မြန်မာလက်ရွေးစင်တိုက်စစ်မှူး အောင်သူ ညာလက်ကောက်ဝတ်အရိုးအက် ဒဏ်ရာရရှိနေ

ထိုင်းလိဂ်-၁ ကလပ် Police Tero အသင်းတွင် သွားရောက်ကစားနေသည့် မြန်မာ့လက်ရွေးစင်တိုက်စစ်မှူး အောင်သူသည် ညာလက်ကောက်ဝတ် အရိုးအက်ဒဏ်ရာရရှိခဲ့ကြောင်း သိရသည်။ အောင်သူသည် ယင်းဒဏ်ရာ ကြောင့် Police Tero အသင်း၏ ရာသီပိတ်လက်ကျန်ပွဲများတွင် ပါဝင်နိုင်တော့မည်မဟုတ်သလို၊ အောက်တိုဘာ(၁၀)ရက်တွင် အင်ဒိုနီးရှားနိုင်ငံ၌ ယှဉ်ပြိုင်ကစားမည့် မြန်မာ့လက်ရွေးစင်အသင်းနှင့် အင်ဒိုနီးရှားလက်ရွေးစင်အသင်း၏ ခြေစမ်းပွဲကိုလည်း လွဲချော်မည်ဖြစ်သည်။

အောင်သူသည် စက်တင်ဘာ(၃၀)ရက်က ယှဉ်ပြိုင်ကစားခဲ့သည့် ရတ် ချာဘူရီအသင်းနှင့် ထိုင်းလိဂ်ပွဲတွင် ဒုတိယပိုင်း၌ လူစားဝင်ကစားပြီး ညာလက်ကောက်ဝတ်အရိုးအက်ဒဏ်ရာရရှိခဲ့ခြင်းဖြစ်သည်။

“အောင်သူရဲ့ ဒဏ် ရာအခြေအနေက စောင့်ကြည့်ရပါဦးမယ်။ သူတို့အသင်းရဲ့ဆရာဝန်က ရက်အနည်းငယ်စောင့်ကြည့်ပြီးမှ ဘယ်လောက်နားရမလဲဆိုတာ သိရမယ်လို့ ပြောပါတယ်။ သူ့အနေနဲ့ ညာလက်ကောက်ဝတ်က အရိုးအသေးတစ်ချောင်း အက်သွားတာပါ။ ကြီးမားတဲ့ဒဏ်ရာမဟုတ်ပေမယ့် Police Tero ဆရာဝန်ရဲ့မှတ်ချက်ကို စောင့်ကြည့်ရမှာပါ။ သေချာတာက Police Teroအသင်းရဲ့ လက်ကျန်ပွဲတွေမှာ ပါဝင်နိုင်တော့မှာမဟုတ်သလို၊ အောက်တိုဘာ(၁၀)ရက်မှာ ယှဉ်ပြိုင်ကစားမယ့် အင်ဒိုနီးရှားအသင်းနဲ့ခြေစမ်းပွဲကိုလည်း လွဲချော်မှာပါ။ နည်းပြ အန်တွမ်နီဟေးကလည်း သူ့ကို အနားပေးလိုတာကြောင့် အဲဒီပွဲကို ခေါ်ဆောင်သွားမှာမဟုတ်ပါဘူး” ဟု မြန်မာ့လက်ရွေးစင်အသင်းတာဝန်ရှိသူတစ်ဦးက ပြောကြားသည်။

အောင်သူသည် ယင်းဒဏ်ရာကြောင့် အောက်တိုဘာ(၃)ရက်က ယှဉ်ပြိုင်ကစားခဲ့သည့် Navy အသင်းနှင့် ထိုင်းလိဂ်ပွဲကို လွဲချော်ခဲ့ပြီး နောက်ဆုံးပွဲဖြစ်သည့် ပရာကျွတ်နှင့်ပွဲကိုပါ လွဲချော်မည်ဖြစ်သည်။

နိုင်ငံ့ဂုဏ်ဆောင် ပြေးခုန်ပစ် လက်ရွေးစင်ဟောင်း ဦးကိုကို (ဗိုလ်ကြီး-ငြိမ်း) ကွယ်လွန်

