စီးပွားရေးကျဆင်းခြင်း၊ ငွေရေးကြေးရေးဈေးကွက် တည်ငြိမ်မှု မရှိခြင်းများတွင် ပြည်တွင်းပြည်ပ ပညာရှင်များ၏ လုပ်ဆောင်မှုနှင့် အရေခြုံထားသော အလှူရှင်များ၊ ဖောင်ဒေးရှင်းများ စွက်ဖက်ခြင်း ပါဝင်မှု ရှိ မရှိ ပြန်လည်သုံးသပ်ရန် လိုအပ်ဟုဆို

လက်ရှိမြန်မာနိုင်ငံ ကြုံတွေ့နေရသည့် စီးပွားရေးကျဆင်းခြင်း၊ ငွေရေးကြေးရေးဈေးကွက် တည်ငြိမ်မှု မရှိခြင်းများတွင် ပြည်တွင်း ပြည်ပ စီးပွားရေးပညာရှင်များ၏ လုပ်ဆောင်မှုများနှင့် အရေခြုံထားသော အလှူရှင်များ၊ ဖောင်ဒေးရှင်းများ၏ စွက်ဖက်ခြင်းများ ပါဝင်နေမှု ရှိ မရှိ ပြန်လည်သုံးသပ်ရန် လိုအပ်နေကြောင်း စီးပွားရေးနှင့် ကူးသန်းရောင်းဝယ်ရေး ၀န်ကြီးဌာနတွင် ဒုတိယ၀န်ကြီးအဖြစ် လုပ်ဆောင်ခဲ့သူ ဒေါက်တာပွင့်ဆန်းက စက်တင်ဘာ ၂၂  ရက်တွင် ပြောကြားသည်။

NLD အစိုးရ လက်ထက်တွင် အစိုးရကသာ စီးပွားရေး တိုးတက်သည်ဟု ပြောကြားနေသော်လည်း ပြည်သူများနှင့် လုပ်ငန်းရှင်များကမူ စီးပွားရေး ကျဆင်းနေမှုကို လက်ခံယုံကြည် ထားသည့်အပြင် လတ်တလောတွင် မြန်မာကျပ်ငွေတန်ဖိုး ကျဆင်းမှုမှာလည်း ဆိုးရွားစွာ ဖြစ်ပေါ်နေပြီး အဆိုပါ အခြေအနေများမှာ လက်ရှိစီမံခန့်ခွဲနေသူ အစိုးရတွင်သာ တာဝန်ရှိကြောင်း ဒေါက်တာပွင့်ဆန်းက ပြောကြားသည်။

“အစိုးရရဲ့ စီးပွားရေးပေါ်လစီ ဆိုတာကတော့ အရမ်းကျယ်ပြန့်တာပေါ့။ ဒါပေမဲ့  အောင်မြင်မှု မရဘူးဆိုတဲ့ အပိုင်းတော့ ပြောလို့ရတယ်။ မှားတယ်၊ မှန်တယ် ဆိုတာထက် အောင်မြင်မှုမရဘူး ဆိုတာက သူ့ရဲ့ လုပ်ဆောင်ချက်အပေါ် မူတည်ပြီးတော့ အောင်မြင်မှု၊ မအောင်မြင်မှုဆိုတာ ဖြစ်ပေါ်လာတယ်။ ဒါကြောင့်မို့လို့ ဒါတွေ မအောင်မြင်ဘူး ဆိုတာမျိုး ရှိလာတဲ့အခါမှာ ကိုယ့်ရဲ့ ပေါ်လစီကိုပဲ ပြန်သုံးသပ်မလား။ ကိုယ်ရဲ့ လုပ်ဆောင်ချက်တွေ မှားနေရင် ပြန်တည့်မလား။  ဒါကတော့ တာဝန်ရှိသူတွေရဲ့ တာဝန်ဖြစ်ပါတယ်။ စီးပွားရေး ကျဆင်းတယ်၊ ငွေရေး ကြေးရေး မတည်ငြိမ်ဘူးဆိုတဲ့ နေရာမှာ အကြောင်းရင်း အများကြီး ရှိပါတယ်။ ဘယ်လို အခြေအနေကမှ ဒီလိုမျိုးဖြစ်အောင် တစ်ခုတည်းနဲ့ ဖန်တီးခဲ့တာ မဟုတ်ပါဘူး။ တစ်ခုနဲ့ တစ်ခု ပေါင်းပြီးဖြစ်တာရှိတယ်။ တစ်ခုနဲ့တစ်ခု ခြုံပြီးတော့ ဖြစ်တာရှိတယ်။ အကြောင်းရင်း တစ်ခုကနေ အဓိကနေရာက ပါဝင်ပြီး ဖြစ်သွားတာရှိတယ်။ အကြောင်းရင်းတွေကို သေသေချာချာ လေ့လာစိစစ်ဖို့လည်း စီမံခန့်ခွဲသူတွေရဲ့ တာဝန်ပဲလို့ ယူဆပါတယ်။ အစိုးရရဲ့ စီမံခန့်ခွဲမှု၊ နောက်တစ်ခါကျတော့ ပူးပေါင်းပါဝင်သူတွေရဲ့ စီမံဆောင်ရွက်မှု၊ စီးပွားရေးကိစ္စတွေ လုပ်ဆောင်ရာမှာ ပြည်တွင်းပြည်ပ ပညာရှင်တွေရဲ့ ဘယ်လိုပုံစံမျိုးနဲ့ ပါဝင်ကိုင်တွယ်နေသလဲ ဆိုတာတွေ။ နောက်တစ်ခါကျတော့ အရေခြုံထားတဲ့ အလှူရှင်တွေ၊ ဖောင်ဒေးရှင်းတွေရဲ့ ဒါတွေရဲ့ စွက်ဖက်မှုရှိနေသလား ဆိုတာကိုတော့ ကိုယ့်ဘာသာ ပြန်သုံးသပ်ရမှာ ဖြစ်ပါတယ်။ သုံးသပ်ချက်တွေအပေါ် မူတည်ပြီးတော့ ပြုပြင်ပြောင်းလဲမှုတွေ ဆောင်ရွက်ရမှာတော့ အစိုးရရဲ့တာဝန်ပဲ ဖြစ်ပါတယ်” ဟု  ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ၏ ဗဟိုအလုပ်အမှုဆောင်လည်းဖြစ်သူ ဒေါက်တာပွင့်ဆန်းက စက်တင်ဘာ ၂၂ ရက်က ကျင်းပသည့် သတင်းစာ ရှင်းလင်းပွဲတွင် ထည့်သွင်းပြောကြားသည်။

ထိုသို့ စီးပွားရေး ကျဆင်းနေခြင်းများ၊ ငွေရေးကြေးရေးဈေးကွက် တည်ငြိမ်မှု မရှိခြင်းများမှာ ရေရှည်အတွက်သာ မဟုတ်ဘဲ လတ်တလော ရေတိုကာလတွင်ပင် ကောင်းမွန်မှု မရှိတော့ကြောင်း ဒေါက်တာပွင့်ဆန်းက ပြောကြားသည်။

“အမေရိကန်ဒေါ်လာ ခိုင်မာမှုနဲ့အတူ ကျပ်ငွေတန်ဖိုး ကျဆင်းမှုမှာ မြန်မာနိုင်ငံက နိုင်ငံအားလုံးထက် ပိုကျဆင်းနေတယ်ဆိုတာ အားလုံးသိပြီး ဖြစ်ပါတယ်။ တော်တော်လေးကို ပိုကျနေတာပါ။ အခုဆိုရင် ရာခိုင်နှုန်း ၂၀ ကျော်လောက်ကို ကျဆင်းနေတာပါ။ အခုဖြစ်ပေါ်နေတာတွေနဲ့ ပတ်သက်ပြီး အစိုးရပိုင်းအနေနဲ့ လျင်လျင်မြန်မြန်ကို ကိုင်တွယ်ဆောင်ရွက်ဖို့ လိုနေပါပြီ။ အဓိက ကတော့ ဒီအပိုင်းမှာ အစိုးရရဲ့ တုံ့ပြန်ဆောင်ရွက်မှုတွေက နှေးကွေးပြီးတော့ အခြေအနေ တစ်ခုရောက်အောင် မထိန်းသိမ်းနိုင်တာ တွေ့ရပါတယ်။ စီးပွားရေးဆိုတာ အချိန်နဲ့အမျှ ပြောင်းနေတယ်။ ဈေးဆိုတာ နာရီနဲ့အမျှ ပြောင်းလဲနေပေမယ့် တာဝန်ရှိ ပုဂ္ဂိုလ်တွေရဲ့ တုံ့ပြန်ဆောင်ရွက်မှုတွေကတော့ နှေးကွေးနေပြီး ပုဂ္ဂလိကပိုင်းက ကြည့်ရင်တော့ အားရစရာ မရှိဘူး။ အောင်မြင်မှု မရှိဘူးလို့ သုံးသပ်ပါတယ်။ အထူးသဖြင့်တော့ နိုင်ငံတော်၏ အတိုင်ပင်ခံပုဂ္ဂိုလ်နဲ့ စီးပွားရေး လုပ်ငန်းရှင် တွေ့ဆုံပွဲပေါ့ ။ မတွေ့ဆုံခင်မှာတော့ တော်တော်လေး မျှော်လင့်ချက် ကြီးကြပါတယ်။ တွေ့ဆုံပြီးတဲ့နောက်မှာ ငွေရေးကြေးရေး အခြေအနေက ပိုပြီးတော့ ဆိုးလာတာကို တွေ့ရမှာ ဖြစ်ပါတယ်” ဟု ဒေါက်တာပွင့်ဆန်းက ဆိုသည်။

ပခုက္ကူနှမ်းဈေးကွက်အတွင်း ယောနှမ်းနက် တစ်တင်း ကျပ် ၈၅၀၀၀ ထိ စံချိန်တင်မြင့်တက်ခဲ့ပြီး ရောင်းဝယ်ရေး ကာလတစ်လျှောက် အမြင့်ဆုံးဈေးနှုန်း ဖြစ်ကြောင်း သိရ

