၂၀၁၇ ခုနှစ် စားနပ်ရိက္ခာဖူလုံမှုနှင့် လုံခြုံစိတ်ချရမှုဆိုင်ရာ ညွှန်းကိန်း၌ နိုင်ငံပေါင်း ၁၁၃ နိုင်ငံအနက် မြန်မာနိုင်ငံက အဆင့် ၈၀ ရရှိခဲ့ပြီး အာဆီယံနိုင်ငံများထဲတွင် တတိယမြောက် ရမှတ်အနည်းဆုံး နိုင်ငံဖြစ်

၂၀၁၇ ခုနှစ် စားနပ်ရိက္ခာဖူလုံမှုနှင့် လုံခြုံစိတ်ချရမှုဆိုင်ရာ ညွှန်းကိန်း၌ နိုင်ငံပေါင်း ၁၁၃ နိုင်ငံအနက် မြန်မာနိုင်ငံက အဆင့် ၈၀ ရရှိခဲ့ပြီး အာဆီယံနိုင်ငံများထဲတွင် တတိယမြောက် ရမှတ်အနည်းဆုံး နိုင်ငံဖြစ်
Published 11 October 2017

တောင်ငူမြို့ရှိ လယ်ယာစိုက်ပျိုးရေး လုပ်ငန်းခွင် တစ်ခုအား တွေ့ရစဉ် (ဓာတ်ပုံ-ဇော်ဝင်းချစ်)

The Economist Intelligence Unit (EIU) မှ ထုတ်ပြန်သော ၂၀၁၇ ခုနှစ် စားနပ်ရိက္ခာဖူလုံမှုနှင့် လုံခြုံစိတ်ချရမှုဆိုင်ရာ ညွှန်းကိန်း၌ နိုင်ငံပေါင်း ၁၁၃ နိုင်ငံအနက် မြန်မာနိုင်ငံက အဆင့် ၈၀ ရရှိခဲ့ပြီး အာဆီယံနိုင်ငံများထဲတွင် တတိယမြောက် ရမှတ်အနည်းဆုံးနိုင်ငံ ဖြစ်ကြောင်း အဆိုပါညွှန်းကိန်းအရ သိရသည်။

၂၀၁၇ ခုနှစ် စားနပ်ရိက္ခာဖူလုံမှုနှင့် လုံခြုံစိတ်ချရမှုဆိုင်ရာ ညွှန်းကိန်းတွင် မြန်မာနိုင်ငံက ရမှတ် ၄၄ ဒသမ ၈ ရှိခဲ့ပြီး ၂၀၁၆  ခုနှစ်ကရရှိခဲ့သော ၄၆ ဒသမ ၅ နှင့် နှိုင်းယှဉ် ပါက ၁ ဒသမ ၇ ကျဆင်းခဲ့ပြီး အဆင့်ပြောင်းလဲမှု မရှိကြောင်း သိရသည်။ အဆိုပါညွှန်းကိန်း၌ ရမှတ်အများဆုံး ရရှိသည့် နိုင်ငံ ၂၀ စာရင်းတွင် အာရှနိုင်ငံများထဲမှ သြစတြေးလျ (၈၃ ဒသမ ၃ မှတ်)၊ ဂျပန် (၇၉ ဒသမ ၅ မှတ်) နှင့် စင်ကာပူ (၈၄ မှတ်) တို့သာ ပါဝင်ခဲ့သည်။

စားနပ်ရိက္ခာ ဖူလုံမှုနှင့် လုံခြုံစိတ်ချရမှုဆိုင်ရာ ညွှန်းကိန်းကို စားနပ်ရိက္ခာ ထုတ်လုပ်မှုနှင့် လုံလောက်မှုဆိုင်ရာ အခြေအနေ၊ စားနပ်ရိက္ခာ လွယ်ကူစွာရရှိနိုင်မှု အခြေအနေ၊ အရည်အသွေးနှင့် လုံခြုံစိတ်ချမှု အခြေအနေ၊ သဘာဝအရင်းအမြစ် ကြွယ်ဝမှုနှင့် ဘေးအန္တရာယ် ဖြေရှင်းနိုင်မှု အရည်အသွေးတို့ကို အဓိကထားပြီး စိစစ်ရွေးချယ်ခြင်း ဖြစ်သည်။

