စတုတ္ထစက်မှုတော်လှန်ရေး၏ အစိုးရအပေါ် ရိုက်ခတ်မှုများ

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် မကြာသေးမီက ကျင်းပပြီးစီးခဲ့သော ကမ္ဘာ့စီးပွားရေးဖိုရမ်တွင် မြန်မာနိုင်ငံသည် တတိယစက်မှုတော်လှန်ရေးနှင့် ထိတွေ့ခဲ့ရခြင်း မရှိသော်လည်း စတုတ္ထစက်မှုတော်လှန်ရေး၌ မပါမဖြစ် ပါခဲ့ရပြီး ယခုအခါ အချိန်တိုအတွင်း ခုန်ကျော်တိုးတက်မှုများ ရှိခဲ့ကြောင်းနှင့် သာမန်ခုန်ကျော်မှု မဟုတ်ဘဲ ကြီးမားလှသည့် အဆင့်ခုန်ကျော်မှုဖြစ်ကြောင်း ပြောကြားခဲ့သည်။ စတုတ္ထစက်မှုတော်လှန်ရေးဟူသည်ကား အဘယ်နည်း။

၁၈ ရာစု အစောပိုင်း စက်မှုတော်လှန်ရေးပြီးနောက် စတုတ္ထမြောက် အဓိကကျသော စက်မှုခေတ်တစ်ရပ်အား ရည်ညွှန်းလျက် စတုတ္ထစက်မှုတော်လှန်ရေး (4IR) ဟု ခေါ်ဆိုခြင်းဖြစ်သည်။ ရူပဗေဒဆိုင်ရာ၊ ဒစ်ဂျစ်တယ်ဆိုင်ရာနှင့် ဇီဝဗေဒဆိုင်ရာ နယ်ပယ်များအကြား ကန့်သတ်မျဉ်းများ မှုန်ဝါးသွားသည့် နည်းပညာများ ပေါင်းစုံရောယှက်သွားမှုသည် 4IR ၏ လက္ခဏာရပ်ဖြစ်ပြီး ဆိုက်ဘာ-ရူပစနစ်များဟုလည်း ရည်ညွှန်းခေါ်ဆိုကြသည်။ ယင်းသည် စက်ရုပ်နည်းပညာ၊ အသိဥာဏ်တုနည်းပညာ၊ နာနိုနည်းပညာ၊ ကွမ်တမ်နည်းပညာ၊ ဇီဝနည်းပညာ၊ အင်တာနက်နည်းပညာ၊ ပဉ္စမမျိုးဆက် ၀ါယာလက်နည်းပညာ၊ 3D Printing နည်းပညာနှင့် အပြည့်အ၀ အလိုအလျောက် မောင်းနှင်နိုင်သော မော်တော်ကား အစရှိသည့် နယ်ပယ်ပေါင်းများစွာ၌ နည်းပညာအောင်မြင်မှုများ ထွက်ပေါ်လာခြင်း၏ စုစုပေါင်းရလဒ်ဖြစ်သည်။ 4IR ၏ အစိုးရအပေါ် သက်ရောက်မှုများကို ဆက်လက် စဉ်းစားကြည့်ရန် လိုသည်။

ရူပဗေဒဆိုင်ရာ၊ ဒီဂျစ်တယ်နှင့် ဇီဝဗေဒဆိုင်ရာ နယ်ပယ်များ ပေါင်းစုံသွားမှုနှင့်အတူ နည်းပညာအသစ်များနှင့် ပလက်ဖောင်းအသစ်များသည် နိုင်ငံသားများအား အစိုးရအဖွဲ့များနှင့် ထိတွေ့ရန်၊ ၎င်းတို့၏ ထင်မြင်ချက်များကို အသံပြုရန်၊ ၎င်းတို့၏ အားထုတ်မှုများကို ချိတ်ဆက် လုပ်ဆောင်ရန်နှင့် ပြည်သူ့ရေးရာ အာဏာပိုင်များ၏ ကြီးကြပ်မှုများကို ရှောင်တိမ်းရန်တို့အတွက် တိုး၍တိုး၍ ဖြစ်နိုင်လာစေသည်။ တစ်ချိန်တည်းမှာပင် အစိုးရအဖွဲ့များသည် စောင့်ကြည့်ရေးစနစ်များနှင့် ဒီဂျစ်တယ် အခြေခံအဆောက်အအုံများကို ထိန်းချုပ်နိုင်စွမ်းတို့ကို အခြေခံလျက် လူများအပေါ် ၎င်းတို့၏ ထိန်းချုပ်မှုများကို တိုးမြှင့်ရန် နည်းပညာအသစ်၏ စွမ်းအားများ ရရှိလာမည်ဖြစ်သည်။ သို့သော် လွှမ်းခြုံ၍ ကြည့်ပါက အစိုးရအဖွဲ့များအနေဖြင့် ၎င်းတို့၏ ပြည်သူများနှင့် ထိတွေ့ရေးနှင့် မူဝါဒချမှတ်ရေးတို့နှင့် ပတ်သက်၍ လက်ရှိချဉ်းကပ်ပုံကို ပြောင်းလဲရန် ဖိအားများနှင့် တိုး၍တိုး၍ ရင်ဆိုင်လာရမည်ဖြစ်သည်။ ယင်းမှာ ပြိုင်ဆိုင်မှုဆိုင်ရာ ရင်းမြစ်အသစ်များ ဖြစ်ပေါ်ခြင်း၊ နည်းပညာ အသစ်များကြောင့် ဖြစ်နိုင်လာသည့် အာဏာပြန်လည်ခွဲဝေခြင်းနှင့် ဗဟိုချုပ်ကိုင်မှုမှ ဖယ်ခွာခြင်းတို့ကြောင့် မူဝါဒများကို ဆောင်ရွက်ရာ၌ ၎င်းတို့၏ ဗဟိုအခန်းကဏ္ဍ လျော့ကျလာသောကြောင့် ဖြစ်သည်။

အစိုးရစနစ်များ၏ လုပ်ဆောင်နိုင်စွမ်းနှင့် ပြည်သူ့ရေးရာဝန်ထမ်းများ၏ လိုက်လျောညီထွေပြုနိုင်စွမ်းက ၎င်းတို့ ဆက်လက်ရှင်သန် ရပ်တည်ရေးကို အဆုံးအဖြတ်ပေးလိမ့်မည် ဖြစ်သည်။ ၎င်းတို့အနေဖြင့် မရပ်မနား ပြောင်းလဲနေသည့် ကမ္ဘာလောကကြီးအား ရင်ဆိုင်နိုင်စွမ်း၊ ပွင့်လင်းမြင်သာမှုနှင့် ထိရောက်မှု မြင့်မားအောင် ၎င်းတို့၏ ဖွဲ့စည်းပုံများကို ပြင်ဆင်နိုင်စွမ်းတို့ရှိကြောင်း သက်သေပြနိုင်မှသာလျှင် ၎င်းတို့အနေဖြင့် ကြံ့ကြံ့ခံနိုင်မည် ဖြစ်သည်။ ၎င်းတို့အနေဖြင့် ယင်းကဲ့သို့သော ဆင့်ကဲဖြစ်စဉ်တစ်ရပ်အတွင်း လိုက်လျောညီထွေ ပြောင်းလဲနိုင်စွမ်းမရှိပါက ပြဿနာများနှင့် တိုး၍တိုး၍ ရင်ဆိုင်လာရမည်ဖြစ်သည်။ 4IR ၏ မြန်ဆန်သော ပြောင်းလဲမှု ခြေလှမ်းများနှင့် ကျယ်ပြန့်သော ရိုက်ခတ်ချက်များကြောင့် ဥပဒေပြုသူများနှင့် ဥပဒေကျင့်သုံးသူများသည် မမျှော်လင့်သော စိန်ခေါ်မှုများကို ရင်ဆိုင်လာရမည် ဖြစ်သည်။

မည်သို့ပင်ဆိုစေကာမူ အရှိန်အဟုန်ဖြင့် ပြောင်းလဲနေသော စတုတ္ထစက်မှုတော်လှန်ရေးအတွင်း အစိုးရတစ်ရပ်အနေဖြင့် လိုက်လျောညီထွေပြုနိုင်ခြင်း မရှိပါက ပြဿနာများနှင့် တိုး၍တိုး၍ ရင်ဆိုင်လာရဖွယ်ရှိပါကြောင်း The Daily Eleven သတင်းစာက ရေးသားအပ်ပါသည်။

စက်တင်ဘာ ၂၁ ရက်နေ့ထုတ် The Daily Eleven သတင်းစာ အယ်ဒီတာ့အာဘော်

စိုးရိမ်စရာကောင်းသည့် ကျပ်ငွေတန်ဖိုးကျဆင်းမှု

မြန်မာကျပ်ငွေတန်ဖိုး ဆက်တိုက်ကျဆင်းနေမှုကြောင့် မြန်မာ့စီးပွားရေး အ၀န်းအ၀ိုင်းတွင် စိုးရိမ်ထိတ်လန့်ဖွယ် အခြေအနေနှင့် ရင်ဆိုင်နေရသည်ကို တွေ့ရသည်။ ထို့အပြင် ကမ္ဘာ့ရွှေဈေး မြင့်တက်မှုနှင့်အတူ ဒေါ်လာလဲနှုန်းကြောင့် ပြည်တွင်းရွှေဈေးနှုန်းသည်လည်း သမိုင်းတွင် မရှိဖူးသည့် စံချိန်တင်ဈေးနှုန်းများဖြင့် ဆက်လက် မြင့်တက်လျက် ရှိနေပြန်သည်။ ယမန်နေ့က ကမ္ဘာ့ရွှေဈေး ၁၂၀၄ ဒေါ်လာဝန်းကျင်သို့ ရောက်ရှိချိန်တွင် ပြည်တွင်းရွှေ ဈေးနှုန်းသည် ကျပ် ၁၀၂၀၈၀၀ အထိ စံချိန်တင် မြင့်တက်ခဲ့သည်။ ၂၀၁၇ ခုနှစ် ဇူလိုင်လတွင် ကျပ် ၉၀၀၀၀၀ အထက်ရှိခဲ့ရာမှ လက်ရှိအချိန်တွင် ၁၀၂၀၀၀၀ ကျော်သို့ ပြည်တွင်းရွှေဈေး လျင်လျင်မြန်မြန် ခုန်တက်လာခဲ့ခြင်းဖြစ်သည်။ ဒေါ်လာဈေးဂယက်ကြောင့် နိုင်ငံအသီးသီးတွင် သက်ရောက်မှုရှိခဲ့သည် ဆိုသော်လည်း မြန်မာကျပ်ငွေ ကျဆင်းမှုနှုန်းမှာ တုန်လှုပ်ဖွယ် အနေအထားသို့ ရောက်ခဲ့သည်ကို တွေ့ရသည်။ ပြီးခဲ့သည့် ဇွန်လမှစတင်ကာ မြန်မာကျပ်ငွေတန်ဖိုးကျဆင်းမှု သိသိသာသာ ဖြစ်လာခဲ့ပြီး သုံးလကျော်အတွင်း ၂၅၀ မှ ၃၀၀ ကျပ်အကြား ရာခိုင်နှုန်းအားဖြင့် ၂၀ ရာခိုင်နှုန်းခန့် တန်ဖိုးကျဆင်းသွားခဲ့ခြင်းလည်း ဖြစ်သည်။