ဂန့်ဂေါမြို့နယ် အတွင်းရှိ နှမ်းစိုက်ခင်းများကို တွေ့ရစဉ်

ပခုက္ကူ သီးနှံဈေးကွက်အတွင်း ယခုစက်တင်ဘာလတွင် အသစ်ဝင်ရောက်လျက်ရှိသည့် ယောနှမ်းနက် တစ်တင်း ကျပ် ၈၅၀၀၀ ထိ စံချိန်တင်မြင့်တက်ခဲ့ပြီး ရောင်းဝယ်ရေး ကာလတစ်လျှောက် အမြင့်ဆုံးဈေးနှုန်း ဖြစ်ကြောင်း  ကုန်သည်များထံမှ သိရသည်။

ပခုက္ကူနှမ်းဈေးကွက်အတွင်း ယောဒေသထွက် နှမ်းနက် (စမုန်) နှင့် နှမ်းနက် (ရိုးရိုး) ဟူ၍ နှစ်မျိုးဝင်ရောက်နေပြီး တရုတ်ဝယ်လက်များ ၀ယ်ယူနေခြင်းကြောင့် ဈေးနှုန်းစံချိန်တင် မြင့်တက်ခဲ့ခြင်း ဖြစ်ကြောင်း သိရသည်။

“ပခုက္ကူဈေးကွက်ကို အရင်ရက်တွေ ကတော့ နှမ်းနက် အိတ်ရေ ၂၅၀၀ လောက် ၀င်တယ်။ ခုရက်ပိုင်းတော့ အိတ်ရေ ၁၅၀၀ လောက် ၀င်နေသေးတယ် ။ လက်ရှိကတော့ ဈေးကောင်းတယ်။တရုတ်သမား အဓိက၀ယ် နေတယ်။ တောင်သူရော ကုန်သည်ရော အတော်ကို အကျိုးရှိတဲ့ နှစ်လို့ ပြောရပါမယ်။ ဈေးကလည်း နေ့စဉ်ဆိုသလို ဆက်တိုက် တက်နေပါတယ်။ ၁၀ စုနှစ်အတွင်းမှာ ဒီလို ဈေးမျိုး တစ်ကြိမ်မှ မဖြစ်ဘူးပါဘူး” ဟု ပခုက္ကူ ကုန်သည် ပွဲစားများအသင်း အတွင်းရေးမှူး ကိုစိန်လွင်က ဆိုသည်။

ပခုက္ကူနှမ်းဈေးကွက်အတွင်း ယခုစက် တင်ဘာ ၂၂ ရက်ဈေးကွက်အရ နှမ်းနက် (စမုန်)တစ်တင်းလျှင် အနိမ့်ဆုံး ကျပ် ၇၉၀၀၀ မှ အမြင့်ဆုံး ကျပ် ၈၅၀၀၀ ပေါက်ဈေးရှိပြီး နှမ်းနက် (ယော) တစ်တင်း ကျပ် ၇၅၀၀၀ ပေါက်ဈေးရှိကြောင်း သိရသည်။

ယောနှမ်းထွက်ရှိရာ ဒေသများမှ တောင်သူများမှာ ယခုနှစ် သီးနှံဈေး ကောင်းသော်လည်း သီးနှံစိုက်ပျိုးပြီးနောက် မိုးသည်းထန်စွာ ရက်ရှည်ရွာသွန်းမှုကြောင့် အထွက်နှုန်း လျော့ကျခဲ့ပြီး အကျိုးအမြတ် ခံစားရမှု နည်းပါးကြောင်း သိရသည်။

“ဒီနှစ်က စိုက်ပြီးချိန်မှာ ၁၄ ရက်လောက် မိုးသည်းလိုက်တဲ့တယ်။ တချို့အခင်းတွေဆို အပင်သေသွားလို့ အသစ်ပြန်ကြဲရတယ်။ အထူးသဖြင့် ရိုးရိုးနှမ်းနက်သမားတွေ ပိုပြီးဒုက္ခများတယ်။ နှစ်ခါပြန်စိုက်ရလို့ စိုက်စရိတ် တက်တယ်။ စမုန်နက်ကတော့ ရေဒဏ်မိုးဒဏ် ခံနိုင်လို့ သက်သာသွားတယ်။ ပုံမှန် တစ်ဧက ကို ၁၅ တင်းနဲ့ တင်း ၂၀ ကြားလောက်ထွက် တယ်။ ဒီနှစ် အလွန်ဆုံးကောင်းတဲ့ အခင်းမှ တစ်ဧက ၁၂ တင်းဆိုတာ အလွန်ဆုံးပဲ။ လက်ရှိ ဈေးနှုန်းအရ အထွက်နည်းပေမဲ့ တောင်သူအတွက် မဆိုးပါဘူး” ဟု ဂန့်ဂေါမြို့နယ်မှ တောင်သူ ကျော်ကျော်ထွန်းက ဆိုသည်။

ယောဒေသတစ်ဝိုက် ယခုနှစ်အနည်းငယ်အတွင်း လုပ်သားရှားပါး လာခြင်းကြောင့် ယခင်နှစ်များကဲ့သို့ နေ့စားလုပ်သား ငှားရမ်းရ ခက်ခဲလာပြီး ဧကအလိုက် ပေါင်းသင်ရိတ်သိမ်းစရိတ်ဖြင့် လုပ်ကိုင်လာကြောင်း တောင်သူများထံမှ သိရသည်။

ပြီးခဲ့သည့် ၂၀၁၇ ခုနှစ် ယောနှမ်းပေါ်ချိန်တွင် ပခုက္ကူဈေးကွက်အတွင်း ၀ယ်လိုအား နည်းပါးခြင်းကြောင့် နှမ်းနက်တစ်တင်း အမြင့်ဆုံး ကျပ် ၅၀၀၀၀ အောက်သာ ပေါက်ဈေးရှိခဲ့ပြီး တောင်သူများမှာ အကျိုးအမြတ် မရှိသလောက် နည်းပါးခဲ့သည်။

ယခုနှစ် စိုက်ပျိုးရာသီတွင် မကွေးတိုင်းအတွင်း ဒေသများမှာ အချိန်အခါမဲ့ မိုးရက်ရှည် ရွာသွန်းမှုကြောင့် ချောင်းရေလျှံခြင်းနှင့် သီးနှံစိုက်ခင်း ပျက်စီးခြင်းများ ကြုံတွေ့လာရပြီး ၂၀၁၇ – ၂၀၁၈ ခုနှစ်ကာလတွင် သဘာဝဘေးကြောင့် စိုက်ပျိုးဧက ၅၀၀၀၀ ကျော် ထိခိုက်ခဲ့ကြောင်း သိရသည်။

 

ကြက်သွန်စိုက်တောင်သူများ ဈေးထိန်းရောင်းချသဖြင့် မန္တလေးကြက်သွန်နီ ဈေးကွက်တွင် တစ်ပတ်အတွင်း တစ်ပိဿာလျှင် ကျပ် ၅၀၀ ကျော် ဈေးမြင့်တက်

ကြက်သွန်ပွဲရုံတစ်ခု လုပ်ငန်းခွင်ကို တွေ့ရစဉ်

ယခုနှစ်တွင် ကြက်သွန်စိုက် တောင်သူများ အနေဖြင့် လှောင်စနစ် ပြုလုပ်ကာ ဈေး ထိန်းရောင်းချသွားသဖြင့်  မန္တလေးမြို့တွင် လက်ရှိကြက်သွန်နီဈေးနှုန်းမှာ တစ်ပတ်အ တွင်း ကျပ် ၅၀၀ ကျော် ဈေးမြင့်တက်နေ ကြောင်း  မန္တလေးမြို့ ကြက်သွန်ကုန်သည်များထံမှ သိရသည်။

လက်ရှိတွင် ကြက်သွန်နီ တစ်ပိဿာလျှင် ထိပ်စ ကျပ် ၁၃၀၀၊ အလတ်စ ကျပ် ၁၁၀၀၊ အောက်စ ကျပ် ၉၀၀ နှင့် တောဈေး ကျပ် ၁၀၀၀ ထိ ရောက်ရှိနေကြောင်း၊ ယခင်နှစ်က လက်ရှိအချိန်တွင် ကြက်သွန်နီတစ်ပိဿာ လျှင် အမြင့်ဆုံး ကျပ် ၂၀၀၀ ခန့်အထိသာ ရောက်ရှိခဲ့ကြောင်း စားဖိုချောင်သီးနှံစိုက်ပျိုး ထုတ်လုပ်ရောင်းချသူများ အသင်းမှ အတွင်းရေးမှူး ဦးဝင်းမြင့်က ပြောကြားသည်။

