ရန်ကုန်တိုင်းဒေသကြီးအတွင်း အကောင်အထည်ဖော်နေသည့် သီလဝါ အထူးစီးပွားရေးဇုန်ကို တွေ့ရစဉ်

၂၀၁၇ ခုနှစ် သြဂုတ်မှ ၂၀၁၈ ခုနှစ် မေ၂၃ ရက်အထိ ၁၀ လအတွင်း ရန်ကုန်တိုင်းဒေသကြီး၌ ပြည်တွင်းပြည်ပ ရင်းနှီးမြှုပ်နှံမှုလုပ်ငန်း ၅၉ ခုအား ရင်းနှီးမြှုပ်ရန် အတည်ပြုမိန့် ထုတ်ပေးခဲ့ပြီး အဆိုပါ လုပ်ငန်းများမှ အလုပ်အကိုင် အခွင့်အလမ်း ၂၆၀၀၀ ကျော် ဖန်တီးပေးနိုင်မည်ဖြစ်ကြောင်း ရန်ကုန်တိုင်းဒေသကြီး ရင်းနှီးမြှုပ်နှံမှု ကော်မတီမှ သိရသည်။

၂၀၁၇ ခုနှစ် သြဂုတ်မှ ၂၀၁၈ ခုနှစ် မေ ၂၃ ရက်အထိ ရန်ကုန်တိုင်း ဒေသကြီး ရင်းနှီးမြှုပ်နှံမှုကော်မတီ အနေဖြင့် စက်မှုကဏ္ဍနှင့် အခြားဝန်ဆောင်မှု ကဏ္ဍတို့တွင် စင်ကာပူနိုင်ငံ၊ တရုတ်ပြည်သူ့ သမ္မတနိုင်ငံ၊ ကိုရီးယားသမ္မတနိုင်ငံ၊ ထိုင်ဝမ်၊ ဟောင်ကောင်၊ ဂျပန်နိုင်ငံ၊ မလေးရှားနိုင်ငံ၊ ဗီယက်နမ်နိုင်ငံနှင့် British Virgin Islands နိုင်ငံတို့မှ နိုင်ငံခြား ရင်းနှီးမြှုပ်နှံမှုလုပ်ငန်း ၄၅ ခုနှင့် မြန်မာနိုင်ငံသား ရင်းနှီးမြှုပ်နှံမှုလုပ်ငန်း ၁၄ ခု၊ စုစုပေါင်း ရင်းနှီးမြှုပ်နှံမှု လုပ်ငန်း ၅၉ ခုအား အတည်ပြုမိန့်များ ထုတ်ပေးခဲ့ပြီး မ,တည်ငွေရင်းပမာဏ စုစုပေါင်း ဒေါ်လာ ၆၈ ဒသမ ၁၈၃ သန်းနှင့် ကျပ် ၃၁၂၅၄ ဒသမ ၄၆၅ သန်း၊ အလုပ်အကိုင် အခွင့်အလမ်း ၂၆၁၀၇ ဦးအတွက် ဖန်တီးပေးနိုင်မည်ဟု သိရသည်။

ရန်ကုန်တိုင်းဒေသကြီးအတွင်း ရင်းနှီးမြှုပ်နှံမှု ဆောင်ရွက်လိုသူများ အနေဖြင့် မ,တည်ငွေရင်း ပမာဏ ဒေါ်လာငါးသန်း သို့မဟုတ်ကျပ် သန်း ၆၀၀၀ အထိ ရင်းနှီးမြှုပ်နှံမှု လုပ်ငန်းများ၏ အတည်ပြု လျှောက်ထားလွှာများကို ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာန၊ ရန်ကုန်တိုင်းဒေသကြီး ဦးစီးမှူးရုံး၊ မြေကွက် အမှတ် ၄၉၊ စိမ်းလဲ့မေလမ်းသွယ်၊ ကမ္ဘာအေးဘုရားလမ်း၊ ရန်ကင်းမြို့နယ်၊ ရန်ကုန်မြို့၊ တယ်လီဖုန်းအမှတ် ၉၅-၀၁-၆၅၈၂၆၃ သို့ ဆက်သွယ် လျှောက်ထားနိုင်ကြောင်း ထုတ်ပြန်ခဲ့သည်။

