ရန်ကုန်မြို့တွင်း တစ်ကီလိုမီတာအတွက် ကုန်စည်သယ်ယူပို့ဆောင်ရေး စရိတ်သည် စိုက်ပျိုးထုတ်လုပ်ရာ မူရင်းဒေသမှ ရန်ကုန်မြို့သို့ ရောက်ရှိသည့် တစ်ကီလိုမီတာအတွက် ကျသင့်သော သယ်ယူပို့ဆောင်ရေး စရိတ်ထက် ခြောက်ဆမှ ရှစ်ဆအထိ များနေ

ရန်ကုန်မြို့တွင်း တစ်ကီလိုမီတာအတွက် ကုန်စည်သယ်ယူပို့ဆောင်ရေး စရိတ်သည် စိုက်ပျိုးထုတ်လုပ်ရာ မူရင်းဒေသမှ ရန်ကုန်မြို့သို့ ရောက်ရှိသည့် တစ်ကီလိုမီတာအတွက် ကျသင့်သော သယ်ယူပို့ဆောင်ရေး စရိတ်ထက် ခြောက်ဆမှ ရှစ်ဆအထိ များနေ
Published 2 May 2018

ရန်ကုန်မြို့ ကမ်းနားလမ်းတွင် ကုန်သေတ္တာယာဉ်များ သွားလာနေသည်ကို တွေ့ရစဉ် (ဓာတ်ပုံ-ကြည်နိုင်)

ရန်ကုန်မြို့အတွင်း တစ်ကီလိုမီတာအတွက် ကုန်စည်သယ်ယူပို့ဆောင်ရေး စရိတ်သည် စိုက်ပျိုးထုတ်လုပ်ရာ မူရင်းဒေသမှ ရန်ကုန်မြို့သို့ရောက်ရှိသည့် တစ်ကီလိုမီတာအတွက် ကျသင့်သော သယ်ယူပို့ဆောင်ရေး စရိတ်ထက် ခြောက်ဆမှ ရှစ်ဆအထိ များပြားနေကြောင်း ကမ္ဘာ့ဘဏ်အဖွဲ့၏ ကုန်သွယ်ရေးနှင့် ယှဉ်ပြိုင်နိုင်စွမ်းကဏ္ဍမှ  အထောက်အပံ့ပြုထားသော စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ပြန်တမ်းဝင် အရာရှိများ ပြုစုထားသည့် မြန်မာနိုင်ငံ၏ အဓိကပြည်ပပို့ကုန်ဖြစ်သော ပဲတီစိမ်း၊ မတ်ပဲ၊ ပဲစင်းငုံ၊ ကုလားပဲတို့နှင့် စပ်လျဉ်း၍ အမျိုးသား ကုန်သွယ်ရေး လမ်းကြောင်းတစ်လျှောက် ထောက်ပံ့ပို့ဆောင်ရေး လုပ်ဆောင်မှုအား လေ့လာအကဲဖြတ်ခြင်း စာတမ်းတွင် သုံးသပ်ထားသည်။

ရန်ကုန်မြို့တွင်း ပျမ်းမျှကုန်သေတ္တာတင်ယာဉ် မောင်းနှင်မှုနှုန်းသည် သိသိသာသာ နှေးကွေးသည့်အပြင် ငါးဈေးအနီးနှင့် ပင်လယ်ဆိပ်ကမ်းအနီး နေရာများတွင် ယာဉ်သွားလမ်း ပိတ်ဆို့မှုများသဖြင့် ပြည်ပပို့ကုန် လုပ်ငန်းရှင်များသည် မောင်းနှင်ချိန်နှင့် ပတ်သက်၍ မရေရာ မသေချာမှုများ တွေ့ကြုံရသဖြင့် ထိခိုက်နစ်နာ လျက်ရှိသည်။

မုံရွာ၊ ရွှေဘို၊ ပဲခူးမြို့များနှင့် ရန်ကုန်မြို့အကြား သွားလာရာ အမျိုးသား ကုန်သွယ်ရေးလမ်း တစ်လျှောက်နှင့် ရန်ကုန်မြို့အနီး အနားရှိ စက်မှုဇုန်များမှ သင်္ဘောဆိပ်များသို့သွားရာ လမ်းတစ်လျှောက်တွင် ရပ်နားချိန် မပါဘဲ သယ်ယူပို့ဆောင်ရေး သက်သက်အတွက် ကြာသည့်အချိန်သည် ခရီးစဉ်အစမှ အဆုံးအထိ သွားလာလျှင် ကြာသည့်အချိန် စုစုပေါင်း ၇၄ ရာခိုင်နှုန်းမှ ၉၁ ရာခိုင်နှုန်းအထိ အသီးသီးရှိသည်။ ခရီးစဉ်အစမှ အဆုံးအထိ ကြာမြင့်ချိန် စုစုပေါင်း၏ ရှစ်ရာခိုင်နှုန်းမှ ၂၆ ရာခိုင်နှုန်းအထိသည် လမ်းတံတား ဖြတ်သန်းမှုအတွက် အသုံးပြုခ ပေးဆောင်ခြင်း၊ ဘီးခွန်ဆောင်ခြင်း၊ လက်မှတ်ဖြတ်ပိုင်း ပြသရန်တို့အတွက် လမ်းအသုံးပြုခ ကောက်ခံသော ဂိတ်စခန်းများ၌ စောင့်ဆိုင်းရသည့် အချိန်များဖြစ်သည်။