မြန်မာကျပ်ငွေတန်ဖိုး ကျဆင်းနေမှုကို ထိန်းသိမ်းနိုင်ရန် ဗဟိုဘဏ်မှ ဒေါ်လာလွတ်လပ်စွာ ၀ယ်ယူခွင့်ပြုခြင်း၊ ၂၀၁၂ ခုနှစ်က စတင်ခဲ့သည့် ဗဟိုဘဏ်၏ ရည်ညွှန်းငွေလဲနှုန်းအပေါ် ပုဂ္ဂလိကဘဏ်များက အတိုးအလျှော့ ၈ ကျပ် (+/- 0.8) သတ်မှတ်ထားခြင်းတို့ကို သြဂုတ် ၁၃ ရက်တွင် ပယ်ဖျက်ခဲ့သည်။ ငွေကြေးဈေးကွက်တွင် ကျပ်ငွေတန်ဖိုး အတက်အကျ မြန်ဆန်နေမှုနဲ့ စီးပွားရေးအပေါ် ရိုက်ခတ်လာမှုတို့ကြောင့် ထိန်းသိမ်းပေးနိုင်ရန် အစိုးရတာဝန်ရှိသူများအား ဝေဖန်တောင်းဆိုမှုများ ပြုလုပ်ချိန်တွင် ငွေလဲဈေးကွက်ကို Float လုပ်ပေးခဲ့ခြင်း၏ သက်ရောက်မှုမှာ လက်ရှိကျပ်ငွေတန်ဖိုး ကျဆင်းမှု အခြေအနေအရ မေးခွန်းထုတ်စရာ ဖြစ်နေပေသည်။ နိုင်ငံတော်၏အတိုင်ပင်ခံပုဂ္ဂိုလ် အနေဖြင့်လည်း စီးပွားရေး လုပ်ငန်းရှင်ကြီးများနှင့် တွေ့ဆုံခဲ့သော်လည်း လက်ရှိဖြစ်ပေါ်နေသော အကျပ်အတည်းအပေါ် တစ်စုံတစ်ရာ အဖြေရှာနိုင်ခြင်း မရှိသေးကြောင်း သုံးသပ်ဝေဖန်သံများလည်း ထွက်ပေါ်လျက်ရှိသည်။ နိုင်ငံအနေဖြင့် အဘက်ဘက်မှ ဖိအားများရှိနေသည့်အပြင် မြန်မာ့စီးပွားရေး ဘေးကျပ်နံကျပ်အနေအထားမှ ရုန်းထွက်နိုင်မည့်လမ်းစ ထွက်ပေါ်ခြင်း မရှိသေးသည့်အပေါ် အားမလို အားမရ ဖြစ်နေကြပြန်သည်။

ကျပ်ငွေတန်ဖိုး ကျဆင်းနေမှုနှင့် စီးပွားရေး အခြေအနေအပေါ် အစိုးရ၏ရှုမြင်ဆောင်ရွက်မှုနှင့် ပတ်သက်ပြီး ယမန်နေ့က ပြုလုပ်သည့် ပြည်ထောင်စုလွှတ်တော်တွင် ၀န်ကြီး ဦးကျော်တင့်ဆွေက ရှင်းလင်းပြောကြားခဲ့ပြန်သည်။ ၎င်း၏ပြောကြားမှုတွင် နိုင်ငံအနေဖြင့် သွင်းကုန်က ပို့ကုန်ထက် ပိုမိုမြင့်မားနေသည့်အတွက် ကုန်သွယ်မှုလိုငွေရှိနေပြီး ကုန်သွယ်မှုမညီမျှသည့် အခြေအနေတွင် ရှိနေကြောင်း တစ်ကမ္ဘာလုံးရှိ ငွေကြေးတန်ဖိုးများ ကျဆင်းလာပြီး ကျပ်ငွေတန်ဖိုး ကျဆင်းခြင်းဟာလည်း တခြားနိုင်ငံများထက် ပိုမိုသက်ရောက်မှုရှိသည်ကို တွေ့မြင်နိုင်ကြောင်း ထည့်သွင်းပြောကြားခဲ့သည်။ မြန်မာကျပ်ငွေတန်ဖိုး ကျဆင်းစေသည့်အချက်များအနက် ငွေလဲနှုန်းကိုလွှမ်းမိုးထားသည့် အဓိကအချက်တွင် ကုန်သွယ်မှုလိုငွေ၊ အတိုးနှုန်း၊ ငွေဖောင်းပွမှုနှုန်းနှင့် တိုင်းပြည်၏ စီးပွားရေးဖွံ့ဖြိုးမှု အလားအလာတို့ ပါဝင်ကြောင်း ၎င်းက ပြောကြားခဲ့သည်။

စီးပွားရေး အကျပ်အတည်းနှင့် ကျပ်ငွေတန်ဖိုး ဆက်တိုက်ကျဆင်းနေမှု၏ ဂယက်ကြောင့် အခြေခံပြည်သူများ ဆင်းရဲတွင်းပိုနက်စေမည့် အခြေအနေနှင့် ရင်ဆိုင်နေရသည့်အပေါ် သတိပြုကာ အလျင်အမြန် အဖြေရှာပေးနိုင်ရန် လိုအပ်နေပေသည်။ စီးပွားရေးဈေးကွက်အရလည်း မြန်မာ့စီးပွားရေးအခြေအနေသည် သေးငယ်သည့် ပမာဏဖြစ်ခြင်း၊ ပြည်ပရင်းနှီးမြှုပ်နှံမှုများအတွက် အကန့်အသတ် အတားအဆီးများ ရှိနေခြင်း၊ အခြေခံအဆောက်အအုံကဏ္ဍ တိုးတက်မှု အားနည်းခြင်းစသည့် အခြေအနေများကြောင့် မြန်မာ့စီးပွားရေးသည် ပြိုလဲသွားမည်ကို အများက စိုးရိမ်နေကြပေသည်။ သို့ဖြစ်ရာ အဘက်ဘက်မှ အခက်အခဲများ၊ စိန်ခေါ်မှုများနှင့်အတူ ကြီးမားသော အန္တရာယ်နှင့် ကြုံတွေ့နေရချိန်တွင် အစိုးရအနေဖြင့် မှန်ကန်သော ကိုင်တွယ်ဖြေရှင်းပုံနှင့်အတူ ရလဒ်ကောင်းဖော်ဆောင်ပေးရန် လိုအပ်မည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

စက်တင်ဘာ ၂၀ ရက်နေ့ထုတ် The Daily Eleven သတင်းစာ အယ်ဒီတာ့အာဘော်

ဆင်းရဲမွဲတေမှုနှင့် အဂတိလိုက်စားမှု

ဆင်းရဲမွဲတေမှုနှင့် အဂတိလိုက်စားမှုတို့သည် လူပေါင်းများစွာတို့၏ ဘ၀များကို ခြိမ်းခြောက်လျက် အနီးကပ် ဆက်နွှယ်လျက်ရှိသည်။ ကျန်းမာရေးနှင့် ရေရရှိရေးကဲ့သို့သော မရှိမဖြစ် ၀န်ဆောင်မှုများကိုရရှိရန် လာဘ်ထိုးကြရသော နိုင်ငံများတွင် သေဆုံးမှုနှုန်းမှာ ကြောက်မက်ဖွယ်ဖြစ်နိုင်သည်။ လူပေါင်း ရာခိုင်နှုန်း ၆၀ ကျော်ခန့် လာဘ်ပေးရသည်ဟု ဖော်ပြသောနိုင်ငံများသည် လာဘ်ပေးရမှု ရာခိုင်နှုန်း ၃၀ အောက်သာရှိသော  နိုင်ငံများနှင့် နှိုင်းယှဉ်ပါက အမျိုးသမီးများ ကလေးမွေးဖွားစဉ် သေဆုံးရမှု ရှစ်ဆပို၍များပြားသည်။ အဂတိလိုက်စားမှုများပြားသော နိုင်ငံများတွင် ကလေးမွေးဖွားမှု ၁၀၀,၀၀၀ လျှင် အမျိုးသမီးများသေဆုံးရမှု ၄၈၂ ဦး ရှိပြီး အဂတိလိုက်စားမှုနည်းပါးသော နိုင်ငံများ ၌ ၅၇ ဦးသာ ရှိသည်။

အဂတိလိုက်စားမှု သက်ရောက်မှုများသည် လူပုဂ္ဂိုလ်တစ်ဦးချင်းပေါ်သို့ ကျရောက်ပြီး အကြီးအကျယ်ပျက်စီးစေသော သဘောရှိသည်။ အဂတိလိုက်စားမှုများသည် ကလေးများကို မိခင်မဲ့သွားစေပြီး မိသားစုများကို ကျန်းမာရေးစောင့်ရှောက်မှု ကင်းမဲ့သွားစေသည်။ လူအများကို စားနပ်ရိက္ခာမဲ့စေလျက် သက်ကြီးရွယ်အိုတို့အတွက် လုံခြုံမှုကင်းမဲ့သွားစေပြီး လုပ်ငန်းများကို အရင်းအနှီးမဲ့သွားစေသည်။ သုတေသနပြုလုပ်မှုများအရ အဂတိလိုက်စားမှုတိုက်ဖျက်ရေးကို ထိရောက်အောင်ဆောင်ရွက်နိုင်ပါက မိခင်များ သေဆုံးရမှုနှုန်း ကျဆင်းခြင်း၊ လူငယ်များအကြား စာတတ်မြောက်မှုနှုန်း မြင့်မားခြင်းနှင့်  ပတ်ဝန်းကျင်သန့်ရှင်းရေး ကောင်းမွန်ခြင်းတို့ ဖြစ်ပေါ်နိုင်သည်ကို တွေ့ရှိရသည်။

