စီးပွားရေးမူဝါဒများနှင့်အညီ နှစ်လတ် ကုန်သွယ်မှုဖွံ့ဖြိုးရေးအစီအစဉ် ရေးဆွဲထားပြီး ယင်းအစီအစဉ်ကို မဏ္ဍိုင်ကြီး ငါးရပ်ဖြင့် အကောင်အထည်ဖော်မည်

လက်ရှိစီးပွားရေးမူဝါဒ ၁၂ ချက်နှင့်အညီ နှစ်လတ် ကုန်သွယ်မှုဖွံ့ဖြိုးရေးအစီအစဉ် (Medium Term Programme - MTP) ရေးဆွဲထားပြီး ယင်းအစီအစဉ်ကို မဏ္ဍိုင်ကြီး ငါးရပ်ဖြင့် အကောင်အထည် ဖော်ဆောင်သွားမည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က အစိုးရသစ် တစ်နှစ်တာကာလအတွင်း ၀န်ကြီးဌာန၏ လုပ်ဆောင်မှုများနှင့် တိုင်းပြည်စီးပွားရေး တိုးတက်စေရန် ရှေ့ဆက်လုပ်ဆောင်မည့် အကြောင်းအရာများနှင့် ပတ်သက်၍ ပြောကြားသည်။

ကုန်သွယ်မှုလုပ်ငန်းနှင့် အမျိုးသားစီးပွားရေး ဖွံ့ဖြိုးတိုးတက်အောင် ဆောင်ရွက်ရန် မျှော်မှန်းချက်နှင့် နိုင်ငံတော်၏ စီးပွားရေးမူဝါဒ (၁၂) ချက်ကို အခြေခံပြီး ရှေ့လုပ်ငန်းစဉ်များ ချမှတ်ဆောင်ရွက်နေကာ တိုင်းပြည်စီးပွားရေး ဖွံ့ဖြိုးရေးအတွက် ပို့ကုန်ဦးဆောင်သည့် စီးပွားရေးဖွံ့ဖြိုးတိုးတက်မှု  (Export Led Growth) ပုံစံနှင့် ဦးတည်ဆောင်ရွက်ရမည် ဖြစ်ကြောင်း ဒေါက်တာသန်းမြင့်က ပြောကြားသည်။

အဆိုပါ ဦးတည်ချက်များကို အကောင်အထည်ဖော်ရာတွင် ကျယ်ပြန့်သည့် ခိုင်မာတည်မြဲသည့် ပို့ကုန်ဈေးကွက် ရရှိရေး၊ ပို့ကုန် ဈေးကွက်တွင် မိမိတို့၏ ပို့ကုန်ပစ္စည်းများအရည်အသွေးအရသော် လည်းကောင်း၊ ဈေးနှုန်းအရသော် လည်းကောင်း၊ လိုအပ်သလို အချိန်မီ တင်ပို့နိုင်မှုအရသော် လည်းကောင်း၊ ယှဉ်ပြိုင်နိုင်မှု စွမ်းရည်တိုးတက်အောင် ဆောင်ရွက်ရမည်ဖြစ်ကြောင်း ဒေါက်တာသန်းမြင့်က ပြောကြားသည်။

