ကူကယ်ရာမဲ့နေဆဲ အသေးစားနှင့်အလတ်စား စီးပွားရေးလုပ်ငန်းများ

မြန်မာနိုင်ငံတွင် ၉၈ ရာခိုင်နှုန်းသော လုပ်ငန်းများသည် ပုဂ္ဂလိကကဏ္ဍမှ ဆောင်ရွက်နေသည့် အသေးစားနှင့်အလတ်စား စီးပွားရေးလုပ်ငန်းများ (SMEs) ပင်ဖြစ်သည်။တိုင်းပြည်စီးပွားရေး တိုးတက်စေရန် SMEs များဖွံ့ဖြိုးရေးများစွာ အရေးပါသော်လည်း လက်ရှိအချိန်အထိ SMEs အများစု ရုန်းကန်နေရဆဲဖြစ်သည့် အခြေအနေကို ၂၀၁၇ ခုနှစ်အတွက် စီးပွားရေးဆိုင်ရာထင်ရှားသော ဖြစ်ရပ်တစ်ခုအဖြစ် ထည့်သွင်းဖော်ပြအပ်ပါသည်။

လက်ရှိအစိုးရလက်ထက် သက်တမ်းတစ်နှစ်ကျော်ချိန်အထိ အသေးစားအလတ်စား စက်မှုလုပ်ငန်းများ (SMEs ) ဖွံ့ဖြိုးရေး နှင့်ပတ်သက်ပြီး လုပ်ဆောင်မှုများ ဖြစ်ဖြစ်မြောက်မြောက် အောင်မြင်မှုမရှိကြောင်း စက်မှုဝန်ကြီးဌာန ပြည်ထောင်စုဝန်ကြီး ဦးခင်မောင်ချိုက ၀န်ခံပြောကြားထားသည်။

မြန်မာနိုင်ငံရှိ အသေးစားအလတ်စား စီးပွားရေးလုပ်ငန်းများမှာ တိုင်းပြည်စီးပွား ရေးလုပ်ငန်းအားလုံး၏ ၉၈ ရာခိုင်နှုန်းအထိ ပါဝင်နေပြီး လက်ရှိအချိန်၌ အစိုးရက SME လုပ်ငန်းများ ဖွံ့ဖြိုးတိုးတက်စေရေးအတွက် လုပ်ဆောင်နေသော်လည်း တစ်နှစ်ကျော်လာသည့်အချိန်အတွင်း ဖြစ်ဖြစ်မြောက်မြောက် အောင်မြင်မှုမရှိဟု အသေးစားအလတ်စား စီးပွားရေးလုပ်ငန်းများ ဖွံ့ဖြိုးတိုးတက်မှုနှင့် အဓိကသက်ဆိုင်သည့် စက်မှုဝန်ကြီးဌာန ပြည်ထောင်စုဝန်ကြီးက ၀န်ခံခဲ့ခြင်း ဖြစ်သည်။

နိုင်ငံတိုင်းနိုင်ငံတိုင်းတွင် SME ကဏ္ဍမှာ စီးပွားရေးတွင် အဓိကအခန်းကဏ္ဍ ပါဝင်လျက်ရှိကြောင်း၊ မြန်မာနိုင်ငံတွင်မူ SME ကဏ္ဍ ဖွံ့ဖြိုးရေးအတွက် ကြိုးစားလျက်ရှိသည့်အခါတွင် တစ်နှစ်ကျော်ကြာသည်အထိ ဖြစ်ဖြစ်မြောက်မြောက် အောင်အောင်မြင်မြင် ဖြစ်ထွန်းလာသည်ကို မတွေ့ရသေးကြောင်း ဦးခင်မောင်ချိုက ဆိုသည်။

အသေးစားနှင့်အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးအတွက် SME National Strategy ကို ချမှတ်ရေးနှင့် ထိရောက်စွာ ဖော်ဆောင်ရေးလိုအပ်နေကြောင်း ကုန်သည်စက်မှုအသင်းချုပ် တွဲဖက်အထွေထွေ အတွင်းရေးမှူး ဒေါက်တာအောင်သိန်းက ပြောကြားသည်။

နိုင်ငံတစ်ဝန်း ပျံ့နှံ့နေသည့် SME များအား အသင်းအဖွဲ့တစ်ရပ်ဖွဲ့စည်း၍ ကိုယ်စားပြုကူညီထောက်ပံ့နိုင်ရေး၊ မြန်မာ့ SME များ ဈေးကွက်အချက်အလက်များ ရရှိနိုင်ရန်နှင့် ဖွံ့ဖြိုးရေးသုတေသနများ ပြုလုပ်နိုင်ရန် SME Information Center လုပ်ငန်းမှတ်ပုံတင် One – stop Center နှင့် SME Research Center များ တည်ထောင်နိုင်ရေးနှင့် SME ဥပဒေ၊ နည်းဥပဒေနှင့် မူဝါဒများချမှတ်ထား ပြီးဖြစ်သော်လည်း နောင်အနာဂတ် နှစ် ၃၀၊ နှစ် ၄၀ စသည်ဖြင့် SME ဖွံ့ဖြိုးတိုးတက်မှုဆိုင်ရာ ရည်မှန်းချက်များနှင့် SME National Strategy ကို ချမှတ်ရေးနှင့် ထိရောက်စွာ ဖော်ဆောင်ရေး လိုအပ်နေသည်ဟု ဒေါက်တာ အောင်သိန်းက ဆက်လက်ပြောကြားသည်။

ထို့ပြင် စတင်တည်ထောင်သည့် SME လုပ်ငန်းများ ရှင်သန်နိုင်ရေးအတွက် အချိန်ကာလတစ်ခုသတ်မှတ်ပြီး အခွန်သက်ညှာခွင့် ရရှိစေရေး၊ SME လုပ်ငန်းများ ဖွံ့ဖြိုးရေးဘဏ်တည်ထောင်ကာ သီးသန့်ချေးငွေ အစီအစဉ်များချမှတ်ရေး၊ သွင်းကုန်အစားထိုး ထုတ်လုပ်မှုလုပ်ငန်းများ အသုံးပြုနေသည့် စက်များ၊ ယန္တရားတင်သွင်းခြင်းအပေါ် အကောက်ခွန်ကင်းလွတ်ခွင့် ရရှိစေရေးနှင့် လူမှုအကျိုးပြုလုပ်ငန်းများ (Social Enterprises ) အခွန်သက်ညှာခွင့် ရရှိစေရေးနှင့် လူမှုအကျိုးပြုလုပ်ငန်းအဖြစ် သီးသန့်မှတ်ပုံ တင်စနစ်ချမှတ်ကာ အားပေးရေးများ လုပ်ဆောင်ပေးရန်လိုအပ်ကြောင်း ဒေါက်တာအောင်သိန်းက ဆက်လက်ပြောကြားသည်။

အစိုးရက ထူထောင်မည့် SME Working နှင့် SME Agency ပေါ်ပေါက်လာမည်ဖြစ်ပြီး လက်ရှိတွင် SME များအတွက် အဖွဲ့ဝင်ကတ်များ ထုတ်ပေးနေကြောင်း စက်မှုဝန်ကြီးဌာန အမြဲတမ်းအတွင်းဝန် ဦးကိုကိုလွင်က ပြောကြားထားသည်။

မြန်မာနိုင်ငံအနေဖြင့် ထုတ်လုပ်မှုအခန်းကဏ္ဍတွင် အလားအလာများစွာရှိကြောင်း၊ လောလောဆယ် ထုတ်လုပ်မှုကဏ္ဍတွင် လျော့နည်းနေသည့်အတွက် ပြန်ပြီးတိုးတက်လာအောင် လုပ်ဆောင်ရန်လိုအပ်ကြောင်း၊ ထုတ်လုပ်မှုကဏ္ဍ တိုးတက်လိုပါက သွင်းအားစုများ လိုအပ်ကြောင်း၊ ရေ၊ မီး၊ လျှပ်စစ် ပုံမှန်ရရှိရမည်ဖြစ်ကြောင်း၊ လိုအပ်သည့် ကုန်ကြမ်းပစ္စည်းများ အမြန်ဆုံးတင်သွင်းနိုင်ရေး ဆောင်ရွက်ပေးရမည်ဖြစ်ကြောင်း ဦးကိုကိုလွင်က ဆိုသည်။

ဒုတိယသမ္မတဦးမြင့်ဆွေက  အသေးစားနှင့် အလတ်စား စီးပွားရေးလုပ်ငန်းများအား မြှင့်တင်သွားရန်အတွက် အသေးစားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်ရေးမူဝါဒ၊ ရည်မှန်းချက်များ ချမှတ်ပြီး လူ့စွမ်းအားအရင်းအမြစ်၊ နည်းပညာဖွံ့ဖြိုးမှုနှင့် တီထွင်ဖန်တီးတတ်မှု၊ ငွေကြေးအရင်းအမြစ်၊ အခြေခံအဆောက်အအုံ ဖွံ့ဖြိုးတိုးတက်ရေး၊ ဈေးကွက်ရရှိရေး၊ သင့်လျော်သော အခွန်အကောက်နှင့် လုပ်ထုံးလုပ်နည်းများ၊ လုပ်သာကိုင်သာရှိသည့် စီးပွားရေး ၀န်းကျင်ကောင်းများရရှိရေးတို့ ဆောင်ရွက်ရမည်ဖြစ်ကြောင်း နေပြည်တော်တွင် ကျင်းပသည့် အသေးစားနှင့်အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးလုပ်ငန်းကော်မတီ ပထမအကြိမ် အစည်းအဝေးတွင် ပြောကြားထားသည်။

ASEAN SME Policy Index အရ စင်ကာပူ၊ မလေးရှား၊ ထိုင်းနှင့် အင်ဒိုနီးရှားတို့သည် Policy Index အနေဖြင့် အမြင့်ဆုံး တွင်ရပ်တည်နေပြီး ကမ္ဘောဒီးယား၊ လာအိုနှင့် မြန်မာနိုင်ငံတို့မှာ အနိမ့်ဆုံးအခြေအနေတွင် ရပ်တည်နေကြောင်း၊ ယင်းကြောင့် မြန်မာနိုင်ငံအနေဖြင့် SME Development Policy Index မြင့်မားစေရေး အဘက်ဘက်က ၀ိုင်းဝန်းကြိုးပမ်းဆောင်ရွက်ရမည်ဖြစ်ကြောင်း ဒုတိယသမ္မတ ဦးမြင့်ဆွေက ပြောကြားသည်။

မြန်မာနိုင်ငံတွင် ၉၉ ရာခိုင်နှုန်းသော စီးပွားရေးလုပ်ငန်းများသည် SMEs များဖြစ်ပြီး SMEs များအောင်မြင်မှသာ နိုင်ငံ့စီးပွားရေး အောင်မြင်မည်ဆိုခြင်းကို ထူးထူးထွေထွေ ရှင်းပြစရာမလိုကြောင်း အသေးစားနှင့်အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးကော်မတီ တွဲဖက်ဥက္ကဋ္ဌ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားခဲ့သည်။

အခြေခံပြည်သူတွေ နေရေးခက်ပြီး ဆောက်လုပ်ရေးကဏ္ဍပြိုလဲမှု ဘယ်လိုထူမ, ကြမလဲ

ဒဂုံဆိပ်ကမ်းမြို့နယ်တွင် ဆောင်ရွက်နေသည့် တည်ဆောက်ဆဲ အိမ်ရာဆောက်လုပ်ရေး လုပ်ငန်းခွင်တစ်ခုကို တွေ့ရစဉ် (ဓာတ်ပုံ-ရှိုင်းလင်းအောင်)

၂၀၁၄ ခုနှစ် ကန်ထရိုက်တိုက်ခန်းဈေးကွက်တွင် ဆောက်လုပ်သူအချို့၏ မမှန်ကန်မှုများကြောင့် ယိမ်းယိုင်လာခဲ့သော ဆောက်လုပ်ရေးလုပ်ငန်းများသည် ၂၀၁၅ ခုနှစ်အတွင်း ကျဆင်းမှုဖြစ်ပေါ်ခဲ့သည်။ ထိုသို့ကျ ဆင်းနေမှုကြောင့် မှန်ကန်သည့် မူဝါဒများဖြင့် ဆောက်လုပ်ရေးလုပ်ငန်းများ ပြန်လည်လည်ပတ်နိုင်ရေး မျှော်လင့်ခဲ့ကြသော်လည်း ပြည်တွင်းဘဏ်များ၌ ၂၀၁၆ ခုနှစ် မတ်လအထိ အကြွေး ကျပ်နှစ်ထရီလျံကျော်ဖြင့် လည်ပတ်နေသည့် ဆောက်လုပ်ရေးလုပ်ငန်းများမှာ အပြီးသတ်ထိုးချခံခဲ့ရသည့် ရိုက်ချက်ဖြစ်သော ဆောက်လုပ်ရေးလုပ်ငန်းများ ရပ်နားခံရမှုတွင် ဗုန်းဗုန်းလဲခဲ့ရသည့် အခြေအနေ ဆိုက်ရောက်ခဲ့သည်။

ဆောက်လုပ်ရေးလုပ်ငန်းများ ပြိုကျမှု၏ နောက်ကွယ်တွင် ဆက်စပ်နေသော အိမ်၊ ခြံ၊ မြေဈေးကွက်မှာလည်း အရောင်းအ၀ယ် ကျဆင်းခဲ့ပြီး အိမ်၊ ခြံ၊ မြေအကျိုးဆောင်များ၏ စစ်တမ်းများအရ တန်ဖိုးကြီး အိမ်၊ ခြံ၊ မြေ ဈေးကွက်တွင် တန်ဖိုးရာခိုင်နှုန်း ၃၀ ခန့် ကျဆင်းခဲ့ပြီး တန်ဖိုးနည်းသည့် အိမ်၊ ခြံ၊ မြေဈေးကွက်တွင် တန်ဖိုးရာခိုင်နှုန်း ၅၀ ခန့် ကျဆင်းခဲ့သည်ဟု ဆိုသည်။

သို့သော် ထိုသို့သော ကျဆင်းမှုများစွာ ဖြစ်ပေါ်နေသော်လည်း အိမ်၊ ခြံ၊ မြေဈေးကွက်မှာ အရောင်းအ၀ယ်ကျဆင်းမှုသာ ဖြစ်နေပြီး သာမန်ပြည်သူများ လက်လှမ်းမမီနိုင်သည့် ဈေးနှုန်းဖြစ်နေဆဲ ဖြစ်သည်။

ဥပမာအားဖြင့် ကျပ်သိန်း ၁၀၀၀ တန်ကြေးရှိသော မြေကွက်တစ်ကွက်သည် ငွေဖောင်းပွမှု၊ ငွေမည်းခ၀ါချမှုနှင့် မြေဈေးကစားမှုများအောက်တွင် ကျပ်သိန်း ၁၀၀၀၀ ခန့် ဖြစ်ပေါ်သွားပြီး အိမ်၊ ခြံ၊ မြေ ပူဖောင်းပေါက်ကာ ဈေးနှုန်းကျဆင်းသွားသည်ဟု ဆိုချိန်တွင်ပင် ကျပ်သိန်း ၅၀၀၀ ခန့် ဈေးဖြစ်နေဆဲဖြစ်ပြီး အမှန်ဈေးနှုန်း (Fair Price) ကျပ်သိန်း ၁၀၀၀ အနီးသို့ ပြန်ရောက်ရှိခြင်းမရှိဘဲ ဈေးနှုန်းကြီးမြင့်နေဆဲဟုသာ ဆိုရမည်ဖြစ်သည်။