အဂတိလိုက်စားမှုကို တိုက်ဖျက်နိုင်ရန် အစိုးရ၏ လုပ်ငန်းမူဘောင်အတွင်း ပစ်မှတ်ထားရမည့် အရာများထဲတွင် ဆုံးဖြတ်ချက်ချရေးလုပ်ငန်းစဉ်၌ ပြည်သူများကို ပိုမိုပါဝင်စေခြင်း၊ အများပြည်သူများအတွက် ငွေကြေးသုံးစွဲမှုများနှင့် နိုင်ငံတော်ဘတ်ဂျက်များ ပို၍ပွင့်လင်းမြင်သာစေခြင်းနှင့် ဥပဒေထိန်းသိမ်းရေး အဖွဲ့အစည်းများနှင့် အများပြည်သူ ၀န်ဆောင်မှုဌာနများအနေဖြင့် သာမန်ပြည်သူများကို ပြန်ကြားပေးခြင်းတို့ပါဝင်သင့်သည်။ ယင်းလုပ်ငန်းစဉ်၏ တစ်စိတ်တစ်ဒေသအဖြစ် အစိုးရအနေဖြင့် ငွေကြေးသုံးစွဲမှုနှင့်ပတ်သက်သော အဓိကအချက်အလက်များကို အများပြည်သူ သိရှိအောင် ထုတ်ပြန်ရန်လိုအပ်သည်။ ယင်းကဲ့သို့ အချက်အလက်များ ထုတ်ပြန်ခြင်းသည် အဂတိလိုက်စားမှု တိုက်ဖျက်ရေးအတွက် ကောင်းမွန်သော ပထမခြေလှမ်းတစ်ရပ် ဖြစ်သည်။ ယနေ့ခေတ်တွင် ဖွံ့ဖြိုးမှုနည်းပါးသော နိုင်ငံပေါင်း ၄၉ နိုင်ငံအနက် ငါးပုံတစ်ပုံ၌သာ ပြည်သူများအနေဖြင့် ယင်းကဲ့သို့သော အချက်အလက်များကို သိရှိခွင့်ရကြသည်။

ကမ္ဘာပေါ်တွင် လူပေါင်း ၂ ဒသမ ဘီလျံသည် ဆင်းရဲမွဲတေလျက်ရှိကြသည်။ သို့သော် ယင်းအတိုင်း ဆက်လက်တည်မြဲနေမည် မဟုတ်ပေ။ ၂၀၃၀ ပြည့်နှစ်သို့အရောက်တွင် ကမ္ဘာ့လူဦးရေသည် ၈ ဒသမ ၅ ဘီလျံသို့ ရောက်ရှိလာမည် ဖြစ်သည်။ ဆင်းရဲမွဲတေသူ မရှိသည့် နိုင်ငံမရှိခြင်း သို့မဟုတ် အဂတိလိုက်စားမှုကင်းမဲ့သည့် နိုင်ငံမရှိခြင်းသည် ကမ္ဘာ့အကြောင်းအရာ တစ်ရပ်ဖြစ်သည်။ နိုင်ငံတကာ ပွင့်လင်းမြင်သာမှုအဖွဲ့က နောက်ဆုံးထုတ်ပြန်သည့် အဂတိလိုက်စားမှုဆိုင်ရာ အညွှန်းကိန်းအရ နိုင်ငံပေါင်း ၁၇၇ နိုင်ငံအနက် သုံးပုံနှစ်ပုံသည်  အမှတ် ၅၀ အောက်လျော့နည်းပြီး နိုင်ငံပေါင်း ၁၀၀ ခန့်ကို သန့်ရှင်းသည်ဟု သတ်မှတ်နိုင်သည်။ ကမ္ဘာ့ဖွံ့ဖြိုးမှုအနည်းဆုံးနိုင်ငံများ၏ ပျမ်းမျှအမှတ်သည် ၂၈ ဖြစ်သည်။ ကမ္ဘာကြီးအနေဖြင့် လူများကို ဆင်းရဲစေသည့် အဂတိလိုက်စားမှုကို မျက်နှာလွှဲ၍ နေနိုင်မည်မဟုတ်ပါ။

မည်သို့ပင်ဆိုစေကာမူ အဂတိလိုက်စားမှုများကို ရပ်တန့်နိုင်ခြင်းမရှိပါက ဆင်းရဲမွဲတေမှုကို လျှော့ချရန် ဖြစ်နိုင်မည်မဟုတ်ပါကြောင်း The Daily Eleven  သတင်းစာက ရေးသားအပ်ပါသည်။

(စက်တာဘာ ၁၉ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)

အများညီ၍ ဤကို ကျွဲဟု ဖတ်ခြင်း

argumentum ad populum ဟူသည့် ငြင်းခုံဆွေးနွေးမှုဆိုင်ရာ သဘောတရား တစ်ရပ်ရှိသည်။ လူအများ သို့မဟုတ် လူအများစုက ယုံကြည်ကြသောကြောင့် ယင်းသည် မှန်ကန်သည်ဟူသည့် ကြိုတင်ပြဋ္ဌာန်းချက် တစ်ရပ်နှင့်အတူ မှားယွင်းသော သို့မဟုတ် ယုတ္တိဗေဒအရ မှားယွင်းမှုအပေါ် အခြေခံသော အဆိုပြုချက်တစ်ရပ်ကို ကောက်ချက်ချခြင်းဖြစ်သည်။ If many believe so, it is so (အများက ယင်းအတိုင်း ယုံကြည်လျှင် ယင်းအတိုင်းပင်ဖြစ်သည်) ဟု ဆိုကြသည်။ အမှန်တကယ်၌ အများညီ၍ ဤကို ကျွဲဟု ဖတ်ခြင်းသာဖြစ်သည်။ အကြီးအကျယ် လူကြိုက်များသော တွေးလုံးတစ်ရပ် ဖြစ်သည်ဟူသည့် အချက်တစ်ခုတည်းပေါ်၌သာ အခြေခံလျက် အကြီးအကျယ် လူကြိုက်များသော အတွေးတစ်ရပ်သည် မှန်ကန်သည်ဟု လူတစ်ဦးအား ယုံကြည်စေရန် ကြိုးပမ်းခြင်းသည် argumentum ad populum ပင် ဖြစ်သည်။ ဥပမာဆိုရလျှင် ယခင်က နေသည် ကမ္ဘာကို ပတ်သည်ဟူ၍လည်းကောင်း၊ ကမ္ဘာကြီးသည် အပြားကြီးဖြစ်သည်ဟူ၍လည်းကောင်း လက်ခံထားမှုဖြစ်သည်။

အဖြေမသိသည့် မေးခွန်းတစ်ခုအား မေးမြန်းခဲ့သူအားလုံး၏ ၇၅ ရာခိုင်နှုန်းက A ဟု ဖြေဆိုပါက အဖြေမှန်သည် A ဖြစ်သည်ဟု ဆင်ခြင်လိုက်ခြင်းမျိုး ဖြစ်သည်။ ယင်းသည် ယုတ္တိဗေဒနည်းအရ မှားယွင်းသော ဆင်ခြင်မှုဖြစ်သည်။ ယုံကြည်မှုတစ်ရပ်ကို လူအများ လက်ခံရုံသက်သက်ဖြင့် ယင်းယုံကြည်မှုသည် မှန်ကန်သည်ဟု အာမ,မခံနိုင်သောကြောင့် ဖြစ်သည်။ ယင်းကဲ့သို့သော အနေအထားတွင် လူတစ်ဦး၏ ယုံကြည်မှုသည် မှားယွင်းခဲ့ပါက ယင်းယုံကြည်မှုကို ဆုပ်ကိုင်ထားသည့် လူများအားလုံး မှားယွင်းသွားနိုင်သောကြောင့် ဖြစ်သည်။ ယင်းကဲ့သို့သော မှားယွင်းမှုမျိုးသည် ယုံကြည်မှုတစ်ရပ်ကို အကဲဖြတ်ခြင်းနှင့် လူအများက ကျယ်ပြန့်စွာ လက်ခံခြင်းအကြား ရှုပ်ထွေးမှုတစ်ရပ် ပါဝင်သည့် အခြားထင်မှတ်မှားခြင်းများနှင့်လည်း ဖွဲ့စည်းပုံအရ တူညီသည်။ အဆိုပြုချက်တစ်ရပ်သည် ကျွမ်းကျင်သူများဟု ယူဆထားသော အုပ်စုတစ်စုအား ယုံကြည်အောင် ပြုလုပ်နိုင်သည့်အခါ အာဏာပိုင်မှုသဘောကို ဆောင်လာသည်။ အဆိုပြုချက်တစ်ရပ်သည်အများက လေးစားကြသော သက်ကြီးဝါကြီးများ သို့မဟုတ် လူ့အသိုင်းအ၀ိုင်း၏ ခေါင်းဆောင်များ ပါဝင်သည့် အုပ်စုကို ဆွဲဆောင်နိုင်ခဲ့ပါက ယင်းသည် အစဉ်အလာသဘောကို ဆောင်လာသည်။

ယင်းမှားယွင်းသော အဆိုပြုချက်တစ်ရပ်ကို ယုံကြည်လိုက်သူတစ်ဦးသည် အခြားသူများက ယင်းအဆိုပြုချက်ကို လေ့လာသုံးသပ် အကဲဖြတ်ကာ တည်းဖြတ်ပြီးဖြစ်သည်ဟု ယုံကြည်သောကြောင့်လည်း ဖြစ်နိုင်သည်။ argumentum ad populum တစ်ခုသည် ခြုံငုံဆင်ခြင်သော ယုတ္တိဗေဒအရ ခိုင်လုံသော အဆိုပြုချက်တစ်ရပ်လည်း ဖြစ်နိုင်သည်။ ဥပမာအားဖြင့် အထိုက်အလျောက်ကြီးမားသော လူအုပ်စုတစ်ခုကို စစ်တမ်းကောက်ယူသည့်အခါ ရာခိုင်နှုန်း ၁၀၀ သည် ထွက်ကုန်အမှတ်တံဆိပ်တစ်ခုကို အခြားတစ်ခုထက် ပို၍ကြိုက်နှစ်သက်ကြောင်း တွေ့ရှိရခြင်းမျိုးဖြစ်သည်။ ယင်းနောက် နောက်ထပ်လူတစ်ဦးသည်လည်း ယင်းအမှတ်တံဆိပ်ကိုပင် ပိုမိုကြိုက်နှစ်သက်နိုင်ခြေ အလွန်များကြောင်း အားကောင်းသော ကောက်ချက်တစ်ရပ် ဆွဲနိုင်သည်။ ကောက်ယူထားသည့် စစ်တမ်းသည် ယင်းကောက်ချက်အတွက် ခိုင်မာသော အထောက်အထားဟု ဆိုနိုင်သည်။ သို့သော် ယင်းသည် ထုတ်ယူဆင်ခြင်နည်းကိုသုံးသော ယုတ္တိဗေဒအရ သက်သေတစ်ရပ်အဖြစ် သင့်လျော်ခြင်းမရှိပေ။ ဥပမာအားဖြင့် လူအများကြိုက်သော အမှတ်တံဆိပ်သည် ပါဝင်သော ပစ္စည်းများအရ အခြားပြိုင်ဘက် အမှတ်တံဆိပ်ထက် ပို၍သာလွန်သည်ဟု စစ်တမ်းက သက်သေမပြနိုင်ခြင်းမျိုး ဖြစ်သည်။

မည်သို့ပင်ဆိုစေကာမူ အဆိုပြုချက်တစ်ရပ်အား သူ၏ သဘောသဘာဝအတိုင်း စစ်ဆေးသုံးသပ် အကဲဖြတ်မှုမလုပ်ဘဲ လူအများ သို့မဟုတ် လူအများစုက ယုံကြည်ကြသောကြောင့် ယင်းသည် မှန်ကန်သည်ဟူသည့် ကြိုတင်ပြဋ္ဌာန်းချက်တစ်ရပ်ဖြင့် ဆုံးဖြတ်ခြင်းသည် အများညီ၍ ဤကို ကျွဲဟုဖတ်ခြင်းသာဖြစ်ပါကြောင်း The Daily Eleven သတင်းစာက ရေးသားအပ်ပါသည်။

