ကချင်ပြည်နယ် မိုးကောင်းမြို့နယ်တွင် KIA ထောင်ထားသည့်မိုင်း နင်းမိ၍ ဒေသခံတစ်ဦး သေဆုံးပြီး တစ်ဦးဒဏ်ရာရရှိဟု တပ်မတော် ထုတ်ပြန်

ကချင်ပြည်နယ် မိုးကောင်းမြို့နယ် ဆားမှော်ကျေးရွာတွင် မေ ၂၆ ရက် မွန်းလွဲပိုင်းက ကချင်တိုင်းရင်းသား လက်နက်ကိုင်အဖွဲ့ (KIA) ထောင်ထားသည့် နင်းမိုင်းတစ်လုံးအား နင်းမိ ပေါက်ကွဲ၍ ဒေသခံတစ်ဦး သေဆုံးပြီး တစ်ဦး ဒဏ်ရာရရှိခဲ့ကြောင်း မေ ၃၁ ရက်တွင် တပ်မတော် ကာကွယ်ရေးဦးစီးချုပ်ရုံးက သတင်းထုတ်ပြန်သည်။

တပ်မတော် ကာကွယ်ရေးဦးစီးချုပ်ရုံး၏ သတင်းထုတ်ပြန်ချက်အရ ဆားမှော်ကျေးရွာနေ မောင်စိုင်းအောင်နှင့် မောင်နိုင်နိုင် တို့သည် ငါးရှာရန် ထွက်ခွာလာစဉ် ကျေးရွာ၏ တောင်ဘက် ရှစ်မိုင်ခန့်အကွာ ဒေသအခေါ် ဘန်ဂျယ်ချောင်းသို့ အရောက်တွင် KIA ထောင်ထားသည့် နင်းမိုင်းတစ်လုံးအား မောင်နိုင်နိုင်က နင်းမိပေါက်ကွဲခဲ့သဖြင့် ၎င်းသည် အဆိုပါနေရာတွင်ပင် မိုင်းစထိမှန် ဒဏ်ရာများဖြင့် သေဆုံးခဲ့ပြီး မောင်စိုင်းအောင်မှာ မိုင်းစထိမှန် ဒဏ်ရာများ ရရှိခဲ့သဖြင့် မိုးကောင်းပြည်သူ့ဆေးရုံသို့ တက်ရောက် ကုသနိုင်ရေးအတွက် စီစဉ်ဆောင်ရွက်ပေးခဲ့ကြောင်းလည်း သိရသည်။

ထို့ပြင် ရှမ်းပြည်နယ် (မြောက်ပိုင်း) သီပေါမြို့နယ်အတွင်း နယ်မြေလုံခြုံရေး ဆောင်ရွက်နေသော တပ်ဖွဲ့ဝင်များသည် မေ ၂၉ ရက်က သီပေါမြို့နယ် ရေပူကျေးရွာရှိ နေအိမ်နှစ်လုံးအား သတင်းအရ ၀င်ရောက်ရှာဖွေရာ SSPP/SSA ၏ အခွန် (မူရင်းတွင် ဆက်ကြေးဟု သုံးနှုန်း) တာဝန်ခံနှစ်ဦးကို ဖမ်းဆီးရမိခဲ့ခြင်း ဖြစ်ကြောင်း၊ ၎င်းတို့နှစ်ဦးနှင့်အတူ တူမီးသေနတ်နှစ်လက်၊ ပွိုင့် – ၅ ကျည်ထိပ်ဖူး ခြောက်တောင့်၊ WY စိတ်ကြွဆေးပြားများနှင့် ငွေကြေးကောက်ခံသော စာရွက်စာတမ်းများကိုလည်း တွေ့ရှိ သိမ်းဆည်းခဲ့ကြောင်း သိရသည်။

အဆိုပါ ဖမ်းဆီးရမိသူများအား တရားဥပဒေအရ ဆက်လက် အရေးယူ ဆောင်ရွက်လျက်ရှိကြောင်း တပ်မတော်ကာကွယ်ရေးဦးစီးချုပ်ရုံး၏ ထုတ်ပြန်ချက်တွင် ပါရှိသည်။

၂၀၁၈ ခုနှစ် ဧပြီမှ စက်တင်ဘာလအထိ ပြည်ထောင်စု အပ်ငွေစာရင်း၏ လိုငွေအား ဖြည့်ဆည်းရန် ဗဟိုဘဏ်မှ ကျပ်ဘီလျံ ၆၄၀ ကျော် ချေးငွေရယူခြင်းကို ပြည်ထောင်စုလွှတ်တော် အတည်ပြု

မေ ၃၁ ရက်က ပြုလုပ်သည့် ပြည်ထောင်စုလွှတ်တော် အစည်းအဝေး မစတင်မီ လွှတ်တော် ကိုယ်စားလှယ်များအား တွေ့ရစဉ် (ဓာတ်ပုံ-စည်သူ)

၂၀၁၈ ခုနှစ် ဧပြီလမှ စက်တင်ဘာလအထိ ပြည်ထောင်စု အပ်ငွေစာရင်း၏ လိုငွေအား ဖြည့်ဆည်းရန် ဗဟိုဘဏ်ထံမှ ကျပ် ၆၄၁ ဒသမ ၀၂၉ ဘီလျံ ချေးငွေရယူခြင်းအား ပြည်ထောင်စုလွှတ်တော် အတည်ပြုခဲ့သည်။

မေ ၃၁ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးတွင် ယင်းကိစ္စနှင့် ပတ်သက်ပြီး လွှတ်တော်ကိုယ်စားလှယ်များ၏ ဆွေးနွေးချက်များအား ဗဟိုဘဏ် ဒုတိယဥက္ကဋ္ဌ ဦးဘိုဘိုငယ်က ပြန်လည် ရှင်းလင်းမှုများ ပြုလုပ်ပြီးနောက် ပြည်ထောင်စုလွှတ်တော်က အတည်ပြုခဲ့ခြင်း ဖြစ်သည်။

ဗဟိုဘဏ် ဒုတိယဥက္ကဋ္ဌက “ပြည်တွင်း ချေးယူငွေအနက် ဗဟိုဘဏ်မှ ချေးယူငွေ ပမာဏဟာ ၂၀၁၈ ခုနှစ် ဧပြီလမှ စက်တင်ဘာလအထိ ခြောက်လတာ ကာလမှာ ရာခိုင်နှုန်း ၂၀ အထိ ကျဆင်းလာခြင်းဟာ သိသာထင်ရှားတဲ့ ညင်သာမှုရှိတဲ့ ဘဏ္ဍာရေးစနစ် ပြောင်းလဲမှုလို့ ပြောလို့ရပါတယ်။ ဒီလိုညင်သာစွာ ပြောင်းလဲမှုကို ဆက်လက် ထိန်းသိမ်းနိုင်ဖို့အတွက် ဗဟိုဘဏ်အနေနဲ့ စီမံ/ဘဏ္ဍာနဲ့ အနီးကပ် ဆက်လက် ညှိနှိုင်းဆောင်ရွက်သွားမှာ ဖြစ်ပါတယ်။ ၂၀၁၈ ခုနှစ် ဧပြီလကနေ စက်တင်ဘာလအထိ ခြောက်လတာအတွင်းမှာ ဖြစ်ပေါ်လာမယ့် ပြည်ထောင်စုအစိုးရ အပ်ငွေစာရင်းရဲ့ လိုငွေအတွက် ကျပ် ၆၄၁ ဒသမ ၀၂၉ ဘီလျံကို မြန်မာနိုင်ငံတော် ဗဟိုဘဏ်က အစိုးရငွေတိုက်လက်မှတ်များ ၀ယ်ယူခြင်းဖြင့် ဖြည့်ဆည်းပေးမှာ ဖြစ်ပါတယ်” ဟု ပြောကြားခဲ့သည်။

ဗဟိုဘဏ်မှ ချေးငွေရယူပါက Monetary Impact ရှိကြောင်း၊ ယင်း Impact သည် Inflation ဟု ခေါ်သည့် ငွေဖောင်းပွမှုကို တိုးလာနိုင်သည့်အတွက် ဗဟိုဘဏ်၏ လိုငွေဖြည့်ဆည်းမှုကို တစ်နှစ်ထက် တစ်နှစ် လျှော့ချလျက် ရှိကြောင်း၊၂၀၁၄-၂၀၁၅ တွင် ပြည်တွင်းမှ ချေးယူနိုင်သည့် ငွေပမာဏ၏ ရာခိုင်နှုန်း ၅၀၊၂၀၁၅-၂၀၁၆ တွင် ၄၇ ဒသမ ၆ ရာခိုင်နှုန်း၊၂၀၁၆-၂၀၁၇ ခုနှစ်တွင် ရာခိုင်နှုန်း ၄၀၊ ၂၀၁၇-၂၀၁၈ ခုနှစ်တွင် ၃၅ ရာခိုင်နှုန်း၊ ၂၀၁၈ ခုနှစ် ဧပြီလမှ စက်တင်ဘာလအထိ ခြောက်လတာ ကာလတွင် ရာခိုင်နှုန်း ၂၀ လျှော့ချ ဆောင်ရွက်လျက် ရှိကြောင်း၊ ယခင် ၁၉၉၀ ခုနှစ်များတွင် အစိုးရလိုငွေအား ဗဟိုဘဏ်မှ ရာခိုင်နှုန်း ၁၀၀ ဖြည့်ဆည်းပေးခဲ့ရခြင်းများ ရှိခဲ့ကြောင်း၊ ယခုနှစ်များတွင် လိုငွေဖြည့်ဆည်းမှုကို လျှော့ချခြင်းအား နိုင်ငံ၏ စီးပွားရေးတွင် Physical Contraction Shock ဟုခေါ်သည့် အစိုးရ၏ အသုံးစရိတ် ရုတ်ချည်းလျှော့ချခြင်းကြောင့် ရုတ်တရက် ကျဆင်းခြင်း မဖြစ်ရအောင် ဗဟိုဘဏ်နှင့် စီမံ/ဘဏ္ဍာဝန်ကြီးဌာနတို့ ညှိနှိုင်းပြီး သတိထား ဆောင်ရွက်နေခြင်း ဖြစ်ကြောင်း ဗဟိုဘဏ် ဒုတိယဥက္ကဋ္ဌက ပြောကြားသည်။

