ပြည်နယ်နှင့် တိုင်းဒေသကြီးများ၌ ခွင့်ပြုခဲ့သည့် ရင်းနှီးမြှုပ်နှံမှုများအနက် ရန်ကုန်တိုင်းဒေသကြီးအတွင်း ဒေါ်လာ ၂ ဒသမ ၅ ဘီလျံဖြင့် အများဆုံး ဝင်ရောက်ထားပြီး ရခိုင်၊ ကယားနှင့် ချင်းပြည်နယ်တွင် ဝင်ရောက်မှု မရှိသေးဟုဆို

ပြည်နယ်နှင့် တိုင်းဒေသကြီးများ၌ ခွင့်ပြုခဲ့သည့် ရင်းနှီးမြှုပ်နှံမှုများအနက် ရန်ကုန်တိုင်းဒေသကြီးအတွင်း ဒေါ်လာ ၂ ဒသမ ၅ ဘီလျံဖြင့် အများဆုံး ဝင်ရောက်ထားပြီး ရခိုင်၊ ကယားနှင့် ချင်းပြည်နယ်တွင် ဝင်ရောက်မှု မရှိသေးဟုဆို
Published 30 December 2017

ရန်ကုန်တိုင်းဒေသကြီးအတွင်း အကောင်အထည်ဖော်နေသည့် သီလဝါ အထူးစီးပွားရေးဇုန်ကို တွေ့ရစဉ်

ပြည်နယ်နှင့် တိုင်းဒေသကြီးများတွင် မြန်မာနိုင်ငံရင်းနှီးမြှုပ်နှံမှု ကော်မရှင်က ခွင့်ပြုပေးခဲ့သည့် ရင်းနှီးမြှုပ်နှံမှုများအနက် ရန်ကုန်တိုင်းဒေသကြီးအတွင်း ဒေါ်လာ ၂ ဒသမ ၅ ဘီလျံဖြင့် အများဆုံး ဝင်ရောက်ထားကာ ရခိုင်၊ ကယားနှင့် ချင်းပြည်နယ်တို့တွင် ဝင်ရောက်မှု မရှိသေးကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင်မှ သိရသည်။

“ပြည်နယ်နဲ့ တိုင်းဒေသကြီးမှာ အများဆုံးဝင်တာက ရန်ကုန်တိုင်းဒေသကြီးပေါ့။ ရန်ကုန်တိုင်းမှာ ရင်းနှီးမြှုပ်နှံမှုပမာဏ ဒေါ်လာ ၂ ဒသမ ၅ ဘီလျံနဲ့ ရင်းနှီးမြှုပ်နှံမှု အများဆုံး ဝင်ရောက်ခဲ့တာ ဖြစ်ပါတယ်။ ဒုတိယအများဆုံးက မန္တလေးတိုင်းဒေသကြီးမှာ ဒေါ်လာ ၁ ဒသမ ၁ ဘီလျံ ဝင်ရောက်ထားပါတယ်။  တတိယ အများဆုံးက မွန်ပြည်နယ်ဖြစ်ပြီးတော့ ဒေါ်လာ ၄၄၈ သန်းဖြစ်ပါတယ်။ ကချင်ပြည်နယ်မှာ ဒေါ်လာ ၂၄၂ဒသမ၃၉ သန်းနဲ့ တနင်္သာရီတိုင်း ဒေသကြီးမှာ ဒေါ်လာ  ၁၇၄ သန်း ဝင်ရောက်ထားပါတယ်။ လုံးဝမ၀င်သေးတာက ရခိုင်ပြည်နယ်၊ ကယားပြည်နယ်နဲ့ ချင်းပြည်နယ်တို့ ဖြစ်ပါတယ်” ဟု ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနမှ ညွှန်ကြားရေးမှူး ဦးကျော်ဝင်းထွန်းက ပြောကြားသည်။