စက်တင်ဘာ ၁၈ ရက်နေ့ထုတ် The Daily Eleven သတင်းစာ အယ်ဒီတာ့အာဘော်

တရားစီရင်ရေးစနစ်၌ အဂတိလိုက်စားခြင်း

တရားစီရင်ရေးကို ကျင့်သုံးမှုသည် လူပုဂ္ဂိုလ်အသီးသီးတို့၏ ဘ၀များအပေါ် သြဇာ သက်ရောက်မှုကြီးမားပြီး အဂတိလိုက်စားမှုများဖြင့် ညစ်ပေနေသော တရားစီရင်ရေးသည် ဥပဒေစနစ်တစ်ရပ်ကို လူ့အဖွဲ့အစည်းက တရားဝင်အဖြစ် လက်ခံမှုအား အကြီးအကျယ် ထိခိုက်စေလိမ့်မည်ဖြစ်သည်။

အတွေ့ရအများဆုံး တရားစီရင်ရေးဆိုင်ရာ အဂတိလိုက်စားမှုနှစ်မျိုးမှာ နိုင်ငံရေးအရ ၀င်ရောက်စွက်ဖက်ခြင်းနှင့် လာဘ်စားခြင်းတို့ဖြစ်သည်။ နိုင်ငံရေးအရ စွက်ဖက်မှုသည် အုပ်ချုပ်ရေးမဏ္ဍိုင် သို့မဟုတ် ဥပဒေပြုရေးမဏ္ဍိုင်မှ နိုင်ငံရေးသမားများ သို့မဟုတ် အစိုးရအာဏာပိုင်များက တရားစီရင်ရေးကိစ္စ၌ ၀င်ရောက်စွက်ဖက်ပြီး တရားသူကြီးများအား မသမာသည့် အစီအစဉ်များ လုပ်ဆောင်စေရန် ပူးပေါင်းကြံစည်ခြင်းဖြစ်သည်။ နိုင်ငံပေါင်းများစွာတို့တွင် တရားစီရင်ရေးကို နိုင်ငံရေးမှ သီးခြားခွဲထုတ်ထားသော်လည်း တရားသူကြီးများနှင့် အခြားတရားရုံးအရာရှိများသည် တရားဥပဒေနှင့်အညီ မဟုတ်ဘဲ သြဇာကြီးမားသော နိုင်ငံရေးသမားများနှင့် လုပ်ငန်းရှင်သူဌေးကြီးများ အကြိုက်ကိုလိုက်၍ ဆုံးဖြတ်ပေးရန် ဖိအားများကို ရင်ဆိုင်နေရဆဲဖြစ်သည်။ မသမာသော လုပ်ရပ်များကို အကာအကွယ်ပေးရန် သို့မဟုတ် တရားဝင်ဖြစ်စေရန်အတွက် အာဏာရှိသူများက  လိုသလို ဆွဲနိုင် ကျုံ့နိုင်သော မျှော့ကြိုးဥပဒေများကို အသုံးပြုလေ့ရှိသည်။ ခြိမ်းခြောက်ငွေညှစ်ခြင်း၊ ငွေကြေးခ၀ါချခြင်းနှင့် အလွဲသုံးစားလုပ်ခြင်းကဲ့သို့သော ရာဇ၀တ်မှုအမျိုးမျိုးတွင် နိုင်ငံရေးသမားများက တရားသူကြီးများနှင့် ပူးပေါင်းကြံစည်တတ်ကြသည်။

တရားစီရင်ရေးဆိုင်ရာ အဂတိလိုက်စားမှုနှင့်ပတ်သက်၍ ဒုတိယအတွေ့ရအများဆုံးမှာ လာဘ်စားခြင်းဖြစ်သည်။ တရားသူကြီး သို့မဟုတ် အခြားတရားရေးဝန်ထမ်းများသည် လာဘ်ထိုးသူဘက်သို့လိုက်လျက် ၎င်းတို့၏ သြဇာကိုအသုံးပြုကာ အမှုကိစ္စများကို ဆောင်ရွက်တတ်ကြသည်။ ဥပမာအားဖြင့် တရားသူကြီးတစ်ဦးသည် အမှုများအား ကြန့်ကြာစေနိုင်သကဲ့သို့ မြန်ဆန်အောင်လည်း ပြုလုပ်နိုင်သည်။ အယူခံများကို လက်ခံနိုင်သကဲ့သို့ ပယ်ချခြင်းလည်း ပြုလုပ်နိုင်သည်။ လာဘ်ငွေယူထားခြင်းအတွက် အလဲအလှယ်အဖြစ် လာဘ်ပေးသူကို အကျိုးရှိအောင် အမိန့်ချပေးနိုင်သည်။ အမှုသည်များအနေဖြင့် လာဘ်ထိုးရခြင်း အကြောင်းရင်းများထဲ၌ မိမိဘက်က အသာရရှိသော စီရင်ဆုံးဖြတ်ချက် ဖြစ်ရန်၊ စီရင်ချက်ချမှတ်မှု မြန်ဆန်စေရန်၊ အာမခံရရှိရန်၊ လုပ်ကြံသက်သေခံမှုများ ဖန် တီးရန်နှင့် ကျမ်းကျိန်လွှာနှင့် မှတ်ပုံတင်ခြင်းကဲ့သို့သော အခြားလုပ်ငန်းစဉ်များ၌ အဆင် ပြေစေရန်တို့ ပါဝင်သည်။

တရားစီရင်ရေးစနစ်တစ်ရပ်၏ သမာဓိကို အကဲဖြတ်သည့်အခါ စဉ်းစားရန် အဓိက အချက် နှစ်ချက်ရှိသည်။ ယင်းတို့မှာ လွတ်လပ်မှုရှိခြင်းနှင့် ပြည်သူကို တာဝန်ခံမှုရှိခြင်း ဖြစ်သည်။ တရားစီရင်ရေးဆိုင်ရာ အဂတိလိုက်စားမှုကို ကိုင်တွယ်ရာတွင် ရင်ဆိုင်ရသည့် အခက်အခဲတစ်ခုအဖြစ် တရားစီရင်မှုများသည် တရားစီရင်ရေးနှင့်ပတ်သက်၍ လိုအပ်သော လွတ်လပ်မှုနှင့် နိုင်ငံရေးမဆန်သော ကြီးကြပ်မှုအတိုင်းအတာနှင့် တာဝန်ခံမှုတို့အကြား မျှခြေတစ်ရပ်ကို တည်ဆောက်ရသည်။ ယင်းအတွက် ရဲလုပ်ငန်းစဉ်ဆိုင်ရာ မှန်ကန်ထိရောက်မှုများနှင့် တရားစီရင်ရေးလုပ်ငန်းစဉ်ဆိုင်ရာ ပွင့်လင်းမြင်သာမှုများ အားဖြင့် တရားစီရင်ရေးစနစ်ကို အကောင်အထည်ဖော်ရသည်။

မည်သို့ပင်ဆိုစေကာမူ တရားစီရင်ရေးသည် လူ့အဖွဲ့အစည်းတစ်ရပ်အတွင်းရှိ လူတိုင်း၏ ဘ၀များအပေါ် ကြီးစွာသော သြဇာသက်ရောက်မှုရှိသည်သာမက ဥပဒေစနစ်တစ်ရပ်ကို လူ့အဖွဲ့အစည်းက တရားဝင်လက်ခံထားခြင်းသည် တရားစီရင်ရေး၏ တော်တည့်မှန်ကန်သော သမာဓိကြောင့်သာဖြစ်သောကြောင့် တရားစီရင်ရေး၌ အဂတိလိုက်စားခြင်းသည် လူ့အဖွဲ့အစည်းတစ်ရပ်၏ ကိုယ်ကျင့်တရားဆိုင်ရာ စံတန်ဖိုးများအားလုံးကို ပြိုလဲစေကာ အဆိုပါလူ့အဖွဲ့အစည်းတစ်ရပ်လုံးအား ကျဆုံးမှုဆီသို့ ဦးတည်သွားစေနိုင်ပါကြောင်း The Daily Eleven သတင်းစာက ရေးသားအပ်ပါသည်။

(စက်တင်ဘာ ၁၆ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)

တရားဥပဒေစိုးမိုးရေးနှင့် ဒီမိ်ုကရေစီ

ဥပဒေ၏ရှေ့မှောက်၌ တန်းတူညီမျှသည့် အခွင့်အရေးရပိုင်ခွင့် သို့မဟုတ် ဥပဒေ၏ တူညီသော ကာကွယ်စောင့်ရှောက်ပေးမှု ရပိုင်ခွင့်တို့သည် တရားမျှတသော၊ ဒီမိုကရေစီ နည်းလမ်းကျသော မည်သည့်လူ့အဖွဲ့အစည်းမဆိုအတွက် အခြေခံအုတ်မြစ် ဖြစ်သည်။ ဆင်းရဲသည်ဖြစ်စေ၊ ချမ်းသာသည်ဖြစ်စေ၊ မည်သည့်လူမျိုး / မည်သည့်ဘာသာဝင်ဖြစ်စေ၊ လက်ရှိအာဏာရအစိုးရကို ထောက်ခံသူ/ အတိုက်အခံလုပ်သူဖြစ်စေ အားလုံးသည် ဥပဒေ၏ရှေ့မှောက်၌ တူညီသောကာကွယ်စောင့်ရှောက်ပေးမှုကို ရရှိစေရမည်ဖြစ်သည်။ ဒီမိုကရေစီနိုင်ငံများအနေဖြင့် လူတိုင်း၏ဘ၀သည် အညီအမျှဖြစ်ရမည်ဟု အာမမခံနိုင် သကဲ့သို့ ယင်းကဲ့သို့ အာမခံပေးရန်လည်း တာဝန်မရှိပေ။ သို့သော် မည်သည့်အခြေအနေ ရပ်များအောက်၌မဆို နိုင်ငံတော်သည် မိမိ၏ပြည်သူများအားလုံးကို တစ်ပြေးတည်း အညီအမျှ ဆက်ဆံရန် လိုအပ်သည်။

မည်သူမျှ ဥပဒေ၏အထက်တွင် မရှိသကဲ့သို့ လူသားတို့က ဖန်တီးထားသော ဥပဒေများသည် လူသားများအပေါ် ဖိနှိပ်ရန် ချမှတ်ထားသည့် တစ်စုံတစ်ရာ မဖြစ်သင့်ပေ။ နိုင်ငံသားများအနေဖြင့် ဥပဒေကို လေးစားလိုက်နာကြခြင်းမှာ တစ်နည်းအားဖြင့် ၎င်းတို့သည် ဥပဒေကို ပြုခဲ့သူများအဖြစ် သွယ်ဝိုက်၍ လက်ခံထားသောကြောင့် ဖြစ်သည်။ ဒီမိုကရေစီနိုင်ငံများတွင် ပြည်သူများက ဥပဒေကို ထူထောင်ထားခြင်းဖြစ်သောကြောင့် ပြည်သူများက ဥပဒေကို လေးစားလိုက်နာကြခြင်း ဖြစ်သည်။

