<

မြန်မာနိုင်ငံ၏ ဥပဒေထက် နိုင်ငံတကာနှင့် အာဆီယံဒေသတွင်းမှ ချမှတ်ထားသည့် ဥပဒေစံချိန်စံညွှန်းဖြင့်သာ အကာအကွယ် ယူလိုသည့်အတွက် နိုင်ငံတကာ ရင်းနှီးမြှုပ်နှံသူများ စင်ကာပူနိုင်ငံမှ တစ်ဆင့်ခံ ရင်းနှီးမြှုပ်နှံမှုများ ဆောင်ရွက်နေဟုဆို

မြန်မာနိုင်ငံတွင် လာရောက် ရင်းနှီးမြှုပ်နှံမည့် နိုင်ငံတကာမှ ရင်းနှီးမြှုပ်နှံသူအချို့သည်  မြန်မာနိုင်ငံမှ ချမှတ်ထားသည့် ဥပဒေထက် နိုင်ငံတကာနှင့် ဒေသတွင်းနိုင်ငံများ၏ ဥပဒေစံနှုန်းများဖြင့်သာ အကာအကွယ်  ပြုလုပ်လိုသည့်အတွက် မြန်မာနိုင်ငံသို့ တိုက်ရိုက်ရင်းနှီးမြှုပ်နှံမှုထက် စင်ကာပူနိုင်ငံမှ တစ်ဆင့်ခံ၍ လာရောက် ရင်းနှီးမြှုပ်နှံမှုများ ဆောင်ရွက်လျက်ရှိကြောင်း ဇန်န၀ါရီ ၁၉ ရက်က ပြုလုပ်သည့် မြန်မာနိုင်ငံရင်းနှီးမြှုပ်နှံမှု ကော်မရှင်၏ သတင်းစာ ရှင်းလင်းပွဲမှ သိရသည်။

“သူကတော့ အခွန်သက်သာခွင့်တော့ ရင်းနှီးမြှုပ်နှံမှု ဥပဒေကြီးမှာ ရှိထားတဲ့အတိုင်းပဲ အဲဒီဖရိန်ထဲကပဲ ပေးတာ။ ဒါပေမဲ့ တစ်ခုရှိတာက ဒီမှာထုတ်လုပ်ပြီးတော့ အာဆီယံနိုင်ငံထဲ သွားရောင်းတာတို့ ချတာတို့ကျတော့ သူရဲ့ Comprehensive အရ အခွန်ကင်းလွတ် သက်သာခွင့်တွေ၊ သဘောတူထားတာတွေ ရှိတယ်။ တစ်ခုခု ဖြစ်လာရင်လည်း ခုနက ASEAN Comprehensive Agreement အောက်မှာ အဲဒီဖရိန်ထဲကမှ ရှင်းရမှာ။ အဲဒီဥပဒေတစ်ခု အာဆီယံ အချင်းချင်းမှာ အချင်းချင်း သဘောတူထားတဲ့ ရင်းနှီးမြှုပ်နှံမှု အကာအကွယ်ပေး အဲဒီစာချုပ်အရ အကာအကွယ်ရမှာပဲ။ တို့ရဲ့ ဒီစာချုပ်ကလည်း အကာအကွယ် မပေးဘူးလား ဆိုတော့လည်း ပေးတယ်လေ။ သို့သော်ငြားလည်း နှစ်ထပ်ရှိတာပေါ့။ နိုင်ငံတကာနဲ့ ထိုးထားတဲ့ ရင်းနှီးမြှုပ်နှံမှု စာချုပ်တွေက မိမိနိုင်ငံမှာ ချထားတဲ့ ဥပဒေတွေထက် နှစ်ခုယှဉ်ရင် ငါတို့ရင်းနှီးမြှုပ်နှံမှု ဥပဒေမှာ ရေးထားတယ်။ နိုင်ငံတကာ သဘောတူညီချက်တွေနဲ့ ဒေသတွင်း သဘောတူညီချက်တွေနဲ့ မိမိဥပဒေနဲ့ ယှဉ်လာရင် နိုင်ငံတကာနဲ့ ပေးထားတဲ့ ကတိက၀တ်ကို လိုက်နာရမယ်။ အလေးပေးရမယ်” ဟု ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာန ဒုတိယညွှန်ကြားရေးမှူးချုပ် ဦးသန်းအောင်ကျော်က ဆိုသည်။

