ပြည်နယ်နှင့် တိုင်းဒေသကြီးများတွင် စက်မှုဇုန်တည်ထောင်လိုသည့် နေရာများကို MIC သို့ တင်ပြထားပြီး Developer များအား တင်ဒါစနစ် သို့မဟုတ် ဒေသအလိုက် တိုက်ရိုက်ရွေးချယ်၍ လုပ်ကိုင်ခွင့်ပြုမည်

ပြည်နယ်နှင့် တိုင်းဒေသကြီးများတွင် စက်မှုဇုန်တည်ထောင်လိုသည့် နေရာများကို MIC သို့ တင်ပြထားပြီး Developer များအား တင်ဒါစနစ် သို့မဟုတ် ဒေသအလိုက် တိုက်ရိုက်ရွေးချယ်၍ လုပ်ကိုင်ခွင့်ပြုမည်
Published 12 August 2017

ရန်ကုန်တိုင်းဒေသကြီးရှိ သီလဝါ အထူးစီးပွားရေးဇုန် Zone B အတွင်း လုပ်ငန်းခွင် တစ်နေရာကို တွေ့ရစဉ်

ပြည်နယ်နှင့် တိုင်းဒေသကြီးများတွင် စက်မှုဇုန်များ တည်ထောင်လုပ်ကိုင်လိုသည့် နေရာများကို မြန်မာနိုင်ငံ ရင်းနှီးမြှုပ်နှံမှု ကော်မရှင်သို့ တင်ပြထားပြီး ဖြစ်ကြောင်းနှင့် Developer များကို တင်ဒါစနစ် သို့မဟုတ် ပြည်နယ်နှင့် တိုင်းဒေသကြီးအလိုက်တိုက် ရိုက်ရွေးချယ်ကာ လုပ်ကိုင်ခွင့်ပြုမည်ဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနမှ ညွှန်ကြားရေးမှူးချုပ် ဦးအောင်နိုင်ဦးက ပြောကြားသည်။

ရင်းနှီးမြှုပ်နှံမှု လုပ်ငန်းများနှင့် ပတ်သက်ပြီး အဆိုပြုချက် စိစစ်ရေးအဖွဲ့၊ တစ်နေရာတည်း၌ တစုတစည်းတည်း အလုံးစုံ ဝန်ဆောင်မှုပေးခြင်း ဆောင်ရွက်သည့် အဖွဲ့များကို မြန်မာနိုင်ငံ ရင်းနှီးမြှုပ်နှံမှု ကော်မရှင်က ဇူလိုင်လအတွင်း ဖွဲ့စည်းခဲ့သည်။

“အခုသွားမယ့်မူက တိုင်းဒေသကြီးနဲ့ ပြည်နယ်တွေမှာ ကော်မတီတွေ အကုန်ဖွဲ့ပြီးသွားပြီ။ တိုင်းဒေသကြီးနဲ့ ပြည်နယ်တွေက စက်မှုဇုန် တည်ထောင်လိုတဲ့ နေရာလေးတွေ လျာထားတာ ရှိတယ်။ အဲဒီနေရာတွေမှာ ဥပဒေနဲ့အညီ မြေသိမ်းတဲ့ ကိစ္စလေးတွေ ဒီမြေကို စက်မှုဇုန်အနေနဲ့ လုပ်ကိုင်လို့ရအောင် မြေပိုင်းဆိုင်ရာ လုပ်ထုံးလုပ်နည်းတွေ ဖျက်မယ်။ ဖျက်ပြီးရင် MIC ကနေ Cabinet ကို တင်မယ်။ Cabinet ခွင့်ပြုတာနဲ့ သက်ဆိုင်ရာ တိုင်းဒေသကြီး၊ ပြည်နယ်တွေမှာ Developer ကို ခေါ်မယ်” ဟု ၎င်းက ဆိုသည်။