သမိုင်းတစ်လျှောက် လူ့အဖွဲ့အစည်းတိုင်းတွင် တရားရေးစနစ်ကို စီမံနေသူများသည် အာဏာရှိသူများဖြစ်သောကြောင့် အလွဲသုံးစားလုပ်နိုင်ခြေနှင့် အာဏာရှင်များဖြစ်သွား နိုင်ခြေရှိသည်သာ ဖြစ်သည်။ နိုင်ငံတော်ဟု အမည်တပ်ထားမှုအောက်၌ လူတစ်ဦးချင်းစီသည် ဥပဒေအရ တရားမျှတမှုမရှိဘဲ (အချို့ဆိုလျှင် တရားဝင်စွဲချက်တင်ခြင်းပင် မပြုဘဲ) အကျဉ်းချခံရနိုင်၊ ပိုင်ဆိုင်မှုများ သိမ်းဆည်းခံရနိုင်၊ နှိပ်စက်ညှဉ်းပန်းခံရနိုင်၊ နိုင်ငံမှ မောင်းထုတ်ခံရနိုင်၊ ကွပ်မျက်ခံရနိုင်သည်။ ဒီမိုကရေစီ လူ့အဖွဲ့အစည်းသည် ယင်းကဲ့သို့သော အလွဲသုံးစားမှုများကို လုံးဝသည်းမခံနိုင်ပေ။ နိုင်ငံတိုင်းသည် တရားဥပဒေကို ထိန်းသိမ်းကာ ရာဇ၀တ်မှုမြောက်သော လုပ်ရပ်များကို အပြစ်ပေးရန် အာဏာရှိသည်။ သို့သော် နိုင်ငံတော်က သူ၏တရားဥပဒေများကို အကောင်အထည်ဖော်သည့် စည်းမျဉ်းများနှင့် လုပ်ငန်းစဉ်များသည် လူသိရှင်ကြား ပွင့်ပွင့်လင်းလင်း ရှိရမည်ဖြစ်သည်။ လျှို့လျှို့ဝှက်ဝှက် ထင်ရာမြင်ရာ သို့မဟုတ် နိုင်ငံရေးစေ့ဆော်ချက်အရ ပြုလုပ်၍ မရပေ။

ဒီမိုကရေစီနိုင်ငံတစ်နိုင်ငံ၌ မှန်ကန်သော ဥပဒေရေးရာလုပ်ငန်းစဉ်ဖြစ်ရန် မရှိမဖြစ် လိုအပ်ချက်များကား အဘယ်နည်း။ ဥပမာအားဖြင့် ၀င်ရောက်ရှာဖွေရန်အတွက် ခိုင်လုံသည့် အကြောင်းပြချက်ကို ဖော်ပြထားသည့် တရားရုံးအမိန့်မပါဘဲ မည်သူ၏နေအိမ်ကိုမျှ ရဲတပ်ဖွဲ့အနေဖြင့် ၀င်ရောက်ရှာဖွေခွင့် မရှိခြင်းဖြစ်သည်။ လျှို့ဝှက်ရဲများ ညသန်းခေါင်ယံအချိန် အိမ်တံခါးလာခေါက်ခြင်းမျိုးကား ဒီမိုကရေစီစနစ်၌ နေရာမရှိပေ။ ခေတ်အဆက်ဆက် အာဏာရှင်များ အသုံးပြုနေကျ နည်းဗျူဟာတစ်ခုမှာ အစိုးရအတိုက်အခံများအား နိုင်ငံတော်သစ္စာဖောက်မှုဖြင့် တရားစွဲဆိုခြင်း ဖြစ်သည်။ ထို့ကြောင့် နိုင်ငံတော်သစ္စာဖောက်မှုဟူသည်ကို အစိုးရအား ဝေဖန်သူများကို နှိပ်ကွပ်ရန် လက်နက်အဖြစ် အသုံးမပြုနိုင်အောင် အဓိပ္ပာယ်သတ်မှတ်ချက်အား အသေအချာ ကန့်သတ်ထားရန် လိုအပ်သည်။ ထို့အတူ ဒီမိုကရေစီနိုင်ငံတစ်နိုင်ငံ၌ အာဏာရှိသူများက မိမိ၏အတိုက်အခံများအား နှိပ်ကွပ်ရန်မည်သည့် ဥပဒေပုဒ်မကိုမျှ လက်နက်အဖြစ် အသုံးမပြုနိုင်စေရေး သေချာစေရန် လိုသည်။

မည်သို့ပင်ဆိုစေကာမူ ဒီမိုကရေစီ လူ့အဖွဲ့အစည်းတစ်ရပ်တွင် တရားစီရင်ရေးစနစ် အနေဖြင့် လူတိုင်းလူတိုင်းအား တန်းတူညီမျှသည့် အခွင့်အရေးနှင့် တူညီသော ကာကွယ်စောင့်ရှောက်ပေးမှု ပေးမှသာ တရားဥပဒေစိုးမိုးရေးရှိသည်ဟု ခေါ်ဆိုနိုင်မည်ဖြစ်ပါကြောင်း The Daily Eleven  သတင်းစာက ရေးသားအပ်ပါသည်။

(စက်တင်ဘာ ၁၅ ရက်နေ့ The  Daily Eleven သတင်းစာ အယ်ဒီတာ အာဘေ်ာ)

အဂတိလိုက်စားခြင်းနှင့် တရားစီရင်ရေးစနစ်

နိုင်ငံတိုင်းတွင် တရားရေးစနစ်သည် နိုင်ငံသားတိုင်းအပေါ် မျှတစွာ ဆက်ဆံရေးနှင့် တရားဥပဒေစိုးမိုးရေးနှင့် တရားရေးစနစ်တို့ ထိရောက်မှုရှိရေးတို့အား အာမခံရသည်။ နိုင်ငံတစ်နိုင်ငံ၏ တရားစီရင်ရေးစနစ်ဆိုင်ရာ အခြေအနေသည် သက်ဆိုင်ရာနိုင်ငံ၏ အစိုးရအဖွဲ့ အရည်အသွေးနှင့် ယင်းအစိုးရအဖွဲ့၏ အဂတိလိုက်စားမှုတိုက်ဖျက်ရေး လုပ်ဆောင်မှုအပေါ် အကြီးအကျယ် တည်မှီနေသည်။ ဥပမာအားဖြင့် ရာဇ၀တ်မှုများနှင့် အချိုးအစားမျှတသော ပြစ်ဒဏ်တို့အား တရားရေးစနစ်က အကောင်အထည်ဖော်ရပြီး ယင်းလုပ်ဆောင်ချက်များ မရှိပါက ညီမျှမှု၊ အားလုံးပါဝင်နိုင်မှု၊ မျှတမှုတို့ မရှိနိုင်သကဲ့သို့ လူမှုရေးနှင့် စီးပွားရေးဖွံ့ဖြိုးမှုတို့ တည်မြဲခြင်းလည်း မရှိနိုင်ပေ။ သို့ဆိုလျှင် အဂတိလိုက်စားမှုများ ထွန်းကားရန်အတွက် ရေခံမြေခံကောင်းတစ်ရပ် ဖြစ်လာပေလိမ့်မည်။

အဂလိုက်စားမှုနှင့် တရာစီရင်ရေးစနစ်တို့အကြား ဆက်နွှယ်မှုသည် အထူးသဖြင့် မြန်မာနိုင်ငံကဲ့သို့သော ဖွံ့ဖြိုးဆဲနိုင်ငံတစ်နိုင်ငံ၌ လွန်စွာအရေးကြီးသည်။ တရားစီရင်ရေး စနစ်တစ်ရပ်၌ အဂတိလိုက်စားခြင်းသည် နိုင်ငံတော်နှင့် နိုင်ငံတကာ အသိုင်းအ၀ိုင်းတို့အား ရာဇ၀တ်မှုနှင့် အကြမ်းဖက်မှုတို့ ကိုင်တွယ်ရန် စွမ်းရည်ကို ပျက်စီးစေပြီး ကုန်သွယ်ရေးနှင့် စီးပွားရေးကြီးထွားမှု၊ လူသားရင်းအမြစ် ဖွံ့ဖြိုးမှုတို့ကို ကျဆင်းစေသည်။ အရေးအကြီးဆုံးမှာ နိုင်ငံသားများအနေဖြင့် အိမ်နီးချင်းများ သို့မဟုတ် အာဏာပိုင်များနှင့် အငြင်းပွားမှု ဖြေရှင်းရေးကို ငြင်းဆိုခံရခြင်းဖြစ်သည်။ လာဘ်ပေးလာဘ်ယူမှုအပေါ် အခြေခံသည့် တရားစီရင်ရေးသည် အစိုးရအဖွဲ့၏ ကဏ္ဍအားလုံး၌ အဂတိလိုက်စားမှုကို အားပေးခြင်းအားဖြင့် အစိုးရအပေါ် ယုံကြည်မှုကို ပျက်ပြားစေသည်။ အဂတိလိုက်စားမှုများ ရှိခြင်းသည် သက်ဆိုင်ရာနိုင်ငံ၌ အဂတိလိုက်စားမှုကို သည်းခံနိုင်ကြောင်း ပြည်သူများအား မက်ဆေ့ခ်ျတစ်ရပ် ထင်ထင်ရှားရှား ပေးနေသကဲ့သို့ရှိသည်။

ကောင်းမွန်သော တရားစီရင်ရေးစနစ်သည် အဂတိလိုက်စားခြင်း ကျူးလွန်မှုများနှင့် အဂတိလိုက်စားသော အရာရှိများကို ပွင့်ပွင့်လင်းလင်း ဖော်ထုတ်ပြောဆိုရန် နိုင်ငံသားများအား အခွင့်အာဏာ အပ်နှင်းထားသည်။ တရားစီရင်ရေးစနစ်၌ အားနည်းချက်များရှိပါက တရားစီရင်ရေးစနစ်ကို ယုံကြည်စေရန်နှင့် ကျူးလွန်သူများကို အပြစ်ပေးရန် အာမခံချက်ရှိမည် မဟုတ်ပေ။ အဂတိကင်းစင်သော တရားစီရင်ရေးစနစ်သည်သာလျှင် နိုင်ငံသားများ၏ ယုံကြည်မှု အဆင့်အတန်းကို တိုးတက်စေခြင်း၊ တရားသူကြီးများ၊ ရှေ့နေများ၊ တရားရုံးစာရေးများနှင့် တရားစီရင်ရေးစနစ်နှင့် သက်ဆိုင်သူများအပေါ် ယုံကြည်မှုရှိခြင်းတို့အား ဖြစ်ပေါ်စေနိုင်မည်ဖြစ်သည်။