မြန်မာနိုင်ငံ၏ ဂျီဒီပီတွင် ဆောက်လုပ်ရေးကဏ္ဍသည် ၁၀ ရာခိုင်နှုန်းဝန်းကျင်တွင် ပါဝင်သည်။ လက်ရှိတွင် ဆောက်လုပ်ရေးကဏ္ဍ ပြိုလဲမှုအတွက် အစိုးရအနေဖြင့် ထူမနိုင်ရေး ခေါင်းခဲနေရသကဲ့သို့ ပြည်သူများ၏ အိမ်ရာလိုအပ်ချက်နောက်ကွယ်တွင် တိုက်ခန်း၊ နေအိမ်ငှားရမ်းခများ ပုံမှန်ဈေးနှုန်း မြင့်တက်မှုနှင့် ရင်ဆိုင်နေရပြီး ခြောက်လတစ်ကြိမ်၊ တစ်နှစ်တစ်ကြိမ် အိမ်ခန်းငှားရမ်းခ တိုးမြှင့်ခံနေရမှုဒဏ်ကို အခြေခံပြည်သူများ ရင်ဆိုင်နေရသည်။

ပုဂ္ဂလိကကဏ္ဍမှ ဆောက်လုပ်ရေးလုပ်ငန်းရှင်များ ကျပ်ထရီလျံချီ အကြွေးတင်ပြီး အတိုးပင်မသတ်နိုင်သည့် အခြေအနေတွင် နိုင်ငံတော်မှတည်ဆောက်မည့် အိမ်ရာစီမံကိန်းများတွင် ၀င်ရောက်တိုးဝင်နေကြသည့် အစိုးရ၏ တန်ဖိုးသင့်၊ တန်ဖိုးနည်းစီမံကိန်းများမှာလည်း ဈေးနှုန်းကြီးမြင့်လှသည့် စီမံကိန်းအချို့၏ နေရာနှင့် အချက်အချာကျမှု မှားယွင်းခြင်းအပြင် ပြည်သူများ လက်လှမ်းမမီသည့် ဈေးနှုန်းများဖြစ်နေသဖြင့် စီမံကိန်းများမှာ အမည်ခံသာဖြစ်နေပြီး ထင်တိုင်းမပေါက်သည့် စီမံကိန်း ၂၀ ခန့် ရှိနေသည်။

ထို့ပြင် အစိုးရကတည်ဆောက်သည့် တန်ဖိုးနည်းအိမ်ရာ စီမံကိန်းများတွင်လည်း နှစ်ရှည်အရစ်ကျဟုဆိုသော်ငြား အခြေခံအဆောက်အအုံတွင် အနိမ့်ဆုံးဖြစ်သည့် သွားလာရေးပင် မချောမွေ့သဖြင့် သာမန်ပြည်သူများကား အချက်အချာ၊ အသွားအလာ အဆင်ပြေသည့် တန်ဖိုးနည်းအိမ်ရာစီမံကိန်း အချို့တွင်ပင် ၀ယ်ယူလိုနေကြပြီး ကျန်တန်ဖိုးနည်းအိမ်ရာ စီမံကိန်းများတွင်လည်း ရေ၊ မီးအပါအ၀င် သုံးစွဲသည့် အိမ်သုံးအစိတ်အပိုင်းအချို့မှာ အပေါစားများသုံးစွဲထားသဖြင့် ပြည်သူများ ထပ်ဆောင်းငွေကုန်ကျရမှု ရှိနေပြန်သည်။ ထို့ပြင် အစိုးရက နှစ်ရှည်အရစ်ကျရောင်းချသည့် တန်ဖိုးနည်းတိုက်ခန်းများ၏ ဘဏ်တိုးနှုန်းစုစုပေါင်းမှာ တိုက်ခန်းတန်ဖိုး ခန့်ပင်ဖြစ်နေသဖြင့် အလွန်အမင်း များပြားသည့် အတိုးနှုန်းဖြစ်ပေါ်နေသည်။

မြန်မာ့စီးပွားရေးကျဆင်းခြင်းသည် ဆောက်လုပ်ရေးကဏ္ဍကို ဆွဲချခဲ့ခြင်းကြောင့် ဖြစ်သည်ဟုဆိုပါက အဆိုပါဆောက်လုပ်ရေးကဏ္ဍနှင့်ပင် မြန်မာ့စီးပွားရေးကို ပြန်လည်မောင်းနှင်နိုင်ရန် လိုအပ်သည်။ ထိုသို့ မောင်းနှင်နိုင်မည့် အချက်အလက်အဖြစ် စုပေါင်းပိုင် အဆောက်အအုံ နည်းဥပဒေတွင် နိုင်ငံခြားသားများကို ၀ယ်ယူပိုင်ဆိုင် ခွင့်ပေးအပ်ထားမှုနှင့် ရန်ကုန်မြို့သစ်စီမံကိန်း၊ ကျုးကျော်များအတွက် အိမ်ရာပေးအပ်မည့် စီမံကိန်းများအပြင် အစိုးရ၏ တည်ဆောက်ရေးစီမံကိန်းများကို အချိန်အခါမှန်ကန်စွာဖြင့် အဂတိလိုက်စားမှုမပါဝင်ဘဲ မှန်ကန်စွာ သုံးသပ်လုပ်ဆောင်ရန် လိုအပ်သည်။

မြစ်ဆုံနှင့် OBOR တရုတ်အကျိုးစီးပွားမဟာဗျုဟာထဲမှာ မနစ်မွန်းဖို့ ကြိုးပမ်းရမည့် မြန်မာ

ကချင်ပြည်နယ် မြစ်ဆုံစီမံကိန်းဝန်းကျင်ကို ဝေဟင်မှ တွေ့ရစဉ်

တပ်မတော်အစိုးရလက်ထက် ဂယက်တစ်ခုဖြစ်ခဲ့သော မြစ်ဆုံစီမံကိန်းသည် ဦးသိန်းစိန်အစိုးရလက်ထက်တွင် မြန်မာတစ်နိုင်ငံလုံး၏ ကန့်ကွက်မှုဖြင့် ရပ်ဆိုင်းခဲ့သော်လည်း အပြီးမဖြတ်နိုင်သဖြင့် လက်ရှိအစိုးရလက်ထက်တွင် တစ်ကျော့ပြန်ဖြေရှင်းနေရသည်။

အာဏာရရင် စာချုပ်ချပြမည်ဆိုသော ကတိစကားသည် နှစ်နှစ်ပြည့်လုအချိန်အထိ ဖြစ်မလာသေးသည့်အပြင် ဧရာဝတီ-မြစ်ဆုံ မြစ်ညာ မြစ်ဝှမ်း ရေအားလျှပ်စစ်စီမံကိန်းများ လေ့လာစိစစ်သုံးသပ်ရေးကော်မရှင်ဖွဲ့စည်းပြီးနောက် ကော်မရှင်၏ အစီရင်ခံစာသည်လည်း သတ်မှတ်ကာလကျော်လွန်၍ တစ်နှစ်ကျော်လာချိန်အထိ ပြည်သူများ သိမြင်ကြားခွင့် မရှိသေးချေ။

ထိုသို့သောအခြေအနေ၀ယ် မြန်မာပြည်သူများ ထပ်ဆင့်ရင်ဆိုင်လာရသည့် ပြဿနာမှာ တရုတ်နိုင်ငံ၏ တောင်ဘက်မျှော်မူဝါဒ (Look South Policy) ၊ အမျိုးသားစွမ်းအင် လုံခြုံရေးမူဝါဒ (National Energy Strategy) နှင့် အိန္ဒိယသမုဒ္ဒရာ၊ ပစိဖိတ်သမုဒ္ဒရာကို စီးနင်းနိုင်ရေးအိပ်မက်၊ ပုလဲသွယ်မဟာဗျူဟာတို့အတွက် ဗျူဟာမြောက်ချဉ်းကပ်မှုအဖြစ် OBOR ( One Belt One Road) စီမံကိန်းကို တရားဝင်ချပြလာခဲ့သလို နိုင်ငံတော်၏အတိုင်ပင်ခံပုဂ္ဂိုလ်၏ တရုတ်ပြည်ခရီးစဉ်တွင်လည်း တရုတ်နိုင်ငံ ခေတ်သစ်ပိုးလမ်းမကြီး (Belt and Road Initiative) ကို ပါဝင်မည်ဖြစ်ကြောင်း နှစ်နိုင်ငံသဘောတူညီချက် ထုတ်ပြန်ခဲ့ပြီးဖြစ်သည်။

ယူနန်ပြည်နယ်၏ လျှပ်စစ်မီးလိုအပ်ချက်အတွက်ဟုဆိုခဲ့သော မြစ်ဆုံစီမံကိန်းသည် လက်ရှိယူနန်ပြည်နယ်၏ လျှပ်စစ်မီးလို အပ်ချက်မရှိတော့သည့်အချိန်အထိ တရုတ်က လက်လျှော့ခြင်းမရှိသေးသည်မှာ စီမံကိန်းမှရရှိမည့် လျှပ်စစ်မီး၏ ရာခိုင်နှုန်း ၉၀ ထက် မြန်မာနိုင်ငံကို ပထ၀ီနိုင်ငံရေး (Geopolitic) တွင် အသာစီးရလိုသည့် ဗျူဟာမြောက် စီမံကိန်းတစ်ခုသာဖြစ်နိုင်သည့် အခြေအနေဖြစ်သည်။

တရုတ်၏ မဟာဗျူဟာ OBOR တွင် ချိတ်ဆက်နေသော စီမံကိန်းများစွာရှိနေသည်။ ကျောက်ဖြူရေနက်ဆိပ်ကမ်းသည် OBOR မဟာဗျူဟာ၏ အရေးကြီးသော အစိတ်အပိုင်းဖြစ်သလို ဘင်္ဂလားဒေ့ရှ်- တရုတ်-အိန္ဒိယ -မြန်မာ (BCIM) စီးပွားရေး စင်္ကြံသည်လည်း အဓိကကျနေသည်။

ထို့အတူပင် ကျောက်ဖြူ-ကူမင်း ရထားလမ်းသည် အချက်အချာဖြစ်သကဲ့သို့ မူဆယ်၊ လားရှိုး၊ မန္တလေး၊ ရန်ကုန်၊ မော်လမြိုင်မြို့များမှတစ်ဆင့် ထိုင်းနိုင်ငံဆီဝင်ရောက်ရန် စီမံထားသည့် မြန်နှုန်းမြင့်ရထားလမ်းစီမံကိန်း သည်လည်း OBOR ၏ အသက်သွေးကြော ဖြစ်သည်။

ကမ္ဘာတစ်ဝန်းကို ချိတ်ဆက်ထားသည့် OBOR စီမံကိန်း၏ အချက်အချာ အစိတ်အပိုင်းတစ်ခုဖြစ်သော မြန်မာနိုင်ငံသည် စီမံကိန်းတွင်ပါဝင်မည်ဟု ပြောကြားထားသော်ငြား မည်သည့်မဟာဗျူဟာမြောက်ချဉ်းကပ် မှုမျှရှိမနေချေ။ ငွေကြေး၊ လူအင်အား၊ ဦးနှောက်၊ ပညာ၊ စစ်အင်အား အစစအရာရာ သာလွန်နေသည့်အပြင် မြန်မာနိုင်ငံကို ဘဏ္ဍာဆက်သရာပြည်နယ်အဆင့်သာ သဘောထားပြီး ခေတ်အဆက်ဆက်အစိုးရများ၏ ကျေးဇူးရှင်နေရာတွင် မဟာဗျူဟာမြောက် ဖန်တီးယူနိုင်ခဲ့သည့် တရုတ်နိုင်ငံ၏ စီမံကိန်းတွင် မည်သည့်လေ့လာမှု၊ မည်သည့်သုတေသန၊ မည်သည့်ဥပဒေ၊ မည်သည့်မဟာဗျူဟာမျှမရှိဘဲ OBOR တွင် ၀င်ပါခြင်းမှာ မြန်မာတစ်နိုင်ငံလုံးကို အလွယ်ကူဆုံး ထိုးကျွေးလိုက်သည့် ဖြစ်စဉ်သာဖြစ်ပေမည်ဟု ယူဆစရာရှိသည်။

စိုက်ပျိုးမြေအများအပြားကို ခရိုနီ၊ အာဏာရှိသူများ၊ အစိုးရနှင့်နီးစပ်သူများက သိမ်းယူထားသည့် မြန်မာနိုင်ငံသည် စိုက်ပျိုးရေး နိုင်ငံအဖြစ်နှင့် အင်အားကြီးလာစရာ မရှိသလို နည်းပညာနိုင်ငံအဖြစ်လည်း ပေါ်ထွန်းလာရန် ဝေးကွာနေသည်။ အိမ်သုံး၊ နေ့စဉ်သုံးပစ္စည်းများ ဈေးချိုချိုနှင့် မျိုးစုံထုတ်လုပ်ကာ ကမ္ဘာ့နိုင်ငံတိုင်းသို့ ဈေးပေါပေါနှင့် တင်ပို့နေသည့် တရုတ်နိုင်ငံ၏ အိမ်နီးချင်း နိုင်ငံဖြစ်နေ၍လည်း စက်မှုကုန်ထုတ်နိုင်ငံအဖြစ် ကြီးကျယ်လာနိုင်ရန် အကြောင်းတရား နည်းပါးပြန်သည်။ ထို့ပြင် နှစ်ပေါင်း ၅၀ ခန့် သယံဇာတများ ထင်သလိုထုတ်ယူခံခဲ့ရပြီး လက်ရှိတွင် အခွံသာကျန်တော့သည့် မြန်မာနိုင်ငံအနေဖြင့် သယံဇာတများ ထုတ်ရောင်းရင်းနှင့်လည်း ကမ္ဘာ့ထိပ်တန်းနိုင်ငံဖြစ်လာစရာ အကြောင်းမရှိတော့ချိန်တွင် တရုတ်၏ မဟာဗျူဟာ OBOR နှင့် အဓိကချိတ်ဆက်သော ရခိုင်ပြည်နယ်ကို ဗဟိုပြုမည့်စီမံကိန်း မဟာဗျူဟာချထားနိုင်ရန် လိုအပ်သည်။

တရုတ် OBOR စီမံကိန်း၏ အဓိကကျသောနေရာမှာ ကျောက်ဖြူအထူးစီးပွားရေး ဇုန်စီမံကိန်းနှင့် ကျောက်ဖြူ-ကူမင်းရထားလမ်းတို့ ဖြစ်သည်။ ထို့ပြင် ဘင်္ဂါလီအရေးတွင် အဓိကညှိနှိုင်းလုပ်ဆောင်ရမည့် ဘင်္ဂလားဒေ့ရ်ှနိုင်ငံနှင့်လည်း BCIM စင်္ကြံသည်လည်း ရခိုင်ပြည်နယ်ဘက်မှ အဓိကဖြတ်သန်းရမည် ဖြစ်သည်။ နိုင်ငံ၏အကျပ်အတည်း၊ နိုင်ငံ၏ မျှော်လင့်ချက်တို့သည် ရခိုင်ပြည်နယ်တွင် ရှိနေသော်လည်း လက်ရှိအချိန်အထိ မဟာဗျူဟာမြောက် ချဉ်းကပ်မှုပုံစံမရှိသေးသည်မှာ အလွန်အမင်း ဆိုးရွားလှသည်ဟု ဆိုနိုင်သည်။