“မန္တလေး ဈေးကွက်မှာ ထိပ်စ ၁၂၀၀ ၁၃၀၀ ရှိတယ်။ တက်သွားရတဲ့ အကြောင်းက ဧပြီလကစပြီး ကြက်သွန်ဈေးက ကြမ်းခင်းဈေး ၅၀၀ ဖြစ်သွားလိုက်တော့ တောင်သူတွေက သူတို့စိုက်စရိတ်တွေနဲ့ ရှုံးပြီး  အပုပ်အနာအဆာများတဲ့ တောင်သူ၊ စရိတ်မရှိတဲ့တောင်သူ၊ အကြွေးဆပ်ရမည့် တောင်သူတွေက အရမ်းရောင်းပစ်လိုက်တယ်။ အဲဒီအချိန်တုန်းကပေါ့။  ဘယ်လိုဖြစ်လဲဆိုတော့ တချို့တောင်သူကျတော့ ကုန်သည်ကြီးတွေ စကား အသံနားထောင်ပြီး ရောင်းကြတယ်။ ဒီဘက်က ကြက်သွန်ကုန်သည် ပွဲစားတွေကျတော့ ဈေးက အရမ်းပေါနေတော့ ဈေးကွက်မှာ ကြက်သွန် အကျိုးအမြတ် မရှိပေမဲ့ ကိုယ်အလုပ်သမားတွေ အလုပ်အကိုင် အဆင်ပြေရေးအတွက် တစ်ပိဿာ တစ်ဆယ်မြတ်မြတ် ငါးကျပ်မြတ်မြတ်ဆိုပြီး တိုင်းသုံးတိုင်းက ကုန်သည်အများစုက တရုတ်ဘက်ကို နယ်စပ်ကုန်သွယ်ရေး ကနေတစ်ဆင့် ဈေးမရဘဲနဲ့ ဧပြီကနေ သြဂုတ်အထိ ဖြစ်သလို ရောင်းချရတယ်။ ဖြစ်သလို ရောင်းချတော့ ကုန်မထိန်းသိမ်းနိုင်ဘဲနဲ့ တရုတ်ဘက် စီးဆင်းမှုအား ပိုများသွားတာပေါ့။ ပိုများတဲ့ အခါကျတော့ တောင်သူက သူတို့လက်ကျန် ကြက်သွန်ကို ထိန်းနိုင်သွားတယ်။  စိုက်စရိတ် ဘဏ်အကြွေးတွေ ဆပ်တဲ့သူတွေကလည်း ရောင်းချဆပ်ပစ်လိုက်တဲ့ အခါကျတော့ တောင်သူဘက်က ကုန်ပစ္စည်းအပေါ် တောင့်ခံနိုင်တဲ့ဘက် ပြန်ရောက်သွားတယ်” ဟု စားဖိုချောင်သီးနှံ စိုက်ပျိုးထုတ်လုပ် ရောင်းချသူများအသင်းမှ အတွင်းရေးမှူး ဦးဝင်းမြင့်က ပြောကြားသည်။

“ဒီနှစ် ကုန်သည်တွေက ကြက်သွန်ကို ကြောက်ပြီး မလှောင်ရဲကြဘဲ တောင်သူလက်ထဲမှာပဲ ကြက်သွန်က ထိန်းသိမ်းထားခဲ့ပြီးတော့ အကျိုးအမြတ် အရမ်းနစ်နာနေတဲ့ အခါကျတော့ သူတို့လည်း တစ်ဆယ်ပိုရရ ဆုပ်ကိုင်ထားတဲ့ အခါကျတော့ သြဂုတ်လနောက် ပိုင်းကနေ စပြီးတော့ ၀ယ်လိုအား မြင့်တက်လာပြီးတော့ နယ်စုံမှာ ရောင်းစရာမရှိဘူး ဖြစ်သွားတယ်။ တောင်သူက ထိန်းပြီး ရောင်းတော့ ၅၀၀ ကနေ တောက်လျှောက် ကုန်သည် လိုက်ဝယ်ရာကနေ တောင်သူက ၁၀၀၀ ကျမှ ပြန်ထွက်လာတယ်။ အဲလိုဖြစ်သွားတဲ့ ပြဿနာ ကလည်း ကုန်သည်တွေက ဒီနှစ် ကြက်သွန် လှောင်မထားတဲ့အတွက် ဖြစ်သွားတာ လှောင်ထားရင် တောင်သူ ၅၀၀ ကနေ ၆၀၀၊ ၇၀၀ ဈေးခေါ်တောင် ကိုယ်ဆီမှာရှိရင် မ၀ယ်ဘဲနဲ့ ထုတ်ရောင်းပေးလို့ရတယ်။ ဒီနှစ်ကျတော့ လှောင်ထားတာ ကိုယ်ဂိုဒေါင်ထဲ မရှိတော့ မန္တလေး ရန်ကုန်လို မြို့ကြီးတွေမှာ တစ်နေ့ တစ်နေ့ ငါးသောင်းနဲ့ တစ်သိန်းကြား ရောင်းချနေရတော့ ကုန်က နေ့စဉ်မ၀င်နိုင်တော့  တောင်သူခေါ်တဲ့ ဈေးလိုက်ဝယ်ရတော့ ဒီအပတ် ၁၀ ရက်အတွင်း မှာ တစ်ပိဿာ ၅၀၀ လောက် တက်သွားတယ်။ တောဈေးက တစ်ပိဿာ တစ်ထောင်ပေါ့။ မန္တလေး၊ ရန်ကုန်မြို့ကြီးတွေ ဈေးကထိပ်စ ၁၂၀၀၊ ၁၃၀၀ လောက် ဖြစ်သွားတယ်” ဟု စားဖိုချောင်သီးနှံ စိုက်ပျိုးထုတ်လုပ် ရောင်းချသူများ အသင်းမှ အတွင်းရေးမှူး ဦးဝင်းမြင့်က ဆက်လက်ပြောကြားသည်။

ပြည်တွင်းကြက်သွန်နီဈေး မြင့်နေချိန်တွင် မြန်မာနိုင်ငံသို့ တရုတ်ကြက်သွန်များ နေ့စဉ်ဝင်ရောက်လျက်ရှိပြီး  ဈေးနှုန်းချိုသာစွာ ရောင်းချနေသော်လည်း ပြည်တွင်း ကြက်သွန်နီထက် အရည်အသွေး မမီသည့်အတွက်  ဈေးနှုန်းချိုသာသော်လည်း ဈေးကွက်တွင် နေရာမရရှိကြောင်း  မန္တလေးမြို့ ကြက်သွန်ကုန်သည်များက ပြောကြားသည်။

ကြက်သွန်နီကို မကွေးတိုင်း၊ မန္တလေးတိုင်း၊ စစ်ကိုင်းတိုင်းတို့တွင် အဓိကထား အများဆုံး စိုက်ပျိုးကြပြီး လာမည့် နိုဝင်ဘာလခန့်တွင် ကျောက်ဆည် မြစ်သား၊ နွားထိုးကြီးမှ ကြက်သွန်ပေါ်မည် ဖြစ်ကြောင်း သိရသည်။

 

မြန်မာနိုင်ငံမှ ပဲမျိုးစုံကို အိန္ဒိယက အထူးသီးသန့်လိုင်စင်ဖြင့် ဆက်ဝယ်နေသည့်အပြင် ဘင်္ဂလားဒေ့ရှ်၊ ပါကစ္စတန်နှင့် နီပေါတို့မှ အ၀ယ်လိုက်သဖြင့် မတ်ပဲတစ်တန်လျှင် ကျပ်ငါးသောင်းနီးပါး ဈေးမြင့်တက်

ပခုက္ကူမြို့နယ်ရှိ ပဲစင်းငုံစိုက်ခင်းကို တွေ့ရစဉ်(ဓာတ်ပုံ-သက်ထိန်ဝင်း)

မြန်မာနိုင်ငံမှ ပဲမျိုးစုံကို အိန္ဒိယနိုင်ငံက အထူးသီးသန့်လိုင်စင်ဖြင့် ဆက်လက် ၀ယ်ယူလျက် ရှိသည့်အပြင် ဘင်္ဂလားဒေ့ရှ်၊ ပါကစ္စတန်နှင့် နီပေါနိုင်ငံတို့မှ အ၀ယ်လိုက်လာနေပြီး ပြည်တွင်းဈေးကွက်၌လည်း မတ်ပဲဈေးမှာ သြဂုတ်လအတွင်း ဖြစ်ပေါ်ခဲ့သည့် ဈေးထက် ကျပ်ငါးသောင်းနီးပါး ဈေးတက်လာကြောင်း မြန်မာနိုင်ငံပဲမျိုးစုံနှင့် နှမ်းကုန်သည်များ အသင်းမှ သိရသည်။

“အဓိကက ဇွန်လပိုင်းမှာ ထွက်လိုက်တဲ့ အမိန့်ကြော်ငြာစာမှာတော့ မတ်ပဲတန်ချိန် တစ်သိန်းခွဲ၊ ပဲတီစိမ်းတန်ချိန် တစ်သိန်းခွဲ၊ ပဲ စင်းငုံက တန်ချိန်နှစ်သိန်းကို သြဂုတ်လကုန်ပိုင်း နောက်ဆုံးထားပြီး ပစ္စည်းပို့ရမယ်ဆိုပြီး စာထွက်တယ်။ မတ်ပဲက ဇွန်လပိုင်းလလယ်ကနေ သြဂုတ်လပိုင်းလောက် အထိမှာ တန်ချိန်တစ်သိန်းခွဲနီးပါး တင်ပြီးသွားပြီ။ တင်ပြီးတဲ့အချိန်မှာ စက်တင်ဘာလပိုင်း လဆန်းမှာ ဘာထပ်ထွက်လာလဲဆိုတော့ သူတို့ခွဲခြမ်း စက်ရုံတွေကို သီးသန့်လိုင်စင်အနေနဲ့ ထုတ်ပေးတဲ့ ၀ယ်ယူခွင့် ထွက်လာတာ တွေ့ရတယ်။ စက်တင်ဘာလပိုင်း ထဲမှာလည်း မတ်ပဲက ဆက်ဝယ်တဲ့အခါ သြဂုတ်လပိုင်းဈေးထက် အခုချိန်မှာ ပိုရတယ်” ဟု မြန်မာနိုင်ငံ ပဲမျိုးစုံနှင့် နှမ်းကုန်သည်များ အသင်းမှ အတွင်းရေးမှူး ဦးမင်းကိုဦးက ပြောကြားသည်။

“လက်ရှိမှာ မတ်ပဲက FAQ တစ်တန် ကိုငါးသိန်းလောက်သွားတယ်။ သြဂုတ်လပိုင်းမှာ လေးသိန်း၊ လေးသိန်းခွဲပ တ်လည်ပဲ ရှိတယ်။ ပဲစင်းငုံလည်း ထို့အတူပါပဲ။ လေးသိန်းရှစ်သောင်း လောက်ရှိတယ်။ သြဂုတ်လပိုင်းတုန်းက လေးသိန်းငါးသောင်း လောက်ပဲရှိတယ်။ ပြောရရင်တော့ အိန္ဒိယဘက်က တန်ချိန်နှစ်သောင်း၊ တန်ချိန်တစ်သောင်းခွဲ စသည့်ဖြင့် သီးသန့်လိုင်စင်လေးတွေ ထွက်လာတဲ့ အခါကျတော့  သူတို့က ဆက်ဝယ်တာလည်းပါတယ်။ ဘင်္ဂလားဒေ့ရှ်၊ ပါကစ္စတန်၊ နီပေါတို့ကလည်း အထိုက်အလျောက် ၀ယ်လာတယ်။ အ၀ယ်များလာတော့ ပြည်တွင်းဈေးလည်း အထိုက်အလျောက် ပြန်တက်လာတယ်” ဟု ၎င်းကဆိုသည်။