ဆီးဂိမ်းစ်ပြိုင်ပွဲ အပါအ၀င် နိုင်ငံတကာပြိုင်ပွဲများ၌ အောင်မြင်မှုများ ရရှိခဲ့သည့် နိုင်ငံ့ဂုဏ်ဆောင် ပြေးခုန်ပစ် လက်ရွေးစင်ဟောင်း ဦးကိုကို (ဗိုလ်ကြီး- ငြိမ်း) သည် ဒီဇင်ဘာ ၁၆ ရက်တွင် ကွယ်လွန်ခဲ့ကြောင်း သိရသည်။

တာဝေးနှင့် မာရသွန်ချန်ပီယံ ဦးကိုကိုသည် ကွယ်လွန်ချိန်တွင် အသက် ၇၂ နှစ်ရှိပြီဖြစ်ပြီး နိုင်ငံအတွက် ရွှေငါးခု၊ ငွေလေးခု၊ ကြေးနှစ်ခု ရယူပေးနိုင်ခဲ့သည်။ ဦးကိုကိုသည် ၁၉၇၃ ခုနှစ်မှ ၁၉၇၉ ခုနှစ်အထိ မြန်မာ့လက်ရွေးစင် ပြေးခုန်ပစ်ကစားသမားအဖြစ် နိုင်ငံတကာပြိုင်ပွဲများ ယှဉ်ပြိုင်ခဲ့ပြီး ၁၉၇၃ ဆီးဂိမ်းစ်ပြိုင်ပွဲ၏ မာရသွန်ပြိုင်ပွဲတွင် ရွှေတံဆိပ်၊ မီတာ ၁၀,၀၀၀ ပြိုင်ပွဲတွင် ငွေတံဆိပ်၊ ၁၉၇၅ ဆီး ဂိမ်းစ်ပြိုင်ပွဲ၏ မီတာ ၁၀,၀၀၀ ပြိုင်ပွဲနှင့် မာရသွန်ပြိုင်ပွဲတွင် ငွေတံဆိပ်တစ်ခုစီ၊ ၁၉၇၇ ဆီးဂိမ်းစ်ပြိုင်ပွဲ၏ မီတာ ၅၀၀၀ နှင့် ၁၀,၀၀၀ ပြိုင်ပွဲတွင် ရွှေတံဆိပ်တစ်ခုစီ၊ ၁၉၇၉ ဆီးဂိမ်းစ်ပြိုင်ပွဲ၏ မီတာ ၅၀၀၀ နှင့် ၁၀,၀၀၀ ပြိုင်ပွဲတွင် ရွှေတံဆိပ်တစ်ခုစီ ရယူနိုင်ခဲ့သည်။ ထို့ပြင် ၁၉၇၈ အာရှအားကစားပြိုင်ပွဲ၏ မီတာ ၁၀,၀၀၀ ပြိုင်ပွဲတွင် ကြေးတံဆိပ်တစ်ခု၊ ၁၉၇၆ စင်ကာပူအိုးပင်း ပြေးခုန်ပစ်ပြိုင်ပွဲ၏ မီတာ ၁၀,၀၀၀ ပြိုင်ပွဲတွင် ငွေတံဆိပ်၊ မီတာ ၅၀၀၀ ပြိုင်ပွဲတွင် ကြေးတံဆိပ်များ ရရှိခဲ့သည်။ ဦးကိုကိုသည် ၁၉၇၃ ဆီးဂိမ်းစ်ပြိုင်ပွဲ၏ မာရသွန်ပြိုင်ပွဲ၌ ရွှေတံဆိပ်ရရှိရာတွင် ဆီးဂိမ်းစ်စံချိန်သစ်ပါ တင်နိုင်ခဲ့သည်။ ကွယ်လွန်သူအား ယနေ့ နံနက် ၁၀ နာရီတွင် ရေဝေးသုသာန်၌ မီးသင်္ဂြိုဟ်မည်ဖြစ်သည်။