ဦးဘိုဘိုငယ်က “လိုငွေ ဖြစ်ပေါ်လာပါက ထိုလိုငွေကို ပထမဆုံးအနေနဲ့ အစိုးရငွေတိုက်လက်မှတ်နဲ့ ငွေတိုက်စာချုပ်တွေကို ရောင်းချခြင်းနဲ့ ဦးစွာ ဖြည့်တင်းပေးမှာ ဖြစ်ပါတယ်။ အဲဒီလိုဖြည့်တင်းလို့ မလုံလောက်ပါမှ ဖြစ်ပေါ်လာတဲ့ လိုငွေကို ဗဟိုဘဏ်က ၉၂ ရက် သက်တမ်းရှိတဲ့ ငွေတိုက် လက်မှတ်တွေ ၀ယ်ယူခြင်းနဲ့ ဖြည့်တင်းပေးမှာ ဖြစ်ပါတယ်။ ဒါကြောင့် ခန့်မှန်းလိုငွေ ပမာဏကို ကာမိဖို့ ချေးယူနိုင်တဲ့ အများဆုံး ပမာဏအနက် ပြည်တွင်းက ချေးယူမယ့်ပမာဏနဲ့ အဆိုပါပြည်တွင်းက ချေးယူနိုင်တဲ့ ပမာဏအနက် ရာခိုင်နှုန်း ၂၀ အထိသာ ဗဟိုဘဏ်မှ ဖြည့်ဆည်းပေးဖို့ကို အချိန်နဲ့တစ်ပြေးညီ ဆောင်ရွက်နိုင်ဖို့ လိုအပ်တဲ့အတွက် လွှတ်တော်မှ ကြိုတင်ခွင့်ပြုချက်ယူခြင်း ဖြစ်ပါတယ်” ဟုဆိုသည်။

နမ္မတူမြို့နယ်၌ တိုက်ပွဲများကြောင့် တိမ်းရှောင်နေသူ ၆၀၀ ကျော် မူလနေရပ် အသီးသီးတွင် ပြန်လည်နေထိုင်

ရှမ်းပြည်နယ်၊ နမ္မတူမြို့နယ်၌ မေလ လဆန်းပိုင်းက ဖြစ်ပွားခဲ့သော တိုက်ပွဲများကြောင့် စစ်ဘေးရှောင် ပြည်သူ ၆၀၀ ကျော် ၎င်းတို့၏ နေရပ်အသီးသီးတွင် မေ ၂၅ ရက်က ပြန်လည် နေထိုင်ပြီဖြစ်ကြောင်း တိုက်ပွဲဖြစ်ပွားရာ ဒေသအနီးရှိ မိုင်းရင်ကျေးရွာအုပ်စု အုပ်ချုပ်ရေးမှူး ဦးထွန်းလင်းက မေ ၃၁ ရက်တွင် ပြောကြားသည်။

နမ္မတူမြို့နယ် မန်းရင်ဒေသရှိ မန်ဆာအွမ်ကျေးရွာနှင့် ယင်းကျေးရွာအနီးရှိ ပတ်ဝန်းကျင် ကျေးရွာများ၌ မေ ၄ ရက်တွင် ရှမ်းပြည်တိုးတက်ရေးပါတီ (SSPP) နှင့် တအန်း လက်နက်ကိုင်အဖွဲ့ (TNLA) တို့ကြား တိုက်ပွဲများ ဖြစ်ပွားခဲ့သည့်အပြင် မေ ၁၀ ရက်နှင့် မေ ၁၆ ရက်တွင် တပ်မတော်နှင့် TNLA တို့ ကြား ပစ်ခတ်မှုများ ဖြစ်ပွားခဲ့ပြီး အဆိုပါ ပဋိပက္ခများကြောင့် အရပ်သားအချို့ ဒဏ်ရာရရှိခဲ့ကာ လူနေအိမ်များလည်း ပျက်စီးခဲ့ကြောင်း ဦးထွန်းလင်းက ပြောကြားသည်။

မေ ၄ ရက် ဖြစ်ပွားခဲ့သော ပစ်ခတ်မှုကြောင့် အရပ်သား အမျိုးသားတစ်ဦးနှင့် အမျိုးသမီးတစ်ဦး ဒဏ်ရာရရှိခဲ့ရာ အမျိုးသား၏ ဒဏ်ရာမှာ ပြင်းထန်သဖြင့် လားရှိုးဆေးရုံတွင် ကုသမှုခံယူခဲ့ရပြီး အမျိုးသမီးမှာ နမ္မတူဆေးရုံတွင် တက်ရောက် ကုသမှုခံယူခဲ့ကာ လက်ရှိတွင် အဆိုပါ အရပ်သားနှစ်ဦးမှာ ဆေးရုံမှ ပြန်ဆင်းလာပြီ ဖြစ်သော်လည်း ဒဏ်ရာပြင်းထန်ခဲ့သည့် အမျိုးသားမှာ အလုပ် မလုပ်နိုင်သေးကြောင်း ဦးထွန်းလင်းက ပြောကြားသည်။

တိုက်ပွဲဖြစ်ပွားရာ ဒေသအနီးရှိ ကျေးရွာများ ဖြစ်သော လလုံ၊ နားဆန်း၊ နားပိန်း၊ မန်ဆာအွမ် ၊ မန်ဆာလုံ၊ ကုန်းမုံ၊ မန်အိုင်နှင့် နားလင်းတို့မှ ဒေသခံ စစ်ဘေးရှောင်ပြည်သူ ၆၀၀ ကျော်သည် မန်းရင်ကျေးရွာ ဘုန်းကြီးကျောင်း၊ ၀ိန်းနန်ကျေးရွာ ဘုန်းကြီးကျောင်းနှင့် ပန်ခမ်းကျေးရွာ ဘုန်းကြီးကျောင်းတို့တွင် လာရောက် တိမ်းရှောင်ခဲ့ရကြောင်း သိရသည်။

လက်ရှိတွင် အဆိုပါ စစ်ဘေးရှောင်ပြည်သူများမှာ ၎င်းတို့၏ နေရပ်အသီးသီးတွင် ပြန်လည် နေထိုင်နေပြီ ဖြစ်သည်။

“စစ်ဘေးရှောင်တွေ မရှိတော့ဘူး။ ၂၅ ရက်တုန်းက ပြန်ကုန်ပြီ” ဟု မိုင်းရင်ကျေးရွာအုပ်စု အုပ်ချုပ်ရေးမှူး ဦးထွန်းလင်းက ပြောကြားသည်။

စစ်ဘေးရှောင်များ နေရပ်အသီးသီးတွင် ပြန်လည်နေထိုင်ခြင်းနှင့်အတူ အဆိုပါဒေသတွင် ပစ်ခတ်မှုများလည်း မဖြစ်ပွားတော့ကြောင်း ဦးထွန်းလင်းက ပြောကြားသည်။

တိုက်ပွဲဖြစ်ပွားရာ ဒေသသည် တပ်မတော်၊ ရှမ်းပြည်ပြန်လည်ထူထောင်ရေးကောင်စီ (RCSS) ၊ ရှမ်းပြည်တိုးတက်ရေးပါတီ (SSPP) နှင့် တအန်းလက်နက်ကိုင်အဖွဲ့ (TNLA) တို့ အဖွဲ့စုံ နေထိုင်ပြီး ရှုပ်ထွေးသည့် နေရာဖြစ်ကြောင်း သိရသည်။

လက်ရှိတွင် တအန်းလက်နက်ကိုင်အဖွဲ့ (TNLA) သည် ရှမ်းလက်နက်ကိုင်အဖွဲ့ (SSPP) နှင့် လည်းကောင်း၊ ရှမ်းပြည် ပြန်လည်ထူထောင်ရေးကောင်စီ (RCSS) နှင့်လည်းကောင်း တိုက်ပွဲ မဖြစ်ပွားသော်လည်း တပ်မတော်နှင့် စစ်ရေးတင်းမှုများ ဖြစ်ပွားနေကြောင်း TNLA သတင်းနှင့်ပြန်ကြားရေး တာဝန်ခံ ဗိုလ်မှူး မိုင်းအိုက်ကျော်က မေ ၃၁ ရက်တွင် ပြောကြားသည်။

ကြားဖြတ်ရွေးကောက်ပွဲ ကျင်းပမည့် လစ်လပ်မဲဆန္ဒနယ် ၁၃ နေရာတွင် မဲစာရင်းပြုစုရာ၌ မတူပီ၊ ကန်ပက်လက်၊ တမူး မဲဆန္ဒနယ် အပါအ၀င် နေရာငါးနေရာ မဲစာရင်းပြုစုပြီးစီး

၂၀၁၇ ကြားဖြတ်ရွေးကောက်ပွဲ မကျင်းပမီ လမ်းမတော်မြို့နယ်ရှိ အမှတ် (၆) ရပ်ကွက်တွင် ကြေညာထားသည့် မဲစာရင်းအား လာရောက်ကြည့်ရှုနေကြသူများ

ကြားဖြတ်ရွေးကောက်ပွဲ ကျင်းပမည့် လစ်လပ်မဲဆန္ဒနယ် ၁၃ နေရာတွင် မဲစာရင်းပြုစုရာ၌ မတူပီ၊ ကန်ပက်လက်၊ တမူး မဲဆန္ဒနယ် အပါအ၀င် မဲဆန္ဒနယ် ငါးနေရာ မဲစာရင်း ပြုစုပြီးစီးပြီဖြစ်ကြောင်း ပြည်ထောင်စုရွေးကောက်ပွဲ ကော်မရှင်အဖွဲ့ဝင် ပြောရေးဆိုခွင့်ရှိသူ ဦးမြင့်နိုင်က The Daily Eleven သတင်းစာကို ပြောကြားသည်။

၂၀၁၈ ခုနှစ်အတွင်း ကြားဖြတ်ရွေးကောက်ပွဲ တစ်ရပ်ကို နိုဝင်ဘာ ၃ ရက်တွင် ကျင်းပမည်ဖြစ်ကြောင်း ရွေးကောက်ပွဲ ကော်မရှင်က ကြေညာထားသည်။

