အခြေခံမူ ၃၇ ချက် ထွက်ပေါ်လာသည့် ပြည်ထောင်စုငြိမ်းချမ်းရေးညီလာခံ – ၂၁ ရာစုပင်လုံ ဒုတိယအစည်းအဝေး

မေ ၂၉ ရက်က နေပြည်တော်ရှိ အပြည်ပြည်ဆိုင်ရာ မြန်မာကွန်ဗင်းရှင်းစင်တာ (၂) တွင် ပြည်ထောင်စုသဘောတူစာချုပ်၏ အစိတ်အပိုင်း(၁)ကို ညီလာခံကိုယ်စားလှယ်များဖြစ်သည့် အစုအဖွဲ့ငါးခုမှ ကိုယ်စားလှယ်ငါးဦးက သဘောတူ လက်မှတ်ရေးထိုးစဉ် (ဓာတ်ပုံ-ချမ်းဝေစိုး)

ပြည်ထောင်စုငြိမ်းချမ်းရေး ညီလာခံကို သမ္မတဟောင်း ဦးသိန်းစိန်အစိုးရလက်ထက်တွင် စတင်ကျင်းပခဲ့ပြီးနောက် NLD ပါတီဦးဆောင်သော အစိုးရလက်ထက်တွင် ပြည်ထောင်စုငြိမ်းချမ်းရေးညီလာခံ ၂၁ ရာစုပင်လုံဟု အမည်ပြောင်း၍ နှစ်ကြိမ်တိုင် ကျင်းပခဲ့ရာ ၂၀၁၇ ခုနှစ် မေလအတွင်းက ကျင်းပသည့် ဒုတိယအကြိမ် အစည်းအဝေးတွင် ပြည်ထောင်စုသဘောတူစာချုပ်၏ အစိတ်အပိုင်း ၃၇ ချက် ထွက်ပေါ်လာသောကြောင့် ၂၀၁၇ ခုနှစ် ထင်ရှားကျော်ကြားဖြစ်ရပ်တစ်ခုအဖြစ် ဖော်ပြအပ်ပါသည်။

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ကို ယခင်သမ္မတဟောင်း ဦးသိန်းစိန်အစိုးရလက်ထက်တွင် အစိုးရနှင့် တိုင်းရင်းသားလက်နက်ကိုင်အဖွဲ့များကြား ရေးဆွဲခဲ့ပြီး ၂၀၁၅ ခုနှစ် အောက်တိုဘာ ၁၅ ရက်တွင် အစိုးရနှင့် တိုင်းရင်းသားလက်နက်ကိုင်အဖွဲ့ ရှစ်ဖွဲ့တို့ လက်မှတ်ရေးထိုးခဲ့သည်။

NCA ရေးထိုးခဲ့သော တိုင်းရင်းသားလက်နက်ကိုင်ရှစ်ဖွဲ့မှာ ကရင်အမျိုးသား အစည်းအရုံး (KNU)၊ DKBA၊ KNU/KNLA (PC)၊ ရှမ်းပြည်ပြန်လည်ထူထောင်ရေးကောင်စီ (RCSS)၊ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO)၊ ချင်းအမျိုးသားတပ်ဦး (CNF)၊ ရခိုင်ပြည်လွတ်မြောက်ရေးပါတီ (ALP)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) တို့ဖြစ်သည်။ NCA စာချုပ်ပါ နိုင်ငံရေးလမ်းပြမြေပုံမှာ (၁) NCA စာချုပ် လက်မှတ်ရေးထိုးခြင်း၊ (၂) အစိုးရကိုယ်စားလှယ်များနှင့် တိုင်းရင်းသားလက်နက်ကိုင် အဖွဲ့အစည်းများက “နိုင်ငံရေးဆွေးနွေးမှုဆိုင်ရာမူဘောင်” ကို ရေးဆွဲ သဘောတူညီမှုရယူခြင်း၊ (၃) ထိုမူဘောင်ကို အခြေခံ၍ အမျိုးသားအဆင့် နိုင်ငံရေးဆွေးနွေးပွဲများ ကျင်းပခြင်း၊ လုံခြုံရေးဆိုင်ရာ ပြန်လည်ပေါင်းစည်းခြင်းကိစ္စရပ်များ၊ လုပ်ငန်းစဉ်များကို ညှိနှိုင်းဆွေးနွေးခြင်းနှင့် နှစ်ဖက်သဘောတူညီသော ကြိုတင်ဆောင်ရွက်ဖွယ်ရာများကို လုပ်ဆောင်ခြင်း၊ (၄) ပြည်ထောင်စုငြိမ်းချမ်းရေး ညီလာခံကျင်းပခြင်း၊ (၅) ပြည်ထောင်စုသဘောတူ စာချုပ်ချုပ်ဆိုခြင်း၊ (၆) ပြည်ထောင်စုလွှတ်တော်သို့ တင်သွင်း၍ အတည်ပြုချက်ရယူခြင်း၊ (၇) “ပြည်ထောင်စု သဘောတူစာချုပ် (Pyidaungsu Accord)” ပါ သဘောတူညီချက်များကို အကောင်အထည်ဖော်ခြင်းနှင့် လုံခြုံရေးဆိုင်ရာ ပြန်လည်ပေါင်းစည်းခြင်း လုပ်ငန်းစဉ်များ အကောင်အထည်ဖော် ဆောင်ရွက်ခြင်းတို့ဖြစ်သည်။

သမ္မတဟောင်း ဦးသိန်းစိန်အစိုးရလက်ထက် NCA ရေးထိုးပြီးနောက် NCA စာချုပ်ပါ နိုင်ငံရေးလမ်းပြမြေပုံအတိုင်း အမျိုးသားအဆင့် နိုင်ငံရေးဆွေးနွေးပွဲများကို ကျင်းပခြင်းမရှိဘဲ ပြည်ထောင်စုငြိမ်းချမ်းရေးညီလာခံကို ၂၀၁၆ ခုနှစ် ဇန်န၀ါရီလတွင် ကျင်းပခဲ့ပြီး ဆုံးဖြတ်ချက်တစ်စုံတစ်ရာ မရှိခဲ့ပေ။

NLD ပါတီဦးဆောင်ဖွဲ့စည်းသည့် အစိုးရသစ် တက်လာပြီးနောက်တွင်လည်း ၂၀၁၆ ခုနှစ် စက်တင်ဘာ၌ ပြည်ထောင်စုငြိမ်းချမ်းရေးညီလာခံ၂၁ ရာစုပင်လုံဟု အမည်ပြင်ဆင်ကာ NCA မရေးထိုးရသေးသည့် တိုင်းရင်းသား လက်နက်ကိုင်အဖွဲ့များကိုပါ တက်ရောက်စေခဲ့ပြီး ၎င်းတို့၏ သဘောထားအမြင်များကို စာတမ်းဖတ်ကြား ခွင့်ပြုခဲ့သော်လည်း အဆိုပါပွဲတွင် ဆုံးဖြတ်ချက် တစ်စုံတစ်ရာ မရှိခဲ့ပေ။

ထို့နောက် ၂၁ ရာစု ပင်လုံပထမအစည်းအဝေးအပြီးတွင် NCA ရေးထိုးထားသည့် တိုင်းရင်းသားလက်နက်ကိုင် နယ်မြေများတွင် လမ်းပြမြေပုံပါအဆင့် (၃) ဖြစ်သည့် အမျိုးသားအဆင့် နိုင်ငံရေးဆွေးနွေးပွဲများကို စတင်ကျင်းပခဲ့သည်။

လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ သုံးပွဲ၊ ဒေသအလိုက်အမျိုးသားအဆင့် နိုင်ငံရေးဆွေးနွေးပွဲသုံးပွဲအား ကျင်းပခဲ့ပြီး အဆိုပါပွဲများမှ ရရှိသည့် သဘောထားများကို စုစည်းကာ ၂၀၁၇ ခုနှစ် မေလတွင် ၂၁ ရာစု ပင်လုံဒုတိယအစည်းအဝေးကို ကျင်းပခဲ့သည်။

အကြောင်းအရာအလိုက် အမျိုးသားအဆင့် နိုင်ငံရေးဆွေးနွေးပွဲ (သို့မဟုတ်) အရပ်ဘက် အဖွဲ့အစည်းများဖိုရမ်ကို ကျင်းပနိုင်ခဲ့သော်လည်း ညီလာခံသို့ စာတမ်းတင်သွင်းနိုင်ခြင်း မရှိခဲ့ပေ။

ပြည်ထောင်စုငြိမ်းချမ်းရေးညီလာခံ ၂၁ ရာစုပင်လုံ ဒုတိယအစည်းအဝေးသို့ အစိုးရ၊ တပ်မတော်၊ လွှတ်တော်ခေါင်းဆောင်များ၊ NCA လက်မှတ်ရေးထိုးထားသည့် တိုင်းရင်းသားလက်နက်ကိုင် အဖွဲ့အစည်းများမှ ကိုယ်စားလှယ်များ၊ နိုင်ငံရေးပါတီများမှ ကိုယ်စားလှယ်များ ညီလာခံကိုယ်စားလှယ် ၇၀၀ တက်ရောက်ခဲ့ပြီး အခြားနိုင်ငံရေး လေ့လာစောင့်ကြည့်သူများနှင့် အရပ်ဘက် လူမှုအဖွဲ့အစည်းများမှ လေ့လာသူ ၁၂၀ ကျော် တက်ရောက်ခဲ့သည်။

၂၁ ရာစုပင်လုံ ဒုတိယအစည်းအဝေးကို မေ ၂၄ရက်မှ ၂၉ ရက်အထိ နေပြည်တော်ရှိ အပြည်ပြည်ဆိုင်ရာ မြန်မာကွန်ဗင်းရှင်းစင်တာ (MICC-2) တွင် ခြောက်ရက်ကြာ ပြုလုပ်ခဲ့ပြီး ညီလာခံသို့ လူမျိုးအလိုက်၊ ဒေသအလိုက် ကျင်းပထားသည့် အမျိုးသားအဆင့် နိုင်ငံရေးဆွေးနွေးပွဲများမှ စုစည်းချက်များဖြစ်သည့် နိုင်ငံရေး၊ လူမှုရေး၊ စီးပွားရေး၊ မြေယာနှင့် သဘာဝပတ်ဝန်းကျင်ကဏ္ဍလေးခုမှ မူဝါဒအဆိုပြုချက် ၄၁ ချက်အား တင်သွင်း ဆွေးနွေးခဲ့သည်။

လုံခြုံရေးကဏ္ဍအား ဆွေးနွေးမှု ရှိခဲ့သော်လည်း ဆုံးဖြတ်ချက် မရှိခဲ့ပေ။

ထိုသို့ညီလာခံသို့ တင်သွင်းဆွေးနွေးခဲ့သည့် အဆိုပြုချက်များမှာ ကဏ္ဍအလိုက် လုပ်ငန်းကော်မတီများနှင့် ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီ (UPDJC) တွင် စိစစ်ညှိနှိုင်းထားသည့် မူဝါဒအဆိုပြုချက်များဖြစ်သည်။

ယင်းကဲ့သို့ ညီလာခံ၌ ကဏ္ဍအလိုက်ခွဲကာ အုပ်စုဖွဲ့၍ စတင်ဆွေးနွေးသည့် ညီလာခံ ပထမနေ့၌ပင် နိုင်ငံရေးကဏ္ဍအောက်ရှိ အခြေခံရမည့်မူများမှ ဖက်ဒရယ်ပြည်ထောင်စုမူ (ဖွဲ့စည်းမှုနှင့်အာဏာခွဲဝေမှု) တွင် နယ်မြေ အပိုင်းအခြား ဟူသမျှသည် နိုင်ငံတော်မှ မည်သည့်အခါမှ ခွဲမထွက်ရဟု ဖော်ပြထားရာ ယင်းအချက်နှင့် ပတ်သက်၍ အချေအတင် ဆွေးနွေးခဲ့ရသည်။

အဆိုပါ အချက်ကို တိုင်းရင်းသားလက်နက်ကိုင် အဖွဲ့များက တိုင်းရင်းသားအချင်းချင်းအကြား စည်းလုံးညီညွတ်မှုကို ထိခိုက်စေနိုင်မည်ဖြစ်ပြီး ၎င်းတို့အနေဖြင့် စိုးရိမ်ပူပန်မှု ဖြစ်ပေါ်နိုင်သည်ဟု ယူဆသည့်အတွက် မထည့်သွင်းသင့်ကြောင်း ဆွေးနွေးခဲ့ကြပြီး ကဏ္ဍအလိုက် ဆွေးနွေးမှု ပြီးဆုံးသည်အထိ ပြေလည်သည့် သဘောတူညီမှု တစ်စုံတစ်ရာ မရရှိခဲ့ဘဲ လာမည့်ညီလာခံတွင် ထပ်မံဆွေးနွေးရန် အချက်အဖြစ် ကျန်ရှိခဲ့သည်။

ထို့အတူ လုံခြုံရေးကဏ္ဍတွင်လည်း အနာဂတ်တွင် ပြည်ထောင်စုတပ်မတော်တစ်ခုတည်းရှိရေးဆိုသည့် အချက်ကို ဆွေးနွေးခဲ့ကြရာ တပ်မတော်တစ်ခုတည်း ထားရှိရေးမူကို လက်ခံခဲ့ကြသော်လည်း စကားလုံး အသုံးအနှုန်းနှင့် ပတ်သက်၍ သဘောထားသုံးရပ် ကွဲလွဲမှု ထွက်ပေါ်ခဲ့သည်။

လုံခြုံရေးကဏ္ဍ ဆွေးနွေးပွဲ တက်ရောက်ခဲ့သူများ၏ ပြောကြားချက်များအရ အချို့မှာ ဒီမိုကရေစီအစိုးရ၏ ကွပ်ကဲမှုအောက်တွင်ရှိရမည့် တပ်မတော်၊ အချို့မှာ ဒီမိုကရေစီနှင့် ဖက်ဒရယ်စနစ်ကို အာမခံသည့် ပြည်ထောင်စုတပ်မတော်ဟူ၍ နာမ၀ိသေသနတပ်ကာ သုံးနှုန်းလိုပြီး အချို့မှာ တစ်ခုတည်းသော တပ်မတော်ဟုသာ သုံးနှုန်းထားရှိရန် စသဖြင့် ကွဲလွဲမှုဖြစ်ပေါ်ခဲ့သည်။

ယင်းနောက် ၂၁ ရာစု ပင်လုံညီလာခံ ဒုတိယအစည်းအဝေးတွင် နိုင်ငံရေးကဏ္ဍမှ မူဝါဒအဆိုပြုချက် အချက် ၂၀ ရှိသည့်အနက် သဘောတူချက် ၁၂ ချက်၊ စီးပွားရေးကဏ္ဍမှ မူဝါဒအဆိုပြုချက် ၁၁ ချက်၊ လူမှုရေးကဏ္ဍမှ မူဝါဒအဆိုပြုချက် လေးချက်၊ မြေယာနှင့် သဘာဝပတ်ဝန်းကျင်ကဏ္ဍမှ မူဝါဒအဆိုပြုချက် ၁၀ ချက် စုစုပေါင်း မူဝါဒအဆိုပြုချက် ၃၇ ချက်ကို သဘောတူခဲ့ပြီး ပြည်ထောင်စုသဘောတူစာချုပ်၏ အစိတ်အပိုင်း (၁) အဖြစ် ညီလာခံ ကိုယ်စားလှယ်များဖြစ်သည့် အစိုးရ၊ တပ်မတော်၊ လွှတ်တော်၊ တိုင်းရင်းသားလက်နက်ကိုင် အဖွဲ့အစည်းများနှင့် နိုင်ငံရေးပါတီ အစုအဖွဲ့ငါးခုမှ ကိုယ်စားလှယ်ငါးဦးက သဘောတူ လက်မှတ်ရေးထိုးခဲ့ပြီး အသိသက်သေများအဖြစ် တိုင်းရင်းသားကိုယ်စားလှယ် သုံးဦးနှင့် ပါဝင်ပါဝင်ထိုက်သူသုံးဦးတို့က ပါဝင်လက်မှတ် ရေးထိုးခဲ့သည်။

ပြည်ထောင်စုငြိမ်းချမ်းရေးညီလာခံ ၂၁ ရာစု ပင်လုံဒုတိယအစည်းအဝေးမှ ရရှိသည့် ပြည်ထောင်စုသဘောတူညီချက် အစိတ်အပိုင်း (၁) အဖြစ် ရရှိခဲ့သော ၃၇ ချက်သည် အမျိုးသားအဆင့် နိုင်ငံရေးဆွေးနွေးပွဲများ ကျယ်ပြန့်စွာ မလုပ်ထားနိုင်သေးခြင်း၊ ညီလာခံတွင် သဘောတူညီချက်များ ရယူသည့်အခါ နိုင်ငံရေးဆွေးနွေးမှုဆိုင်ရာ မူဘောင်အတိုင်း ဆောင်ရွက်ခဲ့ခြင်းမျိုးမဟုတ်ဘဲ ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC) က ဆုံးဖြတ်ချက်နှင့် ဆောင်ရွက်ခဲ့သည့်အတွက် အစိုးရနှင့် တိုင်းရင်းသားလက်နက်အဖွဲ့ အချို့ကြားတွင် နားလည်မှုလွဲခဲ့သည့် အခြေအနေရှိခဲ့သည်။

အမျိုးသားအဆင့် နိုင်ငံရေးဆွေးနွေးပွဲများ ကျယ်ကျယ်ပြန့်ပြန့် ဆောင်ရွက်နိုင်ခြင်း မရှိသေးချိန်၊ NCA ရေးထိုးရန် တိုင်းရင်းသားလက်နက်ကိုင်အဖွဲ့များ ကျန်ရှိသေးချိန် ၂၁ ရာစု ပင်လုံအစည်းအဝေးမှ ပြည်ထောင်စုသဘောတူညီချက်များ ချမှတ်ခြင်းသည် ၂၀၀၈ ဖွဲ့စည်းပုံ အခြေခံဥပဒေ ရေးဆွဲသကဲ့သို့ ဖြစ်နေကြောင်းလည်း ဝေဖန်မှုများရှိနေသည်။

ထိုသို့ဝေဖန်မှုများအပေါ် NCA ရေးထိုးထားသည့် ပအိုဝ်းအမျိုးသားလွတ်မြောက်ရေး အဖွဲ့ချုပ် (PNLO) ဥက္ကဋ္ဌ ခွန်မြင့်ထွန်းက ဘ၀ဖြတ်သန်းမှုများ၊ အခြေအနေများ မတူကြသည့်အခါ စဉ်းစားမှုများသည် ကွာနိုင်သဖြင့် အမြင်အယူအဆများအပေါ် မည်သည့်ဘက်က မှန်သည်ကို မှတ်ချက်ပြုရန်မရှိကြောင်း၊ သို့ရာတွင် ဖြတ်သန်းခဲ့သည့် အတွေ့အကြုံများအရ ပြည်ထောင်စုငြိမ်းချမ်းရေးညီလာခံတွင် အခြေခံမူများ ရရှိခဲ့ခြင်းသည် ၂၀၀၈ ဖွဲ့စည်းပုံ အခြေခံဥပဒေကို ရေးဆွဲခဲ့သည့်ဖြစ်စဉ်များ၊ လုပ်ငန်းစဉ်များနှင့် မတူညီကြောင်း၊ အလားတူ ညောင်နှစ်ပင်ညီလာခံအား ကျင်းပခဲ့သည့်ဖြစ်စဉ်များ၊ လုပ်ငန်းစဉ်များနှင့် မတူညီကြောင်း၊ အမျိုးသားညီလာခံအား ထိုစဉ်အချိန်က တပ်မတော်အစိုးရက ဦးဆောင် ခေါ်ယူကျင်းပခဲ့ခြင်းဖြစ်ကြောင်း၊ ယခုကျင်းပသည့် ၂၁ ရာစု ပင်လုံညီလာခံမှာမူ တစ်စုတစ်ဖွဲ့တည်းက ခေါ်ယူကျင်းခြင်းမဟုတ်ဘဲ NCA သဘောတူညီချက်အရ အစုအဖွဲ့အားလုံး ပူးတွဲကျင်းပခြင်းဖြစ်ကြောင်း ပြောကြားသည်။

မြန်မာနိုင်ငံတွင် နှစ်ပေါင်းရှည်ကြာစွာ ဖြစ်ပွားနေသည့် နိုင်ငံရေးပြဿနာအရင်းခံ ပြည်တွင်းစစ်ပဋိပက္ခကို ဖြေရှင်းရန်အတွက် NCA စာချုပ်သည် အစိုးရနှင့်တိုင်းရင်းသားလက်နက်ကိုင် တော်လှန်ရေးအဖွဲ့အစည်းများကြားရရှိသည့် အမြင့်ဆုံး စာချုပ်တစ်ခုအဖြစ် NCA ရေးထိုးထားသည့် တိုင်းရင်းသားလက်နက်ကိုင်များဘက်က ယူဆထားပြီး နှစ်ပေါင်း ၆၀ ကျော် ပြည်တွင်းစစ်ပဋိပက္ခအတွင်း ၂၁ ရာစုပင်လုံညီလာခံမှ ရလဒ်စတင်ထွက်ပေါ်လာခြင်းသည် ဖက်ဒရယ်ပြည်ထောင်စု တည်ဆောက်ရန် ပထမဆုံး ထွက်ပေါ်လာသည့် အခြေခံမူများလည်းဖြစ်သည်။

ပြည်ထောင်စုငြိမ်းချမ်းရေးညီလာခံအား တစ်နှစ်လျှင် အနည်းဆုံးနှစ်ကြိမ်ကျင်း ပရန်ဆုံးဖြတ်ထားသဖြင့် ထပ်မံကျင်းပမည့် တတိယအကြိမ် အစည်းအဝေးအား ဒီဇင်ဘာလအတွင်း ကျင်းပရန် အစိုးရဘက်က ဆန္ဒရှိသော်လည်း အမျိုးသားအဆင့် နိုင်ငံရေးဆွေးနွေးပွဲများ ထပ်မံမကျင်းပနိုင်မှု အပါအ၀င် အဆင်သင့်မဖြစ်သေးဟု တိုင်းရင်းသားလက်နက်ကိုင်အဖွဲ့များဘက်က ယူဆကာ ၂၀၁၈ ခုနှစ် နှစ်ဆန်းတွင် ကျင်းပရန် အဆိုပြုခဲ့ပြီး နိုဝင်ဘာ ၂၇ ရက်က ပြုလုပ်သည့် ခြောက်ကြိမ်မြောက် JICM တွင်လည်း ၂၁ ရာစု တတိယ အစည်းအဝေးအား လာမည့်ဇန်န၀ါရီလကုန်ပိုင်းတွင် ကျင်းပရန် ဆုံးဖြတ်ခဲ့သည်။

လွှတ်တော်၏ ကောင်းမွန်သည့် ဆောင်ရွက်မှုဖြစ်စေသော မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေ ပြင်ဆင်ရေး ကြိုးပမ်းမှု

မူးယစ်ဆေးဝါး သုံးစွဲသူအား ထောင်ဒဏ်အစား လူမှုအကျိုးပြု လုပ်ငန်းဆောင်ရွက်ခြင်း ပြစ်ဒဏ်ဖြင့် ထည့်သွင်းပြင်ဆင်ထားသည့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေကို ပြင်ဆင်သည့် ဥပဒေကြမ်းကို ၂၀၁၇ ခုနှစ်အတွင်း လွှတ်တော်သို့ တင်သွင်းလာသည့်အတွက် ယခုနှစ်၏ ထင်ရှားကျော်ကြားဖြစ်ရပ်တစ်ခုအဖြစ် ဖော်ပြအပ်ပါသည်။

အဆိုပါ ဥပဒေကြမ်းကို ပြည်ထဲရေးဝန်ကြီးဌာန ဒုတိယ၀န်ကြီး ဗိုလ်ချုပ်အောင်စိုးက ဇူလိုင် ၂၇ ရက်တွင် အမျိုးသားလွှတ်တော်၌ တင်သွင်းခဲ့သည်။

၁၉၉၃ ခုနှစ် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေကို ၁၉၉၃ ခုနှစ် ဇန်န၀ါရီ ၂၇ ရက်တွင် ပြဋ္ဌာန်းခဲ့ပြီး အခန်း (၉) ခန်း ပုဒ်မ ၃၁ ခုပါရှိကြောင်း သိရသည်။

မူးယစ်ဥပဒေကို ပြဋ္ဌာန်းကျင့်သုံးခဲ့သည်မှာ နှစ်ပေါင်း ၂၀ ကျော် ကြာမြင့်ခဲ့ပြီးဖြစ်သည့်အတွက် ခေတ်စနစ်နှင့် လိုက်လျောညီထွေ ဖြစ်စေရေးအတွက် ပြင်ဆင်နိုင်ရန် ၂၀၁၄ ခုနှစ်မှ စတင်၍ အလုပ်ရုံ ဆွေးနွေးပွဲများ၊ အစည်းအဝေးများ၊ သက်ဆိုင်ရာ ၀န်ကြီးဌာနများ၏ အကြံပြုချက် သဘောထား မှတ်ချက်များ ရယူကာ ဆောင်ရွက်ခဲ့ပြီး ၂၀၁၅ ခုနှစ် ဒီဇင်ဘာလအတွင်း ဥပဒေကြမ်းကို ပထမအကြိမ် ပြည်ထောင်စုလွှတ်တော်သို့ ဆက်လက် တင်ပြခဲ့ကြောင်း သိရသည်။

ပထမအကြိမ် ပြည်ထောင်စုလွှတ်တော်မှာ လွှတ်တော်သက်တမ်းအတွင်း အချိန်လုံလောက်မှု မရှိသည့်အတွက်ကြောင့် ဆက်လက် ဆောင်ရွက်နိုင်ခြင်းမရှိသည့်အတွက် ပြည်ထောင်စုအစိုးရအဖွဲ့သို့ ပြန်လည်ပေးပို့ခဲ့ကြောင်း သိရသည်။

