သေနတ်ပစ်အားကစားပြိုင်ပွဲ နောက်ဆုံး နေ့ ပွဲစဉ်များကို သြဂုတ် ၂၆ ရက်တွင်ကျင်းပခဲ့ပြီး မြန်မာကစားသမား ကျော်စွာဝင်း ကြေး တံဆိပ်တစ်ခု ထပ်မံရရှိခဲ့ကြောင်း သိရသည်။

နောက်ဆုံးနေ့အဖြစ် ပွဲစဉ်သုံးပွဲကျင်းပ ရာ မြန်မာအားကစားအဖွဲ့က အမျိုးသား ၁၀ မီတာ လေပစ္စတိုပြိုင်ပွဲတစ်မျိုးတည်းသာ ဝင်ရောက်ယှဉ်ပြိုင်ပြီး ကြေးတံဆိပ်ရရှိခဲ့ခြင်းဖြစ်သည်။

ယင်းပြိုင်ပွဲတွင် အိမ်ရှင်မလေးရှားက ရွှေတံဆိပ်၊ ဗီယက်နမ်က ငွေတံဆိပ်၊ ကျော်စွာဝင်းက ကြေးတံဆိပ်ရရှိခဲ့ပြီး ရွှေတံဆိပ်မျှော်မှန်းထားသည့် နာမည်ကြီးကစားသမား ရဲထွန်းနောင်မှာမူ စတုတ္ထနေရာဖြင့်သာကျေနပ် ခဲ့ရသည်။

ဆီးဂိမ်းစ်သေနတ်ပြိုင်ပွဲအားလုံး ပြီးဆုံးချိန်တွင် မြန်မာသေနတ်ပစ်အဖွဲ့က ရွှေတံဆိပ်တစ်ခုနှင့် ကြေးတံဆိပ်သုံးခုရယူ နိုင်ခဲ့သည်။ ရွှေတံဆိပ်ဆုကို အမျိုးသမီး ၁၀ မီတာ လေပစ္စတိုပြိုင်ပွဲတွင် မေပိုးဝါက ရယူပေးခဲ့ပြီး ကြေးတံဆိပ်ဆုများကိုမူ အမျိုးသား မီတာ ၅၀ ပစ္စတိုပြိုင်ပွဲနှင့် ၁၀ မီတာ လေပစ္စတိုပြိုင်ပွဲတွင် ကျော်စွာဝင်း၊ အမျိုးသားမီတာ ၅၀ ရိုင်ဖယ်ဝမ်းလျားမှောက်ပြိုင်ပွဲတွင် ကောင်းထိုက်တို့က ရယူပေးခဲ့သည်။

ဆုတံဆိပ်ရယူပေးခဲ့သည့် မြန်မာကစားသမားများအား တွေ့ရစဉ် (ဓာတ်ပုံ - ညီညီစိုးညွန့်)

မြန်မာသေနတ်ပစ်အဖွဲ့သည် ၂၀၁၃ ခုနှစ်ပြိုင်ပွဲနောက်ပိုင်း ပထမဆုံး ရွှေတံဆိပ် ပြန်လည်ရရှိခြင်းဖြစ်ပြီး ၂၀၁၅ ပြိုင်ပွဲထက် အောင်မြင်မှုရရှိခဲ့သည်။