တစ်ကမ္ဘာလုံးကို စီးပွားရေးအရ ချိတ်ဆက်အသာယူရန် ပြင်ဆင်လာသည့် တရုတ်၏ မဟာဗျူဟာစီမံကိန်းကို မည်သည့်ဗျူဟာ မြောက်ပြင်ဆင်မှု၊ ပြည်သူကို ချပြမှုမရှိဘဲ ပါဝင်ခြင်းမှာ မြန်မာနိုင်ငံအနေဖြင့် တရုတ်နိုင်ငံ၏ ချနင်းစရာတံတားတစ်စင်းအဖြစ် ပါဝင်ခြင်းမှလွဲပြီး မည်သည့်အကျိုးကျေးဇူးမျှ ရနိုင်စရာမရှိချေ။ ထိုသို့ နင်းချေခံရမည့် အခြေအနေမဟုတ်ဘဲ မြန်မာနိုင်ငံ၏ အမျိုးသား အကျိုးစီးပွားအတွက် ဗျူဟာမြောက်လေ့လာ ပြင်ဆင်ရန် လိုအပ်နေသည် ။ ထို့ပြင် ကမ္ဘာ့ထိပ်သီးနိုင်ငံဘေးမှ ဆင်းရဲမွဲတေနေသည့် မြန်မာနိုင်ငံသည် နိုင်ငံကြီးများ၏ ပထ၀ီနိုင်ငံရေးတွင် အသုံးချခံ၊ အနင်းခြေခံမဖြစ်စေရန် အမျိုးသားလုံခြုံရေးမဟာဗျူဟာ ကြီးကျယ်စွာ ချမှတ်ထားရန်လိုအပ်သည်။ အမျိုးသားလုံခြုံရေး မဟာဗျူဟာ (National Security Strategy) ဆိုရာတွင် စစ်ဘက်လုံခြုံရေး (Military Security)၊ စီးပွားရေးလုံခြုံရေး (Economic Security) ၊ ရင်းမြစ်လုံခြုံရေး (Resource Security) ၊ နယ်စပ်ဒေသလုံခြုံရေး (Border Security)၊ လူဦးရေဆိုင်ရာ အချက်အလက်လုံခြုံရေး (Demographic Security) ၊ ဘေးအန္တရာယ်လုံခြုံရေး (Disaster Security)၊ စွမ်းအင်လုံခြုံရေး (Energy Security) ၊ ပထ၀ီမဟာဗျူဟာလုံခြုံရေး (Geostrategic Security)၊ သတင်းအချက်အလက်လုံခြုံရေး (Information Security) ၊ စားနပ်ရိက္ခာလုံခြုံရေး (Food Security)၊ ကျန်းမာရေးလုံခြုံရေး (Health Security) ၊ လူမျိုးနွယ်စုလုံခြုံရေး (Ethnic Security)၊ သဘာဝပတ်ဝန်းကျင်လုံခြုံရေး (Enviromental Security)၊ ဆိုင်ဘာလုံခြုံရေး (Cyber Security) ၊ မျိုးရိုးဗီဇလုံခြုံရေး (Genomic Security) စသည့် မဟာဗျူဟာမြောက် လုံခြုံရေးအမြင်များစွာ ချမှတ်ထားရန်လိုအပ်သည်။

ခြုံငုံ၍ဆိုရလျှင် မြစ်ဆုံစီမံကိန်းသည် အသွင်ပြောင်းခြင်း၊ နာမည်ပြောင်းခြင်းနှင့် စီမံကိန်းအသေးစားအဖြစ် ပြောင်းလဲကာ မေခ၊ မလိခမြစ်ပေါ်တွင် တည်ဆောက်ခြင်းဟု ပုံစံပြောင်းလဲ တည်ဆောက်မည် အခြေအနေရှိနေသကဲ့သို့ စီမံကိန်းကို လက်မခံပြန်ပါကလည်း မြန်မာနိုင်ငံမှာ ဒေါ်လာသန်း ၉၀၀ ခန့် လျော်ကြေးပေးရမည့်အခြေအနေ ဖြစ်နေသည်။ ထိုသို့သော တရုတ်နိုင်ငံဘက်မှ ပထ၀ီနိုင်ငံရေးအရ အသာစီးရယူထားပြီးသော စီမံကိန်းများကို လူထုထောက်ခံမှုဖြင့် တက်လာသည့် အစိုးရအနေဖြင့် မဟာဗျူဟာမြောက် ချဉ်းကပ်ရန်လိုအပ်မည်ဖြစ်ပြီး မြစ်ဆုံနှင့် OBOR ကဲ့သို့ တရုတ်၏ မဟာဗျူဟာတွင် ရှေးယခင်ကလို မြန်မာနိုင်ငံ ဆက်လက်နစ်မွန်းနေမည်ဆိုပါက တိုင်းပြည်အတွင်း ဆူပူမှု၊ မတည်ငြိမ်မှုများဖြင့် နှစ်ပေါင်းရာချီ နစ်မွန်းသွားနိုင်သည်ကို သတိပြုရန် လိုအပ်သည်။

NLD အစိုးရလက်ထက် စီးပွားရေးကျဆင်းမှုဂယက်နှင့် စစ်တမ်းများကပြောသော စီးပွားရေးစီမံခန့်ခွဲခြင်း ညံ့ဖျင်းမှုဆိုင်ရာ ကိန်းဂဏန်းများ

Myanmar Insider က ထုတ်ပြန်သည့် သုံးလတစ်ကြိမ် စီးပွားရေးဆိုင်ရာ ယုံကြည်မှုညွှန်းကိန်းစစ်တမ်းတွင် နှိုင်းယှဉ်ဖော်ပြထားမှုကို တွေ့ရစဉ်

၂၀၁၆ ခုနှစ်အတွင်း မျှော်လင့်သလောက် စီးပွားရေးတိုးတက်ခဲ့ခြင်းမရှိဟု နိုင်ငံတော်၏ အတိုင်ပင်ခံပုဂ္ဂိုလ်က ၀န်ခံထားမှု၏နောက်တွင် မှန်ကန်သည့် မူဝါဒများနှင့် လုပ်ဆောင်ပါက ၂၀၁၇ ခုနှစ်အတွင်း စီးပွားရေးလည်ပတ်မှု ပုံမှန်ဖြစ်ကာ ၂၀၁၈ ခုနှစ်အတွင်း မြန်မာ့စီးပွားရေးတိုးတက်မည်ဟု ခန့်မှန်းခဲ့ကြသည်။

သို့သော် မှန်းချက်နှင့် နှမ်းထွက်လွဲကာ မြန်မာ့စီးပွားရေးသည် ၂၀၁၇ ခုနှစ်အတွင်း ပုံမှန်လည်ပတ်ခြင်းပင် မပြုနိုင်သည့်အပြင် ၂၀၁၆ ခုနှစ်ထက်ပိုသည့် စီးပွားရေးကျဆင်းမှုနှင့် ရင်ဆိုင်ခဲ့ရသည်။

မြန်မာ့စီးပွားရေးအရှိန်အဟုန်နှင့် တိုးတက်နေပါသည်ဆိုသော အချက်အလက် ကိန်းဂဏန်းအမှားများကို ကိုင်စွဲကာ ကြွေးကြော်နေသော်လည်း Doing Business တွင် အဆင့်ကျဆင်းခဲ့ခြင်းသည် အစိုးရ၏ မူဝါဒများ ဆက်လက်မှားယွင်းနေသည်ကို မီးမောင်းထိုးပြသလို အခြေအနေ ဖြစ်ပေါ်ခဲ့သည်။

၂၀၁၇ ခုနှစ်အတွင်း စံချိန်တင် စီးပွားရေးကျဆင်းခြင်းသည် ယခင်အစိုးရလက်ထက်ကထက် နှစ်ဆတက်များပြားလာသည့် ဘတ်ဂျက်လိုငွေ၊ မလျှော့ချနိုင်သေးသည့် ကုန်သွယ်မှုလိုငွေ၊ မျှတမှုမရှိသော စီးပွားရေး ဆိုင်ရာယှဉ်ပြိုင်မှု၊ ငွေကြေးဖောင်းပွမှုဂယက်၊ ရခိုင်အရေး၊ အိန္ဒိယနိုင်ငံ၏ ပဲတင်သွင်းခွင့် ကန့်သတ်မှု၊ တင်ဒါများတင်သွင်းရာတွင် လာဘ်စားမှုမရှိဟု ကြွေးကြော်နေသော်လည်း လာဘ်ပေးရမှုများ ရှိနေသည့်အပြင် ယခင်က ထက်ကြန့်ကြာမှု၊ ထိရောက်သည့် အဂတိလိုက်စားမှုတိုက်ဖျက်ရေးစနစ် မရှိခြင်း၊ နှစ်စဉ်ကျဆင်းနေသည့် ဆောက်လုပ်ရေးကဏ္ဍကို ၂၀၁၆ ခုနှစ်မှစတင်ကာ ဖြိုချခဲ့ပြီးနောက် လက်ရှိအချိန်အထိ ပြန်လည်ထူမနိုင်ခြင်းမရှိမှု စသည့်အချက်များစွာတို့က ဂျက်ပါဝါဖြင့် ပျံတက်မည့် ၂၀၁၇ ခုနှစ် မြန်မာ့စီးပွားရေးကို အတောင်ကျိုးစေခဲ့သည်ဟုသာ မှတ်ယူရမည် ဖြစ်သည်။

ထိုသို့ အတောင်ကျိုးခဲ့သည့် မြန်မာ့စီးပွားရေးကို ပြန်လည်ကုစားရန်မှာ အစိုးရ၏ လွဲမှားနေသော စီမံခန့်ခွဲမှုများကို ပြင်ဆင်ရန် လိုအပ်မည်ဆိုသည့် အချက်များကို ဦးတည်ထားသော လက်ရှိအစိုးရလက်ထက် စီးပွားရေးစီမံခန့်ခွဲမှုနှင့် ပတ်သက်သည့် စစ်တမ်းသုံးစောင်ထွက်ပေါ်ခဲ့ပြီး စီးပွားရေးတိုးတက်မှုနှင့် စားဝတ်နေရေး အဆင်ပြေလိုသော ပြည်သူများ၏ မျှော်လင့်ချက်များကို ကိုယ်ချင်းစာနိုင်ရန် လိုအပ်မည် ဖြစ်သည်။

၂၀၁၇ ခုနှစ်အတွင်း ထုတ်ပြန်ခဲ့သည့်  စီးပွားရေးစစ်တမ်းသုံးစောင်အနက် အမေရိကန်အခြေစိုက် International Republican Institute (IRI) မှထုတ်ပြန်သည့် စစ်တမ်းအကျဉ်းချုပ်မျှ ပြန်လည်လေ့လာမည်ဆိုပါက လူမှုစီးပွားညွှန်းကိန်းတွင် ဦးသိန်းစိန်အစိုးရလက်ထက် ၂၀၁၄ ခုနှစ် ဖေဖော်ဝါရီ၌ ကောက်ခံခဲ့သည့် အချက်အလက်များအရ မြန်မာနိုင်ငံ၏ အခြေအနေအရပ်ရပ်သည် အကောင်းဘက်တွင်ရှိနေသည်ဟု ဖြေဆိုသူ ၈၈ ရာခိုင်နှုန်းသည် လက်ရှိအစိုးရလက်ထက် တွင် ၇၅ ရာခိုင်နှုန်းသာ ရှိနေခဲ့ပြီး မြန်မာနိုင်ငံ၏ လက်ရှိအခြေအနေအပေါ် အကောင်းမြင်မှု ကျဆင်းခဲ့သည်။ ထို့ပြင် မြန်မာနိုင်ငံ၏ လက်ရှိအခြေအနေမှာ အဆိုးဘက်သို့ ရောက်နေသည်ဟု ထင်မြင်ယူဆမှုမှာလည်း ဦးသိန်းစိန်အစိုးရလက်ထက် ခြောက်ရာခိုင်နှုန်းမှ လက်ရှိအစိုးရ၏ လုပ်ဆောင်မှုကြောင့် အဆိုးမြင်မှု ၁၆ ရာခိုင်နှုန်းအထိ မြင့်တက်ခဲ့သည်။

ဦးသိန်းစိန်လက်ထက် မြန်မာ့စီးပွားရေး အခြေအနေအပေါ် စစ်တမ်းကောက်ယူချိန်တွင် ကောင်းသည်ဟု ဖြေဆိုသူ ၇၃ ရာခိုင်နှုန်းအထိ ရှိခဲ့သော်လည်း ဒေါ်အောင်ဆန်းစုကြည် အစိုးရလက်ထက်တွင် ၅၃ ရာခိုင်နှုန်းသာရှိခဲ့သည်။ သို့သော် ညံ့ဖျင်းသည်ဟု ထင်မြင်သူ နှစ်ဆခုန်တက်လာပြီး ဦးသိန်းစိန်လက်ထက် ၁၁ ရာခိုင်နှုန်းမှ ၂၂ ရာခိုင်နှုန်း အထိ မြန်မာ့စီးပွားရေးညံ့ဖျင်းမှု ခုန်တက်ခဲ့သည်။ ထို့ပြင် တော်တော့်ကို ညံ့သည်ထင်မြင်မှုတွင်လည်း ဦးသိန်းစိန်အစိုးရလက်ထက် တစ်ရာခိုင်နှုန်းမှ ကိုးရာခိုင်နှုန်းအထိ မြင့်တက်လာသလို ဦးသိန်းစိန်အစိုးရလက်ထက် စီးပွားရေးမှာ အရမ်းကောင်းသည်ထင်မြင်သူ ၁၂ ရာခိုင်နှုန်းရှိရာမှာ လက်ရှိအစိုးရလက်ထက်၌ ၁၀ ရာခိုင်နှုန်းအထိ ကျဆင်းခဲ့သည်။

ဦးသိန်းစိန်အစိုးရနှင့် နှိုင်းယှဉ်ခဲ့သည့် စစ်တမ်းများ အားလုံးလိုလိုတွင် လက်ရှိအစိုးရ၏ စွမ်းဆောင်ရည်နိမ့်ကျခဲ့သည်။

မြန်မာတစ်နိုင်ငံလုံးအနေဖြင့် ရင်ဆိုင်နေရသည့် အကြီးဆုံးပြဿနာများ ဖြေဆိုမှု ကဏ္ဍတွင် အဓိကအကြီးဆုံးပြဿနာမှာ စီးပွားရေး ကျဆင်းမှုဖြစ်ပြီး ဒုတိယတွင် ပဋိပက္ခ ဖြစ်သည်။ တတိယနေရာတွင် တရားဥပဒေ စိုးမိုးရေးပြဿနာရင်ဆိုင်နေရပြီး  စတုတ္ထနေရာတွင် နိုင်ငံရေးတည်ငြိမ်မှုမရှိခြင်းတို့က ကြီးမားသည့်ပြဿနာ ဖြစ်နေသည်။

အစိုးရအနေဖြင့် ပထမဦးစားပေးဆောင်ရွက်သင့်သည့် အဖွင့်မေးခွန်းအတွက် စီးပွားရေးတိုးတက်အောင် လုပ်ဆောင်ရန် ၃၁ ရာခိုင်နှုန်းက ဆန္ဒပြုခဲ့ပြီး ငြိမ်းချမ်းရေးဖြစ်စဉ်နှင့် ပဋိပက္ခကို ပထမဦးစားပေးဆောင်ရွက်ရန် ၂၅ ရာခိုင်နှုန်းက ဆန္ဒပြုကာ ဒီမိုကရေစီစနစ်နှင့် စီးပွားရေးတိုးတက်မှု မည်သည်ကပို အရေးကြီးသနည်းဆိုသည်ကိုမူ ဒီမိုကရေစီ စနစ်မှာ လုံးဝပိုအရေးကြီးသည် ဖြေသူ ၂၄ ရာခိုင်နှုန်းသာရှိပြီး စီးပွားရေးဖွံ့ဖြိုးတိုးတက်မှုက ပိုအရေးကြီးသည် ဖြေဆိုမှုရာခိုင်နှုန်း ၄၀ အထိရှိနေကာ ပြည်သူများသည် စီးပွားရေးဖွံ့ဖြိုးတိုးတက်ကာ စားဝတ်နေရေးပြေ လည်မှသာ ဒီမိုကရေစီစနစ်ကို လိုချင်သည်ဟု ညွှန်းဆိုသည်။ ထိုအချက်ကို လေးနက်စေသောအချက်အဖြစ် တစ်ပတ်ဝင်ငွေကို စားဝတ်နေရေးအတွက် မည်မျှအထိ သုံးနေရ သနည်းဆိုသည့် စစ်တမ်းတွင် တစ်ပတ်ဝင်ငွေ၏ ရာခိုင်နှုန်း ၅၀ အောက်ကို စားဝတ်နေရေးအတွက် သုံးစွဲရမှု ကိုးရာခိုင်နှုန်း၊ ရာခိုင်နှုန်း ၅၀ ခန့်ကို စားဝတ်နေရေးအတွက် သုံးစွဲရမှု ၁၃ ရာခိုင်နှုန်း၊ တစ်ပတ်ဝင်ငွေ၏ ရာခိုင်နှုန်း ၅၀ မှ ၇၀ အကြားကို သုံးစွဲနေရမှု ၁၀ ရာခိုင်နှုန်း၊ ရာခိုင်နှုန်း ၇၀ မှ ၉၀ အထိ စားဝတ်နေရေးအတွက် သုံးစွဲနေရမှု ၂၁ ရာခိုင်နှုန်းနှင့် ရရစားစားသဘောမျိုးဖြစ်သည့် တစ်ပတ်ဝင်ငွေ၏ ရာခိုင်နှုန်း ၉၀ မှ ၁၀၀ အထိကို စားဝတ်နေရေးအတွက် သုံးနေရသူ ၄၄ ရာခိုင်နှုန်း အထိ ရှိနေသည်။ ထိုသို့သော ပြည်သူ့ကျပ် တည်းမှုအမှန်တရားများသည် မည်သည့်အစိုးရ လက်ထက်တွင်မှ ပပျောက်မည်ကို မြန်မာပြည်သူများအနေဖြင့် သိစွမ်းနိုင်မည် မထင်ပါ။