မြန်မာ့လက်ရွေးစင်အသင်း ခြေစမ်းပွဲတွင် ကမ္ဘောဒီးယားအသင်းကို အနိုင်ရ

ပထမဂိုးသွင်းယူခဲ့သည့် ဇော်မင်းထွန်း အောင်ပွဲခံနေစဉ် (Photo-MFF)

အာရှဖလားခြေစစ်ပွဲယှဉ်ပြိုင်မည့် မြန်မာအသင်းနှင့် ကမ္ဘောဒီးယားအသင်းသည် ယနေ့ညနေပိုင်းက ကမ္ဘောဒီးယားနိုင်ငံ ဖနွမ်းပင်မြို့ရှိ အိုလံပစ်ကွင်း၌ ခြေစမ်းပွဲယှဉ်ပြိုင်ကစားရာ မြန်မာအသင်းက (၂-၁) ဂိုးဖြင့် အနိုင်ရခဲ့ကြောင်း သိရသည်။

မြန်မာအသင်းသည် ပွဲထွက်လူစာရင်းကို အပြောင်းအလဲပြုလုပ်ထားပြီး သီဟစည်သူ၊ ဒေးဗစ်ဒန်း၊ သိန်းသန်းဝင်း၊ တင်ဝင်းအောင်တို့ကို ပွဲအစတွင်မသုံးဘဲ ကျော်ဇင်ထက် (ဂိုး)၊ သက်နိုင်၊ ဇော်မင်းထွန်း၊ ၀င်းမင်းထွဋ်၊ စည်သူအောင်၊ ရန်အောင်ကျော်၊ လှိုင်းဘိုဘို၊ ဇင်မင်းထွန်း၊ ရန်နိုင်ဦး၊ အောင်သူ၊ ကျော်ကိုကိုတို့ဖြင့် ပွဲထွက်ခဲ့သည်။ မြန်မာအသင်းသည် ပထမပိုင်းတွင် ခြေအသာမရခဲ့သော်လည်း ဂိုးသွင်းခွင့်များဖန်တီးနိုင်ခဲ့ပြီး ၁၄ မိနစ်တွင် ဇော်မင်းထွန်းက အောင်သူကန်တင်ပေးသည့် ဘောလုံးကို ပြစ်ဒဏ်ဘောကို ခေါင်းတိုက်သွင်းကာ ဦးဆောင်ဂိုးရခဲ့သည်။ မိနစ်(၅၀) တွင် ကမ္ဘောဒီးယားအသင်း ချေပဂိုးပြန်ရခဲ့ပြီး မိုယူဒိုက သွင်းယူခဲ့သည်။

ချေပဂိုးပြန်ပေးလိုက်ရသောကြောင့် မြန်မာအသင်းသည် ကစားသမားများအပြောင်းအလဲပြုလုပ်ကာ တိုက်စစ်အားမြင့်ခဲ့ပြီး ၇၁ မိနစ်တွင် တိုက်စစ်မှူး အောင်သူက ဂိုးသမားကိုလိမ်ပြီး ဒုတိယဂိုးသွင်းယူခဲ့သည်။ ယင်းနောက်ပိုင်းတွင် ကမ္ဘောဒီးယားအသင်းက ချေပဂိုးရရန်ကြိုးပမ်းခဲ့သော်လည်း အဆုံးသတ်အားနည်းခဲ့၍ ချေပဂိုးထပ်မရဘဲ အရေးနိမ့်ခဲ့ခြင်းဖြစ်သည်။ မြန်မာအသင်းသည် ၂၀၁၆ အာဆီယံဆူဇူကီးဖလားပြိုင်ပွဲ အုပ်စုအဆင့်တွင်လည်း ကမ္ဘောဒီးယားအသင်းကို (၃-၁) ဂိုးဖြင့် အနိုင်ရခဲ့ကြောင်း သိရသည်။

မြန်မာအသင်းသည် အိန္ဒိယအသင်းနှင့် ကစားမည့် အာရှဖလားခြေစစ်ပွဲအတွက်ကြိုတင်ပြင်ဆင်သည့်အနေဖြင့် ကမ္ဘောဒီးယားအသင်းနှင့် ခြေစမ်းပွဲကစားခြင်းဖြစ်သည်။

