ရုပ်ပိုင်းဆိုင်ရာသာမက စိတ်ပိုင်းဆိုင်ရာပါ ဆိုးဆိုးရွားရွား ထိခိုက်စေနိုင်ပြီး အသက်အန္တရာယ်ပေးနိုင်တယ်ဆိုတာလည်း အားလုံးသိပြီးသား ဖြစ်ပါတယ်။ ကျွန်မတို့ရဲ့ Medical Team အနေနဲ့တော့ အမြင်သစ်တွေ လေ့လာသင်ယူမှုအသစ်တွေကို စင်ကာပူ အဖွဲ့တွေနဲ့ နှီးနှောဖလှယ်ပြီး တိုးတက်ကောင်းမွန်လာအောင် လုပ်ဆောင်နိုင်လိမ့်မယ်လို့ မျှော်လင့်ပါတယ်” ဟု ရန်ကုန်ပြည်သူ့ဆေးရုံကြီးမှ အကြောအဆစ်နှင့်ကိုယ်အင်္ဂါ ပြန်လည်သန်စွမ်းရေးဆေးပညာဌာနမှူး ပါမောက္ခ ဒေါက်တာခင်မျိုးလှက ဆိုသည်။

ယင်းစီမံကိန်းတွင် ပါဝင်မည့်ဆေးရုံများနှင့်ကျောင်းများမှာ ရန်ကုန်ပြည်သူ့ဆေးရုံကြီး၊ အမျိုးသားပြန်လည်သန်စွမ်းရေးဆေးရုံ၊ မြောက်ဥက္ကလာပ အထွေထွေရောဂါကုဆေးရုံ၊ ရန်ကုန်အရိုးအထူးကုဆေးရုံ၊ မန္တလေး အထွေထွေရောဂါကုဆေးရုံ၊ ဆေးတက္ကသိုလ်(၁) နှင့် (၂) ရန်ကုန်တို့ပါဝင်ကြောင်း သိရသည်။

အဆိုပါ စီမံကိန်းတွင် ဆရာဖြစ်သင်တန်းများ၊ စီမံခန့်ခွဲမှုဆိုင်ရာ အလုပ်ရုံဆွေးနွေးပွဲများ၊ သင်ကြားလေ့လာရေးခရီးစဉ်များ၊ အတတ်ပညာပိုင်းဆိုင်ရာ ဝေမျှခြင်းများ ပါဝင်မည်ဖြစ်ပြီး စီမံကိန်းအပြီးတွင် ထိခိုက်ဒဏ်ရာရရှိမှုမှ ပြန်လည်သန်စွမ်းမှုအတွက် ကုသရေးဆိုင်ရာစွမ်းရည်စံနှုန်းများ မြင့်တက်လာပြီး မြန်မာနိုင်ငံရှိပြန်လည်သန်စွမ်းရေး စနစ်ကြီးတစ်ခုလုံး ပိုမိုခိုင်မာလာစေရန် ဆေးကုသမှုဆိုင်ရာ လုပ်ထုံးလုပ်နည်းများကို အကောင်အထည်ဖော်ရန် မျှော်မှန်းထားသည်။

ဘာသာရေးစိတ်ပြင်းထန်သော ဘုန်းကြီးများ၏ စာအုပ်၊ တရားခွေများ ဇေယျာဖြိုးအိမ်မှ သိမ်းဆည်းရမိခဲ့သည်ဆိုသော တရားလိုရှေ့နေ၏ မေးခွန်းနှင့်စပ်လျဉ်း၍ ဇေယျာဖြိုး ငြင်းဆို