အခြားသော စစ်တမ်းတစ်စောင်အဖြစ် Myanmar Insider က ထုတ်ပြန်သည့် သုံးလတစ်ကြိမ် စီးပွားရေးဆိုင်ရာယုံကြည်မှု ညွှန်းကိန်းစစ်တမ်းကို ဖော်ပြလိုသည်။ စစ်တမ်းတွင် ဦးသိန်းစိန်အစိုးရလက်ထက် စီးပွားရေးစီမံခန့်ခွဲမှု ကောင်းမွန်ခြင်း ၄၆ ရာခိုင်နှုန်း၊ ပုံမှန်အခြေအနေ ၂၇ ရာခိုင်နှုန်းနှင့် စီမံခန့်ခွဲခြင်း ကောင်းမွန်ခြင်းမရှိမှု ၁၉ ရာခိုင်နှုန်းသာ ရှိသော်လည်း NLD အစိုးရလက်ထက် စီးပွားရေးစီမံခန့်ခွဲခြင်း မကောင်းမွန်မှု ၅၈ ရာခိုင်နှုန်း၊ ပုံမှန်အခြေအနေဟုထင်မြင်မှု ၂၇ ရာခိုင်နှုန်းနှင့် ကောင်းမွန်သည်ဟုထင်မြင်မှု ၁၂ ရာခိုင်နှုန်းသာရှိနေပြီး လက်ရှိအစိုးရ၏ စီးပွားရေးစွမ်းဆောင်ရည်အပေါ် အကောင်းမြင်မှု ကျဆင်းနေကြောင်း စစ်တမ်းထုတ်ခဲ့သည်မှာ လက်ရှိအစိုးရအနေဖြင့် စီးပွားရေး စီမံခန့်ခွဲခြင်း မကောင်းမွန်မှုများကို ပြင်ဆင်ရန် မီးမောင်းထိုးပြခဲ့သည်။

ထို့ပြင် မြန်မာနိုင်ငံ၏ လက်ရှိစီးပွားရေး အခြေအနေမကောင်းမွန်မှု ၆၃ ရာခိုင်နှုန်းအထိ ဆန္ဒပြုခဲ့ကာ အလွန်မကောင်းဟု ထင်မြင်မှု ၁၉ ရာခိုင်နှုန်းအထိရှိခဲ့ပြီး ကောင်းမွန်သည်ဟု ထင်မြင်မှု ၁၉ ရာခိုင်နှုန်းသာ ရှိနေသည်။

နောင်လာမည့်သုံးလအတွင်း စီးပွားရေးအခြေအနေအပေါ် စစ်တမ်းကောက်ယူရာ ပိုမိုဆိုးရွားလာမည်ထင်မြင်မှု လေးရာခိုင်နှုန်း၊ အနည်းငယ်ဆိုးရွားမည်ထင်မြင်မှု ၄၆ ရာခိုင်နှုန်း၊ အနည်းငယ်ကောင်းလာမည်ဟု ထင်မြင်မှု ၃၈ ရာခိုင်နှုန်းနှင့် ပို၍ကောင်းလာမည်ဟုထင်မြင်မှု လေးရာခိုင်နှုန်း ဆန္ဒပြုခဲ့သည်။ ထို့ပြင် နောင်လာမည့်သုံးလအတွင်း စီးပွားရေးကျဆင်းမှု ပိုဆိုးမည်ဟု ထင်မြင်မှု ၆၉ ရာခိုင်နှုန်း၊ ငွေကြေးဖောင်းပွမှု ပိုဆိုးသွားမည်ဟု ထင်မြင်မှု ၇၇ ရာခိုင်နှုန်းနှင့် မြန်မာကျပ်ငွေတန်ဖိုး ကျဆင်းသွားမည်ဟု ထင်မြင်မှု ၆၉ ရာခိုင်နှုန်းအထိရှိခဲ့ပြီး စစ်တမ်းဖော်ပြမှုအရ မြန်မာ့စီးပွားရေးသည် ဆိုးရွားစွာ ကျဆင်းနေသည်ဟု ညွှန်းဆိုရမည့်အဆင့်သို့ ရောက်ရှိနေသည်။

တတိယမြောက်စစ်တမ်းအဖြစ် ဥရောပ အခြေစိုက် ကမ္ဘာလုံးဆိုင်ရာ အတိုင်ပင်ခံကုမ္ပဏီ Roland Berger မှ ဒုတိယအကြိမ် ထုတ်ပြန်ခဲ့သည့် စစ်တမ်းကိုကိုးကားလိုသည်။ ၂၀၁၆ ခုနှစ်အတွင်း ကျဆင်းခဲ့သည့် စီးပွားရေးနှင့် ပတ်သက်ပြီး ထုတ်ပြန်သည့် Roland Berger ပထမစစ်တမ်းတွင် မြန်မာ့စီးပွားရေး တိုးတက်မည်ဟု ၇၃ ရာခိုင်နှုန်းက ယုံကြည်သော်လည်း ရှင်းလင်းသည့် စီးပွားရေးမူဝါဒမရှိခြင်း၊ ဥပဒေပြုကိစ္စရပ်များ မှန်းဆရခက်ခြင်း၊ မူပိုင်ခွင့်ကာ ကွယ်ပေးမှုမရှိခြင်းနှင့် ကျွမ်းကျင်လုပ်သား ရှားပါးခြင်းများက အတားအဆီးဖြစ်နေသည်ဟု စစ်တမ်းထုတ်ခဲ့သော်လည်း အစိုးရ မူဝါဒ၊ ရှင်းလင်းသည့် စီးပွားရေးမူဝါဒမရှိခြင်း၊ ဥပဒေပြုကိစ္စရပ်များ မှန်းဆရခက်ခြင်း၊ မူပိုင်ခွင့်ကာကွယ်ပေးမှု မရှိခြင်းများက စီးပွားရေး တိုးတက်ရန်အတားအဆီးဖြစ်နေသည်ဟု ထောက်ပြခဲ့သည်။ ထို့ပြင် ဖြေဆိုသူများ၏ ရာခိုင်နှုန်း ၉၀ ကျော်က ပွင့်လင်းမြင်သာသည့် အစိုးရမူဝါဒဖြစ်ရေး၊ တည်ငြိမ်သည့် လျှပ်စစ်ပံ့ပိုးမှုရရှိရေး၊ ပို့ဆောင်ရေး အခြေခံအဆောက်အအုံများ ကောင်းမွန်လာရေး၊ ဘဏ္ဍာရေး ကဏ္ဍပြောင်းလဲရေး၊ မျှတသည့်ယှဉ်ပြိုင်မှုများ မြှင့်တင်ပေးရေးနှင့် ပညာရေး ပြုပြင်ပြောင်းလဲရေး များလုပ်ဆောင်ရန် လိုအပ်သည်ဟု ဖြေဆိုခဲ့သည်။

ပထမအကြိမ်စစ်တမ်းများမှာ ထောက်ပြခဲ့သည့် စိုးရိမ်မှုများသည်၂၀၁၇ ခုနှစ်အတွင်း ပြင်ဆင်နိုင်မှုမရှိခဲ့ဘဲ အစိုးရ၏ စီးပွားရေးဆိုင်ရာ စီမံခန့်ခွဲမှုမှားယွင်းခြင်းများနှင့် မူဝါဒပိုင်းဆိုင်ရာအားနည်းမှုများက တိုင်းပြည်ကို ချောက်ထဲဆွဲချကာ မြန်မာနိုင်ငံအတွင်းရှိ စီးပွားရေးလုပ်ငန်းများ တိုးတက်မည်ဟူသော စီးပွားရေးဆိုင်ရာ ယုံကြည်စိတ်ချရမှု (Business Confidence) သည် ယခင်နှစ် ၇၃ ရာခိုင်နှုန်းမှ ၂၀၁၇ ခုနှစ်တွင် ၄၉ ရာခိုင်နှုန်းသို့ သိသိသာသာ လျော့ကျသွားခဲ့သည်။

စစ်တမ်းများသည် ကောက်ယူမှု အချက်အလက်အလိုက် ကွာဟနိုင်မည်ဖြစ်သော်လည်း ပြည်သူလူထု၏ စားဝတ်နေရေး အဆင်ပြေလိုမှု၊ စီးပွားရေးတိုးတက်လိုမှုများကို  ညွှန်းဆိုနေသည်။ ငြိမ်းချမ်းရေးကို ဦးတည်ဆောင်ရွက်ခဲ့သော ဦးသိန်းစိန်အစိုးရသည် ငြိမ်းချမ်းရေးလည်းမအောင်မြင်၊ စီးပွားရေးတွင်လည်း မျှော်လင့်သလောက် တိုးတက်အောင် မဆောင်ရွက်နိုင်ဖြစ်ခဲ့သည်ကို ဦးသိန်းစိန်အစိုးရလက်ထက်ကထက် စီးပွားရေးကျဆင်းသည်ဟု အဝေဖန်ခံနေရသည့် လက်ရှိအစိုးရအနေဖြင့် မိမိတို့၏ စီးပွားရေးဆိုင်ရာမှားယွင်းမှုများနှင့် စီးပွားရေးစီမံခန့်ခွဲမှု ညံ့ဖျင်းအားနည်းချက်များကို အမြန်ဆုံးပြင်ဆင်နိုင်ရေး ကြိုးပမ်းရန် သတိချပ်သင့်သည်။ ထိုသို့ သတိချပ်ပြင်ဆင်မှသာ ၂၀၁၈ ခုနှစ်အတွင်း စီးပွားရေး ပြန်လည်လည်ပတ်ပြီး ၂၀၁၉ ခုနှစ်အတွင်း တိုးတက်မှုရကာ ၂၀၂၀ ပြည့်နှစ်ရွေးကောက်ပွဲ ရလဒ်ကောင်းမည်ဖြစ်သည်။ စီးပွားရေးကျဆင်းခြင်းအပေါ် မထီမဲ့မြင် ဆက်လက်လုပ်ဆောင်နေမည်ဆိုပါက စားဝတ်နေရေးကျပ်တည်းသထက် ကျပ်တည်းလာသည့် ပြည်သူများက ရွေးကောက်ခဲ့သော လက်သန်းနှင့်ပင် ပြန်လည်တောက်ချနိုင်သည်ကို ဦးသိန်းစိန်အစိုးရအား နမူနာယူရန် အကြံပြုလိုသည်။

NLD အစိုးရသက်တမ်း နှစ်နှစ်ခန့်အကြာတွင် ပြန်လည်ဖွဲ့စည်းခဲ့သည့် အဂတိလိုက်စားမှု တိုက်ဖျက်ရေးကော်မရှင်

တရားဥပဒေစိုးမိုးရေးနှင့် အုပ်ချုပ်ရေး ကဏ္ဍများ၌ ပိုမိုပွင့်လင်းမြင်သာမှုရှိပြီး ပြည်တွင်းပြည်ပ ရင်းနှီးမြှုပ်နှံမှုများဖြင့် စီးပွားရေး ဖွံ့ဖြိုးတိုးတက်လာရန်ဆိုသည့် ရည်ရွယ်ချက်ပါဝင်သော အဂတိလိုက်စားမှု တိုက်ဖျက်ရေး ကော်မရှင်ကို NLD အစိုးရသက်တမ်း နှစ်နှစ်နီးပါး ရောက်မှသာ ပြန်လည်ဖွဲ့စည်းနိုင်ခဲ့သည်။ အဂတိလိုက်စားမှု တိုက်ဖျက်ရေးကော်မရှင်အသစ် ဖွဲ့စည်းမှုကို ၂၀၁၇ ခုနှစ်အတွင်း ထင်ရှားသည့် ဖြစ်စဉ်တစ်ခုအဖြစ် ဖော်ပြအပ်ပါသည်။

အဂတိလိုက်စားမှု တိုက်ဖျက်ရေးကော်မရှင်အသစ်ကို ၂၀၁၇ ခုနှစ် နိုဝင်ဘာ ၂၃ ရက်နေ့စွဲဖြင့် နိုင်ငံတော်သမ္မတရုံး၏ အမိန့်အမှတ် (၃၀/၂၀၁၇) ဖြင့် ဖွဲ့စည်းပေးခဲ့သည်။ ဖွဲ့စည်းခဲ့သည့် အဂတိလိုက်စားမှု တိုက်ဖျက်ရေးကော်မရှင်တွင် ပြန်ကြားရေးဝန်ကြီးဟောင်း ဦးအောင်ကြည်က ဥက္ကဋ္ဌအဖြစ်ဆောင်ရွက်ပြီး အဖွဲ့ဝင်များအဖြစ် ဦးစိုးတင့် (ညွှန်ကြားရေးမှူး (ငြိမ်း)၊ ပြည်ထောင်စုစာရင်းစစ်ချုပ်ရုံး)၊ ဦးအောင်လွင် (ညွှန်ကြားရေးမှူး(ငြိမ်း)၊ ပြည်ထဲရေးဝန်ကြီးဌာန)၊ ဦးဟန်ညွန့် (ဒုတိယညွှန်ကြားရေးမှူးချုပ်(ငြိမ်း)၊ ပြည်ထောင်စု ရှေ့နေချုပ်ရုံး)၊ ဒေါ်မြတ်မြတ်စိုး (ညွှန်ကြားရေးမှူးချုပ်(ငြိမ်း)၊ အမျိုးသားစီမံကိန်းနှင့်      စီးပွားရေး ဖွံ့ဖြိုးတိုးတက်မှုဝန်ကြီးဌာန)၊ ဦးအောင်သန်းမြင့် (ညွှန်ကြားရေးမှူး(ငြိမ်း)၊  ပြည်ထောင်စုရှေ့နေချုပ်ရုံး)၊ ဦးခင်မောင်မြင့် (တရားလွှတ်တော်ရှေ့နေ)၊ ဦးမျိုးမြင့် (တရား လွှတ်တော်ရှေ့နေ)၊ ဒေါ်အေးအေးမူ (ဒုတိယညွှန်ကြားရေးမှူးချုပ်(ငြိမ်း)၊ ပြည်ထောင်စု စာရင်းစစ်ချုပ်ရုံး)၊ ဦးဇော်ဝင်း (ရဲချုပ် (ငြိမ်း)၊ ပြည်ထဲရေးဝန်ကြီးဌာန)၊ ဒေါ်လဲ့လဲ့သွင် (ညွှန်ကြားရေးမှူး(ငြိမ်း)၊ ပြည်ထောင်စုစာရင်းစစ်ချုပ်ရုံး) တို့ဖြင့် ဖွဲ့စည်းထားကာအတွင်း ရေးမှူးအဖြစ် ဦးစန်းဝင်း (ညွှန်ကြားရေးမှူး (ငြိမ်း)၊ ပြည်ထောင်စုရှေ့နေချုပ်ရုံး) က ဆောင်ရွက်မည်ဖြစ်သည်။ ကော်မရှင်တွင် ဥက္ကဋ္ဌ၊ အတွင်းရေးမှူးအပါအ၀င် အဖွဲ့ဝင် ၁၂ ဦးဖြင့် ဖွဲ့စည်းထားသည်။