ဆက်လက်၍ ၎င်းဥပဒေမူကြမ်းကို လက်ရှိအစိုးရ၏ မူဝါဒများနှင့် ကိုက်ညီမှုရှိစေရေးအတွက် ၂၀၁၆ ခုနှစ် မေလအတွင်းမှစ၍ ပြန်လည်စိစစ်ခဲ့ရာ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ အန္တရာယ်တားဆီး ကာကွယ်ရေးဗဟိုအဖွဲ့နှင့် ဆက်စပ်ဝန်ကြီးဌာနရှစ်ခု၊ လုပ်ငန်းအဖွဲ့ ၁၀ ခု၊ တိုင်းဒေသကြီး၊ ပြည်နယ်မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ အန္တရာယ်တားဆီး ကာကွယ်ရေးအဖွဲ့များနှင့် ပြည်တွင်း၊ ပြည်ပရှိ အစိုးရမဟုတ်သော အဖွဲ့အစည်းများထံမှ ပြင်ဆင်ဖြည့်စွက် အကြံပြုချက်များ တောင်းခံ ဆောင်ရွက်ခဲ့ကြောင်း ဒုဝန်ကြီး ဗိုလ်ချုပ်အောင်စိုးက ပြောကြားသည်။

“လက်ရှိမူးယစ်ဥပဒေကို ပုဒ်မခုနစ်ခု ထပ်မံတင်သွင်းခြင်း၊ ပုဒ်မခွဲ (၁၉)ခု ပြင်ဆင်ခြင်း၊ ပုဒ်မခွဲ ၂၀ ဖြည့်စွက်ခြင်း၊ ပုဒ်မတစ်ခုနှင့် ပုဒ်မခွဲလေးခု ပယ်ဖျက်ခြင်းများ ဆောင်ရွက်ထားရှိပါတယ်။ ဥပဒေကို အဓိကပြင်ဆင်ခဲ့တဲ့ အချက်များ အနေနဲ့ကတော့ ပထမအချက် အနေနဲ့ မူးယစ်ဆေးဝါး သုံးစွဲသူများနှင့် ပတ်သက်၍ လက်ရှိဥပဒေပုဒ်မ ကိုးခုမှာ ပုဒ်မခွဲသုံးခုမှာပါရှိတဲ့ မှတ်ပုံတင်၍ဆိုသော စကားရပ်ကို ပယ်ဖျက်ပြီး ပုဒ်မခွဲခြောက်ခုကို ထပ်မံဖြည့်စွက်ထားရှိပါတယ်။ ဒုတိယအချက်အနေနဲ့ ပုဒ်မ (၁၀) မှတ်ပုံတင်ခြင်းကို ပယ်ဖျက်တဲ့ ပုဒ်မ မလိုအပ်တော့တဲ့အတွက် ပယ်ဖျက်ထားရှိကြောင်း တင်ပြအပ်ပါတယ်။ တတိယအချက်မှာ ဆက်သွယ်ရေးလုပ်ငန်းများမှ မှတ်တမ်းများ ကြည့်ရှုခွင့်၊ မိတ္တူကူးခွင့်အတွက် ပုဒ်မ ၁၃ (င)၊ ၁၄ (က) နဲ့ ၁၇ (က) တို့ကို ဖြည့်စွက်ထားရှိကြောင်း တင်ပြအပ်ပါတယ်။ စတုတ္ထအချက် အနေနဲ့ကတော့ ပုဒ်မ ၁၅ မှာ မူးယစ်ဆေးဝါးသုံးစွဲများနဲ့ ပတ်သက်တဲ့ ပြစ်ဒဏ်ပြင်ဆင်ထားရှိကြောင်း တင်ပြအပ်ပါတယ်။ ပဉ္စမအချက်မှာ ပုဒ်မ ၂၄ (က) နဲ့ (ခ)တို့မှာ မူးယစ်ဆေးဝါးများ စီမံခန့်ခွဲရန်နဲ့ သက်သေခံပစ္စည်းများ လွှဲပြောင်းပေးအပ်နိုင်ရေး အစားထိုး ပြင်ဆင်ထား ရှိပါတယ်” ဟု ဒုတိယ၀န်ကြီး ဗိုလ်ချုပ်အောင်စိုးက ပြောကြားသည်။

ထို့နောက် ယင်းဥပဒေကြမ်းနှင့် ပတ်သက်၍ အမျိုးသားလွှတ်တော်ဥပဒေကြမ်း ကော်မတီကလည်း လေ့လာတွေ့ရှိချက် အစီရင်ခံစာကို တင်သွင်းခဲ့သည်။

အဆိုပါ ဥပဒေကြမ်းတွင် မူရင်းဥပဒေပုဒ်မ ၉ ပုဒ်မခွဲ(က)ပါ ဆေးဝါးသုံးစွဲသူသည် ကျန်းမာရေးဝန်ကြီးဌာနက သတ်မှတ်သည့် ဌာန သို့မဟုတ် ဤကိစ္စအလို့ငှာ အစိုးရအသိအမှတ်ပြုထားသည့် ဆေးကုဂေဟာတွင် ဆေးကုသမှု ခံယူရန် မှတ်ပုံတင်ရမည်ဟူသည့် စကားရပ်အစား ဆေးသုံးစွဲသူသည် ကျန်းမာရေးနှင့် အားကစားဝန်ကြီးဌာနက သတ်မှတ်သည့် ဌာန သို့မဟုတ် ဤကိစ္စအလို့ငှာ အစိုးရအသိအမှတ်ပြု ဆေးကုသဌာနတွင် ဆေးကုသမှု ခံယူရမည်ဟု ပြင်ဆင်ရန် ဖော်ပြထားသည်။

ထို့အတူ ပုဒ်မ ၉ ပုဒ်မခွဲ (ခ) ကို ဆေးဝါးသုံးစွဲသူအား ဆေးကုသပေးရေးနှင့် ဆေးကုသမှု ပြီးဆုံးပါက သက်ဆိုင်ရာ ပြုစုပျိုးထောင်ရေး စခန်း သို့မဟုတ် ပြန်လည်ထူထောင်ရေး စခန်းသို့ လွှဲပြောင်းပေးပို့ရန်အတွက် ကျန်းမာရေးနှင့် အားကစားဝန်ကြီးဌာနသည် လိုအပ်သော အစီအစဉ်များအား ချမှတ်ဆောင်ရွက်ရမည်ဟု ပြင်ဆင်ရန်လည်း အမျိုးသားလွှတ်တော် ဥပဒေကြမ်းကော်မတီက အစီရင်ခံစာ တင်သွင်းခဲ့သည်။

ထို့ပြင် အဆိုပါ ဥပဒေကြမ်းတွင် မူရင်းဥပဒေ၏ ပုဒ်မ ၉၊ ပုဒ်မခွဲ (ဂ) ၏ နောက်တွင် ပုဒ်မခွဲ(ဃ)အဖြစ် ရဲတပ်ဖွဲ့ဝင်သည် ဆေးဝါးသုံးစွဲကြောင်း သံသယရှိသူအား ပဏာမ ဆေးစစ်ချက်ခံယူရန် သို့မဟုတ် ဆေးကုသမှုခံယူနိုင်ရန် ကျန်းမာရေးနှင့် အားကစားဝန်ကြီးဌာနက သတ်မှတ်သည့်ဌာန သို့မဟုတ် အစိုးရက ဤကိစ္စအလို့ငှာ အသိအမှတ်ပြုထားသည့် အနီးဆုံးဆေးကုသဌာနသို့ ပို့အပ်နိုင်သည်ဟု လည်းကောင်း၊ ပုဒ်မခွဲ(င)အဖြစ် သက်ဆိုင်ရာ ရဲအရာရှိသည် ပုဒ်မခွဲ(ဃ)ပါ ပြဋ္ဌာန်းချက်ကို လိုက်နာရန် ပျက်ကွက်သူအား စိစစ်ပြီး လိုအပ်ပါက ခံဝန်ချုပ်ချုပ်ဆိုစေသည့် အမိန့်ချမှတ်နိုင်ရန် သက်ဆိုင်ရာတရားရုံးသို့ လျှောက်ထားရမည်ဟုလည်းကောင်း၊ ပုဒ်မခွဲ (စ)အဖြစ် တရားရုံးသည် ပုဒ်မခွဲ(င)အရ လျှောက်ထားခြင်းခံရသူအား ဆေးစစ်ချက် ခံယူနိုင်ရေးနှင့် ဆေးကုသမှု ခံယူနိုင်စေရေးအတွက် သတ်မှတ်ချက်များနှင့်အညီ ခံဝန်ချုပ်ချုပ်ဆိုစေသည့် အမိန့်ချမှတ်နိုင်သည်ဟုလည်းကောင်း၊ ပုဒ်မခွဲ(ဆ)အဖြစ် ဆေးဝါးသုံးစွဲသူသည် ပုဒ်မခွဲ (စ) အရ တရားရုံးမှ ချမှတ်သော အမိန့်နှင့်အညီ ခံဝန်ချုပ် ချုပ်ဆိုခြင်းမပြုလျှင် ဖြစ်စေ၊ ချမှတ်သော ခံဝန်ချက်ပါ စည်းကမ်းချက်တစ်ရပ်ရပ်ကို ဖောက်ဖျက်လျှင်ဖြစ်စေ ဆေးကုသမှုခံရေးနှင့် ပြုစုပျိုးထောင်ရေးတို့အတွက် ဤကိစ္စအလို့ငှာ ဖွင့်လှစ်ထားသော သက်ဆိုင်ရာ ပြုစုပျိုးထောင်ရေးဌာန သို့မဟုတ် ပြန်လည်ထူထောင်ရေးစခန်းသို့ အနည်းဆုံးသုံးလမှ အများဆုံးငါးလအထိ ပို့အပ်ခြင်းခံရမည်ဟုလည်းကောင်း၊ ပုဒ်မခွဲ(ဇ) အဖြစ် ကျန်းမာရေးနှင့် အားကစားဝန်ကြီးဌာနသည် ပုဒ်မခွဲ(ဆ)အရ သက်ဆိုင်ရာ ပြုစုပျိုးထောင်ရေးဌာန(သို့) ပြန်လည်ထူထောင်ရေး စခန်းသို့ ပိုအပ်ခြင်းခံရသည့် ဆေးဝါးသုံးစွဲသူအား တာဝန်ယူ ကုသပေးရမည်ဟု လည်းကောင်း ပြင်ဆင်ရန် ထည့်သွင်းဖော်ပြထားသည်။

မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေ ပုဒ်မ ၁၅ ပါ ဆေးဝါးသုံးစွဲသူသည် ကျန်းမာရေးဝန်ကြီးဌာနက သတ်မှတ်သည့်ဌာန သို့မဟုတ် ဤကိစ္စအလို့ငှာ အစိုးရက အသိအမှတ်ပြုထားသည့် ဆေးကုဂေဟာတွင် မှတ်ပုံတင်ရန် ပျက်ကွက်လျှင်ဖြစ်စေ၊ ဆေးကုသရေးအတွက် ကျန်းမာရေးဝန်ကြီးဌာနက ထုတ်ပြန်ထားသော ညွှန်ကြားချက်များကို လိုက်နာရန် ပျက်ကွက်လျှင်ဖြစ်စေ ထောင်ဒဏ်အနည်းဆုံး သုံးနှစ်မှ အများဆုံးငါးနှစ်အထိ ချမှတ်ခြင်းခံရမည်ဟု ဖော်ပြထားသည်။

ယင်းပုဒ်မနှင့်ပတ်သက်၍ ပြင်ဆင်သည့် ဥပဒေကြမ်းတွင် ဆေးဝါးသုံးစွဲသူသည် ပုဒ်မ ၉ ပုဒ်မခွဲ(ဆ)အရ ဤကိစ္စအလို့ငှာ ဖွင့်လှစ်ထားသော ပြုစုပျိုးထောင်ရေးဌာန သို့မဟုတ် ပြန်လည်ထူထောင်ရေးစခန်းသို့ ပို့အပ်ထားသည့် ကာလအတွင်း သက်ဆိုင်ရာ ပြုစုပျိုးထောင်ရေးဌာန သို့မဟုတ် ပြန်လည် ထူထောင်ရေးစခန်းက ထုတ်ပြန်ထားသော ညွှန်ကြားချက်နှင့် သတ်မှတ်ထားသည့် စည်းကမ်းချက်များကို ဖောက်ဖျက်ကြောင်း ပြစ်မှုထင်ရှား စီရင်ခြင်းခံရလျှင် (က) ထိုသူသည် အသက် ၁၆ နှစ်ပြည့်ပြီးသူဖြစ်ပါက လူမှုရေး လုပ်ငန်းတစ်ရက် နှစ်နာရီဖြင့် အနည်းဆုံးနာရီ ၁၈၀ မှ အများဆုံး နာရီ ၂၄၀ အထိ ချမှတ်ရမည်။ (ခ) အသက် ၁၆ နှစ် မပြည့်သေးသူဖြစ်ပါက လူမှုဝန်ထမ်းဦးစီးဌာန၊ လူငယ်ပြုပြင် ထိန်းသိမ်းရေးစခန်းသို့ ပို့အပ်ရမည်ဟု ပြင်ဆင်ရန် ဖော်ပြထားသည်။

အမျိုးသားလွှတ်တော် ဥပဒေကြမ်း ကော်မတီကမူ ဆေးဝါးသုံးစွဲသူသည် ပုဒ်မ ၉ ပုဒ်မခွဲ(ဆ)အရ ဤကိစ္စအလို့ငှာ ဖွင့်လှစ်ထားသော ပြုစုပျိုးထောင်ရေးဌာန သို့မဟုတ် ပြန်လည်ထူထောင်ရေးစခန်းသို့ ပို့အပ်ထားသည့် ကာလအတွင်း သက်ဆိုင်ရာ ပြုစုပျိုးထောင်ရေးဌာန သို့မဟုတ် ပြန်လည်ထူထောင်ရေး စခန်းက ထုတ်ပြန်ထားသော ညွှန်ကြားချက်နှင့် သတ်မှတ်ထားသည့် စည်းကမ်းချက်များကို ဖောက်ဖျက်ကြောင်း ပြစ်မှုထင်ရှားစီရင်ခြင်းခံရလျှင် လူမှုအကျိုးပြု လုပ်ငန်းများဖြစ်သည့် သစ်ပင်ပန်းမန်စိုက်ပျိုးခြင်း၊ သန့်ရှင်းရေးလုပ်ငန်းများ ဆောင်ရွက်ခြင်း၊ လမ်းတံတားများ ပြုပြင်ခြင်း၊ လူမှုရေးအဖွဲ့များနှင့် ပူးပေါင်း၍ အကျိုးပြုလုပ်ငန်းများ ဆောင်ရွက်ခြင်းစသည့် လုပ်ငန်းများကို ကြီးကြပ်သူရှေ့မှောက်၌ နှိမ့်ချခြင်း၊ ခွဲခြားဆက်ဆံခြင်း သဘောမသက်ရောက်သည့် သတ်မှတ်ထားသောဝတ်စုံကို ၀တ်ဆင်လျက်တစ်ရက် နှစ်နာရီဖြင့် အနည်းဆုံးနာရီ ၁၈၀ မှ အများဆုံးနာရီ ၂၄၀ အထိ ကိုယ်တိုင်လုပ်အားဖြင့် အခမဲ့ လုပ်ကိုင် ဆောင်ရွက်ရမည်ဟု ပြင်ဆင်ရန် အစီရင်ခံစာတွင် ထည့်သွင်းတင်သွင်းခဲ့သည်။

အမျိုးသားလွှတ်တော်၌ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေကို ပြင်ဆင်သည့် ဥပဒေကြမ်းနှင့်ပတ်သက်၍ ဆွေးနွေးရာတွင် ရန်ကုန်တိုင်းဒေသကြီး မဲဆန္ဒနယ်အမှတ်(၂)မှ ဦးဌေးဦးက “ပုဒ်မ ၁၅ တွင် ပထမအကြိမ်ဆိုပြီး ဖြည့်စွက်ချင်ပါတယ်။ လူမှုရေး ပြစ်ဒဏ်ချမှတ်ခြင်းဟာ တကယ်တမ်းကျတော့ ကမ္ဘာယှဉ်ပြီး ကျွန်တော်တို့ နိုင်ငံသားတွေရဲ့ ယဉ်ကျေးမှု အဆင့်ကို မြှင့်တင်ခြင်းသာ ဖြစ်တယ်လို့ ကျွန်တော်က မှတ်ယူပါတယ်။ ဒါ့ကြောင့် ပုဒ်မ ၁၅ ကို လက်ခံပါတယ်။ သို့သော်လည်း အကြိမ်ကြိမ် ထပ်ပြီးတော့ ကျူးလွန်နေမယ် ဆိုရင်တော့ ဒါဟာ ပတ်ဝန်းကျင်ကိုရော၊ မိသားစုကိုရော ထိခိုက်လာနိုင်တဲ့အတွက် ဒုတိယအကြိမ် ဖောက်ဖျက်လို့ရှိရင် မူလချမှတ်တဲ့ ပြစ်ဒဏ်ရဲ့ နှစ်ဆကိုလည်းကောင်း၊ တတိယအကြိမ်နဲ့အထက် ကျူးလွန်သူများ အပေါ်မှာ ထောင်ဒဏ်အနည်းဆုံး တစ်နှစ်မှ အများဆုံး သုံးနှစ်အထိ ချမှတ်ရမယ်လို့ ကျွန်တော်တော့ ဖြည့်စွက်ချင်ပါတယ်” ဟု ဆွေးနွေး တင်ပြခဲ့သည်။

ထို့ပြင် တပ်မတော်သား အမျိုးသားလွှတ်တော်ကိုယ်စားလှယ် ဗိုလ်မှူးကိုကိုနိုင်က “မူးယစ်ဆေးဝါးနဲ့ စိတ်ကိုပြောင်းလဲစေသော ဆေးဝါးများဆိုင်ရာ ဥပဒေကို ပြင်ဆင်ဆောင်ရွက်ခြင်းဟာ လက်ရှိဆောင်ရွက်နေတဲ့ လုပ်ငန်းစဉ်တွေနဲ့ ကွဲလွဲမှုရှိနိုင်ပါတယ်။ သက်ဆိုင်ရာဝန်ကြီးဌာနအလိုက် အခြေခံ လိုအပ်ချက်တွေဖြစ်တဲ့ အဆောက်အအုံ၊ အထောက်အကူပြု ကိရိယာ၊ ကျွမ်းကျင်ဝန်ထမ်း၊ ဘဏ္ဍာငွေ လိုအပ်ချက်တွေ အဆင်သင့်မဖြစ်သေးတဲ့အတွက် ဤဥပဒေ အတည်ဖြစ်သွားပါက သက်ဆိုင်ရာဝန်ကြီးဌာန အနေနဲ့ လိုက်ပါ ဆောင်ရွက်ဖို့ အခက်အခဲတွေ ရှိလာနိုင်ပါတယ်။ အခြေခံ လိုအပ်ချက်တွေကို စီမံချမှတ် အကောင်အထည်ဖော်ပြီးမှသာ ပြင်ဆင်ရန်နဲ့ လတ်တလော ပြင်ဆင်ပြဋ္ဌာန်းဖို့ မသင့်သေးပါဘူး” ဟု ဆွေးနွေးတင်ပြခဲ့သည်။

ထို့နောက် အမျိုးသားလွှတ်တော်က မူးယစ်ဆေးဝါးသုံးစွဲသူများအား လူမှုရေး အကျိုးပြုလုပ်ငန်းများအား တစ်ရက် နှစ်နာရီဖြင့် အနည်းဆုံးနာရီ ၂၄၀ မှ အများဆုံးနာရီ ၃၆၀ အထိ ဆောင်ရွက်ရမည့် အချက်များအပါအ၀င် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေကို ပြင်ဆင်သည့် ဥပဒေကြမ်းအား သြဂုတ် ၁၆ ရက်တွင် အတည်ပြုခဲ့သည်။

အမျိုးသားလွှတ်တော် ဥပဒေကြမ်း ကော်မတီဥက္ကဋ္ဌ ဦးဇော်မင်းက “ဒီမူးယစ်ဥပဒေကို ပြင်ဆင်တာကတော့ နိုင်ငံတကာမှာလည်း ဒီလိုပြစ်ဒဏ်တွေပေးတယ်။ အရင်က ဆေးပြားတစ်ပြားမိလည်း ဒီပြစ်ဒဏ်ပဲ။ အများကြီးမိလည်း ဒီပြစ်ဒဏ်ပဲ ဖြစ်နေတယ်။ ဒါကြောင့် ပြင်ဆင်ရခြင်း ဖြစ်ပါတယ်။ ပြည်ထဲရေးဝန်ကြီးဌာနကလည်း ပြင်သင့်တဲ့အတွက် အဆိုတင်လာခြင်း ဖြစ်ပါတယ်။ အခုလို ပြင်ဆင်တာကို သဘောမတူသူတွေလည်း ရှိပါတယ်။ ဆေးသုံးစွဲသူတွေ များလာမယ် စသဖြင့်ပေါ့။ ဥပဒေဆိုတာကတော့ တစ်ခါတည်း ပြင်လို့မပြီးပါဘူး။ အသုံးပြုနေရင်းနဲ့ လိုအပ်တာတွေ တွေ့လာရင်လည်း ပြင်ဆင်ရမှာပါ” ဟု မှတ်ချက်ပြုထားသည်။

ဥပဒေကြမ်း၏ အခန်း ၇ လူမှုအကျိုးပြု လုပ်ငန်းဆောင်ရွက်စေခြင်း အခန်းတွင် ဆေးဝါးသုံးစွဲသူသည် ပုဒ်မ ၉ ပုဒ်မခွဲ(ဆ)အရ ဤကိစ္စအလို့ငှာ ဖွင့်လှစ်ထားသော ပြုစုပျိုးထောင်ရေးစခန်း သို့မဟုတ် ပြန်လည်ထူထောင်ရေးစခန်း ပို့အပ်ထားသည့် ကာလအတွင်း သက်ဆိုင်ရာ ပြုစုပျိုးထောင်ရေးစခန်း သို့မဟုတ် ပြန်လည်ထူထောင်ရေးစခန်းက ထုတ်ပြန်ထားသော ညွှန်ကြားချက်နှင့် သတ်မှတ်ထားသည့် စည်းကမ်းချက်များကို ဖောက်ဖျက်ကြောင်း ပြစ်မှုထင်ရှား စီရင်ခြင်းခံရလျှင် လူမှုအကျိုးပြု လုပ်ငန်းများဖြစ်သည့် သစ်ပင်ပန်းမန်စိုက်ပျိုးခြင်း၊ သန့်ရှင်းရေးလုပ်ငန်းများ ဆောင်ရွက်ခြင်း၊ လမ်းတံတားများ ပြုပြင်ခြင်း၊ လူမှုရေး အဖွဲ့အစည်းများနှင့် ပူးပေါင်း၍ အကျိုးပြုလုပ်ငန်းများ ဆောင်ရွက်ခြင်း စသည့် လုပ်ငန်းများကို ကြီးကြပ်သူရှေ့မှောက်၌ နှိမ့်ချခြင်း၊ ခွဲခြားဆက်ဆံခြင်း သဘောမသက်ရောက်သည့် သတ်မှတ်ထားသော ၀တ်စုံကို ၀တ်ဆင်လျက် တစ်ရက် နှစ်နာရီဖြင့် အနည်းဆုံး နာရီ ၂၄၀ မှ အများဆုံးနာရီ ၃၆၀ အထိ ကိုယ်တိုင်လုပ်အားဖြင့် အခမဲ့လုပ်ကိုင် ဆောင်ရွက်ရမည်ဟု အမျိုးသားလွှတ်တော်က အတည်ပြုခဲ့သည်။

ဥပဒေကြမ်း၏ ပုဒ်မ ၉ (က) ဆေးဝါးသုံးစွဲသူသည် ကျန်းမာရေးနှင့် အားကစားဝန်ကြီး ဌာနက သတ်မှတ်ထားသည့် ဌာန၊ ဂေဟာ သို့မဟုတ် ဤကိစ္စအလို့ငှာ အစိုးရအသိအမှတ်ပြု ဆေးကုသဌာန၊ ဂေဟာတွင် ဆေးကုသမှုခံယူ၍ မှတ်ပုံတင်ရမည်။ (ခ)မှတ်ပုံတင်ထားသော ဆေးဝါးသုံးစွဲသူအား ဆေးကုသပေးရေးနှင့် ဆေးကုသမှု ပြီးဆုံးပါက သက်ဆိုင်ရာ ပြုစုပျိုးထောင်ရေးစခန်းသို့ လွှဲပြောင်းပေးပို့ရန်အတွက် ကျန်းမာရေးနှင့် အားကစားဝန်ကြီးဌာနသည် လိုအပ်သော အစီအစဉ်များ ချမှတ်ဆောင်ရွက်ရမည်ဟု အမျိုးသားလွှတ်တော်က အတည်ပြုခဲ့သည်။

ထို့နောက် အမျိုးသားလွှတ်တော်က အတည်ပြုခဲ့သည့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေကို ပြင်ဆင်သည့် ဥပဒေကြမ်းကို ပြည်သူ့လွှတ်တော်သို့ ပေးပို့ခဲ့သည်။

ဥပဒေကြမ်းနှင့်ပတ်သက်၍ ပြည်သူ့လွှတ်တော် ဥပဒေကြမ်းကော်မတီက ပြည်ထဲရေးဝန်ကြီးဌာန အနေဖြင့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေကို ပြင်ဆင်သည့် ဥပဒေကြမ်းကို လက်ရှိနိုင်ငံတကာတွင် မူးယစ်ဆေးဝါး သုံးစွဲသူများအား ပြစ်မှုကြောင်းအရ အရေးယူသကဲ့သို့ အရေးယူခြင်း မပြုတော့ဘဲ ကျန်းမာရေးဆိုင်ရာ ပြဿနာခံစားနေရသူများအဖြစ် ရှုမြင်၍ ဆေးကုသမှုပေးခြင်းနှင့် ပြန်လည်ထူထောင်ပေးခြင်း၊ မူးယစ်ဆေးဝါး သုံးစွဲမှုကြောင့် နောက်ဆက်တွဲ ဖြစ်ပေါ်နေသည့် သွေးမှတစ်ဆင့် ကူးစက်သော ရောဂါအန္တရာယ်မှ လျှော့ချရေးလုပ်ငန်းများ ဆောင်ရွက်နိုင်ရေး အစီအမံများ ထည့်သွင်းရန် လိုအပ်ခြင်း၊ ဥပဒေပါအချို့သော ပြဋ္ဌာန်းချက်များသည် ခေတ်စနစ်နှင့် လိုက်လျောညီထွေမှု မရှိသောကြောင့် ပြင်ဆင်ရန် လိုအပ်ခြင်း၊ မူးယစ်ဗဟိုအဖွဲ့သည် ရန်ပုံငွေ ထူထောင်နိုင်ရန်နှင့် ဆုချီးမြှင့်နိုင်ရန် လိုအပ်ခြင်း၊ ကျန်းမာရေးရှုထောင့်နှင့် လူ့အခွင့်အရေးဆိုင်ရာ ရှုထောင့်တို့မှ ချင့်ချိန်၍ ပြင်ဆင်ရန် လိုအပ်ခြင်း ရည်ရွယ်ချက်များဖြင့် ပြင်ဆင်ရေးဆွဲလာခြင်းဖြစ်ကြောင့် စိစစ်လေ့လာ တွေ့ရှိရသည်ဟု လွှတ်တော်သို့ အစီရင်ခံစာ တင်သွင်းခဲ့သည်။