သြဂုတ် ၃၁ ရက်က ဦးကိုနီအမှုနှင့်ပတ်သက်၍ ဖမ်းဆီးခံထားရသူများကို ရုံးထုတ်လာစဉ်

ဇေယျာဖြိုး၏အိမ်အား ရဲတပ်ဖွဲ့က ရှာဖွေရာတွင် ဘာသာရေးနှင့် ပတ်သက်၍ ပြင်းထန်သော ဘုန်းကြီးများ၏ စာအုပ်၊ တရားခွေများကို သိမ်းဆည်းရမိခဲ့သည်မှာ မှန်လားဟူသည့် အဓိပ္ပာယ်ရသောမေးခွန်းအား တရားလိုရှေ့နေက မေးမြန်းခဲ့မှုအပေါ် ဇေယျာဖြိုးက ငြင်းဆိုခဲ့သည်။

သြဂုတ် ၃၁ ရက်က မြောက်ပိုင်းခရိုင် တရားရုံးတွင် ရုံးထုတ်ခဲ့ပြီး ယင်းရုံးချိန်းတရားခွင်တွင် ဇေယျာဖြိုးက ငြင်းဆိုခဲ့ခြင်းဖြစ်ကြောင်း သိရသည်။

ဦးကိုနီလုပ်ကြံခံရမှုနှင့် ပတ်သက်၍ တရားလိုရှေ့နေ ဦးနေလ၏ မေးခွန်းအပေါ် ဇေယျာဖြိုးက ပြန်လည်ဖြေကြားခဲ့ခြင်း ဖြစ်သည်။

ထိုသို့ဖြေကြားရာတွင် ဇေယျာဖြိုးက  ‘မဟုတ်ပါ။ ရိုဟင်ဂျာနှင့် ပတ်သက်သည့် စာအုပ်တစ်အုပ်သာ ရှာဖွေပုံစံတွင် သိမ်းဆည်းဖော်ပြထားပါသည်။ ၎င်းစာအုပ်မှာလည်း ကျွန်တော့် စာအုပ်မဟုတ်ကြောင်း ကျွန်တော့်စာအုပ်မှန်လျှင် ကျွန်တော်၏ လက်ဗွေရာနှင့် ဒီအင်န်အေများ တွေ့ရှိရမည်ဖြစ်ကြောင်း အဓိကထွက်ဆိုချက်တွင် ထွက်ဆိုထားပါသည်။ ကျွန်တော်၏နေအိမ်အား ရှာဖွေရာတွင် ရှာဖွေပုံစံနည်းလမ်းမကျခြင်း အပါအ၀င် ကျွန်တော့်စာအုပ်မဟုတ်ကြောင်း ထွက်ဆိုပြီးဖြစ်ပါသည်’ ဟု ပြန်လည်ဖြေကြားခဲ့သည်။

ဇေယျာဖြိုး၏အိမ်အား ရှာဖွေရာတွင် အမေရိကန်မှ ရိုဟင်ဂျာများဆိုသော စာအုပ်အား ရှာတွေ့ခဲ့ကြောင်း၊ ရဲတပ်ဖွဲ့၏ ရှာဖွေပုံစံစာရွက်တွင် ဖော်ပြပါရှိပြီး အဆိုပါ ရှာဖွေပုံစံတွင်လည်း ဇေယျာဖြိုးက လက်မှတ်ရေးထိုးထားကြောင်း၊ ယင်းတို့ကို ရဲတပ်ဖွဲ့က သက်သေအဖြစ် တရားရုံးသို့ တင်ပြထားကြောင်း သိရသည်။

ဇေယျာဖြိုး၏ ပြန်လည်ဖြေကြားချက်အပေါ် တရားလိုရှေ့နေ ဦးနေလက ‘ရှာဖွေ ပုံစံနည်းလမ်းကျခြင်း မကျခြင်းမှာ တရားရုံးက ဆုံးဖြတ်ရမည့်ကိစ္စဖြစ်ပြီး ကျွန်တော် (ဇေယျာဖြိုး) မငြင်းနိုင်သည်မှာ အဆိုပါရိုဟင်ဂျာနှင့်ပတ်သက်သည့် စာအုပ်မှာကျွန်တော့် နေအိမ်မှ ရှာဖွေသိမ်းဆည်းခဲ့ခြင်းဖြစ်ကြောင်း၊ ရှာဖွေပုံစံတွင် တွေ့ရှိရပါသည်ဆိုလျှင်’ ဟု ဆက်လက်မေးမြန်းခဲ့ကြောင်း သိရသည်။