ယခင်သမ္မတဟောင်း ဦးသိန်းစိန်အစိုးရ လက်ထက်တွင် အဂတိလိုက်စားမှု တိုက်ဖျက်ရေးဥပဒေပါ ပြဋ္ဌာန်းချက်များအရ လာဘ်ပေးလာဘ်ယူမှု ပပျောက်ရေးကော်မရှင်ကို ၂၀၁၄ ခုနှစ် ဖေဖော်ဝါရီ ၂၅ ရက်တွင် စစ်မှုထမ်း (အငြိမ်းစား) ဦးမြ၀င်းဥက္ကဋ္ဌအဖြစ် တာဝန်ယူပြီး အဖွဲ့ဝင် ၁၅ ဦးဖြင့် ဖွဲ့စည်းခဲ့သည်။ ထို့နောက် ၂၀၁၄ ခုနှစ် သြဂုတ် ၄ ရက်တွင် လာဘ်ပေးလာဘ်ယူမှု ပပျောက်ရေးကော်မရှင်ကို အဂတိလိုက်စားမှု တိုက်ဖျက်ရေးကော်မရှင်အဖြစ် အမည်ပြောင်းလဲဖွဲ့စည်းခဲ့သည်။

အဂတိလိုက်စားမှုတိုက်ဖျက်ရေးကို အမျိုးသားရေးတာဝန်တစ်ရပ်အဖြစ် ဆောင်ရွက်ရန်၊ သန့်ရှင်းသောအစိုးရ၊ ကောင်းမွန်သော အုပ်ချုပ်ရေးစနစ်ဖြစ်ထွန်းရန်၊ အများပြည်သူဆိုင်ရာ အုပ်ချုပ်ရေးတွင် ဂုဏ်သိက္ခာနှင့် တာဝန်ယူနိုင်မှု မြင့်မားတိုးတက်လာစေရန်၊ အဂတိလိုက်စားမှုများကြောင့် နိုင်ငံတော်ပိုင်ပစ္စည်း၊ လူ့အဖွဲ့အစည်းနှင့် နိုင်ငံသားများ၏ အခွင့်အရေးနှင့် အကျိုးစီးပွားများကို ထိခိုက်မှုမရှိစေရေးအတွက် အကာအကွယ်ပေးရန်၊ အဂတိလိုက်စားမှုကျူးလွန်သူများအား ထိရောက်စွာအရေးယူရန်၊ တရားဥပဒေ စိုးမိုးရေးနှင့် အုပ်ချုပ်ရေးကဏ္ဍများ၌ ပိုမိုပွင့်လင်းမြင်သာမှုရှိပြီး ပြည်တွင်းပြည်ပ ရင်းနှီးမြှုပ်နှံမှုများဖြင့် စီးပွားရေး ဖွံ့ဖြိုးတိုးတက်လာစေရန်ဆိုသည့် ရည်ရွယ်ချက်များဖြင့် အဂတိလိုက်စားမှုတိုက်ဖျက်ရေးကော်မရှင်ကို ဖွဲ့စည်းခဲ့ခြင်းဖြစ်သည်ဟု ဆိုသည်။

ကမ္ဘာ့နိုင်ငံများ၏ အဂတိလိုက်စားမှုများအား စောင့်ကြည့်အကဲဖြတ်လျက်ရှိသည့် NGO အဖွဲ့ဖြစ်သော နိုင်ငံတကာ ပွင့်လင်းမြင်သာမှုရှိရေးအဖွဲ့ (Transparency International) မှထုတ်ပြန်ခဲ့သည့် အဂတိလိုက်စားမှုနှင့်ပတ်သက်သည့် အညွန်းကိန်းအရ ၂၀၁၁ ခုနှစ်တွင် ကမ္ဘာ့နိုင်ငံပေါင်း ၁၈၂ နိုင်ငံ စာရင်းတွင် မြန်မာနိုင်ငံကို အဆင့် ၁၈၀ အဖြစ် သတ်မှတ်ထားရှိခဲ့ရာမှ ၂၀၁၅ ခုနှစ်တွင် အဆင့် ၁၄၇ သို့ရောက်ရှိလာပြီး ၂၀၁၆ ခုနှစ်တွင် အဆင့် ၁၃၆ သို့ ရောက်ရှိခဲ့သည်။ အဆိုပါအဆင့်များကိုကြည့်ပါက မြန်မာနိုင်ငံ၏ အဂတိလိုက်စားမှုအညွှန်းကိန်းမှာ အနီရောင်အဆင့် (အဂတိလိုက်စားမှုများသည့် နိုင်ငံများကိုပြသသည်အရောင်) တွင်ရှိနေသည်။ NLD အစိုးရလက်ထက် ဖွဲ့စည်းခဲ့သည့် အဂတိလိုက်စားမှု တိုက်ဖျက်ရေးကော်မရှင်အနေဖြင့် မြန်မာနိုင်ငံ၏ အဂတိလိုက်စားမှု အညွှန်းကိန်းအား ကျေနပ်ဖွယ်ကောင်းသည့်အဆင့်သို့ တက်လှမ်းနိုင်မည်လားဆိုသည်ကိုတော့ ဆက်လက်စောင့်ကြည့်ရဦးမည် ဖြစ်သည်။

နိုင်ငံတကာအဆင့် စည်းမျဉ်းများနှင့်ကိုက်ညီရန် အချိန်ယူရဦးမည့် မြန်မာ့ဘဏ်လုပ်ငန်း ပြုပြင်ပြောင်းလဲရေး

ပြည်တွင်းဘဏ်တစ်ခု၏ ဘဏ်ခွဲလုပ်ငန်းခွင်တစ်နေရာကို တွေ့ရစဉ် (ဓာတ်ပုံ-စည်သူအောင်)

မြန်မာနိုင်ငံ၏ ဘဏ္ဍာရေးကဏ္ဍနှင့် ငွေရေးကြေးရေးကဏ္ဍကို နိုင်ငံတကာအဆင့်မီ စနစ်တကျဖြစ်စေရန် နိုင်ငံတော်ဗဟိုဘဏ်က အပြည်ပြည်ဆိုင်ရာ ငွေကြေးရန်ပုံ ငွေအဖွဲ့အပါအ၀င် နိုင်ငံတကာအဖွဲ့အစည်းများနှင့် ပူးပေါင်းဆောင်ရွက်လျက်ရှိရာ ယခုနှစ်အတွင်း ပြည်တွင်းဘဏ်များ လိုက်နာရမည့် စည်းမျဉ်းစည်းကမ်းအသစ်များ ထုတ်ပြန်ခဲ့ပြီး ပမာဏကြီးမားသော ကြွေးမြီများ ဆိုင်ရာစည်းမျဉ်း၊ ဘဏ်များ လိုက်နာရမည့် မ,တည်ငွေရင်း လုံလောက်မှုဆိုင်ရာစည်းမျဉ်း၊ ငွေကြေးလွယ်ကူမှု အချိုးသတ်မှတ်ချက်ဆိုင်ရာစည်းမျဉ်း၊ ရရန်ပိုင်ခွင့်များ အမျိုးအစား သတ်မှတ်ခြင်းနှင့် လျာထားခြင်းဆိုင်ရာ စည်းမျဉ်းတို့ပါဝင်ခဲ့ခြင်းကြောင့်၂၀၁၇ ခုနှစ် ၏ ထင်ရှားသည့် စီးပွားရေးဆိုင်ရာ ဖြစ်ရပ်တစ်ခုအဖြစ် ရွေးချယ်ဖော်ပြအပ်ပါသည်။

မ, တည်ငွေရင်း လုံလောက်မှုအချိုးဆိုသည်မှာ ဘဏ်၏ မçတည်ရင်းနှီးငွေနှင့် ဘဏ်၏ ဆုံးရှုံးနိုင်ခြေ အလေးပေးတွက်ချက်ထားသည့် ရရန်ပိုင်ခွင့်တို့၏ အချိုးကိုဆိုသည်။ ဘဏ်များသည် မçတည်ငွေရင်းလုံလောက် အချိုးအား စုစုပေါင်း မ,တည်ငွေရင်း လုံလောက်မှုအချိုး ရှစ်ရာခိုင်နှုန်း၊ အနည်းဆုံးအလွှာ(၁) မ,တည်ငွေရင်းလုံလောက်မှုအချိုး လေးရာခိုင်နှုန်း၊ မ,တည်ငွေရင်း လုံလောက်မှုအချိုးကို ပြည့်မီအောင်ဆောင်ရွက်ရာတွင် အလွှာ(၂) မ,တည်ငွေရင်း သို့မဟုတ် ဖြည့်စွက်မçတည် ငွေရင်းကို အလွှာ (၁) မတည်ငွေရင်း၏ အများဆုံး ၁၀၀ ရာခိုင်နှုန်းအထိ ဗဟိုဘဏ်၏ ခွင့်ပြုချက်ဖြင့် ထည့်သွင်းသတ်မှတ်နိုင်ခြင်း ဖြစ်သည်။

ထို့အတူ ဘဏ်သည် ငွေကြေးလွယ်ကူမှုအချိုးအား အနည်းဆုံးရာခိုင်နှုန်း ၂၀ ထား ရှိရမည်ဖြစ်ပြီး မိမိ၏ ငွေကြေးလွယ်ကူမှု အချိုးအခြေအနေကို နေ့စဉ်တွက်ချက်၍ သတ်မှတ်ထားသည့် အစီရင်ခံစာ ပုံစံအတိုင်း သီတင်းပတ်အလိုက် ပျမ်းမျှအချိုးအား ဗဟိုဘဏ်၊ ဘဏ်လုပ်ငန်းကြီးကြပ်စစ်ဆေးရေးဌာနသို့ အပတ်စဉ် ရက်သတ္တပတ်ကုန်ဆုံးသည့်နေ့၏ နောက်တစ်နေ့ အလုပ်လုပ်ရက်တွင် အစီရင်ခံတင်ပြရန် သတ်မှတ်ထားသည်။

ထို့ပြင် ဘဏ်များအနေဖြင့် ချေးငွေများ၊ ကြိုတင်ထုတ်ချေးငွေများနှင့် လက်ကျန်ရှင်းတမ်းနှင့် လက်ကျန်ရှင်းတမ်းပြင်ပရှိ အခြားရရန်ပိုင်ခွင့်များတွင် ဆုံးရှုံးမှုဖြစ်ပေါ်သည့် အခါတိုင်း အဆိုပါဆုံးရှုံးမှုအတွက် လုံလောက်သော လျာထားချက်များပြုလုပ်ထားရမည်။ ယင်းသို့လျာထားရာတွင် ပျက်ကွက်မှုဖြစ်ပေါ်သည့်အပိုင်းကိုသာ လျာထားရန်မဟုတ်ဘဲ ချေးငွေနှင့် ကြိုတင်ထုတ်ချေးငွေ လက်ကျန်အားလုံး၏ အတိုး၊ အရင်းနှစ်ရပ်စလုံးပေါ်တွင် လျာထားရမည်ဟု သတ်မှတ်ထား ခြင်း ဖြစ်သည်။

ပမာဏကြီးမားသော ကြွေးမြီဆိုသည်မှာ ဘဏ်၏အဓိကမတည်ငွေရင်း၏ ၁၀ ရာခိုင်နှုန်းနှင့်အထက် ကျော်လွန်၍ ပုဂ္ဂိုလ်တစ်ဦး သို့မဟုတ် မိတ်ဖက်အဖွဲ့အစည်း သို့မဟုတ် ဆက်နွှယ်နေသည့် မိတ်ဖက်အဖွဲ့အစည်းသို့ ထုတ်ချေးသည့်ချေးငွေကို ဆိုလိုခြင်းဖြစ်သည်။ အထူးသဖြင့် နှစ်ဦးသို့မဟုတ် နှစ်ဦးထက်ပိုသော ပုဂ္ဂိုလ်များ သို့မဟုတ် အဖွဲ့အစည်းများအကြားတွင် ဆက်နွှယ်သူများထဲမှ တစ်ဦးသည် အခြားသူများအပေါ် တိုက်ရိုက်သော်လည်းကောင်း၊ သွယ်ဝိုက်၍သော်လည်းကောင်း ထိန်းချုပ်နိုင်ခြင်း၊ ဆက်နွှယ်သူများသည် တူညီသည့်မိခင်ကုမ္ပဏီ၏ လက်အောက်ခံကုမ္ပဏီများဖြစ်ခြင်း၊ တူညီသော စီမံခန့်ခွဲမှုအောက်တွင်ရှိခြင်း၊ ယင်းတို့ထဲမှ တစ်ဦးသည် အခြားသောပုဂ္ဂိုလ်တစ်ဦး သို့မဟုတ် အဖွဲ့အစည်းတွင် ၁၀ ရာခိုင်နှုန်းထက် ကျော်လွန်သော အကျိုးစီးပွားရှိခြင်းနှင့် အပြန်အလှန် အာမခံသည့်သဘောတူညီချက် စာချုပ်ချုပ်ဆိုထားခြင်း သို့မဟုတ် တစ်ဆင့်ခံ ကန်ထရိုက်စာချုပ်များ၊ လုပ်ငန်းခွဲဝေလုပ်ကိုင်မှု စာချုပ်စသည်ဖြင့် တစ်ဦးနှင့်တစ်ဦး စီးပွားရေးလုပ်ငန်းများ အထူးဆက်နွှယ်မှုရှိခြင်းတို့ဖြစ်သည်။

ထိုသို့ဗဟိုဘဏ်မှ ချမှတ်ထားသည့် စည်းမျဉ်းအချို့ကို ကိုက်ညီအောင်ဆောင်ရွက်ရန် ပြည်တွင်းဘဏ်များအတွက် အခက်အခဲ ဖြစ်ပေါ်ခဲ့သဖြင့် ဘဏ်လုပ်ငန်းရှင်များနှင့် ဗဟိုဘဏ်တို့အကြား ညှိနှိုင်းဆွေးနွေးမှုများ ပြန်လည်ပြုလုပ်ခဲ့ရသည်။ ထို့နောက် ဗဟိုဘဏ်က ရရန်ပိုင်ခွင့်များ အမျိုးအစားသတ်မှတ်ခြင်းနှင့် လျာထားခြင်းဆိုင်ရာစည်းမျဉ်းပါ အချက်အချို့ကို ပြန်လည်ဖြေလျှော့ပေးပြီး  အဓိကအချက်မှာ ၂၀၁၇ ခုနှစ် ဇူလိုင် ၇ ရက်အထိ ဘဏ်များမှထုတ်ချေးခဲ့သော စာရင်းပို ထုတ်ချေးငွေများအနက် တစ်နှစ်ပြည့်မြောက်သည့်နေ့တွင်  ပြန်လည်မပေးဆပ်နိုင်သော စာရင်းပိုထုတ်ချေးငွေများအား ဗဟိုဘဏ်မှ ချမှတ်ထားသောအချက်များနှင့် ကိုက်ညီပါက သုံးနှစ်ထက်မပိုသော ကာလသတ်မှတ်ချက် ချေးငွေများအဖြစ် ပြောင်းလဲခွင့်ပြုခြင်းဖြစ်သည်။ ထို့ပြင် ငွေကြေးလွယ်ကူမှုအချိုးသတ် မှတ်ချက်ဆိုင်ရာစည်းမျဉ်းကိုလည်း အချိုးတွက်ချက်မှုပုံစံတွင်ပါရှိသည့် ငွေတိုက်စာချုပ်များနှင့်စပ်လျဉ်း၍ သက်တမ်းတစ်နှစ်ထက် ပို၍ကျန်ရှိသော ငွေတိုက်စာချုပ်များတန်ဖိုး၏ ရာခိုင်နှုန်း ၅၀ ကိုပါ ထည့်သွင်းတွက်ချက် ပြင်ဆင်သတ်မှတ်ပေးခဲ့သည်။