၂၀၁၈ ခုနှစ် ဧပြီလဆန်းတွင် အိန္ဒိယနိုင်ငံက ပဲ Quota ပြန်လည်သတ်မှတ်ခြင်း မပြုသည့်အတွက် ဧပြီလတွင် ကျပ် ၄၅၆၀၀၀၊ မေလတွင် ကျပ် ၃၈၂၀၀၀ အထိ ကျဆင်းခဲ့ပြီး မေ ၄ ရက်တွင် အိန္ဒိယနိုင်ငံ၏ ပဲတင်သွင်းခွင့် Quota ကို မတ်ပဲ၊ ပဲတီစိမ်းတန်ချိန်သုံး သိန်းတင်သွင်းရန် ကြေညာလိုက်သည့်အတွက် မတ်ပဲဈေး အနည်းငယ် ပြန်တက်လာရာ ၂၀၁၈ ခုနှစ် ဇွန်လလယ်တွင် ပဲဈေး ငါးသိန်းကျော်အထိ ပြန်တက်လာခဲ့သည်။

၂၀၁၈ခုနှစ် စက်တင်ဘာ ၇ ရက်တွင် မတ်ပဲ FAQ ကျပ် ၄၅၅၅၀၀၊ မတ်ပဲ SQ ကျပ် ၆၂၃၀၀၀ အထိ ဈေးရှိခဲ့သည်။ စက်တင်ဘာ ၁၀ ရက်က မတ်ပဲ FAQ ကျပ် ၅၀၃၅၀၀၊ မတ်ပဲ SQ ကျပ် ၆၇၆၀၀၀ ဈေးရှိခဲ့ရာမှ စက်တင်ဘာ ၁၈ ရက်တွင် မတ်ပဲ FAQ ကျပ် ၅၀၀၀၀၀၊ မတ်ပဲ SQ ကျပ် ၆၇၉၀၀၀ အထိ ဈေးရှိခဲ့ကြောင်း ဘုရင့်နောင် ကုန်စည်ဒိုင်မှ ထုတ်ပြန်ချက်များအရ သိရသည်။ စက်တင်ဘာ ၂၁ ရက်က မတ်ပဲ FAQ ကျပ် ၄၉၉၅၀၀၊ မတ်ပဲ SQ ကျပ် ၆၆၆၀၀၀ အထိ ဈေးတက်လာခဲ့သည်။

မြန်မာနိုင်ငံတွင် ပဲမျိုးစုံ သီးနှံစိုက်ပျိုး ထုတ်လုပ်မှုသည် စုစုပေါင်း စိုက်ပျိုးသီးနှံ ထုတ်လုပ်မှု၏ ၂၁ ရာခိုင်နှုန်းခန့် စိုက်ပျိုးလျက်ရှိသည်။ မြန်မာနိုင်ငံသည် အာရှတွင် ပဲအများဆုံး တင်ပို့သည့် နိုင်ငံဖြစ်ပြီး ကမ္ဘာပေါ်တွင် ကနေဒါပြီးလျှင် ပဲအများဆုံး တင်ပို့သည့် နိုင်ငံဖြစ်သည်။

 

စက်သုံးဆီဈေး သုံးလခွဲကျော်အတွင်း ၁၆ ရာခိုင်နှုန်းကျော်အထိ မြင့်တက်ခဲ့ပြီး တစ်လီတာ စံချိန်တင်ဈေးနှုန်းများ အဖြစ် 92 Ron ၁၀၂၅ ကျပ်၊ 95 Ron ၁၀၇၅ ကျပ်၊ ဒီဇယ် ၁၀၅၅ ကျပ်၊ ပရီမီယံဒီဇယ် ၁၀၆၅ ကျပ်အထိ မြင့်တက်

ဒေါ်လာဈေးခုန်တက်ခြင်းကြောင့် စက်သုံးဆီဈေးနှုန်း သုံးလခွဲကျော်ကာလအတွင်း ၁၆ ရာခိုင်နှုန်းကျော်အထိ မြင့်တက်ခဲ့ပြီး တစ်လီတာစံချိန်တင် ဈေးနှုန်းများအနေဖြင့် 92 Ron ၁၀၂၅ ကျပ်၊ 95 Ron ၁၀၇၅ ကျပ်၊ ဒီဇယ် ၁၀၅၅ ကျပ်၊ ပရီမီယံဒီဇယ် ၁၀၆၅ ကျပ် အထိဆက်လက်မြင့်တက်ခဲ့ကြောင်း စက်သုံးဆီအရောင်းဆိုင်များထံမှ သိရသည်။

ပြည်တွင်းဈေးကွက်တွင် ၂၀၁၈ ခုနှစ် စက်တင်ဘာ ၂၁ ရက်တွင် မြန်မာနိုင်ငံစက်သုံးဆီ တင်သွင်းရောင်းချဖြန့်ဖြူးရေးအသင်းမှ အမြင့်ဆုံးနှုန်းအဖြစ်သတ်မှတ်ထားသော စက်သုံးဆီလက်လီဈေးများမှာ ဒီဇယ်တစ်လီတာ ကျပ် ၁၀၅၅ (တစ်ဂါလန် ၄၇၈၉ ကျပ်) ပရီမီယံဒီဇယ်တစ်လီတာ ကျပ် ၁၀၆၅ (တစ်ဂါလန် ၄၈၃၅ ကျပ်)၊ အောက်တိန်း 92 Ron တစ်လီတာ ကျပ် ၁၀၂၅ (တစ်ဂါလန် ၄၆၅၃ ကျပ်) အောက်တိန်း 95 Ron တစ်လီတာ ၁၀၇၅ ကျပ် (တစ်ဂါလန် ၄၈၈၀ ကျပ်) ဖြစ် သည်။ ပြီးခဲ့သည့် ဇွန် ၃ ရက်တွင် ဖြစ်ပေါ် သော ဈေးနှုန်းများနှင့်နှိုင်းယှဉ်ပါက သုံးလခွဲ ကျော် အတွင်း ဒီဇယ် ၁၅ ဒသမ ၉၃ ရာခိုင်နှုန်း၊ ပရီ မီယံဒီဇယ် ၁၅ ဒသမ ၁၃ ရာ ခိုင်နှုန်း၊ 92 Ron ၁၆ ဒသမ ၄၇ ရာခိုင်နှုန်း၊ 95 Ron ၁၅ ဒသမ ၅၉ ရာခိုင်နှုန်းဈေးမြင့်တက်ခဲ့ ခြင်းဖြစ်သည်။

နိုင်ငံခြားငွေလဲနှုန်းသည် ဇွန်လမှစတင်၍ သိသိသာသာမြင့်တက်ခဲ့ပြီး ဇွန် ၁၁ ရက် တွင် ၁၃၄၆ ကျပ်ဝန်းကျင်ဖြစ်ပေါ်နေသော ဒေါ်လာဈေးသည် စက်တင်ဘာ ၂၀ ရက်တွင် ကျပ် ၁၆၅၀ အထိ စံချိန်တင်မြင့်တက်ခဲ့သည်။

ပြည်တွင်းဈေးကွက်အတွင်း ရောင်းချလျက်ရှိသော စက်သုံးဆီဈေးနှုန်းသည် ကမ္ဘာ့စက်သုံးဆီဈေးနှုန်း၊ နိုင်ငံခြားငွေလဲနှုန်းနှင့် သယ်ယူပို့ဆောင်ရေးစရိတ်အပေါ် အခြေခံပြီး ဈေးနှုန်းအပြောင်းအလဲ ဖြစ်ပေါ်ခြင်းဖြစ် သည်ဟု စက်သုံးဆီတင်သွင်းနေသည့် လုပ်ငန်းရှင်များက ဆိုသည်။ ပြီးခဲ့သည့် သြဂုတ် ၂၀ ရက်ဈေးနှင့်နှိုင်းယှဉ်ပါက ကမ္ဘာ့ရေနံဈေးသည် ကိုးရာခိုင်နှုန်းကျော်မြင့်တက်ခဲ့ပြီး ဒေါ်လာဈေးသည် သုံးလကျော်အတွင်း ၂၂ ရာခိုင်နှုန်းကျော် မြင့်တက်ခဲ့သည်။

မြန်မာနိုင်ငံ စက်သုံးဆီ တင်သွင်းရောင်းချဖြန့်ဖြူးရေးအသင်းမှ ထုတ်ပြန်ထားသော စက်တင်ဘာ ၂၀ ရက်တွင် ပြည်ပမှဝယ်ယူရသည့် စက်သုံးဈေးနှုန်း (တစ်စည်) MOPS Price  များမှာ 92 Ron ၈၈ ဒသမ ၁၇ ဒေါ်လာ၊ 95 Ron ၉၀ ဒသမ ၂၇  ဒေါ်လာ၊ ဒီဇယ် ၉၃ ဒသမ ၀၄ ဒေါ်လာ၊ ပရီမီယံဒီဇယ် ၉၄ ဒသမ ၁၈  ဒေါ်လာတို့ဖြစ်သည်။

ပြည်တွင်းဈေးကွက်တွင် စက်သုံးဆီ လက်လီဈေးများမှာ  ၂၀၁၈ ခုနှစ် စက်တင်ဘာ ၂၁ ရက်ဈေးနှုန်းနှိုင်းယှဉ်ပါက လပေါင်း ၃၀ ၀န်းကျင်အတွင်း ဒီဇယ် ၁၁၁  ရာခိုင်နှုန်း၊ ပရီမီယံဒီဇယ် ၉၇ ရာခိုင်နှုန်း၊ 92 Ron ၈၆ ရာခိုင်နှုန်း၊ 95 Ron ၆၅ ရာခိုင်နှုန်း ဈေးနှုန်းမြင့်တက်ခဲ့ကြောင်း သိရသည်။