ပြည်သူ့လွှတ်တော်က ၎င်းဥပဒေကြမ်းနှင့် ပတ်သက်၍ အမျိုးသားလွှတ်တော်က ပြင်ဆင်အတည်ပြုချက်များအနက် ၃၂ ချက်ကို သဘောတူ အတည်ပြုခဲ့ပြီး ပြည်သူ့လွှတ်တော် ဥပဒေကြမ်းကော်မတီ၏ ပြင်ဆင်ရန် တင်ပြချက် ၂၆ ချက်ကို အတည်ပြုခဲ့ပြီး လွှတ်တော်နှစ်ရပ် သဘောကွဲလွဲခဲ့သည်။

ထို့ပြင် ပြည်သူ့လွှတ်တော်က ဥပဒေကြမ်း၏ ပုဒ်မ ၁၅ တွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေ ပုဒ်မ ၁၂ ကို အောက်ပါအတိုင်း အစားထိုးရမည် “၁၂။ ပြည်ထဲရေးဝန်ကြီးဌာနနှင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာနတို့သည် ပုဒ်မ ၁၅ အရ လူမှုအကျိုးပြု လုပ်ငန်းဆောင်ရွက်စေသော ဆေးဝါးသုံးစွဲသူအား လိုအပ်ပါက ပြန်လည်ထူထောင်ရေးစခန်းသို့ ပြန်လည်ပို့ဆောင်ပေးခြင်းကိုသော်လည်းကောင်း၊ အသက်မွေးဝမ်းကျောင်းပညာရပ်များ သင်ကြားပေးခြင်းကိုသော်လည်း သတ်မှတ်ချက်များနှင့်အညီ ဆောင်ရွက်ရမည်” ဟု ပြင်ဆင် အတည်ပြုခဲ့သည်။

ဆက်လက်၍ ဥပဒေကြမ်း၏ ပုဒ်မ ၉ ပုဒ်မခွဲ (ဃ) တွင် ရဲတပ်ဖွဲ့ဝင်သည် ဆေးဝါးသုံးစွဲကြောင်း သံသယရှိသူအား ပဏာမ ဆေးစစ်ချက်ခံယူရန်နှင့် ဆေးဝါးသုံးစွဲကြောင်း စစ်ဆေးတွေ့ရှိပါက ဆေးကုသမှု ခံယူနိုင်ရန် ကျန်းမာရေးနှင့် အားကစားဝန်ကြီးဌာနက သတ်မှတ်ထားသည့်ဌာန၊ ဂေဟာ သို့မဟုတ် အစိုးရက ဤကိစ္စအလို့ငှာ အသိအမှတ်ပြုထားသည့် အနီးဆုံးဆေးကုဌာန၊ ဂေဟာသို့ ဆောလျင်စွာ ပို့အပ်ရမည်။ ပုဒ်မခွဲ (င) သက်ဆိုင်ရာ ရဲအရာရှိသည် ပုဒ်မခွဲ (ဃ) ပါ ပြဋ္ဌာန်းချက်ကို လိုက်နာရန် ပျက်ကွက်သူအား စိစစ်ပြီး လိုအပ်ပါက ခံဝန်ချုပ်ချုပ်ဆိုစေသည့် အမိန့်ချမှတ်နိုင်ရန် သက်ဆိုင်ရာတရားရုံးသို့ လျှောက်ထားရမည်၊ ပုဒ်မခွဲ (စ) တရားရုံးသည် ပုဒ်မခွဲ (င) အရ လျှောက်ထားခြင်းခံရသူအား ဆေးစစ်ချက် ခံယူနိုင်ရေးနှင့် ဆေးကုသမှု ခံယူနိုင်စေရေးအတွက် သတ်မှတ်ချက်များနှင့်အညီ ခံဝန်ချုပ်ချုပ်ဆိုစေသည့် အမိန့်ချမှတ်နိုင်သည်ဟု ပြည်သူ့လွှတ်တော်က အတည်ပြုခဲ့သည်။

“ကျွန်တော်တို့ အဲဒီမှာက နှစ်ပိုင်းရှိတယ်ဗျ။ နဂိုတုန်းက မူးယစ်ဆေးဝါးသုံးစွဲသူတွေကို ဥပဒေပုဒ်မ ၁၆ နဲ့ အရေးယူ ဆောင်ရွက်တာရှိတယ်ပေါ့ဗျာ။ အခုဟာက ဒီမှာက မူးယစ်ဆေးဝါး သုံးစွဲတဲ့သူတွေကို တွေ့ရှိလို့ရှိရင် ဆေးကုသမှုဂေဟာ၊ ကျန်းမာရေးစောင့်ရှောက်မှုဂေဟာသို့ ပို့အပ်ရမယ်ပေါ့နော်။ ဒါပေမဲ့ ဆေးဝါးလက်ဝယ်ထားရှိတဲ့လူကတော့ နဂိုဥပဒေအတိုင်းပဲ အရေးယူ ဆောင်ရွက်မှာပေါ့။ ရောင်းဝယ်ဖောက်ကားတဲ့ကိစ္စ။ အဓိက,က သုံးစွဲသူတွေကို နယ်စပ်တွေမှာ နည်းနည်းများနေတယ်ပေါ့ဗျာ ပြောရရင်တော့။ သုံးစွဲတဲ့သူတွေကို ဆေးဝါးကုသမှု ခံယူနိုင်အောင်ပေါ့ ဒီဥပဒေကို ပြန်ပြင်တာပေါ့။ သုံးစွဲတဲ့သူတွေမှာ ဆေးကုသမှုဂေဟာတို့ ကျန်းမာရေးစောင့်ရှောက်မှုဂေဟာတို့ ခံယူနိုင်အောင် ဒီဥပဒေကို ပြင်ဆင်ခြင်း ဖြစ်ပါတယ်” ဟု ပြည်သူ့လွှတ်တော်ဥပဒေကြမ်းကော်မတီမှ အဖွဲ့ဝင် ဦးနေမျိုးထွန်းက ပြောကြားသည်။

လက်ရှိတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေကို ပြင်ဆင်သည့် ဥပဒေကြမ်းကို ပြည်သူ့လွှတ်တော်က အတည်ပြုခဲ့ပြီး အမျိုးသားလွှတ်တော်သို့ ပြန်လည်ပေးပို့ထားကြောင်း သိရသည်။

ဒုတိယအကြိမ် အမျိုးသားလွှတ်တော် သတ္တမပုံမှန်အစည်းအဝေး စတင်ချိန်တွင် ဥပဒေကြမ်း ၁၁ ခု၏ အစီရင်ခံစာများ တင်သွင်းနိုင်ရန် ဆောင်ရွက်ထားပြီးဖြစ်ကြောင်းနှင့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေကို ပြင်ဆင်သည့် ဥပဒေကြမ်းနှင့်ပတ်သက်၍ အစီရင်ခံစာ တင်သွင်းရန်ရှိကြောင်း အမျိုးသားလွှတ်တော်ဥပဒေကြမ်းကော်မတီမှ အတွင်းရေးမှူး ဒေါက်တာမြတ်ဥာဏစိုးက ပြောကြားထားသည်။

ဒုတိယအကြိမ် ပြည်ထောင်စုလွှတ်တော်၊ ပြည်သူ့လွှတ်တော်နှင့် အမျိုးသားလွှတ်တော် သတ္တမပုံမှန်အစည်းအဝေးများကို ၂၀၁၈ ခုနှစ် ဇန်န၀ါရီလအတွင်း စတင်ကျင်းပဖွယ်ရှိပြီး ၎င်းအစည်းအဝေးကာလအတွင်း မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေကို ပြင်ဆင်သည့် ဥပဒေကြမ်းကိုလည်း ဆက်လက်ဆွေးနွေး အတည်ပြုရန်ရှိကြောင်း သိရသည်။

လူငယ်များ ပြုစုပျိုးထောင်ရေးစခန်း သုံးခုဖြစ်သည့် ရွှေပြည်အေးလူငယ်များပြုစု ပျိုးထောင်ရေးစခန်း (ဖယ်ခုံ)၊ ရွှေပြည်သာ လူငယ်များပြုစုပျိုးထောင်ရေးစခန်း (၀က်ထီးကန်) နှင့် ရွှေပြည်သစ်လူငယ်များ ပြုစုပျိုးထောင်ရေးစခန်း (တီးမ) တို့အနက် ရွှေပြည်သစ်လူငယ်များ ပြုစုပျိုးထောင်ရေးစခန်း (တီးမ) သည် ၂၀၁၁ ခုနှစ် စက်တင်ဘာ ၂၄ ရက်မှစ၍ လုံခြုံရေး အခြေအနေအရ ပိတ်သိမ်းခဲ့ကြောင်း၊ ရွှေပြည်အေး လူငယ်များပြုစုပျိုးထောင်ရေးစခန်း (ဖယ်ခုံ) သည် ၁၉၈၃ ခုနှစ်မှ ၂၀၀၅ ခုနှစ်အထိ သင်တန်းအပတ်စဉ် ၂၈ ခု ဖွင့်လှစ်ခဲ့ကြောင်း မူးယစ်ဆေးစွဲလူနာ ၄၂၇ ဦးအား ဆေးဖြတ်ကုသပေးခဲ့ကြောင်း၊ ရွှေပြည်အေးလူငယ်များ ပြုစုပျိုးထောင်ရေးစခန်းတွင် ၂၀၀၅ ခုနှစ်နောက်ပိုင်း၌ သင်တန်းသားမရရှိသဖြင့် သင်တန်းများ မဖွင့်ဖြစ်သည်မှာ ယနေ့အထိဖြစ်ကြောင်း ပြည်ထဲရေးဝန်ကြီးဌာန ဒုတိယ၀န်ကြီးဗိုလ်ချုပ်အောင်စိုးက ၂၀၁၆ ခုနှစ် သြဂုတ်လအတွင်းက လွှတ်တော်၌ ရှင်းလင်းပြောကြားခဲ့သည်။

လက်ရှိတွင် အစိုးရက မူးယစ်ဆေးဖြတ် စခန်းများ တည်ဆောက်ရန်အတွက် စီစဉ် ဆောင်ရွက်လျက်ရှိကြောင်း သိရပြီး အဆိုပါဥပဒေကြမ်းကို ၂၀၁၈ ခုနှစ် ဇန်န၀ါရီတွင် ပြန်စမည့် လွှတ်တော်ပုံမှန်အစည်းအဝေး၌ ဆွေးနွေးအတည်ပြုဖွယ်ရှိသည်။

ချောင်းဆုံကပေးသော သင်ခန်းစာနှင့် ၂၀၁၇ ကြားဖြတ်ရွေးကောက်ပွဲ

၂၀၁၅ အထွေထွေရွေးကောက်ပွဲပြီးနောက် အမျိုးသားဒီမိုကရေစီအဖွဲ့ချုပ် (NLD) ပါတီ ဦးဆောင်သည့် အစိုးရလက်ထက်တွင် ကျင်းပခဲ့သည့် ၂၀၁၇ ကြားဖြတ်ရွေးကောက်ပွဲ လစ်လပ်မဲဆန္ဒနယ်များအနက် NLD ပါတီအနေဖြင့် တိုင်းဒေသကြီး မဲဆန္ဒနယ်များတွင် အနိုင်ရရှိခဲ့သော်လည်း တိုင်းရင်းသားဒေသများဖြစ်သည့် ပြည်နယ်မဲဆန္ဒနယ်အချို့မှာ ရှုံးနိမ့်ခဲ့သည့်အတွက် လာမည့် ၂၀၂၀ အထွေထွေရွေးကောက်ပွဲတွင် NLD ပါတီအား ပြည်နယ်မဲဆန္ဒနယ်များတွင် ကြိုတင်ပြင်ဆင်မှုများ ပြုလုပ်ရန် နှိုးဆော်လိုက်သည့် အခြေအနေဖြစ်သောကြောင့် ၂၀၁၇ ခုနှစ် ထင်ရှားကျော်ကြားဖြစ်ရပ်တစ်ခုအဖြစ် ဖော်ပြအပ်ပါသည်။

၂၀၁၇ ခုနှစ် ကြားဖြတ်ရွေးကောက်ပွဲတွင် လစ်လပ်မဲဆန္ဒနယ် ၁၉ နေရာအတွက် ၀င်ရောက်ယှဉ်ပြိုင်သည့် တစ်သီးပုဂ္ဂလ ကိုယ်စားလှယ်လောင်းခုနစ်ဦး အပါအ၀င် နိုင်ငံရေးပါတီ ၂၄ ခုမှ လွှတ်တော်ကိုယ်စားလှယ်လောင်း စုစုပေါင်း ၉၅ ဦး ၀င်ရောက်ယှဉ်ပြိုင်ရန် စာရင်းပေးခဲ့ပြီး မဲဆွယ်စည်းရုံးရေးကာလ၌ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက ပြည်နယ်လွှတ်တော်ကိုယ်စားလှယ်လောင်းတစ်ဦး ရုတ်တရက် ကွယ်လွန်ခဲ့သည့်အတွက် လွှတ်တော်ကိုယ်စားလှယ်လောင်း ၉၄ ဦး ၀င်ရောက်ယှဉ်ပြိုင်ခဲ့သည်။

ကြားဖြတ်ရွေးကောက်ပွဲ ကျင်းပခဲ့သည့် လစ်လပ်မဲဆန္ဒနယ်များမှာ ပြည်သူ့လွှတ်တော် လစ်လပ်မဲဆန္ဒနယ် ကိုးနေရာဖြစ်သည့် မုံရွာမဲဆန္ဒနယ်၊ ချောင်းဆုံမဲဆန္ဒနယ်၊ အမ်းမဲဆန္ဒနယ်၊ လှိုင်သာယာမဲဆန္ဒနယ်၊ ဒဂုံမြို့သစ် (ဆိပ်ကမ်း) မဲဆန္ဒနယ်၊ ဒဂုံမြို့သစ် (အရှေ့ပိုင်း) မဲဆန္ဒနယ်၊ ကော့မှူးမဲဆန္ဒနယ်၊ ကျေးသီးမဲဆန္ဒနယ်၊ မိုင်းရှူးမဲဆန္ဒနယ်တို့ဖြစ်သည်။

ထို့အတူ အမျိုးသားလွှတ်တော် လစ်လပ်မဲဆန္ဒနယ် သုံးနေရာမှာ ချင်းပြည်နယ် အမျိုးသားလွှတ်တော် မဲဆန္ဒနယ်အမှတ် ၃ (ထန်တလန်)၊ ပဲခူးတိုင်းဒေသကြီးအမျိုးသား လွှတ်တော်မဲဆန္ဒနယ်အမှတ် ၄ (ကျောက်တံခါး၊ ညောင်လေးပင်)၊ ရန်ကုန်တိုင်းဒေသကြီး အမျိုးသားလွှတ်တော် မဲဆန္ဒနယ်အမှတ် ၆ (ကမာရွတ်၊ ကြည့်မြင်တိုင်၊ ဆိပ်ကမ်း၊ လသာ၊ လှိုင်၊ လမ်းမတော်၊ အလုံ) တို့ဖြစ်သည်။

ပြည်နယ်လွှတ်တော်လစ်လပ်မဲဆန္ဒနယ် ခုနစ်နေရာမှာ ဖရူဆိုမြို့နယ် ပြည်နယ်လွှတ်တော် မဲဆန္ဒနယ်အမှတ်(၁)၊ ကျိုင်းတုံမြို့နယ် ပြည်နယ်လွှတ်တော်မဲဆန္ဒနယ် အမှတ်(၂)၊ ကျေးသီးမြို့နယ် ပြည်နယ်လွှတ်တော် မဲဆန္ဒနယ်အမှတ်(၁)နှင့် အမှတ်(၂)၊ ညောင်ရွှေမြို့နယ် ပြည်နယ်လွှတ်တော်မဲဆန္ဒနယ် အမှတ်(၁)၊ မိုင်းရှူးမြို့နယ် ပြည်နယ်လွှတ်တော် မဲဆန္ဒနယ် အမှတ်(၁)နှင့် အမှတ်(၂)တို့ဖြစ်သည်။

လွှတ်တော်ကိုယ်စားလှယ်လောင်း အမည်စာရင်း တင်သွင်းရာတွင် ဖရူဆိုမြို့နယ် ပြည်နယ်လွှတ်တော် မဲဆန္ဒနယ် အမှတ်(၁)တွင် ၀င်ရောက်ယှဉ်ပြိုင်မည့် NLD ပါတီ လွှတ်တော်ကိုယ်စားလှယ်လောင်းမှာ သတ်မှတ်ရက်မတိုင်မီ အမည်စာရင်း တင်သွင်းနိုင်ခြင်း မရှိခဲ့သည့်အတွက် လစ်လပ်မဲဆန္ဒနယ် ၁၉ နေရာအနက် ၁၈ နေရာသာ ၀င်ရောက်ယှဉ်ပြိုင်ခဲ့ရသည်။

ကြားဖြတ်ရွေးကောက်ပွဲ ကျင်းပခဲ့သည့် လစ်လပ်မဲဆန္ဒနယ်များမှ မိုင်းရှူးနှင့် ကျေးသီး နှစ်မြို့နယ်သည် ၂၀၁၅ အထွေထွေ ရွေးကောက်ပွဲ ကျင်းပနိုင်ခြင်းမရှိသဖြင့် ပြန်လည်ကျင်းပခြင်းဖြစ်ပြီး ကျန်မဲဆန္ဒနယ်များမှာ လွှတ်တော်ကိုယ်စားလှယ်များသည် ပြည်ထောင်စုအဆင့် တာဝန်ထမ်းဆောင်ခြင်းနှင့် အချို့မှာ ကွယ်လွန်သွားသောကြောင့်ဖြစ်သည်။

လစ်လပ်မဲဆန္ဒနယ် အရေအတွက်ကို ကြည့်ခြင်းအားဖြင့် ကြားဖြတ်ရွေးကောက်ပွဲတွင် နေရာအများအပြား ရှုံးခဲ့သည့်တိုင် NLD ပါတီအတွက် လက်ရှိအခြေအနေ ပြောင်းလဲခြင်းမရှိသော်လည်း နိုင်ငံရေးသိက္ခာပိုင်းနှင့် ၂၀၂၀ ရွေးကောက်ပွဲအတွက် အားစမ်းသည့် ပွဲတစ်ပွဲဖြစ်ခဲ့သည်။

၂၀၁၇ ကြားဖြတ်ရွေးကောက်ပွဲကို ဧပြီ ၁ ရက်တွင် ကျင်းပခဲ့ပြီး ပြည်သူအများစုမှာ အစိုးရ အပြောင်းအလဲ ဖြစ်စေခဲ့သည့် ၂၀၁၅ အထွေထွေ ရွေးကောက်ပွဲလောက် စိတ်ဝင်စားမှုမရှိဘဲ မဲပေးမှု ရာခိုင်နှုန်း ကျဆင်းခဲ့သည်။

သို့ရာတွင် မိုင်းရှူးနှင့် ကျေးသီးကဲ့သို့ ရွေးကောက်ပွဲ ကျင်းပခဲ့ခြင်းမရှိသည့် ဒေသများတွင်မူ မဲဆန္ဒရှင်များသည် အားတက်သရော မဲပေးခဲ့သည်ကို တွေ့ရသည်။ ကြားဖြတ်ရွေးကောက်ပွဲ ကျင်းပပြီးနောက် မဲရလဒ်များ ထွက်လာချိန်တွင် NLD ပါတီသည် ပြည်သူ့လွှတ်တော် လစ်လပ်မဲဆန္ဒနယ်ကိုးနေရာ အနက် ငါးနေရာ၊ အမျိုးသားလွှတ်တော် လစ်လပ်မဲဆန္ဒနယ် သုံးနေရာအပြည့်၊ ၀င်ရောက် ယှဉ်ပြိုင်နိုင်ခြင်းမရှိသည့် ပြည်နယ်လွှတ်တော် လစ်လပ်မဲဆန္ဒနယ် တစ်နေရာ အပါအ၀င် ခုနစ်နေရာအနက် တစ်နေရာ စုစုပေါင်းကိုးနေရာ အနိုင်ရရှိခဲ့သည်။

NLD ပါတီအနိုင်ရရှိခဲ့သည့် ပြည်သူ့လွှတ်တော်မဲဆန္ဒနယ်များသည် တိုင်းဒေသကြီးတွင်ဖြစ်ပြီး ၂၀၁၅ ရွေးကောက်ပွဲတွင်လည်း အနိုင်ရရှိထားသည့် နေရာများဖြစ်ကာ အမျိုးသားလွှတ်တော် မဲဆန္ဒနယ်သုံးနေရာတွင် တစ်နေရာသည် ချင်းပြည်နယ်၌ ပါဝင်ပြီး အဆိုပါ သုံးနေရာနှင့် ရှမ်းပြည်နယ်လွှတ်တော်တွင် လစ်လပ်မဲဆန္ဒနယ် တစ်နေရာတို့သည် ၂၀၁၅ ရွေးကောက်ပွဲတွင် အနိုင်ရရှိခဲ့သည့် နေရာများအား ပြန်လည်အနိုင်ရရှိခြင်း ဖြစ်သည်။

ကျန်မဲဆန္ဒနယ်များဖြစ်သည့် ရခိုင်ပြည်နယ်တွင် အမ်းမဲဆန္ဒနယ်၌ ရခိုင်အမျိုးသားပါတီ၊ မွန်ပြည်နယ်ချောင်းဆုံ ပြည်သူ့လွှတ်တော် မဲဆန္ဒနယ်နှင့် ရှမ်းပြည်နယ် ကျိုင်းတုံပြည်နယ် လွှတ်တော်မဲဆန္ဒနယ်တို့တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၊ ကျေးသီးနှင့် မိုင်းရှူးမြို့နယ်နှစ်ခုတွင် မဲဆန္ဒနယ် ခြောက်နေရာစလုံးတွင် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) က အနိုင်ရရှိခဲ့သည်။

မွန်ပြည်နယ် ချောင်းဆုံပြည်သူ့လွှတ်တော် မဲဆန္ဒနယ်သည် ၂၀၁၅ ရွေးကောက်ပွဲတွင် NLD ပါတီ အနိုင်ရရှိခဲ့သည့်နေရာ ဖြစ်သော်လည်း ၂၀၁၇ ကြားဖြတ်ရွေးကောက်ပွဲမတိုင်မီ သံလွင်တံတား (ချောင်းဆုံ) အား အမည်ပြောင်းလဲရန် ဆောင်ရွက်သည့် ကိစ္စရပ်ကြောင့် အဆိုပါ မဲဆန္ဒနယ်တွင် NLD ပါတီပေါ် လူထုထောက်ခံမှု ကျဆင်းခဲ့ခြင်းဖြစ်ကြောင်း နိုင်ငံရေးလေ့လာသူများက သုံးသပ်ကြသည်။

ထို့ပြင် ရှမ်းပြည်နယ်တွင် အဓိက ၀င်ရောက်ယှဉ်ပြိုင်သည့် ရှမ်းတိုင်းရင်းသားများ ဒီမိုကရေစီအဖွဲ့ချုပ်သည် ရှမ်းပြည်နယ်ရှိ လွှတ်တော်သုံးရပ်တွင် လစ်လပ်မဲဆန္ဒနယ် ရှစ်နေရာအနက် ခုနစ်နေရာ ၀င်ရောက်ယှဉ်ပြိုင်ခဲ့ပြီး ခြောက်နေရာ အနိုင်ရရှိခဲ့သည့်အတွက် ၎င်းတို့၏ အောင်မြင်မှုသည် ရာခိုင်နှုန်းအားဖြင့် များပြားခဲ့သည်။

၂၀၁၅ ရွေးကောက်ပွဲကဲ့သို့ အနိုင်မရရှိဘဲ ရှမ်းပြည်နယ် အပါအ၀င် အခြားနေရာများတွင် ရှုံးနိမ့်ခဲ့ခြင်းသည် မဲလာမပေးသူ ရာခိုင်နှုန်း များသောကြောင့် ဖြစ်ကြောင်းနှင့် အရှုံးအား မချင့်မရဲမဖြစ်ဘဲ မျှော်မှန်းထားပြီးဖြစ်ကြောင်း ထိုစဉ်အချိန် NLD ပါတီဗဟိုအလုပ် အမှုဆောင်အဖွဲ့၊ အတွင်းရေးမှူးအဖွဲ့ဝင် ဦးဝင်းထိန်က ရွေးကောက်ပွဲရလဒ်ကြေညာအပြီး ဧပြီ ၂ ရက်တွင် မီဒီယာများအား ပြောကြားခဲ့သည်။

ကြားဖြတ်ရွေးကောက်ပွဲအပြီး ရွေးကောက်ပွဲ တရားမဲ့ပြုကျင့်မှုများအား အပြန်အလှန် ကန့်ကွက်ခဲ့သည့် အမှုခြောက်မှုရှိခဲ့ပြီး အမှုအားလုံးအား ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီဘက်မှ ရှုံးနိမ့်ခဲ့သည်။

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ကြားဖြတ်ရွေးကောက်ပွဲတွင် ရွေးချယ်ခံခဲ့ရသည့် ကျိုင်းတုံမြို့နယ် ပြည်နယ်လွှတ်တော် မဲဆန္ဒနယ်အမှတ် (၂) ကိုယ်စားလှယ်အား အဆိုပါ မဲဆန္ဒနယ်တွင် ဒုတိယ ခိုင်လုံမဲအများဆုံးရရှိသူ NLD ပါတီ လွှတ်တော်ကိုယ်စားလှယ်လောင်းက တရားမဲ့ပြုကျင့်မှုဖြင့် ကန့်ကွက်သည့်အတွက် ပြည်ထောင်စု ရွေးကောက်ပွဲကော်မရှင်က ကြားနာစစ်ဆေးခဲ့ပြီး မူလပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ လွှတ်တော်ကိုယ်စားလှယ်ကိုသာ အနိုင်ပေးခဲ့သည်။