လက်ရှိတွင် ကြားဖြတ်ရွေးကောက်ပွဲနှင့် ပတ်သက်၍ မဲဆန္ဒရှင်စာရင်း ပြုစုရာတွင် မတူပီ မဲဆန္ဒနယ်တွင် မဲဆန္ဒရှင် ၁၇၄၈၉ ဦး၊ ကန်ပက်လက် မဲဆန္ဒနယ်တွင် ၁၂၄၇၅ ဦး၊ တမူးမဲဆန္ဒနယ်တွင် ၃၄၈၃၂ ဦးရှိကြောင်း ရွေးကောက်ပွဲ ကော်မရှင်အဖွဲ့ဝင် ဦးမြင့်နိုင်က ပြောကြားသည်။

“မဲစာရင်းက တော်တော်များ တချို့နေရာတွေလည်း ပြီးပါပြီ။ ငါးနေရာလောက် ပြီးပါပြီ။ မတူပီ၊ ကန်ပက်လက်၊ တမူး၊ မင်းဘူး (၂) တို့ ပြီးကုန်ကြပြီ။ အကြမ်းပြုစုထားတာပေါ့။ ဒါလည်း အတည်မဟုတ်သေးဘူးပေါ့နော်။ ဖြည့်တာတွေ ဘာတွေ လာဦးမှာပေါ့။ မတူပီဆိုလို့ရှိရင် အရင် ၂၀၁၅ တုန်းကဆိုရင် ၁၆၄၄၅ အခုဆိုရင် ၁၇၄၈၉ ပေါ့။ ဒါက ပြန်ပြီးတော့ မဲစာရင်းကပ်တော့ အတိုးအလျှော့ တွေ့နိုင်သေးတာပေါ့နော်။ ကန်ပက်လက်ဆိုရင် အရင်တုန်းက ၁၁၄၈၄ ပေါ့။ အခု ၁၂၄၇၅ ပေါ့။ နောက်တမူး ဆိုလို့ရှိရင် ၃၂၁၅၈။ အခုဆိုရင် ၃၄၈၃၂။ ပိုတာပဲရှိတာပေါ့။ မင်းဘူး (၂) ဆိုရင် ၆၆၁၂၉ ပေါ့။ အခုက ၆၈၀၀၀ ကျော်ပေါ့။ ဒါကတော့ အကြမ်းပြုစု ထားတာပေါ့နော်။ ကပ်တဲ့အခါကျတော့ လာကြည့်ကြ၊ ပြင်ကြ၊ ဖြည့်ကြဦးမှာပေါ့” ဟု ပြည်ထောင်စု ရွေးကောက်ပွဲ ကော်မရှင်အဖွဲ့ဝင် ဦးမြင့်နိုင်က ပြောကြားသည်။

ကြားဖြတ် ရွေးကောက်ပွဲအတွက် မဲစာရင်းပြုစုခြင်းကို ဧပြီ ၁၉ ရက်မှစတင်ကာ ပြုစုလျက်ရှိပြီး မေလကုန်တွင် အပြီးပြုစုရန် လျာထားကြောင်း သိရသည်။

သို့သော် မဲဆန္ဒရှင် နှစ်သိန်းကျော်ရှိသည့် မြင်းခြံမဲဆန္ဒနယ်တွင် အနည်းငယ် နောက်ကျနိုင်ကြောင်း ရွေးကောက်ပွဲကော်မရှင် အဖွဲ့ဝင် ဦးမြင့်နိုင်က ဆိုသည်။

ကြားဖြတ်ရွေးကောက်ပွဲ မဲစာရင်းကြေညာရာ၌ အိမ်ထောင်စုအလိုက် ထုတ်ပြန်ကြေညာ ပေးမည်ဖြစ်သည်။

ကြားဖြတ်ရွေးကောက်ပွဲ ကျင်းပမည့် လစ်လပ်မဲဆန္ဒနယ် ၁၃ နေရာမှာ ပြည်သူ့လွှတ်တော် မဲဆန္ဒနယ် လေးနေရာ၊ အမျိုးသား လွှတ်တော်မဲဆန္ဒနယ် တစ်နေရာနှင့် တိုင်းဒေသကြီးနှင့် ပြည်နယ်လွှတ်တော် မဲဆန္ဒနယ် ရှစ်နေရာတို့ဖြစ်သည်။

လစ်လပ်မဲဆန္ဒနယ်ရှိ မဲစာရင်းများကို ဇွန်လကုန် သို့မဟုတ် ဇူလိုင်လ ပထမပတ်တို့တွင် ကြေညာရန် လျာထားကြောင်း ပြည်ထောင်စု ရွေးကောက်ပွဲကော်မရှင် အဖွဲ့ဝင် ဦးမြင့်နိုင်က ပြောကြားထားသည်။

ထို့ပြင် လွှတ်တော်အသီးသီး၏ မဲဆန္ဒနယ်များအတွက် လွှတ်တော်ကိုယ်စားလှယ်လောင်း အမည်စာရင်းများကို ဇူလိုင် ၂ ရက်မှ စတင် တင်သွင်းနိုင်ပြီး ဇူလိုင် ၁၁ ရက်တွင် နောက်ဆုံး တင်သွင်းရမည် ဖြစ်ကြောင်း ပြည်ထောင်စု ရွေးကောက်ပွဲကော်မရှင်က မေ ၂၅ ရက်တွင် ကြေညာချက် ထုတ်ပြန်သည်။

ထို့အတူ လွှတ်တော်ကိုယ်စားလှယ်လောင်း အမည်စာရင်း တင်သွင်းလွှာများ ရုပ်သိမ်းလိုပါက ဇူလိုင် ၁၃ ရက်တွင် နောက်ဆုံး ရုပ်သိမ်းနိုင်ကြောင်းနှင့် လွှတ်တော်ကိုယ်စားလှယ်လောင်း အမည်စာရင်း တင်သွင်းလွှာများကို ဇူလိုင် ၁၆ ရက်မှ ၂၂ ရက်အထိ စိစစ်မည်ဖြစ်ကြောင်း ပြည်ထောင်စု ရွေးကောက်ပွဲ ကော်မရှင်၏ ထုတ်ပြန်ချက်အရ သိရသည်။

တည်ဆဲနိုင်ငံရေးပါတီ ၉၃ ပါတီသို့ မေ ၁၅ ရက်တွင် ပြည်ထောင်စုရွေးကောက်ပွဲ ကော်မရှင်က ကြားဖြတ်ရွေးကောက်ပွဲ ပြုလုပ်မည့် ကြေညာချက်အား ပေးပို့ထားပြီး ပါတီဆက်လက် ရပ်တည်ရန် မဲဆန္ဒနယ် သုံးနေရာ မဖြစ်မနေ ၀င်ရောက်ယှဉ်ပြိုင်ရမည့် နိုင်ငံရေးပါတီ ခုနစ်ပါတီရှိကြောင်း သိရသည်။

ပြည်ထောင်စု ရွေးကောက်ပွဲကော်မရှင် အနေဖြင့် ကြားဖြတ်ရွေးကောက်ပွဲ ကျင်းပမည့် လစ်လပ်မဲဆန္ဒနယ် ၁၃ နေရာရှိ ပြည်ပရောက် မဲဆန္ဒရှင်များ ကြိုတင်ဆန္ဒမဲ လက်မှတ်ဖြင့် မဲပေးနိုင်ရေး ပုံစံ ၁၅ များကို သက်ဆိုင်ရာ မြန်မာသံရုံးများသို့ မကြာမီပေးပို့နိုင်ရေး နိုင်ငံခြားရေး ၀န်ကြီးဌာန သက်ဆိုင်ရာ တာဝန်ရှိသူများနှင့် ညှိနှိုင်းဆောင်ရွက်လျက်ရှိကြောင်း သိရသည်။

 

ပြည်တွင်းငြိမ်းချမ်းရေးအတွက် ရှမ်းပြည်နယ်အတွင်းရှိ NCA လက်မှတ်ထိုးနိုင်ခြင်း မရှိသေးသော လက်နက်ကိုင် အဖွဲ့များနှင့် တွေ့ဆုံဆွေးနွေးပြီး ကြိုးပမ်းဆောင်ရွက်နေဟုဆို

ပြည်တွင်းငြိမ်းချမ်းရေးအတွက် ရှမ်းပြည်နယ်အတွင်းရှိ NCA လက်မှတ်ရေးထိုးနိုင်ခြင်း မရှိသေးသော လက်နက်ကိုင် အဖွဲ့များနှင့် တွေ့ဆုံဆွေးနွေးပြီး ကြိုးပမ်းဆောင်ရွက်မှုများ ပြုလုပ်နေဟု ရှမ်းပြည်နယ် နယ်လုံဝန်ကြီးက သတင်းစာ ရှင်းလင်းပွဲတွင် ပြောကြားသည်။

ရှမ်းပြည်နယ် အစိုးရအဖွဲ့၏ ဒုတိယသက်တမ်း တစ်နှစ်တာ ဆောင်ရွက်ခဲ့မှု အခြေအနေများကို မီဒီယာများနှင့် သတင်းစာ ရှင်းလင်းခြင်းကို တောင်ကြီးမြို့ မြို့တော်ခန်းမတွင် မေ ၂၅ ရက် မွန်းလွဲ ၁ နာရီတွင် စတင်ပြုလုပ်ခဲ့ပြီး သတင်းမီဒီယာများနှင့် အပြန်အလှန် မေးခွန်းများ ဖြေဆိုခဲ့ခြင်း ဖြစ်သည်။

“NCA လက်မှတ် ရေးထိုးထားခြင်း မရှိသေးတဲ့ အဖွဲ့တွေနဲ့ ဆွေးနွေးနေတာတွေ ရှိပါတယ်။ ထိုနည်းတူစွာပဲ ကျွန်တော်တို့ကိုယ်တိုင် လိုက်ပါပြီးတော့ NCA လက်မှတ်မထိုးထားတဲ့ နေရာတွေမှာ NCA လက်မှတ်ရေးထိုးဖို့အတွက် လိုအပ်တဲ့ ဒေသပိုင်းဆိုင်ရာ ညှိနှိုင်းဆောင်ရွက်မှုတွေ၊ ငြိမ်းချမ်းရေးသွားမယ့် လမ်းစဉ်တွေကို ဆွေးနွေးပြီး ဆောင်ရွက်လျက် ရှိပါတယ်။ လက်ရှိ NCA လက်မှတ်ရေးထိုးတာ ရှစ်ဖွဲ့ကနေ ထပ်တိုးတင်ပြလိုက်တာ နှစ်ဖွဲ့ဆိုတော့ စုစုပေါင်း ၁၀ ဖွဲ့ဖြစ်ခဲ့တာ ဖြစ်ပါတယ်။ စေ့စပ်ညှိနှိုင်းမှုတွေ ဆောင်ရွက်နေပါတယ်လို့ ဖြေကြားလိုပါတယ်” ဟု လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး နိုင်ဝင်းအောင်က ပြောကြားသည်။