ထိုသို့ တိုးတက်နိုင်ရန်အတွက် ကုန်ထုတ်လုပ်မှုနှုန်း တိုးတက်ရေး၊ ထုတ်လုပ်မှု ကုန်ကျစရိတ်လျှော့ချရေး၊ ထုတ်ကုန်ပစ္စည်း အရည်အသွေးကောင်းမွန်ရေး၊ သယ်ယူပို့ဆောင်၊ သိုလှောင်၊ ဖြန့်ဖြူးစရိတ်လျော့နည်းရေးတို့ကို အလေးထား ဆောင်ရွက်ရမည်ဖြစ်ပြီး အဆိုပါ စိန်ခေါ်မှုများအတွက် ရလဒ်ကောင်းများရရှိဖို့ရန် ကဏ္ဍအသီးသီးတွင်  ဖြည့်ဆည်းရမည့် ပို့ကုန်ဦးဆောင်သည့် စီးပွားရေးဖွံ့ဖြိုးမှုပုံစံရရှိနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ဦးဆောင်ပြီး ကမ္ဘာ့ကုန်သွယ်ရေးအဖွဲ့ (WTO) ၊ ကမ္ဘာ့ဘဏ် (World Bank) စသည့် နိုင်ငံတကာအဖွဲ့အစည်းများ၊ မိတ်ဖက်နိုင်ငံများ၊ ပြည်တွင်းပြည်ပ ပညာရှင်များ၊ သက်ဆိုင်ရာဝန်ကြီးဌာနများ၊ တိုင်းဒေသကြီး/ပြည်နယ် အစိုးရအဖွဲ့များ၊ ကုန်သည်လုပ်ငန်းရှင် အသင်းအဖွဲ့ များနှင့် တိုင်ပင်ညှိနှိုင်းပြီး ကုန်သွယ်မှုဖွံ့ဖြိုး တိုးတက်ရေးဘက်စုံ ဆက်စပ်ဆန်းစစ်လေ့လာမှု ပြုလုပ်ခဲ့ကြောင်း သိရသည်။

အဆိုပါ လေ့လာဆန်းစစ်ချက်များကို အခြေခံပြီး နိုင်ငံတော်၏ စီးပွားရေးမူဝါဒနှင့် အညီ သုံးနှစ်၊ ငါးနှစ် နှစ်လတ် ကုန်သွယ်မှုဖွံ့ဖြိုးရေးအစီအစဉ် (Medium Term Programme - MTP) ကို ရေးဆွဲထားပြီးဖြစ်ပြီး အဆိုပါ MTP ကို လုပ်ငန်း Project များ ရေးဆွဲကာ သက်ဆိုင်သူများ ပါဝင်ပူးပေါင်း အကောင်အထည်ဖော်ဖို့ ချမှတ်ထားပြီးဖြစ်ကြောင်း ဒေါက်တာသန်းမြင့်က ပြောကြားသည်။

“ MTP ကို မဏ္ဍိုင်ကြီးငါးရပ် ခွဲခြားသတ်မှတ်ပြီး ဆောင်ရွက်သွားမှာ ဖြစ်ပါတယ်။ မဏ္ဍိုင် (၁) ကုန်သွယ်မှုမူဝါဒနဲ့ ကုန်သွယ်မှု အဖွဲ့အစည်းတွေ ဖွံ့ဖြိုးတိုးတက်ဖို့၊ မဏ္ဍိုင် (၂) ကုန်သွယ်မှု လွယ်ကူချောမွေ့စေဖို့နဲ့ သယ်ယူပို့ဆောင် သိုလှောင်ထောက်ပံ့မှုဖွံ့ဖြိုးဖို့၊ မဏ္ဍိုင် (၃) အရည်အသွေးမြင့် အခြေခံအဆောက်အအုံနဲ့ စံချိန်စံညွှန်းတွေ သတ်မှတ်စစ်ဆေးရေး၊ မဏ္ဍိုင် (၄) ပုဂ္ဂလိကကဏ္ဍ ဖွံ့ဖြိုးတိုးတက်ရေးနဲ့ မဏ္ဍိုင် (၅) ပို့ကုန်အမျိုးမျိုး ထုတ်လုပ်ရေး စတဲ့ အသေးစိတ်အစီအစဉ်တွေ ချမှတ်ထားပါတယ်” ဟု ဒေါက်တာသန်းမြင့်က ဆိုသည်။

အထက်ပါ ကုန်သွယ်မှုဖွံ့ဖြိုးရေးနှင့် အမျိုးသားပို့ကုန် မဟာဗျူဟာကို သတ်မှတ်ချက်အတိုင်း အောင်မြင်စွာ ပူးပေါင်းဆောင်ရွက်ခြင်းဖြင့် နိုင်ငံ၏ ပို့ကုန်ဦးဆောင်သည့်  စီးပွားရေး ဖွံ့ဖြိုးတိုးတက်မှု (Export Led Growth) ပုံစံရရှိအောင် ဦးတည် ဆောင်ရွက်မည်ဖြစ်ကြောင်း ဒေါက်တာသန်းမြင့်က ဆက်လက် ပြောကြားသည်။

                                                                 

Writer: 
ဖြိုးဝေ