 

ကမ္ဘာ့ဒေါ်လာဈေး အညွှန်းကိန်း ၉၄ ပွိုင့်အောက်ကျပြီး နိုင်ငံခြားငွေလဲနှုန်း တစ်ဒေါ်လာ ၁၆၃၅ ကျပ်အထိပြန်တက်

စက်တင်ဘာ ၂၁ ရက်တွင် ကမ္ဘာ့ဒေါ်လာဈေးအညွှန်းကိန်း ၉၄ ပွိုင့်အောက်ကျခဲ့ပြီး ပြည်တွင်းဈေးကွက်တွင် နိုင်ငံခြားငွေ လဲနှုန်း တစ်ဒေါ်လာ ၁၆၃၅ ကျပ်အထိပြန် လည်မြင့်တက်ခဲ့ကြောင်း နိုင်ငံခြားငွေကြေး ရောင်းဝယ်သူများထံမှ သိရသည်။

မြန်မာကျပ်ငွေတန်ဖိုးသည်  ဒေါ်လာဈေးမြင့်တက်မှုနှင့်အတူ ထိုင်းဘတ်၊ တရုတ်ယွမ်နှင့် စင်ကာပူဒေါ်လာ စသည့်ငွေကြေးများနှင့်နှိုင်းယှဉ်ပါက သိသိသာသာ ဆက်လက်အားပျော့နေသည်။

ပြည်တွင်းဈေးကွက်တွင် နိုင်ငံခြားငွေလဲနှုန်း ဇွန်လမှစတင်ကာ သိသိသာသာမြင့်တက်ခဲ့ရာ၂၀၁၆ ခုနှစ် ဒီဇင်ဘာ ၁၆ ရက်တွင် ဖြစ်ပေါ်ခဲ့သည့် တစ်ဒေါ်လာ ၁၄၃၈ ကျပ်စံ ချိန်ကို ဇူလိုင် ၃၀ ရက်တွင် ကျပ် ၁၄၄၀  ဖြင့် ချိုးခဲ့ပြီး သြဂုတ် ၁၆ ရက်တွင် ကျပ် ၁၅၇၀  ဖြင့် စံချိန်တင်ထားကာ စက်တင်ဘာ ၁၈ ရက်တွင် ၁၅၈၅ ကျပ်၊ စက်တင်ဘာ ၁၉ ရက်တွင်  ၁၆၂၂ ကျပ်၊ စက်တင်ဘာ ၂၀ ရက်တွင် ကျပ် ၁၆၅၀ ဖြင့် အမြင့်ဆုံးစံချိန် ထပ်တင်ခဲ့သည်။ ဒေါ်လာဈေးသည် သြဂုတ် ၂၀ ရက်တွင် ကျပ် ၁၄၈၀ အထိကျဆင်းခဲ့သော်လည်း သြဂုတ် ၂၈ ရက် တွင် ကျပ် ၁၅၆၀၊ စက်တင်ဘာ ၁၂ ရက်တွင် ကျပ် ၁၅၇၀၊ ကျပ်၊ စက်တင်ဘာ ၁၉ ရက်တွင် ၁၆၂၂ကျပ်၊ စက်တင်ဘာ ၂၀ ရက်တွင် ကျပ် ၁၆၅၀ အထိဆက်တက်ခဲ့ပြီး စက်တင်ဘာ ၂၁ ရက်တွင် ၁၆၃၅ ကျပ်ဝန်းကျင် ဖြစ်ခဲ့သည်။ ၂၀၁၈ ခုနှစ် ဇွန် ၁၁ ရက်တွင် ဖြစ်ပေါ်သော တစ်ဒေါ်လာ ၁၃၄၆ ကျပ်နှင့် စက်တင်ဘာ ၂၀ ရက်တွင်ဖြစ်ပေါ်သော တစ်ဒေါ်လာ  ကျပ် ၁၆၅၀ နှင့်နှိုင်းယှဉ်ပါက သုံးလကျော်အတွင်း ၃၀၄ ကျပ်၊ ၂၂ ရာခိုင်နှုန်းကျော် ကျပ်ငွေတန်ဖိုး ကျဆင်းခဲ့သည်။

၂၀၁၈ ခုနှစ် မေလမှစတင်ကာ ကမ္ဘာ့ဒေါ်လာဈေး အညွှန်းကိန်း သိသိသာသာ ပြန်လည်မြင့်တက်ခဲ့ခြင်းဖြစ်ပြီး  ပြည်တွင်းဈေးကွက်၌ ငါးလအတွင်း လအလိုက်ဖြစ်ပေါ်သော နိုင်ငံခြားငွေလဲနှုန်းအနိမ့်ဆုံးနှင့် အမြင့်ဆုံးနှုန်းများမှာ ဧပြီတွင် ၁၃၂၄-၁၃၃၂ ကျပ်၊ မေတွင် ၁၃၃၂-၁၃၅၁ ကျပ်၊  သြဂုတ်တွင် ၁၄၄၂-၁၅၇၀ တို့ဖြစ်ပြီး သြဂုတ်လတွင် ကွာဟချက်အများဆုံးဖြစ်ခဲ့သည်။ စက်တင်ဘာ ၂၁  ရက်တွင် ဗဟိုဘဏ်ရည်ညွှန်း ငွေလဲနှုန်းမှာ တစ်ဒေါ်လာ ကျပ် ၁၅၉၇ ဖြစ်သည်။

 

ကမ္ဘာ့ဒေါ်လာဈေး ကျသော်လည်း ပြည်တွင်းဈေးကွက်တွင် တစ်ဒေါ်လာ ၁၅၇၇ ကျပ်အထိ စံချိန်တင်ဆက်လက် မြင့်တက်

စက်တင်ဘာ ၁၈ ရက်တွင် ကမ္ဘာ့ဒေါ်လာဈေးအညွှန်းကိန်း ၉၄ ပွိုင့်အောက် ကျဆင်းခဲ့သော်လည်း ပြည်တွင်းဈေးကွက်တွင် နိုင်ငံခြားငွေလဲနှုန်း တစ်ဒေါ်လာ ၁၅၇၇ ကျပ် အထိစံချိန်တင် ဆက်လက်မြင့်တက်ခဲ့ကြောင်း နိုင်ငံခြားငွေကြေးရောင်းဝယ်သူများထံမှ သိရသည်။

မြန်မာကျပ်ငွေတန်ဖိုးသည်  ဒေါ်လာဈေး မြင့်တက်မှုနှင့်အတူ ထိုင်းဘတ်၊ တရုတ်ယွမ်နှင့် စင်ကာပူဒေါ်လာ စသည့်ငွေကြေးများနှင့် နှိုင်းယှဉ်ပါက ဆက်လက်အားပျော့နေဆဲ ဖြစ်သည်။

ပြီးခဲ့သည့် ငါးလအတွင်း အမြင့်ဆုံး ဖြစ်ပေါ်ခဲ့သော ကမ္ဘာ့ဒေါ်လာဈေးအညွှန်းကိန်းများမှာ မတ်တွင် ၉၀ ဒသမ ၃၇ ပွိုင့်၊ ဧပြီတွင်  ၉၁ ဒသမ ၇၁ ပွိုင့်၊ မေတွင် ၉၄ ဒသ မ ၈၃ ပွိုင့်၊ ဇွန်တွင် ၉၅ ဒသမ ၂၁ ပွိုင့်ဖြစ်ပြီး ဇူလိုင်တွင် ၉၅ ဒသမ ၃၉ ပွိုင့်၊ သြဂုတ်တွင် ၉၆ ဒသမ ၈၅ ပွိုင့်ဝန်းကျင် ဖြစ်ပေါ်ခဲ့ကာ စက်တင်ဘာ ၁၇ ရက်တွင် ၉၅ အောက်၊ စက်တင်ဘာ ၁၈ ရက်တွင် ၉၄ ပွိုင့်အောက် ကျဆင်းခဲ့သည်။

ပြည်တွင်းဈေးကွက်တွင် နိုင်ငံခြားငွေလဲနှုန်း ဇွန်လမှစတင်ကာ သိသိသာသာမြင့်တက်ခဲ့ရာ၂၀၁၆ ခုနှစ် ဒီဇင်ဘာ ၁၆ ရက်တွင် ဖြစ်ပေါ်ခဲ့သည့် တစ်ဒေါ်လာ ၁၄၃၈ ကျပ်စံ ချိန်ကို ဇူလိုင် ၃၀ ရက်တွင် ကျပ် ၁၄၄၀ ဖြင့် ချိုးခဲ့ပြီး သြဂုတ် ၁၆ ရက်တွင် ကျပ် ၁၅၇၀  ဖြင့် စံချိန်တင်ထားကာ စက်တင်ဘာ ၁၈ ရက်တွင် ၁၅၇၇ ဖြင့် အမြင့်ဆုံး စံချိန်ထပ်တင်ခဲ့သည်။ ဒေါ်လာဈေးသည် သြဂုတ် ၂၀ ရက်တွင် ကျပ် ၁၄၈၀ အထိကျဆင်းခဲ့သော်လည်း သြဂုတ် ၂၈ ရက် တွင် ကျပ် ၁၅၆၀ အထိ ပြန်တက်ခဲ့ကာ စက်တင်ဘာ ၁၂ ရက်တွင် ကျပ် ၁၅၇၀၊ စက်တင်ဘာ ၁၈ ရက်တွင် ၁၅၇၇ ကျပ်အထိ ပြန်လည်မြင့်တက်ခဲ့ခြင်း ဖြစ်သည်။ ၂၀၁၈ ခုနှစ် ဇွန် ၁၁ ရက်တွင် ဖြစ်ပေါ်သော တစ်ဒေါ် လာ ၁၃၄၆ ကျပ်နှင့် စက်တင်ဘာ ၁၈ ရက်တွင်ဖြစ်ပေါ်သော တစ်ဒေါ်လာ ၁၅၇၇ ကျပ်နှင့်နှိုင်းယှဉ်ပါက သုံးလကျော်အတွင်း ၂၃၁ ကျပ်၊ ၁၇ ရာခိုင်နှုန်းကျော်အထိ ကျပ်ငွေတန်ဖိုး ကျဆင်းခဲ့သည်။