ထို့ပြင် ရှမ်းပြည်နယ်အတွင်းရှိ ပြည်သူလူထုများ ငြိမ်းချမ်းစွာ နေထိုင်ရေးနှင့် တရားဥပဒေစိုးမိုးရေး ကိစ္စရပ်များသည် ၀န်ကြီးချုပ် တာဝန်ယူ ဆောင်ရွက်နေစဉ် ကာလအတွင်း အကြီးမားဆုံးသော စိန်ခေါ်မှု တစ်ရပ်လည်း ဖြစ်ကြောင်း ဒေါက်တာလင်းထွဋ်က သတင်းထောက်တစ်ဦး၏ မေးမြန်းမှုကို ပြန်လည် ဖြေကြားသည်။

“ရှမ်းပြည်နယ်အတွင်း နေထိုင်ကြသော ပြည်သူလူထု တစ်ရပ်လုံးအတွက် ငြိမ်းချမ်းစွာ နေထိုင်ရေးနဲ့ တရားဥပဒေ စိုးမိုးရေးက အကြီးမားဆုံးနဲ့ အခက်ခဲဆုံး ဖြေရှင်းနေရတဲ့ အခက်အခဲ အတားအဆီး လုပ်ငန်းတာဝန်တစ်ခု ဖြစ်ပါတယ်ဆိုတာ ပြောချင်ပါတယ်” ဟု ရှမ်းပြည်နယ် ၀န်ကြီးချုပ် ဒေါက်တာလင်းထွဋ်က ပြောကြားသည်။

 

ကုလသမဂ္ဂ၏ စည်းမျဉ်းစည်းကမ်းများအရ နယ်စပ်မျဉ်းအနီးရှိ မလုပ်သင့်သည်တို့ကို အမြန်ဆုံးဖယ်ရှားရန် မြန်မာက ဘင်္ဂလားဒေ့ရ်ှအား တောင်းဆို

မြန်မာ-ဘင်္ဂလားဒေ့ရ်ှနှစ်နိုင်ငံနယ်နိမိတ်အနီးတွင် လုံခြုံရေးဆိုလာမီးတိုင်များ စိုက်ထူထားသည်ကို တွေ့ရစဉ် (ဓာတ်ပုံ-သတင်းထုတ်ပြန်ရေးကော်မတီ)

ကုလသမဂ္ဂ၏ စည်းမျဉ်းစည်းကမ်းများအရ မလုပ်သင့်သည်တို့ကို အမြန်ဆုံးဖယ်ရှားရန် မြန်မာဘက်က ဘင်္ဂလားဒေ့ရ်ှအား တောင်းဆိုခဲ့ကြောင်း သတင်းထုတ်ပြန်ရေးကော်မတီ၏ ထုတ်ပြန်ချက်အရ သိရသည်။

မြန်မာ-ဘင်္ဂလားဒေ့ရှ် နှစ်နိုင်ငံနယ်ခြားစောင့် တပ်ရင်းမှူးများအဆင့် တွေ့ဆုံဆွေးနွေးပွဲကို မေ ၂၃ ရက် မွန်းလွဲ ၂ နာရီ ၃၅ မိနစ်မှ ညနေ ၅ နာရီအထိ မြန်မာ-ဘင်္ဂလားဒေ့ရ်ှနှစ်နိုင်ငံ ချစ်ကြည်ရေးတံတားအနီး ဘင်္ဂလားဒေ့ရ်ှဘက်ခြမ်းတွင် ပြုလုပ်ခဲ့ပြီး ယင်းဆွေးနွေးပွဲတွင် ယခုကဲ့သို့ တောင်းဆိုခဲ့ခြင်းဖြစ်သည်။

ဆွေးနွေးပွဲတွင် ဘင်္ဂလားဒေ့ရှ် နယ်ခြားစောင့်တပ်ရင်းမှူးက နှစ်နိုင်ငံနယ်နိမိတ်မျဉ်းအနီးတွင် မြန်မာနိုင်ငံဘက်မှ အသံချဲ့စက်များဖြင့် ပြောဆိုနေသဖြင့် ၎င်းအသံချဲ့စက်သံကြောင့် ဘင်္ဂလားဒေ့ရ်ှဘက်တွင် နေထိုင်သည့် နိုင်ငံသားများ စိုးရိမ်ပူပန်နေပြီး စာသင်ကျောင်းများ၊ သင်တန်းကျောင်းများရှိသဖြင့် အသံလျှော့ချပေးရန်၊ နှစ်နိုင်ငံနယ်စပ်တစ်လျှောက်တွင် မြန်မာ့တပ်မတော်အနေဖြင့် လုံခြုံရေးဆိုင်ရာ လုပ်ဆောင်မှုများရှိပါက မိမိတို့ထံ အသိပေးအကြောင်းကြားစေလိုကြောင်း၊ ဒေသကွပ်ကဲရေးမှူးအဆင့် တွေ့ဆုံပွဲအစည်းအဝေးပြုလုပ်နိုင်ရန် နယ်ခြားစောင့် ကွပ်ကဲရေးမှူးအား သုံးကြိမ်အကြောင်းကြားထားသော်လည်း မိမိတို့ထံ အကြောင်းပြန်ကြားမှု မရှိသေးကြောင်း၊ နှစ်နိုင်ငံနယ်နိမိတ်မျဉ်းအနီး အဆောက်အအုံများ ဆောက်လုပ်မည်ဆိုပါက ဆောက်လုပ်နိုင်သော်လည်း မိမိတို့ထံ အသိပေးစေလိုကြောင်း ပြောကြားသည်။

ထို့နောက် မြန်မာနိုင်ငံ နယ်ခြားစောင့်ရဲတပ်ဖွဲ့မှူးက နှစ်နိုင်ငံနယ်နိမိတ်မျဉ်းအနီး ဘင်္ဂလားဒေ့ရ်ှနိုင်ငံဘက်ခြမ်းတွင် CCTV ကင်မရာလေးလုံး တပ်ဆင်ခြင်းနှင့် လုံခြုံရေးဆိုလာမီးတိုင် ၁၀ တိုင် တပ်ဆင်ထားခြင်းများသည် တစ်ဖက်နိုင်ငံ နယ်မြေအခြေအနေများနှင့် လှုပ်ရှားမှုများကို စောင့်ကြည့်သတင်းရယူခြင်းဖြစ်၍ ကုလသမဂ္ဂစည်းမျဉ်းအရ မလုပ်သင့်သည်ကို လုပ်သည့်သဘောဖြစ်၍ အမြန်ဖယ်ရှားပေးစေလိုကြောင်း၊ နှစ်နိုင်ငံနယ်နိမိတ်မျဉ်းအနီး လူမနေထိုင်ရန် သတ်မှတ်ထားသည့်နေရာတွင် လူဦးရေတိုးပွားလာမှုများကို ဘင်္ဂလားဒေ့ရ်ှနိုင်ငံအနေဖြင့် လျစ်လျူရှုပြီး ထောက်ခံအားပေးသည့် သဘောဆောင်နေကြောင်း၊ အိမ်ထောင်စုများကို တိုးချဲ့လာမှု၊ ရွှေ့ပြောင်းလာမှုများကို ထိန်းသိမ်းရန်အတွက် အသံချဲ့စက်ဖြင့် သတိပေးတားမြစ်မှုများ ဆောင်ရွက်နေရခြင်းဖြစ်ပြီး ဘင်္ဂလားဒေ့ရ်ှနိုင်ငံဘက်မှ ပူးပေါင်းဆောင်ရွက်ပါက မိမိတို့အနေဖြင့် ထိုကဲ့သို့လုပ်ဆောင်ရန်မလိုကြောင်း၊ ငါးဖမ်းစက်လှေနှင့်အတူ တွေ့ရှိထိန်းသိမ်းထားသည့် ဘင်္ဂလားဒေ့ရ်ှနိုင်ငံသား အာမောက်ဖော်လောင်ပါ ငါးဦးတို့အား လွှဲပြောင်းပေးအပ်ရန်အတွက် အကြောင်းကြားထားသော်လည်း ယခုအချိန်အထိ အကြောင်းပြန်ကြားလာခြင်းမရှိကြောင်း၊ နှစ်နိုင်ငံနယ်နိမိတ်မျဉ်းအနီးရှိ အဆောက်အအုံ မဆောက်လုပ်ရန် တားမြစ်ထားသည့်ဇုန်အတွင်း၌ တဲအသစ်များ ထပ်မံတိုးချဲ့ဆောက်လုပ်ခြင်းများအား ရပ်ဆိုင်းပေးစေလိုပြီး ရိက္ခာလာရောက်ပေးပို့နေမှုများနှင့် လုံခြုံရေးလိုက်ပါ ကူညီပေးနေမှုများကို ကန့်ကွက်ကြောင်း ပြန်လည်ပြောကြားသည်။

အဆိုပါ တွေ့ဆုံဆွေးနွေးပွဲသို့ မြန်မာနိုင်ငံဘက်မှ အရာရှိ ၁၀ ဦးနှင့် ဘင်္ဂလားဒေ့ရ်ှနိုင်ငံဘက်မှ အရာရှိ ၁၀ ဦး ပါဝင်ကြောင်း သိရသည်။ ထို့ပြင် မေ ၂၃ ရက်ကလည်း မြန်မာနိုင်ငံဘက်ခြမ်း တောင်ပြိုလက်ဝဲတွင် မြန်မာ- ဘင်္ဂလားဒေ့ရ်ှနှစ်နိုင်ငံ တပ်ရင်းမှူးအဆင့် တွေ့ဆုံဆွေးနွေးပွဲကို ပြုလုပ်ခဲ့ကြောင်း သတင်းထုတ်ပြန်ရေးကော်မတီက ထုတ်ပြန်ထားသည်။

မြန်မာနိုင်ငံဆိုင်ရာ ကုလသမဂ္ဂ အထူးကိုယ်စားလှယ်သစ် ဇွန်လတွင် ပထမဆုံးခရီးစဉ် လာရောက်မည်