အဝေးပြေးလမ်းရှိ လမ်းအသုံးပြုခ ကောက်ခံသော ဂိတ်စခန်းအချို့တွင် ကုန်တင်ကားများသည် ပျမ်းမျှအားဖြင့် မိနစ် ၃၀ ခန့် ကြာသည်အထိ စောင့်ဆိုင်းရလေ့ရှိပြီး ရန်ကုန်-မန္တလေး အဝေးပြေးလမ်းမ တစ်လျှောက်ရှိ ဖြတ်သန်းခ ကောက်ခံသည့် ဂိတ်စခန်းများ အားလုံးကို ဖယ်ရှားလိုက်မည် ဆိုပါက သယ်ယူပို့ဆောင်ရေးအတွက် ကြာမြင့်ချိန်သည် ငါးနာရီမှ ခြောက်နာရီခန့်အထိ လျော့နည်းသက်သာ သွားလိမ့်မည်ဟု ခန့်မှန်းထားသည်။

ထောက်ပံ့ပို့ဆောင်ရေးနှင့် ပတ်သက်၍ အလွန်အရေးပါသော အကြောင်းကိစ္စများကို ရန်ကုန်တိုင်းဒေသကြီးတွင်သာ တွေ့ရှိရပြီး ပထမအချက်မှာ ရန်ကုန်တိုင်းဒေသကြီး အစိုးရက ပြည်ပပို့ကုန်နှင့် သွင်းကုန်များ သယ်ယူပို့ဆောင်သည့် ကုန်သေတ္တာယာဉ်များအား ရန်ကုန်မြို့၏ မြို့တွင်းလမ်းများတွင် ည ၈ နာရီ၊ ၉ နာရီမှ နံနက် ၆ နာရီအတွင်းသာ အသုံးပြုရန် ကန့်သတ်ထားခြင်း၏ အကျိုးသက်ရောက်မှုများ ဖြစ်သည်။ ယင်းကဲ့သို့ အချိန်ကန့်သတ်ချက်များ ရှိနေခြင်းသည် သယ်ယူပို့ဆောင်ရေးနှင့် ကုန်ပစ္စည်းရောင်း ဝယ်ဖောက်ကားရေးတို့နှင့် သက်ဆိုင်သော ကုန်ကျစရိတ်များကို ပိုမိုမြင့်မားလာစေပြီး ၎င်းအချက်က စိုက်ပျိုးသူ တောင်သူများနှင့် ဝယ်ယူစားသုံးသူများအား သွယ်ဝိုက်သောနည်းဖြင့် ဆိုးကျိုးသက်ရောက်မှု ရှိစေခြင်း ဖြစ်သည်။

ဒုတိယအချက်မှာ နိုင်ငံခြားပို့ကုန်များအား အကောက်ခွန် စစ်ဆေးမှု မပြုလုပ်မီ ပင်လယ်ကူး သင်္ဘောဆိပ်ကမ်းတွင် စောင့်ဆိုင်းနေရသော အချိန်သည် ၎င်းဆိပ်ကမ်းတွင်  အမျိုးမျိုးသော လုပ်ဆောင်မှုများ အားလုံး လုပ်ဆောင်ရန် ကြာမြင့်ချိန် စုစုပေါင်း၏ ၃၇ ရာခိုင်နှုန်း အထိရှိနေပြီး အကောက်ခွန်စစ်ဆေးခြင်း၊ အခြားထောက်ပံ့ ပို့ဆောင်မှုနှင့် ဝန်ဆောင်မှုများသည်လည်း အရေးပါလျက်ရှိကာ ကုန်သေတ္တာမချမီ စောင့်ဆိုင်းချိန်သည် ကြာမြင့်ချိန် စုစုပေါင်း၏ ၁၂ ရာခိုင်နှုန်း ရှိကြောင်း သိရသည်။

နောက်ဆုံးအချက်မှာ ရန်ကုန်မြို့တွင်း ထောက်ပံ့ပို့ဆောင်ရေး စနစ်သည် ယုံကြည်အားထားရမှု မရှိသည့်အတွက် ကုန်ကျစရိတ် တိုးမြင့်စေသည်သာမက တစ်ကီလိုမီတာတွင် ပျမ်းမျှကုန်သေတ္တာတင်ယာဉ် မောင်းနှင်နိုင်မှု အမြန်နှုန်းကိုလည်း လျော့ကျစေပြီး ကုန်သွယ်ရေး လုပ်ငန်းများအတွက် စက်မှုဇုန်များ၊ ကုန်သေတ္တာစခန်းများ၊ ဆိပ်ကမ်း၊ ထောက်ပံ့ပို့ဆောင်ရေးအတွက် လိုအပ်သည့် အခြေခံ အဆောက်အအုံ ပံ့ပိုးမှုများနှင့် စည်းမျဉ်းစည်းကမ်းများတွင် အခက်အခဲများ ဖြစ်ပေါ်နေခြင်းဖြစ်ကြောင်း ယင်းစာတမ်းတွင် သုံးသပ်ထားသည်။

 

Most Read

Most Recent