မျက်မှောက်မြန်မာ့စီးပွားရေး အလားအလာ ပြန်လည်သုံးသပ်ခြင်း ဆွေးနွေးပွဲကျင်းပမှုကို တွေ့ရစဉ်
အိမ်ခြံမြေဈေးကွက်သို့ ငွေမည်းများ ဝင်ရောက်မှုနှင့် မှန်မှန်ကန်ကန်လုပ်သူများ နစ်နာမှုမရှိရန် အခွန်ကင်းလွတ်ခွင့်ကို ရင်းနှီးမြှုပ်နှံမှု အားနည်းသည့် နေရာများသို့ မြှုပ်နှံခြင်းများကိုသာ ပေးအပ်သင့်ကြောင်း ရန်ကုန်စီးပွားရေး တက္ကသိုလ်၊ ဘောဂဗေဒဌာနမှ ပါမောက္ခ၊ ဌာနမှူး ဒေါက်တာသီတာကြူက မြန်မာ့အဖွဲ့အစည်းများ တိုးတက်မြှင့်တင်ရေး ပညာရှင်များအသင်းမှ ဦးဆောင်ကျင်းပသည့် မျက်မှောက်မြန်မာ့စီးပွားရေး အလားအလာ ပြန်လည်သုံးသပ်ခြင်း ဆွေးနွေးပွဲတွင် သုံးသပ်ပြောကြားသည်။
၂၀၁၈ ခုနှစ် ပြည်ထောင်စု၏ အခွန်အကောက် ဥပဒေကြမ်းတွင် စည်းကြပ်မှုမှ လွတ်ကင်းနေသော ဝင်ငွေများနှင့် အခြေပစ္စည်းများ တရားဝင်ဖြစ်လာစေရန် အခွန်နှုန်း သုံးရာခိုင်နှုန်းနှင့် ငါးရာခိုင်နှုန်း ပေးသွင်းရမည်ဟု သတ်မှတ်ဖော်ပြခဲ့ခြင်းဖြစ်ပြီး အဆိုပါ ပုဒ်မမှာ နှစ်စဉ်ပုံမှန် ထမ်းဆောင်နေသူများအတွက် အခွန်ရှောင်လိုသော အလေ့အထကို စဉ်းစားလာစေနိုင်ခြင်း၊ အခွန်ရှောင်ခဲ့သူများကို ဦးစားပေးသလို ဖြစ်စေနိုင်ခြင်း၊ အစ္စလာမ္မစ် အစွန်းရောက် အဖွဲ့အစည်းများနှင့် အကြမ်းဖက် အဖွဲ့အစည်းများ၏ငွေများ စီးဝင်လာနိုင်ခြင်း၊ စစ်ဆေးကြပ်မတ်ရမည့် အဖွဲ့အစည်းများ၏ တာဝန်များကို ဖော်ပြနိုင်မှုမရှိခြင်း၊ မဆိုင်သည့် ဥပဒေတစ်ခု၌ ပုဒ်မတစ်ခုအဖြစ် ထည့်သွင်းကာ ငွေမည်းများ ဝင်ရောက်လာမည့် အခြေအနေများကို တားမြစ်နိုင်ဖွယ်မရှိခြင်း စသည့် ဝေဖန်မှုများ ရှိခဲ့ပြီးနောက် အဆိုပါပုဒ်မကို ပယ်ဖျက်ခဲ့ကြောင်း သိရသည်။
ထိုသို့ အခွန်လွတ်ငြိမ်းခွင့်အတွက် လက်ရှိသတ်မှတ်ထားသည့် သုံးရာခိုင်နှုန်းနှင့် ငါးရာခိုင်နှုန်းမှာ နည်းပါးနေကြောင်း ဒေါက်တာသီတာကြူက ဆိုသည်။