မြန်မာနိုင်ငံဆိုင်ရာ ကုလသမဂ္ဂ အထူးကိုယ်စားလှယ်သစ် ခရစ်စတင်းရှရန်နာဘာဂျီနာသည် ဘင်္ဂါလီမွတ်စလင်ဒုက္ခသည် အကျပ်အတည်းဆိုင်ရာ ဆွေးနွေးပွဲများအတွက် လာမည့်လတွင် နေပြည်တော်သို့ ပထမဆုံးအကြိမ် သွားရောက်မည်ဖြစ်ကြောင်း ကုလသမဂ္ဂ သတင်းအရစ်အမြစ်များက မေ ၂၃ တွင် ပြောကြားခဲ့သည်။

ဂျာမနီနိုင်ငံဆိုင်ရာ ဆွစ်ဇာလန်သံအမတ်ကြီး ဖြစ်ခဲ့ဖူးသော ရှရန်နာဘာဂျီနာသည် ပြီးခဲ့သည့်လတွင် မြန်မာနိုင်ငံဆိုင်ရာ အထူးကိုယ်စားလှယ်အဖြစ် ခန့်အပ်ခံခဲ့ရခြင်းဖြစ်သည်။ လုံခြုံရေးကောင်စီက မြန်မာနိုင်ငံသို့ သွားခဲ့ပြီးနောက် အထူးကိုယ်စားလှယ်က ဇွန်လတွင် ပထမအကြိမ် အစည်းအဝေးများကို ကျင်းပရန် လာရောက်မည်ဖြစ်သည်။

ရှရန်နာဘာဂျီနာသည် ထိုင်းနိုင်ငံဆိုင်ရာ ဆွစ်ဇာလန်သံအမတ်ကြီးအဖြစ် ၂၀၀၉ ခုနှစ် မှ ၂၀၁၅ ခုနှစ်ထိ ထမ်းဆောင်ခဲ့ဖူးသူဖြစ်သည်။

မြန်မာနိုင်ငံသည် ကုလသမဂ္ဂ လူ့အခွင့်အရေးကောင်စီက ဖွဲ့စည်းထားသော အချက်အလက်ရှာဖွေရေးမစ်ရှင်ကို မြန်မာနိုင်ငံအတွင်းသို့ ၀င်ရောက်ခွင့်ပြုရန် ငြင်းဆိုထားပြီး ကုလသမဂ္ဂ လူ့အခွင့်အရေးကျွမ်းကျင်သူ မြန်မာနိုင်ငံဆိုင်ရာ ကိုယ်စားလှယ် ရန်ဟီးလီကိုလည်း တားမြစ်ပိတ်ပင်ထားသည်။

ကုလသမဂ္ဂ အထူးကိုယ်စားလှယ်၏ ခရီးစဉ်နှင့်ပတ်သက်၍ ရက်အတိအကျကို ကုလသမဂ္ဂ သတင်းအရင်းအမြစ်က မပြောကြားခဲ့သော်လည်း ခရီးစဉ်ကို မြန်မာအစိုးရက သဘောတူထားကြောင်း ပြောကြားသည်။

ရှရန်နာဘာဂျီနာသည် ဘင်္ဂါလီမွတ်စလင် အကျပ်အတည်းကို ဆွေးနွေးရန်အတွက် အတွင်းရေးမှူးချုပ် အန်တိုနီယိုဂူတာရက်စ် နှင့် မေ ၂၂ ရက်က တွေ့ဆုံခဲ့သည်။

အသက် ၅၄ နှစ်အရွယ် ဘာဂျီနာ၏ ခင်ပွန်းသည်လည်း သံတမန်တစ်ဦးဖြစ်ပြီး ကမ္ဘောဒီးယား၊ လာအိုနှင့် မြန်မာနိုင်ငံဆိုင်ရာ ဆွစ်ဇာလန်သံအမတ်ကြီးတာဝန်ကို ထမ်းဆောင်ခဲ့ဖူးသူဖြစ်သည်။ ဘာဂျီနာ၏ ၂၅ နှစ်တာ သံတမန်ရေးရာ အတွေ့အကြုံများက မြန်မာနိုင်ငံဆိုင်ရာ အထူးကိုယ်စားလှယ်သစ် တာဝန်အတွက် သင့်တော်မှုရှိသူဖြစ်စေကြောင်း ကုလသမဂ္ဂ ပြောခွင့်ရပုဂ္ဂိုလ် စတက်ဖနီဒူဂျာရစ်က ပြောကြားထားခဲ့သည်။

ကုလသမဂ္ဂ အတွင်းရေးမှူးချုပ် အန်တိုနီယိုဂူတာရက်စ်သည် ခရစ်စတင်းရှရန်နာ ဘာဂျီနာကို ၎င်း၏ မြန်မာနိုင်ငံဆိုင်ရာ အထူးသံတမန်အဖြစ် ဧပြီလအတွင်းက ခန့်အပ်ခဲ့ခြင်းဖြစ်သည်။

မြန်မာနိုင်ငံအား ရခိုင်ပြည်နယ်၌ ပြုလုပ်သည့် စစ်ဆင်ရေးကို အဆုံးသတ်ရန် တောင်းဆိုသည့် ဆုံးဖြတ်ချက်တစ်ရပ်၌ အထူးသံတမန်တစ်ဦး ခန့်ထားရန် ၂၀၁၇ ခုနှစ် ဒီဇင်ဘာကပြုလုပ်ခဲ့သည့် အထွေထွေညီလာခံက ကုလသမဂ္ဂ အတွင်းရေးမှူးချုပ်အား တောင်းဆိုခဲ့ခြင်းလည်းဖြစ်သည်။

ကုလသမဂ္ဂ လုံခြုံရေးကောင်စီ ကိုယ်စားလှယ်အဖွဲ့က မေလဆန်းတွင် မြန်မာနိုင်ငံသို့ လာရောက်ခဲ့သည့်ခရီးစဉ်အပြီး၌ ဘင်္ဂါလီတို့ကို ဖိနှိပ်မှုစွပ်စွဲချက်များနှင့် ပတ်သက်၍ မြန်မာနိုင်ငံက မှန်မှန်ကန်ကန် စုံစမ်းစစ်ဆေးပေးရမည်ဟု တောင်းဆိုခဲ့သည်။

မြန်မာနိုင်ငံ အမျိုးသားလူ့အခွင့်အရေးကော်မရှင်၏ နှစ်ပတ်လည်အစီရင်ခံစာနှင့် ပတ်သက်၍ လွှတ်တော်ကိုယ်စားလှယ်၏ ဆွေးနွေးမှုသည် တပ်မတော်ဂုဏ်သိက္ခာကို ထိခိုက်စေသဖြင့် မှတ်တမ်းမှ ပယ်ဖျက်ပေးရန် တပ်မတော်သား လွှတ်တော်ကိုယ်စားလှယ် မတ်တတ်ရပ်ကန့်ကွက်

မြန်မာနိုင်ငံ အမျိုးသားလူ့အခွင့်အရေးကော်မရှင်၏ နှစ်ပတ်လည်အစီရင်ခံစာနှင့် ပတ်သက်၍ မန်တုံမဲဆန္ဒနယ် ပြည်သူ့လွှတ်တော်ကိုယ်စားလှယ် ဒေါ်နန်းမိုး၏ ဆွေးနွေးချက်သည် တပ်မတော်ဂုဏ်သိက္ခာကို ထိခိုက်စေသဖြင့် မှတ်တမ်းမှပယ်ဖျက်ပေးရန် တပ်မတော်သားကိုယ်စားလှယ်က ပြည်ထောင်စုလွှတ်တော်တွင် မတ်တတ်ရပ် ကန့်ကွက်ခဲ့သည်။

နေပြည်တော်၌ မေ ၂၄ ရက်က ပြုလုပ်သည့် ဒုတိယအကြိမ် ပြည်ထောင်စုလွှတ်တော် အဋ္ဌမပုံမှန်အစည်းအဝေး စတုတ္ထနေ့တွင် မြန်မာနိုင်ငံ အမျိုးသားလူ့အခွင့်အရေးကော်မရှင်၏ ၂၀၁၇ ခုနှစ် နှစ်ပတ်လည်အစီရင်ခံစာနှင့် စပ်လျဉ်း၍ မန်တုံမဲဆန္ဒနယ် ပြည်သူ့လွှတ်တော်ကိုယ်စားလှယ် ဒေါ်နန်းမိုး၏ ဆွေးနွေးချက်သည် တပ်မတော်ဂုဏ်သိက္ခာကို ထိခိုက်စေကြောင်း တပ်မတော်သား ကိုယ်စားလှယ်က မတ်တတ်ရပ်ကန့်ကွက်ခဲ့ခြင်းဖြစ်သည်။

“အစီရင်ခံစာ၏ စာမျက်နှာ ၇၀ အပိုဒ် ၄ မှာပါရှိတဲ့အတိုင်း ကျွန်မရဲ့မဲဆန္ဒနယ်မှာ တာဝန်ထမ်းဆောင်နေတဲ့ တပ်မတော်သားအချို့က အပြစ်မဲ့ ဒေသခံတိုင်းရင်းသားတွေအပေါ် ညှဉ်းပန်းနှိပ်စက်ခြင်းနဲ့ ပတ်သက်ပြီး ကျွန်မကိုယ်တိုင် တိုင်ကြားခဲ့ပါတယ်။ အစီရင်ခံစာမှာ ပါရှိတဲ့အတိုင်း သက်ဆိုင်ရာဝန်ကြီးဌာနက စစ်ခုံရုံးများဖွဲ့စည်းပြီး စစ်ဆေးခဲ့ပါတယ်။ သို့သော် စစ်ခုံရုံးဖွဲ့စစ်ဆေးပြီး ယခုထိ ရှစ်လကြာမြင့်ခဲ့သော်လည်း ဒီကိစ္စနဲ့ပတ်သက်ပြီး ထိုက်တန်တဲ့ပြစ်ဒဏ် တစ်စုံတစ်ရာပေးပြီး အရေးယူခြင်း ရှိ မရှိကို ကျွန်မထံ အကြောင်းပြန်ကြားလာခြင်း လုံးဝမရှိသေးပါ။ ဒါကြောင့် အကြံပြုလိုတာက ဒီလိုကိစ္စရပ်တွေ ဆောင်ရွက်တဲ့အခါမှာ သက်ဆိုင်ရာဝန်ကြီးဌာနအနေနဲ့ အမှန်တကယ် ပြီးပြတ်ခြင်းရှိမရှိကို စိစစ်ပေးစေလိုပါတယ်” ဟု ပြည်သူ့လွှတ်တော်ကိုယ်စားလှယ် ဒေါ်နန်းမိုးက ဆွေးနွေးရာတွင် ပြောကြားခဲ့သည်။

