သြဂုတ် ၆ ရက်တွင် နိုင်ငံခြားငွေလဲနှုန်း တစ်ဒေါ်လာ ၁၄၅၇-၁၄၆၄ ကျပ်ကြား အတက်အကျ ဖြစ်ပေါ်နေပြီး ပြည်တွင်းရွှေဈေးနှုန်း ကျပ် ၉၄၇၉၀၀ ဝန်းကျင်ရှိကြောင်း ဈေးကွက်အတွင်း ရောင်းဝယ်သူများထံမှ သိရသည်။
၂၀၁၆ ခုနှစ် ဒီဇင်ဘာ ၁၆ ရက်တွင် ဖြစ်ပေါ်ခဲ့သည့် တစ်ဒေါ်လာ ၁၄၃၈ ကျပ် စံချိန်ကို ဇူလိုင် ၃၀ ရက်တွင် ကျပ် ၁၄၄၀ ဖြင့် ချိုးခဲ့ပြီး ဇူလိုင် ၃၁ ရက်တွင် ၁၄၄၃ ကျပ်၊ သြဂုတ် ၁ ရက်တွင် ၁၄၄၇ ကျပ်၊ သြဂုတ် ၂ ရက်တွင် ၁၄၅၁ ကျပ်၊ သြဂုတ် ၃ ရက်တွင် ၁၄၆၅ ကျပ်အထိ စံချိန်တင် ဆက်လက်မြင့်တက်ခဲ့သည်။ ၂၀၁၈ ခုနှစ် ဇွန်လဒုတိယပတ်မှ စတင်ကာ ဒေါ်လာဈေးများ မြင့်တက်ခဲ့ခြင်းဖြစ်ပြီး ဇွန် ၁၁ ရက်မှ သြဂုတ် ၃ ရက်အထိ တစ်ဒေါ်လာ ကျပ် ၁၁၉ အထိ မြင့်တက်ခဲ့ကာ ယင်းကာလအတွင်း မြန်မာကျပ်ငွေတန်ဖိုး ၈ ဒသမ ၈၄ ရာခိုင်နှုန်း ကျဆင်းခဲ့သည်။
ပြည်တွင်းဈေးကွက်အတွင်း သြဂုတ် ၆ ရက်တွင် ဖြစ်ပေါ်သော အခြားနိုင်ငံခြားငွေကြေးများ၏ လဲလှယ်မှုနှုန်းထားများမှာ ယူရို ကျပ် ၁၆၈၀၊ စင်ကာပူဒေါ်လာ ၁၀၇၂ ကျပ်၊ မလေးရှားရင်းဂစ် ၃၅၈ ကျပ်၊ ထိုင်းဘတ် ၄၄ ဒသမ ၁၀ ကျပ်၊ တရုတ်ယွမ် ၂၁၃ကျပ်၊ ဂျပန် ယန်း ၁၃ ကျပ်၊ တောင်ကိုရီးယားဝမ် ၁ ဒသမ ၄၀ ကျပ်ဖြစ်သည်။
ဒေါ်လာဈေးမြင့်တက်မှုနှင့်အတူ ပြည်တွင်းရွှေဈေးသည် ကမ္ဘာ့ရွှေဈေးကျဆင်းသော်လည်း အမြင့်ပိုင်းတွင် ဆက်လက်ဖြစ်ပေါ်နေကြောင်း ပြည်တွင်းရွှေဈေးကွက်အတွင်း အရောင်းအဝယ်ဖြစ်မှုများအရ သိရသည်။
ပြည်တွင်းရွှေဈေးသည် ပြီးခဲ့သည့် ၂၀၁၇ ဇူလိုင် ၂၁ ရက်မှ စတင်ကာ ကျပ် ၉၀၀၀၀၀ အထက်ရောက်ခဲ့ပြီး ကမ္ဘာ့ရွှေဈေး မြင့်တက်မှုနှင့်အတူ စံချိန်တင်ဈေးနှုန်းများအဖြစ် သြဂုတ်လအတွင်းနှင့် စက်တင်ဘာလလယ်အထိ ဆက်တိုက်မြင့်တက်ခဲ့ကာ ၂၀၁၇ ခုနှစ် စက်တင်ဘာ ၁၅ ရက်တွင် ၉၅၇၃၀၀ ဖြင့် စံချိန်တင်ထားသည်။
ပြီးခဲ့သည့် ၂၀၁၇ ခုနှစ် ဒီဇင်ဘာ ၃၀ ရက်တွင် ကျပ် ၉၃၇၀၀၀၊ ဇန်နဝါရီ ၉ ရက်တွင် ကျပ် ၉၃၈၀၀၀ ဝန်းကျင်ဖြစ်ပေါ်နေသော ရွှေဈေးသည် ဇန်နဝါရီ ၂၅ ရက်တွင် ကျပ် ၉၅၅၇၀၀ အထိ မြင့်တက်ခဲ့ကာ ဖေဖော်ဝါရီ ၁၅ ရက်တွင် ကျပ် ၉၄၄၆၀၀၊ မတ် ၇ ရက်တွင် ကျပ် ၉၄၁၂၀၀၊ မတ် ၃၁ ရက်တွင် ကျပ် ၉၃၉၅၀၀၊ ဧပြီ ၁၉ ရက်တွင် ကျပ် ၉၄၈၄၀၀၊ မေ ၉ ရက်တွင် ကျပ် ၉၃၈၀၀၀၊ မေ ၃၁ ရက်တွင် ကျပ် ၉၃၄၇၀၀၊ ဇွန် ၆ ရက်တွင် ကျပ် ၉၃၂၉၀၀၊ ဇွန် ၂၇ ရက်တွင် ကျပ် ၉၃၇၀၀၀၊ ဇူလိုင် ၃ ရက်တွင် ကျပ် ၉၃၄၁၀၀၊ ဇူလိုင် ၂၆ ရက်တွင် ကျပ် ၉၅၀၅၀၀၊ သြဂုတ် ၆ ရက်တွင် ကျပ် ၉၄၇၉၀၀ ဝန်းကျင်ဖြစ်ပေါ်ခဲ့သည်။