အဆိုပါ အခြေအနေများ စိစစ်သုံးသပ်ရာတွင် မြန်မာနိုင်ငံက သဘာဝအရင်းအမြစ်  ကြွယ်ဝမှုဆိုင်ရာ အခြေအနေနှင့် စားနပ်ရိက္ခာ ထုတ်လုပ်မှုနှင့် လုံလောက်မှုဆိုင်ရာ အခြေအနေတို့တွင် ရမှတ်ကောင်းမွန်သော်လည်း စာနပ်ရိက္ခာ လွယ်ကူစွာရရှိနိုင်မှု အခြေအနေ၊ အရည်အသွေးနှင့် လုံခြုံစိတ်ချမှု အခြေအနေ၊ သဘာဝဘေးအန္တရာယ် ဖြေရှင်းနိုင်မှု အရည်အသွေးတို့တွင် ရမှတ်လျော့နည်းခဲ့ကြောင်း သိရသည်။ ထို့ပြင် လယ်ယာစိုက်ပျိုးရေးနှင့် မွေးမြူရေးဆိုင်ရာ ကဏ္ဍတွင် မူဝါဒပိုင်းဆိုင်ရာ အားနည်းမှု၊ သွင်းအားစုနှင့် အရင်းအနှီးရရှိနိုင်မှုဆိုင်ရာ အခွင့်အလမ်း နည်းပါးမှု၊ စိုက်ပျိုးမွေးမြူရေးဆိုင်ရာ သုတေသနနှင့် ဖွံ့ဖြိုးမှု အထောက်အကူ အားနည်းချက်များလည်း ရမှတ်လျော့နည်းမှု၏ အကြောင်းအရာအချို့ ဖြစ်သည်။

ယင်းညွှန်းကိန်းတွင် ပါဝင်သော ထိပ်ဆုံး ၁၀ နိုင်ငံစာရင်းတွင် အိုက်ယာလန်၊ သြစတြီးယား၊ ပြင်သစ်၊ အမေရိကန်၊ ဂျာမနီ၊ ဆွစ်ဇာလန်၊ ဗြိတိန်၊ ကနေဒါ၊ ဒိန်းမတ်နှင့်  ဆွီ ဒင်နိုင်ငံတို့ဖြစ်ပြီး အာဆီယံနိုင်ငံများထဲမှ စင်ကာပူက ရမှတ် ၈၄  မှတ်ဖြင့် အဆင့် ၁၉ ၌ ရပ်တည်နိုင်ခဲ့ခြင်းဖြစ်သည်။ ယင်းညွှန်းကိန်းတွင် ပါဝင်သည့် အခြားအာရှနိုင်ငံကြီးများ၏ ရမှတ်များမှာ တောင်ကိုရီးယားက ၇၄ ဒသမ ၇ မှတ်၊ တရုတ်က ၆၃ ဒသမ ၇ မှတ်၊ အိန္ဒိယက ၄၈ ဒသမ ၉ မှတ်တို့ဖြစ်သည်။

အာဆီယံနိုင်ငံများထဲတွင် စင်ကာပူပြီးနောက် မလေးရှားက ၆၆ ဒသမ ၂ မှတ်၊ ထိုင်း က ၅၈ ဒသမ ၃ မှတ်၊ ဗီယက်နမ်က ၅၄ မှတ်၊ အင်ဒိုနီးရှားက ၅၁ ဒသမ ၃ မှတ်၊ ဖိလစ်ပိုင် က ၄၇ ဒသမ ၃ မှတ်၊ မြန်မာက ၄၄ ဒသမ ၈ မှတ်၊ ကမ္ဘောဒီးယားက ၄၃ ဒသမ ၃ မှတ်၊ လာ အိုက ၃၃ ဒသမ ၁ မှတ်ရရှိခဲ့ခြင်းဖြစ်ပြီး မြန်မာနိုင်ငံက ယခုညွှန်းကိန်းတွင်ပါဝင်သော အာဆီယံနိုင်ငံများအနက် အဆင့် (၇) နေရာ တွင် ရပ်တည်လျက်ရှိသည်။

၂၀၁၇ ခုနှစ် စားနပ်ရိက္ခာဖူလုံမှုနှင့် လုံခြုံ စိတ်ချရမှုဆိုင်ရာ ညွှန်းကိန်းတွင် ရမှတ်အနည်းဆုံး ၁၀ နိုင်ငံစာရင်းတွင် ကွန်ဂို၊ ဘူရွန်ဒီ၊ မာ ဒါဂါစကာ၊ ယီမင်၊ ချက်ဒ်၊ ဆီရာလီယွန်၊ ဟေ တီ၊ နိုင်ဂျာ၊ မာလာဝီ၊ ဆီးရီးယားတို့ပါဝင်ပြီး မြန်မာနိုင်ငံ၏ အိမ်နီးချင်းနိုင်ငံများအနက် လာအို (၃၃ ဒသမ ၁ မှတ်) နှင့် ဘင်္ဂလားဒေ့ရှ် (၃၉ ဒသမ ၇ မှတ်) တို့က ရမှတ်အနည်းဆုံး ၂၅ နိုင်ငံစာရင်းတွင် ပါဝင်နေကြောင်း သိရသည်။

Most Read

Most Recent