အာဆီယံနိုင်ငံများ အချင်းချင်း ပေးထားသော ASEAN Comprehensive Investment Agreement သဘောတူညီချက်အရ အာဆီယံဒေသအတွင်း မည့်သည့်နိုင်ငံတွင်မဆို ရင်းနှီးမြှုပ်နှံပါက တန်းတူအခွင့်အရေး ရရှိမည်ဖြစ်သည် အတွက်ကြောင့် မြန်မာနိုင်ငံသို့ တိုက်ရိုက်ရင်းနှီးမြှုပ်နှံမှု မပြုလုပ်ဘဲ စင်ကာပူနိုင်ငံမှ တစ်ဆင့်ခံကာ လာရောက် ရင်းနှီးမြှုပ်နှံခြင်းဖြစ်ကြောင်း သိရသည်။

“စင်ကာပူမှာ ထောင်ရတဲ့ အကြောင်းတရားကတော့ အဓိကထောင်ရတဲ့ အကြောင်းတရား ပြောရရင်တော့ အာဆီယံနိုင်ငံ အချင်းချင်းတွေ ပေးတဲ့စာချုပ်တွေနဲ့ အခွင့်အလမ်းတွေကို လိုချင်လို့ပဲ” ဟု ဦးသန်းအောင်ကျော်က ပြောကြားသည်။

မြန်မာနိုင်ငံသို့ တစ်နှစ်အတွင်း ၀င်ရောက်လာသည့် နိုင်ငံခြား ရင်းနှီးမြှုပ်နှံမှု စုစုပေါင်း၏ ရာခိုင်နှုန်း ၄၀ မှာ စင်ကာပူနိုင်ငံမှဖြစ်ပြီး အခြားတတိယနိုင်ငံများက စင်ကာပူတစ်ဆင့်ခံ၍ ၀င်ရောက်မြှုပ်နှံနေခြင်း ဖြစ်ကြောင်း မြန်မာနိုင်ငံ ရင်းနှီးမြှုပ်နှံမှု ကော်မရှင် အတွင်းရေးမှူး ဦးအောင်နိုင်ဦးက ပြောကြားထားသည်။

“လတ်တစ်လောမှာ မြန်မာနိုင်ငံကို ၀င်ရောက်ခဲ့တဲ့ ရင်းနှီးမြှုပ်နှံမှုကိုကြည့်ရင် နှစ်နှစ်အတွင်း အများဆုံးလာတာ စင်ကာပူက။ စင်ကာပူက မြန်မာနိုင်ငံမှာ တစ်နှစ်တစ်နှစ် ၀င်လာသမျှ ရင်းနှီးမြှုပ်နှံမှုတွေ အားလုံးရဲ့ ရာခိုင်နှုန်း ၄၀ လောက်က စင်ကာပူက ၀င်ပါတယ်။ စင်ကာပူရင်းနှီးမြှုပ်နှံမှု ဆိုသော်ငြားလည်း စင်ကာပူနိုင်ငံသားတွေ လုပ်တဲ့ ရင်းနှီးမြှုပ်နှံမှုတွေချည်း မဟုတ်ပါဘူး။ အခြားတတိယနိုင်ငံတွေက တစ်ဆင့်ခံ ရင်းနှီးမြှုပ်နှံမှုတွေ ပါပါတယ်။ အခြားတတိယနိုင်ငံတွေက စင်ကာပူမှာ ကုမ္ပဏီကော်ပိုရိတ်လုပ်တယ်။ လုပ်ပြီးမှ မြန်မာပြည်ကို စင်ကာပူကတစ်ဆင့် ၀င်လာတယ်ပေါ့နော်” ဟု ဦးအောင်နိုင်ဦးက ပြောကြားသည်။

စင်ကာပူနိုင်ငံမှ တစ်ဆင့်ခံကာ မြန်မာနိုင်ငံသို့ လာရောက် ရင်းနှီးမြှုပ်နှံနေသည့် နိုင်ငံများသည် အမေရိကန်၊ ဥရောပသမဂ္ဂ အဖွဲ့ဝင် နိုင်ငံတို့မှ အများဆုံး ၀င်ရောက်ထားကြောင်း သိရသည်။

စင်ကာပူနိုင်ငံ အနေဖြင့် မြန်မာနိုင်ငံတွင် ရင်းနှီးမြှုပ်နှံမှု အများဆုံး ပြုလုပ်ထားသော်လည်း အနာဂတ်တွင် ရင်းနှီးမြှုပ်နှံမှုများ ပိုမိုတိုးမြှင့် ဆောင်ရွက်နိုင်ရန်အတွက် မြန်မာနိုင်ငံဆိုင်ရာ စင်ကာပူသမ္မတနိုင်ငံ သံအမတ်ကြီးမှ မြန်မာနိုင်ငံ ပြည်သူ့လွှတ်တော် ဒုတိယဥက္ကဋ္ဌနှင့် တွေ့ဆုံဆွေးနွေးခဲ့ကြောင်း ပြန်ကြားရေး ၀န်ကြီးဌာနမှ သိရသည်။

 

January 19, 2018














Copy Protected by Chetan's WP-Copyprotect.