“အခွန်ကင်းလွတ်ခွင့်၊ အခွန်တွေလျှော့ချဖို့ကိစ္စမှာ သုံးရာခိုင်နှုန်း၊ ငါးရာခိုင်နှုန်းကတော့ အရမ်းနည်းပါးတယ်လို့ ထင်ပါတယ်။ ဒါပေမဲ့ သဘာဝသယံဇာတတွေ ထုတ်တာပဲဖြစ်ဖြစ် ဘာတွေကိုပဲထုတ်ထုတ် Reach Sustainability ဆိုတာ ရှိခဲ့ပါတယ်။ အဲဒီလို Reach Sustainability လုပ်တာက သယံဇာတထုတ်ရင်း ပညာရေး၊ ကျန်းမာရေးကို လုပ်ဆောင်တာမျိုး၊ တိုင်းပြည်အတွက် အကျိုးဖြစ်ထွန်းမယ့် နေရာတွေမှာ ရင်းနှီးမြှုပ်နှံရင် သူတို့ကို ခွင့်ပြုတာမျိုး ရှိခဲ့သလိုမျိုးပဲ။ ကျွန်မတို့ နိုင်ငံမှာလည်း ရင်းနှီးမြှုပ်နှံမှုတွေ လိုနေတယ်။ အခွန်စနစ်ကလည်း ကျွန်မတို့ နိုင်ငံမှာ အရမ်းမထွန်းကားခဲ့တာမျိုးမို့လို့ အခွန်မဆောင်ဖြစ်ခဲ့လို့ ငွေမည်းဖြစ်နေတာ တွေရှိမယ်။ ဒါမှမဟုတ် မဟုတ်တဲ့ ကုန်သွယ်မှုတွေကြောင့်လည်း ရှိနေမယ်။ အဲဒီလိုမျိုး ရှိနိုင်တဲ့ အထဲကနေ တစ်ခုခု ဆုံးဖြတ်တော့မယ်ဆို ကိုယ့်နိုင်ငံအတွက် အကျိုးနဲ့အပြစ်ကို ဆုံးဖြတ်လို့ ရတယ်ပေါ့။ အဲဒီတော့ တကယ်လို့ အစိုးရက သတ်မှတ်ထားတဲ့ နေရာတွေမှာ ရင်းနှီးမြှုပ်နှံမယ်ဆိုရင် ရင်းနှီးမြှုပ်နှံမယ့် အချိန်ကျမှ Tax ကို လျှော့ပေးမယ်ဆိုရင် ပိုပြီးတော့ ကောင်းမယ်လို့ မြင်ပါတယ်။ အဲဒါဆိုရင် လူတွေစိုးရိမ်နေတဲ့ မြေယာဈေးကွက်ကို သွားမှာတို့၊ မှန်မှန်ကန်ကန် လုပ်တဲ့သူတွေ နစ်နာအောင်မရှိတာတို့ ရင်းနှီးမြှုပ်နှံမှု အားနည်းနေတဲ့ နေရာတွေမှာ ရင်းနှီးမြှုပ်နှံရင်၊ မြှုပ်နှံမယ်ဆိုရင် သူတို့ကို Tax ကင်းလွတ်ခွင့် ပေးမယ်ဆိုရင် အကောင်းဆုံး ဖြစ်မယ်လို့ ထင်ပါတယ်” ဟု ဒေါက်တာသီတာကြူက သုံးသပ်သည်။
အခွန်လွတ်ငြိမ်းချမ်းသာခွင့် ပုဒ်မ ၂၅ ကြောင့် အခွန်စာရင်း မပြခဲ့သည့်ငွေများ စီးပွားရေးလောကသို့ ထုထည်ကြီးစွာ ဝင်လာပါက တစ်ပတ်ကြာ ဝင်လာလျှင်ပင် အကျိုးရှိမည် ဖြစ်ကြောင်းနှင့် ငွေမည်းများ ဝင်မလာရန် ပြည်ထဲရေး ဝန်ကြီးဌာနနှင့် စိစစ်ကာ အခွန်လွတ်ငြိမ်းချမ်းသာခွင့်ပေးရေး ဆက်လက်လုပ်ဆောင်မည် ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ပြောကြားသည်။
