ရန်ကုန်မြို့ သစ္စာလမ်းမပေါ်ရှိ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနရုံးကို တွေ့ရစဉ်

အသေးစား အလတ်စား စီးပွားရေးလုပ်ငန်းများ ပိုမိုဖွံ့ဖြိုးတိုးတက်စေရေးနှင့် မှတ်ပုံတင်ခြင်း မပြုသေးဘဲ ဆောင်ရွက်နေသည့် စီးပွားရေး လုပ်ငန်းများ ကုမ္ပဏီအဖြစ် ပြောင်းလဲထူထောင်၍ လုပ်ငန်းများ ချဲ့ထွင်နိုင်စေရေးကို ဦးတည်ကာ လက်ရှိသတ်မှတ်ထားသည့် အများနှင့်မသက်ဆိုင်သည့် ကုမ္ပဏီများအတွက် မှတ်ပုံတင်ကြေးအား လက်ရှိကျပ်ငါးသိန်း သတ်မှတ်ထားရာမှ ၂၀၁၈ ခုနှစ် ဧပြီ ၁ ရက်မှစတင်ကာ ကျပ်နှစ်သိန်းခွဲသို့ လျှော့ချပြင်ဆင် သတ်မှတ်သွားမည်ဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနမှ ထုတ်ပြန်လိုက်သည်။

နိုင်ငံသားများအနေဖြင့် စီးပွားရေးလုပ်ငန်းများ လုပ်ကိုင်ရာတွင် ကုမ္ပဏီအဖြစ် ထူထောင်ဆောင်ရွက်ခြင်းကို လွယ်ကူသက်သာစွာ ဆောင်ရွက်နိုင်စေရေးအတွက် စီမံကိန်းနှင့် ဘဏ္ဍာရေး ဝန်ကြီးဌာနသည် အများနှင့် မသက်ဆိုင်သော ကုမ္ပဏီမှတ်ပုံတင်ကြေး အား ၂၀၁၆ ခုနှစ် ဇွန်လ ၁ ရက်မှစတင်ကာ ယခင်ကျပ် ၁၀ သိန်း ကောက်ခံရာမှ ကျပ်ငါးသိန်းသို့ လျှော့ချသတ်မှတ်ပေးခဲ့သည်။

နိုင်ငံတော်အစိုးရ အနေဖြင့် နိုင်ငံသားများ ကုမ္ပဏီထူထောင်၍ စီးပွားရေးလုပ်ငန်း ဆောင်ရွက်ခြင်းကို ပိုမိုလွယ်ကူရှင်းလင်းစွာ ဆောင်ရွက်နိုင်စေရေး၊ ကုမ္ပဏီလုပ်ငန်းများ စနစ်တကျ ရှိစေရေးနှင့် အသေးစားနှင့် အလတ်စား လုပ်ငန်းများ ဖွံ့ဖြိုးတိုးတက်စေရေးကို ဦးတည်ကာ နှစ် ၁၀၀ ကျော်ခန့် သက်တမ်းရှိခဲ့သည့် မြန်မာနိုင်ငံ ကုမ္ပဏီများ အက်ဥပဒေကို ခေတ်နှင့်အညီ ပြန်လည်ပြင်ဆင်ရေးဆွဲ၍ လွှတ်တော်အသီးသီးသို့ တင်ပြခဲ့ပြီး ၂၀၁၇ ခုနှစ် ဒီဇင်ဘာ ၆ ရက်တွင် မြန်မာနိုင်ငံ ကုမ္ပဏီများဥပဒေအဖြစ် ပြည်ထောင်စုလွှတ်တော်က အတည်ပြု ပြဋ္ဌာန်းပေးခဲ့သည်။

လက်ရှိအချိန်တွင် ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနသည် မြန်မာနိုင်ငံ ကုမ္ပဏီများဥပဒေအား ကျင့်သုံးဆောင်ရွက်နိုင်ရေးအတွက် လိုအပ်သည့် စည်းမျဉ်းများ ရေးဆွဲခြင်း၊ အမိန့်ကြော်ငြာစာများ ထုတ်ပြန်ကြေညာရန် ဆောင်ရွက်ခြင်း၊ ဥပဒေအား အများပြည်သူ ကျယ်ပြန့်စွာ သိရှိနိုင်ရန် ဆောင်ရွက်ခြင်း တို့အပြင် ကုမ္ပဏီမှတ်ပုံတင်ခြင်း၊ ပြန်တမ်းများပေးပို့ခြင်း၊ ကုမ္ပဏီမှတ်ပုံတင်ရုံးနှင့် ဆက်သွယ် ဆောင်ရွက်ခြင်းတို့ကို အီလက်ထရောနစ် စနစ်ဖြင့် ပိုမိုလျင်မြန်ချောမွေ့စွာ ဆောင်ရွက်နိုင်ရေးအတွက် စီမံကိန်းနှင့် ဘဏ္ဍာရေး ဝန်ကြီးဌာန၏ လမ်းညွှန်ကြီးကြပ်မှုဖြင့် လိုအပ်သည်များ ပြင်ဆင်ဆောင်ရွက်လျက်ရှိရာ မြန်မာနိုင်ငံ ကုမ္ပဏီများ ဥပဒေသစ်ကို ၂၀၁၈ ခုနှစ် သြဂုတ် ၁ ရက်မှစတင်၍ ကျင့်သုံးဆောင်ရွက် နိုင်တော့မည် ဖြစ်ကြောင်း သိရသည်။

ယင်းသို့ လိုအပ်သည့်ပြင်ဆင်မှုများ ဆောင်ရွက်လျက်ရှိသည်နှင့်အညီ ကုမ္ပဏီ မှတ်ပုံတင်ခြင်း လုပ်ငန်းများကို နိုင်ငံသားလုပ်ငန်းရှင်များ ပိုမိုသက်သာစွာ ဆောင်ရွက်နိုင်စေရေးအတွက် လက်ရှိသတ်မှတ်ထားသည့် အများနှင့် မသက်ဆိုင်သည့် ကုမ္ပဏီများအတွက် မှတ်ပုံတင်ကြေးအား ၂၀၁၈ ခုနှစ် ဧပြီ ၁ ရက်မှစတင်ကာ လက်ရှိ ကျပ်ငါးသိန်း သတ်မှတ်ထားရာမှ ကျပ်နှစ်သိန်းခွဲသို့ လျှော့ချပြင်ဆင် သတ်မှတ်သွားမည်ဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနက ထုတ်ပြန်ထားသည်။