ရန်ကုန်ဆိပ်ကမ်းများသို့ ၂၀၁၅ ခုနှစ်အတွင်းက ကုန်သေတ္တာပေါင်း ၈၉၀၀၀၀ စီးဝင်ခဲ့ပြီး လာမည့် ၂၀၂၀ တွင် ကုန်သေတ္တာ နှစ်သန်းခန့်အထိ တိုးတက်လာမည်ဟု ခန့်မှန်းထား

ရန်ကုန်မြို့ ဆိပ်ကမ်းတစ်ခုရှိ ကုန်သေတ္တာများကို တွေ့ရစဉ်

ရန်ကုန်ဆိပ်ကမ်းများသို့ ၂၀၁၅ ခုနှစ် အတွင်းက ကုန်သေတ္တာပေါင်း ၈၉၀,၀၀၀ ဆိပ်ကမ်းသို့ စီးဝင်ခဲ့ပြီး လာမည့် ၂၀၂၀ ပြည့် နှစ်တွင် ကုန်သေတ္တာပေါင်း နှစ်သန်းခန့်အထိ တိုးတက်မည်ဟု ခန့်မှန်းထားကြောင်း မြန်မာ့ ဆိပ်ကမ်းအာဏာပိုင်မှ ဒုတိယ အထွေထွေမန်နေဂျာ ဦးဇော်ထွန်းလွင်က ပြောကြားသည်။

အလားတူ လာမည့် ၂၀၂၅ ခုနှစ်တွင်မူ ကုန်သေတ္တာပေါင်း လေးသန်းခန့်အထိ တိုးတက်လာမည်ဟု ခန့်မှန်းထားကြောင်းနှင့် ကြီးမားမည့် အခက်အခဲများကို ဖြေရှင်းရန် ရေကြောင်းမှ တိုက်ရိုက်ကုန်စည် သယ်ယူပို့ဆောင်မှု စနစ်ကို နိုင်ငံတော် အစိုးရထံသို့ တင်ပြထားကြောင်းလည်း ၎င်းကဆက်လက် ပြောကြားသည်။

ထို့ပြင် ဆန်၊ ပဲ၊ ပြောင်း အများဆုံးထွက်ရှိရာ စစ်ကိုင်းတိုင်းဒေသကြီး၊ မန္တလေးတိုင်း ဒေသကြီးနှင့် မကွေးတိုင်း ဒေသကြီးတို့တွင် ဧရာဝတီမြစ်ကြောင်းတစ်လျှောက် ကုန်သေတ္တာသိုလှောင်ရုံများ ဆောက်လုပ်ကာ ကုန်စည်များအား သင်္ဘောနောက်တွဲဖြင့် သယ်ဆောင်လာပြီး နိုင်ငံခြားသို့ ပို့ဆောင်မည့် ကုန်တင်သင်္ဘောသို့ ရေကြောင်းမှပင် တိုက်ရိုက်တင်ဆောင်မည့်စနစ်ကို JICA ၏ အကူအညီဖြင့် မန္တလေးတွင် စမ်းသပ်ဆောင်ရွက် နေကြောင်း ဦးဇော်ထွန်းလွင်က ပြောကြားသည်။

ရန်ကုန်တိုင်းဒေသကြီး အတွင်းရှိ ကုန်သေတ္တာ သိုလှောင်ရုံများ လိုအပ်ချက်နှင့်အတူ နေရာချထားမှု မမှန်ခြင်း၊ လျှပ်စစ်မီးနှင့် စက်ယန္တရား မပြည့်စုံခြင်းတို့ကို အစိုးရနှင့် ပုဂ္ဂလိကကဏ္ဍ ပူးပေါင်းဖြေရှင်းနိုင်ရန် ညှိနှိုင်းခဲ့ကြသည်။

အလားတူ ရန်ကုန်မြို့ဆိပ်ကမ်းမြို့များတွင် ဆိပ်ကမ်းရှင်းလင်းခြင်း နှောင့်နှေးကြန့်ကြာခြင်းကြောင့် အထွေထွေ ကုန်ကျစရိတ်များ မြင့်တက်နေစေသဖြင့် လျင်မြန်ချောမွေ့နိုင်စေရေးတို့ကို မတ် ၁၆ ရက်က ရန်ကုန်မြို့ရှိ ကုန်သည်/စက်မှု အသင်းချုပ်၌ ကျင်းပသည့် နိုင်ငံတော်ဒုတိယသမ္မတ-၁ ဦးမြင့်ဆွေ ဦးဆောင်သည့် မြန်မာပုဂ္ဂလိကကဏ္ဍ ဖွံ့ဖြိုးတိုးတက်ရေး ကော်မတီနှင့် စတုတ္တအကြိမ် တွေ့ဆုံပွဲတွင် မြန်မာ့ပုဂ္ဂလိကကဏ္ဍ ကိုယ်စားလှယ်များက အကြံပြု တင်ပြခဲ့ကြသည်။

သယ်ယူပို့ဆောင်ရေး ကဏ္ဍတွင် ရန်ကုန်တိုင်း ဒေသကြီးအတွင်း ကုန်သေတ္တာတင်ယာဉ်များကို နံနက် ၁၁ နာရီမှ ညနေသုံးနာရီအတွင်း ဖြတ်သန်းသွားလာခွင့်ကို တိုင်းဒေသကြီး အစိုးရမှ ခွင့်ပြုခဲ့ပြီး ပြည်ပပို့ကုန်ပစ္စည်းတင် ယာဉ်များကိုပါ ထည့်သွင်းခွင့်ပြုပေးပါရန် ကုန်သေတ္တာတင် လုပ်ငန်းရှင်များက တင်ပြခဲ့သည်။                        

Writer: 
နီလာ