ထိုသို့ အနိုင်ပေးမှုအပေါ် NLD ပါတီ လွှတ်တော်ကိုယ်စားလှယ်လောင်းက အယူခံတက်ရာတွင် မူလအောက်ခုံရုံး၏ ဆုံးဖြတ်ချက်အား ပြန်လည်ပြင်ဆင်၍ NLD လွှတ်တော်ကိုယ်စားလှယ်လောင်းအား လွှတ်တော်ကိုယ်စားလှယ်အဖြစ် အနိုင်ပေးခဲ့သည့်အပေါ် ကျေနပ်မှုမရှိကြောင်းနှင့် ကော်မရှင်သည် ဘက်လိုက်မှုရှိနေကြောင်း ပြည်ခိုင်ဖြိုးပါတီပြောရေးဆိုခွင့်ရှိသူ ဒေါက်တာနန္ဒာလှမြင့်က ထုတ်ဖော်ပြောကြားခဲ့သည်။

သို့ဖြစ်၍ ၂၀၁၇ ကြားဖြတ်ရွေးကောက်ပွဲတွင် ချင်းပြည်နယ်ရှိ အမျိုးသားလွှတ်တော် မဲဆန္ဒနယ်၊ ရှမ်းပြည်နယ်ရှိ ညောင်ရွှေမဲဆန္ဒနယ်တို့တွင် NLD ပါတီအနေဖြင့် အနိုင်ရရှိခဲ့သော်လည်း ၂၀၂၀ ရွေးကောက်ပွဲသည် ၂၀၁၅ ရွေးကောက်ပွဲကဲ့သို့ အပြောင်းအလဲ တစ်ရပ်ကို ပြည်သူလူထုက မျှော်လင့်သည့် ရွေးကောက်ပွဲမျိုး ဖြစ်မလာနိုင်သောကြောင့် တိုင်းရင်းသားဒေသများတွင် ယခင် ၂၀၁၅ ရွေးကောက်ပွဲကဲ့သို့ တိုင်းရင်းသားပါတီများအား အနိုင်ရရှိရန် ခက်ခဲမည့် အခြေအနေ ရှိသောကြောင့် ကြိုတင်ပြင်ဆင်မှုများ ပြုလုပ်ရန်လိုအပ်ကြောင်း နိုင်ငံရေးလေ့လာသုံးသပ်သူများက ပြောကြားသည်။

သက်ရောက်မှု ရှိ/မရှိ စောင့်ကြည့်ရတော့မည့် ဘဏ္ဍာနှစ်အပြောင်းအလဲ

လက်ရှိကျင့်သုံးလျက်ရှိသော ဘဏ္ဍာနှစ် ဧပြီ ၁ ရက်မှ မတ် ၃၁ ရက်အထိအစား အမျိုးသားဒီမိုကရေစီအဖွဲ့ချုပ်ပါတီက ရွေးချယ်တင်မြှောက်ထားသော နိုင်ငံတော်သမ္မတဦးထင်ကျော် ဦးဆောင်သည့် အစိုးရအနေဖြင့် အောက်တိုဘာ ၁ ရက်မှ စက်တင်ဘာ ၃၀ ရက်အဖြစ် ၂၀၁၈-၂၀၁၉ ဘဏ္ဍာနှစ်မှစ၍ ပြောင်းလဲပြင်ဆင် သတ်မှတ်လိုက်ပြီး နှစ်ပေါင်း ၄၀ ကျော်အကြာတွင် ပြန်လည်ပြင်ဆင် သတ်မှတ်ခြင်းဖြစ်သည့်အပြင် လွှတ်တော်တွင်လည်း ၀ိုင်းဝန်းဆွေးနွေး အကြံပြုမှုများရှိခဲ့သည့်အတွက် ၂၀၁၇ ခုနှစ် ထင်ရှားကျော်ကြား ဖြစ်ရပ်တစ်ခုအဖြစ် ဖော်ပြအပ်ပါသည်။

ထိုသုိ့ ဘဏ္ဍာနှစ်ပြောင်းလဲ ပြင်ဆင်သတ်မှတ်ရန် ကိစ္စနှင့်ပတ်သက်၍ နိုင်ငံတော်သမ္မတဦးထင်ကျော်က ပြည်ထောင်စုလွှတ်တော်နာယကထံသို့ စက်တင်ဘာ ၂၉ ရက် ရက်စွဲဖြင့် သ၀ဏ်လွှာပေးပို့ခဲ့ပြီး ၎င်းကိစ္စနှင့် ပတ်သက်၍ ပြည်ထောင်စုအစိုးရအဖွဲ့ကိုယ်စား စီမံကိန်းနှင့်ဘဏ္ဍာရေးဝန်ကြီးဌာန ဒုတိယ၀န်ကြီး ဦးမောင်မောင်ဝင်းက အောက်တိုဘာ ၁၇ ရက်က ကျင်းပသည့် ပြည်ထောင်စုလွှတ်တော် အစည်းအဝေး၌ ရှင်းလင်းခဲ့သည်။

နိုင်ငံတစ်နိုင်ငံ၏ ဘဏ္ဍာနှစ်သတ်မှတ်ရာတွင် နိုင်ငံ၏စီးပွားရေးရည်မှန်းချက်၊ ငွေကြေးမူဝါဒ၊ ဘဏ္ဍာရေးမူဝါဒတို့ကို ချမှတ် ဆောင်ရွက်ရာတွင် ချမှတ်သည့်ရည်မှန်းချက်အတိုင်း အထမြောက် အောင်မြင်စေရန် အဓိကထား၍ သတ်မှတ်ကြခြင်းဖြစ်ကြောင်း၊ ထို့ပြင် နိုင်ငံ၏ ရာသီဥတုအခြေအနေ၊ အစိုးရကဏ္ဍ၊ ပုဂ္ဂလိကကဏ္ဍ၊ နှစ်ချုပ်ဘဏ္ဍာရေး ငွေစာရင်းများနှင့် နှစ်ချုပ်ကုန်ထုတ်လုပ်မှု ဆိုင်ရာစာရင်းများ ရေးဆွဲမှုတို့နှင့်လည်း လိုက်လျောညီထွေဖြစ်စေရန် သတ်မှတ်ကြကြောင်း၊ ဘဏ္ဍာနှစ်ဘတ်ဂျက်နှစ်ဟူသည် တစ်နှစ်တာသို့မဟုတ် ၁၂ လကာလအတွက် အစိုးရ၏ ဘဏ္ဍာငွေအရ အသုံးကိစ္စများ လျာထားအကောင်အထည်ဖော်ရန် အချိန်ကာလ သတ်မှတ်ချက်ဖြစ်ကြောင်း ဒုတိယ၀န်ကြီး ဦးမောင်မောင်ဝင်းက ရှင်းလင်းတင်ပြခဲ့သည်။

ထို့ပြင် ၁၉၇၄ ခုနှစ်တွင် ဘဏ္ဍာနှစ်ကို ဧပြီ ၁ ရက်မှ မတ် ၃၁ ရက်အထိ ပြန်လည်ပြင်ဆင် သတ်မှတ်ခဲ့စဉ်က အဓိကအားဖြင့် မြန်မာနိုင်ငံသည် လယ်ယာစိုက်ပျိုးရေးကို အဓိကထား ဆောင်ရွက်သည့်နိုင်ငံဖြစ်ခြင်းကြောင့် လယ်ယာစိုက်ပျိုးရေး လုပ်ငန်းများ မစတင်မီ တောင်သူလယ်သမားများအား စိုက်ပျိုးစရိတ် ထုတ်ချေးပေးနိုင်ရေး၊ မြန်မာနိုင်ငံ၏ ဘဏ္ဍာနှစ်ကို မြန်မာသက္ကရာဇ်တို့နှင့် ညီညွတ်စေရေးတို့အတွက်ဖြစ်သည်ဟု သိရှိရကြောင်း ဦးမောင်မောင်ဝင်းက ရှင်းပြသည်။

လက်ရှိကျင့်သုံးလျက်ရှိသည့် ဘဏ္ဍာနှစ်သည် ဧပြီ ၁ ရက်မှ စတင်သည့်အတွက်ကြောင့် တည်ဆောက်ရေးလုပ်ငန်းများကို မိုးရာသီကာလကျော်လွန်မှသာ လုပ်ငန်းစတင်နိုင်သဖြင့် လုပ်ငန်းဆောင်ရွက်ချိန် နည်းပါးခြင်း၊ ပြည်ပချေးငွေ၊ ပြည်ပအကူအညီရငွေများ ရယူရာတွင် ပေးအပ်သည့်နိုင်ငံ၊ အဖွဲ့အစည်း၏ဘဏ္ဍာနှစ်နှင့် မကိုက်ညီပါက အချိန်များညှိနှိုင်းရခြင်း၊ အထွေထွေရွေးကောက်ပွဲ ပြုလုပ်သည့်နှစ်တွင် နောင်အစိုးရအတွက် ဘတ်ဂျက်ကို လက်ရှိအစိုးရက ရေးဆွဲပေးရခြင်းစသည့် အားနည်းချက်များရှိကြောင်း၊ ဘဏ္ဍာနှစ်ကို ပြင်ဆင်သတ်မှတ်ပါက တည်ဆောက်ရေး၊ ၀ယ်ယူရေးစသည့် လုပ်ငန်းများတွင် တစ်ဆက်တည်းရှစ်လခန့် ပွင့်လင်းရာသီရရှိနိုင်ခြင်း၊ ဘဏ္ဍာနှစ် စတင်ချိန်နှင့် နှစ်သစ်ကူး ရုံးပိတ်ရက်များ တိုက်ဆိုင်နေမှု မရှိတော့ခြင်း၊ ပွင့်လင်းရာသီအစတွင် လုပ်ငန်းများ အရှိန်အဟုန်မြှင့် ဆောင်ရွက်နိုင်ပြီး ဘတ်ဂျက်ကုန်ဆုံးခါနီး မိုးရာသီတွင် လုပ်ငန်းများ အပြီးသတ် ဆောင်ရွက်နိုင်ခြင်း၊ သုံးလပတ်အလိုက် ဘဏ္ဍာငွေသုံးစွဲမှု ပိုမိုညီညွတ် မျှတလာနိုင်ခြင်း အစရှိသည့် အားသာချက်များ ရရှိမည်ဖြစ်ကြောင်း ဒုတိယ၀န်ကြီး ဦးမောင်မောင်ဝင်းက ရှင်းလင်းတင်ပြသည်။

သို့ရာတွင် ၂၀၁၅ ခုနှစ် ပြည်ထောင်စု လွှတ်တော်ဥပဒေအမှတ် ၄၂ ဖြင့် အတည်ပြု ပြဋ္ဌာန်းထားသည့် ပြည်ထောင်စု၏ ဘဏ္ဍာငွေအရအသုံး ရေးဆွဲတင်ပြခြင်းဆိုင်ရာ ဥပဒေပါ ဘတ်ဂျက်ရေးဆွဲ တင်ပြရမည့်အချိန်နှင့် မကိုက်ညီတော့သဖြင့် အဆိုပါ ဥပဒေအား ပြင်ဆင်ရေးဆွဲရန် လိုအပ်ခြင်း၊ ပြည်ပအကူအညီ၊ ချေးငွေများအတွက် မိမိဘဏ္ဍာနှစ်နှင့် မကိုက်ညီသည့်နိုင်ငံ၊ အဖွဲ့အစည်းများနှင့် အချိန်ညှိနှိုင်းရခြင်း၊ အထွေထွေရွေးကောက်ပွဲ ကျင်းပသည့်နှစ်တွင် လက်ရှိအစိုးရက ရေးဆွဲ၍ အကောင်အထည်ဖော် ဆောင်ရွက်လျက်ရှိသော ဘတ်ဂျက်သည် အစိုးရသစ်သို့ တာဝန်လွှဲပြောင်းပေးချိန်တွင် အကောင်အထည်ဖော်ဆောင်ရွက်မှု ခြောက်လသာရှိသေးခြင်းစသည့် အားနည်းချက်များရှိကြောင်း ဒုတိယ၀န်ကြီးက ပြောကြားသည်။

ဘဏ္ဍာနှစ်ပြောင်းလဲ ပြင်ဆင်သတ်မှတ်ရန် ကိစ္စနှင့်ပတ်သက်၍ အောက်တိုဘာ ၂၃ ရက်က ကျင်းပသည့် ပြည်ထောင်စုလွှတ်တော်၌ ဆွေးနွေးရာတွင် တပ်မတော်သား လွှတ်တော်ကိုယ်စားလှယ်၊ ရခိုင်အမျိုးသားပါတီမှ လွှတ်တော်ကိုယ်စားလှယ်၊ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ လွှတ်တော်ကိုယ်စားလှယ်တို့က ဘတ်ပေါင်းစုံမှပြန်လည် စဉ်းစားသုံးသပ်ရန် လိုအပ်ကြောင်း ဆွေးနွေးအကြံပြုခဲ့ပြီး အမျိုးသားဒီမိုကရေစီအဖွဲ့ချုပ်မှ လွှတ်တော်ကိုယ်စားလှယ်များက ထောက်ခံအကြံပြု ဆွေးနွေးခဲ့ကြသည်။

အစိုးရတစ်ရပ်၏ ဘဏ္ဍာနှစ် သတ်မှတ်မှုကို လေ့လာရာမှာ သမိုင်းကြောင်း၊ နိုင်ငံရေး၊ စီးပွားရေး၊ အများပြည်သူရုံးပိတ်ရက်၊ ရာသီဥတု အခြေအနေများအပြင် အခြားသော အမျိုးသားအကျိုးစီးပွားဆိုင်ရာ အဆောက်အအုံများနှင့် လုပ်ငန်းစဉ်များက လွှမ်းမိုးလျက်ရှိကြောင်း၊ လွှတ်တော်မှ ဘတ်ဂျက်အား ထိန်းညှိစောင့်ကြည့်ရန် အချိန်ကာလ လုံလောက်ရန် လိုအပ်သဖြင့် အစိုးရတစ်ရပ်၏ ဘဏ္ဍာနှစ်သည် လွှတ်တော်၏ လုပ်ငန်းစဉ်များနှင့်လည်း ကိုက်ညီရန်လိုအပ်ကြောင်း တပ်မတော်သား ပြည်သူ့လွှတ်တော်ကိုယ်စားလှယ် ဗိုလ်မှူးသောင်းထိုက်စိုးက ဆွေးနွေးအကြံပြုခဲ့သည်။

ထို့ပြင် ၎င်းက လွန်ခဲ့သောဆယ်စုနှစ်များအတွင် အမေရိကန်၊ နယူးဇီလန်၊ ဖီဂျီ၊ တီမောလက်စ်တေစသည့် နိုင်ငံအနည်းငယ်သာ ဘဏ္ဍာနှစ်ကို ပြောင်းလဲခဲ့ကြကြောင်း၊ ဘဏ္ဍာနှစ်ပြောင်းလဲရခြင်းကြောင့် ဘတ်ဂျက်ဆိုင်ရာ လုပ်ငန်းများ ပြုပြင်ပြောင်းလဲရေးအတွက် ကုန်ကျစရိတ်များရှိခြင်း၊ စာရင်းအင်း စနစ်ပြောင်းလဲရခြင်း၊ ၀န်ထမ်းများနှင့် အဖွဲ့အစည်းများအား ဘဏ္ဍာရေးနှင့် ပတ်သက်သည့် သင်တန်းများ၊ စာရင်းစစ်သင်တန်းများ၊ ဘတ်ဂျက်ပြင်ဆင်ခြင်းနှင့် ရေးဆွဲခြင်းဆိုင်ရာ သင်တန်းများပို့ချရခြင်း စသည့် လုပ်ငန်းများ ဆောင်ရွက်ရမည်ဖြစ်ပြီး မိမိတို့နိုင်ငံအနေဖြင့် အထက်ပါ အချက်များနှင့်ပတ်သက်၍ အသင့်ဖြစ်ပြီလားဟု မေးခွန်းထုတ်ခဲ့သည်။

အလားတူ ဘဏ္ဍာနှစ်ပြောင်းလဲ ပြင်ဆင်သတ်မှတ်ရန် ကိစ္စနှင့်ပတ်သက်၍လည်း ပျော်ဘွယ်မဲဆန္ဒနယ်၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ပြည်သူ့လွှတ်တော်ကိုယ်စားလှယ် ဦးသောင်းအေးက “နိုင်ငံတော်အတိုင်ပင်ခံပုဂ္ဂိုလ် စက်တင်ဘာ ၁၉ ရက်က ပြောခဲ့တဲ့ မိန့်ခွန်းမှာပါ။ ကျွန်မတို့အနေနဲ့ အများမျှော်လင့်ထားတဲ့အရာလမ်းကို ကျော်လွှားနိုင်ဖို့ ၁၈ လဆိုတဲ့ အချိန်ကာလဟာ အင်မတန် တိုတောင်းတဲ့ကာလဖြစ်တယ်လို့ တင်ပြထားတဲ့အတိုင်း အချိန်ကာလ တိုတောင်းသေးတဲ့အပြင် အစိုးရစတင် ဖွဲ့စည်းတုန်းကလည်း ၀န်ကြီးအရေးအတွက် လျှော့ချပြီး ၀န်ကြီးဌာနအချို့ ပေါင်းစည်းဖွဲ့စည်းလိုက်တဲ့အတွက် လုပ်ငန်းအသီးသီးရဲ့ အခြေအနေမှန်ကို သိရှိဖို့အတွက် ခက်ခဲပါတယ်။ ပြည်သူတွေအနေနဲ့လည်း ငွေကြေးအကျပ်အတည်း၊ အလုပ်အကိုင် အခက်အခဲ၊ ရာသီဥတု ဖောက်ပြန်မှုတွေ ကြုံတွေ့နေရတဲ့အတွက် အခုချိန်မှာ နိုင်ငံတော်ဘဏ္ဍာနှစ် ပြောင်းလဲပြင်ဆင် သတ်မှတ်ခြင်းကို မသင့်သေးဘူးလို့ ဆိုလိုပါတယ်” ဟု ဆွေးနွေးတင်ပြခဲ့သည်။

အုတ်တွင်းမဲဆန္ဒနယ်၊ အမျိုးသားဒီမိုကရေစီအဖွဲ့ချုပ်ပါတီမှ ပြည်သူ့လွှတ်တော်ကိုယ်စားလှယ် ဒေါ်ချိုချိုကလည်း မြန်မာနိုင်ငံနှင့် ရာသီဥတု အနီးကပ်ဆုံး တူညီနေသည့် အိမ်နီးချင်းနိုင်ငံဖြစ်သော ထိုင်းနှင့် လာအိုတို့တွင် ဘဏ္ဍာနှစ်ကို အောက်တိုဘာ ၁ ရက်မှ စက်တင်ဘာ ၃၀ ရက်အထိ သတ်မှတ်ထားသောကြောင့် မြန်မာနိုင်ငံအနေဖြင့်လည်း အောက်တိုဘာ ၁ ရက်မှ စက်တင်ဘာ ၃၀ ရက်အထိ ပြောင်းလဲသတ်မှတ်လိုက်ခြင်းဖြင့် မြန်မာနိုင်ငံ၏ ရာသီဥတုနှင့် မိုးရွာသွန်းမှုများကြောင့် လုပ်ငန်းများကို ဆောင်ရွက်ရာတွင် ဇွန်လမှ နိုဝင်ဘာလအထိ လုပ်ငန်းများ ရပ်ဆိုင်းထားစရာမလိုဘဲ လုပ်ငန်းများ နှောင့်နှေးမှုမရှိဘဲ လုပ်ကိုင်နိုင်မည်ဖြစ်ကြောင်း ထောက်ခံဆွေးနွေးခဲ့သည်။

ဆက်လက်၍ အောက်တိုဘာ ၃၁ ရက်တွင် ပြုလုပ်သည့် ပြည်ထောင်စုလွှတ်တော် အစည်းအဝေး၌ စီမံကိန်းနှင့် ဘဏ္ဍာရေးဝန်ကြီးဌာန ဒုတိယ၀န်ကြီး ဦးမောင်မောင်ဝင်းက ပြန်လည်ရှင်းလင်း တင်ပြခဲ့ရာ ပြည်ထောင်စုအစိုးရအဖွဲ့ အနေဖြင့် ဘဏ္ဍာနှစ်ပြောင်းလဲ သတ်မှတ်လိုသည့် အဓိကအကြောင်းရင်းမှာ ပြည်သူတို့၏ လူမှုစီးပွားဖွံ့ဖြိုးတိုးတက်ရန် ဆောင်ရွက်ရာတွင် လိုအပ်နေသော အခြေခံ အဆောက်အအုံများ အရှိန်အဟုန်ဖြင့် တည်ဆောက်ရန် လိုအပ်နေသည့် အချိန်ဖြစ်သဖြင့် ပြည်ထောင်စုနှင့် တိုင်းဒေသကြီး သို့မဟုတ် ပြည်နယ်အစိုးရများ၏ တည်ဆောက်ရေးနှင့် ၀ယ်ယူရေးလုပ်ငန်းများ ဆောင်ရွက်ရာတွင် တစ်ဆက်တည်းဖြစ်သော ပွင့်လင်းရာသီ အများဆုံး ရရှိနိုင်စေရန်ဖြစ်ကြောင်း ဆိုသည်။

ထို့ပြင် ၂၀၁၅ ခုနှစ်က ပြဋ္ဌာန်းခဲ့သည့် ပြည်ထောင်စု၏ဘဏ္ဍာငွေ အရအသုံးရေးဆွဲ တင်ပြခြင်းဆိုင်ရာဥပဒေတွင် လက်ရှိဘဏ္ဍာနှစ်နှင့် ဆီလျော်ညီညွတ်စေရန် ဘတ်ဂျက်ပြင်ဆင်မှုအတွက် အချိန်ကာလ သတ်မှတ်ချက်များကို ထည့်သွင်း ပြဋ္ဌာန်းထားပြီး၊ အဆိုပါ အချိန်ကာလ သတ်မှတ်ချက်များကို ပြောင်းလဲသည့်ဘဏ္ဍာနှစ်နှင့် ညီညွတ်စေရန် ပြန်လည်ပြင်ဆင် အစားထိုးပြဋ္ဌာန်းရန်ကိစ္စမှာ များစွာအခက်အခဲ မရှိနိုင်ကြောင်း၊ ပြည်ပချေးငွေများနှင့် ပတ်သက်၍လည်း မည်သည့်ဘဏ္ဍာနှစ်ကို သတ်မှတ်သည်ဖြစ်စေ နှစ်ဦးနှစ်ဖက် ညှိနှိုင်းဆောင်ရွက်သွားခြင်းဖြင့် ပြေလည်စေမည်ဖြစ်ကြောင်း၊ ဘဏ္ဍာနှစ်ပြောင်းလဲရန် လုပ်ငန်းစဉ်များနှင့် စပ်လျဉ်း၍ ပြည်ထောင်စုအဆင့်ဌာန၊ အဖွဲ့အစည်းများ၊ တိုင်းဒေသကြီးနှင့် ပြည်နယ်အဆင့်ဌာန၊ အဖွဲ့အစည်းများနှင့် အသေးစိတ် ညှိနှိုင်းဆွေးနွေးပြီး ဖြစ်သည့်အတွက် အဆင်ပြေချောမွေ့စွာ လိုက်ပါ ပြောင်းလဲနိုင်မည်ဖြစ်ကြောင်းလည်း သဘောထား မှတ်ချက်များ ရရှိပြီးဖြစ်ကြောင်းလည်း ဒုတိယ၀န်ကြီးက ဆိုသည်။

ထို့နောက် မြန်မာနိုင်ငံ၏ လက်ရှိဘဏ္ဍာနှစ်ဖြစ်သည့် ဧပြီ ၁ ရက်မှ မတ် ၃၁ ရက်အထိအစား အောက်တိုဘာ ၁ ရက်မှ စက်တင်ဘာ ၃၀ ရက်အထိ ပြောင်းလဲပြင်ဆင် သတ်မှတ်မှုကို ပြည်ထောင်စုလွှတ်တော်က အောက်တိုဘာ ၃၁ ရက်တွင် မှတ်တမ်းတင်ခဲ့သည်။

လက်ရှိဘဏ္ဍာနှစ်မှာ မတ် ၃၁ ရက်တွင်ကုန်မည်ဖြစ်ပြီး ပြန်စမည့် ဘဏ္ဍာနှစ်သစ် ၂၀၁၈-၂၀၁၉ မှာ အောက်တိုဘာ ၁ ရက်မှ စက်တင်ဘာ ၃၀ ရက်ဖြစ်သည့်အတွက် လစ်လပ်နေသည့် ခြောက်လအတွက် အစိုးရအဖွဲ့ အနေဖြင့် မည်ကဲ့သို့ ဆောင်ရွက်သွားမည် ဆိုသည်ကို မေးခွန်းများ ထုတ်လာခဲ့ကြသည်။

လက်ရှိဘဏ္ဍာနှစ်မှာ မတ် ၃၁ ရက်တွင် ကုန်မည်ဖြစ်ပြီး ပြန်စမည့်ဘဏ္ဍာနှစ်သစ် ၂၀၁၈-၂၀၁၉ မှာ အောက်တိုဘာ ၁ ရက်မှ စက်တင်ဘာ ၃၀ ရက်ဖြစ်သည့်အတွက် ၂၀၁၈ ခုနှစ် ဧပြီ ၁ ရက်မှ စက်တင်ဘာ ၃၀ ရက်အထိ လစ်လပ်နေသည့် ခြောက်လအတွက် ခြောက်လဘတ်ဂျက် သက်သက်ရေးဆွဲပြီး ဆောင်ရွက်ရန် စီစဉ်နေကြောင်း စီမံကိန်းနှင့် ဘဏ္ဍာရေးဝန်ကြီးဌာန ဒုတိယ၀န်ကြီး ဦးမောင်မောင်ဝင်းက ပြောကြားသည်။