ဒေါ်နန်းမိုး၏ ဆွေးနွေးမှုအပြီးတွင် တပ်မတော်သား လွှတ်တော်ကိုယ်စားလှယ်တစ်ဦးက အဆိုပါဆွေးနွေးမှုကို မှတ်တမ်းမှ ပယ်ဖျက်ပေးရန် မတ်တတ်ရပ် ကန့်ကွက်ခဲ့ခြင်းဖြစ်သည်။

“အဖွဲ့အစည်းတစ်ခုကို ခြေခြေမြစ်မြစ်မရှိဘဲ ခိုင်ခိုင်မာမာမရှိဘဲ နစ်နာမှုရှိအောင် ဆွေးနွေးတဲ့အချက်၊ ပြည်ထောင်စုလွှတ်တော်ဥပဒေ ၁၉ အရ ကျွန်တော်ကန့်ကွက်တာ ဖြစ်ပါတယ်။ ဂဃနဏမသိဘဲ တပ်မတော်ဂုဏ်သိက္ခာကို ထိခိုက်စေပါတယ်” ဟု မတ်တတ်ရပ်ကန့်ကွက်သူ တပ်မတော်သား လွှတ်တော်ကိုယ်စားလှယ်က ပြောကြားသည်။

အဆိုပါကိစ္စနှင့်ပတ်သက်ပြီး ပြည်ထောင်စုလွှတ်တော် နာယက ဦးမန်းဝင်းခိုင်သန်းက “တပ်မတော်သားက ကန့်ကွက်တဲ့အတွက် ဒေါ်နန်းမိုး ဆွေးနွေးသွားတဲ့အထဲမှာ ဘာမှမသိရဘူးလို့ ဆွေးနွေးသွားတယ်။ ဒါပေမဲ့ ဒီမှာစာမျက် ၇၀၊ အပိုဒ် ၄ မှာ ပြုမှုဆောင်ရွက်နေမှုများနှင့် စပ်လျဉ်း၍ ကော်မရှင်မှ ကာကွယ်ရေးဝန်ကြီးဌာနသို့ ၂၉ ရက် ၈ လ ၂၀၁၇ ခုနှစ်ရက်စွဲဖြင့် မေးမြန်းခဲ့ရာ ၀န်ကြီးဌာနမှ တိုင်းတန်းချက်အပေါ် စိစစ်မှုများပြုလုပ်ပြီး အဓိကကျူးလွန်သူ ဒုတိယတပ်ကြပ်တစ်ဦးအား စစ်စည်းကမ်းအရ အရေးယူခြင်းနှင့် တာဝန်ရှိသူဗိုလ်မှူးကြီးအဆင့်ရှိ အရာရှိကြီးတစ်ဦးအား အပြစ်ဖော်ပြ သတိပေးဆုံးမခြင်းများ ပြုလုပ်သွားမည်ဟု ၂၉ ရက် ၁၁ လ ၂၀၁၇ ခုနှစ် ရက်စွဲဖြင့် ပြန်ကြားလာခဲ့ပါသည်လို့ သူတို့ဖြေရှင်းထားတာ ရှိပါတယ်။ ဒါကြောင့် ပယ်ဖျက်ပေးပါမယ်” ဟုပြောကြားသည်။

မြန်မာနိုင်ငံ အမျိုးသားလူ့အခွင့်အရေးကော်မရှင်၏ ၂၀၁၇ ခုနှစ် နှစ်ပတ်လည်အစီရင်ခံစာ၏ စာမျက်နှာ ၇၀၊ အပိုဒ် ၄ တွင် ရှမ်းပြည်နယ်၊ မန်တုံမြို့နယ်၊ တအောင်း (ပလောင်) ကိုယ်ပိုင်အုပ်ချုပ်ခွင့်ရဒေသ ပြည်သူ့လွှတ်တော်ကိုယ်စားလှယ် ဒေါ်နန်းမိုးနှင့် ရှမ်းပြည်နယ် မဲဆန္ဒနယ်အမှတ် ၁၀ အမျိုးသားလွှတ်တော် ကိုယ်စားလှယ် ဦးမိုင်းအုဏ်းခိုင်က မန်တုံမြို့နယ်အတွင်း တာဝန်ထမ်းဆောင်နေသည့် တပ်မတော်သားများမှ ဒေသခံတိုင်းရင်းသားများအပေါ် ပြုမှုဆောင်ရွက်နေမှုများနှင့် စပ်လျဉ်း၍ ကော်မရှင်မှ ကာကွယ်ရေးဝန်ကြီးဌာနသို့ ၂၀၁၇ ခုနှစ် သြဂုတ် ၂၉ ရက်စွဲဖြင့် မေးမြန်းခဲ့ရာ ၀န်ကြီးဌာနမှ တိုင်းတန်းချက်အပေါ် စိစစ်မှုများပြုလုပ်ပြီး အဓိကကျူးလွန်သူ ဒုတိယတပ်ကြပ်တစ်ဦးအား စစ်စည်းကမ်းအရ အရေးယူခြင်းနှင့် တာဝန်ရှိသူ ဗိုလ်မှူးကြီးအဆင့်ရှိ အရာရှိကြီးတစ်ဦးအား အပြစ်ဖော်ပြ သတိပေးဆုံးမခြင်းများ ပြုလုပ်သွားမည်ဟု ၂၀၁၇ ခုနှစ် နိုဝင်ဘာ ၂၉ ရက် ရက်စွဲဖြင့် ပြန်ကြားလာခဲ့ပါသည်ဟု ဖော်ပြပါရှိသည်။

“အစီရင်ခံစာမှာ ပါပြီးသား။ စာမျက်နှာ ၇၀ အမှတ်စဉ် ၄ မှာ ရှင်းထားပြီးသား။ ပြည်ထောင်စုလွှတ်တော်ဆိုင်ရာ နည်းဥပဒေ ၁၉ အရအလည်း ဒီအစီရင်ခံစာမှာပါတဲ့ဟာနဲ့ တိုက်ရိုက်သက်ဆိုင်တဲ့ဟာကိုပဲ ဆွေးနွေးတာ ဖြစ်ပါတယ်။ ဆွေးနွေးတဲ့ကိစ္စကိုပဲ ကိုယ်စားလှယ်ဆီကို တိုက်ရိုက်မပြန်လို့ ဘာညာဆိုတာ အဲဒါကိုလက်မခံတာပါ။ ဘာပဲပြောပြော အဖွဲ့အစည်းတစ်ခုရဲ့ ဂုဏ်သိက္ခာ တကယ်လုပ်ထားတဲ့ဟာကိုလည်း မလုပ်သလို ထင်ယောင်ထင်မှား ဖြစ်စေမှာစိုးလို့ ကန့်ကွက်တာပါ” ဟု တပ်မတော်သား လွှတ်တော်ကိုယ်စားလှယ် ဒုတိယဗိုလ်မှူးကြီး မျိုးထက်ဝင်းက မီဒီယာများကို ပြောကြားသည်။

 

၂၁ ရာစု ပင်လုံအစည်းအဝေးများကို သတ်မှတ်ချိန်အတိုင်း ကျင်းပခြင်းထက် ထွက်ပေါ်လာမည့် ရလဒ်များသည် အရေးကြီးသဖြင့် ဆွေးနွေးဖက်များအကြား သဘောတူညီချက်များရရှိရေး အကျေအလည် ဆွေးနွေးရန် လိုအပ်ဟု UPDJC အတွင်းရေးမှူးများ သုံးသပ်

အစိုးရနှင့် NCA ထိုးထားသည့် တိုင်းရင်းသားလက်နက်ကိုင်အဖွဲ့တို့ မေ ၁၉ ရက်က နေပြည်တော်တွင် ဒုတိယအကြိမ် လုံခြုံရေးကဏ္ဍ အလွတ်သဘောဆွေးနွေးပွဲ ပြုလုပ်နေစဉ် (ဓာတ်ပုံ-Myo Win)

ပြည်ထောင်စုငြိမ်းချမ်းရေးညီလာခံ-၂၁ ရာစု ပင်လုံအစည်းအဝေးများကို သတ်မှတ်ချိန်အတိုင်း ကျင်းပနိုင်ခြင်း၊ မကျင်းပနိုင်ခြင်းထက် ညီလာခံမှထွက်ပေါ်လာမည့် ရလဒ်များသည် အလွန်အရေးကြီးပြီး အလွတ်သဘော ဆွေးနွေးကြမည့် ဆွေးနွေးဖက်များ ကြားသဘောတူညီချက်များ ရရှိရေးအတွက် အကျေအလည်ညှိနှိုင်းဆွေးနွေးရန် လိုအပ်ကြောင်း ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ (UPDJC) အတွင်းရေးမှူးများက သုံးသပ်ပြောကြားသည်။

၂၁ ရာစု ပင်လုံအစည်းအဝေးများကို တစ်နှစ်လျှင် နှစ်ကြိမ်ပြုလုပ်ရန် အစိုးရအဖွဲ့က စီစဉ်ထားသော်လည်း တစ်နှစ်လျှင်တစ်ကြိမ်သာ ပြုလုပ်နိုင်သေးပြီး တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ရေးထိုးထားသော တိုင်းရင်းသားလက်နက်ကိုင် အဖွဲ့အစည်းအချို့၏ အမျိုးသားအဆင့် နိုင်ငံရေးဆွေးနွေးပွဲများ ပြုလုပ်ရန် ကန့်သတ်ခံရမှုသည်လည်း သတ်မှတ်ချိန်အတိုင်း ညီလာခံကျင်းပနိုင်ရေးကို အခက်အခဲဖြစ်စေသည်ဟု UPDJC အတွင်းရေးမှူးများက ပြောကြားသည်။