နိုင်ငံတော်ဗဟိုဘဏ်မှ ချမှတ်ပေးသော စည်းမျဉ်းစည်းကမ်းသစ်များသည် နိုင်ငံတကာ ဘဏ်လုပ်ငန်းများတွင် လိုက်နာဆောင်ရွက်နေသော စည်းမျဉ်းစည်းကမ်းများဖြစ်သော်လည်း အချို့စည်းမျဉ်းများကို ပြည်       တွင်းဘဏ်များ လိုက်နာဆောင်ရွက်နိုင်ရန် အချိန်အတိုင်းအတာ လိုအပ်ခြင်းကြောင့်  အချို့အချက်များ ပြန်လည်ဖြေလျှော့ပေးခဲ့ခြင်း ဖြစ်သည်။

ဘဏ်များ၏ အဓိက၀င်ငွေအရင်းအမြစ်သည် ချေးငွေလုပ်ငန်းမှဖြစ်ပြီး ပြည်တွင်းစီးပွားရေးလုပ်ငန်းများအတွက်လည်း ချေးငွေရရှိရေးက အဓိကလိုအပ်ချက် ဖြစ်နေသည်။ ၂၀၁၇ ခုနှစ်အထိ ချေးငွေရရှိရန် မရွှေ့ပြောင်းနိုင်သည့် ပိုင်ဆိုင်ပစ္စည်းများကိုသာ အာမခံအဖြစ်လက်ခံ၍ ဘဏ်ချေးငွေထုတ်ပေးနေခြင်းဖြစ်ပြီး စည်းမျဉ်းစည်းကမ်း အပြောင်းအလဲများကြောင့် ဘဏ်များပိုမိုလုံခြုံ စိတ်ချရမည်လား၊ လုပ်ငန်းရှင်များ ချေးငွေရရှိရန် လွယ်ကူလျင်မြန်မလား စသည့်ဖြစ်ပေါ်လာမည့် အကျိုးသက်ရောက်မှုများကို စောင့်ကြည့်ရဦးမည် ဖြစ်သည်။

အိန္ဒိယ၏ ပဲတင်သွင်းခွင့် ကန့်သတ်မှုကြောင့် ဟန်ချက်ပျက်ခဲ့ရသည့် မြန်မာ့ပဲဈေးကွက်

ပခုက္ကူမြို့နယ်အတွင်း ပဲစင်းငုံခြွေလှေ့နေသည်ကို ပဲသိမ်းရာသီက တွေ့ရစဉ် (ဓာတ်ပုံ-သက်ထိန်ဝင်း)

မြန်မာနိုင်ငံ၏ အဓိကပြည်ပ ပဲဈေးကွက်ဖြစ်သည့် အထူးသဖြင့် မတ်ပဲ၊ ပဲစင်းငုံ၊ ပဲတီစိမ်းတို့၏ အဓိကပို့ကုန်ဈေးကွက်ဖြစ်သည့် အိန္ဒိယနိုင်ငံက မြန်မာအပါအ၀င် ပြည်ပမှ ပဲတင်သွင်းမှုများကို ကန့်သတ်လိုက်ခြင်းကြောင့် အိန္ဒိယဈေးကွက်ကို အားထားတင်ပို့နေရသည့် မြန်မာနိုင်ငံ၏ ပဲဈေးကွက်ကို ကြီးကြီးမားမား ထိခိုက်နစ်နာစေခဲ့သည်။ ကန့်သတ်ခံလိုက်ရသော ပဲစင်းငုံ၊ မတ်ပဲ၊ ပဲတီစိမ်းပဲ အမျိုးအစားများသည် အိန္ဒိယဈေးကွက်နှင့် နိုင်ငံတကာသို့ တင်ပို့ရန် မျှော်ကိုးစိုက်ပျိုးခြင်းဖြစ်ပြီး ယင်းပဲအမျိုးအစားများက ပြည်တွင်း စားသုံးမှုနည်းပါးခြင်းကြောင့် ဈေးနှုန်းများထိုးဆင်းခဲ့ပြီး ပြည်ပပို့ကုန်ဝင်ငွေလည်း လျော့ကျခဲ့သည့်အတွက် ၂၀၁၇ ခုနှစ်၏ ထင်ရှားသည့်စီးပွားရေးဆိုင်ရာ ဖြစ်ရပ်တစ်ခုအဖြစ် ရွေးချယ်ဖော်ပြအပ်ပါသည်။

အိန္ဒိယနိုင်ငံ ကူးသန်းရောင်းဝယ်ရေးဌာနက ၂၀၁၇ ခုနှစ် သြဂုတ် ၅ ရက်မှ ၂၀၁၈ ခုနှစ် မတ် ၃၁ ရက်အထိ ပဲစင်းငုံတင်သွင်းမှုကို ကန့်သတ်ကုန်စည်အဖြစ် တစ်နှစ်ကို တန်ချိန် နှစ်သိန်း၊ ၂၀၁၇ ခုနှစ် သြဂုတ် ၂၁ ရက်မှ ၂၀၁၈ ခုနှစ် မတ် ၃၁ ရက်အထိ မတ်ပဲနှင့် ပဲတီစိမ်းတင်သွင်းမှုကို ကန့်သတ်ကုန်စည်အဖြစ် တစ်နှစ်ကို တန်ချိန်သုံးသိန်း သတ်မှတ်လိုက်ခြင်း ဖြစ်သည်။ ယင်းကန့်သတ်မှုမှာ အစိုးရချင်း G to G တင်သွင်းရန် ကတိပြုထားသည့် ပမာဏအပေါ်တွင် သက်ရောက်မှု မရှိဟုဆိုသော်လည်း မြန်မာနှင့် အိန္ဒိယကြား ပဲတင်ပို့မှုတွင် G to G သဘော တူညီမှုမရှိခြင်းကြောင့် မြန်မာ့ပဲဈေးကွက်၏ အဓိက၀ယ်လက် ပျောက်သွားမည့် အခြေအနေဖြစ်သည်။

ယင်းကန့်သတ်မှုများ ထွက်ပေါ်ပြီးချိန်တွင်  ပြည်တွင်း၌ ပဲစင်းငုံလက်ကျန်တန်ချိန် ၁၀၀၀၀၀ ခန့်နှင့် မတ်ပဲလက်ကျန် တန်ချိန် ၃၀၀၀၀၀ ခန့်ကျန်ရှိနိုင်သည်ဟု မြန်မာနိုင်ငံ ပဲမျိုးစုံနှင့် နှမ်းကုန်သည်များအသင်းက ခန့်မှန်းခဲ့ပြီး ကြေညာချက်မထွက်ပေါ်မီ ပဲစင်းငုံတစ်တန် ကျပ်ခြောက်သိန်းခွဲဝန်းကျင်နှင့် မတ်ပဲတစ်တန် ကျပ်ရှစ်သိန်းဝန်းကျင် အရောင်းအ၀ယ်ဖြစ်နေရာမှ ကြေညာချက် ထွက်ပေါ်ပြီးချိန်နောက်ပိုင်း ရက်ပိုင်းအတွင်း ပဲစင်းငုံတစ်တန်လျှင် ကျပ်ငါးသိန်းအောက်နှင့် မတ်ပဲတစ်တန်လျှင် ကျပ်ခြောက်သိန်းခွဲ အောက်ထိုးဆင်းခဲ့သည်။

ဈေးကွက်အတွင်း ပဲဈေးနှုန်းများ ထိုးဆင်းမှုကြောင့် အစိုးရအဖွဲ့၊ သက်ဆိုင်ရာ အသင်းအဖွဲ့များ ပူးပေါင်းပြီး ပဲများပြန်လည် ၀ယ်ယူရန် အိန္ဒိယအစိုးရတာဝန်ရှိသူများနှင့် ညှိနှိုင်းမှုများပြုလုပ်ခဲ့သော်လည်း အိန္ဒိယဘက်မှ ပြန်လည်ဝယ်ယူချိန်တွင် G to G အစီအစဉ်ဖြင့်သာ ၀ယ်ယူမည်ဟု အကြောင်းပြန်ခဲ့သည်။

အိန္ဒိယ၏ ကန့်သတ်မှုစတင်ချိန်တွင် ကုန်စည်ဒိုင်များတွင် အရောင်းအ၀ယ်ပါ ခေတ္တပိတ်သိမ်းခဲ့ပြီး နှစ်ဖက်အစိုးရ တာဝန်ရှိသူများတွေ့ဆုံဆွေးနွေးမှု၊ ကုန်စည်ဒိုင်များ၊ သက်ဆိုင်ရာအသင်းအဖွဲ့များနှင့် အစိုးရ တာဝန်ရှိသူများ တွေ့ဆုံညှိနှိုင်းမှုများပြုလုပ်ခဲ့ပြီး အိန္ဒိယအစိုးရ၏ ကန့်သတ်ချက်ကို မပယ်ဖျက်နိုင်သော်လည်း ဈေးနှုန်းအလွန်အကျွံ ကျဆင်းမှုမဖြစ်ပေါ်ရန် သတ်မှတ်ဈေးတစ်ခု ထားရှိကာ ကျပ်ဘီလျံ ၁၀၀ မတည်၍ ဈေးကွက်အတွင်းရှိပဲများကို ၀ယ်ယူရန် စီစဉ်ခဲ့သည်။

အိန္ဒိယနိုင်ငံမှ တင်သွင်းခွင့် ပိတ်ပင်ထားမှုကြောင့် ပြည်တွင်းရှိကုန်သည်များ ငွေကြေးလည်ပတ်မှု အားလျော့သွား၍ မတ်ပဲ၊ ပဲစင်းငုံဈေးများ ဖြစ်သင့်ဖြစ်ထိုက်သည့် ဈေးနှုန်းအောက်များစွာ ကျဆင်းနေချိန်တွင် ပဲဈေးနှုန်း မပျက်ပြားစေရေးအတွက် မတ်ပဲတစ်တန် ကျပ်ငါးသိန်းနှုန်းဖြင့် တန်ချိန် နှစ်သောင်း၊ ပဲစင်းငုံတစ်တန် ကျပ်လေးသိန်းနှုန်းဖြင့် တန်ချိန်တစ်သောင်း စတင်ဝယ်ယူပေးမည်ဖြစ်ကြောင်း ပဲစင်းငုံနှင့် မတ်ပဲဈေးနှုန်း တည်ငြိမ်ရေးနှင့် ၀ယ်ယူတင်ပို့ရောင်းချရေးအဖွဲ့၊ စီမံခန့်ခွဲရေးကော်မတီက သတင်းထုတ်ပြန်ခဲ့သည်။ ထိုသို့ ဆောင်ရွက်ခဲ့သော်လည်း ဈေးကွက်အတွင်း ပဲဈေးများ ဆက်လက်ကျဆင်းခဲ့ရာ နိုဝင်ဘာလအတွင်း မတ်ပဲတစ်တန်လျှင် ကျပ် ၄၇၀၀၀၀  ၀န်းကျင်၊ ပဲစင်းငုံနီ တစ်တန်လျှင် ကျပ် ၃၃၀၀၀၀ ၀န်းကျင်အထိ ရောက်ရှိခဲ့သည်။  မြန်မာနိုင်ငံ၏ ပဲဈေးကွက် ရွှေထီးဆောင်းခဲ့ချိန်မှာ ယခုဆိုလျှင် ကျော်လွန်ခဲ့ပြီဖြစ်ပြီး ၂၀၁၅ ခုနှစ်တွင် မတ်ပဲတစ်တန် ကျပ် ၂၅ သိန်း၊ ပဲစင်းငုံတစ်တန် ကျပ်သိန်း ၂၀ ဈေးနှုန်းများမှာ အတိတ်တွင် ကျန်ရစ်ခဲ့ပြီ ဖြစ်သည်။  ၂၀၁၇ နှစ်စတွင် မတ်ပဲတစ်တန် ကျပ် ၁၂ သိန်းဝန်းကျင်၊ ပဲစင်းငုံအနီတစ်တန် ကျပ်ရှစ်သိန်းခွဲဝန်းကျင်ရှိခဲ့ပြီး တစ်နှစ်အတွင်း ထက်ဝက်ကျော်ဆက်လက်ကျဆင်းခဲ့ခြင်း ဖြစ်သည်။ ထို့အတူ ပို့ကုန်တင်ပို့မှုအနေဖြင့်လည်း လက်ရှိ ၂၀၁၇-၂၀၁၈ ဘဏ္ဍာနှစ်တွင် တင်ပို့မှုထက်ဝက်ကျော်လျော့ကျခဲ့ပြီး နိုဝင်ဘာ ၂၄ ရက်အထိ ကာလတူတင်ပို့မှုတွင် ယခင်နှစ်ထက် ဒေါ်လာ ၃၄၃ သန်းလျော့ နည်းခဲ့ခြင်း ဖြစ်သည်။

မြန်မာနိုင်ငံ၏ ပဲစိုက်ပျိုးမှုနှင့် ပို့ကုန်တင်ပို့မှုသည် အိန္ဒိယဈေးကွက်ကိုသာ အဓိက ရည်မှန်းဆောင်ရွက်နေခြင်းကြောင့် ယခုကဲ့သို့ ကန့်သတ်မှုနှင့်ကြုံတွေ့ချိန်တွင် ထိ      ခိုက်ဆုံးရှုံးမှု များပြားစေခဲ့သည်။ ယခုဖြစ် ပေါ်ခဲ့သည့်ကိစ္စသည် ဈေးကွက်တစ်ခုတည်း အပေါ်မှီခိုအားထားမှုနှင့် သမားရိုးကျ ဈေးကွက်ရှာဖွေမှုပုံစံသာရှိသည့် မြန်မာ့ပဲဈေးကွက်အတွက် သင်ခန်းစာတစ်ခုဖြစ်ခဲ့ပြီး မြန်မာနိုင်ငံ၏ စီးပွားရေးအခြေအနေအတွက် သတိပေးခေါင်းလောင်းသံတစ်ခုလည်း ဖြစ်ခဲ့သည်။

အွန်လိုင်းလောင်းကစားမှုကို စစ်ဆေးရန်အကြောင်းပြပြီး တရုတ်နိုင်ငံမှ ပိတ်လိုက်သည့် ဘဏ်အကောင့်များကြောင့် နစ်နာခဲ့သော မြန်မာနိုင်ငံသားပိုင် ကုန်သွယ်မှုငွေစာရင်းများ

၂၀၁၇ ခုနှစ် နှစ်လယ်ခန့်က အွန်လိုင်းလောင်းကစားမှုကို စစ်ဆေးရန် တရုတ်နိုင်ငံမှ ပိတ်ထားသည့် ဘဏ်အကောင့် ၃၄၉ ခု အနက် မြန်မာနိုင်ငံသားပိုင်ဘဏ်အကောင့် ၁၃၂ ခုပါဝင်ခဲ့သည့်ဖြစ်စဉ်ကို ၂၀၁၇ ခုနှစ် အတွက် စီးပွားရေးဆိုင်ရာ ထင်ရှားသော ဖြစ်ရပ်တစ်ခုအဖြစ် ဖော်ပြအပ်ပါသည်။