အဆိုပါ ခြောက်လစာ ဘတ်ဂျက်ကို ပြည်ထောင်စုလွှတ်တော်သို့ ၂၀၁၈ ခုနှစ် ဇန်န၀ါရီ ၁၅ ရက်မတိုင်မီ တင်သွင်းဖြစ်ဖို့များကြောင်း ဦးမောင်မောင်ဝင်းက ပြောကြားခဲ့ပြီး ၂၀၁၈ ခုနှစ် ဇန်န၀ါရီလအတွင်း ပြန်စမည့် ပြည်ထောင်စုလွှတ်တော် ပုံမှန်အစည်းအဝေးများ၌ ခြောက်လစာဘတ်ဂျက်ကို စိစစ်ရမည်ဖြစ်ကြောင်း လွှတ်တော်ကိုယ်စားလှယ်အချို့ကပြောကြားသည်။

ဘဏ္ဍာနှစ်ပြောင်းလဲမှုများ ပတ်သက်၍ လေ့လာကြည့်ပါက ကမ္ဘာ့နိုင်ငံ ၂၂၇ နိုင်ငံတွင် ဇန်န၀ါရီ ၁ ရက်မှ ဒီဇင်ဘာ ၃၁ ရက်အထိ (ပြက္ခဒိန်နှစ်အတိုင်း) သတ်မှတ်သည့်နိုင်ငံ ၁၅၆ နိုင်ငံရှိပြီး ဧပြီ ၁ ရက်မှ မတ် ၃၁ ရက်အထိ သတ်မှတ်သည့်နိုင်ငံ ၃၃ နိုင်ငံနှင့် ဇူလိုင် ၁ ရက်မှ ဇွန် ၃၀ ရက်အထိ သတ်မှတ်သည့် နိုင်ငံ ၂၀၊ အောက်တိုဘာ ၁ ရက်မှ စက်တင်ဘာ ၃၀ ရက်အထိ သတ်မှတ်သည့်နိုင်ငံ ၁၂ နိုင်ငံရှိကြောင်း သိရသည်။

မြန်မာနိုင်ငံ၏ ဘဏ္ဍာနှစ်သတ်မှတ်ခဲ့သည့် သမိုင်းကြောင်းတွင် ဒုတိယကမ္ဘာစစ်မတိုင်မီက ဘဏ္ဍာနှစ်သည် ဧပြီ ၁ ရက်မှ မတ် ၃၁ ရက်အထိဖြစ်ပြီး ဒုတိယကမ္ဘာစစ်ပြီးနောက် မြန်မာနိုင်ငံအား ဗြိတိသျှတို့ ပြန်လည်အုပ်ချုပ်သည့် ၁၉၄၅ ခုနှစ်မှ လွတ်လပ်ရေးရရှိသည့် အချိန်အထိ ဘဏ္ဍာနှစ်ကို အောက်တိုဘာ ၁ ရက်မှ စက်တင်ဘာ ၃၀ ရက်အထိ သတ်မှတ်ခဲ့ကြောင်း သိရသည်။

လွတ်လပ်ရေး ရရှိပြီးသည့် အချိန်မှစ၍လည်း ၁၉၇၃ ခုနှစ်အထိ အောက်တိုဘာ ၁ ရက်မှ စက်တင်ဘာ ၃၀ ရက်အထိကိုသာ ဘဏ္ဍာနှစ်အဖြစ် ဆက်လက် သတ်မှတ်ခဲ့ကြောင်း၊ ၁၉၇၄ ခုနှစ် ပြည်သူ့လွှတ်တော်ကာလတွင် ဘဏ္ဍာနှစ်ကို ဧပြီ ၁ ရက်မှ မတ် ၃၁ ရက်အထိသို့ ပြန်လည်ပြင်ဆင် သတ်မှတ်ခဲ့ခြင်းဖြစ်ကြောင်း သိရသည်။

“ဘဏ္ဍာနှစ် ပြောင်းလဲတဲ့ကိစ္စကျတော့ ကျွန်တော်တို့က ပြီးခဲ့တဲ့ လွှတ်တော်သက်တမ်းမှာ ကတည်းကလည်း ကြိုးစားခဲ့ဖူးပါတယ်။ ဘာကြောင့်လဲဆိုတော့လည်း သူက တည်ဆောက်ရေးလုပ်ငန်းတွေ အပေါ်မှာ အခက်အခဲရှိတယ်။ နောက်ဘဏ်ချေးငွေအပေါ်မှာ တောင်သူလယ်သမားတွေ စိုက်ပျိုးစရိတ် ထုတ်ချေးပေးတဲ့ ကဏ္ဍတွေမှာလည်း ပြန်လည်ပြီး ပြန်ပေးဆပ်ရမယ့်အချိန်တွေမှာ နှစ်ကုန်တဲ့အချိန်နဲ့ သွားကြုံတဲ့ကိစ္စရပ်တွေစတဲ့ အခက်အခဲတွေ ကြုံတွေ့နေရတာ တွေ့ရတယ်။ အဲဒီတော့ အဲလိုမျိုး အခက်အခဲတွေ ရှိလာတော့ အဲဒါတွေကို ပြေလည်ဖို့ဆိုရင် ဘဏ္ဍာနှစ်ကို ပြောင်းလဲဖို့ လိုအပ်လိမ့်မယ်လို့ ကျွန်တော်တို့ သုံးသပ်ခဲ့ဖူးပါတယ်။ ဘဏ္ဍာနှစ်က ပြောင်းလဲဖို့ လိုအပ်ပါတယ်” ဟု ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီမှ ပြည်သူ့လွှတ်တော်ကိုယ်စားလှယ် ဦးစိုင်းသီဟကျော်က ပြောကြားသည်။

ဘဏ္ဍာနှစ် ပြောင်းလဲလိုက်သည့်အတွက် အကျိုးသက်ရောက်မှုရှိစေမည့် ကိစ္စရပ်များကို ကြိုတင်ပြင်ဆင်ပြီးမှ စနစ်တကျ ပြောင်းလဲသင့်ကြောင်း ဦးစိုင်းသီဟကျော်က အကြံပြုသည်။

လက်ရှိတွင် မြန်မာနိုင်ငံသည် ဖွံ့ဖြိုးမှု အနည်းဆုံးနိုင်ငံ (Least Development Country-LDC) စာရင်းထဲ ပါဝင်လျက်ရှိသည်။

အစိုးရ အနေဖြင့် ဖွံ့ဖြိုးမှုအနည်းဆုံး နိုင်ငံအဖြစ်မှ လွတ်မြောက်ရေးကို ဆောင်ရွက်နိုင်ရန်အတွက် ဒုတိယသမ္မတ ဦးဟင်နရီဗန်ထီးယူ ဦးဆောင်သည့် ဖွံ့ဖြိုးမှု အနည်းဆုံးနိုင်ငံအဖြစ်မှ လွတ်မြောက်ရေးအတွက် အကောင်အထည်ဖော်ရေး ကော်မတီကို ဖွဲ့စည်းပြီး ဆောင်ရွက်နေကြောင်း သိရသည်။

လက်ရှိ ၂၀၁၇-၂၀၁၈ ဘဏ္ဍာနှစ်မှာ ၂၀၁၈ ခုနှစ် မတ် ၃၁ ရက်တွင် ကုန်ဆုံးမည်ဖြစ်ပြီး ၂၀၁၈-၂၀၁၉ ဘဏ္ဍာနှစ်သည် ၂၀၁၈ ခုနှစ် အောက်တိုဘာ ၁ ရက်မှ စတင်မည်ဖြစ်ပြီး ၂၀၁၉ စက်တင်ဘာ ၃၀ ရက်တွင် ကုန်ဆုံးမည် ဖြစ်သည်။ ဘဏ္ဍာနှစ် ပြောင်းလဲပြင်ဆင်လိုက်သည့်အတွက် ပထမဦးစွာ ၂၀၁၅ ခုနှစ်က ပြည်ထောင်စုလွှတ်တော်က အတည်ပြုပြဋ္ဌာန်းထားသည့် ပြည်ထောင်စု၏ဘဏ္ဍာငွေ အရအသုံး ရေးဆွဲတင်ပြခြင်းဆိုင်ရာ ဥပဒေကို မဖြစ်မနေ ပြန်လည်ပြင်ဆင်ရမည်ဖြစ်ပြီး ဘဏ္ဍာနှစ် ပြောင်းလဲလိုက်ခြင်းအတွက် အစိုးရ၏လုပ်ငန်းများ ဘယ်လောက်အောင်မြင်မည်လဲ။ ဘယ်လောက်အထိ တိုးတက်လာမည်လဲ။ ပြည်သူလူထုအတွက် ဘယ်လိုအကျိုးတွေ ဖြစ်ထွန်းမည်လဲဆိုတာကို စောင့်ကြည့်သွားရန် လိုအပ်ပေသည်။

နိုင်ငံရေးအရ အရေးပါခဲ့သော နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ တရုတ်ခရီးစဉ်များ

ဒီဇင်ဘာ ၁ ရက်က တရုတ်နိုင်ငံ ပေကျင်းမြို့ရှိ ပြည်သူ့ခန်းမဆောင်တွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် တရုတ်သမ္မတရှီကျင်ပင်း တွေ့ဆုံစဉ် (Photo: MSCO)

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် မြန်မာနိုင်ငံ၏ အိမ်နီးချင်း အင်အားကြီး တရုတ်နိုင်ငံသို့ ယခုနှစ်အတွင်း နှစ်ကြိမ်တိုင် သွားရောက်ခဲ့သည့်အတွက် ၂၀၁၇ ခုနှစ် ထင်ရှားကျော်ကြား ဖြစ်ရပ်တစ်ခုအဖြစ် ဖော်ပြအပ်ပါသည်။

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် တရုတ်နိုင်ငံ ပေကျင်းမြို့တွင် ကျင်းပသော Belt and Road Forum for International Cooperation အစည်းအဝေးသို့ တက်ရောက်ရန် ယခုနှစ် မေလအတွင်းက တရုတ်နိုင်ငံသို့ ပထမအကြိမ် သွားရောက်ခဲ့ခြင်းဖြစ်သည်။

အဆိုပါ ခရီးစဉ်အတွင်း နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် တရုတ်နိုင်ငံသမ္မတ ရှီကျင်ပင်းနှင့် သီးခြားတွေ့ဆုံရာတွင် တရုတ်သမ္မတ ရှီကျင်ပင်းက မြန်မာနိုင်ငံ၏ ငြိမ်းချမ်းရေးလုပ်ငန်းစဉ် တိုးတက်ရေးတွင် လိုအပ်သော ထောက်ပံ့မှုနှင့်အတူ မြန်မာနိုင်ငံအား ဆက်လက် ကူညီသွားရန် တရုတ်က ဆန္ဒရှိကြောင်းနှင့် မြန်မာ-တရုတ် နှစ်နိုင်ငံနယ်စပ် တည်ငြိမ်အေးချမ်းရေးအတွက် ပူးပေါင်းဆောင်ရွက်ရန်လည်း ဆောင်းဆိုခဲ့မှု ပြုလုပ်ခဲ့ကြောင်း ထိုစဉ်အချိန်က တရုတ်အစိုးရပိုင် ဆင်ဟွာသတင်းဌာနက ဖော်ပြခဲ့သည်။

ထို့အတူ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် တရုတ်နိုင်ငံဝန်ကြီးချုပ် လီခယ်ကျင်းတို့ သီးခြားတွေ့ဆုံခဲ့ပြီး တွေ့ဆုံမှုအပြီး ၎င်းတို့ရှေ့မှောက်တွင် နှစ်နိုင်ငံ တာဝန်ရှိသူများက မြန်မာနှင့် တရုတ်နိုင်ငံကြား ပူးပေါင်းဆောင်ရွက်မှုဆိုင်ရာ သဘောတူစာချုပ် ငါးခုဖြစ်သည့် “စီးပွားရေးနှင့် နည်းပညာ ပူးပေါင်းဆောင်ရွက်ရေးဆိုင်ရာ သဘောတူညီချက်စာချုပ်”၊ “မြန်မာ-တရုတ် နယ်စပ်စီးပွားရေး ပူးပေါင်းဆောင်ရွက်မှုဇုန် တည်ထောင်ရေး သဘောတူစာချုပ်”၊ “စီးပွားရေးပိုးလမ်းမ ရပ်ဝန်းတစ်ခုနှင့် (၂၁) ရာစု ရေကြောင်းဆိုင်ရာ ပိုးလမ်းမရပ်ဝန်းတစ်ခု စတင်ခြင်းဆိုင်ရာ ပူးပေါင်းဆောင်ရွက်ရေး သဘောတူစာချုပ်”၊ “ကျန်းမာရေးကဏ္ဍ ပူးပေါင်း ဆောင်ရွက်ရေး သဘောတူစာချုပ်” နှင့် “ငလျင်အလွန် ပုဂံရှိ သမိုင်းဝင်အဆောက်အအုံများ ပြုပြင်ထိန်းသိမ်းရေးနှင့် ကာကွယ်စောင့်ရှောက်ရေးဆိုင်ရာ ပူးပေါင်းဆောင်ရွက်ရေး သဘောတူစာချုပ်” များကို လက်မှတ်ရေးထိုးခဲ့သည်။

Belt and Road Forum for International Cooperation အစည်းအဝေးသို့ တက်ရောက်နေစဉ် ကာလအတွင်း နိုင်ငံတော်၏အတိုင်ပင်ခံပုဂ္ဂိုလ်သည် ဆွစ်ဇာလန်နိုင်ငံသမ္မတ၊ သီရိလင်္ကာ၊ ပိုလန်နှင့် မွန်ဂိုလီးယားနိုင်ငံ ၀န်ကြီးချုပ်တို့နှင့် သီးခြားတွေ့ဆုံမှုများ ပြုလုပ်ခဲ့သေးသည်။

ထို့ပြင် အဆိုပါခရီးစဉ်၌ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား ဂုဏ်ပြုသောအားဖြင့်ဟုဆိုကာ တရုတ်နိုင်ငံက နှင်းဆီပန်းမျိုးစိတ်သစ်အမည်ကို “အောင်ဆန်းစုကြည်နှင်းဆီ” ဟု အမည်ပေးခဲ့ပြီး ယင်းအမည်ပေးပွဲ အခမ်းအနားသို့ နိုင်ငံတော်၏အတိုင်ပင်ခံပုဂ္ဂိုလ်ကိုယ်တိုင် တက်ရောက်ခဲ့ကာ ထိုသို့တရုတ်နိုင်ငံ၏ ပြုမူဆောင်ရွက်မှုသည် တရုတ်နိုင်ငံက မြန်မာနိုင်ငံနှင့် ဆက်ဆံရေးအပေါ် အလေးထားသည့် သဘောပြသခြင်းဖြစ်ကြောင်း သုံးသပ်မှုများ ရှိခဲ့သည်။

ထို့နောက် တရုတ်ပြည်သူ့သမ္မတနိုင်ငံ အစိုးရ၏ ဖိတ်ကြားချက်အရ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် တရုတ်ကွန်မြူနစ်ပါတီနှင့် ပြည်ပနိုင်ငံရေးပါတီများအကြား အဆင့်မြင့်ခေါင်းဆောင်များ ဆွေးနွေးပွဲသို့ တက်ရောက်ရန်နှင့် နှစ်နိုင်ငံချစ်ကြည်ရေး မြှင့်တင်ရန် တရုတ်နိုင်ငံသို့ နိုဝင်ဘာ ၃၀ ရက်တွင် ဒုတိယအကြိမ် အလုပ်သဘော ချစ်ကြည်ရေးခရီးသွားခဲ့သည်။

ထိုသို့ နိုင်ငံတော်၏အတိုင်ပင်ခံပုဂ္ဂိုလ် ဒုတိယအကြိမ် တရုတ်နိုင်ငံသို့ သွားရောက်မည့်သတင်းအား နိုင်ငံတော်အတိုင်ပင်ခံရုံးက ထုတ်ပြန်ချိန်တွင် နိုင်ငံတော်၏အတိုင်ပင်ခံပုဂ္ဂိုလ် တက်ရောက်မည့် တရုတ်ကွန်မြူနစ်ပါတီနှင့် ပြည်ပနိုင်ငံရေးပါတီများအကြား အဆင့်မြင့်ခေါင်းဆောင်များ ဆွေးနွေးပွဲသို့ ပါတီခေါင်းဆောင်များသာ တက်ရောက်ရသောကြောင့်ဟုဆိုကာ နိုင်ငံတော်၏အတိုင်ပင်ခံပုဂ္ဂိုလ်သည် ပါတီလုပ်ငန်းများ ၀င်ရောက် ဆောင်ရွက်နေသည်ဟု ဝေဖန်မှုများ ထွက်ပေါ်ခဲ့သေးသည်။

ထို့ပြင် တရုတ်ပြည်သူ့သမ္မတနိုင်ငံ ဗဟိုစစ်ကော်မရှင်အဖွဲ့ဝင်နှင့် ပူးတွဲစစ်ဦးစီးဌာန စစ်ဦးစီးချုပ် Gen. Li Zuocheng ၏ ဖိတ်ကြားချက်အရ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် နိုဝင်ဘာ ၂၁ ရက်မှ ၂၆ ရက်ထိ တရုတ်နိုင်ငံသို့ သွားရောက်ပြီးနောက် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တရုတ်နိုင်ငံခရီးစဉ် သွားရောက်ခြင်းကြောင့်လည်း အဆိုပါ ဒုတိယအကြိမ် ခရီးစဉ်အပေါ် နိုင်ငံရေးလေ့လာ သုံးသပ်သူများအကြား စိတ်ဝင်တစား ဖြစ်ခဲ့သည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်အား တရုတ်နိုင်ငံ ခရီးစဉ်အတွင်း တရုတ်ပြည်သူ့လွတ်မြောက်ရေး တပ်မတော် တာဝန်ရှိသူများအပြင် တရုတ်နိုင်ငံသမ္မတ ရှီကျင်းပင် ကိုယ်တိုင်လက်ခံ တွေ့ဆုံခဲ့သည်။

တရုတ်ကွန်မြူနစ်ပါတီနှင့် ပြည်ပနိုင်ငံရေးပါတီများအကြား အဆင့်မြင့်ခေါင်းဆောင်များ ဆွေးနွေးပွဲတွင် နိုင်ငံပေါင်း ၁၂၀ မှ ပါတီနှင့်နိုင်ငံရေးအဖွဲ့အစည်း ၂၀၀ ကျော်မှ ခေါင်းဆောင်များ တက်ရောက်ခြင်းဖြစ်သည်။

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် NLD ပါတီတွင် ဥက္ကဋ္ဌအဖြစ် ဆက်လက်ရပ်တည်လျက်ရှိသော်လည်း ပြည်ထောင်စုဝန်ကြီးတာဝန်များအား ထမ်းဆောင်နေသောကြောင့် ၂၀၀၈ ခုနှစ် ဖွဲ့စည်းပုံ အခြေခံဥပဒေအရ ပါတီလုပ်ငန်းများ ပါဝင်ဆောင်ရွက်ခြင်း၊ ပါတီမှ ကျင်းပသည့် အခမ်းအနားများသို့ တက်ရောက်ခြင်း မရှိသည်ကို တွေ့ရသည်။

တရုတ်နိုင်ငံသို့ သွားရောက်ချိန်တွင် နိုင်ငံတော်၏အတိုင်ပင်ခံပုဂ္ဂိုလ်သည် တရုတ်ကွန်မြူနစ်ပါတီနှင့် ပြည်ပနိုင်ငံရေးပါတီများအကြား အဆင့်မြင့်ခေါင်းဆောင်များ ဆွေးနွေးပွဲတွင် မိန့်ခွန်းပြောကြားရန် အထူးဧည့်သည်တော်အဖြစ် တရုတ်နိုင်ငံအစိုးရက ဖိတ်ကြားခြင်းဖြစ်ကြောင်း နိုင်ငံတော်အတိုင်ပင်ခံရုံးက သတင်းထုတ်ပြန်ခဲ့သည်။

ထို့ပြင် တရုတ်နိုင်ငံသို့ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့်အတူ NLD ပါတီခေါင်းဆောင်တစ်ဦးဖြစ်သည့်အပြင် ပါတီလုပ်ငန်းဆောင်ရွက်ခွင့်ရှိသည့် မန္တလေးတိုင်းဒေသကြီး ၀န်ကြီးချုပ် ဒေါက်တာဇော်မြင့်မောင်အား ခေါ်ဆောင်သွားသောကြောင့် ခရီးစဉ်အပေါ်ဝေဖန်မှုများ ရပ်တန့်ခဲ့သည်။

အလားတူ နိုင်ငံတော်၏အတိုင်ပင်ခံပုဂ္ဂိုလ်နှင့်အတူ ကိုယ်စားလှယ်အဖွဲ့ဝင်များအဖြစ် လျှပ်စစ်နှင့် စွမ်းအင်ဝန်ကြီးဌာနနှင့် ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးဝင်းခိုင်၊ သမ္မတရုံးဝန်ကြီးဌာန ဒုတိယ၀န်ကြီး ဦးမင်းသူနှင့် တာဝန်ရှိသူများလည်း လိုက်ပါသွားခဲ့သည်။

နိုင်ငံတော်၏အတိုင်ပင်ခံပုဂ္ဂိုလ်သည် ဒီဇင်ဘာ ၁ ရက်တွင် တရုတ်ကွန်မြူနစ်ပါတီက ကျင်းပသည့် အဆင့်မြင့်ခေါင်းဆောင်များ ဆွေးနွေးပွဲသို့ မတက်ရောက်မီ တရုတ်သမ္မတ ရှီကျင်ပင်းနှင့် ပေကျင်းမြို့ရှိ ပြည်သူ့ခန်းမဆောင်တွင် တွေ့ဆုံပြီး နှစ်နိုင်ငံဆွေးနွေးပွဲ ပြုလုပ်ခဲ့သည်။

ယင်းသို့တွေ့ဆုံစဉ် နှစ်နိုင်ငံအကြား ဖြစ်ထွန်းပြီးဖြစ်သော ဆွေမျိုးပေါက်ဖော် ဆက်ဆံရေးကို အခြေခံ၍ ဘက်စုံမဟာဗျူဟာမြောက် ပူးပေါင်းဆောင်ရွက်မှုများ အရှိန်အဟုန် မြှင့်တင်ရေး၊ အပြည်ပြည်ဆိုင်ရာ မျက်နှာစာတွင် ဆက်လက်ပူးပေါင်း ဆောင်ရွက်ရေး၊ နှစ်ဖက်အဆင့်မြင့် ခေါင်းဆောင်များအကြား ချစ်ကြည်ရေးခရီးစဉ်များ အပြန်အလှန် သွားလာရေး၊ နှစ်နိုင်ငံပြည်သူအချင်းချင်း ချစ်ကြည်ရင်းနှီးမှု တိုးမြှင့်ဖော်ဆောင်ရေးနှင့် ကဏ္ဍစုံ ပူးပေါင်းဆောင်ရွက်ရေးတို့ အပြင် နှစ်နိုင်ငံအကြား အကောင်အထည်ဖော်မည့် စီမံကိန်းကြီးများနှင့် မြန်မာနိုင်ငံ၏ ငြိမ်းချမ်းရေးလုပ်ငန်းစဉ်အား တရုတ်နိုင်ငံမှ ဆက်လက်အကူအညီပေးမည့် ကိစ္စရပ်များနှင့်ပတ်သက်၍ ဆွေးနွေးခဲ့ကြောင်း နိုင်ငံတော်အတိုင်ပင်ခံရုံးက သတင်းထုတ်ပြန်ခဲ့သည်။

နှစ်နိုင်ငံတွေ့ဆုံပွဲအပြီးတွင် နိုင်ငံတော်၏အတိုင်ပင်ခံပုဂ္ဂိုလ်သည် ပြည်သူ့ခန်းမဆောင် ဒုတိယထပ်တွင် ကျင်းပသည့် တရုတ်ကွန်မြူနစ်ပါတီနှင့် ပြည်ပနိုင်ငံရေးပါတီများအကြား အဆင့်မြင့်ခေါင်းဆောင်များ ဆွေးနွေးပွဲဖွင့်ပွဲနှင့် မျက်နှာစုံညီ အစည်းအဝေး (ပထမပိုင်း)သို့ တက်ရောက်ခဲ့ပြီး တရုတ်နိုင်ငံ အစိုးရ၏ အထူးဧည့်သည်တော်အဖြစ် မိန့်ခွန်းပြောကြားခဲ့သည်။

တရုတ်ကွန်မြူနစ်ပါတီနှင့် ပြည်ပနိုင်ငံရေးပါတီများအကြား အဆင့်မြင့် ခေါင်းဆောင်များ ဆွေးနွေးပွဲသို့ မြန်မာနိုင်ငံမှ အတိုက်အခံပါတီဖြစ်သည့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီဥက္ကဋ္ဌ ဦးသန်းဌေး ဦးဆောင်သော ပြည်ခိုင်ဖြိုးပါတီ ကိုယ်စားလှယ်အဖွဲ့လည်း တက်ရောက်ခဲ့သည်။

တရုတ်နိုင်ငံသည် မြန်မာနိုင်ငံ ငြိမ်းချမ်းရေးလုပ်ငန်းစဉ်များတွင် ပါဝင်ဆောင်ရွက်ရေး အပါအ၀င် မြန်မာအစိုးရနှင့် မြောက်ပိုင်း တိုင်းရင်းသား လက်နက်ကိုင်အဖွဲ့များကြား ညှိနှိုင်းဆွေးနွေးမှုများအတွက် ကြားဝင်ဆောင်ရွက်ရန် တရုတ်နိုင်ငံခြားရေးဝန်ကြီးဌာန အာရှရေးရာ အထူးကိုယ်စားလှယ် မစ္စတာဆွန်းကော့ရှန်အား တာဝန်ပေးကာ ဆောင်ရွက်စေလျက်ရှိသည်။

သမ္မတဟောင်း ဦးသိန်းစိန်အစိုးရလက်ထက်တွင် မြစ်ဆုံစီမံကိန်း တည်ဆောက်ရေးအား ၎င်း၏တာဝန်သက်တမ်းကာလအတွင်း ရပ်ဆိုင်းထားမည်ဖြစ်ကြောင်း ထိုစဉ်အချိန်က သမ္မတဦးသိန်းစိန်က ကြေညာချိန်မှစတင်၍ မြန်မာအစိုးရက နိုင်ငံတကာ အသိုင်းအ၀ိုင်းနှင့် ဆက်ဆံရေး တိုးမြှင့်ဆောင်ရွက်လာချိန်တွင် မြန်မာ-တရုတ်ဆက်ဆံရေးမှာ အနည်းငယ် အေးစက်ခဲ့ပြီး ရခိုင်ပဋိပက္ခများ ဖြစ်ပွားချိန်တွင် မြန်မာ-တရုတ်ဆက်ဆံရေး အခြေအနေမှာ ပြန်လည်နီးကပ်လာသည့် အခြေအနေဖြစ်ကြောင်း နိုင်ငံရေးလေ့လာသူများက သုံးသပ်ကြသည်။