အဂတိလိုက်စားမှုများ တည်ရှိသည့်နေရာတွင် တရားဥပဒေစိုးမိုးရေး မထွန်းကားနိုင်ပေ။ လူများစွာတို့အနေဖြင့် အဂတိလိုက်စားမှုက ဖွံ့ဖြိုးရေးနှင့် သာယာဝပြောရေးအပေါ် ရိုက်ခတ်ချက်ရှိကြောင်း နားမလည်နိုင်ကြပေ။ အဂတိလိုက်စားမှုနှင့် တရားစီရင်ရေးစနစ်တို့အကြား ဆက်နွှယ်ချက်သည် စဉ်ဆက်မပြတ် ဖွံ့ဖြိုးတိုးတက်ရေးကို ထိန်းထားနိုင်ရန်အတွက် အလွန်အရေးကြီးသည်။ တရားဥပဒေစိုးမိုးရေးကို အားကောင်းအောင် ပြုလုပ်ခြင်းနှင့် အဂတိလိုက်စားမှု တိုက်ဖျက်ခြင်းတို့သည် မြန်မာနိုင်ငံကဲ့သို့သော ဖွံ့ဖြိုးဆဲနိုင်ငံများတွင် အစိုးရ၏ အဓိကဦးစားပေး လုပ်ဆောင်မှု ဖြစ်သင့်သည်။ တရားစီရင်ရေးသည် အမှောင်ဖုံးလျက်ရှိပြီး အစိုးရက ‘ဖြစ်သမျှအကြောင်း အကောင်းချည်းပဲ’ ဟူ၍ နေတတ်သလို နေနေသည့် နိုင်ငံတစ်နိုင်ငံတွင် အဂတိလိုက်စားမှု ပို၍ပို၍ ကြီးထွားလာရန် အလွန်လွယ်ကူသည်။

မည်သို့ပင်ဆိုစေကာမူ တရားစီရင်ရေးစနစ် အနေဖြင့် နိုင်ငံသားတို့အား အဆိုးမြင်သူများ မဖြစ်ဘဲ အကောင်းမြင်သူများ ဖြစ်စေရေးသို့ တွန်းပို့ရန်နှင့် အဂတိလိုက်စားမှုများ ရှိနေလေသလားဟု သံသယပင် မ၀င်အောင် အာမခံထားနိုင်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။

စက်တင်ဘာ ၁၄ ရက်နေ့ထုတ် The Daily Eleven သတင်းစာ အယ်ဒီတာ့အာဘော်

ထိတ်လန့်ဖွယ် မှုခင်းများနှင့် စိုးရိမ်စရာ အညွှန်းကိန်းများ

လတ်တလောတွင် မကြာခဏ ဖြစ်ပေါ်နေသော ထိတ်လန့်ဖွယ် မှုခင်းဖြစ်စဉ်များက ပြည်သူများအကြားတွင် အစိုးရ၏ တရားဥပဒေစိုးမိုးရေးဆိုင်ရာ စီမံခန့်ခွဲမှုနှင့် သက်ဆိုင်ရာ အာဏာပိုင် ရဲတပ်ဖွဲ့တို့၏ ကိုင်တွယ် ဆောင်ရွက်ပုံတို့အပေါ် ဝေဖန်မေးခွန်းထုတ်မှုများ ကျယ်ကျယ်ပြန့်ပြန့် ထွက်ပေါ်လျက် ရှိသည်။ အခြေခံစားသောက်ကုန်ဈေးနှုန်းများ ကြီးမြင့်မှုနှင့်အတူ နိုင်ငံ၏စီးပွားရေး သိသိသာသာ ကျဆင်းမှုတို့၏ နောက်ဆက်တွဲ အကျိုးရလဒ်အဖြစ် မြို့ကြီးများတွင်ပါ လုယက်မှု၊ သတ်ဖြတ်မှု စသည့် မှုခင်းဖြစ်စဉ်များ တိုးပွားလာရသည်ဟု သုံးသပ်မှုများလည်း ရှိနေသည်။ မြန်မာနိုင်ငံတွင် ရဲတပ်ဖွဲ့ဝင် ခုနစ်သောင်းကျော်ရှိပြီး သန်းခေါင်စာရင်းအရ ရဲတစ်ဦးလျှင် ပြည်သူ ၁၃၀၀ အား ထိန်းသိမ်းနေရသည်ဆိုသည့် စာရင်းဇယား အချက်အလက်အရ ပြည်သူနှင့် ရဲအင်အား အချိုးမညီမျှမှုသည်လည်း အားနည်းချက်တစ်ရပ် ဖြစ်နေသည်ဟူသော အကြောင်းပြချက်များလည်း ရှိနေသည်။

သို့သော်လည်း ရန်ကုန်၊ မန္တလေးကဲ့သို့ မြို့ကြီးများတွင် မှုခင်းဖြစ်စဉ်များ တိုးပွားနေရခြင်း၏ နောက်ဆက်တွဲ အခြေအနေမှာ တိုင်းပြည်အတွက် စိုးရိမ်စရာဖြစ်နေသည့်အပေါ် လွှတ်တော်ကိုယ်စားလှယ်များကလည်း လွှတ်တော်တွင် သုံးသပ် ထောက်ပြမှုများ ရှိနေသည်။ စက်တင်ဘာ ၁၁ ရက် ညနေပိုင်းက တာမွေမြို့နယ် တာမွေဈေးအနီးတွင် လူမြင်ကွင်း၌ မင်းမဲ့စရိုက်ဆန်စွာ ဓားရှည်၊ လှံများဖြင့် အုပ်စုဖွဲ့လူသတ်မှု ဖြစ်စဉ်ကြောင့် မြို့နေလူထုမှာ စိုးရွံ့ ထိတ်လန့်ခဲ့ကြရသည်။ ထို့ပြင် မန္တလေးမြို့၌လည်း သြဂုတ်လကုန်ပိုင်းက ဖြစ်ပွားခဲ့သော လည်ပင်းကို ဓားဖြင့်လှီး၍ ဖုန်းလုယက်သည့်ဖြစ်စဉ်၊ ဆိုင်ကယ်စီးနင်းလာသူကို လူတစ်စုက ဓားဖြင့်ဝိုင်းခုတ်ခဲ့သည့် ဖြစ်စဉ်နှင့် လူမြင်ကွင်းတွင် သေနတ်ပစ်ခတ် လုယက်မှု၊ ဓားခုတ်လုယက်မှု ဖြစ်စဉ်များကြောင့် အစိုးရ၏ တရားဥပဒေစိုးမိုးရေး ဆောင်ရွက်မှု လုပ်ငန်းစဉ်များကို ပြည်သူများ ကျေနပ်မှုမရှိဘဲ ဖြစ်ခဲ့ကြသည်။ မှုခင်းဖြစ်ပွားမှုနှုန်းကိုကြည့်လျှင် ၂၀၁၇ ခုနှစ်က ထုတ်ပြန်ခဲ့သည့် လအလိုက် မှုခင်းမှတ်တမ်းများအနက် နောက်ဆုံးငါးလစာရင်းတွင် လူသတ်မှုနှင့် မုဒိမ်းမှုအများဆုံးမှာ ရန်ကုန်မြို့တွင် ဖြစ်ပွားကြောင်း အချက်အလက်များအရ သိရသည်။ ရန်ကုန်ပြီးလျှင် မန္တလေးသည်လည်း လူသတ်မှုနှင့် မုဒိမ်းမှု အများဆုံး ဖြစ်ပွားလေ့ရှိသည်ကို တွေ့ရသည်။

လူဦးရေ ထူထပ်များပြားမှုအရလည်း ရန်ကုန်နှင့် မန္တလေးမှာ အချက်အလက်များအရ မှုခင်းဖြစ်စဉ် ဖြစ်ပွားမှုနှုန်း များပြားလေ့ရှိသည် ဆိုသော်လည်း ယခုလတ်တလောတွင် ဖြစ်ပေါ်နေသည့် မှုခင်းဖြစ်စဉ်များအပေါ် တာဝန်ရှိသူများ အနေဖြင့် ထိထိရောက်ရောက် ကိုင်တွယ် ဖြေရှင်းမှုနှင့် တားဆီးကာကွယ်မှုတွင် အားနည်းချက်ရှိနေမှုအပေါ် စိုးရိမ်နေကြခြင်း ဖြစ်သည်။ NLD အစိုးရတက်ခါစအချိန်တွင် ရက်တစ်ရာ စီမံချက်ဖြင့် တရားဥပဒေ စိုးမိုးရေးအတွက် ချပြခဲ့သောလုပ်ငန်းများနှင့် ကတိစကားများအပေါ် တာဝန်ယူပေးရန် ပြည်သူလူထုက တောင်းဆိုမှုများလည်း ရှိနေသည်။ စီးပွားရေးကျဆင်းမှု၏ နောက်ဆက်တွဲ အခြေအနေကြောင့် တရားဥပဒေစိုးမိုးရေးကို များစွာသက်ရောက်မှု ရှိနေသည့်အပြင် နိုင်ငံတကာရှိ အဖွဲ့အစည်းအချို့မှာ ထုတ်ပြန်သည့် အညွှန်းကိန်းများကလည်း စိုးရိမ်စရာ ဖြစ်နေသည်။ ၂၀၁၈ အတွက် ထုတ်ပြန်ခဲ့သည့် ပြိုကွဲပျက်စီးနိုင်သည့်နိုင်ငံများ၏ အညွှန်းကိန်း ထုတ်ပြန်ချက် Fragile State Index တွင်လည်း အဆင့် ၂၂ သို့ ရုတ်ခြည်းမြင့်တက်သွားသည်ကို တွေ့ရသည်။ အဆိုပါ အညွှန်းကိန်းကိုကြည့်လျှင် သတ်မှတ်ချက် ၁၂ ချက်ရှိပြီး ယင်းသတ်မှတ်ချက်များမှာ နိုင်ငံလုံခြုံရေး၊ ပြည်တွင်းစစ် အခြေအနေနှင့် တရားဥပဒေစိုးမိုးရေး အဖွဲ့အစည်းများ၏ စွမ်းဆောင်ရည်ကို တိုင်းတာသည့် Security Apparatus၊ လူ့အခွင့်အရေးနဲ့ တရားဥပဒေစိုးမိုးရေးကို တိုင်းတာသည့် Human Right and Rule of Law၊ လူမျိုးရေး ဘာသာရေး အကွဲအပြဲများကို တိုင်းတာသည့် Fictionalized Elite၊ ဆင်းရဲချမ်းသာ ကွာဟမှုနှင့် အုပ်စုဖွဲ့ တိုက်ခိုက်သည့် အခြေအနေများကို တိုင်းတာသည့် Group Grievance၊ စီးပွားရေးညွှန်းကိန်းများ တိုင်းတာသည့် Economics Indicator၊ ဖွံ့ဖြိုးမှုမညီမျှခြင်းများကို တိုင်းတာသည့် Uneven Development၊ အစိုးရအား ယုံကြည်မှု၊ ပါတီစုံများပါဝင်မှု၊ အကျင့်ပျက်ခြစားမှုများကို တိုင်းတာသည့် Political Indicator၊ လူသားအရင်းအမြစ်များနှင့် ဦးနှောက်ယိုစီးမှု ပြဿနာများကို တိုင်းတာသည့် Human Flight and Brain Drain၊ လူထုအား ၀န်ဆောင်မှုပေးသည့် အခြေအနေများကို တိုင်းတာသည့် Public Services၊ လူဦးရေအချိုးမညီမှု၊ ကလေးသေဆုံးနှုန်း စသည်တို့ကို တိုင်းတာသည့် Social Indicator၊ ခိုးဝင်သူများနှင့် ပြည်ပ အထောက်အပံ့များကို တိုင်းတာသည့် Cross Cutting Indicators External Intervention၊ ဒုက္ခသည် အရေးကို တိုင်းတာသည့် Refugees and IDP စသည့်အချက်များ ပါဝင်သည်။