၁၉၉၄-၁၉၉၅ ဘဏ္ဍာနှစ်မှ ၂၀၁၇-၂၀၁၈ ဘဏ္ဍာနှစ်ကုန်အထိ ရန်ကုန်တိုင်းဒေသကြီးအတွင်း မြန်မာနိုင်ငံသား ရင်းနှီးမြှုပ်နှံမှုပမာဏ ကျပ် ၆၉၉၀ ဘီလျံကျော်ရှိပြီး အခြားကဏ္ဍ၊ အိမ်ခြံမြေကဏ္ဍနှင့် ပို့ဆောင်ဆက်သွယ်ရေး ကဏ္ဍတို့တွင် အများဆုံး မြှုပ်နှံထားကြောင်း ရင်းနှီးမြှုပ်နှံမှုနှင့် ကုမ္ပဏီများညွှန် ကြားမှုဦးစီးဌာန ဒုတိယညွှန်ကြားရေးမှူးချုပ် ဒေါက်တာမာလာမျိုးညွန့်က ပြောကြားသည်။

ရန်ကုန်တိုင်းဒေသကြီးအတွင်း ၂၀၁၇ ခုနှစ် ခန့်မှန်းချက်အရ လူဦးရေ ၆ဒသမ၂ သန်းကျော်ရှိပြီး ၆၄ ရာခိုင်နှုန်းမှာ လုပ်သားအင်အားစုများ ဖြစ်သဖြင့် စီးပွားရေး လုပ်ငန်းများအတွက် လုံလောက်သည့် လုပ်သားအင်အားစုများ အပြည့်အ၀ ရှိနေကြောင်း စီမံကိန်းနှင့် ဘဏ္ဍာရေး ဝန်ကြီးဌာန ယခင်ပြည်ထောင်စုဝန်ကြီး ဦးကျော်ဝင်းက ပြောကြားသည်။

ရန်ကုန်တိုင်းဒေသကြီးသည် စီးပွားရေးလုပ်ငန်းများ အများဆုံး တည်ရှိရာဒေသ ဖြစ်သည့်အလျောက် မြန်မာနိုင်ငံ စီးပွားရေး ဖွံ့ဖြိုးတိုးတက်မှုအတွက် အဓိကကျကြောင်း၊ ရန်ကုန်မြို့သည် ယခင်က မြန်မာနိုင်ငံ၏ မြို့တော်ဖြစ်သည့်အလျောက် တစ်ဦးချင်း ဝင်ငွေအများဆုံး ရရှိသည့်နေရာ ဖြစ်ကြောင်း၊ ကမ်းရိုးတန်းဒေသများနှင့် မြစ်ကြောင်းကူးသန်းရောင်းဝယ်ရေး၊ အပြည်ပြည်ဆိုင်ရာ ကုန်သွယ်မှုအတွက် အချက်အချာကျသည့်နေရာကို ပိုင်ဆိုင်ထားကြောင်း သိရသည်။

ရန်ကုန်တိုင်းဒေသကြီးသည် မြန်မာနိုင်ငံ၏ ရင်းနှီးမြှုပ်နှံမှုနှင့် စီးပွာရေးဗဟိုချက် မဖြစ်ကြောင်း၊ နိုင်ငံ GDP ၏ ၂၃ ရာခိုင်နှုန်းရှိပြီး တစ်နှစ်ထက်တစ်နှစ် ပျှမ်းမျှစီးပွားရေး တိုးတက်မှုနှုန်း ၉ ဒသမ ၂ ရာခိုင်နှုန်း ရှိကြောင်း သိရသည်။