ရခိုင်ပြည်နယ်တွင် ARSA ဘင်္ဂါလီ အစွန်းရောက် အကြမ်းဖက်သမားများ၏ တိုက်ခိုက်ဖျက်ဆီးမှုကို တုံ့ပြန်သည့် မြန်မာတပ်မတော်၏ နယ်မြေရှင်းလင်းရေး ဆောင်ရွက်မှုများနှင့် ဘင်္ဂလားဒေ့ရ်ှဘက်သို့ ရောက်ရှိသွားသူများ ပြန်လည်လက်ခံရေး ကိစ္စရပ်များအပေါ် နိုင်ငံတကာ အသိုင်းအ၀ိုင်းမှ မြန်မာအစိုးရနှင့် တပ်မတော်အား စွပ်စွဲမှုများအပေါ် တရုတ်နိုင်ငံသည် ကုလသမဂ္ဂတွင်လည်းကောင်း၊ အခြားသီးခြားပုံစံဖြင့်လည်းကောင်း ကာကွယ်ပြောကြားမှုများ ပြုလုပ်လျက်ရှိသည်။

မြန်မာနိုင်ငံ ငြိမ်းချမ်းရေးရရှိရေးအတွက် တရုတ်နိုင်ငံအား ပုံအပ်ပြီး ဆောင်ရွက်၍မရဘဲ ပြည်တွင်းပြဿနာဖြစ်သည့်အတွက် ပြည်တွင်း၌သာ စဉ်းစားရမည်ဖြစ်ပြီး တရုတ်နိုင်ငံသည် ငြိမ်းချမ်းရေးရရှိအောင် ကူညီခြင်းထက် စီမံကိန်းများ ဆောင်ရွက်ရန် တာစူနေကြောင်း တရုတ်နိုင်ငံအရေး လေ့လာသူအချို့က သုံးသပ်ပြောကြားထားသည်။

ယခုနှစ်အတွင်း နိုင်ငံတော်သမ္မတ ဦးထင်ကျော်သည် ဧပြီလအတွင်းက တရုတ်နိုင်ငံသို့ သွားရောက်ခဲ့ပြီး တရုတ်နိုင်ငံသမ္မတ ရှီကျင်ပင်း၊ တရုတ်နိုင်ငံဝန်ကြီးချုပ် လီခယ်ကျင်း၊ တရုတ်ပြည်သူ့သမ္မတနိုင်ငံ အမျိုးသားပြည်သူ့ကွန်ဂရက်ဥက္ကဋ္ဌ မစ္စတာကျန်းတဲ့ကျန်းတို့နှင့် သီးခြားစီတွေ့ဆုံခဲ့သည်။

တရုတ်နိုင်ငံခရီးစဉ်အတွင်း နိုင်ငံတော်သမ္မတ ဦးထင်ကျော်နှင့် တရုတ်နိုင်ငံသမ္မတရှီကျင်ပင်းတို့ ဆွေးနွေးမှုအပြီးတွင် နှစ်နိုင်ငံ သက်ဆိုင်ရာ တာဝန်ရှိသူများက နှစ်နိုင်ငံအစိုးရအကြား ယဉ်ကျေးမှု အမွေအနှစ်ဆိုင်ရာ ပစ္စည်းများအား တရားမ၀င်တူးဖော်ခြင်း၊ မှောင်ခိုတင်သွင်း ရောင်းချခြင်း ကိစ္စရပ်များကို ကာကွယ် ဟန့်တားနိုင်ရေးအတွက် သဘောတူညီမှုစာချုပ်၊ စီးပွားရေးနှင့် အတတ်ပညာ ပူးပေါင်းဆောင်ရွက်ရေးဆိုင်ရာ သဘောတူညီချက်စာချုပ်၊ ပို့ဆောင်ရေးကဏ္ဍနှင့် သစ်တောကဏ္ဍ ပူးပေါင်းဆောင်ရွက်မှုဆိုင်ရာ နားလည်မှု စာချွန်လွှာနှစ်စောင်တို့ လက်မှတ်ရေးထိုးခဲ့သေးသည်။

အစိုးရတာဝန် စတင်ထမ်းဆောင်ပြီးနောက် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် တရုတ်နိုင်ငံသို့ ပထမအကြိမ်အဖြစ် ၂၀၁၆ ခုနှစ် သြဂုတ်လအတွင်းက ချစ်ကြည်ရေးခရီးစဉ်အဖြစ် ငါးရက်ကြာ သွားရောက်ခဲ့ပြီး စုစုပေါင်း တရုတ်နိုင်ငံသို့ အစိုးရတာဝန်ဖြင့် သုံးကြိမ်သွားရောက်ထားသည်။

သမိုင်းဝင်စေခဲ့သော ပုပ်ရဟန်းမင်းကြီး၏ ပထမဆုံး မြန်မာခရီးစဉ်

နိုဝင်ဘာ ၂၉ ရက်က ကျိုက္ကဆံကွင်းတွင် မစ္ဆားတရားတော်မြတ် ပူဇော်ဝတ်ပြု ဆုတောင်းခြင်း မစတင်မီ ပုပ်ရဟန်းမင်းကြီး ဖရန်စစ်က ဆုတောင်းပွဲတက်ရောက်လာသည့် လူထုအကြား မော်တော်ယာဉ်ဖြင့် လှည့်လည်ကာ နှုတ်ဆက်စဉ် (ဓာတ်ပုံ-ကြည်နိုင်)

ပုပ်ရဟန်းမင်းကြီးဖရန်စစ်၏ မြန်မာနိုင်ငံသို့ လေးရက်ကြာ သမိုင်းဝင်လာရောက်ခဲ့သည့် ခရီးစဉ်ကို ၂၀၁၇ ခုနှစ် ထင်ရှားကျော်ကြားဖြစ်ရပ်တစ်ခုအဖြစ် ဖော်ပြအပ်ပါသည်။

မြန်မာနိုင်ငံသို့ ပုပ်ရဟန်းမင်းကြီး ဖရန်စစ် လာရောက်မည်ဖြစ်ကြောင်း ဗာတီကန်က သြဂုတ် ၂၈ ရက်တွင် တရားဝင် ကြေညာချက် ထုတ်ပြန်သည့်အချိန်မှစ၍ မြန်မာနိုင်ငံရှိ ကက်သလစ်ဘာသာဝင်များအပြင် အခြားဘာသာဝင်များကလည်း စိတ်ဝင်တစားဖြစ်ခဲ့သည်။

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ၂၀၁၇ ခုနှစ် မေလအတွင်း ဥရောပခရီးစဉ် သွားရောက်ရာတွင် ဗာတီကန်နန်းတော်၌ ပုပ်ရဟန်းမင်းကြီး ဖရန်စစ်နှင့်တွေ့ဆုံခဲ့ပြီး တွေ့ဆုံမှုအပြီးတွင် ပြည်ထောင်စုသမ္မတမြန်မာနိုင်ငံတော်နှင့် ဗာတီကန်မြို့ပြနိုင်ငံတို့အကြား သံတမန် အဆက်အသွယ် စတင်ထူထောင်ခဲ့ခြင်းသည် ပုပ်ရဟန်းမင်းကြီး၏ မြန်မာနိုင်ငံခရီးစဉ် အစကနဦးပင်ဖြစ်သည်။

ဗာတီကန်မြို့ပြနိုင်ငံအား ပုပ်ရဟန်းမင်းကြီးက ကိုယ်ပိုင်အုပ်ချုပ်ခွင့် ရရှိထားခြင်းဖြစ်ပြီး ကက်သလစ်အသင်းတော်၏ အစိုးရ (Holy See) က အုပ်ချုပ်ခြင်းဖြစ်သည်။

မြန်မာနိုင်ငံသို့ ပုပ်ရဟန်းမင်းကြီး ဖရန်စစ်သည် နိုဝင်ဘာ ၂၇ ရက် မွန်းလွဲပိုင်းတွင် စတင်ရောက်ရှိလာပြီး ရန်ကုန်အပြည်ပြည်ဆိုင်ရာလေဆိပ်နှင့် ခေတ္တတည်းခိုနေထိုင်မည့် ရန်ကုန်မြို့၊ သိမ်ဖြူလမ်းရှိ ရန်ကုန်ကက်သလစ်ဂိုဏ်းချုပ် ဆရာတော်ကြီး ကာဒီနယ် ချားလစ်စ်ဘို၏ နေအိမ်သွားရာလမ်းတစ်လျှောက် စုရပ်များတွင် ပုပ်ရဟန်းမင်းကြီးအား ကက်သလစ် ဘာသာဝင်များသာမက ပြည်သူအများအပြားက ကြိုဆိုခဲ့ကြသည်။

မြန်မာ့တပ်မတော်နှင့် ရဲတပ်ဖွဲ့တို့ ရခိုင်အရေးနှင့်ပတ်သက်၍ နိုင်ငံတကာ၏ ဝေဖန်မှုများခံနေရချိန်နှင့် ပုပ်ရဟန်းမင်းကြီး မြန်မာနိုင်ငံသို့ လာရောက်ချိန်သည်လည်း တိုက်ဆိုင်မှုရှိခဲ့သည်။

ပုပ်ရဟန်းမင်းကြီး မြန်မာနိုင်ငံသို့ ရောက်ရှိသည့် နိုဝင်ဘာ ၂၇ ရက် ညနေပိုင်းတွင် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ပုပ်ရဟန်းမင်းကြီးအား ခေတ္တတည်းခိုနေထိုင်သည့် ရန်ကုန်ကက်သလစ်ဂိုဏ်းချုပ် ဆရာတော်ကြီးနေအိမ်တွင် သွားရောက်တွေ့ဆုံခဲ့ပြီး တွေ့ဆုံမှုသတင်းအား နှစ်ဖက်လုံးမှ ထုတ်ပြန်ခဲ့သော်လည်း သတင်းဓာတ်ပုံ ထုတ်ပြန်ခြင်းမရှိသည်ကို တွေ့ရသည်။

အလားတူ ပုပ်ရဟန်းမင်းကြီး ဖရန်စစ်သည် ရန်ကုန်မြို့၌ ခေတ္တတည်းခိုနေစဉ် နိုဝင်ဘာ ၂၈ ရက် နံနက်ပိုင်းတွင် သီတဂူဆရာတော် ဒေါက်တာ အရှင်ဥာဏိဿရနှင့် တွေ့ဆုံဆွေးနွေးခြင်း၊ ဘာသာပေါင်းစုံမှ ခေါင်းဆောင်များနှင့် တွေ့ဆုံဆွေးနွေးမှုများ ပြုလုပ်ခဲ့ပြီးနောက် မွန်းလွဲပိုင်းတွင် လေကြောင်းခရီးဖြင့် နေပြည်တော်သို့ သွားရောက်ခဲ့သည်။

နေပြည်တော်သို့ရောက်ရှိချိန်တွင် ပုပ်ရဟန်းမင်းကြီးဖရန်စစ်အား နိုင်ငံတော်သမ္မတ ဦးထင်ကျော်က သမ္မတအိမ်တော်တွင် ဂုဏ်ပြုတပ်ဖွဲ့ဖြင့် ကြိုဆိုခဲ့ပြီး နိုင်ငံတော်သမ္မတ အိမ်တော်သံတမန်ဆောင်ဧည့်ခန်းမတွင် တွေ့ဆုံခဲ့သည်။

အလားတူ ပုပ်ရဟန်းမင်းကြီး ဖရန်စစ်နှင့် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် နိုင်ငံတော်သမ္မတအိမ်တော် သံတမန်ဆောင်ဧည့်ခန်းမတွင် တွေ့ဆုံဆွေးနွေးခဲ့သည်။

ပုပ်ရဟန်းမင်းကြီးသည် နေပြည်တော်သို့ ရောက်ရှိနေချိန်တွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းစင်တာ (၂)တွင် အစိုးရအဖွဲ့ဝင်များ၊ လူမှုအဖွဲ့အစည်းများနှင့် သံတမန်အမှုထမ်းများအား မိန့်ခွန်း ပြောကြားခြင်း အစီအစဉ် ပြုလုပ်ခဲ့ပြီး အဆိုပါ အခမ်းအနားသို့ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကိုယ်တိုင် တက်ရောက်ခဲ့သည်။

နယ်အသီးသီးမှ ရန်ကုန်မြို့သို့ ရောက်ရှိနေသည့် ကက်သလစ်ဘာသာဝင်များသည် နိုဝင်ဘာ ၂၉ ရက် နံနက်တွင် ပုပ်ရဟန်းမင်းကြီး ဖရန်စစ် မစ္ဆားတရားတော်မြတ်ပူဇော်ဝတ်ပြု ဆုတောင်းပွဲပြုလုပ်မည့် ကျိုက္ကဆံကွင်းသို့ နိုဝင်ဘာ ၂၈ ရက် ညအချိန်ကတည်းက ၀င်ရောက်၍ ညအိပ်စောင့်ဆိုင်းခဲ့ကြသည်။

ပုပ်ရဟန်းမင်းကြီး ဖရန်စစ် လူထုပရိသတ်နှင့် မစ္ဆားတရားတော်မြတ်ပူဇော်ဝတ်ပြု ဆုတောင်းပွဲကို နိုဝင်ဘာ ၂၉ ရက် နံနက် ၈ နာရီခန့်တွင် စတင်ကျင်းပခဲ့ပြီး အဆိုပါပွဲသို့ ကက်သလစ်သာသနာ နယ်အသီးသီးမှ ကက်သလစ်ဘာသာဝင် သိန်းချီတက်ရောက်ခဲ့ပြီး ဂိုဏ်းကွဲခရစ်ယာန် ဘာသာဝင်များ၊ ဖိတ်ကြားထားသည့် အခြားဘာသာဝင်များနှင့် ဧည့်သည်တော်များ တက်ရောက်ခဲ့ကာ လူဦးရေ များပြားသော်လည်း ကွင်းအတွင်း ကြိုတင်စီစဉ်ထားသည့်အတိုင်း စနစ်တကျ နေရာယူကာ ဆုတောင်းမှုပြုလုပ်ခဲ့ပြီး ပဋိပက္ခ တစ်စုံတစ်ရာမရှိဘဲ ငြိမ်းချမ်းစွာ ကျင်းပခဲ့သည်ကို တွေ့ရသည်။

အဆိုပါ မစ္ဆားတရားတော်မြတ် ပူဇော်ဝတ်ပြု ဆုတောင်းခြင်းမစတင်မီ ပုပ်ရဟန်းမင်းကြီး ဖရန်စစ်သည် မစ္ဆားတရားတော်မြတ် ပူဇော်ဝတ်ပြုဆုတောင်းပွဲ တက်ရောက်လာသည့် လူထုအကြား မော်တော်ယာဉ်ဖြင့် လှည့်လည်ကာ နှုတ်ဆက်ခဲ့သည်။

ပုပ်ရဟန်းမင်းကြီး ဖရန်စစ် လူထုပရိသတ်နှင့် မစ္ဆားတရားတော်မြတ် ပူဇော်ဝတ်ပြု ဆုတောင်းပွဲတွင် ပုပ်ရဟန်းမင်းကြီး ကိုင်ဆောင်ခဲ့သည့် သိုးထိန်းတောင်ဝှေးတော်မှာ ပုပ်ရဟန်းမင်းကြီးခရီးစဉ်အား မပါဝင်နိုင်ကြသော ကချင်ပြည်နယ်နှင့် ရှမ်းပြည်နယ် မြောက်ပိုင်းတို့တွင် စစ်ဒဏ်ခံနေရသည့် IDP ဒုက္ခသည်စခန်းများမှ ကက်သလစ်ဘာသာဝင်များက ကိုယ်တိုင်ထုလုပ်၍ လက်ဆောင် ပေးအပ်ခဲ့သည့် တောင်ဝှေးတော်လည်းဖြစ်သည်။

ပုပ်ရဟန်းမင်းကြီး၏ မြန်မာနိုင်ငံခရီးစဉ်ဆောင်ပုဒ်မှာ “Love & Peace” “ချစ်ခြင်းမေတ္တာနှင့် ငြိမ်းချမ်းခြင်း” ဖြစ်သည်။

နိုင်ငံတော်သံဃမဟာနာယကအဖွဲ့ ဥက္ကဋ္ဌ ဗန်းမော်ဆရာတော်ကြီး ဒေါက်တာ ဘဒ္ဒန္တကုမာရာဘိဝံသ ဦးဆောင်သော နိုင်ငံတော်သံဃမဟာနာယက ဆရာတော်ကြီး ၁၇ ပါး တတိယအဖွဲ့ခွဲနှင့် ပုပ်ရဟန်းမင်းကြီး ဖရန်စစ်ဦးဆောင်သော အဖွဲ့တို့သည် ရန်ကုန်မြို့၊ ကမ္ဘာအေးကုန်းမြေရှိ ၀ိဇယမင်္ဂလာ ဓမ္မသဘင်တွင် နိုဝင်ဘာ ၂၉ ရက် ညနေပိုင်းတွင် တွေ့ဆုံခဲ့သည်။

ပုပ်ရဟန်းမင်းကြီး ဖရန်စစ် မြန်မာနိုင်ငံသို့ မလာရောက်မီတွင် ရခိုင်အရေးနှင့်ပတ်သက်၍ ထိလွယ်ရှလွယ်ဖြစ်သော အသုံးအနှုန်းများ ပြောကြားမည်ကို မြန်မာနိုင်ငံရှိ ကက်သလစ်ဘာသာဝင် အသိုင်းအ၀ိုင်းက စိုးရိမ်မှုများရှိခဲ့ပြီး ပုပ်ရဟန်းမင်းကြီး သိရှိနိုင်ရန်အတွက် မြန်မာနိုင်ငံကက်သလစ်ဆရာတော်ကြီးများအဖွဲ့ချုပ်မှ တာဝန်ရှိသူအချို့က မီဒီယာများမှတစ်ဆင့် ထုတ်ဖော်ပြောဆိုမှုများ ပြုလုပ်ခဲ့ပြီး ပုပ်ရဟန်းမင်းကြီးခရီးစဉ်သည် ရခိုင်အရေးကိစ္စနှင့် သက်ဆိုင်ခြင်းမရှိဘဲ ကက်သလစ်သာသနာအတွက် လာရောက်ခြင်းသာဖြစ်ကြောင်း ကြိုတင်ရှင်းလင်းခဲ့ရသည်။

အလားတူ ပုပ်ရဟန်းမင်းကြီး မြန်မာနိုင်ငံမလာရောက်မီ ရက်ပိုင်းအလိုတွင် ရခိုင်ပြည်နယ်ဆိုင်ရာ အကြံပေးကော်မရှင်ဥက္ကဋ္ဌ တာဝန်ထမ်းဆောင်ခဲ့သည့် ကုလသမဂ္ဂအတွင်းရေးမှူးချုပ်ဟောင်း မစ္စတာကိုဖီအာနန်သည် ပုပ်ရဟန်းမင်းကြီးအား သွားရောက်တွေ့ဆုံမှု ပြုလုပ်ခဲ့သေးသည်။

မြန်မာနိုင်ငံရှိ ကက်သလစ်ဘာသာဝင်များ စိုးရိမ်ခဲ့သော်လည်း ပုပ်ရဟန်းမင်းကြီး ဖရန်စစ်သည် မြန်မာနိုင်ငံသို့ရောက်ရှိချိန်တွင် ပြောဆိုခဲ့သည့် စကားလုံး အသုံးအနှုန်းများတွင် ရခိုင်အရေးကိစ္စအား ပြောကြားခဲ့ခြင်းမရှိသဖြင့် နိုင်ငံတကာမီဒီယာအချို့နှင့် နိုင်ငံတကာ လူ့အခွင့်အရေးအဖွဲ့အချို့က ဝေဖန်ခဲ့ကြသည်။

ပုပ်ရဟန်းမင်းကြီး၏ မြန်မာနိုင်ငံသို့ သွားရောက်ခဲ့စဉ်အတွင်း ဘင်္ဂါလီ (မူရင်းတွင် ရိုဟင်ဂျာဟုဖော်ပြ) မွတ်စလင် အကျပ်အတည်းအား ထုတ်ဖော်ပြောဆိုရန် ပျက်ကွက်ခဲ့သော်လည်း ပုပ်ရဟန်းမင်းကြီး၏ Moral authority (မူများ သို့မဟုတ် အခြေခံ အမှန်တရားများအား တာဝန်ယူသည့်သြဇာ) ကျဆင်းခဲ့ခြင်းမရှိကြောင်း ဗာတီကန် နိုဝင်ဘာ ၂၉ ရက်တွင် ထုတ်ပြန်ခဲ့သည်။

လေးရက်ကြာခရီးစဉ်အတွင်း ဘင်္ဂါလီ အရေးနှင့်ပတ်သက်သည့် အကြောင်းအရာများကို လက်တွေ့ကျကျ သိမြင်ခဲ့သဖြင့် မြန်မာနိုင်ငံ၏ လုပ်ဆောင်ချက်များအပေါ် ပုပ်ရဟန်းမင်းကြီးက အားပေးချီးမွမ်းခဲ့ခြင်းဖြစ်သည်ဟု ထင်မြင်မိကြောင်း ပုပ်ရဟန်းမင်းကြီး ခရီးစဉ်အပြီး မြန်မာနိုင်ငံ၌ ပြုလုပ်သည့် သတင်းစာ ရှင်းလင်းပွဲတွင် ပုပ်ရဟန်းမင်းကြီး မြန်မာနိုင်ငံခရီးစဉ်ဆိုင်ရာ ပြန်ကြားရေးတာဝန်ခံ ဖာသာစိုးနိုင်က ပြောကြားခဲ့သည်။

ပုပ်ရဟန်းမင်းကြီး ဖရန်စစ်သည် နိုဝင်ဘာ ၂၉ ရက်ညပိုင်းတွင် စိန့်မေရီကာဒီဒြယ် ဘုရားကျောင်းတွင် မြန်မာနိုင်ငံကက်သလစ် ဆရာတော်ကြီးများနှင့်တွေ့ဆုံခဲ့ပြီး နိုဝင်ဘာ ၃၀ ရက် နံနက်ပိုင်းတွင် စိန့်မေရီကာဒီဒြယ်၌ပင် ကက်သလစ်ဘာသာဝင်လူငယ်များနှင့် မစ္ဆားတရားတော်မြတ် ပူဇော်ဝတ်ပြု ဆုတောင်းပွဲပြုလုပ်၍ မွန်းလွဲပိုင်းတွင် မြန်မာနိုင်ငံမှ ပြန်လည်ထွက်ခွာကာ ဘင်္ဂလားဒေ့ရ်ှနိုင်ငံသို့ ဆက်လက် သွားရောက်ခဲ့သည်။

ဘင်္ဂလားဒေ့ရ်ှသို့ရောက်ရှိချိန်တွင် ပုပ်ရဟန်းမင်းကြီးသည် ဘင်္ဂါလီဒုက္ခသည်အချို့အား တွေ့ဆုံမှုပြုလုပ်ခဲ့ပြီး အဆိုပါတွေ့ဆုံမှုတွင် ရိုဟင်ဂျာဟု တစ်ကြိမ်ခေါ်ဝေါ် သုံးစွဲခဲ့သည်။

ပုပ်ရဟန်းမင်းကြီး ဖရန်စစ် (Jorge Mario Bergolio) ကို ၁၉၃၆ ခုနှစ် ဒီဇင်ဘာ ၁၇ ရက်တွင် အာဂျင်တီးနားနိုင်ငံ Buenos Aires မြို့တွင် မွေးဖွားခဲ့သည်။

ဓာတုဗေဒဆိုင်ရာ ကျွမ်းကျင်ပညာရှင် တစ်ဦးအဖြစ် နည်းပညာတက္ကသိုလ်မှ ဘွဲ့ရရှိပြီးနောက် ကက်သလစ်ခရစ်ယာန်ရဟန်းဖြစ် သင်ကျောင်းသို့ တက်ရောက်ခဲ့ပြီး ၁၉၅၈ ခုနှစ် မတ် ၁၁ ရက်တွင် ယေဇူး၏ မိတ်ဆွေများ အသင်းဂိုဏ်းသို့ ၀င်ရောက်ခဲ့သည်။

၁၉၆၉ ခုနှစ် ဒီဇင်ဘာ ၁၃ ရက်တွင် Archbishop Romom Jose Castellano က ၎င်းအား ကက်သလစ်ခရစ်ယာန်ဘုန်းတော်ကြီးအဖြစ် သိက္ခာတင်ပေးခဲ့သည်။ ၁၉၇၃ ခုနှစ်မှ ၂၀၁၃ ခုနှစ်ထိ ကျောင်းအုပ်၊ ၀ိညာဉ်ရေးလမ်းညွှန်၊ အာပတ်ဖြေပေးသူ၊ ကက်သလစ်ဂိုဏ်းချုပ် ဆရာတော်ကြီးနှင့် ရဟန်းအမတ် (ကာဒီနယ်) အဖြစ် တာဝန်ထမ်းဆောင်ခဲ့ပြီး အသက် ၇၆ နှစ်အရွယ် ၂၀၁၃ ခုနှစ် မတ် ၁၃ ရက်တွင် ရိုမန်ကက်သလစ်သာသနာတော်၏ ၂၆၆ ယောက်မြောက် ပုပ်ရဟန်းမင်းကြီး ဖြစ်လာခြင်းဖြစ်သည်။