“ခေါ်တဲ့ အပိုင်းမှာတော့ တိုင်းရဲ့ အခြေအနေအပေါ် မူတည်ပြီး တချို့တိုင်းတွေလည်း ရွေးချယ်ထားပြီး တိုက်ရိုက်ပေးချင်လည်း ပေးမယ်။ ဒါမှမဟုတ် တင်ဒါစနစ်နဲ့ ခေါ်ရင်လည်း ခေါ်မယ်။ အဲဒီမှာ Developer က ရင်းနှီးမြှုပ်နှံမှုပြုပြီးတော့ ရွေးချယ်ထားတဲ့ ဇုန်ကြီးကို လိုအပ်ချက်အားလုံးကို ဖြည့်မယ်။ အဆင့်တွေက တစ်ဆင့်ပြီးတစ်ဆင့် သွားမယ်။ အခုတော့ ပထမအဆင့်ဖြစ်တဲ့ တိုင်းဒေသကြီး ကော်မတီတွေ ဖွဲ့ပြီးသွားပြီ။ တိုင်းဒေသကြီး၊ ပြည်နယ်တွေက သူတို့ဆန္ဒရှိတဲ့ နေရာတွေကို MIC ကို ပို့တာရောက်ပြီ။ တတိယအဆင့်ကတော့ မြေနဲ့ပတ်သက်ပြီး စက်မှုဇုန်မြေဖြစ်အောင် Developer တွေ အခု စလုပ်နေပြီ။ MIC က အစိုးရအဖွဲ့ကို တင်ပြမယ်။ ခွင့်ပြုရင် တိုင်းဒေသနဲ့ ပြည်နယ်တွေကို ဆက်လုပ်မယ်” ဟု ဦးအောင်နိုင်ဦးက ဆက်လက်ပြောကြားသည်။

ပြည်နယ်နှင့် တိုင်းဒေသကြီးများတွင် စက်မှုဇုန် တည်ထောင်လုပ်ကိုင်မည့်သူ (Developer) များ အနေဖြင့် စက်မှုဇုန်အတွင်း လိုအပ်သည့် လျှပ်စစ်မီး၊ ရေ၊ ရေဆိုးသန့်စင်သည့်လုပ်ငန်း စသည့်လိုအပ်ချက်များ အားလုံးကို တာဝန်ခံ ရင်းနှီးလုပ်ကိုင်ရမည်ဖြစ်သည်။

“မီးပေးမယ်၊ ရေပေးမယ်၊ လျှပ်စစ်ဓာတ်အားပေးမယ်၊ ရေဆိုးသန့်စင်တဲ့ လုပ်ငန်းတွေကျတော့ အရင်တုန်းကကျတော့ သက်ဆိုင်ရာ အစိုးရတွေရဲ့ ကြီးကြပ်မှု ကော်မတီတွေက လုပ်ခဲ့တယ်။ လုပ်ခဲ့ပေမယ့် မထိရောက်ဘူးပေါ့။ အစိုးရက ကြီးကြပ်တာပဲ ဖြစ်တဲ့အတွက် အစိုးရက ဒီစက်မှုဇုန်ကြီး ရာနှုန်းပြည့် တိုးတက်အောင် အချိန်ပေးပြီး မလုပ်နိုင်ခဲ့ဘူး။ တချို့ကျတော့လည်း ကြီးကြပ်မှုကော်မတီမှာ ပုဂ္ဂလိကကဏ္ဍကပါတော့ အခွင့်အာဏာက သိပ်မရှိဘူး။ ဒါကြောင့် နောက်ပိုင်းသွားမယ့် စက်မှုဇုန်တွေမှာ Developer က ဘာမှမရှိတဲ့မြေကို အစိုးရဆီက ရယူမယ်။ လမ်းတွေ လုပ်မယ်။ မြေကွက်တွေ ဖော်မယ်၊ ရေပေးအောင် လုပ်မယ်။ အချိန်မီ မီးပေးနိုင်အောင် လုပ်မယ်၊ ရေဆိုးတွေသန့်စင်အောင် လုပ်မယ် စသဖြင့်ပေါ့၊ သူက စက်မှုဇုန် လိုအပ်ချက်တွေ အားလုံးကို တာဝန်ခံ ရင်းနှီးမြှုပ်နှံသူ တစ်ယောက်က အကုန်လုပ်မယ်။ ကြီးကြပ်မှု ကော်မတီဆိုတာ တိုင်းဒေသကြီးနဲ့ ပြည်နယ်အစိုးရတွေက မူပိုင်းဆိုင်ရာ ကြီးကြပ်ပေးမယ်” ဟု ဦးအောင်နိုင်ဦးက ရှင်းပြခဲ့သည်။

Most Recent