ဇွန် ၁၅ ရက်မှစပြီး မြန်မာနိုင်ငံသား ပို့ကုန်-သွင်းကုန် ကုန်သည်လုပ်ငန်းရှင်များ၏ ဘဏ်စာရင်းများအား တရုတ်နိုင်ငံဘက်မှ ယာယီပိတ်သိမ်းခဲ့ကြောင်း၊ ဘဏ်စာရင်းများ ပိတ်သိမ်းမှုနှင့်ပတ်သက်ပြီး စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးဆောင်သည့် ကိုယ်စားလှယ်အဖွဲ့သည် သိလျှင်သိချင်း တရုတ်ပြည်သူ့သမ္မတနိုင်ငံ စီးပွားရေးကောင်စစ်ဝန်နှင့် စတင်ညှိနှိုင်းခဲ့သည်။ ၂၀၁၇ ခုနှစ် ဇွန် ၁၆ ရက်တွင် ဘဏ်စာရင်းများ ထပ်မံပိတ်သိမ်းမှု သတင်းများအပေါ် မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံးသို့ တယ်လီဖုန်းဖြင့်ဆက်သွယ်ပြီး ဖြေရှင်းဆောင်ရွက်ပေးရန် ညှိနှိုင်းခဲ့သည်။

ထို့ပြင် မြန်မာကုန်သည်များ၏ ငွေစာရင်း၊ အကောင့်များ ပိတ်သိမ်းခဲ့အား မည်သည့်အတွက်ကြောင့် ပြုလုပ်ခြင်းဖြစ်သည်ကို ပိတ်ထားသည့် မြန်မာနိုင်ငံသား လုပ်ငန်းရှင်များ၏ ငွေစာရင်းများကို အမြန်ဆုံးပြန် လည်ဖွင့်လှစ်ပေးရန် ရွှေလီမြို့ပါတီကော်မ တီအတွင်းရေးမှူးနှင့် ရွှေလီမြို့ အစိုးရဌာန တာဝန်ခံတို့ထံ ညှိနှိုင်းအကြောင်းကြားထားခဲ့ပြီး ကုန်သွယ်မှုလုပ်ငန်းများကို ပုံမှန်ဆောင်ရွက်ပေးနိုင်ရန် ညှိနှိုင်းခဲ့သည်။

၂၀၁၇ ခုနှစ် ဇွန် ၁၈ ရက်တွင် ရွှေလီမြို့ ပြည်သူ့အစိုးရ ဒုတိယမြို့တော်ဝန်ဦးစီးအ ဖွဲ့နှင့် မြန်မာအဖွဲ့တို့ မူဆယ်မြို့တွင် တွေ့ဆုံ ဆွေးနွေးခဲ့ပြီး ဒုတိယမြို့တော်ဝန်မှ တရုတ်နိုင်ငံ ပြည်နယ်သုံးခုတွင် အွန်လိုင်းမှ လောင်းကစားလုပ်ငန်းများလုပ်ကိုင်ပြီး ငွေကြေးများ တရားမ၀င်လွှဲပြောင်းခြင်း၊ ငွေသွင်းငွေထုတ်လုပ်ငန်းများ ဆောင်ရွက်နေခြင်းများကြောင့် တစ်ဖက်နိုင်ငံရွှေလီမြို့ပေါ်ရှိ ဘဏ်ခွဲများမှ ဘဏ်အကောင့် ၃၄၉ ခုကို စစ်ဆေးရန်အတွက် ခေတ္တပိတ်ထားခဲ့ရာ မြန်မာနိုင်ငံသားပိုင် ဘဏ့် အကောင့် ၁၃၂ခုပါဝင်နေကြောင်း၊ အွန်လိုင်းလောင်းကစားမှုကို တရုတ်နိုင်ငံ ရဲချုပ်ရုံးမှ တိုက်ရိုက်ကိုင်တွယ်ဖြေရှင်းနေခြင်းဖြစ်ပြီး ဘဏ်အကောင့်များ စိစစ်ခြင်းသည် ဆင့်ကဲဆင့်ကဲ တင်ပြဆောင်ရွက်ခြင်းဖြစ်ပြီး အချိန်အနည်းငယ် လိုအပ်ပါကြောင်း၊ အမှုနှင့် မသက်ဆိုင်သည့် ဘဏ်အကောင့်များ အမြန်ဆုံးပြန်လည်ဖွင့်လှစ်နိုင်ရေး ဆောင်ရွက်သွားမည်ဖြစ်ကြောင်းနှင့် ဘဏ်အကောင့်များ စိစစ်ဖြေရှင်းရေးအတွက်လည်း အထူးအဖွဲ့များ ဖွဲ့စည်းထားရှိပြီးဖြစ်ကြောင်း ပြောကြားသည်။

တရုတ်-မြန်မာနယ်စပ်ဒေသတွင် နယ်စပ်ကုန်သွယ်ရေးလုပ်ကိုင်ကြသော ကုန်သည်အချို့၏ ဘဏ်ငွေစာရင်းများ အပိတ်ခံရမှုနှင့် ပတ်သက်ပြီး မြန်မာနိုင်ငံမှ သက်ဆိုင်ရာ ဌာနများနှင့် ညှိနှိုင်းဆောင်ရွက်သွားမည်ဖြစ်ကြောင်း မြန်မာနိုင်ငံဆိုင်ရာ တရုတ်သံရုံးမှ ဇွန် ၁၉ ရက်တွင် ထုတ်ပြန်ခဲ့သည်။

နှစ်နိုင်ငံ နယ်စပ်နေပြည်သူများ၏ အကျိုးတူစီးပွားကို ကာကွယ်စောင့်ရှောက်ရန်နှင့် နယ်စပ်ဒေသ တရားမ၀င်လှုပ်ရှားမှုများကို  တိုက်ဖျက်ရန်အတွက် လတ်တလောကာလများ၌ တရုတ်သက်ဆိုင်ရာဌာနက နယ်စပ်ဖြတ်ကျော်မှုခင်းများကို စုံစမ်းစစ်ဆေးရာတွင် နှစ်နိုင်ငံမှ နယ်စပ်ကုန်သွယ်ရေး လုပ်ကိုင်နေသူများကို စုံစမ်းမှုများတွင် ပူးပေါင်းပေးပါရန် ဥပဒေနှင့်အညီ တောင်းဆိုထားပြီး ကုန်သည်အချို့၏ ဘဏ်ငွေစာရင်းများကို ယာယီပိတ်ထားခဲ့ကြောင်း ထုတ်ပြန်ချက်တွင် ဖော်ပြထားသည်။

ထိုပိတ်ထားသော ဘဏ်ငွေစာရင်းများတွင် မြန်မာနိုင်ငံမှ နယ်စပ်ကုန်သွယ်ရေး လုပ်ကိုင်သူအချို့၏ ဘဏ်ငွေစာရင်းများလည်း ပါဝင်ကြောင်း သိရပြီး တရုတ်နိုင်ငံ၏ အထက်ဖော်ပြပါ ယာယီလုပ်ဆောင်ချက်သည် နှစ်နိုင်ငံ တရားဝင် နယ်စပ်ကုန်သွယ်ရေး လုပ်ကိုင်သူများ၏ ရေရှည်အကျိုးစီးပွားနှင့် တရုတ်-မြန်မာ ပုံမှန်နယ်စပ်ကုန်သွယ်ရေးကို ကာကွယ်စောင့်ရှောက်ရန်ဖြစ်ကြောင်း ထုတ်ပြန်ချက်တွင် ဖော်ပြထားသည်။

မြန်မာနိုင်ငံနှင့် တရုတ်နိုင်ငံတို့၏ ကုန်သွယ်မှုတွင် နှစ်စဉ်ဒေါ်လာ ၁၀ ဘီလျံခန့် ကုန်သွယ်မှု ပြုလုပ်နေခြင်းဖြစ်ပြီး စုစုပေါင်း ကုန်သွယ်မှုပမာဏ၏ ရာခိုင်နှုန်း ၃၀ ခန့်ရှိကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

မြန်မာ-တရုတ်နယ်စပ်ဒေသတွင် ပုံမှန်ကုန်သွယ်မှုဖြစ်လာစေရေးအတွက် နှစ်နိုင်ငံကုန်သွယ်မှုဆိုင်ရာ သဘောတူညီချက်များ ရရှိနိုင်ရေးဆောင်ရွက်မည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က ပြောကြားသည်။

“တရုတ်-မြန်မာနယ်စပ်ဒေသတွင် ပုံမှန်ကုန်သွယ်ရေးဖြစ်လာအောင် နံပါတ်တစ်အနေနဲ့ လက်ရှိကုန်သွယ်ရေးကိုထိန်းထားမယ်။ နံပါတ် (၂) က  BiLeteral Agreement လုပ်လို့ရရင်လုပ်ဖို့အတွက် တရုတ်နဲ့ကျွန်တော်တို့နဲ့  နှစ်နိုင်ငံကုန်သွယ်ရေး သဘောတူညီမှုရအောင်လို့ ကြိုးစားဆောင်ရွက်မယ်” ဟု စီးပွားရေးနှင့် ကူးသန်းရောင်းဝယ် ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က ဆိုသည်။

မြန်မာ-တရုတ်နယ်စပ်တွင် လယ်ယာထွက်ကုန်များကို တင်ပို့နေခြင်းဖြစ်ပြီး  အထူးသဖြင့် ဆန်နှင့်ပြောင်းစသည်တို့ကို အဓိက တင်ပို့နေခြင်းဖြစ်သည်။ မြန်မာနိုင်ငံမှ ဆန်ကို တရုတ်နိုင်ငံသို့ တရားဝင်တင်ပို့ခြင်း ဖြစ်သော်လည်း တရုတ်ဘက်ကမူ တရားဝင် သတ်မှတ်ထားခြင်းမရှိသဖြင့် မကြာခဏဆို သလိုအဖမ်းအဆီးများ ပြုလုပ်နေခြင်း ဖြစ်သည်။

၂၀၁၇ နှင့် အခြေခံ စားသောက်ကုန်ဈေးနှုန်းမြင့်တက်မှု ဂယက်

မီးဖိုချောင်သုံး စားသောက်ကုန်များဖြစ်သည့် ဆန်အပါအ၀င် ကြက်သွန်နီ၊ ကြက်သွန်ဖြူ စသည့် အခြေခံစားသောက်ကုန်များသည် ယခုနှစ်အတွင်း ဈေးနှုန်းသိသိသာသာ မြင့်တက်ခဲ့သည့်အတွက် ၂၀၁၇ ခုနှစ်အတွက် စီးပွားရေးဆိုင်ရာထင်ရှားသော ဖြစ်ရပ်တစ်ခုအဖြစ် ဖော်ပြအပ်ပါသည်။

ကြက်သွန်နီနှင့်ပတ်သက်ပြီး နွေကြက်သွန်စိုက်ပျိုးသူများ ယခင်နှစ်က တစ်ပိဿာ ကျပ် ၄၀၀ ၀န်းကျင်မှ ၂၀၁၇  ခုနှစ် မတ်လတွင် ကျပ် ၆၀၀ ၀န်းကျင်ဖြင့် ရောင်းချရသည်။၂၀၁၇ ခုနှစ် နိုဝင်ဘာနှင့် ဒီဇင်ဘာတွင် ဈေးကွက်အတွင်း ကြက်သွန်တစ်ပိဿာ ကျပ် ၃၀၀၀ အထိ ရှိလာသည်။၂၀၁၆  ခုနှစ် ကာလတူထက်ဈေးနှုန်းထက် တစ်ဆ၀န်းကျင် ပိုမိုမြင့်တက်ခဲ့သည်။

၂၀၁၅ ခုနှစ်မှ လက်ရှိအချိန်အထိ သုံးနှစ်ဆက်တိုက် ပြည်တွင်းကြက်သွန်နီဈေး မြင့်တက်ခဲ့ခြင်းမရှိခဲ့ပေ။ ယခုနှစ် ကြက်သွန်နီဈေးနှုန်းမှာ သုံးနှစ်အတွင်း စံချိန်တင် မြင့်တက်ခဲ့ခြင်းဖြစ်သည်။ လက်ရှိတွင် ဈေးကွက်အတွင်း ကြက်သွန်နီတစ်ပိဿာလျှင် ကျပ် ၃၆၀၀ အထိပင် ဈေးရှိလာသည်။ ကြက်သွန်နီ အရွယ်အစားနှင့် ခြောက်သွေ့မှုအပေါ် မူတည်၍ ဈေးနှုန်းကွာခြားမှုရှိသည်။ ထို့ပြင် တရုတ်ဘက်မှ ကြက်သွန်နီများလည်း ပြည်တွင်းသို့ ၀င်ရောက်လျက်ရှိသည်။

ထို့အတူ ၂၀၁၇ နှစ်လယ်ခန့်က ကြက်သွန်ဖြူဈေးနှုန်းများ အမြင့်ဆုံးအဖြစ် တစ်ပိဿာ ကျပ် ၆၀၀၀၊ ကျပ် ၇၀၀၀ အတွင်း မြင့်တက်ခဲ့ကြောင်း သိရသည်။

ပြည်တွင်းဆန်လက်ကျန် နည်းလာချိန်ဖြစ်သည့် အောက်တိုဘာလအတွင်းက ဆန်သိုလှောင်ထားသူများက ငွေတိုးနှင့် အမြတ်အစွန်းတွက်ချက်ကာ ဈေးတင်ရောင်းချနေသဖြင့် ပြည်တွင်းစားသုံးနေသည့် ဆန်ဈေးမြင့်တက်ခဲ့သည်။

အောက်တိုဘာလအတွင်းက ယင်းကဲ့သို့ ဆန်ဈေးမြင့်တက်သွားခြင်းသည် ပြည်တွင်းလက်ကျန်နည်းပြီး ဆန်သစ်ပေါ်ခါနီးဖြစ်လာသဖြင့် လှောင်လက်များက ထုတ်ရောင်းလာသည့်အခါ အချိန်ကာလ၊ ငွေတိုးနှင့် အမြတ်အစွန်းကိုတွက်ချက်၍ ဈေးတင်ရောင်းချခြင်းဖြစ်ကြောင်း ကုန်သည်များက ဆိုသည်။

ဘုရင့်နောင်ဆန်ကုန်စည်ဒိုင်အတွင်း ရေးမှူးဦးသန်းဦးက  ပြည်တွင်းစားသုံးဆန်က ပေါ်ဆန်းမွှေးရော၊  ဇီယာပါ ဈေးတက်ကြောင်း၊ ၂၅ မှတ် ဆန်မှာ အမြင့်ဆုံး ၁၀၈ ပေါင် တစ်အိတ်ကို ကျပ် ၂၂၀၀၀ ဈေးဖြစ်သွားသည်။ ဆန်ချောများဖြစ်သည့် ရွှေဘိုပေါ်ဆန်းသည် ယခင်လက ကျပ် ၅၀၀၀၀ ခန့်မှ ကျပ် ၅၅၀၀၀ ခန့်အထိ ဈေးတက်ခဲ့သည်။ ဇီယာရှယ်မှာမူ  ကျပ် ၂၇၀၀၀ ခန့်မှ ကျပ် ၃၀၀၀၀အထိ ဈေးတက်ခဲ့သည်ဟု အောက်တိုဘာလအတွင်း မြင့်တက်ခဲ့သည့် ဆန်ဈေးအခြေအနေကို ပြောကြားသည်။

စက်တင်ဘာလကုန်ပိုင်းနှင့် အောက်တိုဘာလဆန်းပိုင်းက အထူးသဖြင့် ဆန်ကြမ်းဖြစ်သည့် မြောင်းမြဇီယာရှယ်တစ် အိတ်လျှင် ကျပ် ၂၂၅၀၀၊၂၃၀၀၀ ခန့်ရှိခဲ့ရာမှ ကျပ်၂၄၀၀၀ဈေးရှိလာကာ ဈေးတန်းနေကြောင်း၊ အောက်တိုဘာလကုန်ပိုင်းတွင် ကျပ်၂၅၀၀၀ ခန့်  အထိ ပြန်တက်လာကြောင်း၊