FSI ပြိုကွဲပျက်စီးနိုင်သည့်နိုင်ငံများ၏ အညွှန်းကိန်းကိုကြည့်လျှင် မြန်မာနိုင်ငံသည် ၂၀၁၆ ခုနှစ်၌ အဆင့် ၂၆၊ ၂၀၁၇ ခုနှစ်၌ အဆင့် ၂၅ ရှိခဲ့ရာမှ ၂၀၁၈ ခုနှစ်တွင် အဆင့် ၂၂ သို့ မြင့်တက်သွားပြီး ကင်မရွန်း၊ အန်ဂိုလာ၊ လစ်ဗျား၊ ယူဂန်ဒါစသော နိုင်ငံများကဲ့သို့ စိုးရိမ်စရာဖြစ်သည်ဟု အညွှန်းကိန်းက ဆိုနေသည်။ သို့ဖြစ်ရာ တရားဥပဒေစိုးမိုးရေးနှင့် ပတ်သက်၍ အားနည်းချက်များနှင့် စီးပွားရေး ကျပ်တည်းမှု၏ ထွက်ပေါက်အဖြစ် မှုခင်းကျူးလွန်လာနိုင်မှုများအပေါ် တာဝန်ရှိသူများ အနေဖြင့် သတိပြုဖြေရှင်း ဆောင်ရွက်ရန် လိုအပ်နေသည်မှာလည်း အမှန်ပင်ဖြစ်သည်။ နိုင်ငံတော်၏အတိုင်ပင်ခံ အနေဖြင့်လည်း ဒီမိုကရေစီစနစ်တွင် တရားဥပဒေစိုးမိုးရေးမှာ အရေးကြီးသည့် အခန်းကဏ္ဍမှ ပါဝင်လျက်ရှိသည်ဟု မကြာခဏ ထုတ်ဖော် ပြောကြားလျက်ရှိပေရာ လတ်တလော ပြည်သူများအကြား စိုးရိမ်ဖွယ်ဖြစ်နေသည့် မှုခင်းများအပေါ် ထိရောက်စွာ တားဆီးပေးရန် လိုအပ်လျက် ရှိပါကြောင်း The Daily Eleven သတင်းစာက ရေးသားအပ်ပါသည်။

စက်တင်ဘာ ၁၃ ရက်နေ့ထုတ် The Daily Eleven သတင်းစာ အယ်ဒီတာ့အာဘော်

နိုင်ငံတကာ၏ ဖယ်ကြဉ်မှု

နိုင်ငံတကာ၏ ဖယ်ကြဉ်မှုဟူသည် နိုင်ငံတကာအသိုင်းအ၀ိုင်း သို့မဟုတ် ကုလသမဂ္ဂ ကဲ့သို့သော အင်အားကြီးမားသည့် နိုင်ငံများအုပ်စုက နိုင်ငံတစ်နိုင်ငံ၊ အစိုးရတစ်ရပ် သို့မဟုတ် လူအုပ်စုတစ်စုအပေါ် အပြစ်ပေးရန် ကျင့်သုံးမှုတစ်ရပ်ဖြစ်သည်။ နိုင်ငံတကာ အသိုင်းအ၀ိုင်း သို့မဟုတ် နိုင်ငံများအုပ်စုက ဖယ်ကြဉ်ခဲ့ပြီးနောက် နိုင်ငံတစ်နိုင်ငံအနေဖြင့် အထီးကျန်တည်ရှိခြင်းကိုလည်း ခေါ်ဆိုသည်။ အင်အားကြီးသည့် နိုင်ငံများအုပ်စုဟု သတ်မှတ်ချက်များသည် စီးပွားရေး၊ နိုင်ငံရေးနှင့် ယဉ်ကျေးမှုအရ တည်ငြိမ်မှုများအပေါ် တည်မှီနေသော်လည်း ဖွံ့ဖြိုးဆဲနိုင်ငံများ တိုးတက်လာခြင်းနှင့်အတူ ကမ္ဘာကြီး၏ အခင်းအကျင်းသည် အဆက်မပြတ် ပြောင်းလဲနေသောကြောင့် ယင်းကဲ့သို့သော အုပ်စုများမှာလည်း ပြောင်းလဲ၍နေနိုင်သည်။

နိုင်ငံတကာ၏ ဖယ်ကြဉ်မှုသည် နိုင်ငံတစ်နိုင်ငံ သို့မဟုတ် နိုင်ငံများအုပ်စုတစ်စုအား နိုင်ငံတကာက ပိတ်ဆို့မှုများကြောင့် ဖြစ်ပေါ်လာသော ရလဒ်တစ်ခု ဖြစ်တတ်သော်လည်း သက်ဆိုင်ရာ နိုင်ငံတစ်နိုင်ငံက တံခါးပိတ်မူဝါဒ ကျင့်သုံးခြင်းကြောင့် ထွက်ပေါ်လာသော ရလဒ်လည်း ဖြစ်နိုင်သည်။ ဥပမာအားဖြင့် မွမ်မာကဒါဖီလက်ထက် လစ်ဗျားနိုင်ငံသည် ဆယ်စုနှစ်အတန်ကြာ အနောက်တိုင်းနှင့် ထိပ်တိုက်တွေ့ပြီး အမျိုးတူ အာရပ်အစိုးရအဖွဲ့များနှင့် ဆန့်ကျင်သော နိုင်ငံရေးကြောင့် နိုင်ငံတကာ၏ ဖယ်ကြဉ်မှုခံရသော နိုင်ငံဖြစ်ခဲ့သည်။

အခြားနိုင်ငံတစ်နိုင်ငံမှ ခွဲထွက်ခဲ့သော နိုင်ငံများသည်လည်း နိုင်ငံတကာ၏ ဖယ်ကြဉ်မှုခံရနိုင်သည်။ ဥပမာအားဖြင့် ရုရှားစစ်တပ်၏ အကူအညီဖြင့် ဂျော်ဂျီယာနိုင်ငံမှ ခွဲထွက်ခဲ့သော အက်ခါးဇီးယားနိုင်ငံကို နိုင်ငံအနည်းငယ်မျှသာ အသိအမှတ်ပြုကြသည်။  ဆိုက်ပရပ်စ်ကျွန်း၏ မြောက်ပိုင်းဖြစ်သော မြောက်ဆိုက်ပရပ်စ်သည်လည်း အလားတူ အနေအထားမျိုး ကြုံတွေ့ရသည်။ ယင်းကဲ့သို့သော နိုင်ငံများနှင့် ၎င်းတို့၏ အကျိုးစီးပွားများကို ပိုမိုကြီးမားသော အိမ်နီးချင်းက ကာကွယ်ပိတ်ဆို့၍ ထားတတ်သည်။

‘အပယ်ခံနိုင်ငံ’ ကဲ့သို့သော ပို၍ကျယ်ပြန့်စွာ သိကြသည့် စကားရပ် သို့မဟုတ် သဘောတရားကို မိမိဘာသာ နိုင်ငံတကာအသိုင်းအ၀ိုင်းမှ ရှောင်ဖယ်၍နေသော သို့မဟုတ် နိုင်ငံများအုပ်စုတစ်စုက ဖယ်ကြဉ်ထားသော နိုင်ငံများအား ရည်ညွှန်းရာ၌ ခေါ်ဆိုသည်။ ယင်းကဲ့သို့သော နိုင်ငံတစ်နိုင်ငံနှင့် ပတ်သက်သည့် လက္ခဏာရပ်များမှာ သံတမန်အရ ဖယ်ကြဉ်ခံထားရမှု၊ ယုံကြည်စိတ်ချရသော လုံခြုံရေးဆိုင်ရာ ထောက်ပံ့မှု သို့မဟုတ်  အင်အားကြီးမားသော မဟာမိတ်ဖွဲ့စည်းပုံအတွင်း နိုင်ငံရေးအရ အကာအကွယ်ပေးခံရခြင်းချို့တဲ့မှုနှင့် ကုလသမဂ္ဂကဲ့သို့သော နိုင်ငံတကာ ဖိုရမ်များအတွင်း စွဲစွဲမြဲမြဲ မညှာမတာ ကဲ့ရဲ့ပြစ်တင်ခံရမှုနှင့် ပြင်းပြင်းထန်ထန် ဝေဖန်ခံရမှုတို့ဖြစ်ကြသည်။ ယင်းကဲ့သို့သော နိုင်ငံမှာ ၁၉၇၉ ခုနှစ်နောက်ပိုင်း ကမ်ပူးချားနိုင်ငံဖြစ်သည်။ ထိုစဉ်က ခမာအစိုးရကို ဖြုတ်ချရန် ဗီယက်နမ်တို့၏ ၀င်ရောက်မှုကို အတည်မပြုပေးသည့်အတွက် တရုတ်နှင့် အမေရိကန် နှစ်နိုင်ငံစလုံးသည် ကမ်ပူးချားကို ဖယ်ကြဉ်ခဲ့သည်။ အခြားဥပမာတစ်ရပ်မှာ  နိုင်ငံတကာသဘောတူညီချက်များကို ပယ်ချသည့် သို့မဟုတ် လိုက်နာခြင်းမရှိသည့် နိုင်ငံများကို ဖယ်ကြဉ်ခြင်းဖြစ်သည်။ ၂၀၁၁ ခုနှစ်တွင် ဖန်လုံအိမ်အာနိသင်ကို ဖြစ်စေသော ဓာတ်ငွေ့များအား ကန့်သတ်ထိန်းချုပ်သည့် ကျိုတိုသဘောတူညီချက်အား မလိုက်နာသည့် ကနေဒါနိုင်ငံသည် အဆိုပါ ဥပမာမျိုးဖြစ်သည်။ နိုင်ငံတကာဖယ်ကြဉ်ခံရမှုကြောင့် ခံရသော သက်ရောက်မှုများအနက် အဖြစ်အများဆုံးမှာ လူ့အဖွဲ့အစည်းအတွင်း ပစ္စည်းဥစ္စာ မပြည့်စုံသူများ ဆင်းရဲမွဲတေသွားခြင်း ဖြစ်သည်။

မည်သို့ပင်ဆိုစေကာမူ နိုင်ငံတကာ၏ ဖယ်ကြဉ်မှုကြောင့် အဆိုးရွားဆုံးဒဏ်ခံရမည့် သူများမှာ အောက်ဆုံးလွှာမှ ပြည်သူများသာဖြစ်ပါကြောင်းThe Daily Eleven သတင်းစာက ရေးသားအပ်ပါသည်။

(စက်တင်ဘာ ၁၂ ရက်နေ့ The Daily Eleven သတင်းစာ အယ်ဒီတာ အာဘေ်ာ)

ပရော်ဖက်ရှင်နယ်တစ်ဦးဟူသည် . . .