ဆီးဂိမ်းစ် သုံးကြိမ်ဆက် ကစားခွင့်ရမည့် စည်သူအောင်

ဆီးဂိမ်းစ် အမျိုးသားဘောလုံးပြိုင်ပွဲကို ယခင်က လက်ရွေးစင်အဆင့် ပြိုင်ပွဲအဖြစ် ကျင်းပခဲ့သော်လည်း ၂၀၀၁ မလေးရှား ဆီးဂိမ်းစ်ပြိုင်ပွဲမှစ၍ ယူ-၂၃ ပြိုင်ပွဲအဖြစ် ပြောင်းလဲကျင်းပခဲ့သည်။ သက်တမ်းအလိုက်ပြိုင်ပွဲ ဖြစ်လာသောကြောင့် ကစားသမားများ အနေဖြင့် အကြိမ်များစွာ ယှဉ်ပြိုင်ခွင့်ရရန် မလွယ်ကူတော့ဘဲ အများဆုံး နှစ်ကြိမ်သာ ယှဉ်ပြိုင်ခွင့်ရသည့် ကစားသမား များပြားလာခဲ့သည်။ ၂၀၁၇ မလေးရှားဆီးဂိမ်းစ်ပြိုင်ပွဲမှ စ၍ အမျိုးသား ဘောလုံးပြိုင်ပွဲကို ယူ-၂၂ ပြိုင်ပွဲအဖြစ် ပြောင်းလဲခဲ့ရာ ကစားသမားများ အကြိမ်များစွာ ယှဉ်ပြိုင်ခွင့်ရရှိရန် အခွင့်အရေး ပိုမိုနည်းပါးလာခဲ့သည်။ မလေးရှားဆီးဂိမ်းစ်ပြိုင်ပွဲ ယှဉ်ပြိုင်မည့် မြန်မာ ယူ-၂၂ အသင်းတွင် ဆီးဂိမ်းစ် သုံးကြိမ်ဆက် ယှဉ်ပြိုင်ခွင့်ရမည့် ကစားသမားတစ်ဦး ပါဝင်လာပြီး ၎င်းမှာ အသင်းခေါင်းဆောင် စည်သူအောင် ဖြစ်သည်။

စည်သူအောင်သည် ဆီးဂိမ်းစ်ပြိုင်ပွဲတွင် ၂၀၁၃ နှင့် ၂၀၁၅ နှစ်ကြိမ်ဆက် ယှဉ်ပြိုင်ခွင့် ရခဲ့သူဖြစ်ပြီး ယခုအကြိမ်တွင် ကစားခွင့်ရခဲ့ပါက သုံးကြိမ်ဆက် ယှဉ်ပြိုင်ခွင့်ရသူအဖြစ် မှတ်တမ်းဝင်မည် ဖြစ်သည်။ စည်သူအောင်သည် ၂၀၁၃ ဆီးဂိမ်းစ်ပြိုင်ပွဲတွင် ပုံမှန် ပွဲထွက်ခွင့်ရရန် ရုန်းကန်ခဲ့ရသော်လည်း ၂၀၁၅ ဆီးဂိမ်းစ်ပြိုင်ပွဲ ငွေတံဆိပ်ဆုရ မြန်မာအသင်းတွင် အဓိက ကစားသမားဖြစ်ခဲ့သည်။ ၎င်းသည် ဘယ်တောင်ပံ၌ ကစားရသော်လည်း ၂၀၁၅ ဆီးဂိမ်းစ်ပြိုင်ပွဲဝင် မြန်မာ ယူ-၂၃ အသင်း၌ သွင်းဂိုးအများဆုံး ကစားသမားဖြစ်ခဲ့ပြီး ပြိုင်ပွဲ၏ အကောင်းဆုံး ၁၁ ဦး စာရင်းတွင်လည်း ရွေးချယ်ခံခဲ့ရသည်။ ၂၀၁၅ ဆီးဂိမ်းစ်ပြိုင်ပွဲအပြီးတွင် မြန်မာ့လက်ရွေးစင်အသင်း ကစားသမားအဖြစ် ရွေးချယ်ခံခဲ့ရပြီး ၂၀၁၆ နှစ်ဆန်းပိုင်းတွင် ကုန်ပစ္စည်းမိတ်ဆက်ပွဲသို့ တက်ရောက်ခဲ့သောကြောင့် ဘောလုံးအဖွဲ့ချုပ် စည်းကမ်းထိန်းသိမ်းရေးကော်မတီ၏ အရေးယူမှုနှင့် ရင်ဆိုင်ခဲ့ရသည်။ သို့သော်လည်း အမှားကို ပြင်ဆင်ကာ ကြိုးစားအားထုတ်မှု ကောင်းခဲ့သောကြောင့် ယခုနှစ်တွင် လက်ရွေးစင်အသင်း နှင့် ယူ-၂၂ အသင်း၌ ပုံမှန်နေရာ ရလာခဲ့ပြီး ယူ-၂၂ အသင်း၏ အသင်းခေါင်းဆောင်အဖြစ်ပါ ခန့်အပ်ခံခဲ့ရသည်။ စည်သူအောင်သည် ၂၀၁၅ ဆီးဂိမ်းစ်ပြိုင်ပွဲတွင် ငါးဂိုး သွင်းယူနိုင်ခဲ့သည်။