အဆိုပါမေးမြန်းမှုအပေါ် ဇေယျာဖြိုးက ပြန်လည်ဖြေကြားရာတွင် ‘တရားရုံးကဆုံးဖြတ်ရမည့် ကိစ္စဆိုသည်ကို ကျွန်တော်မသိပါ။ ကျွန်တော့်အိမ်တွင် ရှာဖွေလုပ်ဆောင်ခဲ့သည်များနှင့်ပတ်သက်၍ သတ်မှတ်ထားသော လုပ်ထုံးလုပ်နည်းနှင့်အညီ ဆောင်ရွက်မှုမရှိကြောင်းကို တင်ပြခြင်းသာ ဖြစ်ပါသည်။ ရိုဟင်ဂျာနှင့်ပတ်သက်သည့် စာအုပ်ကိစ္စနှင့် ပတ်သက်၍ ၎င်းအားပြသခဲ့ခြင်းမရှိဘဲရှာဖွေ ပုံစံတွင်လည်း ၎င်း (ရဲ) တို့ လက်မှတ်ရေးထိုးခိုင်းသော နေရာတွင်သာ လက်ထိတ်ခတ်လျက် ရေးထိုးခဲ့ရသည်မှအပ ရှာဖွေပုံစံပါ စာရင်းများလည်း ကြည့်ရှုခွင့်မရခဲ့ပါ။ ၎င်းစာအုပ်သည်လည်း ဥပဒေအရ တားမြစ်ထားသော စာအုပ်လည်းမဟုတ်ပါ။ ထို့ပြင် ကျွန်တော့်အိမ်တွင် အခြားမည်သည့် အစွန်းရောက်နိုင်ငံရေး၊ ဘာသာရေးစာအုပ်များ အပါအ၀င် မည်သို့သောအစွန်းရောက်ခြင်းနှင့် သက်ဆိုင်သည့် ပစ္စည်းစာရွက်စာတမ်းများ ရှာဖွေတွေ့ရှိခဲ့ခြင်းလည်း မရှိပါ။ နေအိမ်တွင် ရှာဖွေပုံစံနှင့်ပတ်သက်၍ လာရောက်ထွက်ဆိုခဲ့သူများ(တရားလိုပြသက်သေများ) အားလုံးကလည်း အစွန်းရောက်မှုနှင့် ပတ်သက်၍ မည်သည့်ထွက်ဆိုချက်ကိုမှ ထွက်ဆိုထားခြင်း မရှိပါ’ ဟု ပြန်လည်ဖြေကြားခဲ့သည်။

ယခင်ရုံးချိန်းများတွင် ဇေယျာဖြိုးက ၎င်းအိမ်တွင် ရဲများကရှာဖွေရာ၌ လုပ်ထုံးလုပ်နည်းအတိုင်း ရှာဖွေခြင်းမရှိဘဲ နေ့ခင်းကြောင်တောင်တွင် အနုကြမ်းစီးသကဲ့သို့ဖြစ်နေကြောင်း ထွက်ဆိုထားသည်။

ယခင်ရုံးချိန်းဖြစ်သည့် သြဂုတ် ၂၃ ရက်တွင် ဇေယျာဖြိုးကို ၎င်းအပါအ၀င် အောင်ဝင်းခိုင်နှင့် မိုင်းဖြတ် ပြည်သူ့လွှတ်တော်ကိုယ်စားလှယ် ဦးလင်းဇော်ထွန်းတို့ ဟောင်ကောင်တွင် ဆုံတွေ့ခဲ့သည့် ကိစ္စနှင့်ပတ်သက်၍ ကွာဟနေသည့် ထွက်ဆိုချက်အချို့ကို ဦးကိုနီ၏ရှေ့နေက မေးမြန်းခဲ့သည်။