၂၀၁၇ ခုနှစ် သြဂုတ်လမှ ဒီဇင်ဘာလ ၂၀ ရက်နေ့အထိ ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီ အနေဖြင့် စက်မှုကဏ္ဍနှင့် အခြားဝန်ဆောင်မှု ကဏ္ဍတို့တွင် စင်ကာပူနိုင်ငံ၊ တရုတ်ပြည်သူ့ သမ္မတနိုင်ငံ၊ ကိုရီးယား သမ္မတနိုင်ငံ၊ ထိုင်ဝမ်၊ ဟောင်ကောင်၊ ဂျပန်နိုင်ငံနှင့် မလေးရှားနိုင်ငံတို့မှ စုစုပေါင်း ရင်းနှီးမြှုပ်နှံမှု လုပ်ငန်း ၂၁ ခုနှင့် မြန် မာနိုင်ငံသား ရင်းနှီးမြှုပ်နှံမှုလုပ်ငန်း သုံးခုတို့အား အတည်ပြုမိန့်များ ထုတ်ပေးခဲ့ပြီး ၊ မတည်ငွေရင်း ပမာဏ စုစုပေါင်း ဒေါ်လာ ၂၉ ဒသမ ၈၇၉ သန်းနှင့် မြန်မာကျပ်ငွေ ၈၇၁၉ ဒသမ ၂၂ သန်းရှိပြီး အလုပ်အကိုင် အခွင့်အလမ်း ၉၂၄၀ အတွက် ဖန်တီးပေးနိုင်မည်ဖြစ်သည်။ ရန်ကုန်တိုင်းဒေသကြီး အတွင်း ရင်းနှီးမြှုပ်နှံမှု ဆောင်ရွက်လိုသူများ အနေဖြင့် မတည်ငွေရင်း ပမာဏ ဒေါ်လာ ငါးသန်း (သို့)  ကျပ်သန်း ၆၀၀၀ အထိ ရင်းနှီးမြှုပ်နှံမှုလုပ်ငန်းများ၏ အတည်ပြု လျှောက်ထားလွှာများကို ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာန၊ ရန်ကုန်တိုင်းဒေသကြီး ဦးစီးမှူးရုံး အမှတ် (၁) သစ္စာလမ်း ရန်ကင်းမြို့နယ် တယ်လီဖုန်း အမှတ် ၉၅-၀၁-၆၅၇၈၉၂ သို့ ဆက်သွယ်မေးမြန်း လျှောက်ထားနိုင်သည်။

မြန်မာနိုင်ငံ ရင်းနှီးမြှုပ်နှံမှုကော်မရှင် အနေဖြင့် ရင်းနှီးမြှုပ်နှံမှု လုပ်ငန်းများကို ခွင့်ပြုပေးရာတွင် လုပ်ငန်း၏ စီးပွားရေး တွက်ခြေကိုက်မှု၊ အလုပ်အကိုင်သစ်များ ဖန်တီးပေးနိုင်မှု၊ အမျိုးသားဝင်ငွေနှင့် အခွန်တိုးတက် ရရှိနိုင်မှု၊ ပြည်တွင်းပြည်ပ ဈေးကွက်အခြေအနေ၊ ပြည်တွင်းစားသုံးရန် လိုအပ်ချက်၊ နည်းပညာ ဆီလျော်မှု၊ တီထွင်ဆန်းသစ်မှု၊ နည်းပညာ လွှဲပြောင်းရရှိမှု၊ ပတ်ဝန်းကျင် ထိခိုက်မှုနှင့် လူမှုရေးထိခိုက်မှု ထိန်းသိမ်းကာကွယ်ရေး ဆောင်ရွက်မှု အစီအမံများ၊ တာဝန်ယူမှုရှိသော ရင်းနှီးမြှုပ်နှံမှု ဖြစ်ခြင်းနှင့် တည်ဆဲဥပဒေများကို လိုက်နာခြင်း စသည့်အချက်များကို အခြေခံ၍ စိစစ်ခြင်းဖြစ်ကြောင်း သိရသည်။

ပြည်နယ်နှင့် တိုင်းဒေသကြီးများရှိ ရင်းနှီးမြှုပ်နှံမှု ကော်မတီများက ရင်းနှီးမြှုပ်နှံမှု ပမာဏ ဒေါ်လာငါးသန်း သို့မဟုတ် ကျပ်သန်း ၆၀၀၀ အထိရှိသည့် ရင်းနှီးမြှုပ်နှံမှု လုပ်ငန်းများကို ခွင့်ပြုပေးလျက်ရှိကြောင်း၊ လက်ရှိအချိန်၌ ပြည်နယ်နှင့် တိုင်းဒေသကြီးများတွင်လည်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန (DICA) တစ်နည်းအားဖြင့် မြန်မာနိုင်ငံ ရင်းနှီးမြှုပ်နှံမှု ကော်မရှင် (MIC) ရုံးများကို ဖွင့်လှစ်ထားပြီဖြစ်သည်။

Most Read

Most Recent