မြန်မာနိုင်ငံ ရင်းနှီးမြှုပ်နှံမှု မြှင့်တင်ရေး အစီအစဉ်အရ မြန်မာနိုင်ငံအတွင်းသို့ နှစ်စဉ် နိုင်ငံခြား ရင်းနှီးမြှုပ်နှံမှု ပမာဏ ယခင်က ဒေါ်လာခြောက်ဘီလျံအထိ ဝင်ရောက်ရန် ခန့်မှန်းထားသော်လည်း လက်ရှိတွင် ဒေါ်လာ ၅ ဒသမ ၈ ဘီလျံအထိ ဝင်ရောက်ရန် ခန့်မှန်းထားကြောင်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနမှ ဒုတိယညွှန်ကြားရေးမှူးချုပ် ဦးသန်းအောင်ကျော်က မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) ၏လုပ်ငန်းတာဝန်များနှင့် ရင်းနှီးမြှုပ်နှံမှု အခွင့်အလမ်းများ၊ စိန်ခေါ်မှုများ ခေါင်းစဉ်ဖြင့် ကျင်းပခဲ့သည့် စီးပွားရေး စကားဝိုင်းတွင် ဆွေးနွေးခဲ့ကြောင်း နိုင်ငံပိုင် သတင်းစာများတွင် ဖော်ပြထားသည်။
ယခင်က နိုင်ငံခြားနှင့် တိုက်ရိုက်ရင်းနှီးမြှုပ်နှံသည့် အစီအစဉ် (Foreign Direct Investment Promotion Plan - FDIPP) ရေးဆွဲခဲ့ကြောင်း၊ နောက်ပိုင်းတွင် ပြောင်းလဲလာသည့် ရင်းနှီးမြှုပ်နှံမှုမူဝါဒ၊ စီးပွားရေးမူဝါဒ၊ ပတ်ဝန်းကျင် အခြေအနေ၊ ကမ္ဘာ့အခြေ အနေများနှင့် လိုက်လျောညီထွေမှု ရှိစေရန်အတွက် လက်ရှိအချိန်တွင် မြန်မာနိုင်ငံ ရင်းနှီးမြှုပ်နှံမှုမြှင့်တင်ရေး အစီအစဉ် (Myanmar Investment Promotion Plan – MIPP) ကို ပြန်ဆွဲထားကြောင်း သိရသည်။
“ဒီကိစ္စကို ပြန်ဆွဲတဲ့အခါမှာ စီးပွားရေးမူဝါဒလည်း ကိုက်ရမယ်။ အခုကျွန်တော်တို့ နောက်ဆုံးလုပ်တဲ့ ရေရှည်တည်တံ့သော ဖွံ့ဖြိုးတိုးတက်မှုဆိုင်ရာ အစီအစဉ် (Myanmar Substainable Development Plan – MSDP) နဲ့လည်း အံဝင်အောင်ဆိုပြီး ပြန်ဆွဲထားတယ်။ ကျွန်တော်တို့ မှန်းထားတာက ၂၀၁၆-၂၀၁၇ ကနေမှန်းပြီး ဆွဲထားတာ။ ကာလတို ၂၀၂၀-၂၀၂၁ အထိ ငါးနှစ်မှာ အ ရင်က ခြောက်ဘီလျံအထိ မှန်းထားပေမဲ့ အခု ၅ ဒသမ ၈ ဘီလျံလောက်အထိ မှန်း ထားတယ်။ အဲဒီကနေ နောက်ထပ် ၂၀၂၅- ၂၀၂၆ ငါးနှစ်တာကာလမှာတော့ ၈ ဒသမ ၅ ဘီလျံ စလုပ်ပြီ။ အဲဒီကနေ နောက်ထပ် ငါးနှစ်မှာ ၁၂ ဘီလျံလောက် တိုးပြီးမှန်းထား တယ်။ အဲဒီကနေ ၂၀၃၅-၂၀၃၆ အထိကို ၁၇ ဘီလျံလောက်အထိ တိုးမှန်းထားတယ်။ နှစ်စဉ်အလိုက် တိုးတက်လာဖို့ပါ” ဟု ဦးသန်းအောင်ကျော်က ပြောကြားသည်။
လက်ရှိအချိန်အထိ မြန်မာနိုင်ငံသို့ နိုင်ငံခြားရင်းနှီးမြှုပ်နှံမှုပမာဏ ဒေါ်လာ ၁ ဒသမ ၁၃၇ ဘီလျံကျော်အထိ ဝင်ရောက်ထားသော်လည်း ယခင်နှစ်ကာလတူတွင် ဝင်ရောက်ခဲ့သည့် နိုင်ငံခြား ရင်းနှီးမြှုပ်နှံမှုထက် ဒေါ်လာ ၂ ဒသမ ၅ ဘီလျံကျော် လျော့နည်းနေကြောင်း MIC မှ သိရသည်။