၂၀၁၈ ခုနှစ် မေလမှစတင်ကာ ကမ္ဘာ့ ဒေါ်လာဈေးအညွှန်းကိန်း သိသိသာသာ ပြန်လည်မြင့်တက်ခဲ့ခြင်းဖြစ်ပြီး  ပြည်တွင်းဈေးကွက်၌ ငါးလအတွင်း လအလိုက်ဖြစ်ပေါ်သော နိုင်ငံခြားငွေလဲနှုန်းအနိမ့်ဆုံးနှင့် အမြင့်ဆုံးနှုန်းများမှာ ဧပြီတွင် ၁၃၂၄-၁၃၃၂ ကျပ်၊ မေတွင် ၁၃၃၂-၁၃၅၁ ကျပ်၊ ဇွန်တွင် ၁၃၄၅-၁၄၀၇၊ ဇူလိုင်တွင် ၁၃၈၄-၁၄၄၃၊ သြဂုတ်တွင် ၁၄၄၂-၁၅၇၀ တို့ဖြစ်ပြီး သြဂုတ်လတွင် ကွာဟချက်အများဆုံး ဖြစ်ခဲ့သည်။ စက်တင်ဘာ ၁၈ ရက်တွင် ဗဟိုဘဏ်ရည်ညွှန်း ငွေလဲနှုန်းမှာ တစ်ဒေါ်လာ ကျပ် ၁၅၅၀ ဖြစ်ပြီး စက်တင်ဘာ ၁၇ ရက်ဈေးနှုန်းထက် ကျပ် ၁၀ မြှင့်တင်ခဲ့သည်။

ပြည်တွင်းဈေးကွက်အတွင်း စက်တင်ဘာ ၁၈ ရက်တွင်ဖြစ်ပေါ်သော အခြားနိုင်ငံခြားငွေကြေးများ၏ လဲလှယ်မှုနှုန်းထားများမှာ ယူရို ၁၈၂၀ ကျပ်၊ စင်ကာပူဒေါ်လာ ၁၁၃၇ ကျပ်၊ မလေးရှားရင်းဂစ် ၃၇၅ ကျပ်၊ ထိုင်းဘတ် ၄၈ ဒသမ ၃၀ ကျပ်၊ တရုတ်ယွမ် ၂၂၈ ကျပ်၊ ဂျပန်ယန်း ၁၃ ဒသမ ၉၀ ကျပ်၊ တောင်ကိုရီးယား ၀မ် ၁ ဒသမ ၄၈ ကျပ် ဖြစ်သည်။

ကမ္ဘာ့ရွှေဈေး ဒေါ်လာ ၁၂၀၀ အောက်ဆက်ရှိပြီး ဒေါ်လာဈေးမြင့်မားမှုကြောင့် ပြည်တွင်းရွှေဈေးနှုန်း စံချိန်သစ်အဖြစ် ကျပ် ၁၀၀၅၅၀၀ အထိဆက်လက်မြင့်တက်

ကမ္ဘာ့ရွှေဈေးသည် စက်တင်ဘာ ၁၈ ရက်တွင် ၁၁၉၉ ဒေါ်လာဝန်းကျင် ဖြစ်ပေါ်ခဲ့ပြီး ဒေါ်လာဈေးမြင့်မားမှုကြောင့် ပြည်တွင်းရွှေဈေးနှုန်း ကျပ် ၁၀၀၅၅၀၀ အထိ စံချိန်တင် ဆက်လက်မြင့်တက်ခဲ့ကြောင်း သိရသည်။

ပြည်တွင်းရွှေဈေးသည် ပြီးခဲ့သည့် ၂၀၁၇ ဇူလိုင် ၂၁ ရက်မှ စတင်ကာ ကျပ် ၉၀၀၀၀၀ အထက်ရောက်ခဲ့ပြီး ကမ္ဘာ့ရွှေဈေး မြင့်တက်မှုနှင့်အတူ စံချိန်တင်ဈေးနှုန်းများအဖြစ်  သြဂုတ်လအတွင်းနှင့် စက်တင်ဘာလလယ်အထိ ဆက်တိုက်မြင့်တက်ခဲ့သည်။ ၂၀၁၇ ခုနှစ် စက်တင်ဘာ ၁၅ ရက်တွင် ၉၅၇၈၀၀ ဖြင့် စံချိန်တင်ထားကာ ၂၀၁၈ ခုနှစ် သြဂုတ် ၂၃ ရက်တွင် ကျပ် ၉၅၈၉၀၀၊ သြဂုတ် ၂၄ ရက်တွင်  ကျပ် ၉၆၁၃၀၀၊ သြဂုတ် ၂၅ ရက်တွင် ကျပ် ၉၆၃၅၀၀၊ သြဂုတ် ၂၆ ရက်တွင် ကျပ် ၉၆၄၅၀၀၊ သြဂုတ် ၂၇ ရက်တွင် ကျပ် ၉၆၉၄၀၀၊ သြဂုတ် ၂၈ ရက်တွင် ၉၈၅၀၀၀ ဖြင့် ခြောက်ရက်ဆက် တိုက်စံချိန်ချိုးခဲ့သည်။ သြဂုတ် ၃၀ ရက်တွင် ကျပ် ၉၆၉၀၀၀ အထိ ပြန်လည်ကျဆင်းခဲ့ပြီး  စက်တင်ဘာ ၁၀ ရက်တွင် ကျပ် ၉၈၉၂၀၀၊ စက်တင်ဘာ ၁၁ ရက်တွင် ကျပ် ၉၉၁၇၀၀၊ စက်တင်ဘာ ၁၂ ရက်တွင် ကျပ် ၉၉၃၂၀၀၊ စက်တင်ဘာ ၁၃ ရက်တွင် ကျပ် ၉၉၆၂၀၀၊ စက်တင်ဘာ ၁၇ ရက်တွင် ကျပ် ၉၉၈၅၀၀၊ စက်တင်ဘာ ၁၈ ရက်တွင် ကျပ် ၁၀၀၅၅၀၀ ဖြင့် အမြင့်ဆုံးစံချိန်ထပ်တင်ခဲ့သည်။

ပြီးခဲ့သည့် ၂၀၁၇ ခုနှစ် ဒီဇင်ဘာ ၃၀ ရက်တွင် ၉၃၇၀၀၀၊ ဇန်န၀ါရီ ၉ ရက်တွင် ၉၃၈၀၀၀ ၀န်းကျင်ဖြစ်ပေါ်နေသော ပြည်တွင်းရွှေဈေးသည် ဇန်န၀ါရီ ၂၅ ရက်တွင် ၉၅၅၇၀၀ အထိ မြင့်တက်ခဲ့ကာ ဖေဖော်ဝါရီ ၁၅ ရက်တွင် ၉၄၄၆၀၀၊ မတ် ၇ ရက်တွင် ၉၄၁၂၀၀၊ မတ် ၃၁ ရက်တွင် ၉၃၉၅၀၀၊ ဧပြီ ၁၉ ရက်တွင် ၉၄၈၄၀၀၊ မေ ၉ ရက်တွင်  ကျပ်  ၉၃၈၀၀၀၊ ဇွန် ၆ ရက်တွင် ၉၃၂၉၀၀၊ ဇူလိုင် ၃ ရက်တွင် ၉၃၄၁၀၀၊ ဇူလိုင် ၂၆ ရက်တွင် ကျပ်  ၉၅၀၅၀၀၊ သြဂုတ် ၂၈ ရက်တွင် ၉၈၅၀၀၀ ကျပ်၊ စက်တင်ဘာ ၁၈ ရက်တွင် ကျပ် ၁၀၀၅၅၀၀ ဖြင့် ဈေးကွက်သမိုင်းတစ်လျှောက် အမြင့်ဆုံးဈေးအဖြစ် စံချိန်သစ်ဖြစ်ပေါ်ခဲ့သည်။

ပြီးခဲ့သည့်သုံးလက ရွှေဈေးကို ပြန်ကြည့်ပါက ဇွန်လအတွင်း ပြည်တွင်းရွှေဈေး အနိမ့်ဆုံးဈေးနှုန်း ကျပ် ၉၃၁၇၀၀ (ဇွန် ၅ ရက်)၊ အမြင့်ဆုံးဈေးနှုန်း ကျပ် ၉၃၉၅၀၀ (ဇွန် ၁၅ ရက်)၊ ဇူလိုင်လအတွင်း ပြည်တွင်း ရွှေဈေး အနိမ့်ဆုံးနှုန်း ကျပ်  ၉၃၄၁၀၀ ( ဇူလိုင် ၃ ရက်)၊ အမြင့်ဆုံးနှုန်း ကျပ် ၉၅၀၅၀၀ (ဇူလိုင် ၂၆ ရက်)၊ သြဂုတ်လအတွင်း ပြည်တွင်းရွှေဈေးနှုန်း အနိမ့်ဆုံးနှုန်း ကျပ် ၉၄၇၃၀၀ (သြဂုတ် ၆ ရက်)၊ အမြင့်ဆုံးနှုန်း ကျပ် ၉၈၅၀၀၀ (သြဂုတ် ၂၈ ရက်)တို့ ဖြစ်သည်။