မြန်မာလူငယ်အသင်းများနှင့် အင်တာမီလန်လူငယ်အသင်း ခြေစမ်းပွဲကစားမည့်ရက် သတ်မှတ် ဆီးဂိမ်းစ်ပြိုင်ပွဲကြောင့် မြန်မာ ယူ-၂၂ အသင်း သြဂုတ် ၁၂ ရက်တွင် ပထမခြေစမ်းပွဲ စတင်ကစားမည်

မြန်မာ ယူ-၂၂ အသင်း လေ့ကျင့်နေစဉ် (၀ဲပုံ) နှင့် နိုင်ငံတကာပြိုင်ပွဲများ ယှဉ်ပြိုင်ရန် လေ့ကျင့်နေသည့် မြန်မာ ယူ-၁၈ အသင်း (ယာပုံ) (ဓာတ်ပုံ-ညီညီစိုးညွန့်)

မြန်မာနိုင်ငံဘောလုံးအဖွဲ့ချုပ် (MFF) သည် မြန်မာလူငယ်အသင်းများနှင့် အင်တာမီလန်လူငယ်အသင်းတို့၏ ခြေစမ်းပွဲကစားမည့်ရက်များ သတ်မှတ်လိုက်ပြီဖြစ်ကြောင်း သိရသည်။ ယင်းခြေစမ်းပွဲများကို သြဂုတ် ၁၂၊ ၁၄ ရက်တွင် ရန်ကုန်မြို့ရှိ သုဝဏ္ဏကွင်း၌ ကျင်းပမည်ဖြစ်သည်။

မြန်မာ ယူ-၂၂ အသင်းသည် ဆီးဂိမ်းစ်ပြိုင်ပွဲ ယှဉ်ပြိုင်ရမည်ဖြစ်သောကြောင့် ပထမခြေစမ်းပွဲ ယှဉ်ပြိုင်ကစားမည်ဖြစ်ပြီး သြဂုတ် ၁၂ ရက်တွင် ယှဉ်ပြိုင်ကစားမည်ဖြစ်သည်။

MFF သည် ခြေစမ်းပွဲကစားရန် ဆီးဂိမ်းစ်ပြိုင်ပွဲယှဉ်ပြိုင်မည့် မြန်မာ ယူ-၂၂ အသင်း၊ အာဆီယံ ယူ-၁၈ ချန်ပီယံရှစ်ပြိုင်ပွဲနှင့် အာရှယူ-၁၉ ခြေစစ်ပွဲ ယှဉ်ပြိုင်ကစားရမည့် မြန်မာ ယူ-၁၈ အသင်းတို့ကို ရွေးချယ်ထားပြီး မြန်မာ ယူ- ၁၈ အသင်းနှင့် ခြေစမ်းပွဲကိုမူ သြဂုတ် ၁၄ ရက်တွင် ကျင်းပမည်ဖြစ်သည်။

