နိုင်ငံခြားငွေလဲနှုန်း တစ်ဒေါ်လာ ၁၃၆၁ ကျပ်အထိ ပြန်လည်ကျဆင်း

ဇူလိုင် ၁၄ ရက်တွင် ကမ္ဘာ့ဒေါ်လာဈေး အညွှန်းကိန်း အနည်းငယ် ကျရိပ်ပြနေပြီး ပြည်တွင်းဈေးကွက်တွင်လည်း နိုင်ငံခြားငွေလဲနှုန်း တစ်ဒေါ်လာ ၁၃၆၁ ကျပ်အထိ ပြန်လည် ကျဆင်းခဲ့ကြောင်း နိုင်ငံခြားငွေကြေး ရောင်းဝယ်သူများထံမှ သိရသည်။

ကမ္ဘာ့ဒေါ်လာဈေး အညွှန်းကိန်းသည် ၂၀၁၆ ခုနှစ် စက်တင်ဘာလနောက်ပိုင်း အနိမ့်ဆုံး နှုန်းထားအဖြစ် ဇွန် ၃၀ ရက်တွင် ၉၅ ဒသမ ၂၇ ပွိုင့်အထိ ကျဆင်းခဲ့ပြီး ဇူလိုင် ၅ ရက်တွင် ၉၆ ဒသမ ၂၀ ပွိုင့်အထိ ပြန်လည် မြင့်တက်ခဲ့သော်လည်း ဇူလိုင် ၆ ရက်မှ စတင်ကာ ၉၆ ပွိုင့်အောက်သို့ ပြန်ဆင်းခဲ့ကာ ဇူလိုင် ၁၄ ရက်အထိ ယင်းဈေးနှုန်းတစ်ဝိုက်သာ အတက်အကျ ဖြစ်ပေါ်နေသည်။

အမေရိကန်နိုင်ငံ ရွေးကောက်ပွဲပြုလုပ်ခဲ့သည့် ၂၀၁၆ ခုနှစ် နိုဝင်ဘာလနောက်ပိုင်း ဒီဇင်ဘာ ၂၀ ရက်တွင် ၁၀၃ ဒသမ ၂၉ ပွိုင့်အထိ အမြင့်ဆုံး ရောက်ရှိခဲ့ပြီး ၂၀၁၇ ခုနှစ် ဧပြီ ၁၈ ရက် နောက်ပိုင်းကတည်းက ၁၀၀ ပွိုင့်အောက်၊ မေ ၁၅ ရက်မှ စတင်ကာ ၉၉ ပွိုင့်အောက် ရောက်ရှိခဲ့ခြင်းဖြစ်သည်။ ပြီးခဲ့သော ဧပြီလအတွင်း အမြင့်ဆုံးနှုန်းထားမှာ ၁၀၁ ဒသမ ၂၂ ပွိုင့်ဖြစ်ပြီး မေလအတွင်း အမြင့်ဆုံး နှုန်းထားမှာ  ၉၉ ဒသမ ၆၅ ပွိုင့်ဖြစ်ကာ ဇွန်လအတွင်း အမြင့်ဆုံးနှုန်းထားမှာ ၉၇ ဒသမ ၅၃ ပွိုင့်ဖြစ်သည်။

၂၀၁၇ ခုနှစ် မတ်လလယ်မှ စတင်ကာ ကမ္ဘာ့ဒေါ်လာဈေး အညွှန်းကိန်း သိသိသာ သာကျဆင်းခဲ့ခြင်းဖြစ်ပြီး မတ်လအတွင်း ပြည်တွင်းဈေးကွက်၌ အမြင့်ဆုံး ဖြစ်ပေါ်ခဲ့သော ဒေါ်လာဈေးသည် ၁၃၆၆ ကျပ်ဖြစ်ပြီး အနိမ့်ဆုံး ဖြစ်ပေါ်ခဲ့သော ဒေါ်လာဈေးသည် ၁၃၅၇ ကျပ်ဖြစ်သည်။ ထို့အတူ ဧပြီလအတွင်း အမြင့်ဆုံး ဖြစ်ပေါ်ခဲ့သော ဒေါ်လာဈေးသည် ၁၃၆၁ ကျပ်ဖြစ်ပြီး အနိမ့်ဆုံး ဈေးနှုန်းမှာ ၁၃၄၇ ကျပ်ဖြစ်ကာ မေလအတွင်း အမြင့်ဆုံးဖြစ်ပေါ်ခဲ့သော ဒေါ်လာဈေးသည် ၁၃၆၃ ကျပ်ဖြစ်ပြီး အနိမ့်ဆုံးဈေးနှုန်းမှာ ၁၃၄၈ ကျပ်ဖြစ်သည်။ ထို့နောက် ဇွန်လအတွင်း ဖြစ်ပေါ်သော အမြင့်ဆုံးနိုင်ငံခြားငွေလဲနှုန်းမှာ တစ်ဒေါ်လာ ၁၃၆၁ ကျပ်ဖြစ်ပြီး အနိမ့်ဆုံးနိုင်ငံခြားငွေလဲနှုန်းမှာ တစ်ဒေါ်လာ ကျပ် ၁၃၅၀ ဖြစ်သည်။

Writer: 
စည်သူအောင်