“နိုင်ငံရေးဆွေးနွေးမှုရဲ့ အဓိကအခြေခံကတော့ ကျွန်တော်တို့ အကျေအလည် ညှိနှိုင်းဆွေးနွေးမှုတွေနဲ့ နိုင်ငံရေးဆွေးနွေးကြတာဖြစ်တဲ့အတွက် နိုင်ငံရေးပြဿနာတွေ ငြိမ်းချမ်းစွာဖြေရှင်းဖို့လို့ ပြောတဲ့အတွက် အကျေအလည် ညှိနှိုင်းဖြေရှင်းမှုကို အခြေခံရမှာဖြစ်ပါတယ်။ အဲဒီတော့ ဒါကလည်း ကျွန်တော်တို့ အကျေအလည် ညှိနှိုင်းဆွေးနွေးမှုတွေနဲ့ သွားမယ်ဆိုတာကိုလည်း နှစ်ဖက်စလုံးမှာ နဂိုကတည်းက သဘောတူခဲ့ကြတာ ဖြစ်ပါတယ်။ အခုကတော့ အကျေအလည် ညှိနှိုင်းဆွေးနွေးမှုတွေဖြစ်ဖို့ အဲဒါဟာ အဓိကအချက်ပါပဲ” ဟု တိုင်းရင်းသားလက်နက်ကိုင်များ အစုအဖွဲ့မှ UPDJC အတွင်းရေးမှူးအဖွဲ့ဝင် ဦးခွန်မြင့်ထွန်းက ပြောကြားသည်။

၂၁ ရာစု ပင်လုံတတိယအစည်းအဝေးအား အောင်မြင်စွာ ကျင်းပနိုင်ရေးအတွက် ပြည်ထောင်စု၏ အစိတ်အပိုင်းဟူသမျှသည် နိုင်ငံတော်မှ မည်သည့်အခါမျှ ခွဲမထွက်ရဆိုသည့်အချက်ကို အစိုးရနှင့် တပ်မတော်က ပြည်ထောင်စုသဘောတူစာချုပ် အစိတ်အပိုင်းတွင် ထည့်သွင်းလိုသော်လည်း တိုင်းရင်းသားများက လက်မခံနိုင်ကြောင်း၊ သို့သော် အဆိုပါအချက်ကို လက်ခံမှသာ အစိုးရနှင့် တပ်မတော်က တိုင်းရင်းသားများ လိုလားသည့် လူမျိုးရေးတန်းတူမှုနှင့် ကိုယ်ပိုင်ပြဋ္ဌာန်းခွင့်ကို လက်ခံမည်ဖြစ်သည့်အတွက် အဆိုပါကိစ္စတွင် အကျေအလည်ညှိနှိုင်းဆွေးနွေးရန် လိုအပ်နေသည်ဟု ဦးခွန်မြင့်ထွန်းက ပြောကြားသည်။

NCA စာချုပ်တွင် ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွတ်မှု မပြိုကွဲရေး စသည့် ဒို့တာဝန်အရေးသုံးပါးကို NCA စာချုပ်အား လက်မှတ်ရေးထိုးစဉ်ကတည်းကပင် တိုင်းရင်းသားလက်နက်ကိုင် အဖွဲ့အစည်းများက လက်ခံထားပြီးသားဖြစ်သည့်အတွက် ပြည်ထောင်စုသဘောတူစာချုပ် အစိတ်အပိုင်းတွင် ခွဲမထွက်ရဆိုသည့်အချက်ကို ထည့်သွင်းရန် မလိုအပ်တော့ဟု နိုင်ငံရေးပါတီအစုအဖွဲ့မှ UPDJC အတွင်းရေးမှူးအဖွဲ့ဝင် ဒေါက်တာမနာမ်တူးဂျာက ပြောကြားသည်။

“တပ်မတော်က ခုနကပြောတဲ့စာသား (ခွဲမထွက်ရ) ကို ထည့်ကိုထည့်ရမယ်ပေါ့။ တိုင်းရင်းသားတွေက ခွဲထွက်ရေးမူကို စွဲကိုင်ထားတာ မရှိပါဘူး။ ခွဲထွက်ရေးမူမပါတဲ့ ဖက်ဒရယ်ပြည်ထောင်စုဆိုပြီး ပြောလာတယ်။ ပထမအစည်းအဝေးမှာလည်း ခွဲထွက်ရေးမပါဘူး။ ဒါက ဒို့တာဝန်အရေးသုံးပါးကို လက်ခံတဲ့သဘောပေါ့။ ဒါပေမဲ့ တပ်မတော်နဲ့အစိုးရကတော့ ခုနကစကားလုံးပါမှ စိတ်ချရမယ့်သဘောယူဆနေတယ်။ ဒါက နောက်တော့ ဖြေရှင်းလို့ ရတန်ကောင်းပါတယ်။ ဒီတိုင်းသွားနေလို့လည်း မဖြစ်ဘူးလေ” ဟု ဒေါက်တာမနာမ်တူးဂျာက ပြောကြားသည်။

၂၁ ရာစုပင်လုံအစည်းအဝေးများကို တစ်နှစ်လျှင်နှစ်ကြိမ် ကျင်းပခြင်း၊ မကျင်းပခြင်းထက် ပြည်ထောင်စုငြိမ်းချမ်းရေးညီလာခံမှ အားလုံးသဘောတူလက်ခံသော ပြည်ထောင်စုသဘောတူညီချက် အစိတ်အပိုင်းများ ရရှိရေးကသာလျှင် ပိုမိုအရေးကြီးကြောင်း နိုင်ငံရေးပါတီအစုအဖွဲ့မှ UPDJC အတွင်းရေးမှူးအဖွဲ့ဝင် ဦးစိုင်းကျော်ညွန့်က ပြောကြားသည်။

“နိုင်ငံရေးဖြစ်စဉ်မှာလုပ်နေတဲ့ အမျိုးသားအဆင့် နိုင်ငံရေးတွေ့ဆုံပွဲတို့၊ လူထုတွေ့ဆုံပွဲတို့ဆိုတာ ဘယ်လိုလဲဆိုတာ ဟိုဘက်ဒီဘက် နားလည်တာမတူဘူး။ မတူတော့ ဒီဘက်ကလုပ်ရင် ဟိုဘက်က ပိတ်တယ်ပေါ့ဗျာ။ အဲ့ဒီတော့ ပြောချင်တာက ဒီအခက်အခဲအကျပ်အတည်းတွေကို ဖြေရှင်းဖို့လိုတယ်။ မဖြေရှင်းဘဲနဲ့ ညီလာခံကို လုပ်လိုက်မယ်ဆိုရင်လည်း ညီလာခံမှာသွားပြီးတော့ တိုင်းသိ၊ ပြည်သိ ငြင်းခုံနေကြလို့လည်း ဘာထူးမလဲ။ အဲဒီတော့ ကြားထဲမှာရှိနေတဲ့ အခက်အခဲတွေ ဖြေရှင်းဖို့လိုတယ်။ နောက်ပြီးတော့ လုံခြုံရေးပိုင်းဆိုင်ရာမှာဆိုရင်လည်း တစ်ခုတည်းသော တပ်မတော်ဆိုတာ ဘယ်လို၊ ပြည်ထောင်စုတပ်မတော်ဆိုတာ ဘယ်လိုပေါ့။ ဒီဟာတွေကလည်း ဆွေးနွေးညှိနှိုင်းမှုတွေမရှိဘူး။ မရှိဘဲနဲ့ ဟိုမှာသွားပြီး ရန်ဖြစ်နေကြရင်လည်း ဘာထူးမှာလဲ။ ဟိုဘက်က DDR ပြောတယ်။ ဒီဘက်က SSR ပြောတယ်။ ဟိုဘက်က DDR ပဲ ဆွေးနွေးမယ်။ SSR လုံးဝမဆွေးနွေးဘူး။ အဲဒါမျိုးတွေကအစ ဒါတွေက ပွဲမလုပ်ခင်ကတည်းက အပြင်မှာ ကြေကြေညက်ညက်ဖြစ်ဖို့လိုတယ်။ ဒါကြောင့်မို့ တိုင်းရင်းသားလက်နက်ကိုင်တွေအနေနဲ့ အစိုးရနဲ့ လာပြီးဆွေးနွေးတယ်။ အလွတ်သဘော နှစ်ခါဆွေးနွေးတယ်။ ဒါပေမဲ့ သဘောတူညီမှုမရသေးဘူး။ ဒီအလွတ်သဘောကတော့ များများတွေ့ဖို့လိုတယ်။ အလွတ်သဘောတွေက ပြေလည်ခါနီးပြီး အဖြေတွေထွက်ဖို့လိုတယ်” ဟု ဦးစိုင်းကျော်ညွန့်က ပြောကြားသည်။

၂၁ ရာစုပင်လုံ တတိယအစည်းအဝေး ကျင်းပနိုင်ရေးအတွက် အစိုးရနှင့် NCA လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့များ ယခုလကုန်ပိုင်းတွင် အလွတ်သဘော ပြန်လည်ဆွေးနွေးကြမည်ဖြစ်ပြီး နှစ်ဖက်အဖွဲ့အစည်းများအကြား ညှိနှိုင်းမှုအဆင်ပြေမှသာ ညီလာခံကျင်းပမည်ဟု အစိုးရနှင့် အလွတ်သဘော တွေ့ဆုံဆွေးနွေးရေးအဖွဲ့တွင် ပါဝင်ခဲ့သူ ဦးခွန်မြင့်ထွန်းက ပြောကြားသည်။

ရှမ်းပါတီနှစ်ခု ပေါင်းစည်းရေး ကိစ္စနှင့်ပတ်သက်၍ မည်ကဲ့သို့ သဘောထားရှိကြောင်း ကျားခေါင်းပါတီထံ ကျားဖြူပါတီ စာဖြင့်မေးမြန်း

ရှမ်းပါတီနှစ်ခု ပေါင်းစည်းရေးကိစ္စနှင့် ပတ်သက်၍ မည်ကဲ့သို့သဘောထားရှိကြောင်း ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီ (SNLD-ကျားခေါင်းပါတီ) ထံ ရှမ်းတိုင်းရင်းသားများ ဒီမိုကရက်တစ်ပါတီ (SNDP-ကျားဖြူပါတီ) က မေ ၂၃ ရက်တွင် စာပေးပို့မေးမြန်းထားကြောင်း သတင်းရရှိသည်။