ဆန်ချောဈေးအနေဖြင့် ပေါ်ကျွဲရှယ်၊ ပေါ်ဆန်းမွှေး(ရှယ်)၊ ပေါ်ဆန်းလတ်စသည်တို့မှာ ယခင် ၂၇၅၀၀၊၂၈၀၀၀ကျပ်မှ ယင်းကာလတွင် ကျပ် ၃၃၀၀၀ အထိ ဈေးရှိလာကာ တစ်အိတ်လျှင် ပျမ်းမျှအားဖြင့် ကျပ် ၅၀၀၀ ၀န်းကျင်ခန့်ဈေးတက်လာခြင်းဖြစ်ကြောင်း သိရသည်။

ရွှေဘိုပေါ်ဆန်းတစ်အိတ်လျှင် စက်တင်ဘာလကုန်ပိုင်းက ၄၇၅၀၀၊ ၄၈၅၀၀ ကျပ်ဝန်းကျင်မှ အောက်တိုဘာလအတွင်း ကျပ် ၅၁၀၀၀၊ ၅၁၅၀၀ခန့်အထိ ဈေးတက်လာကြောင်း၊ မြောင်းမြပေါ်ဆန်းတစ်အိတ် လျှင် ယခင်က  ကျပ်  ၃၉၅၀၀ ၀န်းကျင်မှ  ကျပ် ၄၃၀၀၀၊ ၄၄၀၀၀ အထိဈေးမြင့်လာကြောင်း ရန်ကုန်မြို့ရှိ ဆန်ကုန်သည်တစ်ဦးက ပြောကြားသည်။ လက်ရှိအချိန်အထိလည်း ဆန်ဈေးများ အတက်ဘက်တွင်သာ ရှိနေဆဲ ဖြစ်သည်။

ကုန်ဈေးနှုန်းများ မြင့်တက်မှုအပါအ၀င် ကိစ္စတစ်ခုခုဖြစ်လာသည့်အချိန်တိုင်းတွင် အစိုးရကို အပြစ်တင်ခြင်းမှာ Mindset အများ မပြောင်းလဲနိုင်သေးသည့် သဘောသာဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယ၀န်ကြီး ဦးအောင်ထူးက ဒီဇင်ဘာ ၉ ရက်တွင် ပြောကြားသည်။

မြန်မာနိုင်ငံအနေဖြင့် ယခင်က ဗဟိုထိန်း ချုပ်မှုရှိခဲ့သည့် ဈေးကွက်ဖြင့် ရပ်တည်ခဲ့ရာမှ ဈေးကွက်စီးပွားရေးစနစ်သို့ အဆင့်ဆင့် ပြောင်းလဲခဲ့ပြီး လက်ရှိတွင် ပိုမိုလွတ်လပ်သည့် ဈေးကွက်စီးပွားရေးစနစ် (Liberal Market Economy) ဆီသို့ လျှောက်လှမ်းနေ ချိန်ဖြစ်သည်ဟု ၎င်းက ဆိုသည်။

ညာမောင်းကားများ တစ်ခန်းရပ်သွားစေသော နှစ်တစ်နှစ်လား

ပြည်ပမှ တင်သွင်းလာသော ကားများကို သီလ၀ါဆိပ်ကမ်းတွင် တွေ့ရစဉ် (ဓာတ်ပုံ-ကြည်နိုင်)

၂၀၁၇ ခုနှစ် အောက်တိုဘာတွင် ဘယ်မောင်းကားများကိုသာ ခွင့်ပြုတော့မည့် ၂၀၁၈ ခုနှစ်အတွက် မော်တော်ယာဉ် တင်သွင်းမှုမူဝါဒဆိုင်ရာ Model Year သတ်မှတ်ချက်ထွက်ရှိလာပြီး ဈေးကွက်အတွင်းရှိနှင့်ပြီး ညာမောင်းကားများ၊ တင်သွင်းပြီးကားများ၏ ဈေးနှုန်းများသည် အမြင့်ဈေးဖြင့် ရှိနေရာမှ ဆက်လက်မြင့်တက်စေခဲ့သောကြောင့် ၂၀၁၇ ခုနှစ် ၏ ထင်ရှားသည့် စီးပွားရေးဆိုင်ရာ အကြောင်းအရာတစ်ခုအဖြစ် ရွေးချယ်ဖော်ပြအပ်ပါသည်။

လက်ရှိအစိုးရသည် ကားတင်သွင်းမှု မူဝါဒကို ၂၀၁၇ ခုနှစ် Model Year သတ်မှတ်ချက်ကတည်းက စတင်တင်းကျပ်ခဲ့ပြီးနောက် ကားဈေးများ စတင်မြင့်တက်ခဲ့ခြင်း ဖြစ်သည်။ ၂၀၁၆ ခုနှစ်နှင့် နှိုင်းယှဉ်ပါက ၂၀၁၇ ခုနှစ်အတွင်း လူအများစီးသော ၁၃၅၀ စီစီအောက် ကားဈေးနှုန်းသည် ရာခိုင်နှုန်း ၆၀ မှ ၉၀ ၀န်းကျင်အထိ မြင့်တက်ခဲ့ပြီး ယခု ၂၀၁၈ ခုနှစ် Model Year သတ်မှတ်ချက်ကြောင့် ကားဈေးနှုန်းများ ဆက်လက်မြင့်တက်လာမည်ဟု ကားရောင်းဝယ်သူများက မျှော်မှန်းထားသည်။

မော်တော်ယာဉ်တင်သွင်းခြင်းနှင့် သက်ဆိုင်သောလုပ်ငန်းများကြီးကြပ်ရေး ကော်မတီက အောက်တိုဘာ ၁၆ ရက်တွင် အမိန့်ကြော်ငြာစာအမှတ် (၁/၂၀၁၇)ဖြင့် ၂၀၁၈ ခုနှစ်အတွက် ပြည်ပမှ မော်တော်ယာဉ် တင်သွင်းခြင်းတွင် ထုတ်လုပ်သည့် ခုနှစ်သတ်မှတ်ခြင်းကို ပြည်ထောင်စုအစိုးရအဖွဲ့၏ သဘောတူညီချက်ဖြင့် ထုတ်ပြန်ခဲ့ခြင်း ဖြစ်သည်။

ယင်းသတ်မှတ်ချက်အရ ယာဉ်အိုယာဉ်ဟောင်းအစီအစဉ် (Consignment စနစ်အပါအ၀င်) တွင် လူစီးမော်တော်ယာဉ်များ (၁၃၅၀ စီစီနှင့်အောက် လူစီးယာဉ်များ အပါအ၀င်) ၂၀၁၄ ခုနှစ်မှ ၂၀၁၈ ခုနှစ်အတွင်း (ဘယ်မောင်း)၊ ကုန်တင်ယာဉ်များ ၂၀၁၄ ခုနှစ်မှ ၂၀၁၈ ခုနှစ်အတွင်း (ဘယ်မောင်း)၊ ခရီးသည်တင်ယာဉ်များ ၂၀၁၄ မှ ၂၀၁၈ ခု နှစ်အတွင်း (ဘယ်မောင်း) တင်သွင်းရမည် ဖြစ်သည်။

လူပုဂ္ဂိုလ်တစ်ဦးချင်း အစီအစဉ်တွင် လူစီးမော်တော်ယာဉ်များ (၁၃၅၀ စီစီနှင့်အောက် လူစီးယာဉ်များအပါအ၀င်) ၂၀၁၆ မှ ၂၀၁၈ ခုနှစ်အတွင်း(ဘယ်မောင်း)၊ ကုန်တင်ယာဉ်များ ၂၀၁၄ မှ ၂၀၁၈ ခုနှစ်အတွင်း (ဘယ်မောင်း)၊ ခရီးသည်တင်ယာဉ်များ (Mini Bus / City Bus / Express Bus ) ၂၀၁၄ မှ ၂၀၁၈ ခုနှစ်အတွင်း (ဘယ်မောင်း) တင်သွင်းရန် သတ်မှတ်ထားသည်။

ထို့အတူ ပုံမှန်လိုင်စင်ဖြင့် မော်တော်ယာဉ်လျှောက်ထားမှု (FOC စနစ်ဖြင့် ပြည်ပမှ လှူဒါန်းသည့် မော်တော်ယာဉ်ပါမစ် လျှောက်ထားမှုအပါအ၀င်) တွင် လူစီးမော်တော်ယာဉ်များ ၂၀၁၆ မှ ၂၀၁၈ ခုနှစ်အတွင်း (ဘယ်မောင်း)၊ လုပ်ငန်းသုံးယာဉ်များ ၂၀၁၄ မှ ၂၀၁၈ ခုနှစ်အတွင်း၊ ယန္တရားများ ၂၀၀၉ ခုနှစ်မှ ၂၀၁၈ ခုနှစ်အတွင်း၊ မီးသတ်ယာဉ်၊ လူနာတင်ယာဉ်၊ နိဗ္ဗာန်ယာဉ် ၂၀၀၇ မှ ၂၀၁၈ ခုနှစ်အတွင်း (ဘယ်မောင်း)၊ သာသနာရေးဆိုင်ရာယာဉ်များ ၂၀၁၄ ခုနှစ်မှ ၂၀၁၈ ခုနှစ်အတွင်း (ဘယ်မောင်း)၊ ခရီးသည်တင်ယာဉ်များ (Mini Bus / City Bus / Express Bus )၂၀၁၄ မှ ၂၀၁၈ ခုနှစ်အတွင်း (ဘယ်မောင်း) တင်သွင်းရန် သတ်မှတ်ထားသည်။ အစိုးရဌာနများမှ မော်တော်ယာဉ်လျှောက်ထားမှုအနေဖြင့် လူစီးမော်တော်ယာဉ်များ  ၂၀၁၆ မှ ၂၀၁၈ ခု နှစ်အတွင်း (ဘယ်မောင်း)၊ လုပ်ငန်းသုံးယာဉ်များ/ ယန္တရားများ/ ခရီးသည်တင်ယာဉ်များ    ၂၀၁၄ ခုနှစ်မှ ၂၀၁၈ ခုနှစ်အတွင်း (ဘယ်မောင်းတင်သွင်းရန် မူဝါဒချမှတ်ထားသည်။

၂၀၁၇ ခုနှစ်အတွက် သတ်မှတ်ခဲ့သော သတ်မှတ်ချက်များနှင့် နှိုင်းယှဉ်ပါက ယာဉ်အိုယာဉ်ဟောင်းအစီအစဉ်တွင် အနိမ့်ဆုံး မော်ဒယ်သတ်မှတ်ချက်များ သိသိသာသာ မြင့်တက်ခဲ့ပြီး ယခင်က ညာမောင်းကားများ တင်သွင်းခွင့်ပြုခဲ့သော်လည်း ၂၀၁၈ ခုနှစ်တွင် ဘယ်မောင်းကားများသာ တင်သွင်းခွင့်ပြုတော့မည် ဖြစ်သည်။ ယင်းအချက်ကြောင့် ဈေးကွက်အတွင်း ရောင်းချရန်ကျန်ရှိသော ကားများအပါအ၀င် ညာမောင်းကား ဈေးနှုန်းများ ဆက်လက်မြင့်တက်ခဲ့ခြင်း ဖြစ်သည်။

၂၀၁၇ ခုနှစ် လက်ကျန်ကာလတွင် ၂၀၁၇ ခုနှစ် မော်တော်ယာဉ်တင်သွင်းမှု မူဝါဒဖြင့် ဒီဇင်ဘာ ၂၇ ရက်အထိ သတ်မှတ်ခုနှစ်များအတိုင်း မော်တော်ယာဉ်တင်သွင်းခွင့် လိုင်စင်၊ ပါမစ်များလျှောက်ထားနိုင်မည်ဖြစ်ပြီး တစ်ဦးချင်း ပြည်ပမှမော်တော်ယာဉ်တင်သွင်းခွင့်ပါမစ် လျှောက်ထားခြင်းကို ဒီဇင်ဘာ ၁၅ ရက်အထိ ခွင့်ပြုမည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန စီမံခန့်ခွဲရေးကော်မတီ၏(၂၀ /၂၀၁၇) အစည်းအဝေးဆုံးဖြတ်ချက်အရ အောက်တိုဘာ ၂၄ ရက်တွင် ထုတ်ပြန်ကြေညာခဲ့သည်။

အဆိုပါသတ်မှတ်ချက်အရ ၂၀၁၇ ခု နှစ် ဒီဇင်ဘာ ၁၅ ရက်အထိသာ ညာမောင်းကားများ တင်သွင်းခွင့်ပါမစ်လျှောက်ထားနိုင်ခဲ့ပြီး စလစ်ဈေးများလည်း ဒီဇင်ဘာ ဒုတိယပတ်တွင်မြင့်တက်ခဲ့သည်။ ၂၀၁၇ လက်ကျန်ကာလအတွင်း လျှောက်ထားမှုများအရ ပါမစ်သက်တမ်းနှင့် သက်တမ်းတိုးကာလများကြောင့် လာမည့်ဧပြီလပိုင်းအထိ ညာမောင်းကားများ ၀င်ရောက်နေဦးမည် ဖြစ်သည်။

၂၀၁၇ ခုနှစ်နှင့် ၂၀၁၈ ခုနှစ်မော်တော် ကားတင်သွင်းမှု မူဝါဒအပြောင်းအလဲကြောင့် ညာမောင်းကားများ ဈေးနှုန်းများမြင့်တက်လာပြီး တစ်ဖက်တွင်လည်း ဈေးနှုန်းကွာခြားမှု နည်းပါးလာသည့်အတွက် Brand New ကားများကို လူကြိုက်များလာပြီး လတ်တလောနှစ်များတွင် ဈေးကွက်အားပြိုင်နေဦးမည်ဖြစ်သော်လည်း မကြာမီနှစ်အနည်းငယ်အတွင်း  Brand New ကားသစ်များက ဈေးကွက်ဦးဆောင်လာဖွယ်ရှိနေသည်။

၂၀၁၆ ခုနှစ်တွင် မြန်မာနိုင်ငံအတွင်း ကားသစ်စီးရေ ၄,၂၀၀ ၀န်းကျင်ရောင်းချခဲ့ရပြီး ၂၀၁၇ ခုနှစ်အတွင်း မြန်မာအစိုးရ၏ ကားတင်သွင်းမှုဆိုင်ရာ မူဝါဒအပြောင်းအလဲကြောင့် ကားသစ်စီးရေ ၇,၅၀၀ ၀န်းကျင် ရောင်းချရမည်ဟု မျှော်မှန်းထားသည်။ ကားသစ်များ ရောင်းချမှုနှင့် ထုတ်လုပ်မှုများအတွက် မြန်မာဈေးကွက်သည် ထွန်းသစ်စဈေးကွက်တစ်ခုဖြစ်ပြီး နှစ်အလိုက်တိုးတက်မှုနှုန်း ဆက်လက်မြင့်မားမည်ဟု ခန့်မှန်းထားခြင်း ဖြစ်သည်။ ၂၀၁၁ ခုနှစ်တွင် မော်တော်ကားတင်သွင်းခြင်းဆိုင်ရာ မူဝါဒစတင်ခဲ့ရာ ၂၀၁၇ ခုနှစ် အောက်တိုဘာအထိ ဒေါ်လာ ၁၀ ဘီလျံဝန်းကျင်တန်ဖိုးရှိ ကားစီးရေ ၈၈၆,၂၃၄ စီးတင်သွင်းခဲ့ပြီး အများစုသည် တစ်ပတ်ရစ် ညာမောင်းကားများသာ ဖြစ်သည်။ ယခု ပြောင်းလဲလိုက်သည့် မူဝါဒကြောင့် ၂၀၁၇ ခုနှစ်သည် ညာမောင်းကားများတင်သွင်းခွင့်ပြုသည့် နောက်ဆုံးနှစ်ဖြစ်လာပြီး ကားဈေးကွက်အတွက် အချိုးအကွေ့များစွာ ဖြစ်ပေါ်စေခဲ့သည့် နှစ်ဖြစ်ခဲ့သည်။