ကမ္ဘာ့ရွှေဈေးနှုန်းကို ပြန်ကြည့်ပါက  ၂၀၁၇ ခုနှစ်ဧပြီလမှစ၍ အတက်အဆင်း ကြမ်းလျက်ရှိပြီး လတစ်လအတွင်း အမြင့်ဆုံးနှင့် အနိမ့်ဆုံးနှုန်းသည် ဒေါ်လာ ၃၀ ခန့်မှ ဒေါ်လာ ၇၀ ခန့်အထိ ကွာခြားခဲ့သည်။ လ အလိုက်ဖြစ်ပေါ်ခဲ့သော အနိမ့်ဆုံးနှင့်အမြင့်ဆုံး ကမ္ဘာ့ရွှေဈေးနှုန်းများမှာ ဇန်န၀ါရီတွင် ၁၃၁၀-၁၃၆၄ ဒေါ်လာ၊ ဖေဖော်ဝါရီတွင် ၁၃၁၇-၁၃၄၇ ဒေါ်လာ၊ မတ်တွင် ၁၃၁၂-၁၃၅၅ ဒေါ်လာ၊ ဧပြီတွင် ၁၃၂၃ -၁၃၅၄၊ မေ တွင် ၁၂၈၈-၁၃၁၉၊ ဇွန်တွင် ၁၂၅၂- ၁၂၉၉၊ ဇူလိုင်တွင် ၁၂၁၁-၁၂၅၈၊ သြဂုတ် ၁၁၇၄- ၁၂၂၁ ဒေါ်လာဝန်းကျင်ဖြစ်ပေါ်ခဲ့ပြီး ကွာ ဟချက်ဒေါ်လာ ၃၀ ၀န်းကျင်မှ ၅၀ ကျော် အထိရှိခဲ့သည်။ ကမ္ဘာ့ရွှေဈေးသည် ဇွန်လ ဆန်းမှစ၍ အကျပိုင်းသို့ရောက်လာပြီး  သြဂုတ်လလယ်တွင် ၁၁၇၄ ဒေါ် လာဝန်းကျင် အထိကျဆင်းခဲ့ကာ သြဂုတ် ၃၁ ရက်တွင် ၁၂၀၆ ဒေါ်လာ၊ စက်တင်ဘာ ၁၈ ရက်တွင် ၁၁၉၉ ဒေါ်လာဝန်းကျင် ဖြစ်ပေါ်ခဲ့သည်။

၁၉၈၈ ခုနှစ်မှ ၂၀၁၇ ခုနှစ်အထိ မြန်မာနိုင်ငံတွင် နိုင်ငံခြားရင်းနှီးမြှုပ်နှံမှု ပမာဏ ဒေါ်လာ ၇၆ ဘီလျံကျော် ခွင့်ပြုထားပြီး လက်ရှိလုပ်ငန်း လည်ပတ်နေသည့် ပမာဏ ဒေါ်လာဘီလျံ ၆၀ ကျော်ရှိသော်လည်း အမှန်ဝင်ရောက်မှုမှာ ဒေါ်လာ၂၆ ဘီလျံကျော်သာရှိကြောင်း သိရ

ရန်ကုန်မြို့တွင် ဆောင်ရွက်နေသည့် ကုန်ထုတ်လုပ်မှု လုပ်ငန်းခွင်ကို တွေ့ရစဉ် (ဓာတ်ပုံ-မင်းသီဟဇော်)

၁၉၈၈ ခုနှစ်မှ ၂၀၁၇ ခုနှစ်အထိ မြန်မာနိုင်ငံအတွင်းသို့ နိုင်ငံခြား ရင်းနှီးမြှုပ်နှံမှုပမာဏ ဒေါ်လာ ၇၆ ဘီလျံအထိ ခွင့်ပြုထားပြီး လက်ရှိလုပ်ငန်း လည်ပတ်နေသည့် ပမာဏ ဒေါ်လာဘီလျံ  ၆၀ ကျော်ရှိသော်လည်း အမှန်ဝင်ရောက်မှုမှာ ဒေါ်လာ ၂၆ ဘီလျံကျော် သာရှိကြောင်း နိုင်ငံခြားရင်းနှီးမြှုပ်နှံမှု အမှန်ဝင်ရောက်မှု (International Investment Position) အခြေအနေ စာရင်းအရ သိရသည်။

“မြန်မာနိုင်ငံရဲ့ FDI Actual စာရင်းတွေ အနေအထားကိုကြည့်ရင် Transaction အပိုင်းကိုကြည့်ရင် ၄ ဘီလျံတို့ ၃ ဒသမ ၅ ဘီလျံတို့ နှစ်အလိုက်မှာ Actual စာရင်းတွေ ပိုတက်လာတယ်။ စုစုပေါင်းဆိုရင် ၂၆ ဘီလျံရှိတယ်။ ဒါက Permit နဲ့တော့ ချိန်ထိုးလို့မရဘူး။ Exisiting နဲ့ဆိုရမယ်။ Exisiting က ၆၀ဘီလျံကျော်ရှိတယ်။ ဘာလို့လဲဆိုရင် ဥပမာ- စွမ်းအင်စီမံကိန်းတွေ ဆိုပါတော့။ သူက စမ်းသပ်ကာလမှာတင် ပျက်သွားတာတွေ ရှိတယ်လေ။ ဆိုတော့ ပါမစ်ပြန်အပ်တဲ့ အပိုင်းတွေရှိတယ်။ တချို့လည်း မအပ်သေးတာတွေရှိတယ်။ ဆိုတော့ Actual ၀င်တာက ၂၆ ဘီ လျံကျော်ရှိတယ်။ တစ်နှစ်ချင်း ၀င်တာကို ကြည့်ရင် ၂၀၁၅၊ ၂၀၁၆၊ ၂၀၁၇ က ၃ ဒသမ ၅ ဘီလျံနဲ့ အထက်တွေချည်း ပုံမှန်ဝင်နေတယ်” ဟု ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနမှ တာဝန်ရှိသူ တစ်ဦးက ပြောကြားခဲ့သည်။

နိုင်ငံတစ်နိုင်ငံတွင် နိုင်ငံခြားရင်းနှီးမြှုပ်နှံမှု ၀င်ရောက်မှု အခြေအနေမှာ အရေးကြီးသည့်အတွက် ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန အနေဖြင့် နိုင်ငံတကာ အဖွဲ့အစည်းများဖြစ်သည့် နိုင်ငံတကာ ငွေကြေးရန်ပုံငွေအဖွဲ့ (IMF) နှင့် EU-ASEAN Compass Program တို့နှင့်ပူးပေါင်းပြီး Pilot Survey ကို ၂၀၁၇ ခုနှစ်အတွင်း ဆောင်ရွက်ခဲ့ပြီး FDI Annual Survey ကိုကောက်ယူနိုင်ခဲ့ကာ၂၀၁၈ ခုနှစ်အတွင်း နိုင်ငံတကာ စံနှုန်းများနှင့်အညီ ကိန်းဂဏာန်းများကို ထုတ်ပြန်နိုင်ခဲ့ခြင်း ဖြစ်ကြောင်း သိရသည်။

အမှန်ဝင်ရောက်ခဲ့သည့် ရင်းနှီးမြှုပ်နှံမှု အခြေအနေကို လေ့လာကြည့်ပါက ရေနံနှင့် သဘာဝဓာတ်ငွေ့ ကဏ္ဍတွင် ဒေါ်လာ ၁၀၃၇၄ ဒသမ ၈၈ သန်းရှိပြီး စုစုပေါင်း ရင်းနှီးမြှုပ်နှံမှု၏ ရာခိုင်နှုန်း ၄၀ နီးပါးရှိသည်။ တယ်လီကွန်းကဏ္ဍတွင် ဒေါ်လာ ၄၄၃၀ ဒသမ၂၃ သန်းဖြင့် စုစုပေါင်း ရင်းနှီးမြှုပ်နှံမှု၏ ၁၆ ဒသမ ၈၁ ရာခိုင်နှုန်း၊ ကုန်ထုတ်လုပ်မှု ကဏ္ဍတွင် ဒေါ်လာ ၂၈၁၂ ဒသမ ၀၇ သန်းဖြင့် စုစုပေါင်း၏ ၁၀ ဒသမ ၆၇ ရာခိုင်နှုန်းရှိသည်။

Power Generation ကဏ္ဍတွင် ဒေါ်လာ ၁၇၁၈ ဒသမ ၆၀ သန်းဖြင့် စုစုပေါင်း ရင်းနှီးမြှုပ်နှံမှု၏ ၆ ဒသမ ၅၂ ရာခိုင်နှုန်း၊ ဘဏ်လုပ်ငန်း ကဏ္ဍတွင် ဒေါ်လာ ၁၃၇၈ သန်းဖြင့်  စုစုပေါင်း ရင်းနှီးမြှုပ်နှံမှု၏ ၅ ဒသမ ၂၃ ရာခိုင်နှုန်း၊ ဟိုတယ်ကဏ္ဍတွင် ဒေါ်လာ ၉၅၈ ဒသမ ၇၉ သန်းဖြင့် စုစုပေါင်း ရင်းနှီးမြှုပ်နှံမှု၏ ၃ ဒသမ ၆၄ ရာခိုင်နှုန်း၊ Services excl. Banking ကဏ္ဍတွင် ဒေါ်လာ ၉၄၆ ဒသမ ၈၄ သန်းဖြင့် စုစုပေါင်းရင်း နှီးမြှုပ်နှံမှု၏ ၃ ဒသမ ၅၉ ရာခိုင်နှုန်း၊ အိမ်ခြံမြေကဏ္ဍတွင် ဒေါ်လာ ၅၃ ၈ဒသမ ၅၅ သန်းဖြင့် စုစုပေါင်း ရင်းနှီးမြှုပ်နှံမှု၏ ၂ ဒသမ ၀၄ ရာခိုင်နှုန်း၊ သားငါးကဏ္ဍတွင် ဒေါ်လာ ၂၃၅ ဒသမ ၃၂ သန်းဖြင့် စုစုပေါင်း၏ ၀ ဒသမ ၈၉ ရာခိုင်နှုန်းရှိကြောင်း အစီရင်ခံစာတွင် ဖော်ပြထားသည်။