SNLD ပါတီသို့ ပေးပို့သောစာတွင် ကျားဖြူပါတီ (SNDP) ၏ အနာဂတ်နိုင်ငံရေးမျှော်မှန်းချက်နှင့် ၎င်းတို့၏မူဝါဒများအား ရှမ်းပြည်ညီညွတ်ရေးကော်မတီ (CSSU) ၂၀၁၇-၂၀၁၈ အလှည့်ကျသဘာပတိသို့ တင်ပြထားပြီးဖြစ်ကြောင်း၊ CSSU သဘာပတိသို့ တင်ပြထားသည်မှာ SNDP ပါတီ၏ ၁၄ ကြိမ်မြောက် ဗဟိုအလုပ်အမှုဆောင်ကော်မတီ အစည်းအဝေးဆုံးဖြတ်ချက်အရ ရှမ်းတိုင်းရင်းသား ရဟန်းရှင်လူ၊ ပြည်သူများ၏ သဘောဆန္ဒများကို လေးစားသောအားဖြင့် SNDP နှင့် SNLD ပါတီနှစ်ခု ပေါင်းစည်းရေးကို ဆောင်ရွက်သွားရန် သဘောတူညီမှုရရှိခဲ့ကြောင်း၊ ပါတီနှစ်ခု ပူးပေါင်းရေးကိစ္စအား အခြေအနေအရပ်ရပ်ကြောင့်သော်လည်းကောင်း (သို့မဟုတ်) အကြောင်းအမျိုးမျိုးကြောင့်သော်လည်းကောင်း အကော်အထည်ဖော် ဆောင်ရွက်နိုင်ခြင်းမရှိသေးပါက လာမည့် ၂၀၂၀ အထွေထွေရွေးကောက်ပွဲတွင် ရှမ်းပါတီကြီးနှစ်ခုအနေဖြင့် မဲဆန္ဒနယ်မြေခွဲခြား၍ ရွေးကောက်ပွဲဝင်ကြရန် (သို့မဟုတ်) မြို့နယ်ခွဲခြား၍ ရွေးကောက်ပွဲဝင်ကြရန်နှင့် ပူးပေါင်းရေးအောင်မြင်ပါက ရှမ်းပါတီတစ်ခုတည်းအမည်ဖြင့် ရွေးကောက်ပွဲဝင်ကြရန်ဟူ၍ အဆိုပြုတင်ပြခဲ့ကြောင်း ဖော်ပြထားသည်။

ယင်းကဲ့သို့ SNDP ပါတီမှ CSSU သဘာပတိထံတင်ပြချက်များသည် ရေတိုနိုင်ငံရေးအခွင့်အလမ်းအတွက် မျှော်မှန်းအဆိုပြုခြင်းမဟုတ်ဘဲ အနာဂတ်နိုင်ငံရေးကဏ္ဍတွင် ရှမ်းတိုင်းရင်းသားများ၏ စုစည်းခိုင်မာသောအင်အားဖြင့် အမျိုးသားနိုင်ငံရေး အကျိုးစီးပွားကို ဖော်ဆောင်နိုင်ရန် ဦးတည်ရည်မှန်း အဆိုပြုတင်ပြခြင်းဖြစ်သော်လည်း ယင်းတင်ပြချက်များကို CSSU ၏ (၂၀၁၇-၂၀၁၈) အလှည့်ကျသဘာပတိမှ သက်ဆိုင်ရာပါတီများအား အစည်းအဝေးခေါ်ယူ ဆွေးနွေးဆုံးဖြတ်ပေးထားခြင်း မရှိသေးကြောင်း၊ ထို့အတွက် SNLD အနေဖြင့် SNDP ၏ အပြုသဘောဆောင်သည့် အဆိုပြုချက်များအပေါ် မည်ကဲ့သို့ သဘောထားရှိကြောင်း တရားဝင်အကြောင်းပြန်ပေးရန် တင်ပြသည်ဟု SNLD ကို ပေးပို့သောစာတွင် ထည့်သွင်းဖော်ပြထားသည်။

SNDP ပါတီတွဲဖက်အတွင်းရေးမှူး (၁) ဦးစိုင်းအောင်မြင့်ခိုင်က “ကျွန်တော်တို့ ပြည်သူတွေနဲ့ ရဟန်းပြည်သူတွေရဲ့ တောင်းဆိုချက်အရ ရှမ်းပါတီနှစ်ပါတီ ပေါင်းစည်းဖို့ ဆန္ဒရှိကြတဲ့အတွက်ကြောင့် ကျွန်တော်တို့ ပါတီတွေအနေနဲ့ ပေါင်းလို့ရရင်လည်းပေါင်းမယ်။ ပေါင်းလို့မရရင်လည်း ဘယ်လိုရှေ့ဆက်ပြီးတော့ စခန်းသွားကြမလဲဆိုတာ ဆွေးနွေးရဦးမှာပါ။ ကျွန်တော်တို့ကတော့ ရဟန်းရှင်လူရဲ့ သဘောထားအတိုင်း ဆောင်ရွက်တာပါ” ဟုပြောကြားသည်။

SNDP ပါတီမှ ပေးပို့သောစာသည် ရှမ်းနှစ်ပါတီ ပေါင်းစည်းရေးအတွက် တိုက်ရိုက်ဦးတည် ပြောကြားခြင်းမဟုတ်သောကြောင့် အဆိုပါကိစ္စအပေါ် တစ်စုံတစ်ရာ တုံ့ပြန်သွားရန် အဆင်သင့်မဖြစ်သေးကြောင်း SNLD ပါတီ၏ တွဲဖက်အတွင်းရေးမှူး (၁) ဦးစိုင်းလိတ်က ပြောကြားသည်။

ဦးစိုင်းလိတ်က “ကျွန်တော်တို့ဆီပို့ထားတဲ့စာကို ဖတ်ကြည့်တော့ ကျွန်တော်တို့ဆီကို တိုက်ရိုက်ပေးပို့တယ်ဆိုတာထက် CSSU ဥက္ကဋ္ဌ ဒါမှမဟုတ် သဘာပတိပေါ့။ အဲဒီသဘာပတိကြီးဆီကို ရေးပြီးတော့မှ သဘာပတိက အကြောင်းမပြန်တဲ့ကိစ္စကို ကျွန်တော်တို့ဆီကို လှမ်းတိုင်တဲ့ပုံစံမျိုးဖြစ်နေပါတယ်။ ကျွန်တော်တို့ပါတီကို တိုက်ရိုက်ဒီလိုမျိုးပေါင်းဖို့ပြုဖို့ ပြောတာမဟုတ်တဲ့အတွက်ကြောင့် ကျွန်တော်တို့ဘက်က တစ်စုံတစ်ရာ ပြန်ပြီးတော့ တုံ့ပြန်ဖို့ကတော့ အဆင့်သင့်မဖြစ်သေးပါဘူး။ ကျွန်တော်တို့ဆီကို တိုက်ရိုက်ပေးပို့တာဆိုရင်တော့ တစ်မျိုးပေါ့။ စာအသွားအလာအရ ဒီအပေါ်မှာ စဉ်းစားရကျပ်နေပါတယ်။ အရင်ကတည်းက ပြောတာကလည်း ကျွန်တော်တို့ဆီကို တိုက်ရိုက်ပြောတာ တစ်ခုမှမရှိဘူး။ အွန်လိုင်းပေါ်တင်လိုက်နဲ့ ပြောတာပဲရှိတယ်။ ကျွန်တော်တို့ဆီကို တိုက်ရိုက်ညှိနှိုင်းတာမျိုးလည်း မရှိသေးပါဘူး။ ပေါင်းစည်းရေးနဲ့ ပတ်သက်လို့ကတော့ ကျွန်တော်တို့က လူထုရဲ့ဆန္ဒကို အဓိကထားပါတယ်။ တစ်ချိန်တည်းမှာပဲ ဒီမိုကရေစီအခွင့်အရေးတွေကို အလေးအနက်ထားပါတယ်။ ဒီမိုကရေစီ စံချိန်စံညွှန်းနဲ့ကိုက်ညီတဲ့ ပူးပေါင်းဆောင်ရွက်မှု လုပ်ငန်းမျိုးကိုတော့ အားလုံးကြိုဆိုပါတယ်။ ဒါပေမဲ့ သံဃာထုရဲ့တောင်းဆိုမှု၊ လူထုရဲ့တောင်းဆိုမှုဆိုတဲ့အပေါ်မှာ ဘယ်အရပ်၊ ဘယ်ဒေသက သံဃာတော်တွေက တောင်းဆိုတာလဲဆိုတာတော့ အများကြီးသုတေသနလုပ်ဖို့ လိုအပ်ပါသေးတယ်” ဟုပြောကြားသည်။

SNLD ပါတီသည် ၁၉၈၈ တွင် စတင်တည်ထောင်ခဲ့သည့်ပါတီဖြစ်ပြီး ၂၀၁၀ ရွေးကောက်ပွဲကာလက ပါတီခေါင်းဆောင်အချို့ ဖမ်းဆီးထိန်းသိမ်းခံထားရသောကြောင့် ပါတီအား ပြန်လည်မှတ်ပုံတင်ခြင်းမရှိဘဲ ရွေးကောက်ပွဲအား ၀င်ရောက်ယှဉ်ပြိုင်ခြင်းမရှိခဲ့သော်လည်း SNDP ပါတီသည် ၂၀၁၀ ရွေးကောက်ပွဲတွင် ပေါ်ပေါက်လာပြီးနောက် ၂၀၁၀ ရွေးကောက်ပွဲတွင် ရှမ်းပြည်နယ်ရှိ မဲဆန္ဒနယ်နေရာအများအပြားတွင် အနိုင်ရရှိခဲ့သည်။ ထို့နောက် SNLD ပါတီသည် ၂၀၁၂ ခုနှစ်တွင်ပြန်လည်၍ ပါတီမှတ်ပုံတင်ခဲ့ပြီး SNDP ပါတီမှ လွှတ်တော်ကိုယ်စားလှယ်အချို့နှင့် ပါတီဝင်အချို့သည် SNLD သို့ပါတီ ပြောင်းဝင်မှုများရှိခဲ့ကာ ၂၀၁၅ အထွေထွေရွေးကောက်ပွဲတွင် SNLD ပါတီသည် လွှတ်တော်ကိုယ်စားလှယ်နေရာ ၄၀ အနိုင်ရရှိခဲ့ပြီး SNDP ပါတီသည် လွှတ်တော်ကိုယ်စားလှယ်နေရာ တစ်နေရာသာ ရရှိထားသည်။