“ရဟန်းမင်းကြီး ကြွလာခြင်းဟာ အောင်မြင်တယ်၊ မအောင်မြင်ဘူးဆိုတဲ့ဟာကိုတော့ ကျွန်တော်တို့နောင်အချိန်မှာ လာမယ့်လတွေမှာ သူ့ရဲ့ရလဒ်ကိုကြည့်ပြီးတဲ့နောက် အောင်မြင်တယ်၊ မအောင်မြင်ဘူးဆိုတာ သိရမှာဖြစ်ပါတယ်။ ရဟန်းမင်းကြီးမိန့်ဆိုတဲ့စကား၊ မိန့်ခွန်းတွေထဲမှာဆိုရင် နိုင်ငံတော်ရဲ့အစိုးရအတွက်လည်းပဲ လုပ်ဖော်ရမယ့်၊ ပါဝင်ပတ်သက်ရမယ့် လုပ်ငန်းတွေရှိသလို၊ နိုင်ငံတော်ရဲ့ တပ်မတော်မှာလည်းပဲ ရဟန်းမင်းကြီးအနေနဲ့က မှာထားချက်တွေလည်းပဲ ရှိပါတယ်။ ဒီဟာအပြင် ဘာသာရေးခေါင်းဆောင်များအတွက် လုပ်ရမယ့်ကိစ္စ၊ ဒါတင်မကဘဲပဲနဲ့ ဗုဒ္ဓဘာသာ သံဃာတော်များအတွက်လည်းပဲ ရဟန်းမင်းကြီးမှာထားတဲ့ အချက်တွေရှိသလို၊ ဒီကက်သလစ် အသင်းတော်အတွက် ဆရာတော်ကြီးများနဲ့ နောက်ဆုံးလူငယ်များတိုင်အောင် ရဟန်းမင်းကြီးမှာပေးထားတဲ့ လမ်းညွှန်ထားတဲ့ အရာတွေတော်တော်များများ ရှိပါတယ်။ ဒီရဟန်းမင်းကြီး ကြွလာတဲ့ခရီးစဉ်က ဆုံးသွားပေမယ့် ကျွန်တော်တို့မြန်မာပြည်အတွက် အားလုံးအတွက်၊ ကောင်းကျိုးအတွက်လုပ်ရမယ့် လုပ်ငန်းဟာ အစနိဒါန်းပဲရှိပါတယ်။ အားလုံးကြိုးစားသွားမှသာလျှင် လာမယ့်လတွေ၊ နှစ်တွေရဲ့ ရလဒ်ပေါ်မူတည်ပြီးတဲ့နောက် အကျိုးရှိတယ်၊ မရှိဘူးဆိုတာ အကဲဖြတ်နိုင်မှာ ဖြစ်ပါတယ်” ဟု ရန်ကုန်ကက်သလစ်ဂိုဏ်းချုပ် ဆရာတော်ကြီး ကာဒီနယ် ချားလစ်စ်ဘိုက Radio Veritas Asia Myanmar Service ဖေ့စ်ဘွတ်စာမျက်နှာမှ တစ်ဆင့် ဒီဇင်ဘာ ၁၁ ရက်တွင် ပြောကြားသည်။

NLD အစိုးရလက်ထက် ၀န်ကြီးချုပ်တာဝန်က ပထမဦးဆုံးနုတ်ထွက်ခဲ့သည့် ဦးမင်းမင်းဦး

၂၀၁၆ ခုနှစ် ဒီဇင်ဘာ ၁၁ ရက်က ရန်ကုန်မြို့ ဗဟန်းမြို့နယ်ရှိ အမျိုးသားဒီမိုကရေစီအဖွဲ့ချုပ်ပါတီရုံးချုပ်တွင် ခေါ်ယူမေးမြန်းခံရမှုအပြီး မီဒီယာများ၏ မေးမြန်းမှုကို ဖြေကြားနေသည့် ဦးမင်းမင်းဦးအား တွေ့ရစဉ်

မွန်ပြည်နယ်ဝန်ကြီးချုပ် ဦးမင်းမင်းဦး ရာထူးတာဝန်မှ နုတ်ထွက်မှုသည် အမျိုးသားဒီမိုကရေစီအဖွဲ့ချုပ် (NLD) ပါတီဦးဆောင်သည့် အစိုးရလက်ထက်တွင် ပထမဆုံးဖြစ်သဖြင့် ၂၀၁၇ ခုနှစ် ထင်ရှားကျော်ကြားဖြစ်ရပ်တစ်ခုအဖြစ် ဖော်ပြအပ်ပါသည်။

နိုင်ငံတော်သမ္မတဦးထင်ကျော်က ဖေဖော်ဝါရီ ၂၃ ရက်တွင် အမိန့်အမှတ် (၃/ ၂၀၁၇)ဖြင့် မွန်ပြည်နယ်ဝန်ကြီးချုပ် ဦးမင်းမင်းဦးအား ၀န်ကြီးချုပ်နှင့် ၀န်ကြီးရာထူးများမှ နုတ်ထွက်ခွင့်ပြုကြောင်း ထုတ်ပြန်ခဲ့သည်။

ထိုသို့ တရားဝင် နိုင်ငံတော်သမ္မတက ဦးမင်းမင်းဦးအား နုတ်ထွက်ခွင့်ပြုကြောင်း အမိန့်စာမထုတ်ပြန်မီ ကတည်းကပင် ဦးမင်းမင်းဦးသည် ပါတီတွင် စုံစမ်းစစ်ဆေးမှုကို ဦးစွာခံခဲ့ရပြီးနောက် ၎င်းကိုယ်တိုင် ၀န်ကြီးချုပ်ရာထူးနှင့် ၀န်ကြီးရာထူးများမှ နုတ်ထွက်စာအား နိုင်ငံတော်သမ္မတထံသို့ ဖေဖော်ဝါရီ ၂၀ ရက်တွင် တင်ပြခဲ့ခြင်းဖြစ်သည်။

ဦးမင်းမင်းဦးသည် ၂၀၁၅ အထွေထွေ ရွေးကောက်ပွဲတွင် ဘီးလင်းမြို့နယ် ပြည်နယ်လွှတ်တော်မဲဆန္ဒနယ် အမှတ် (၂) မှ လွှတ်တော်ကိုယ်စားလှယ်အဖြစ် ရွေးချယ်တင်မြှောက်ခံရသူဖြစ်ပြီး မွန်ပြည်နယ် လွှတ်တော် ဒုတိယဥက္ကဋ္ဌအဖြစ် ဦးစွာရွေးချယ် တင်မြှောက်ခံရပြီးနောက် မွန်ပြည်နယ်ဝန်ကြီးချုပ်အဖြစ် ရွေးချယ်ခန့်အပ်ခံခဲ့ရခြင်း ဖြစ်သည်။

ထို့ပြင် ဦးမင်းမင်းဦးသည် ၀န်ကြီးချုပ် တာဝန်နှင့်အတူ မွန်ပြည်နယ်အစိုးရအဖွဲ့ စည်ပင်သာယာရေးနှင့် ဆောက်လုပ်ရေးဝန်ကြီးဌာန ၀န်ကြီးတာဝန်ကိုလည်း ပူးတွဲထမ်းဆောင်ခဲ့သည်။

ဦးမင်းမင်းဦးသည် တိုင်ကြားခံရခြင်းဖြစ်ပြီး မည်သည့်အကြောင်းအရာများကြောင့် တိုင်ကြားခံရသည်ကို လက်ရှိအချိန်အထိ မည်သူမျှ ထုတ်ဖော်ပြောကြားခြင်းမရှိခဲ့ဘဲ တိုင်ကြားခံရမှုအပေါ် အမျိုးသားဒီမိုကရေစီအဖွဲ့ချုပ်ပါတီက ၂၀၁၆ ခုနှစ် နိုဝင်ဘာ၂၈ ရက်တွင် လေ့လာသုံးသပ်ရေးအဖွဲ့ ဖွဲ့စည်းကာ စုံစမ်းစစ်ဆေးမှုများ ပြုလုပ်ခဲ့ပြီး စုံစမ်းတွေ့ရှိချက်အရ ဦးမင်းမင်းဦးတွင် အချက်အချို့ အပြစ်ရှိကြောင်း တွေ့ရှိရသဖြင့် လေ့လာသုံးသပ်ရေးအဖွဲ့က ပါတီဗဟိုအလုပ်အမှုဆောင် အဖွဲ့ထံ အစီရင်ခံခဲ့သည်။

ထို့နောက် အုပ်ချုပ်ရေးပိုင်းက မည်သို့ အရေးယူ ဆောင်ရွက်မည်ကို နယ်ပယ်အသီးသီးမှ စောင့်ကြည့်နေချိန်တွင် ဦးမင်းမင်းဦးက နုတ်ထွက်ခဲ့ခြင်းဖြစ်သည်။

ထိုသို့ ၀န်ကြီးချုပ်နှင့် ၀န်ကြီးတာဝန်မှ နုတ်ထွက်ချိန်တွင် ဦးမင်းမင်းဦးက မီဒီယာတစ်ခုအား ဖြေကြားရာတွင် ပါတီအားမကြိုက်၍ နုတ်ထွက်ခြင်းဖြစ်ကြောင်း ပြောကြားခဲ့မှုအပေါ်တွင်လည်း လှုပ်ခတ်မှုတစ်ခု ဖြစ်ပေါ်ခဲ့သည်။

အဆိုပါ ဖြေကြားမှုနှင့်ပတ်သက်၍ နိုင်ငံတော်သမ္မတက မွန်ပြည်နယ်ဝန်ကြီးချုပ် ဦးမင်းမင်းဦးအား တရားဝင် နုတ်ထွက်ခွင့်ပြုကြောင်း အမိန့်မထုတ်ပြန်မီ တစ်ရက်အလို ဖေဖော်ဝါရီ ၂၂ ရက်တွင် ဦးမင်းမင်းဦးသည် မွန်ပြည်နယ်အစိုးရအဖွဲ့ရုံးခန်းတွင် မီဒီယာများနှင့် တွေ့ဆုံကာ ၎င်းအနေဖြင့် နုတ်ထွက်ခြင်းမှာ ပါတီအားမကြိုက်၍ မဟုတ်ကြောင်း၊ အနားယူလိုသည့်အတွက် နုတ်ထွက်ခြင်းဖြစ်ကြောင်း၊ နုတ်ထွက်ရာတွင် ၀န်ကြီးချုပ်၊ ၀န်ကြီးနှင့် လွှတ်တော်ကိုယ်စားလှယ်အဖြစ်မှပါ နုတ်ထွက်မည်ကို အားလုံးနုတ်ထွက်မည်ဟု ပြောဆိုလိုက်ခြင်းဖြစ်ကြောင်း၊ အင်တာဗျူးပြုလုပ်စဉ်က အမှတ်မထင်ပါသွားခြင်းဖြစ်ကြောင်း၊ မိမိအနေဖြင့် အမေ (ဒေါ်အောင်ဆန်းစုကြည်)ကို ချစ်သည့်အတွက် NLD ပါတီဝင်ကာ လုပ်ဆောင်နေခြင်းဖြစ်ကြောင်း၊ ပါတီတစ်ခုဝင်ရောက်ပါက ပါတီစည်းမျဉ်းစည်းကမ်းနှင့်အညီ ၀င်ရောက်ရမည်ဖြစ်ပြီး ပြန်ထွက်လိုပါက ထွက်လို့ရကြောင်းကို ပြောလိုက်ခြင်းသာဖြစ်ကြောင်း၊ နုတ်ထွက်သည့်နောက်ပိုင်းတွင်လည်း NLD ပါတီအတွက် တတ်နိုင်သရွှေ့ ပံ့ပိုးလုပ်ဆောင်သွားမည်ဖြစ်ကြောင်း ပြန်လည်ဖြေရှင်းခဲ့ရသည်။

ဦးမင်းမင်းဦးအား ၀န်ကြီးချုပ်ရာထူးမှ မနုတ်ထွက်စေရေးအတွက် ဒေသခံပြည်သူ ၁၀၀ ခန့်က ဖေဖော်ဝါရီ ၂၀ ရက်တွင် မော်လမြိုင်မြို့ရှိ မွန်ပြည်နယ်အစိုးရအဖွဲ့ရုံးရှေ့တွင် လာရောက် တောင်းဆိုမှု ပြုလုပ်ခဲ့သည့် ဖြစ်စဉ်လည်း ဖြစ်ပေါ်ခဲ့သေးသည်။

လက်ရှိတွင် ဦးမင်းမင်းဦးသည် ပြည်နယ်လွှတ်တော်ကိုယ်စားလှယ် တာဝန်အား ဆက်လက်ထမ်းဆောင်လျက် NLD ပါတီမှလည်း နုတ်ထွက်ထားခြင်း မရှိသေးကြောင်း သိရသည်။

မွန်ပြည်နယ်ဝန်ကြီးချုပ်တာဝန်မှ ဦးမင်းမင်းဦး နုတ်ထွက်ပြီးနောက်တွင် ၀န်ကြီးချုပ်အသစ်အဖြစ် အမျိုးသားဒီမိုကရေစီအဖွဲ့ချုပ်ပါတီဝင် ကျိုက်ထိုမြို့နယ် မဲဆန္ဒနယ် အမှတ် (၂) ပြည်နယ်လွှတ်တော်ကိုယ်စားလှယ် ဒေါက်တာ အေးဇံအား ခန့်အပ်ခဲ့သည်။

ဒေါက်တာအေးဇံသည် ၁၉၉၀ ရွေးကောက်ပွဲတွင် ကျိုက်ထိုမြို့နယ် မဲဆန္ဒနယ် အမှတ် (၂) ၌ပင် အမျိုးသားဒီမိုကရေစီအဖွဲ့ချုပ် ကိုယ်စားပြု လွှတ်တော်ကိုယ်စားလှယ်အဖြစ် ၀င်ရောက်ယှဉ်ပြိုင်ခဲ့ရာ ရွေးချယ်တင်မြှောက်ခံခဲ့ရသူလည်းဖြစ်သည်။
ဦးမင်းမင်းဦးကဲ့သို့ပင် တနင်္သာရီတိုင်းဒေသကြီး လွှတ်တော်ဥက္ကဋ္ဌနှင့် ဒုတိယဥက္ကဋ္ဌတို့သည်လည်း တိုင်ကြားခံရပြီး အဆိုပါ တိုင်ကြားမှုအပေါ် ပါတီလေ့လာသုံးသပ်ရေး အဖွဲ့က စစ်ဆေးရာတွင် တစ်ဦးမှာ ဂုဏ်သိက္ခာနှင့် မလျော်ညီသော အလုပ်လုပ်ထားကြောင်း အမျိုးသားဒီမိုကရေစီအဖွဲ့ချုပ် (NLD) ပါတီ လေ့လာသုံးသပ်ရေးအဖွဲ့ခေါင်းဆောင် ဦးဥာဏ်ဝင်းက ဇန်န၀ါရီ ၉ ရက်တွင် ပြောကြားခဲ့ပြီး မည်သို့အရေးယူခဲ့သည်ကို မသိရှိရပေ။

တနင်္သာရီတိုင်းဒေသကြီး လွှတ်တော်ဥက္ကဋ္ဌနှင့် ဒုတိယဥက္ကဋ္ဌတို့မှာ လွှတ်တော်လုပ်ငန်းစဉ်များ လုပ်ဆောင်ရာတွင် အားနည်းခြင်းနှင့် လွှတ်တော်တင်ဒါခေါ်ယူရာတွင် နီးစပ်သူများအား ချထားပေးသောကြောင့် ပြန်လည် စိစစ်ပေးရန် လွှတ်တော်သုံးရပ်မှ ကိုယ်စားလှယ် ၁၉ ဦးက လက်မှတ်ရေးထိုး၍ နိုင်ငံတော်၏အတိုင်ပင်ခံပုဂ္ဂိုလ်၊ လွှတ်တော်ဥက္ကဋ္ဌ နှစ်ဦးနှင့် ပါတီတာဝန်ရှိသူများထံ တိုင်ကြားခဲ့ခြင်းဖြစ်ကြောင်း တိုင်ကြားခံခဲ့ရသည့်ကာယကံရှင်များ ထိုစဉ်အချိန်က ပြောကြားခဲ့သည်။

NLD ပါတီဦးဆောင်သော အစိုးရသစ်လက်ထက်တွင် ဦးမင်းမင်းဦး နုတ်ထွက်ခြင်းသည် ၀န်ကြီးချုပ်များအနက် ပထမဦးဆုံးဖြစ်ပြီး အဆိုပါကိစ္စရပ်မတိုင်မီ ၂၀၁၆ ခုနှစ်ကလည်း စိုက်ပျိုးရေးနယ်ပယ်တွင် ကောင်းသတင်းဖြင့် လူသိများသည့် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယ၀န်ကြီး ဒေါက်တာထွန်းဝင်းသည် တာဝန်ထမ်းဆောင်ပြီး ခြောက်လကျော်အကြာတွင် ပထမဆုံးအဖြစ် ဒုတိယ၀န်ကြီးတာဝန်မှ ရပ်စဲခံရပြီး ထိုသို့တာဝန်ရပ်စဲမှုအပေါ် ဝေဖန်မှုများစွာ ဖြစ်ပေါ်ခဲ့သေးသည်။

ငွေစက္ကူများပေါ် ပြန်လည် ရောက်ရှိလာတော့မည့် ဗိုလ်ချုပ်အောင်ဆန်း ရုပ်ပုံလွှာများ

နိုဝင်ဘာ ၁၇ ရက် ပြည်သူ့လွှတ်တော် အစည်းအဝေးတွင် ငွေစက္ကူများအပေါ်၌ ဗိုလ်ချုပ်အောင်ဆန်းရုပ်ပုံဖြင့် ရိုက်နှိပ် ထုတ်ဝေရန် အစိုးရအား တိုက်တွန်းသည့်အဆိုကို တပ်မတော်သား လွှတ်တော်ကိုယ်စားလှယ်များနှင့် ပြည်ခိုင်ဖြိုးပါတီဝင် လွှတ်တော်ကိုယ်စားလှယ် တစ်ဦးက မတ်တတ်ရပ် ကန့်ကွက်စဉ် (ဓာတ်ပုံ-မျိုးမင်းထက်)

အနာဂတ်တွင် ရိုက်နှိပ်ထုတ်ဝေရန်ရှိ လာမည့် ငွေစက္ကူများအပေါ်၌ ဗိုလ်ချုပ်အောင်ဆန်း ရုပ်ပုံများဖြင့် ရိုက်နှိပ်ထုတ်ဝေရန် ပြည်သူ့လွှတ်တော်က အစိုးရကို တိုက်တွန်းထားသည့်အတွက် အဆိုပါကိစ္စကို ၂၀၁၇ ခုနှစ် ထင်ရှားကျော်ကြား ဖြစ်ရပ်တစ်ခုအဖြစ် ဖော်ပြအပ်ပါသည်။

အောက်တိုဘာ ၂၇ ရက်က ကျင်းပသည့် ဒုတိယအကြိမ် ပြည်သူ့လွှတ်တော် ဆဋ္ဌမပုံမှန် အစည်းအဝေး၌ အမျိုးသားဒီမိုကရေစီအဖွဲ့ချုပ် (NLD) ပါတီ၊ မြိုင်မဲဆန္ဒနယ်မှ လွှတ်တော်ကိုယ်စားလှယ် ဦးအောင်ခင်ဝင်းက ရှေ့လာမည့် အနာဂတ်တွင် ရိုက်နှိပ်ထုတ်ဝေရန်ရှိသည့် ငွေစက္ကူများပေါ်၌ ဗိုလ်ချုပ်အောင်ဆန်းပုံဖြင့် ထုတ်ပေးရန် ပြည်ထောင်စုအစိုးရအား တိုက်တွန်းကြောင်း အဆိုတစ်ရပ် တင်သွင်းခဲ့သည်။

အဆိုရှင်က မြန်မာနိုင်ငံတော် ဗဟိုဘဏ်ဥပဒေအရ ဗဟိုဘဏ်က ငွေစက္ကူများနှင့် ဒင်္ဂါးများ၏ တန်ဖိုးအဆင်အပြင် ဖွဲ့စည်းပါဝင်သည့် ၀တ္ထုပစ္စည်း အခြားခွဲခြားနိုင်သော လက္ခဏာများကို အစိုးရအဖွဲ့၏ သဘောတူညီချက်ဖြင့် သတ်မှတ်ရမည်ဟု လည်းကောင်း၊ ဗဟိုဘဏ်သည် မည်သည့် ငွေစက္ကူအမျိုးအစားကိုမဆို ပြောင်းလဲသုံးစွဲရန် လိုအပ်ပါက အစိုးရအဖွဲ့၏ သဘောတူညီချက်ဖြင့် ဆောင်ရွက်နိုင်သည်ဟု လည်းကောင်း၊ ယင်းဆောင်ရွက်ချက် အခြေအနေများကို အနီးစပ်ဆုံး ကျင်းပသည့် ပြည်ထောင်စုလွှတ်တော် အစည်းအဝေးသို့ တင်ပြအတည်ပြုချက် ရယူရမည်ဟု လည်းကောင်း ပြဋ္ဌာန်းထားသည့်အတွက် အစိုးရအဖွဲ့နှင့် ပြည်ထောင်စုလွှတ်တော်ကသာ အဓိကကျနေသောကြောင့် ပြည်ထောင်စုအစိုးရအား တိုက်တွန်းကြောင်း အဆိုတင်သွင်းရခြင်းဖြစ်ကြောင်း ပြောကြားခဲ့သည်။

ငွေစက္ကူဆိုသည်မှာ လူတိုင်း၏ လက်ထဲတွင် ကိုင်တွယ် သုံးစွဲနေသည်ဖြစ်၍ နှစ်ကြာရှည် သုံးစွဲလာသည့်အခါ ဟောင်းနွမ်းခြင်း၊ စုတ်ပြဲခြင်း၊ ရေနစ်၍ ပျက်စီးခြင်း၊ မီးလောင်၍ ပြာဖြစ်ခြင်းစသည့် ပျက်စီးခြင်းအမျိုးမျိုးကြောင့် လျော့နည်းသွားမှု ရှိလာမည်ဖြစ်ကာ လျော့နည်းသွားမှုများကို အစားထိုးသည့်အခါဖြစ်စေ၊ မြန်မာနိုင်ငံတော် ဗဟိုဘဏ်၏ ဖြေကြားချက်အရ လုံခြုံရေးအဆင့်အတန်း တိုးမြှင့်ထုတ်ဝေသည့်အခါ ဖြစ်စေ၊ အရွယ်အစားအသစ်ဖြင့် ထုတ်ဝေသောအခါ ဖြစ်စေ၊ ရှေ့အနာဂတ်တွင် ထုတ်ဝေမည့်အခါတိုင်း ဗိုလ်ချုပ်အောင်ဆန်း ရုပ်ပုံများဖြင့် ထုတ်ဝေသွားရန်ဖြစ်ကြောင်း အဆိုရှင်က လွှတ်တော်သို့ ဆွေးနွေးတင်ပြခဲ့သည်။

မြန်မာနိုင်ငံတော် ဗဟိုဘဏ်၏ ဖြေကြားချက်အရ ၂၀၀၉ ခုနှစ်တွင် ကျပ် ၅၀၀၀ တန် ငွေစက္ကူများ၊ ၂၀၁၂ ခုနှစ်တွင် ကျပ် ၁၀၀၀၀ တန် ငွေစက္ကူများ၊ ၂၀၁၄ ခုနှစ်တွင် အရွယ်အစားသစ်ဖြင့် ကျပ် ၂၀၀ တန်၊ ကျပ် ၅၀၀ တန်၊ ကျပ် ၁၀၀၀ တန် ငွေစက္ကူများ၊ ၂၀၁၄-၂၀၁၅ ဘဏ္ဍာနှစ်တွင် လုံခြုံရေးအဆင့်အတန်း တိုးမြှင့်သည့် ကျပ် ၅၀၀၀ တန် ငွေစက္ကူနှင့် ကျပ် ၁၀၀၀၀ တန် ငွေစက္ကူများ ထုတ်ဝေခဲ့ကြောင်း သိရှိရပြီး ထိုသို့ ရှစ်နှစ်ကျော်အတွင်း၌ ငါးကြိမ်ရိုက်နှိပ် ထုတ်ဝေခဲ့ရာ နှစ်နှစ် သုံးနှစ် တစ်ကြိမ်ခန့် ထုတ်ဝေပေးခဲ့သည်ကို တွေ့ရှိရကြောင်း၊ ထို့ကြောင့် ၂၀၁၇ ခုနှစ်မှစ၍ နောက်ပိုင်း ရိုက်နှိပ်ထုတ်ဝေမည့် ငွေစက္ကူများကို ဗိုလ်ချုပ်အောင်ဆန်းရုပ်ပုံများထဲမှ သင့်လျော်သည့်ပုံများဖြင့် ရိုက်နှိပ်ထုတ်ဝေသွားရန် ဦးအောင်ခင်ဝင်းက တင်ပြခဲ့သည်။

ထို့နောက် ယင်းအဆိုကို ထောက်ခံခဲ့သည့် သရက်မဲဆန္ဒနယ် အမျိုးသားဒီမိုကရေစီအဖွဲ့ချုပ်ပါတီမှ ပြည်သူ့လွှတ်တော် ဦးကံမြင့်က ငွေစက္ကူများနှင့် ပတ်သက်၍ မျက်မှောက်ကာလတွင် ကမ္ဘာ့အလယ်၌ နိုင်ငံအတွက် ဂုဏ်ယူဝင့်ကြွားနိုင်မှု မရှိသည့် ဆင်ရုပ်၊ ခြင်္သေ့ရုပ်များဖြင့် သုံးစွဲနေရသည်မှာ တွေးမိတိုင်း ရှက်စရာကောင်းလှသည်ဟု ဆွေးနွေး ပြောကြားခဲ့သည်။

၎င်းအဆိုကို ပြည်သူ့လွှတ်တော်က လက်ခံဆွေးနွေးမည် ဖြစ်ကြောင်း ဆုံးဖြတ်ခဲ့ပြီး နိုဝင်ဘာ ၁၇ ရက်တွင် အဆိုအပေါ် ပြည်သူ့လွှတ်တော် ကိုယ်စားလှယ် ကိုးဦးက ဆွေးနွေးရာတွင် လွှတ်တော်ကိုယ်စားလှယ် ရှစ်ဦးက အကြံပြုထောက်ခံ ဆွေးနွေးခဲ့ပြီး တပ်မတော်သား ပြည်သူ့လွှတ်တော်ကိုယ်စားလှယ် ဒုတိယဗိုလ်မှူးကြီး ကျော်မင်းလှိုင်က ငွေစက္ကူပုံစံအသစ် ရိုက်နှိပ်ခြင်းကို လတ်တလောအခြေအနေအရ မဆောင်ရွက်သင့်ပါကြောင်း အကြံပြုဆွေးနွေးခဲ့သည်။