Financial Services excl.banks တွင် ဒေါ်လာ ၁၉၃ ဒသမ ၉၃ သန်းဖြင့် စုစုပေါင်း ရင်းနှီးမြှုပ်နှံမှု၏ ၀ ဒသမ ၇၄ ရာခိုင်နှုန်း၊ လေဆိပ်နှင့် လေဆိပ်ဝန်ဆောင်မှု လုပ်ငန်းကဏ္ဍတွင် ဒေါ်လာ ၅၀ ဒသမ ၈၃ သန်းဖြင့် စုစုပေါင်း ရင်းနှီးမြှုပ်နှံမှု၏ ၀ ဒသမ ၁၉ ရာခိုင်နှုန်း၊ ဆောက်လုပ်ရေး ကဏ္ဍတွင် ဒေါ် လာ ၄၇ ဒသမ ၂၀ သန်းဖြင့် စုစုပေါင်း ရင်းနှီးမြှုပ်နှံမှု၏ ၀ ဒသမ ၁၈ ရာခိုင်နှုန်း၊ စက်မှုဇုန် တည်ဆောက်ရေး ကဏ္ဍ၌ ဒေါ်လာ ၄၃ ဒသမ ၆၁ သန်းဖြင့် စုစုပေါင်း၏ ၀ ဒသမ ၁၇ ရာခိုင်နှုန်း၊ လယ်ယာကဏ္ဍတွင် ဒေါ်လာ ခြောက်သန်းကျော် ၀င်ရောက်ထားသည်။

 

၂၀၁၇-၂၀၁၈ ဘဏ္ဍာနှစ်တွင် ပို့ကုန်တန်ဖိုး ဒေါ်လာ ၁၅ ဘီလျံရှိ၍ ယခင်နှစ်ထက် တိုးလာပြီး ကုန်သွယ်မှုလိုငွေ ကျဆင်းကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ရှင်းလင်း

၂၀၁၇-၂၀၁၈ ဘဏ္ဍာနှစ်တွင် ပို့ကုန်တန်ဖိုး အမေရိကန်ဒေါ်လာ ၁၅ လီလျံရှိ၍ ယမန်နှစ်ထက် တိုးလာပြီး ကုန်သွယ်မှုလိုငွေသည် ၂၀၁၆-၂၀၁၇ ဘဏ္ဍာနှစ်ထက် ကျဆင်းခဲ့ကြောင်း စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန ကိုယ်စား စက်မှုဝန်ကြီးဌာန၊ ပြည်ထောင်စုဝန်ကြီး ဦးခင်မောင်ချိုက ပြောကြားသည်။

နေပြည်တော်၌ စက်တင်ဘာ ၁၀ ရက်က ပြုလုပ်သော ဒုတိယအကြိမ် ပြည်ထောင်စု လွှတ်တော် န၀မပုံမှန် အစည်းအဝေး ၁၉ ရက်မြောက်တွင် ပြည်ထောင်စု စာရင်းစစ်ချုပ်ရုံး၏၂၀၁၆-၂၀၁၇ ဘဏ္ဍာရေးနှစ် စစ်ဆေးတွေ့ရှိချက် အစီရင်ခံစာအပေါ် ပြည်သူ့ ငွေစာရင်း ပူးပေါင်းကော်မတီ၏ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာ အမှတ်စဉ် (၇/၂၀၁၈) နှင့် လွှတ်တော် ကိုယ်စားလှယ်များ၏ ဆွေးနွေးချက်များအပေါ် စီးပွားရေးနှင့် ကူးသန်းရောင်းဝယ်ရေး ၀န်ကြီးဌာနကိုယ်စား စက်မှုဝန်ကြီးဌာန ပြည်ထောင်စုဝန်ကြီး ဦးခင်မောင်ချိုက ရှင်းလင်း ပြောကြားရာတွင် အထက်ပါအတိုင်း ပြောကြားခဲ့ခြင်း ဖြစ်သည်။

“ပို့ကုန် အမယ်တွေကို ပိုမို တိုးချဲ့ခြင်း၊ တင်ပို့တဲ့ နိုင်ငံတွေကို တိုးချဲ့ခြင်း၊ တင်ပို့တဲ့ ပမာဏကို တိုးချဲ့ခြင်းတို့ဖြင့် ပို့ကုန်တိုးမြှင့်ရေးကို ဆောင်ရွက်သွားမှာ ဖြစ်ပါတယ်။ ဒီလို ဆောင်ရွက်ခဲ့တဲ့အတွက် ၂၀၁၆-၂၀၁၇ ဘဏ္ဍာနှစ်မှာ မြန်မာနိုင်ငံရဲ့ ပို့ကုန်တန်ဖိုးဟာ အမေရိကန် ဒေါ်လာ ၁၂ ဘီလျံ ရှိခဲ့ပေမယ့် ၂၀၁၇-၂၀၁၈ ဘဏ္ဍာနှစ်မှာ ပို့ကုန်အမေရိကန် ဒေါ်လာ ၁၅ ဘီလျံသို့ တိုးလာပြီး ကုန်သွယ်မှုလိုငွေဟာ ၂၀၁၆-၂၀၁၇ ဘဏ္ဍာနှစ်မှာ အမေရိကန် ဒေါ်လာ ၅ ဒသမ ၂ ဘီလျံကနေ၂၀၁၇- ၂၀၁၈ ဘဏ္ဍာနှစ်မှာ အမေရိကန် ဒေါ်လာ ၃ ဒသမ ၈ ဘီလျံသို့ ကျဆင်းခဲ့ပါကြောင်းကိုလည်း တင်ပြလိုပါတယ်” ဟု စက်မှုဝန်ကြီးက ပြောကြားသည်။

၂၀၁၁ ခုနှစ်မှ စတင်ခဲ့သည့် ပြုပြင်ပြောင်းလဲမှုများနှင့်အတူ ကုန်သွယ်မှုဆိုင်ရာ ဖြေလျော့ ပြုပြင်ပြောင်းလဲမှုများ ပြုလုပ်ခြင်း၊ မြန်မာနိုင်ငံတော် ဗဟိုဘဏ်မှ နိုင်ငံခြားငွေ လွတ်လပ်စွာ စီးဆင်းခွင့်ပြု၍ ပို့ကုန်တင်ပို့မှ တင်သွင်းနိုင်သည့် စနစ်ကို ပယ်ဖျက်ခဲ့ခြင်း၊ နိုင်ငံတော်၏ တည်ဆောက်ရေး လုပ်ငန်းများအတွက် ရင်းနှီးမြှုပ်နှံမှုနှင့် လုပ်ငန်းသုံးပစ္စည်းများ၊ စက်ယန္တရားများ ပိုမိုတင်သွင်းခဲ့ခြင်း၊ အထူးစီးပွားရေးဇုန် စီမံကိန်းများ အကောင်အထည်ဖော် ဆောင်ရွက်ခြင်း၊ နိုင်ငံခြား ရင်းနှီးမြှုပ်နှံမှုများအတွက် တင်သွင်းမှုများနှင့် ပုဂ္ဂလိကကဏ္ဍ ဖွံ့ဖြိုးတိုးတက်စေရေးအတွက် လွတ်လပ်စွာ တင်သွင်းခွင့်ပြုမှုများအရ သွင်းကုန်တင်သွင်းမှု ပိုမိုလာပြီး ပို့ကုန်နှင့် သွင်းကုန်တိုးတက်မှု အချိုးမညီမျှဘဲ ၂၀၁၂-၂၀၁၃ ဘဏ္ဍာနှစ်မှစ၍ ကုန်သွယ်မှု လိုငွေများ ဖြစ်ပေါ်ခဲ့ကြောင်း ၎င်းက ပြောကြားသည်။

ထို့ပြင် နိုင်ငံတော် တည်ဆောက်ဆဲ ကာလဖြစ်သည့်အတွက် နိုင်ငံတကာမှ ရင်းနှီးမြှုပ်နှံသူများကို ဖိတ်ခေါ်နေသည့် ကာလဖြစ်ပြီး ၀င်ရောက်လာသည့် နိုင်ငံခြား ရင်းနှီးမြှုပ်နှံမှုများမှ လိုအပ်သည့် ကုန်ပစ္စည်းများ တင်သွင်းမှု များပြားနေခြင်းကြောင့် သွင်းကုန်တိုးချဲ့ တင်သွင်းမှုသည်လည်း အခြားသော ဖွံ့ဖြိုးဆဲနိုင်ငံများကဲ့သို့ မဖြစ်မနေ ဆက်လက် ဖြစ်ပေါ်နေမည်ဟု သုံးသပ်ရကြောင်း၊ အထူးစီးပွားရေးဇုန်များသည် ပို့ကုန်တိုးချဲ့ တင်ပို့ နိုင်သလို သွင်းကုန်များကိုလည်း အစားထိုးနိုင်သည်ကို တွေ့ရကြောင်း စက်မှုဝန်ကြီးဌာန ပြည်ထောင်စုဝန်ကြီး ဦးခင်မောင်ချိုက ပြောကြားသည်။

ဆက်လက်ပြီး စက်မှုဝန်ကြီးက ကုန်သွယ်မှု သာမန်စာရင်းအပိုင်းတွင် ကုန်စည်များသာမက ၀န်ဆောင်မှုအပိုင်းသည်လည်း ပါဝင်နေခြင်းကြောင့် နိုင်ငံတော် ၀င်ငွေရရှိသည့် ၀န်ဆောင်မှုလုပ်ငန်းများ ဖြစ်သော ခရီးသွားလုပ်ငန်း၊ လေယာဉ်ဖြတ်သန်းခ၊ လေဆိပ်ရပ်နားခ၊ လေယာဉ်ဆီဖြည့်ခ၊ သင်္ဘောဆိပ်ကမ်း ရပ်နားခ၊ သင်္ဘောဆိပ်ကမ်းများအတွက် ၀င်ထွက်မှုဆိုင်ရာ အခွန်အခများ၊ လေယာဉ်လိုင်းများမှ ပြည်တွင်းပြည်ပ နိုင်ငံခြားသား ခရီးသွားများအတွက် ရရှိမည့် လေယာဉ်ခများ၊ ပြည်ပ အလုပ်အကိုင်များမှ ရရှိမည့် ၀င်ငွေများ စသည်တို့ကို ထည့်သွင်း တွက်ချက်ပါက ကုန်သွယ်မှုလိုငွေကို ပိုမို လျော့ကျစေမည် ဖြစ်ကြောင်း ပြောကြားသည်။