ယင်းခြေစမ်းပွဲ နှစ်ပွဲစလုံးကို ညနေ ၆ နာရီတွင် ကျင်းပမည်ဖြစ်ပြီး ကွင်းဝင်ကြေးများကို MFF ကထပ်မံထုတ်ပြန် ကြေညာမည်ဖြစ်သည်။ အင်တာမီလန်လူငယ်အသင်းနှင့် ခြေစမ်းပွဲမှာ မြန်မာ ယူ-၂၂ အသင်းအတွက် ဆီးဂိမ်းစ်ပြိုင်ပွဲမတိုင်မီ နောက်ဆုံးကစားမည့် ခြေစမ်းပွဲဖြစ်ပြီး ယင်းခြေစမ်းပွဲ ယှဉ်ပြိုင်ကစားပြီးပါက ဆီးဂိမ်းစ်ပြိုင်ပွဲယှဉ်ပြိုင်ရန် မလေးရှားနိုင်ငံသို့ ထွက်ခွာမည်ဖြစ်သည်။

အီတလီစီးရီးအေကလပ် အင်တာမီလန်အသင်းသည် MFF နှင့် မိတ်ဖက်ဆောင်ရွက်ခွင့်ရရန် ပြီးခဲ့သည့်နှစ်ကတည်းက ကြိုးပမ်းခဲ့သော်လည်း အပြီးသတ် သဘောတူညီမှုမရသေးဘဲ ခြေစမ်းပွဲကစားရန် ပထမအဆင့် သဘောတူညီမှုရရှိခဲ့ခြင်းဖြစ်သည်။

MFF သည် ယင်းခြေစမ်းပွဲကို မူလက မန္တလေးမြို့၌ ကျင်းပရန်စီစဉ်ခဲ့သော်လည်း အင်တာမီလန်အသင်းနှင့် သဘောတူညီမှုမရခဲ့သောကြောင့် ရန်ကုန်မြို့၌သာ ကျင်းပခြင်းဖြစ်ကြောင်း သိရသည်။

ခြေစမ်းပွဲကစားမည့် မြန်မာ ယူ-၁၈ အသင်းကို နည်းပြချုပ်အဖြစ် ပြင်သစ်နိုင်ငံသား ဘန်လာဘီက ကိုင်တွယ်လျက်ရှိပြီး ပြိုင်ပွဲများအတွက် ပြင်ဆင်ရန် သြဂုတ်တွင် ခြေစမ်းပွဲများ ဆက်တိုက်ကစားမည်ဖြစ်သည်။

လက်ရှိလူစာရင်းဖြင့် ဆီးဂိမ်းစ်ရွှေဆုမရပါက အောင်မြင်ရန် ဝေးကွာလာနိုင်ဟု ဦးသန်းတိုးအောင် သုံးသပ်

မြန်မာ ယူ-၂၂ အသင်းအုပ်ချုပ်သူ ဦးသန်းတိုးအောင် (ယာမှဒုတိယ) (ဓာတ်ပုံ-ညီညီစိုးညွန့်)

မြန်မာ ယူ-၂၂ အသင်းအုပ်ချုပ်သူ ဦးသန်းတိုးအောင်က လက်ရှိလူစာရင်းဖြင့် ဆီးဂိမ်းစ်ရွှေတံဆိပ်ဆု ရယူနိုင်ခြင်းမရှိပါက လာမည့်နှစ်များတွင် အောင်မြင်မှုရယူရန် ပိုမိုဝေးကွာလာနိုင်ကြောင်း သုံးသပ်ပြောကြားခဲ့သည်။