၁၉၅၂ ခုနှစ် ငွေကြေးအုပ်ချုပ်မှုအဖွဲ့မှ စတင်ကာ ၂၀၁၂ခုနှစ်အထိ နှစ် ၆၀ ကာလအတွင်း ငွေစက္ကူရိုက်နှိပ်မှု ၁၉ ကြိမ် ရှိခဲ့ပြီး ၁၉၉၀ ပြည့်နှစ်အထိ ထုတ်ဝေခဲ့သည့် ငွေစက္ကူများတွင် ဗိုလ်ချုပ်အောင်ဆန်းပုံများကို မျက်နှာစာတွင် ဖော်ပြခဲ့သည်ကို တွေ့ရှိရကြောင်း၊ လွတ်လပ်ရေး ရပြီးနောက် ငွေစက္ကူများ စတင်ထုတ်ဝေစဉ်ကပင် လူပုဂ္ဂိုလ်နှင့် စပ်လျဉ်း၍ အမျိုးသားခေါင်းဆောင်ကြီး ဗိုလ်ချုပ်အောင်ဆန်းပုံ၊ ဆရာစံနှင့် သခင်ဖိုးလှကြီးတို့၏ ပုံများကို ထည့်သွင်းဖော်ပြပေးခြင်းမှာ အထွတ်အမြတ် တန်ဖိုးထားခြင်း၊ အသိအမှတ်ပြုခြင်း၊ လွတ်လပ်ရေးကြိုးပမ်းမှု သမိုင်းနှင့် မျိုးချစ်စိတ်ဓာတ် ရှင်သန်စေရေးတို့အတွက် နောင်လာနောက်သားများ အားကျအတုယူစေရန်အတွက် ဖြစ်ကြောင်း၊ ဒေါင်း၊ ခြင်္သေ့နှင့် ဆင်ဖြူတော်များကို ရိုက်နှိပ်ဖော်ပြခြင်းမှာ မြန်မာတိုင်းရင်းသား အားလုံးက မြတ်နိုးတန်ဖိုးထားပြီး နိုင်ငံတော်၏ အမှတ်လက္ခဏာ တစ်ရပ်အနေဖြင့် အသိအမှတ်ပြုထားခြင်းကြောင့် ဖြစ်ကြောင်း၊ မည်သည့်အဖွဲ့အစည်းကိုမှ ကိုယ်စားပြု ဖော်ပြခြင်း မဟုတ်ပါကြောင်း ဒုတိယဗိုလ်မှူးကြီး ကျော်မင်းလှိုင် က ဆွေးနွေးတင်ပြခဲ့သည်။

ထို့ပြင် ငွေစက္ကူများကို ကိုင်တွယ်မှု၊ သယ်ဆောင်မှု၊ ထိန်းသိမ်းမှုပိုင်းတွင် လွန်စွာ အားနည်းသည်ကို တွေ့ရကြောင်း၊ အမျိုးသားခေါင်းဆောင်ကြီး ဗိုလ်ချုပ်အောင်ဆန်း၏ ဓာတ်ပုံ၊ ရုပ်တုများကို နိုင်ငံသူ၊ နိုင်ငံသားများက အမြတ်တနိုးထား ဂုဏ်ပြုနေမှုကြောင့် သပ်ရပ်တင့်တယ်ပြီး လေးစားကြည်ညိုဖွယ် ဖြစ်နေသော်လည်း ငွေစက္ကူတွင် ရိုက်နှိပ်ဖော်ပြထားသည့် ဗိုလ်ချုပ်ပုံများကတော့ ကိုင်တွယ်ရာတွင် စနစ်ကျမှုမရှိခြင်း၊ ထားသိုမှု၊ သယ်ဆောင်မှုများတွင် အလေးထားမှု မရှိခြင်းများကြောင့် ဟောင်းနွမ်းမှေးမှိန်ပြီး စုတ်ပြဲနေတာကို စိတ်မကောင်းစွာ မြင်တွေ့ကြရမှာဖြစ်ကြောင်း ဒုတိယဗိုလ်မှူးကြီး ကျော်မင်းလှိုင်က ဆိုသည်။

ဗိုလ်ချုပ်အောင်ဆန်း၏ ဂုဏ်၊ စွမ်းဆောင်ရည်တွေကို အောက်မေ့သတိရပြီး နိုင်ငံတော်၏ ငွေစက္ကူတွင် ဗိုလ်ချုပ်အောင်ဆန်းပုံဖြင့် ရိုက်နှိပ် ထုတ်ဝေသင့်သည့်အတွက် အဆိုကို ထောက်ခံကြောင်း ဒေါ်ဝင့်ဝါထွန်းက တင်ပြခဲ့သည်။

အဆိုအပေါ် “တကယ်တမ်းကျတော့ ငွေစက္ကူနဲ့ ငွေဒင်္ဂါးများ ထုတ်ဝေခြင်းဟာ မြန်မာနိုင်ငံတော် ဗဟိုဘဏ်ရဲ့ တာဝန်ဖြစ်တဲ့အတွက် အားလုံးတင်ပြသွားသလိုပဲ ကျွန်တော်တို့ မြန်မာနိုင်ငံတော် ဗဟိုဘဏ်အနေနဲ့လည်း ရှေ့အနာဂတ်မှာ ရိုက်နှိပ်ထုတ်ဝေရန် ရှိလာမည့် ငွေစက္ကူများအပေါ် ဗိုလ်ချုပ်အောင်ဆန်း ရုပ်ပုံများနဲ့ ရိုက်နှိပ်ထုတ်ဝေရန် ဆိုတာဟာ တကယ်တမ်းတော့ မြန်မာနိုင်ငံတော် ဗဟိုဘဏ်ရဲ့သဘောထားနဲ့လည်း တစ်ထပ်တည်း ဖြစ်ပါတယ်။ အပြစ်မဲ့အဆိုလည်း ဖြစ်တဲ့အတွက် မြန်မာနိုင်ငံတော် ဗဟိုဘဏ်အနေနဲ့ ပြည်ထောင်စုအစိုးရရဲ့ လမ်းညွှန်ချက်နဲ့အညီ ဥပဒေနဲ့အညီ ဆောင်ရွက်သွားမှာ ဖြစ်ပါကြောင်း ထောက်ခံတင်ပြပါတယ်”ဟု ဒုတိယဥက္ကဋ္ဌ ဦးစိုးမင်းက ပြောကြားခဲ့သည်။

ရှေ့အနာဂတ် ကာလတွင် ရိုက်နှိပ်ထုတ်ဝေရန် ရှိလာမည့် ငွေစက္ကူများအပေါ်တွင် ဗိုလ်ချုပ်အောင်ဆန်း ရုပ်ပုံများဖြင့် ရိုက်နှိပ်ထုတ်ဝေရန် ပြည်ထောင်စုအစိုးရအား တိုက်တွန်းကြောင်းအဆိုကို ပြည်သူ့လွှတ်တော်က အတည်ပြုပေးရန် မြန်မာနိုင်ငံတော် ဗဟိုဘဏ် ဒုတိယဥက္ကဋ္ဌ ဦးစိုးမင်းက ထောက်ခံတင်ပြခဲ့ပြီး အဆိုရှင် ဦးအောင်ခင်ဝင်းကလည်း အဆိုကို လွှတ်တော်က အတည်ပြုပေးရန် တင်ပြခဲ့သည်။

ထို့နောက် အဆိုနှင့်ပတ်သက်၍ ပြည်သူ့လွှတ်တော်၏ အဆုံးအဖြတ် ရယူရာတွင် လွှတ်တော်ဥက္ကဋ္ဌ ဦးဝင်းမြင့်က အဆိုကို ကန့်ကွက်ဆန္ဒမဲရှိပါက မတ်တတ်ရပ်ပေးရန် ပြောကြားခဲ့သည့်အတွက် တပ်မတော်သား ပြည်သူ့လွှတ်တော် ကိုယ်စားလှယ်များနှင့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီဝင် လွှတ်တော်ကိုယ်စားလှယ် တစ်ဦး စုစုပေါင်း ၁၀၉ ဦးက မတ်တတ်ရပ် ကန့်ကွက်ခဲ့ကြပြီး အဆိုအပေါ် ကြားနေမဲ မရှိဘဲ ထောက်ခံဆန္ဒမဲ ၂၈၆ မဲဖြင့် ပြည်သူ့လွှတ်တော်က အဆိုကို အတည်ပြုကြောင်း ဆုံးဖြတ်ခဲ့သည်။

အနာဂတ် ကာလတွင် ရိုက်နှိပ်ထုတ်ဝေရန် ရှိလာမည့် ငွေစက္ကူများအပေါ်တွင် ဗိုလ်ချုပ်အောင်ဆန်း ရုပ်ပုံများဖြင့် ရိုက်နှိပ်ထုတ်ဝေရန် အစိုးရကို တိုက်တွန်းသည့် အဆိုအား ပြည်သူ့လွှတ်တော်က အတည်ပြုခဲ့သည့်အတွက် ဗိုလ်ချုပ်အောင်ဆန်းရုပ်ပုံများဖြင့် ငွေစက္ကူများကို ပြန်လည်မြင်တွေ့ရမည်ဖြစ်ပြီး လွှတ်တော်၏ ဆုံးဖြတ်ချက်ကို အစိုးရအနေဖြင့် လိုက်နာဆောင်ရွက်ရမည် ဖြစ်သည်။

သို့သော် မြန်မာနိုင်ငံတော် ဗဟိုဘဏ် ဒုတိယဥက္ကဋ္ဌ ဦးစိုးမင်းအနေဖြင့် ဗိုလ်ချုပ်အောင်ဆန်း ရုပ်ပုံဖြင့် ရိုက်နှိပ်ထုတ်ဝေမည့် ငွေစက္ကူများနှင့် ပတ်သက်၍ မည်သည့်နှစ်တွင် ထုတ်ဝေမည်၊ ငွေစက္ကူပုံစံ စသည့် အချက်အလက်များကို လွှတ်တော်သို့ ရှင်းလင်းတင်ပြခဲ့ခြင်း မရှိပေ။

ထို့အတူ သရက်မဲဆန္ဒနယ်၊ အမျိုးသားဒီမိုကရေစီအဖွဲ့ချုပ်ပါတီမှ ပြည်သူ့လွှတ်တော် ကိုယ်စားလှယ် ဦးကံမြင့်က ၂၀၁၆ ခုနှစ် နိုဝင်ဘာ ၂၂ ရက်က ကျင်းပသည့် ပြည်သူ့ လွှတ်တော် အစည်းအဝေး၌ မြန်မာပြည်တစ်ဝန်းတွင် ကိုင်တွယ် သုံးစွဲနေသော ငွေစက္ကူအမျိုးမျိုးပေါ်ရှိ ဆင်တံဆိပ်နှင့် ခြင်္သေ့တံဆိပ် ရုပ်ပုံများအစား အမျိုးသားခေါင်းဆောင်ကြီး ဗိုလ်ချုပ်အောင်ဆန်း၏ ရုပ်ပုံပါသော ငွေစက္ကူများဖြင့် အစားထိုးရိုက်နှိပ် ထုတ်ဝေသုံးစွဲရန် အစီအစဉ်ရှိ မရှိကို မေးမြန်းခဲ့ဖူးသည်။

အဆိုပါ မေးခွန်းအပေါ် မြန်မာနိုင်ငံတော် ဗဟိုဘဏ် ဒုတိယဥက္ကဋ္ဌ ဦးစိုးမင်းက “ငွေစက္ကူအသစ် ရိုက်နှိပ် ထုတ်ဝေမယ်ဆိုရင် လှည့်လည်သုံးစွဲလေ့ရှိတဲ့ ငွေပမာဏကို လဲလှယ်ပေးနိုင်ဖို့အတွက် လှည့်လည် သုံးစွဲလျက်ရှိတဲ့ ပမာဏနီးပါးကို မှာကြား ရိုက်နှိပ်သိုလှောင်ထားရမှာ ဖြစ်ပါတယ်။ လှည့်လည် သုံးစွဲလျက်ရှိသော ငွေစက္ကူ (Denomination) တစ်ခုကို အပြည့်အ၀ လဲလှယ်ပေးနိုင်ဖို့ ဆိုရင်တော့ ရိုက်နှိပ် သိုလှောင်ရမယ်ဆိုရင် ဘီလျံ ၁၀၀ လောက် ကုန်ကျမှာဖြစ်ပါတယ်။ ဒါ ဟာ Denomination တစ်ခုအတွက်ပဲ ဖြစ်ပါတယ်။ အားလုံးအသုံးများတဲ့ Denomination တွေအတွက် ရိုက်နှိပ်မယ် ဆိုလို့ရှိရင်တော့ ဘီလျံ ၃၀၀ လောက် ကုန်ကျဖွယ်ရှိပါတယ်။ ပုံစံသစ် ငွေစက္ကူတွေ ထုတ်ဝေမယ်ဆိုရင် လက်ရှိ လှည့်လည်သုံးစွဲနေတဲ့ ငွေစက္ကူတွေကိုလည်း ဖျက်ဆီးဖို့ လိုအပ်မှာဖြစ်ပါတယ်” ဟု ဖြေကြားခဲ့သည်။

ထို့ကြောင့် ကုန်ကျစရိတ် ပိုများလာနိုင်ခြင်း၊ ပုံစံအမျိုးမျိုး ရှိနေသည့်အတွက် ပြည်သူများက ငွေစက္ကူအပေါ် ယုံကြည်မှုအားနည်းလာနိုင်သည်ကို ထည့်သွင်းစဉ်းစားပါက ငွေစက္ကူအပေါ်တွင် မရေမရာ၊ ဇဝေဇ၀ါ ဖြစ်ပေါ်ခြင်းများ ရှိလာနိုင်သည့်အတွက် လက်ရှိ လှည့်လည်သုံးစွဲနေသည့် ငွေများကို လဲလှယ်ရန်အတွက် အခက်အခဲရှိကြောင်း၊ မြန်မာနိုင်ငံတော် ဗဟိုဘဏ်အနေဖြင့် ငွေစက္ကူများကို နိုင်ငံစီးပွားရေး တည်ငြိမ်သည့်အချိန်၊ အနှောင့်အယှက် မဖြစ်စေနိုင်သော သင့်လျော်သည့် ကာလ၌ ပုဒ်မ ၆၅ နှင့် ပုဒ်မ ၆၆ ပါပြဋ္ဌာန်းချက်များနှင့်အညီ ဆောင်ရွက်သွားမည် ဖြစ်ကြောင်း၊ ငွေစက္ကူ ရိုက်နှိပ်ရာတွင် ငွေစက္ကူဒီဇိုင်း ရေးဆွဲခြင်း၊ ဒီဇိုင်း အတည်ပြုခြင်း၊ မှာကြားခြင်း၊ ရိုက်နှိပ်ခြင်း၊ ကြိုတင်သိုလှောင် ထားရှိခြင်း လုပ်ငန်းစဉ်များ ရှိသည့်အတွက် အချိန်ကာလ တိကျစွာ သတ်မှတ်နိုင်ခြင်း မရှိသေးကြောင်း ဦးစိုးမင်းက ရှင်းလင်းဖြေကြားခဲ့သည်။

သို့သော် ၂၀၁၇ ခုနှစ်၌ ပြည်သူ့လွှတ်တော်က အစိုးရအနေဖြင့် အနာဂတ်တွင် ရိုက်နှိပ်ထုတ်ဝေရန် ရှိလာမည့် ငွေစက္ကူများအပေါ်၌ ဗိုလ်ချုပ်အောင်ဆန်း ရုပ်ပုံများဖြင့် ရိုက်နှိပ်ထုတ်ဝေရန် အဆိုတင်သွင်းကာ အတည်ပြုဆုံးဖြတ်ခဲ့သည့်အတွက် အစိုးရအနေဖြင့် ဆောင်ရွက်ရတော့မည် ဖြစ်သည်။

ငွေစက္ကူ အမျိုးအစား ပြောင်းလဲသုံးစွဲခြင်းနှင့် ပတ်သက်၍ ပုဒ်မ ၆၆ တွင် “ဗဟိုဘဏ်သည် မည်သည့် ငွေစက္ကူအမျိုးအစားကိုမဆို ပြောင်းလဲသုံးစွဲရန် လိုအပ်ပါက အစိုးရအဖွဲ့၏ သဘောတူညီချက်ဖြင့် ဆောင်ရွက်နိုင်သည်။ ယင်းဆောင်ရွက်ချက် အခြေအနေကို အနီးစပ်ဆုံး ကျင်းပသည့် ပြည်ထောင်စုလွှတ်တော် အစည်းအဝေးသို့ တင်ပြ၍ အတည်ပြုချက် ရယူရမည်” ဟု ပြဋ္ဌာန်းထားသည်။

ငွေစက္ကူ ထုတ်ဝေခြင်းနှင့် ပတ်သက်၍ သမိုင်းကိုပြန်ကြည့်ပါက မြန်မာနိုင်ငံတော် ဗဟိုဘဏ်အနေဖြင့် ငွေစက္ကူများ ထုတ်ဝေခဲ့ရာ၌ ၁၉၄၈ ခုနှစ်၊ ၁၉၅၂ ခုနှစ်မှာ ဒေါင်းပုံ၊ ခြင်္သေပုံပါသည့် တစ်ကျပ်တန်၊ ငါးကျပ်တန်၊ ၁၀တန်၊ ၁၀၀ တန် ငွေစက္ကူများ ရိုက်နှိပ်ထုတ်ဝေခဲ့ပြီး ၁၉၅၈ ခုနှစ်တွင် ဗိုလ်ချုပ်အောင်ဆန်း ပုံပါသည့် တစ်ကျပ်တန်၊ ငါးကျပ်တန်၊ တစ်ဆယ်တန်၊ တစ်ရာတန် ငွေစက္ကူများ ရိုက်နှိပ်ထုတ်ဝေခဲ့ကြောင်း၊ ၁၉၆၅ ခုနှစ်တွင်လည်း တစ်ကျပ်တန်၊ ငါးကျပ်တန်၊ တစ်ဆယ်တန် ငွေစက္ကူများမှာ ဗိုလ်ချုပ်အောင်ဆန်းပုံဖြင့် ပုံစံသစ် ငွေစက္ကူများ ထုတ်ဝေခဲ့သည်။

ထို့ပြင် ၁၉၉၄ ခုနှစ်တွင် ၂၀ တန်၊ ၅၀ တန်၊ ၁၀၀ တန် ငွေစက္ကူများကို ခြင်္သေ့ပုံဖြင့် ရိုက်နှိပ် ထုတ်ဝေခဲ့ပြီး ၁၉၉၈ ခုနှစ်မှာ ကေသရာဇာခြင်္သေ့ပုံဖြင့် တစ်ထောင်တန် ငွေစက္ကူ ထုတ်ဝေခဲ့ကာ ၂၀၁၄ ခုနှစ်တွင် ၂၀၀ တန်၊ ၅၀၀ တန်၊ ၁၀၀၀ တန်များကို အရွယ်အစားသစ်ဖြင့် ထုတ်ဝေခဲ့သည်။

၂၀၀၉ ခုနှစ်တွင် ၅၀၀၀ တန် ငွေစက္ကူကို စတင်ထုတ်ဝေခဲ့ပြီး ၂၀၁၂ ခုနှစ်တွင် တစ်သောင်းတန် ငွေစက္ကူကို ထုတ်ဝေခဲ့ကြောင်း၊ ငါးထောင်တန်နှင့် တစ်သောင်းတန် ငွေစက္ကူများကို လုံခြုံရေးအဆင့်အတန်း တိုးမြှင့်ကာ ၂၀၁၄ ခုနှစ်၊ ၂၀၁၅ ခုနှစ်တို့တွင် ထပ်မံထုတ်ဝေခွဲခဲ့ကြောင်း သိရသည်။

ဗိုလ်ချုပ်အောင်ဆန်း၏ ရုပ်ပုံဖြင့် ငွေစက္ကူများအပေါ်တွင် ရိုက်နှိပ် ထုတ်ဝေမည့်ကိစ္စနှင့် ပတ်သက်၍ အမြင်အမျိုးမျိုး ရှိနေကြပြီး တိုင်းရင်းသား စည်းလုံးညီညွတ်ရေးကို ဖော်ဆောင်နေသည့်အချိန်တွင် တိုင်းရင်းသားများ၏ ပုံရိပ်များကိုလည်း ထည့်သွင်းပေးရန် တောင်းဆိုမှုများ ရှိလာပါက ဆောင်ရွက်ပေးမည်လား ဆိုသည့်မေးခွန်းထုတ်မှုများလည်း ရှိနေသည်။

“ကျွန်တော်တို့ အနေနဲ့ကတော့ ဒီဗိုလ်ချုပ်အောင်ဆန်းရဲ့ ရုပ်ပုံနဲ့ ငွေစက္ကူအပေါ်မှာ ရိုက်နှိပ်ဖို့ကိစ္စက ဘာမှကန့်ကွက်စရာ မရှိပါဘူး။ သို့သော်လည်းပဲ ဒီလိုကိစ္စမျိုးတွေက သူ့အခြေအနေ အချိန်အခါအရ စဉ်းစားသုံးသပ်ပြီးတော့ ဆောင်ရွက်သင့်တဲ့ ကိစ္စမျိုးလို့ တော့ ယူဆတယ်လေ။ ဗိုလ်ချုပ်အောင်ဆန်းရဲ့ ရုပ်ပုံတွေကို ထည့်တာတွေကို ကျွန်တော်တို့ လက်မခံတာလည်း မဟုတ်ဘူး။ ဒါပေမဲ့လည်း အခုကျွန်တော်တို့ တိုင်းရင်းသား စည်းလုံးညီညွတ်ရေး ဖော်ဆောင်နေတဲ့ ကာလတွေမှာ အဲဒီတော့ တိုင်းရင်းသားတွေရဲ့ ပုံရိပ်တွေကိုလည်း ထည့်သွင်းပေးပါလို့ တောင်းဆိုလာခဲ့ရင်ရော ဆောင်ရွက်ပေးမှာလား။ ဆိုပါဆို့ဗျာ လွတ်လပ်ရေး ရယူပေးခဲ့တဲ့နေရာမှာ ဗိုလ်ချုပ်အောင်ဆန်း တစ်ယောက်တည်းလို့ပဲ အသိအမှတ်ပြုမှာလား။ အဲလိုမျိုးပေါ့နော်။ ဒီနိုင်ငံကြီးကို ၀ိုင်းဝန်း တည်ဆောက်နေကြတဲ့နေရာမှာ တခြားတည်ဆောက်ခဲ့တဲ့ ပုဂ္ဂိုလ်တွေပေါ့ ပါဝင်ခဲ့တဲ့ပုဂ္ဂိုလ်တွေ၊ တကယ့် အထင်ကရပုဂ္ဂိုလ်တွေလည်း ရှိပါတယ်။ တိုင်းရင်းသားတွေထဲမှာလည်း ရှိပါတယ်။ နောက်ပြီးတော့ မြန်မာနိုင်ငံရဲ့ ပထမဆုံးသမ္မတဆိုရင် ရှမ်းတိုင်းရင်းသားပေါ့ ကျွန်တော်တို့ စော်ဘွားကြီး စပ်ရွှေသိုက် အဲဒီပုဂ္ဂိုလ်တွေရဲ့ ရုပ်ပုံတွေကို ထည့်သွင်းဖော်ပြပါလို့ တောင်းဆိုလာရင်ရော သဘောတူပါ့မလား။ ဒါတွေက ပြောစရာတွေ ဖြစ်လာလိမ့်မယ်”ဟု ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီမှ ပြည်သူ့လွှတ်တော် ကိုယ်စားလှယ် ဦးစိုင်းသီဟကျော်က ပြောကြားသည်။

ထို့ပြင် ဦးစိုင်းသီဟကျော်က “အဲဒီတော့ ဘာမဟုတ်တဲ့ တံတားနာမည်လေးတောင်မှ ဗိုလ်ချုပ်အောင်ဆန်း နာမည်တစ်ခုတည်း ထည့်ဖို့ပြောတာတောင်မှ ပဋိပက္ခပုံစံမျိုးပေါ့နော် သဘောမတူတဲ့ ကိစ္စရပ်တွေဖြစ်လာတယ်။ နောက်ပြီးတော့ ဗိုလ်ချုပ်ကြေးရုပ်တွေကို တစ်နိုင်ငံလုံးအနှံ့ လိုက်ပြီးတော့ စိုက်ထူတဲ့ ကိစ္စတွေမှာလည်း ဒါဝေဖန်ချက်တွေ များနေတဲ့ကာလမှာ ဒီလိုမျိုးတွေက စဉ်းစားသုံးသပ်သင့်တဲ့ အနေအထားပါလို့ ပြောချင်ပါတယ်။ မလုပ်ဖို့ မပြောပါဘူး။ သူ့အချိန်နဲ့သူ နောက်ပြီးတော့ လုပ်မယ်ဆိုရင်လည်းပဲ ကျွန်တော်တို့ သွားချင်နေတဲ့ ဖက်ဒရယ်လို့ခေါ်တဲ့ တန်းတူညီမျှမှုဆိုင်ရာ ကိစ္စရပ်တွေ၊ ပုံရိပ်တွေပေါ်အောင် ပါအောင်ပေါ့လေ ဆောင်ရွက်သွားနိုင်ရင် ပိုပြီးတော့မှ တစ်ဦးတစ်ပေါ် တစ်ဦး အမြင်စောင်းစေတဲ့ ကိစ္စရပ်မျိုးတွေ၊ ၀ိဝါဒကွဲတဲ့ ကိစ္စရပ်တွေ လျော့နည်းစေနိုင်မှာပေါ့လေ” ဟု သုံးသပ်ပြောကြားသည်။

အမျိုးသားရင်ကြားစေ့ရေး ပြန်လည်တည်ဆောက်နေသည့် ကာလမျိုးတွင် အဆိုပါကိစ္စရပ်များကို သတိထား ဆောင်ရွက်သင့်ကြောင်း ဦးစိုင်းသီဟကျော်က ဆိုသည်။

ဗိုလ်ချုပ်အောင်ဆန်းရုပ်ပုံပါ ငွေစက္ကူများကို မည်သည့်အချိန်၌ စတင်ထုတ်ဝေမည်လဲ၊ မည်သည့်ပုံစံမျိုးနှင့် ထုတ်ဝေလာမည်လဲ၊ ထုတ်ဝေလိုက်သည့် ငွေစက္ကူများနှင့် ပတ်သက်၍ အကျိုးဆက်က မည်ကဲ့သို့ ရှိမည်လဲ ဆိုတာကို စောင့်ကြည့်သွားရမည် ဖြစ်သည်။