မိမိ ရွေးချယ်ထားသော နယ်ပယ်တစ်ရပ်၌ ပရော်ဖက်ရှင်နယ်ဖြစ်ခြင်းဟူသည် ဂျုတီကုတ်ကဲ့သို့သော သက်ဆိုင်ရာ လုပ်ငန်းဝတ်စုံကို ၀တ်ဆင်လိုက်ခြင်း၊ ဘွဲ့လက်မှတ် တစ်ခုကို ပိုင်ဆိုင်ခြင်း သို့မဟုတ် ရာထူးတာဝန်တစ်ခု၌ ရှိနေခြင်း အစရှိသည်တို့ထက် များစွာပိုပေသည်။ ပရော်ဖက်ရှင်နယ်လစ်ဇင်ဟူသည် မိမိ၏ လုပ်ငန်းရေးရာကိစ္စရပ်များ အတွင်း မိမိကိုယ်တိုင် မည်သို့မည်ပုံ စောင့်ထိန်းလိုက်နာ ဆောင်ရွက်သနည်းဟူသည်နှင့် သက်ဆိုင်သည်။ စစ်မှန်သော ပရော်ဖက်ရှင်နယ်များသည် မည်သည့်လုပ်ငန်း အမျိုးအစား၌မဆို အကျုံးဝင်နိုင်သည့် အရေးကြီးသော စရိုက်လက္ခဏာရပ်များကို ပိုင်ဆိုင်ထားကြသည်။

အသွင်အပြင် – ပရော်ဖက်ရှင်နယ်တစ်ဦးသည် အသွင်အပြင်အရ သပ်ရပ်နေရမည် ဖြစ်သည်။ မိမိကုမ္ပဏီ၏ ၀တ်စားဆင်ယင်မှုဆိုင်ရာ ကျင့်ဝတ်များကို လိုက်နာသည်ထက်ပင် ပိုမိုရမည်ဖြစ်သည်။ အထူးသဖြင့် အလုပ်လျှောက်ထားသူများ သို့မဟုတ် လုပ်ငန်း ဖောက်သည်များကို တွေ့ဆုံရသည့်အခါ မိမိအသွင်အပြင်ကို ပို၍ပင် ဂရုစိုက်ရန် လိုအပ်သည်။

ပြောဆိုပြုမူပုံ – မိမိ၏ ပြောဆိုပြုမူပုံသည် ယုံကြည်မှုရှိရမည်ဖြစ်သော်လည်း မောက်မာထောင်လွှားသော ပုံစံမျိုးပေါက်မနေစေရန် လိုအပ်သည်။ ဖောက်သည်များ၊ အထက်လူကြီးများ၊ လုပ်ဖော်ကိုင်ဖက်များ စသဖြင့် မည်သူနှင့် ပြောဆိုဆက်ဆံရာ၌ဖြစ်စေ ယဉ်ကျေးသိမ်မွေ့ပြီး ကောင်းမွန်စွာ ပြောဆိုရန် လိုအပ်သည်။ တင်းမာနေသည့် အနေအထားများ၌ပင်လျှင် တည်ငြိမ်မှုကို ထိန်းထားနိုင်ရန် လိုအပ်သည်။

ယုံကြည်စိတ်ချရမှု – ပရော်ဖက်ရှင်နယ်တစ်ဦးအဖြစ် အလုပ်ပြီးမြောက်စေရေး နည်းလမ်းကို ရှာဖွေရန် မိမိအပေါ် ယုံကြည်စိတ်ချမှု ရှိလာစေရန် လိုအပ်သည်။ လူများကို အလျင်အမြန် တုံ့ပြန်ရန်နှင့် အချိန်နှင့်တစ်ပြေးညီ ပေးထားသည့် ကတိအတိုင်း ဆောင်ရွက်ပေးရန် အရေးကြီးသည်။

လုပ်ရည်ကိုင်ရည် – ပရော်ဖက်ရှင်နယ်များသည် မိမိတို့နယ်ပယ်တွင် ကျွမ်းကျင်ပိုင်နိုင်သူများ ဖြစ်လာရန် အားထုတ်ကြသူများဖြစ်သည်။ ယင်းကပင်လျှင် မိမိတို့အား အခြားသူများနှင့် ကွဲပြားလာစေရန် တည်ဆောက်နေမှုများ ဖြစ်သည်။ သက်ဆိုင်ရာ သင်ခန်းစာများကို လေ့လာခြင်း၊ ဆွေးနွေးပွဲများ တက်ရောက်ခြင်း၊ မိမိပရော်ဖက်ရှင်နှင့် ဆက်နွှယ်နေသော မည်သည့်စာတမ်းဖတ်ပွဲများကိုမဆို တက်ရောက်ခြင်း အစရှိသည်တို့ဖြင့် မိမိ၏ ပညာရှာမှီးရေး လမ်းကြောင်းကို အဆက်မပြတ် လိုက်နေရန် လိုအပ်သည်။

ကျင့်ဝတ် – ဆရာဝန်များ၊ ရှေ့နေများနှင့် အစိုးရစာရင်းကိုင်များ ကဲ့သို့သော ပရော်ဖက်ရှင်နယ်များသည် ကျင့်ဝတ်နှင့်ပတ်သက်သော တင်းကျပ်သည့် စည်းကမ်းများကို လိုက်နာရမည်ဖြစ်သည်။ မိမိ၏ ကုမ္ပဏီ သို့မဟုတ် လုပ်ငန်း၌ ရေးဆွဲထားသော ကျင့်ဝတ်ဆိုင်ရာ စည်းမျဉ်းစည်းကမ်းများ မရှိသည့်တိုင် မိမိအနေဖြင့် အချိန်တိုင်း ကျင့်ဝတ်နှင့် လျော်ညီသော အမူအကျင့်များကို ပြသရန်လိုသည်။

မိမိ၏ ဣနြေ္ဒကို စောင့်ထိန်းခြင်း – ခက်ခဲသော အနေအထားတစ်ရပ်ကို ရင်ဆိုင်ရသည့်အခါ၌ပင်လျှင် ပရော်ဖက်ရှင်နယ်တစ်ဦးသည် မိမိ၏ဣနြေ္ဒကို စောင့်ထိန်းရန် လိုအပ်သည်။ ဥပမာအားဖြင့် မိမိ၏ လုပ်ဖော်ကိုင်ဖက်တစ်ဦး သို့မဟုတ် ဖောက်သည်တစ်ဦးက မိမိအပေါ် ရန်လိုသည့် အပြုအမူတစ်ရပ် ပြုသည့်တိုင် မိမိအနေဖြင့် တူညီသော အပြုအမူမျိုးဖြင့် မတုံ့ပြန်သင့်ပေ။

ဖုန်းနှင့်ပတ်သက်သော ကျင့်ဝတ် – ဖုန်းနှင့်ပတ်သက်သော ကျင့်ဝတ်သည် ပရော်ဖက်ရှင်နယ် အပြုအမူအတွင်း အရေးကြီးသော အစိတ်အပိုင်းတစ်ရပ်ဖြစ်သည်။ ဖုန်းခေါ်ဆိုသည့်အခါ မိမိ၏ နာမည်အပြည့်အစုံ၊ ကုမ္ပဏီအမည်နှင့် ရာထူးအပြည့်အစုံကို ဖော်ပြရမည်ဖြစ်သည်။ အပြန်အလှန် စကားပြောဆိုမှုကို လွှမ်းမိုးရန် မကြိုးစားဘဲ တစ်ဖက်သား ပြောကြားမှုအား စိတ်ရှည်လက်ရှည် နားထောင်ပေးရမည်ဖြစ်သည်။

စာများ ရေးသားခြင်း – လုပ်ငန်းနှင့်ပတ်သက်သော စာရေးသား ဆက်သွယ်မှုတွင် တိုတိုနှင့် လိုရင်းကို ဖော်ပြရမည်ဖြစ်သည်။ စာရေးသားသည့် လေသံသည် ယဉ်ကျေးသိမ်မွေ့ကာ ကိန်းကြီးခန်းကြီးမနိုင်ဘဲ နည်းလမ်းတကျ ဖြစ်ရမည်ဖြစ်သည်။

စုစည်းနိုင်သည့် ကျွမ်းကျင်မှု – ပရော်ဖက်ရှင်နယ်တစ်ဦးသည် လိုအပ်သည့် အရာကို အလျင်အမြန် အလွယ်တကူ ရှာဖွေနိုင်ရမည်ဖြစ်သည်။ မိမိလုပ်ငန်းခွင်သည် သပ်ရပ်ကာ စုစုစည်းစည်း ရှိရမည်ဖြစ်သည်။ မိမိ၏ ချိန်းဆိုထားမှုများနှင့် တင်ပြမှုများအတွက် လိုအပ်သည့် အရာများကိုသာလျှင် မိမိ၏ လက်ဆွဲအိတ်ထဲ၌ ထည့်ထားသင့်သည်။

တာဝန်ခံမှု – ပရော်ဖက်ရှင်နယ်များသည် မည်သည့်အချိန်၌မဆို မိမိတို့ လုပ်ဆောင်ချက်တိုင်းအတွက် တာဝန်ခံထားရသည်။ အမှားတစ်ခု လုပ်မိပါက ယင်းအတွက် ပြန်လည်ပေးဆပ်ရပြီး ဖြစ်နိုင်သမျှ ပြန်လည်ပြင်ဆင်နိုင်ရန် ကြိုးပမ်းရသည်။ လုပ်ဖော်ကိုင်ဖက်တစ်ဦးအပေါ် အပြစ်ပုံချရန် ကြိုးပမ်းခြင်း မပြုအပ်ပေ။ မိမိကုမ္ပဏီတစ်ခုလုံး အနေဖြင့် အမှားလုပ်မိပါကလည်း တာဝန်ယူကာ ယင်းကိစ္စကို ဖြေရှင်းနိုင်ရန် လုပ်ဆောင်ရသည်။

ထို့ကြောင့် ပရော်ဖက်ရှင်နယ်တစ်ဦး ရှိရမည့် စရိုက်လက္ခဏာရပ်များနှင့် လျော်ညီသောသူများကိုသာ ပရော်ဖက်ရှင်နယ်များဟု ခေါ်ဆိုနိုင်မည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

စက်တင်ဘာ ၁၁ ရက်နေ့ထုတ် The Daily Eleven သတင်းစာ အယ်ဒီတာ့အာဘော်