(၂၉) ကြိမ်မြောက် ဆီးဂိမ်းစ်ပြိုင်ပွဲ ယှဉ်ပြိုင်ရန် ဖွဲ့စည်းထားသည့် မြန်မာ ယူ-၂၂ အသင်းတွင် ၂၀၁၅ ခုနှစ် ယူ-၂၀ ကမ္ဘာ့ဖလား ပြိုင်ပွဲယှဉ်ပြိုင်ခဲ့သည့် ယူ-၂၀ အသင်းမှ ကစားသမားအများစုပါဝင်လာပြီး လက်ရှိမြန်မာ့လက်ရွေးစင်ကစားသမား ကိုးဦးအထိ ရွေးချယ်ခံထားရသည်။

ဦးသန်းတိုးအောင်က “လက်ရှိလူစာရင်းက ပြီးခဲ့တဲ့အကြိမ်ထက် အများကြီးကောင်းပါတယ်။ ၂၀၁၅ ဆီးဂိမ်းစ်ပြိုင်ပွဲတုန်းက ယူ-၂၀ ကမ္ဘာ့ဖလားပြိုင်ပွဲနဲ့ တိုက်ဆိုင်နေတာကြောင့် ကစားသမားတချို့ ပါဝင်ခွင့်မရခဲ့ပါဘူး။

လက်ရှိလူစာရင်းကတော့ အကောင်းဆုံးဖြစ်ပါတယ်။ ဒဏ်ရာကြောင့် ကစားသမားတချို့ မပါနိုင်သေးပေမယ့် တောင့်တင်းမှုရှိပါတယ်။ လက်ရှိလူစာရင်းနဲ့ ဆီးဂိမ်းစ်ပြိုင်ပွဲမှာ ရွှေတံဆိပ်မရခဲ့ရင် နောက်နှစ်တွေမှာ ရယူနိုင်ဖို့ ခက်သွားပါလိမ့်မယ်။

ဒါကြောင့်လည်း သေချာပြင်ဆင်နေတာပါ။ ကစားသမားတွေကို လိုချင်တဲ့ပုံစံရအောင်ပြုလုပ်ပြီး အကောင်းဆုံးအနေအထားရအောင် ကြိုးစားသွားမှာပါ” ဟုပြောကြားသည်။

မြန်မာအသင်းသည် ဆီးဂိမ်းစ်ပြိုင်ပွဲတွင် ၁၉၇၃ ခုနှစ်၌ ရွှေတံဆိပ်ရယူပြီးနောက်ပိုင်း နှစ်ပေါင်း ၄၀ ကျော်ကြာ ရွှေတံဆိပ်ရယူနိုင်ခြင်း မရှိတော့ကြောင်း သိရသည်။ မြန်မာအသင်းသည် ၁၉၇၃ ပြိုင်ပွဲနောက်ပိုင်း ကျင်းပသည့်ပြိုင်ပွဲများတွင် ၁၉၉၃၊ ၂၀၀၇ နှင့် ၂၀၁၅ ခုနှစ်၌ ဗိုလ်လုပွဲသုံးကြိမ် တက်ရောက်နိုင်ခဲ့သော်လည်း ထိုင်းအသင်းကို သုံးကြိမ်စလုံးရှုံးနိမ့်ကာ ငွေတံဆိပ်ဆုဖြင့် ကျေနပ်ခဲ့ရသည်။

မြန်မာအသင်းသည် ဆီးဂိမ်းစ်အမျိုးသား ဘောလုံးပြိုင်ပွဲတွင် ရွှေငါးခု၊ ငွေလေးခု၊ ကြေးလေးခုဖြင့် တတိယအအောင်မြင်ဆုံးအသင်းအဖြစ် ရပ်တည်လျက်ရှိပြီး ၁၉၆၅၊ ၁၉၆၇၊ ၁၉၆၉၊ ၁၉၇၁၊ ၁၉၇၃ ခုနှစ်တွင် ငါးကြိမ်ဆက် ရယူနိုင်ခဲ့ခြင်းဖြစ်သည်။ ထိုင်းအသင်းသည် ရွှေ ၁၅ ခုဖြင့် အအောင်မြင်ဆုံးအသင်းအဖြစ် ရပ်တည်လျက်ရှိသည်။